Finalizohet shitja e Albtelekom kompanisë turke

[Albo]

Calik duhet të bëjë konsorcium me një kompani me eksperiencë në telekomunikacioneve

Albtelekom, rrezikohet kontrata me turqit

Kompanisë turke i hiqet e drejta e thirrjeve roaming pas privatizimit

Julian Llupo

TIRANË-Turqit e Calik Enerji rrezikojnë kontratën me qeverinë shqiptare nëse nuk plotësojnë dy kushte të rëndësishme: krijimin e një konsorciumi me një kompani që ka pasur një eksperiencë të gjatë në fushën e telekomunikacione. Ndërsa pika e dytë mbetet në dorë të qeverisë shqiptare, pasi ka lidhje me thirrjet roaming. Problemet që kanë dalë gjatë rinegocimit të kontratës janë bërë të ditura nga ministri i Ekonomisë dhe Energjetikës, Genc Ruli, gjatë emisioni televiziv “5 pyetje nga Babaramo” në Vizion Plus. Problemi më i madh për turqit e Calik me kontratën duket se është zgjidhja e të drejtës roaming të brendshëm, që duket se nuk do t’i jepet kompanisë. Heqja e kësaj të drejte i detyron turqit që të realizojnë miliona euro investime, ndërsa përcakton edhe rregullat që operatorët mobilë duhet të realizojnë midis tyre. Sipas burimeve, kjo ka qenë edhe arsyeja që kompania ka kërkuar që shuma e ofruar në tender për blerjen e Albtelekom të jetë 30 milionë euro më e ulët se ajo fillestare. Ndërsa nga ana e saj, Ministria e Ekonomisë, Tregtisë dhe Energjetikës bën të ditur se qeveria nuk ka ndërmend që të lëshojë pe në këtë pikë. Ulja e vlerës së shitjes së kompanisë shtetërore Albtelekom është kundërshtuar edhe nga ana e ministrit të Ekonomisë, Genc Ruli, që ka deklaruar se ky është një kusht i pakontestueshëm. Njëkohësisht, i interesuar me një ofertë më të lartë për blerjen e kompanisë shtetërore Albtelekom është edhe biznesi vendës që ka krijuar një konsorcium, duke ofruar një shumë prej 150 milionë eurosh. Kjo ofertë rezulton të jetë 30 milionë euro më shumë sesa Calik Enerji, për blerjen e 74 për qind të aksioneve të Albtelekom sh.a.

Privatizimi
Privatizimi i gjigantit të telefonisë fikse nisi me qeverisjen socialiste, e cila zgjodhi turqit e Calik Enerji në një tender të hapur ndërkombëtar me një shumë fituese prej 120 milionë euro. Opozita e atëhershme dhe mazhoranca e sotme e sulmoi ashpër këtë privatizim, duke e vlerësuar si të dështuar dhe u zotua se nuk do ta ratifikonte marrëveshjen në parlament dhe kështu bëri. Por pas vizitës së kryeministrit Berisha në Turqi, qëndrimi i qeverisë ndryshoi. Nëse negociatat midis kompanisë turke dhe qeverisë shqiptare mbyllen pa sukses, shpallja e një tenderi tjetër ndërkombëtar, nga ana e qeverisë, shtyn privatizimin deri në fund të vitit 2007. Kjo është edhe periudha më e afërt që mund të realizohet privatizimi i kompanisë së telefonisë fikse që ka gëzon edhe licencën e operatorit të tretë Eagle Mobile.


“Albtelekom”
Kompania e telefonisë fikse, “Albtelekom”, regjistron rreth 230 mijë abonentë, ndërkohë që ka potencial për 600 deri në 800 mijë të tillë. Asetet e saj në të gjithë territorin e vendit kapin shifrën e 1,2 miliardë eurove, ndërkohë që shoqëria posedon licencën e operatorit të tretë celular, “Eagle Mobile”. Gjatë vitit të shkuar kompania rezultoi me një fitim neto prej 17 milionë dollarësh, ndërkohë që fitimi i pritshëm për këtë vit është 19 milionë dollarë dhe me 140 milionë dollarë të ardhura.

Kontrata
Pas një tenderi të mbyllur për mediet, me datë 23 maj të vitit të kaluar, qeveria shqiptare, atë kohë socialiste, firmosi një kontratë me konsorciumin turk, për të shitur 76 për qind të kompanisë shtetërore Albtelekom. 76 për qind e aksioneve do të shiteshin për shumën e 120 milionë eurove. Anastas Angjeli, ministri i Ekonomisë së asaj kohe, firmosi me Calik Enerji Telekomunikasyon një konsorcium, i përbërë nga Calik Enerji dhe Turk Telekom, sipas tenderit ndërkombëtar të fituar në maj të 2005-ës. Calik Enerji ishte kompania e vetme ndërkombëtare që bëri një ofertë për të blerë aksione të Albtelekomit. Dhjetë kompani të tjera, të cilat vinin nga shtete të tilla, si Sllovenia, Koreja, SHBA-ja, Kuvajti dhe Irlanda u shfaqën të interesuara për kompaninë e telefonisë, por nuk dhanë ofertë.

Calik
Drejtues të kompanisë turke “Calik Enerji”, kanë deklaruar se nuk do të tërhiqet nga kontrata e bërë me qeverinë e fundit socialiste për blerjen e Albtelekom. Në një prononcim të bërë në fund të muajit gusht, Ahmet Calik, president i kompanisë, u shpreh se problemet me kontratën nuk kanë të bëjnë me Calik Enerji, po me qeverinë shqiptare. Ahmet Calik, i cili ka firmosur kontratën e shitjes me ish-ministrin e Ekonomisë, Anastas Angjeli, është shprehur se kompani Calik është shpallur fituese e tenderit. Sipas Calik, raporti hetimor i Deloitte &Touche, ka përfundime të pavërteta. “Në lidhje me këtë çështje dhe me një raport të Deloitte & Touche, ne nuk kemi asnjë të dhënë zyrtare. Për sa i përket kontratës së shitjes së Albtelekom, është një pikë ku pengesë ka pasur qeveria shqiptare dhe jo kompania Calik. Ajo është fituesja e tenderit që u zhvillua nga shteti juaj dhe, për momentin, po presim rezultatet e kontratës së nënshkruar mes dy palëve”, është shprehur Ahmet Calik.

Shekulli

[ClaY_MorE]

Biznesi Shqiptar rrit ofertën për kompanine Albtelekom

Nëse kompania turke dështon në negociata me qeverinë shqiptare, biznesi vendës ka deklaruar se do të ofrojë 200 milionë euro për kompaninë e vetme të telefonisë turke.

Oferta është bërë publike nga ana e kryetarit të Dhomës së Tregtisë dhe Industrisë së Tiranës, Luan Bregasi.

Për negocimin e kontratës qeveria shqiptare ka vëne disa kushte për kompaninë, disa prej të cilave nuk mund të anashkalohen.

Kushtet janë të lidhura ngushtë me të drejtën romin për kompaninë e tretë celulare dhe njëkohësisht edhe për plotësimin e kushteve si investitor strategjik nga ana e Calik Enerji Telekomunikasyon A.S. Kjo kompani detyrohet që të realizojë një konsorcium pas largimit të Telekomit Turk nga ky grup.

Oferta që vjen nga biznesi vendës është 25 për qind më e lartë sesa oferta që turqit e Calik Enerji kanë dhënë për blerjen e 74 për qind të aksioneve të kompanisë shtetërore të telefonisë fikse Albtelekom sh.a.

Sipas Luan Bregasit, qeveria duhet ta shohë më interes të veçantë këtë ofertë pasi, përveç se po ofrohen 80 milionë euro më shumë sesa janë dhënë deri më tani për Albtelekomin, nga ana strategjike njëra prej kompanive të telekomunikacionit do të mund të kontrollohet nga biznesi shqiptar; këtë gjë e nxisin dhe e aplikojnë mjaft shtete të tjera.

Duke hyrë më në detaje të këtij projekti, mësojmë se konsorciumi i bizneseve shqiptare përbën 80 për qind të aksioneve të kompanisë së krijuar, ndërkohë që pjesa tjetër, ajo prej 20 për qind, mund t’i takojë një kompanie amerikane me eksperiencë në menaxhimin dhe teknologjinë e telekomunikacioni.


A1TV

[smoki]

Ndërmarrja në prag shitje, shpall 2 tendera për investime gjigante në rrjet!
Qeveria shqiptare është gati t'i paguajë 13 milionë euro të buxhetit të shtetit, në dy tendera që priten të zhvillohen në Albtelekom. Dokumentacioni prezantues i tenderave që posedohet nga redaksia e "Shekullit", tregon se zyrtarisht dy tenderat, për të cilat aktualisht mungon transparenca, janë justifikuar për blerje pajisjesh dhe zgjerim rrjeti në Albtelekom(!). Kujtojmë se Albtelekom është një ndërmarrje në proces privatizimi. 13 milionë euro, është rreth 13 për qind e shumës me të cilën Albtelekom pritet të shitet. Asnjë logjikë financiare biznesi nuk mund ta kapë arsyen, se pse duhen harxhuar plot 13 milionë euro në një ndërmarrje që është gati t'i dorëzohet blerësit privat.
***

Lajmi merr përmasat e skandalit, nëse futesh në brendësi të dokumentacionit prezantues të dy tenderave. Njëri prej tenderave (Ref.No. of Procurment: 518.00-7-13/ 11/06 ADSL) njofton se Albtelekom shpall tenderin ndërkombëtar, me fond limit 10 milionë euro, për "zgjerimin e network-ut ADSL". Ekspertë të tregut të Telekomunikacioneve të kontaktuar nga "Shekulli" për sqarime, na shpjeguan se në termat profesionalë, kjo blerje do të thotë "blerje portash". Llogaritë e Albtelekom të mahnitin! Aktualisht, një "portë" blihet me pakicë për maksimalisht 50 dollarë copa. Nëse kalon numrin e "portave" të blera mbi 20, çmimi ulet automatikisht. Kurse shifrat e shpallur nga Albtele-kom, tregojnë se ndërmarrja shtetërore, çelësat e së cilës janë gati të dorëzohen, kërkon të blejë 200 mijë "porta" të tilla. Dhe çmimi për copë, jo vetëm që nuk ulet, por është më i lartë se ai i pakicës. Albtelekom, me paratë e taksapaguesve po kërkon ta blejë një portë me çmim 50 euro copa!

***

Tenderi tjetër (me Ref.No.of Procurement518.00-7- 35/12/06), shpall nevojën e ndërmarrjes në shitje për të zgjeruar edhe rrjetin TR3 me teknologji "soft-switch". Ky tender i dytë, ka fondin limit 2 milionë e 750 mijë euro. Gjithsej, dy tenderat kapin shifrën rekord 12 milion e 750 mijë euro. Të gjitha para të buxhetit të shtetit, të gjitha para të justifikuara si investime. Investime në një ndërmarrje që thuajse është shitur! Çdo taksapagues shqiptar ka të drejtë të pyes: Përse po shpenzohen këto para? Çfarë kuptimi ka ky investim gjigant? A bëhet fjalë për një investim apo një tentativë të re vjedhje fondesh publike?

***

Një tjetër dyshim shtohet nëse vëren datat e caktuara për të zhvilluar dy tenderat. Dokumentacioni që posedon redaksia tregon se tentativa e parë për zhvillimin e dy tenderave daton pak ditë para zgjedhjeve lokale të janarit. Pas shtyrjes së datës së zgjedhjeve për në shkurt, çuditërisht u shty edhe data e zhvillimit të këtyre dy tenderave për në shkurt (tre ditë para zgjedhjeve). Rastësi?

[Humdinger]

Albtelekom: Berisha e dinte që duheshin 50 mijë porta


Shekulli
05-02-2007

Të dhënat mbi skandalin e tenderave të Albtelekom, bërë publik gjatë këtyre ditëve nga gazeta "Shekulli", tashmë konfirmohen edhe me anë të dokumentave zyrtare. Këto dokumenta që janë siguruar nga gazeta, konfirmojnë faktin se kryeministri Sali Berisha ka qenë në dijeni të plotë, se investimi për blerjen e portave për shërbimin ADSL në Albtelekom, nuk mund të përfshinte një numër më të madh se 50 mijë porta, pasi kaq ishte edhe kapaciteti i Albtelekom. Në një MEMO që këshilltari për Telekomunikacionet, Pjerin Marku i dërgon kryeministrit Berisha, më datë 07.08.2006, i bën me dije se: "Përsa i përket investimeve për blerjen e portave për shërbimin ADSL, mendoj se sasia e parë mund të jetë rreth 50 000 porta dhe me plotësimin e 2/3 të kësaj sasie, të përsëritej blerja edhe për 50 000 të tjera". Pra, në këtë MEMO që këshilltari i Kabinetit i ka dërguar Kryeministrit, është bërë e qartë, se aktualisht Albtelekom ka kapacitet për të montuar vetëm 50 mijë porta dhe jo 200 mijë, sa parashikohet që të blihen në tenderin prej 10 milionë eurosh. Sipas vlerësimit të ekspertëve të kësaj fushe, "një blerje pjesë-pjesë është shumë logjike, sepse kjo teknologji blihet me module që shtohen pa problem në një shasi, pra, ti mund të fillosh me 10,000 porta dhe më pas të shkosh edhe deri në 500,000 porta, por çfarë kuptimi ka që t'i blen 200,000 porta menjëherë, për të cilat nuk ke mundësi fizike t'i instalosh brenda një apo dy vjetësh, gjë që do të sillte humbje financiare nga amortizimi, por edhe rrezikun e zëvendësimit nga teknologji më moderne".
Ekspertë të tregut të telekomunikacioneve në Tiranë, kanë sqaruar dje të dhënat teknike të skandalit me tenderat e Albtelekom. "Shekulli" botoi gjatë këtyre ditëve të dhënat për tentativën për të realizuar 13 milionë euro investime, në një ndërmarrje që është thuajse e shitur me çmim tashmë të përcaktuar. Një investim prej 13 milionë eurosh duhet t'i shtohej çmimit të shitjes, ndërkohë që ky akt, hedh dyshime për afera të tjera mbi çmimin e shitjes së kësaj kompania shtetërore. Analiza e dhënë nga specialistët e kësaj fushe për "Shekullin", konfirmuar tashmë edhe nga një MEMO që këshilltari, Pjerin Marku, i ka dërguar kryeministrit Berisha 6 muaj më parë, nxjerr në dritë një aferë të pastër korruptive, për vjedhjen e miliona dollarëve.

Prova në fushën teknike, që flet qartë për mundësinë e abuzimeve në shifra të mëdha me këto para të qytetarëve shqiptarë, është fakti se Albtelekom praktikisht, nuk ka mundësi t'u ofrojë klientëve 200 mijë porta. Tenderi do të zhvillohet për këtë numër, pra 200 mijë porta, por në të vërtetë do të vijnë vetëm 50 mijë të tilla, pasi për aq ka kapacitet Albtelekomi. Sot, Albtelekomi ka afërsisht 250 mijë abonentë, ndërsa Tirana duhet të ketë rreth 100 mijë abonentë. Po te pyesësh edhe teknikët më të thjeshtë të Albtelekomit, ata e kanë të qartë se nuk i duhen kujt 200 mijë porta ADSL. Shpjegimi teknik bazohet në atë që në gjuhën profesionale, quhen "teknikat e lidhjes së konsumatorit fundor". Skema është e tillë: Nëse marrim zonën e "Ali Demit" kur dikush kërkon numër telefon Albtelekom, rëndom të thonë se "nuk ka porta", por po të japësh një ryshfet të vogël, të thonë se "ka një zgjidhje", e cila është pikërisht kjo: Nëse ndërmjet postës dhe një pallati ka një linjë fizike (dhe s'ka më të tjera), tekniku vendos një muks, (emër teknik aparature) dhe një demuks nga ana tjetër, dhe në të njëjtën linjë fizike, ai mund të shfrytëzojë deri në katër linja. Pra, një linjë fizike, mund të përdoret lirshëm për minimalisht 4 abonentë. Kjo do të thotë, se mbi 30% deri në 40% e portave për Telekomin në të gjithë Shqipërinë, janë të tilla, pra në këto lloje lidhjesh.

Përveç kësaj, ADSL ka dhe një kërkese tjetër specifike, që linja nga centrali e deri tek abonenti, nuk duhet të jetë më e gjatë sa 4 km dhe duhet të ketë një cilësi shumë të lartë, (të mos ketë zhurma etj). Nëse kalon kjo distancë, abonenti nuk mund të ketë këtë shërbim nga Albtelekomi. Kjo do të thotë, që 20% e abonentëve të Albtelekomit, (mund të jenë edhe më shumë, sepse vetëm Tirana, Durrësi, Vlora, Shkodra, Elbasani kanë cilësi të mirë, pjesa tjetër ka linja të dobëta) me instalimin e sistemit ADSL, e kanë të pamundur komunikimin me centralin. Pra, po llogarisim një minimum prej 20% të abonentëve të humbur në këtë mënyrë, duke shtuar dhe 30% e atyre abonentëve të kategorisë "katër lidhje në një linjë fizike", i bie që Albtelekom, teknikisht ka mundësi vetëm për 120 mijë porta. Atëherë, përse i duhen Albtelekomit 200 mijë porta? 80 mijë të tjera, ku do të përdoren, për çfarë do të shërbejnë? "Në këtë segment të aferës luhen miliona, sepse kush do të jetë personi që do të kontrollojë teknikisht sa porta erdhën në Shqipëri dhe sa të tilla u instaluan? Këto porta nuk do të shfrytëzohen menjëherë, sepse edhe instalimi i tyre kërkon kohën e tyre",- tha një nga ekspertët e pyetur dje nga "Shekulli", duke shtuar se: "E vetmja mundësi që Telekomi të shpërndajë Internet, është ADSL".

Liberalizimi i tregut

Diçka tjetër që përmendet në MEMO-n që këshilltari Marku i dërgon Kryeministrit, është liberalizimi i LLU-së (Local Loop Unbundling). Nëse LLU është liberalizuar vërtet, atëherë do të kishim një situatë ku Albtelecom duhet të lejojë të gjitha ISP-të e tjera të shfrytëzojnë abonentët e saj, për t'u shitur shërbime interneti nëpërmjet po kësaj teknologjie ADSL. Por, nëse Albtelecom instalon 200,000 porta, atëherë do të kishim krijimin e një monopoli të ri, sepse nuk do kishte më vend për të tjerët. Ndërsa ky do të ishte një monopol që do t'u shitej të huajve për pesë lekë.

Qeveria ka organizuar disa takime me ISP-të në shtator 2006, dhe u ka thënë se LLU

është liberalizuar dhe se kushdo nga ju mund të shkojë të instalojë ADSL-në e vet në Albtelecom, por në të vërtetë, kjo histori u harrua nga po këta. Pra, duket qartë se ky është një tender që nuk ka asnjë logjikë tregu, bie ndesh me të gjitha programet e zhvillimit të telekomunikacioneve, të bëra nga vetë qeveria, bie ndesh me rregulloret dhe ligjet e Telekomunikacionit për konkurrencë të hapur në treg dhe njëkohësisht me mundësitë teknike reale për të realizuar. Pra, çfarë është? Është thjesht, një mundësi shumë e mirë për të bërë para` sa hap e mbyll sytë! Sidomos, kur Albtelecom është kthyer në një bunker që nuk merr asnjë informacion se si menaxhohet kjo pasuri kombëtare, dhe si përdoren paratë që fitojnë taksapaguesit nga kjo veprimtari.

Enigma e investimit 13 milionë euro

Ndërmarrja në prag shitje, shpall 2 tendera për investime gjigante në rrjet!

Qeveria shqiptare është gati t'i paguajë 13 milionë euro të buxhetit të shtetit, në dy tendera që priten të zhvillohen në Albtelekom. Dokumentacioni prezantues i tenderave që posedohet nga redaksia e "Shekullit", tregon se zyrtarisht dy tenderat, për të cilat aktualisht mungon transparenca, janë justifikuar për blerje pajisjesh dhe zgjerim rrjeti në Albtelekom(!). Kujtojmë se Albtelekom është një ndërmarrje në proces privatizimi. 13 milionë euro, është rreth 13 për qind e shumës me të cilën Albtelekom pritet të shitet. Asnjë logjikë financiare biznesi nuk mund ta kapë arsyen, se pse duhen harxhuar plot 13 milionë euro në një ndërmarrje që është gati t'i dorëzohet blerësit privat

Çmimi i një porte, 3 herë më i lartë se tregu

Operues në tregun e telekomunikimit, shpjeguan dje për "Shekullin" se përdorimi i 10 milionë eurove për blerjen e 200 mijë "portave", është një skandal më vete. Çmimi i bie 50 euro për "portë". Nëqoftë se blejmë një portë ADSL në treg, maksimumi i çmimit për një portë të vetme është 50 dollarë dhe ky është çmimi më i shtrenjtë në botë për portën e cilësisë më të mirë dhe që vlen vetëm për shitjet me pakicë. Aktualisht me këtë çmim shet kompania , "Far Aëay" (më e shtrenjta e njohur në botë për këtë çështje). Telekomi grek, FranctelekomiBritisctelekom e kanë marrë këtëteknologji nga kjo kompani. Nëqoftëse ti kërkon të blesh 200 mijë portanë bazë të ligjeve të këtij tregu çmimi shkon të paktën tre herë më poshtë se blerja me pakicë, pra çmimi i një porte për një sasi të tillë gjigante do të ishte maksimalisht 20 dollarë, rreth 16 euro... Një llogari e thjeshtë: 200 mijë porta ADSL, edhe sikur t'i duheshin me domosdo Albtelekomit, maksimalisht mund t'i kushtojnë shqiptarëve rreth 3 milion e 200 mijë euro. Ku shkon diferenca e krijuar, që është mbi 6 milionë euro?

MEMO

Për: Kryeministrin, zotin Sali Berisha

Nga: Kabineti (Pjerin Marku)

Çështja: Albtelekom

Data: 07.08.2006

Në lidhje me ecurinë e reformës "Internet për të gjithë", ju raportoj se pjesa më e madhe e vendimeve nga ana e Albtelekomit janë marrë. Është marrë vendimi për blerjen e 1 Gbsec, e cila do të sjellë pjesën më të madhe të uljes së çmimit. Gjithashtu, është marrë vendimi për liberalizimin e LLU ( përdorimi i kabllove të abonentit, për shpërndarjen e abonentit në bandë të gjerë).

Gjithashtu është vendosur çmimi 2800 lekë në muaj për shërbimin ADSL, i cili për momentin është i justifikueshëm (nuk është zhvilluar tenderi për 1 Gbsec, nuk ka mjaftueshmërisht pajisje dhe aftësi teknike për kërkesë të lartë), por me t'u lidhur kontrata për sasinë e kërkuar të Internetit dhe blerjen e portave, do të duhet të rishihet (ulet).

Ndërkohë që ERT akoma nuk ka konkluduar për frekuencat 3.5 GHz.

Do të jetë e rëndësishme që kontrata e re që do të përpilohet me blerësin e ri të Albtelekom, të pasqyrojë këtë reformë për sa i përket përdorimit të fibrës nënujore optike, si dhe liberalizimit të LLU-së. Gjithashtu, do të duhet të pasqyrohet edhe tendenca drejt kostos dhe çmimit të internetit për operatorët e tjerë (pasi Albtelekom shfrytëzon kurrizoren nënujore, e cila është pasuri kombëtare). Për sa i përket "Çmimit të referencës" së internetit që propozohej në materialin e Ministrisë së Punëve Publike, Transportit dhe të Telekomunikacionit, mendoj se është në kundërshtim me reformën që kemi marrë për internetin. Tregu dhe konkurrenca do të ulnin çmimin më tepër sesa çmimi i referencës që propozon Ministria. Të vendosësh çmim reference (sidomos në ato nivele që propozohen) do të thotë të pengosh uljen e çmimit, të cilin e realizon reforma e nisur.Përsa i përket investimeve për blerjen e portave për shërbimin ADSL, mendoj se sasia e parë mund të jetë rreth 50 000 porta dhe me plotësimin e 2/3 të kësaj sasie, të përsëritej blerja edhe për 50 000 të tjera. Albtelekomi do të ketë nevojë urgjente për përmirësimin e teknologjisë së shpërndarjes dhe do të duhet që të investojë më shumë në rrjete. Teknologjia e fibrave optike, do të duhet të zëvendësojë teknologjinë e telave të bakrit, jo vetëm se është më e lirë, por edhe se është e aftë që të realizojë pafundësisht më shumë shërbime, telefonike, audio, video edhe të dhënash me një cilësi shumë të lartë. Albtelekomi do të duhet që të investojë në mbulimin e të gjithë Shqipërisë me rrjet, pasi aktualisht ka shumë vende që nuk ka mbulim dhe kjo, do të jetë një pengesë në shtrirjen e internetit në të gjithë shkollat dhe shtëpitë e shqiptarëve. Kjo do të bëjë të mundur realizimin dhe thellimin e reformës që Ju transformuat, nga "Internet për të gjithë shkollat" në "Internet për të gjithë shqiptarët"

Gjithashtu, përmirësimi i cilësisë së shërbimit ndaj biznesit dhe qytetarit, është pika e tij e dobët dhe për këtë duhet të përqendrohet vëmendja e tij në këtë periudhë. Koha e gjatë e përgjigjes ndaj një defekti e bën Albtelekomin të mos preferohet, megjithëse mund të ofrojë një çmim më të ulët. Për këtë do të duhet që të rritet niveli profesional i inxhinierëve dhe teknikëve, dhe të përmirësohet struktura organizative.

[Albo]

“Privatizimi i Albtelekomit, turqit te plotesojne kushtet”

E Merkure, 14 Mars 2007

Ministri i Ekonomise, Genc Ruli, tha dje se kompania turke “Calik Group” nuk mund te fitoje te drejten e pronesise mbi Albtelekomin, pa plotesuar me pare kushtet e panegociueshme. Kriteret jane paraqitja e nje konsorciumi me pjesemarrjen e nje kompanie me eksperience ne fushen e telekomunikacioneve dhe sherbimi roaming

Blerina Hoxha

Negociatat e qeverise shqiptare me kompanine turke “Calik Group” per privatizimin e Albtelekomit, duket se nuk kane pasur perfundimin e pritshem, te pakten ne kohe. Burimet nga grupi negociator kishin deklaruar me pare, se procesi i bisedimeve do te perfundonte ne fund te muajit shkurt, ndersa kontrata e rishikuar me turqit do te firmosej gjate vizites se Presidentit turk Erdogan, e cila u njoftua se eshte shtyre per nje periudhe te pacaktuar kohe. Mosmarreveshjet per rishikimin e kontrates i ka pohuar edhe dje ne menyre indirekte ministri i Ekonomise, Tregtise dhe Energjetikes, Genc Ruli, i cili tha per median se, "ne presim qe firma turke "Calik Group" te plotesoje kushtet e kontrates, sidomos ato qe per ne jane te panegociueshme". Kushtet e panegociueshme per qeverine shqiptare jane paraqitja e nje konsorciumi me pjesemarrjen e nje kompanie me eksperience ne fushen e telekomunikacioneve se bashku me "Calik Enerji", si dhe ate per sherbimin roaming.

Kompania turke “Calik Group” qe te behet pronare e Albtelekom-it, duhet qe me pare te ofroje standardet e nje investitori strategjik, te cilat nuk i zoteron aktualisht. Kjo ka qene pika me e debatueshme e negociatave, e cila duket se nuk ka mundur te zgjidhet nga turqit. Burimet ne Ministrine e Ekonomise pohojne se jane rinegociuar vetem ato pika, te cilat filiali cek i “Deloite & Touche” i ka konsideruar abuzive. Behet fjale per sherbimin e roamingut, i cili sipas kontrates aktuale sjell pasoja ne treg dhe ka te beje me percaktimin e detyrimit te shitesit per vendosjen e roamingut nderkombetar, ku shkelet veprimtaria e rrjeteve publike te telekomunikacioneve, ne vecanti te kompanive celulare. Per rregullimin e kesaj veprimtarie nuk parashikohet asnje mekanizem financiar. Kjo pike e kontrates ka qene atakuar, qekur dokumenti u nenshkrua ndermjet paleve dhe eshte evidentuar edhe ne raportin permbledhes mbi “hetimin” e ligjshmerise se tenderit per shitjen e Albtelekomit. Procesi i negociatave ndermjet qeverise dhe kompanise turke “Calik Group” eshte tensionuar, kur ditet e fundit Albtelekomi zhvilloi nje tender me vlere 10 milione euro per blerjen e sherbimit te internetit me baze te gjere. Kompania turke nuk ka qene dakord qe ne momentet e fundit te perfundimit te bisedimeve, qe te harxhohej nje shume e tille nga Albtelekomi.

Qekur kompania turke “Calik Group” ka fituar tenderin e shitjes se ndermarrjes ne fjale, ka kaluar me shume se 1 vit e gjysme, nderkohe qe pronaret e rinj nuk kane mundur te marrin administrimin e ndermarrjes, per shkak te kontestimit qe qeveria e re i beri kontrates aktuale dhe procedurave te tenderit. Zvarritja e procesit te privatizimit te Albtelekomit pervecse ka krijuar deme ne te ardhurat e kompanise, ka penguar edhe zhvillimin e metejshem te tregut, nga mosaktivizimi i operatorit te trete celular, kane komentuar nje dite me pare ekspertet.

Korrieri

[Albo]

“Eagle Mobile”, peng i privatizimit te Albtelekomit

E Merkure, 14 Mars 2007

Aktivizimi i operatorit te trete celular lidhet ne menyre te drejtperdrejte me privatizimin e Albtelekomit. Deklaraten e ka bere dje ministri i Ekonomise, Tregtise dhe Energjetikes, Genc Ruli. Ai tha se "shtyrja e futjes ne treg te "Eagle Mobile" lidhet me vecantine e investigimit qe iu be privatizimit te kompanise "Albtelekom" me kompanine "Calik Enerji".

Sipas Rulit, iu kerkua nga ERT-ja qe te shtyje 1 vit hyrjen ne treg te kompanise se trete celulare "Eagle Mobile" ne treg, me qellim qe kjo te ndodhe pas privatizimit te "Albtelekomit".

Korrieri

[Dr Rieux]

Albtelekom, vonesa e shitjes ul çmimin

Ish-ministri i Financave, Malaj, thotë se vonesa e privatizimit rrit edhe koston e borxhit publik

Vonesa prej 2 vjetësh në privatizimin e Albtelekomit e ka ulur vlerën reale të kësaj kompanie me 15 për qind. Ky është mendimi i ish-ministrit të Financave, njëkohësisht dhe anëtar i Komisionit Kuvendor të Ekonomisë, Arben Malaj. Sipas tij, nëse Albtelekom do të shitej aktualisht me çmimin prej 120 milionë eurosh të parashikuar në kontratën fillestare midis qeverisë sonë dhe kompanisë turke "Çalik", vlera reale që do të përfitonte buxheti i shtetit do të ishte vetëm 100 milionë euro. Kjo për shkak të kostos së borxhit që është marrë nga qeveria shqiptare në mungesë të këtyre parave dhe për impaktin e vonuar në modernizimin e sektorit të telekomunikacioneve në vend. "Në të gjitha modelet ekonomike të zhvillimit, një akses më i madh në internet dhe me kosto më të ulët krijon zhvillim, ndërsa vonesat të kundërtën", tha Malaj për gazetën. Plani i qeverisë shqiptare ishte që 60 milionë euro nga paratë, që do të merreshin nga shitja e Albtelekomit të përdoreshin në financimin e rrugës Durrës-Kukës-Morinë. Kjo rrugë, kostoja e saktë e të cilës mbetet akoma e paqartë mendohej në atë kohë se do të kushtonte rreth 500 milionë euro. Pak muaj më parë, zëvendësministri aktual i Financave, Sherefedin Shehu, deklaroi publikisht se qeveria do të merrte rreth 250 milionë euro kredi me terma tregtare për të financuar ndërtimin e autostradës. Por vonesat në privatizimin e Albtelekomit, bënë që qeveria të rriste shumën e kredisë së kërkuar, tashmë në 380 milionë euro. Vetëm 60 milionë eurot e Albtelekomit po të llogariten mesatarisht me një normë vjetore interesi prej afro 7 për qindësh i kushtojnë buxhetit të shtetit mbi 4 milionë euro në vit. Megjithatë, kompania publike e telefonisë fikse nuk është e vetmja pronë shtetërore, e cila ka njohur vonesa në privatizim. E njëjta gjë ka ndodhur gjatë viteve të fundit edhe me kompaninë e rafinimit të naftës, ARMO, si dhe me kompaninë publike të sigurimeve INSIG. Të gjitha vonesat në këto privatizime përveçse ulin vlerën reale të tyre kanë një kosto shumë më të madhe që lidhet me impaktin e vonuar në modernizimin e sektorëve respektivë. Për sa i përket shitjes së Albtelekom, aktualisht, ujdisë me turqit i kanoset sërish rreziku i dështimit, përderisa qeveria shqiptare nuk pranon të lëshojë pe në dy kushte. Të dyja këto kushte-argumente bazohen në auditimin e Deloitte, i cili thekson mungesën e eksperiencës së turqve dhe lëshimet shumë të mëdha që u janë bërë atyre nga pala shqiptare, veçanërisht për çështjen e roaming. Sipas këtyre vërejtjeve, të cilat janë kundërshtitë kryesore të Ministrisë së Ekonomisë dhe Energjetikës, së pari, turqit pa pikë eksperience në telekomunikacion duhet ta lidhin pronësinë e tyre me një shoqëri që e zotëron këtë eksperiencë, pasi aktualisht konsorciumi ekzistues - siç ka thënë edhe vetë Berisha kur ishte në opozitë - paraqitet fantazmë në këtë drejtim. Pengesa e dytë për forcimin e mëtejshëm të miqësisë shqiptaro-turke, është teorikisht në dorë të qeverisë shqiptare, pasi lidhet me thirrjet roaming. Kjo pikë përbën në fakt, ngërçin më të madh në marrëdhëniet kontraktuale me turqit, pasi zgjidhja e së drejtës për roaming të brendshëm i detyron investitorët e Calikut të kryejnë miliona euro investime shtesë, sikurse parashikon edhe një rregullim të ri ligjor ndërmjet operatorëve mobilë. E ndërsa turqit duket se nuk pranojnë ta rinegociojnë këtë pikë, as Ministria e Ekonomisë nuk pranon të zmbrapset. Si rrjedhojë, afatit përfundimtar të zhbllokimit të situatës po i vjen fundit, ndërsa në horizont nuk duket asnjë zgjidhje. Ndërkohë, ministri i Ekonomisë, Tregtisë dhe Energjetikës, Genc Ruli, është treguar shumë i prerë teksa deklaroi pak ditë më parë, që në rast se palët nuk do të bien dakord brenda muajit maj, atëherë Albtelekom do të hidhet sërish në treg.

[Dr Rieux]

Para ca ditesh te Panorama u hodh nje bombe tymese qe nje kompani amerikano-kanadeze paska ofruar 300 milione euro per Albtelekomin. Me poshte nje interviste e sotme me perfaqsuesin e firmes. Nderkohe shqiptaret vazhdojne te paguajne me shtrenjte se anglezet per telefonine celulare.
_____________________________

Panorama, 18 mars 2007

Xhon Dolan, kryetar i “US/American Carey International Ltd” rrëfen për ofertën drejtuar kryeministrit

“Një sistem telekomi shqiptaro-amerikan”

Privatizimi i Albtelekomit, qeveria hesht para superofertës

Redi Gjuzi
Qeveria shqiptare nuk i ka kthyer ende asnjë përgjigje kompanisë amerikane “Carey International”, e cila ka ofruar zyrtarisht 300 milionë euro për blerjen e Albtelekomit.

Kjo kompani ka mjaft përvojë në fushën e telekomunikacioneve, duke përmbushur kështu një nga kushtet kryesore për privatizimin e kësaj shoqërie. “Carey International” ka qenë përfshirë në fushën e Telekomit për më shumë se 25 vjet dhe kemi hapur shumë lidhje ndërkombëtare, ndërlidhje dhe objekte të portave lidhëse, si dhe lidhje të shpejta të internetit në të gjithë botën. Në një intervistë për gazetën “Panorama”, kryetari i “US/American Carey International Ltd”, Xhon Dolan, ka sqaruar të gjitha detajet e ofertës së tyre drejtuar qeverisë shqiptare për blerjen e Albtelekomit.

Sikurse e dimë, ju i keni dërguar kohët e fundit një letër-ofertë kryeministrit Sali Berisha rreth blerjes së Albtelekomit. A keni marrë ndonjë përgjigje zyrtare nga qeveria shqiptare rreth letrës suaj dhe ofertës që ju keni dërguar tek kryeministri Berisha?
Jo, jo deri në këtë moment.

Oferta juaj është rreth 300 milionë euro, dy herë më shumë se ajo e kompanisë turke “Calik”. A nuk është kjo ofertë e ekzagjeruar?
Jo, oferta nuk është e ekzagjeruar… ajo reflekton pagesën që ne jemi gati të bëjmë me para në dorë (cash), plus komponentin e bursës prej 25% në një mënyrë shumë të qartë dhe transparente, me qëllim që të ndihmojmë popullin shqiptar për të kuptuar vlerën e vërtetë të një prej ndërmarrjeve të tij më të mëdha strategjike, sikurse është Albtelekom. Nëse ju, edhe një herë, shikoni me kujdes ofertën tonë në detaje, mund të shikoni se ne bëmë një ofertë me një vlerë për më shumë se 300 milionë euro, sipas së cilës ne do të bëjmë një pagesë me para në dorë prej 130 milionë eurosh menjëherë. Shteti, sipas kësaj oferte, do të mbajë 25% dhe do ta nxjerrë kompaninë në tregjet e bursave në Nju Jork ose Londër. Kjo do të thotë se vlera e vetëm 25% mund të jetë më shumë se oferta origjinale e 120 milionë eurove të palës turke. Pse? Sepse, sikurse e kam sqaruar në letrën e datës 4 mars 2007 drejtuar kryeministrit Berisha, vlera e vetëm 25% mund të vlejë më tepër se oferta origjinale e 120 milionë eurove të palës turke. Unë dua të theksoj këtu se në bursa, sipas praktikave botërore të vendosura, vlera e një kompanie përcaktohet duke shumëzuar 15 deri 20 herë fitimet. Kështu, sikurse e sqaruam në letër-ofertën tonë, nëse Albtelekom kishte 40M fitime, vlera e ndërmarrjes do të ishte ndërmjet 600M (15x) dhe 800M (20x) milionë euro. Kjo do të thotë se pasi qeveria Shqiptare të marrë 130M euro pagesë me lekë në dorë nga “US Carey International Ltd.”, interesi i pjesës së mbetur prej 25% mund të vlejë edhe 150-200 milionë euro më tepër, gjë e cila do ta bëjë vlerën e ofertës sonë më shumë se 300M euro.

Një nga kushtet minimale për privatizimin e Albtelekomit është që kompania blerëse të ketë pasur përvojë të mëparshme në fushën e telekomunikacioneve. A e plotësoni ju këtë kusht dhe cilat janë përvojat tuaja të mëparshme?
Ne kemi qenë përfshirë në fushën e Telekomit për më shumë se 25 vjet dhe kemi hapur shumë lidhje ndërkombëtare, ndërlidhje dhe objekte të portave lidhëse, si dhe lidhje të shpejta të internetit në të gjithë botën. Ne kemi modernizuar dhe përmirësuar pajisje telekomi në standarde të larta, ne kemi trajnuar punonjës aktualë, stafe dhe menaxherë të shumë kompanive dhe vendeve, në mënyrë që ata të mbajnë vendin e punës dhe të kenë standardet e duhura e cilësore të punës dhe kushte të përmirësuara jetese. Ne jemi ndërlidhur me mbi 350 kompani telekomi të ndryshme në të gjithë botën, për të sjellë çmimet më të mira, cilësinë më të mirë dhe teknologjitë më të mira për të gjithë njerëzit në mbarë botën.
Përsa u përket standardeve ndërkombëtare dhe Shqipërisë, fatkeqësisht më duhet ta them këtu se Bashkimi Ndërkombëtar i Telekomunikacionit (ITU), një organ jashtëzakonisht profesional i telekomunikacioneve të Kombeve të Bashkuara, një organ i cili përfaqëson 186 shtete anëtare, ka deklaruar publikisht se detajet që janë pjesë e marrëveshjeve në Shqipëri janë kaq joprofesionale dhe jofitimprurëse për Albtelekomin dhe shqiptarët, saqë një prej raporteve zyrtare përfundon si më poshtë: “Duhet thënë se nuk ekziston asnjë shembull tjetër në Evropë ose vend tjetër me marrëveshje të tilla, të padrejta, interkonjeksioni për operatorët e telefonisë fikse”. Raporti i ITU-së pohon më tej se “këto marrëveshje rrezikojnë vetë ekzistencën dhe rënien e Albtelekomit”.

Në letrën që ju i dërguat kryeministrit Berisha, ju tregoni se vlera e aksioneve të Albtelekomit mund të arrijë deri në 600-800 milionë euro?
Po, vlera e aksioneve të Albtelekomit mund të shkojë në të vërtetë në nivelin e 600-800 milionë eurove, madje edhe më shumë, në bazë të modernizimit të tij të ardhshëm dhe në bazë të lidhjes së përmirësuar dhe çmimeve më të mira që ne do të ofrojmë, në mënyrë që e gjithë Shqipëria të mund të përfitojë më tepër dhe më gjerë nga kjo gjë dhe jo vetëm qytetet e mëdha të Shqipërisë. Mënyrat dhe rrugët specifike se si mund të arrihet kjo gjë sqarohen shkurtimisht dhe saktësisht në letrën time të 4 marsit 2007, drejtuar kryeministrit Berisha.

Si e parashikoni shumën e lartpërmendur?
Pas modernizimit dhe përmirësimit të sistemeve, më shumë shqiptarë do të kenë akses më të mirë dhe cilësor, me çmime më të mira, në mënyrë që një numër më i madh shqiptarësh të përdorin sistemin. Për më tepër, duke vendosur ndërmarrjen e Telekomit në bursat e Nju Jorkut dhe Londrës, do të ketë akses transparent publik për të blerë aksione nga e gjithë bota dhe do të ketë krenari të pronësisë nga populli shqiptar, i cili do të vendosë Shqipërinë në arenën botërore përpara se ajo të hyjë në BE. Në këtë mënyrë, investime të huaja do të vijnë në Shqipëri jo vetëm për të përmirësuar Telekomin, por edhe për të përmirësuar projekte të tjera infrastrukture si rrugët dhe urat, për të mbyllur hapësirën mes Evropës dhe Shqipërisë. Kjo do të ndihmojë gjithashtu edhe Produktin e Brendshëm Bruto (GDP) dhe rritjen e zhvillimin e qëndrueshëm ekonomik kombëtar, duke rritur standardet dhe cilësinë e shërbimeve që do të ofrohen. Me fjalë të tjera, kjo konsiderohet si një nga marrëveshjet më të mira të sigurisë për GDP-në e Shqipërisë.

Nëse ju shpalleni fituesi, a keni tashmë një platformë për kompaninë shqiptare, Albtelekom dhe cilat mund të jenë disa nga pikat e kësaj platforme?
Platforma jonë do të jetë të mirëmbajmë, përmirësojmë dhe modernizojmë pajisjet; të rrisim dhe përmirësojmë cilësinë e shërbimeve dhe interkonjeksionit; të bëjmë shërbimet e Telekomit të përballueshme për popullin shqiptar dhe të ulim çmimet për shqiptarë; të mbajmë dhe të trajnojmë punonjësit e sindikatat, në mënyrë që shtrirja e duhur në të gjithë Shqipërinë të bëhet një realitet i shpejtë, me qëllim që njerëzit të përfitojnë nga teknologjitë e reja si VOIP (bisedat zanore përmes internetit), të cilat ulin dukshëm kostot/çmimet e komunikimit dhe telefonatave të brendshme e ndërkombëtare, duke përfshirë telefonatat marrëse dhe dalëse për popullin shqiptar. Kjo do të mundësojë që Shqipëria të konkurrojë me fqinjët e saj rajonalë, në vend që të varet nga ata. Për më tepër dhe më e rëndësishmja, ne do të kemi një marrëveshje sigurie, specifike, profesionale dhe të plotë me qeverinë e Shqipërisë, që çdo informacion telekomi i Shqipërisë, privat ose publik, të jetë tërësisht i sigurt dhe i mbrojtur dhe interesi kombëtar i Shqipërisë e i popullit të saj të jetë i mirëmbrojtur. Qëllimi ynë përfundimtar do të jetë të krijojmë një sistem Telekomi shqiptaro-amerikan të nivelit të lartë, me të cilin të gjithë shqiptarët mund të krenohen.




ZMQ: T’i hiqet licenca “Eagle Mobile”

Zyra për Mbrojtjen e Qytetarëve i ka kërkuar dje qeverisë që t’i heqë licencën operatorit të tretë të telefonisë celulare, “Eagle Mobile”. Sipas një deklarate për shtyp të përfaqësuesve të kësaj zyre, kjo kërkesë bazohet në nenin 55 të ligjit “Për Telekomunikacionin”, ku parashikohet se kjo licencë i hiqet operatorit, nëse ky i fundit nuk respekton kushtet e saj. Operatori “Eagle Mobile” nuk ka plotësuar kushtin që përcaktohet në ligjin 9127, sipas të cilit shërbimi nga operatori i licencuar do t’i ofrohet publikut jo më vonë se 12 muaj pas marrjes së licencës”, thuhet në deklaratë. Ky afat është tejkaluar disa herë dhe kjo ka qenë përpjekja e vetme e këtij operatori imagjinar në tregun shqiptar.



Selami Xhepa: Nuk di gjë për letrën e kompanisë amerikane

Nëse dështojnë negociatat, do shihen ofertat e tjera
Turqit mbajnë peng privatizimin e Albtelekomit

Nëse dështojnë negociatat me kompaninë turke “Calik Enerji”, atëherë qeveria shqiptare do të shikojë oferta të tjera për të privatizuar Albtelekomin. Në një prononcim për gazetën “Panorama”, Selami Xhepa, kryetar i Këshillit Mbikëqyrës në Albtelekom është shprehur se nuk është në dijeni të ofertës së kompanisë amerikanë për blerjen e Albtelekomit. “Tenderi për privatizimin e Albtelekomit është mbyllur dhe është shpallur një kompani fituese. Aktualisht ne jemi në negociata me palën turke. Nëse këto negociata dështojnë, atëherë do shikohen oferta të tjera”, ka thënë ai. Sipas tij, është rënë dakord me turqit e “Calik Enerji” me një nga pikat kryesore të negociatave, që është roamingu. “Kemi rënë dakord me kompaninë turke që kjo e fundit të investojë në ngritjen e një rrjeti të ri interkonjeksioni”, u shpreh Xhepa. Ndërkohë turqit nuk kanë plotësuar ende kushtin e investitorit strategjik. “Negociatat vazhdojnë dhe priten të përfundojnë brenda 6-mujorit të parë të këtij viti”, ka theksuar ai.
Kalvari i privatizimit të kompanisë Albtelekom ka nisur 8 vjet më parë. Tenderi i parë për privatizimin e saj është zhvilluar në vitin 1999, por u shtynë për shkak të luftës në Kosovë. Që nga ajo kohë e deri në vitin 2005 janë zhvilluar disa tendera, por kanë dështuar. Ndërkohë që në vitin 2005 ish-qeveria socialiste zhvilloi tenderin për privatizimin e Albtelekomit, ku u shpall fituese kompania turke “Calik Enerji”. Por kjo kontratë u kundërshtua nga demokratët. Me ardhjen në fuqi të qeverisë së re demokrate këta të fundit kontestuan kontratës e shitjes duke kontraktuar filialin çek të “Deloite & Touche”, për të kontrolluar procedurat e ligjshmërisë së shitjes së Albtelekomit. Ky proces u zhvillua në pranverë të vitit 2006. Sipas raportit të çekëve, turqit duhet të plotësonin dy kritere kryesore, që ishin standardet dhe roamingu.

[Dr Rieux]

Korrieri, 20 mars 2007

Telefon-gejt
E Hene, 19 Mars 2007
Nga Fatos ÇOÇOLI

Fjala "gejt" (në anglisht "portë") ka hyrë në fjalorin ndërkombëtar, por edhe në tonin si cilësim i skandaleve dhe punëve të turbullta të administratave shtetërore në vende të ndryshme. Ajo e ka zanafillën nga skandali "Watergate" (në shqip lexohet uotërgejt), i cili kishte të bënte me përgjimin e bisedave në Ambasadën sovjetike në Uashington nga ana e CIA-s amerikane. Ky skandal shkaktoi dorëheqjen e Presidentit amerikan Nikson në vitin 1972. Në botë, çështja e programit bërthamor të fshehtë të Iranit u quajt "Iran-gejt", e kështu me radhë. Tek ne, ndërmarrja e vetme e telefonisë me fill (rrjetit tokësor) quhet Albtelekom dhe është ende shtetërore. Ka me mijëra punonjës në të gjithë vendin dhe jep një shërbim që realizon në vit të paktën 45-50 milionë euro xhiro. Socialistët në fund të majit 2005 e shitën për 120 milionë euro. Demokratët sapo erdhën në fuqi e pezulluan këtë shitje. Argumentet që nxorën ishin shumë bindës për publikun dhe shqiptarin e thjeshtë. Duke filluar nga procesi i tenderimit që kishin ndjekur socialistët. Në fillim në garë kishin hyrë 11 kompani të huaja të interesuara për ta blerë Albtelekomin. Shumica mjaft serioze. Pastaj, si me magji, gjatë garës kishte ngelur vetëm kompania turke "Calik Energi", e cila edhe e fitoi tenderin, nëpërmjet filialit të saj "Calik Communication".

Duke vazhduar me faktin e qartë si drita e diellit se kompania "Calik" nuk përbën investitor strategjik. Pra, nuk është një kompani me eksperiencë të gjatë dhe specialistë në fushën e telefonisë dhe të menaxhimit të një veprimtarie të tillë. Nga ana tjetër, marrëveshja e kompanisë me shtetin shqiptar në maj 2005 ishte thjesht një marrëveshje menaxhimi, ku kompania turke kishte të drejtë t'ia shiste aksionet e saj një kompanie tjetër. Për shembull, shoqërisë "Turkish Telecom (në shqip: Telekomi Turk)". E cila po, mund të kishte përbërë një investitor strategjik. Sanksionet nga shteti shqiptar për shitjen e aksioneve nga ana e kompanisë "Calik" ishin qesharake. Po ashtu, kontrata synonte ruajtjen e rolit monopol të Albtelekom, edhe pasi ky të ishte privatizuar. Kështu vendi ynë nuk përfillte rregullat e Organizatës Botërore të Tregtisë, tek e cila është anëtarësuar, si dhe i thoshte Bashkimit Evropian dhe bisedimeve për integrim:"A ç'më çani kokën! Unë as që pyes për rregullat e konkurrencës së lirë dhe bëj si të dua në shtëpinë time". Të gjitha këto bindën shqiptarët se ia vlente që shitja të pezullohej, derisa një kompani e huaj e specializuar të hetonte shitjen dhe të nxirrte parregullsitë. Një kompani e huaj kontrolluese këshilloi qeverinë shqiptare (kundrejt pagesës) që kontrata me kompaninë turke mund të ishte e vlefshme, por duheshin përmbushur disa kushte kyçe. Ndër to, edhe që "Calik" të lidhte kontratë me një kompani profesioniste për kësi punësh, për menaxhimin e "Albtelekom". Me fjalë të tjera, të jepte garanci që nuk do t'ia shiste menjëherë dikujt tjetër, duke siguruar dhjetëra milionë euro fitim me një shkëmbim kontratash. Ky kusht për të cilën edhe sot qeveria jonë ngul këmbë (dhe bravo i qoftë) duket se ka tërbuar turqit e "Calik". Të aftë të bindin edhe kryetarin e qeverisë së tyre të anulojë një vizitë pune në Shqipëri këto ditë, gjoja me preteksin e sëmundjes. Telefonata e Kryeministrit tonë të Republikës për të bindur kryeministrin turk të vijë (apo ndoshta edhe të ushtrojë ndikimin e tij që kompania turke përfundimisht të bjerë dakord me kushtet shqiptare) është pa dyshim për t'u lavdëruar. Por ama, a do të jetë e aftë ajo të kthejë gjendjen? A do të mundë ajo të shtyjë kryeministrin Erdogan të shërbejë si avokat i interesave shqiptare? Si zor. E kundërta ndodh rëndom. Kryeministri i vendit fqinj (Turqisë) i shërben në radhë të parë interesave të biznesit të vendit të vet. Dhe interesat e "Calik", për fat të keq të shanseve privatizuese të shoqërisë sonë shtetërore, është ta blejë me 120 milionë euro Albtelekomin dhe pastaj fët e fët ta shesë për ndonja 140 a 150 milionë. Këtë vërteton sjellja e tanishme e turqve të "Calik". Çdo kompani serioze që synon investim afatgjatë me një blerje kapitale si ajo e Albtelekomit, do të kishte mirëpritur kushtin që firma të lidhej me një operator strategjik telefonie kabllore (në këtë rast, "Turkish Telekom"). Mirëpo "Calik" me sa duket, ka plane të tjera për Albtelekomin tonë. Dhe kështu "telefon-gejt" vazhdon.

[Dr Rieux]

Sipas Turkish Daily News, cituar gjithashtu dhe nga Top-Channel, Oger Telecom deklaron se mund te perfshihet ne blerjen e Albtelekom-it ne rast se qeveria e rinxjerr ne ankand. Oger Telekom eshte nje kompani telekomunikacion me qender ne Dubai. Bashkepronare dhe partnere e kompanise eshte dhe Telekom Italia, ndersa nje konsorcium mes te dyve bleu para dy vjetesh 55% te aksioneve te Turkish Telecom per 6.5 miliarde dollare (ku si per ironi te fatit Çalik Energji doli ne vend te dyte ne ankand).

Shkeputur nga http://www.turkishdailynews.com.tr/a...?enewsid=69156, paragrafi ne lidhje me Shqiperine:

Kompania mund te jape oferte per shumicen e aksioneve te operatorit shqiptar te telefonise fikse dhe celulare AlbTelekom, nepermjet Turk Telekom, ne rast se qeveria shqiptare do te hape nje tender te ri kete vit. Qeveria shqiptare mund te rihape tenderin per mbi 60% te Albtelekomit pasi tenderi i pare terhoqi interesin e vetem nje firme turke.