Finalizohet shitja e Albtelekom kompanisë turke

[no name]

Tenderi "Albtelekom", ministrite dorezojne dosjet

E Premte, 02 Nentor 2007


Tirane - Ministrite e Ekonomise dhe e Financave dorezuan dje te gjitha dokumentet qe dispononin ne lidhje me shitjen e "Albtelekom". Disa dosje te vecanta jane marre dje nga prokuroret e ceshtjes ne zyren e Task-Forces, te postuara. Lajmin e bene te ditur burime zyrtare nga Prokuroria e Tiranes per gazeten "Koha Jone". Analiza qe do t'i behet dokumenteve do te percaktoje edhe shkeljet e mundshme qe jane bere me shitjen e gjigantit telefonik, si dhe humbjet qe i kane shkaktuar buxhetit te shtetit ne kontraten e nenshkruar per 120 milione euro. Nje jave pas pergjigjes se fundit te dy ministrive per dorezimin e dokumenteve, dje kane mberritur ne institucionin e akuzes te postuara. Mesohet se pjese e tyre jane kontratat e shitjes, marreveshja, procedurat e tenderit te zhvilluar dhe shpjegimet e specialisteve. Burime nga organi i akuzes bene te ditur se do te shqyrtohen te gjitha materialet dhe do te mbahet nje raport perfundimtar, qe do pasoje me marrjen ne pyetje te personave qe kane dijeni. Hetimi nisi nje muaj me pare dhe objekt eshte shkaku perse u rishit po 120 milione euro te firma turke "Calik Enerji".



Kohajone

[no name]

Qeveria dërgon në prokurori dosjen "Albtelekom"

Task-Forca: Verifikim ofertave nga firmat pjesëmarrëse në tenderin për privatizim

Në një kohë që në Parlamentin Shqiptar po diskutohej shkarkimi i Kryeprokurorit Theodhori Sollaku, Ministria e Ekonomisë ka depozituar në Prokurorinë e Tiranës një dosje voluminoze me kontratat e firmave që pretendonin të fitonin privatizimin e kompanisë "Albtelekom". Krahas komisionit hetimor për gjigandin telefonik, akuza ka filluar një verifikim, në bazë të shkrimeve në media, të cilat bënin publike disa nga aferat korruptive gjatë procesit të privatizimit. Për verifikimin e këtyre shkrimeve, Task-Forca kundër informaliteteve në akuzën kryeqytetase vendosi t‘i kërkojë Ministrisë së Ekonomisë dokumentet e tenderit për privatizimin, si dhe dosjet e paraqitura nga firmat pjesëmarrëse. Burimet pohojnë se materialet voluminoze po i nënshtrohen një verifikimi dhe në fund do të vendoset nëse do të merret i pandehur ndonjë zyrtar i dyshuar për afera korruptive.

Në një hark kohor shumë të shkurtër, Prokuroria e Përgjithshme konfirmon hetimin e dytë për qeverinë "Berisha". Pas rrugës Durrës-Kukës-Morinë, vartësit e Kryeprokurorit Theodhori Sollaku konfirmojnë se kanë nisur një hetim ndaj shitjes së "Albtelekom"-it. Në sitën e organit të akuzës janë drejtuesit e Ministrisë së Ekonomisë. Nga një llogaritje e thjeshtë e grupit hetimor, rezulton se firma gjermane "Axos" ka ofruar 200 milionë euro më shumë se kompania turke "Çalik". Gjithsesi, në fund të vlerësimit të ofertave, komisioni ka vendosur të shpallë fituese firmën turke, duke "injoruar" ofertën gjermane. Kjo e fundit, me një letër drejtuar kabinetit "Berisha", shprehte pakënaqësitë e përzgjedhjes së firmës fituese.

Prokuroria ka marrë në dorëzim një kopje të ofertës së paraqitur nga kompania gjermane. Sipas ofertës, "Axos" kishte si qëllim ta zhvillonte "Albtelekomin" në qendër të shërbimeve të telekomunikacionit rajonal. "Albtelekomi" parashikohej të ofronte shërbime konkurruese të telefonisë fikse dhe mobile për 50% të popullatës deri në vitin 2012. Përveç 200 milionë eurove shtesë, krahasuar me ofertën fituese të "Çalik", marrëveshja do të përfshinte përhapjen e shpërndarjes së teledensitetit nga niveli 8% që është sot, në 25% brenda pesë vitesh, si dhe ndërtimin e një rrjeti WiMax, duke qenë se licenca për këtë teknologji do të përfshihej në transaksion. Në ofertë parashikohej reduktimi i listës së pritjes për t‘u pajisur me numra të rinj, si dhe ulja e tarifave dhe ngarkesës së roamingut ndërkombëtar sipas standardeve të BE-së. Rritja vjetore e biznesit parashikohej në 15%, ndërsa konkurrenca në treg do të pësonte një rritje të ndjeshme. Prokuroria tha se në ofertën e saj kompania gjermane zotohej se do të ishte në gjendje të lidhte në rrjetin e saj të telefonisë fikse rreth 120 mijë konsumatorë në vit. "Axos" shkruante se bëhej fjalë për një operator lider në tregun evropian, duke theksuar se partneri rezervon të drejtën e blerjes së shumicës së aksioneve të "Albtelekomit". Por gjithçka është hedhur poshtë nga qeveria shqiptare, e cila preferoi 120 milionë eurot e turqve përballë 320 milionë eurove të gjermanëve, çka solli edhe hetimin e Prokurorisë së Tiranës. Një tjetër abuzim sipas akuzës është mospublikimi i kontratës nga ana e Ministrisë së Ekonomisë. Gjithashtu, dikasteri i ministrit Genc Ruli nuk ka publikuar dhe itinerarin e dokumentacionin e zhvillimit të këtij tenderi.




Gazeta Shqip

[Albo]

Shitja e "Albtelekomit", pushohen hetimet

Prokuroria: Privatizimi është vendosur kolegjialisht nga qeveria, u ratifikua nga Kuvendi

Sokol Çobo

Prokuroria e Tiranës ka pushuar hetimet për privatizimin e kompanisë së telekomunikacionit "Albtelekom", me arsyetimin se Këshilli i Ministrave ka vendosur kolegjialisht për procesin e shitjes. Në pamundësi për të marrë nën hetim një organ që prodhon ligje, organi i akuzës është "dorëzuar", duke mbyllur përfundimisht hetimet, pasi ligjet shqiptare e kanë të pamundur që të vënë nën akuzë të gjithë anëtarët e qeverisë. Lajmi bëhet i ditur nga burime zyrtare nga Prokuroria e Tiranës, të cilat saktësojnë se gjatë fazave të privatizimit janë gjetur disa parregullsi në përzgjedhjen e firmave që do të hynin në tender. Por, pas përcaktimit të firmës fituese, qeveria ka miratuar vendimin e marrë nga Ministria e Ekonomisë dhe e ka dërguar për ratifikim në Parlamentin e Shqipërisë. Ky i fundit e ka ratifikuar, duke e bërë të pamundur hetimin e prokurorisë.

Procedurat
Hetimet e prokurorisë përcaktuan se me një vendim të Këshillit të Ministrave (VKM) është caktuar Komisioni i Transparencës dhe Konsulencës, i cili përbëhej nga 12 anëtarë. Komisioni drejtohej nga ish-ministri i Ekonomisë, Anastas Angjeli. Anëtarët, me një vendim të Këshillit të Ministrave të mëvonshëm, morën rolin e Komisionit të Vlerësimit të Ofertave. Pas këtij vendimi, janë shtuar edhe përfaqësues të huaj në konsulentë. Prokuroria përcaktoi se Komisioni i Transparencës ka marrë 2 miliardë lekë "shpërblim" për punë të mirë gjatë procesit të privatizimit të kompanisë shtetërore të telekomunikacionit. Mësohet se pas vlerësimit të ofertave (që ishte një e vetme) është vendosur shitja e "Albtelekomit" me një vlerë 120 milionë euro. Nëse ka abuzime, sipas prokurorisë, anëtarët dhe konsulenti që u futën në komision janë përgjegjës për vlerësimin e gabuar të ofertës.
Hetuesit e çështjes thanë se një firmë e vetme ka bërë ofertë për shitjen e "Albtelekomit". Fillimisht, tri firma kanë qenë në garë, por kanë hequr dorë tri ditë nga zhvillimi i tenderit, duke lënë në garë vetëm një firmë. Prokuroria e Tiranës thotë se dokumentacioni i paraqitur ka qenë jo i plotë. Por, Komisioni i Vlerësimit në vend që të shpallte të pavlefshëm tenderin e ka pranuar ofertën, duke e shpallur firmën fituese të rregullt. Tenderi për përcaktimin e firmës fituese të "Albtelekomit" është zhvilluar në muajin maj të vitit 2005, megjithatë është miratuar më pas nga qeveria dhe ratifikuar nga Kuvendi.

Hetimet e prokurorisë
Në "sitën" e organit të akuzës kanë qenë drejtuesit dhe ish-drejtuesit e Ministrisë së Ekonomisë. Nga një llogaritje e thjeshtë e grupit hetimor, rezulton se një firmë gjermane kishte ofruar miliona euro më shumë se kompania që fitoi tenderin. Por, në fund të vlerësimit të ofertave, komisioni ka vendosur të shpallë fituese firmën turke, duke "injoruar" ofertën gjermane. Kjo e fundit, me një letër drejtuar kabinetit "Berisha", shprehte pakënaqësitë e përzgjedhjes së firmës fituese. Prokuroria mori në dorëzim një kopje të ofertës së paraqitur nga kompania gjermane. Sipas ofertës, firma kishte si qëllim ta zhvillonte "Albtelekomin" në qendër të shërbimeve të telekomunikacionit rajonal. Kompania shtetërore parashikohej të ofronte shërbime konkurruese të telefonisë fikse dhe mobile për 50 për qind të popullatës deri në vitin 2012. Në ofertë parashikohej reduktimi i listës së pritjes për t‘u pajisur me numra të rinj, si dhe ulja e tarifave dhe ngarkesës së roaming-ut ndërkombëtar, sipas standardeve të BE-së. Por gjithçka është hedhur poshtë nga qeveria shqiptare, e cila preferoi 120 milionë eurot e turqve përballë 320 milionë eurove të gjermanëve, çka solli edhe hetimin e Prokurorisë së Tiranës. Pas një sërë pyetjesh dhe verifikimesh, prokuroria "mbylli një sy", duke mos rrezikuar që personat përgjegjës të shpalleshin të pafajshëm nga gjykata, e vendosi që të pushojë hetimet, pavarësisht se janë konstatuar disa parregullsi gjatë procesit të privatizimit.

Shqip