Perkujtohet dita e fitores mbi fashizmin.

[kolombi]

Përkujtohet 60-vjetori i fitores mbi fashizmin në Evropë


Në Berlin do të zhvillohet një festival dyditor i demokracisë
Në të gjithë Evropën po zhvillohen veprimtari përkujtimore me rastin e 60- vjetorit të fitores së forcave aleate mbi Gjermaninë naziste.
Mbi 40 milionë vetë u vranë gjatë luftës së dytë botërore.

Presidenti Bush do të nderojë kujtimin e ushtarëve të vrarë në qytetin hollandez të Mastrihtit, ku ndodhen varret e tetë mijë ushtarëve amerikanë.

Përpara kësaj vizite, zoti Bush deklaroi se do t'u thurte lavde atyre që luftuan, por do t'i kujtonte gjithashtu njerëzimit se ende duhej punë për ta bërë botën të lirë.

Këto komente vlerësohet se janë një referencë për zhvillimet politike në Rusi, ku presidenti Bush do të marrë pjesë në një ceremoni të veçantë përkujtimore që do të zhvillohet të hënën.

Rusia njeh 9 Majin si Ditën e Fitores mbi Fashizmin.

Gjatë vizitës në Republikën Balltike të Letonisë ditën e shtunë, zoti Bush e përshkroi dominimin e Bashkimit Sovjetik në Evropën Qendrore dhe Lindore gjatë periudhës së Luftës së Ftohtë si një ndër shkeljet më të mëdha të historisë.


Zoti Bush me homologen letoneze

"Fitorja në Evropë shënoi fundin e fashizmit por nuk i dha fund shtypjes. Vuajtjet e miliona vetëve në Evropën Qendrore dhe Lindore do të kujtohen si një ndër shkeljet më të mëdha në histori", tha Presidenti Bush.

Festival Demokracie në Gjermani

Në Gjermani, Dita e Fitores po përkujtohet me atë që është quajtur si Festival i Demokracisë.

Ceremonia 48-orëshe me muzikë dhe fjalime do të zhvillohet në Portën e Brandenburgut në Berlin.

Udhëheqësit politikë të Gjermanisë do të marrin pjesë në një shërbesë fetare në Katedralen Katolike të Berlinit, dhe më pas do të ketë një ceremoni në parlament.

Një kurorë me lule do të vendoset në monumentin e ngritur për nder të ushtrisë së kuqe në Berlin për të nderuar kujtimin e ushtarëve që luftuan në këtë qytet.

Gjermania e feston 8 Majin çdo vit si ditën e çlirimit nga regjimi nazist.

Këtë vit do të ketë edhe një marshim të grupeve të ekstremit të djashtë, të cilat kërkojnë që t'i jepet fund asaj që ato e quajnë gënjeshtër të çlirimit.

Festime në vendet evropiane

Fitorja mbi nazi-fashizmin po përkujtohet edhe në vende të tjera evropiane.

Presidenti francez, Zhak Shirak do të marrë pjesë në një ceremoni që do të zhvillohet në Pallatin Elize në Paris.

Ministrja e tij e Mbrojtjes, Mishel Alliot Marie, vizitoi qytetin Reim, ku Gjermania u dorëzua përpara fuqive perëndimore.

Ajo tha se çlirimtarët e Evropës do të mbeteshin përgjithmonë në zemrat e popullit francez.

Në Londër, Princi Charles do të vendosë një kurorë në monumentin e njohur si Cenotafi në qendër të Londrës. Disa mijëra vetë pritet të marrin pjesë në një koncert në sheshin e Trafalgarit.

Ndërsa në Poloni ceremonitë përkujtimore kanë shkaktuar debat.

Një parti opozitare e ka kritikuar vendimin e presidentit Kvasnievski për të marrë pjesë në ceremonitë që do të zhvillohen të hënën në Moskë, duke thënë se kjo i thurte lavde komunizmit sovjetik.

[kolombi]

Bush flet për pushtimin komunist



Turneu i zotit Bush ka zemëruar Presidentin rus Putin
Presidenti Bush e ka përshkruar dominimin e Evropës qëndrore dhe lindore nga BS gjatë Luftës së ftohtë si një nga gabimet më të mëdha në histori.
Duke folur në Letoni, zoti Bush tha se SHBA gjithashtu kishte përgjegjësinë e vet për ndarjen e Evropës në fund të luftës së dytë botërore.

Ai tha se SHBA nuk do të harrojë kurrë se në shtetet balltike, shkatërrimi i nazizmit solli okupimin dhe shtypjen komuniste.

"Një objektiv i udhëtimit tim është nderimi i kujtimeve të atyre që dhanë jetën e tyre, 60 vjet më parë, në luftë kundër nazizmit dhe fashizmit. Nesër, do të jem në varreza në Hollandë për t'i bërë homazhe brezit që sakrifikoi jetën për liri dhe paqe. Por unë njoh gjithashtu edhe atë se në perëndim, fundi i luftës së dytë botërore solli paqe, ndërsa në vendet balltike solli pushtimin dhe shtypjen komuniste. Populli amerikan nuk do të harrojë kurrë okupimin e shtypjes komuniste të vendeve balltike. Ne e njohim historinë tuaj të dhimbshme."

[ArberXYZ]

Ne lufte e Dyte Boterore jane vrare perafersisht 60 milione njerez, dhe jo 40 milion.