Uji kosovar gjen treg në Emiratet e Bashkuara Arabe

[ganoid]

Të enjten një kontingjent prej 18 mijë litrash uji mineral i markës “Dea” është nisur për në Dubai të Emirateve të Bashkuara Arabe. Pronari i kësaj fabrike e ka vlerësuar si sukses të madh futjen e ujit “Dea” në këtë treg


Më në fund, prodhimet kosovare kanë filluar të eksportohen jashtë Kosovës. Të enjten një kontingjent prej 18 mijë litrash uji mineral është nisur për në Dubai të Emirateve të Bashkuara Arabe. Pronari i kësaj fabrike, Mustaf Shala, e ka vlerësuar si sukses të madh futjen e ujit “Dea” në këtë treg dhe, sipas tij, është rezultat i analizave të bëra në Dubai, para nënshkrimit të kontratës. Sipas tij, ambalazhet e ujit janë shkruar në gjuhën arabe dhe atë angleze dhe në fund natyrisht që është shënuar “Made in Kosova”. “ Uji mineral dhe natyral “Dea” është futur në tryezat e KFOR-it francez, suedez, austriak e irlandez dhe tashmë po hyn edhe në tregun e Maqedonisë dhe atë të Shqipërisë. Pas depërtimit të ujit “Dea” në tregun e Emirateve të Bashkuara Arabe, kemi shpresë për depërtim edhe në shtetet e tjera aziatike”, pohoi Shala. Ai ka shtuar se uji mineral dhe natyral “Dea” i cili ambalazhohet në një fabrikë në Gjilan, në Dubai do të hyjë në konkurrencë me ujin francez dhe atë italian. Kimisti Arben Haziri, përgjegjës i prodhimit të ujit “Dea”, duke folur për cilësitë e ujit natyral, tha se ai është i vetmi ujë në Kosovë, i cili i përmbush kriteret që ka parashikuar Bashkimi Europian përmes një deklarate 98-83/EC për ujërat e ambalazhuar, kurse cilësia e tij në Kosovë kontrollohet në dy institutet vendase, nga Instituti Kombëtar i Shëndetit Publik dhe Departamenti i Kimisë, pranë Fakultetit të Shkencave Matematiko-Natyrore (FSHMN). Fabrika për prodhimin e ujit mineral dhe natyral “Dea”, me teknologji gjermano-sllovake, është lëshuar në prodhim vitin e kaluar, për të cilin janë investuar mbi tre milionë euro. Fabrika që gjendet në bjeshkët e fshatit Ponesh, punon me dy turne me një kapacitet prodhues në shishe plastike prej 5 mijë njësive në orë (rreth 7 500 litra), kurse linja e dytë ka një kapacitet prej 5 mijë njësi në shishe qelqi (3 000 litra). Në këtë fabrikë janë punësuar 48 punëtorë, ndërkohë që pronari Shala thotë se planifikon që shumë shpejt të fillojë edhe me turnin e tretë gjë e cila do ta çojë numrin e punëtorëve në 108.