Si do duket Kosova e pavarur?

[deqanas]

te nderuar forumist,

ju ftoj ti shpalosim mendimet tona se si ne/ju mendojme/mendoni qe do te shkojne punet pas njohjes se pavaresise??

per veten time them sincerisht qe... perballe gezimit dhe optimizmit qe kam per ate qe si do shkojne punet pas realizimit te endrres sone shekullore, pra njohjes se pavaresise, per fat te keq ndjej edhe nje lloj frige/shqetesimi se a do dime ne ta udheheqim veten tone dhe te mbajme shtetin qe do krijojme?!?

mjafton nje shikim matane kufrit, pra kah meme shqypnija me pa se si mund shkaterrohet endrra e popullit te shumevuajtur (pa dashur te hyj ne detajet e hidhura).

pra si e shihni ju Kosoven e pavarur - me parlament celularesh, apo si model zvicerian (per cka kosova ka mjaft potencial!)?

me t´mira

[DYDRINAS]

Pavaresia njehere mire se te vije ne Kosove.
Por pavaresi do te thote shume pergjegjesi per veten dhe per te tjeret qe jetojne nen nje kulm me ty.
Pavaresi do te thote qe te trajtosh te gjithe qytetaret e Kosoves ne menyre te njejte pavaresisht prej prejardhjes se tyre,besimit te tyre e ngjyres se lekures.
Ndoshta ne fillim do te jete nje parlament "celularesh" e me vone kur te krijohet nje elite e re politike do te kete nje parlament "zviceran" sic ke qejf t'a quash.
Koha deri sa te behet ai parlamenti "zviceran " eshte e gjate sepse Kosova ka shume probleme te brendshme.Ka shume probleme mes familjeve,mes fshatrave,mes krahinave.
Ende shikohet Kosova si nje parcele livadhi ne bjeshke ku secili do t'i kullose dhente sipas qejfit te tij e sipas interesit te familjes e farefisit.
Pastaj se cfare potenciali ka Kosova qe te behet me parlament "zviceran" une kete nuk e kuptoj se cfare ke dashte te thuash?
Duhet qe ai Drini i Bardhe,Ibri,Lepenci e te tjere lumenj e perrenj te Kosoves te derdhin me shume uje ne det qe te pastrohet "turbullsia" e tyre.
Pavaresia do te vije por procesi eshte i gjate jo vetem per Kosoven por per te gjithe shqiptaret qe te arrijme disa tregues te tjere te domosdoshem per te qene nje shoqeri e civilizuar.Por njehere te behet Kosova e pavarur e pastaj koha do t'a tregoje.

[Irfan]

Kosova e pavarur dhe flamuri i saj

Written by Saimir LOLJA
Wednesday, 09 February 2005

Kosova po ecën drejt pamvarësimit të saj. Fundi i kësaj rruge paqeje shumë po i gëzon, ndërkohë që më shumë të tjerë po i shqetëson. Shqetësimet i përkasin natyrës njerzore dhe hutimet luhaten nga përfytyrime vetjake e deri tek ato ngrehinave ndërshtetrore. Një hutim për një gjë mjaft të dukshme, por edhe të rëndësishme, është edhe hutimi në lidhje me flamurin e shtetit të ardhshëm të pavarur të Kosovës

Edhe pse tani për tani një shqetësim i tillë është vendosur në harresë, ai vetvetiu është ndjerë edhe ndër shqiptarët. Për më shumë, çeshtja bëhet më e mprehtë ngaqë një pavarësi e vlefshme e Kosovës do të thotë që ajo të njihet nga shtete e tjera dhe organizatat ndërshtetërore. Në nje situtatë të tillë, dashakeqësit e paqes në Europën Juglindore do të gjenin një syth për t'u përkujdesur që harmonia midis shqiptarëve të thumbohej dhe begatija e përparimi i Europës Juglindore në udhët e qytetërimit të ishin të brishtë.

Shteti në Kosovë duhet të jetë i qytetarëve që kanë dhënë e japin për këtë Kosovë të pavarur e që kanë bashkëpunuar me bashkësinë e qytetëruar ndërkombëtare në këtë proçes. Shteti i Kosovës së pavarur nuk iu përket atyre që e kanë pushtuar, plaçkitur, gjakosur e dhunuar Kosovën ose që edhe tani e sabotojnë apo e pengojnë të eci në rrugën e përparimit dhe bashkëpunimit me bashkësinë e qytetëruar ndërkombëtare. Megjithëse, roli udhëheqës iu takon shqiptarëve në Kosovë, duhet që të urtët e saj të mos krenohen me fjalë, por të shqyrtojnë nëse ato fjalë janë në përputhje me gjërat për të mirën e qytetarëve të Kosovës. Rrjedhimisht edhe shenja përfaqsuese e shtetit të pavarur të Kosovës, domethënë e flamurit, nuk mund të jetë shenjë e pjesshme (partiake e thënë joshqip) apo një hartim me ngjyra zbukuruese. Aq më shumë që pavarësi e Kosovës nuk do të thotë pavarësi vetjake e ndokujt. Pavarësi e Kosovës nuk do të thotë të pranosh çfardolloj hartimi për flamurin vetëm e vetëm që të arrihet ajo "e shkretë pavarësi". Pavarësia e Kosovës do të thotë në rradhë të parë përgjegjësi, respekt, punë, zhvillim e mosndalim. Pavarësia e Kosovës nuk do të thotë që Kosova e pavarur të përfaqsohet nga një flamur që s'iu përket kombit të qytetarëve të saj dhe atyre t'iu thuhet me cinizëm: "mbajeni flamurin tuaj kombëtar brenda shtëpisë".

Nga këndvështrimi ndërshtetëror, Kosova e pavarur dhe Shqipëria zyrtare nuk do prishnin rregullin dhe paqen midis midis tyre apo shteteve të tjera nëse do të kishin të njëjtin hymn dhe flamur. Sepse ka shembull të ngjashëm e të harmonishëm midis dy shteteve të rëndësishëm, Italisë e Irlandës, të cilët kanë të njëjtin flamur me pak ndryshim vetëm tek ngjyra e shiritit të kuq.

Pra zgjidhja e problemit në fjalë del tani qartë: meqenëse spektri i kuq ka gjatësi vale 647-700 nm, atëhere shteti i Kosovës dhe Shqipëria zyrtare të kenë të njëjtin flamur por me një ndryshim në ngjyrën e kuqe, të marrë nga spektri i kuq i ngjyrës. (Biles edhe pak ndryshim në paraqitjen e shqiponjës dykrenëshe do të shtontë një ndryshim tjetër të harmonishëm në këtë drejtim).

[Irfan]

Pavarësia e Kosovës, SHBA lajmëron hapin vendimtar
Written by Kryeredaktori
Thursday, 31 March 2005
SHBA u bën thirrje faktorëve ndërkombëtarë të mos vonojnë hapin vendimtar për pavarësinë e Kosovës. Këtë e konfirmoi dje Bruce Jackson, këshilltari i presidentit amerikan Xhorxh Bush, për televizionin grek "Mega". "Serbia, si dhe të gjitha vendet e tjera europiane, ka të drejtë ta shprehë mendimin e saj, por nuk e ka të drejtën e vetos në vendimin për statusin e Kosovës", tha Jackson. Ai shtoi se "status-kuoja në Kosovë nuk po funksionon dhe tashmë i mbetet komunitetit ndërkombëtar të reagojë sa më shpejt.

"Duhet ta bëjmë lëvizjen vendimtare në drejtim të pavarësisë dhe të anëtarësimit në Bashkimin Evropian gjatë dekadës së ardhshme", tha Jackson duke shtuar se pavarësia e Kosovës nuk do t'i destabilizonte vendet fqinje, perspektiva e të cilave është në integrimet euro-atlantike. I pyetur për frikën e serbëve të Kosovës lidhur me pavarësinë e Kosovës, Jackson u shpreh se Uashingtoni është absolutisht për mbrojtjen e pakicës serbe dhe të përmendoreve në Kosovë. SHBA ka deklaruar vazhdimisht se mbështet zgjidhjen sa më të shpejtë të çështjes së Kosovës, por nuk ka deklaruar ndonjëherë zyrtarisht se mbështet pavarësinë e saj. Zyrtarët amerikanë kanë pohuar se sidoqoftë, Kosova është ndër prioritetet e tyre në Ballkan dhe se zgjidhja e çështjes së statusit do të qetësonte rajonin. Dy ditë më parë Uashingtoni konfirmoi se do të financojë për përmbushjen e standarteve në Kosovë, të cilat janë vënë si kusht për hapjen e bisedimeve për statusin. Vetë standartet ishin plan i paraqitur nga amerikanët për të nxitur ndryshimin e status-kuosë aktuale në Kosovë dhe për të siguruar një motiv drejt arritjes së statusit përfundimtar. Edhe sekretarja amerikane e shtetit, Kondolesa Rajs, deklaroi disa javë më parë, gjatë bisedimeve më zyrtarët europianë në Bruksel, se duhet të përshpejtohen proçeset në Kosovë dhe duhet mbështetur zgjidhja e statusit. Bisedimet për statusin përfundimtar të Kosovës duhet të nisin në tetor dhe në to pritet të marrin pjesë edhe zyrtarët e Prishtinës dhe Beogradit. Sidoqoftë, për përcaktimin e statusit është e nevojshme vota e pesë anëtarëve të përhershëm të Këshillit të Sigurimit; Kinës, Rusisë, SHBA-së, Francës dhe Britanisë.

Gazeta Shqiptare 31-03-2005