Kombëtarja Shqiptare

[Davius]

01.03.2006

Kombetarja e Shqiperise e fillon me nje humbje te zbehte me rezultatin 2-1 ndaj Lituanise vitin e ri futbollistik. Megjithse ishin kuqezinjte ata qe shenuan te paret me ane te 11-metershi te ekzekutuar nga Ardian Aliaj, djemt e Brigelit nuk arriten dot ta ruajn avantazhin dhe Lituanezet shenuan dy here radhazi para perfundimit te pjeses se pare.

Ndersa ne pjesen e dyte, kuqezinjte provuan disa here ta barazojn rezultatin por sulmet drejt portes Balltike rezultuan te deshtuar. Vlen te theksohet se rezultati mund te kishte qene edhe me i thelle nese Arian Beqaj nuk do ta kishte pritur nje 11-metersh ne çastet e fundit te ndeshjes.

Shkëlzen Xh. - Tifozat.Com

[Davius]

Në miqësoren e mbrëmshme, kuqezinjtë kanë demonstruar qartë dobësitë e shkuara, sidomos në mbrojtje 02-03-2006

Brigel, kjo kombëtare s'jep shpresë!

Jeton SELIMI

Shqipëri - Lituani 1-2

Shënues: Aliaj 33' (11-m), Savenas 34', Danilevicius 42'

Shqipëria: Beqaj, Aliaj, Murati (Vrapi 79'), Cana (Dallku 63'), Hasi, E. Beqiri, Lala, Duro, Bylykbashi (Skela 46'), Bushi (Myrtaj 46'), Tare (Bogdani 46').
Trajner: Hans Peter Brigel.

Lituania: Malinauskas, Paulauskas, Stankevicius, Skerla, Zvirgzdaukuas, Savenas, Mikoljunas (Kalonas 79'), Danilevicius (Lukshys 85'), Poskus (Marius 72'), Miceika (Zutautas 87'), Radzinevicius.

Trajner: Algimantas Liubinskas.

Gjyqtarë: T.Pieri, S.Ayroldi, P.Cavuoti (Itali)

[Davius]

Radiografia"
1'- K. Duro zhvendoset nga e djathta, kroson në zonë, ndërkohë që portieri i Lituanisë e nxjerr topin mbi traun e portës.
5'- K. Duro kroson saktë në zonë për Bushin, i cili ka hapësirë, por goditja e tij me kokë përfundon jashtë kuadratit.
8'- Rrëmujë në zonën tonë, por nuk përfitojnë si duhet lituanezët.
11'- Beqiri nuk mund ta kontrollojë topin në zonë, megjithëse pengohet dhe pretendon për një 11-metërsh.
14'- Hasi kroson në zonë dhe është portieri lituanez që ndërhyn saktë, duke e larguar topin jashtë.
18'- Lituanezët rrezikojnë me një goditje të fortë jashtë zonës.
20- Kapiteni i Lituanisë mund të rrezikojë portën e kombëtares sonë, por ndërhyn më shpejt mbrojtja.
21'- Nr. 10 i Lituanisë zbret rrezikshëm në zonën tonë dhe përballë Beqajt godet mbi tra.
23'- Duro del bukur nga krahu i djathtë, kroson në zonë për Taren, i cili megjithëse ka hapësirë, shkakton një faull.
24'- Aliaj kroson nga krahu i majtë, në zonë ndodhet Tare, që shumë pranë portës kërkon ta dërgojë topin në rrjetë, por ndërhyn një mbrojtës.
26'- Goditje dënimi për Lituaninë. Shumë pranë zonës godet numri 11 dhe topi përplaset te muri.
28'- Tare ka mundësinë më të mirë të shënojë në portën kundërshtare, mirëpo gabon.
30'- Aliaj fut një top të rrezikshëm në zonë dhe Beqiri nuk ka mundur ta shtyjë drejt rrjetës.
32'- Murati pengohet në hyrje të zonës dhe gjyqtari jep 11-metërsh në favorin tonë. Nga pika e bardhë godet në krah të kundërt të portierit Adrian Aliaj dhe ekipi ynë kombëtar kalon në epërsi. 1-0 për Shqipërinë.
34'- Savenas godet befasisht jashtë zonës dhe topi përfundon në rrjetën e portës së mbrojtur nga Beqaj, i cili nuk ka asnjë mundësi të reagojë për të shmangur golin e barazimit. 1-1.
36'- Hasi gjuan jashtë zonës, grushton me shumë vështirësi portieri, më pas topi në zonë përfundon te Beqiri, që shënon, por është kapur më parë në pozicion jashtë loje.
38'- Bylykbashi kërkon Igli Taren në zonë, por ky i fundit nuk arrin dot ta zotërojë topin.
39'- Leviksius futet në zonën tonë, por godet fare lehtësisht dhe Beqaj arrin ta kapë topin.
40'- Murati shkakton një faull kundrejt portierit.
42'- Dalinevicius përfiton nga një gabim i mbrojtjes sonë dhe, pasi kontrollon topin brenda zonës, është i vetëm përballë Beqajt, godet dhe realizon golin e epërsisë. 1-2 për Lituaninë.
44'- Beqaj del përpara numrit 11 dhe shpëton portën tonë nga goli, pasi sulmuesi lituanez kishte depërtuar i vetëm drejt zonës, pas një kundërsulmi të shpejtë të Lituanisë.

45'- Bushi provon me kokë, por portieri i Lituanisë evidenton golin e barazimit.
49'- Skela kap një top në afërsi të zonës dhe e nis drejt portës, por Bogdani nuk arrin ta devijojë drejt rrjetës.
53'- Klodian Duro, pas një kombinimi të mirë me Skelën, futet në zonë dhe vihet përballë portierit, por ndërhyn një mbrojtës, duke ia hequr topin nga këmbët.
56'- Kapiteni i Lituanisë me numër 9 është futur rrezikshëm në zonë, por nuk arrin ta pasojë topin për shokët e sulmit.
60'- Danilevicius futet në zonë dhe, në dyluftim me dy mbrojtës të kombëtares sonë, bie në zonë dhe 11-metërsh. Godet dhe pret Beqaj.
62'- Një kros i rrezikshëm në zonën tonë dhe janë sërish lituanezët shumë pranë golit të tretë, por topi del ngjitur me shtyllën pingule.
64'- Bogdani, shumë pranë me portën, që është boshatisur nga portieri, ndërhyn deri diku parregullsisht një mbrojtës, por gjyqtari nuk jep 11-metërsh.
68'- Skela kombinon me Duron dhe ky i fundit, pas një goditjeje tokazi, rrezikon seriozisht portën lituaneze.

71'- Goditje e befasishme e një lojtari të Lituanisë dhe topi, pasi kalon tërë zonën, përplaset në shtyllë e më pas kthehet në lojë, por gjyqtari fërshëllen për një pozicion jashtë loje.
73'- Goditje dënimi për Shqipërinë. Aliaj gjuan bukur, por është ndërhyrja e portierit që shpëton portën nga një gol i sigurt.
77' - Një goditje e fortë dhe e befasueshme e Skelës, që pritet mrekullisht nga portieri Melasaus i Lituanisë.
80'- Goditje dënimi për Shqipërinë shumë afër zonës së rreptësisë. Klodian Duro godet bukur, por jashtë.
83'- Myrtaj kroson saktë për Bogdanin, që e ndalon topin bukur në zonë dhe godet, por vetëm rrjetën e jashtme.
85'- Kros i rrezikshëm në zonë, me kokë Beqiri, një mbrojtës largon rrezikun nga zona e portës së tij.
86'- Një dalje e pasigurt e portierit Beqaj dhe lituanezët rrezikojnë sërish në portën tonë.
88'- Bogdani godet dhe rrezikon me kokë, pas një kombinimi të mirë të kuqezinjve në portën e Lituanisë.
89' - Gabon Hasi dhe lituanezët në kundërsulm kanë mundësi të shënojnë golin e sigurisë, por ndërhyn në fund më i sigurt Aliaj.

[Davius]

Nis me një humbje aventura miqësore e kombëtares sonë në prag të eliminatoreve të Europianit 2008.

Ndryshe nga dy vite më parë, teksa kuqezinjtë mposhtnin Suedinë në "Qemal Stafa", kësaj here janë dorëzuar pa kushte përballë një kundërshtari më inferior, por që ishte mjaft vital në fushën e lojës, si Lituania. Natyrisht, terreni shumë i rënduar ndikoi shumë në aspektin e spektaklit, pasi shiu nuk pushoi përgjatë gjithë takimit, por ama kuqezinjtë e Brigelit u mposhtën 1-2, ndonëse kishin kaluar të parët në avantazh me anë të Ardian Aliajt, i cili shndërroi në gol një penallti të dhënë në favor të Muratit. Por kaq ishte gëzimi i tifozerisë së paktë (rrallë mund të ketë ndodhur që në "Qemal Stafa" të kishte kaq pak tifozë), pasi miqtë nga Lituania kanë barazuar sa hap e mbyll sytë dhe po kaq shpejt kanë shënuar golin e avantazhit.

Ashtu siç ishte deklaruar edhe më parë, në formacionin titullar të skuadrës kuqezi, startojnë Arjan Beqaj (i rikthyer mes dy shtyllave pas një periudhe të gjatë) dhe kapiteni i Partizanit, Dorian Bylykbashi. Pjesa tjetër e formacionit ishte më se e njohur. Një vijë mbrojtëse me katër lojtarë Beqiri-Hasi-Cana-Aliaj, një mesfushë po me katër elementë Duro-Lala-Bylykbashi-Murati, si dhe dyshja e sulmit e përbërë nga dyshja Tare-Bushi.

Takimi nis i qetë dhe të dyja skuadrat nuk rrezikojnë shumë. Ngadalë kuqezinjtë krijojnë epërsi në terrenin e lojës, por mbrojtja është në një ditë të zezë, ku Hasi e Beqiri vuajnë shumë në mbulimin e kundërshtarëve. Megjithatë, Shqipëria kalon e para në avantazh falë golit të shënuar nga Aliaj me anë të 11-metërshit. Ka qenë një kombinim i bukur përpara zonës mes Bylykbashit dhe Muratit, ku ky i fundit është penguar nga kundërshtarët. Për gjyqtarin italian Pieri nuk ka dyshim dhe Aliaj ekzekuton saktë, duke kaluar kuqezinjtë në avantazh 1-0. Por në aksionin e radhës, menjëherë sapo është nisur loja nga mesi i fushës, lituanezët kanë barazuar me anë të Savenas, pas një goditjeje të mrekullueshme jashtë zonës. Ndërsa të gjithë mendonin se pjesa e parë do të mbyllej në barazim, kanë qenë sërish miqtë, që me anë të Danileviciusit kanë kaluar në avantazh, duke shfrytëzuar një gabim foshnjarak të mbrojtjes sonë. Gjithçka për sa i përket rezultatit është vendosur që në pjesën e parë të takimit, ndërsa në fraksionin e dytë Brigeli aktivizon thuajse të gjithë lojtarët e grumbulluar për këtë miqësore.

Kështu, zëvendëson dyshen Tare-Bushi, që nuk bëri thuajse asgjë në këtë takim, me atë Bogdani-Myrtaj, si dhe nxjerr nga fusha e lojës Bylykbashin për Skelën. Loja jonë sulmuese përmirësohet disi, por është sërish reparti mbrojtës ai që në këtë takim ka lënë shumë për të dëshiruar dhe nuk e ka kaluar "klasën". Lituania mund ta kishte thelluar avantazhin nëse do të kishin shfrytëzuar një 11-metërsh të dhënë në favor, por që është pritur mjeshtërisht nga Beqaj. Mes zëvendësimeve të shumta, ndonjë rasti sporadik për të barazuar shifrat dhe në praninë e një numri tifozësh të denjë për ndeshjet e kampionatit shqiptar, kombëtarja jonë e ka nisur keq vitin 2006, duke u mposhtur që në miqësoren e parë në shtëpi.

Por nëse rezultati i një ndeshjeje miqësore nuk është shumë i rëndësishëm, loja e zhvilluar është mjaft e rëndësishme dhe kombëtarja jonë ka zhvilluar një takim të dobët, ku fitorja e vetme ka qenë portieri Arjan Beqaj. Shqetësimi është krejt i natyrshëm duke gjykuar mbi atë çka pamë. Mjaft lojtarë si Myrtaj, Hasi, Bushi, apo edhe ndonjë tjetër, ka ardhur koha t'i japin lamtumirën kombëtares, ashtu siç është e nevojshme t'u krijohet një klimë më e ngrohtë debutuesve, që do të freskojnë radhët e kuqezinjve. Mbi të gjitha duhet të jemi të ndërgjegjshëm, se kombëtarja jonë në aventurën e Euro 2008-s nuk ka nevojë për makiazh, por për një operacion të thellë për ta nxjerrë nga gjendja alarmante që demonstroi mbrëmë. Këtë më mirë se askush duhet ta kuptojë trajneri Brigel, i cili para se të justifikohet, të analizojë dhe të marrë masat e nevojshme që kombëtarja jonë të mos bëjë një hap para dhe dy apo tre mbrapa.
Po të shikosh rezultatet e kundërshtarëve tanë në grup, ku Rumania ka fituar ndaj Sllovenisë, Bjellorusia ka barazuar në Finlandë apo fitoren e Bullgarisë në Maqedoni, ky start i kuqezinjve të bën të mendohesh, sidomos po të rikthesh në memorje atë lojë apatike, sidomos në "thembrën e Akilit", repartin e mbrojtjes.

Llambi Kallço
Sporti Shqiptar

[Cimo]

Janë shumë të pakta gjasat që tekniku gjerman të rinovojë kontratën me përfaqësuesen shqipetare. Persona pranë trajnerit ttë përfaqësueses shqiptare kanë konfirmuar në mënyrë të paidentifikuar se Hans Peter Briegel nuk ka dëshirë ta rinovojë kontratën e tij me shtetin shqiptar edhe për dy vjet të tjera. Sipas tij, takimi me Lituaninë i ka treguar më së miri trajnerit gjerman gjendjen e plogësht fizike në të cilën ndodhen aktualisht pjesa më e madhe e futbollistëve shqiptarë. Kjo për vetë moshën që kanë shumica e tyre (30 e sipër) por edhe se përqindja më e madhe e tyre nuk aktivizohen në klubet aktuale ose kanë qenë të dëmtuar për një kohë të gjatë dhe nuk janë akoma në formë. Gjithashtu sipas burimit në fjalë mësohet se trajneri gjerman nuk shikon ndonjë përmirësim në forcën e skuadrës pasi brezi i lojtarëve që ai mendon duhet larguar nuk ka se më kë të zëvendësohet. Ndoshta për 2-3 lojtarë këtu e atje mund të sajohet ndonjë zëvendësues por për të gjetur 7-8 lojtarë kualiteti duket si e pamundur. Besimi që ai ka tek lojtarët e kampionatit shqiptar është shumë i vogël ose aspak i konsiderueshëm prej tij. Një shqetësim i madh, i pashprehur në shtyp nga ana e tij është edhe pozicioni i Presidentit aktual të Federatës Shqiptare të Futbollit, Armando Duka. Ndonëse ai fitoi dhe u rizgjodh si President, qendrimi i tij në post është i lëkundur për vetë presionin e shtetit për ta hequr nga drejtimi i FSHF-së dhe për Brigel kjo përbën një shqetësim, ndoshta akoma zyrtarisht të pa shprehur. Siç dihet Duka është suportuesi kryesor i tij, megjithëse kohët e fundit nuk ka shprehur kryekëput që tekniku gjerman do të rikthehet përsëri si drejtues i kombëtares Shqiptare. Praktikisht, ndoshta kjo ishte ndeshja e fundit që Brigel u pa në krye të skuadrës kuqezi.

[dodoni]

Curri e Kastrati, Brigel i fton për anti- gjeorgjinë


Data e Publikimit: 09/03/2006

Autori i Lajmit:
A.L
Federata Shqiptare e Futbollit, ka nisur dje ftesat në adresë të dy futbollistëve më të rinj që priten t’i bashkohen kombëtares shqiptare, Debatik Curri dhe Bekim Kastrati. Sipas shefit të Sektorit të Ekipeve Kombëtare, Besnik Çela, trajneri Hans Peter Brigel ka dhënë Ok-in e tij që dy lojtarët të grumbullohen për ndeshjen e 22 marsit ndaj përfaqësueses gjeorgjiane. “Brigel më ka thënë nëpërmjet telefonit, se këta dy lojtarë bëjnë pjesë në listën e tij të madhe dhe unë sot u kam nisur ftesat”, - tha Çela. Gjithsesi, 22 marsi nuk është datë e lirë e UEFA-s dhe nëse do të vijnë apo jo, kjo do të varet nga dëshira e klubeve të tyre. “Nuk është çudi që edhe të mos vijnë përderisa është kështu. Megjithatë, duke qenë se është hera e parë, ndoshta lojtarët mund të jenë gati për takimin ndaj Gjeorgjisë”, - tha shefi i Ekipeve Kombëtare. Ndërkaq, dje janë marrë edhe dokumentet nga Ministria që të dy lojtarët të pajisen me pasaportë. Për ta duhet gjetur tashmë një shtëpi në Shqipëri dhe vetëm më pas mund të kërkohet pasaporta. “Unë sot kam marrë në MTKRS vendimin e presidentit për dhënien e shtetësisë dhe tashmë mund të nisin procedurat për pasaportën. Për këtë duhet gjetur në fillim një shtëpi për ta”, - sqaroi Çela. Sipas këtij të fundit, ndeshja ndaj Gjeorgjisë nuk do të jetë e fundit miqësore për këtë periudhë të mbetur të sezonit, por kanë nisur negociatat që të gjendet një kundërshtar edhe për muajin maj, kur ekipet do të jenë në përgatitje për kampionatin botëror. “Nuk mund të them emra konkretë, por po kontaktojmë me ekipe që janë në nivelin e Shqipërisë dhe pak më lart se ne”, pranoi shefi i Ekipeve Kombëtare. Një gjë e tillë ishte kërkuar edhe nga vetë Brigel në ditët e qëndrimit të tij në Shqipëri, në kuadër të ndeshjes ndaj Lituanisë. Ndërkaq, shumë pranë marrjes së nënshtetësisë shqiptare duket edhe sulmuesi që luan në Australi me Njukasëll Jets, Labinot Haliti. Skuadra e tij drejtohet nga një trajner gjerman dhe ndihmëstrajneri i përfaqësueses, Aksel Ros ka nisur personalisht kontaktet me këtë trajner, për të marrë vesh gjendjen dhe formën e tij si edhe të sjellë në FSHF gjithë dokumentet e nevojshëm për marrjen e pasaportës shqiptare.

[Davius]

Kundërshtari në miqësoren e 22 marsit e ka shpallur prej kohësh listën anti Shqipëri 16-03-2006

Anti-Gjeorgjia, lista ende "top-sekret"

Olsi Avdiaj

Në prag të takimit miqësor të 22 marsit mes Shqipërisë dhe Gjeorgjisë, asgjë nuk është e qartë se cilët lojtarë do të grumbullohen me kuqezinjtë. Të paktën pala shqiptare dhe kombëtarja jonë nuk ka zbardhur listën e lojtarëve, ndonëse duhen më pak se një javë nga zhvillimi i ndeshjes miqësore me Gjeorgjinë, trajneri Brigel dhe federata nuk kanë zbardhur akoma listën e lojtarëve, të cilët do të ketë gjermani në dispozicion për ndeshjen me gjeorgjianët.

Kështu, trajneri Brigel duhet të kishte sjellë listën e lojtarëve anti Gjeorgji. Por këtë gjë nuk e ka bërë akoma. Sipas informacionve në federatë, lista akoma nuk është bërë gati për t'u publikuar. Sektori i ekipeve kombëtare vazhdon të konfirmojë për median se lojtarët e kombëtares akoma nuk e kanë konfirmuar plotësisht ardhjen e tyre. Meqenëse trajneri Brigel kërkon skuadrën e parë, problemi duket se është shumë i ndërlikuar. Lojtarët nuk mund të marrin dot leje nga klubet dhe kështu gjermani po sheh të gjitha mundësitë për të formuar një ekip sa më të denjë. Gjithsesi, vonesa e listës nuk është shumë e justifikuar me faktin se trajneri Brigel po mundohet të mbledhë më të mirët.

Nga ana tjetër, Gjeorgjia ka disa ditë që ka shpallur listën e lojtarëve që do të udhëtojnë drejt Shqipërisë. Madje kjo listë është e përbërë nga shumica lojtarë që luajnë nëpër klubet e huaja, me në krye Kalaxen. Pra, duket qartë se konfirmimi i lojtarëve nuk është justifikim. Trajneri gjerman domosdoshmërisht duhet të kishte bërë publike listën e lojtarëve, të cilët do të grumbullohen me Shqipërinë për miqësoren me Gjeorgjinë. Ndërkohë, kuqezinjtë do të grumbullohen si zakonisht në hotel "Adriatik" që ditën e diel. Stërvitjet do t'i zhvillojnë në Durrës dhe Shijak, ndërsa të mërkurën, më 22 mars, ora 18.00, në stadiumin kombëtar "Qema Stafa" pritet që të zhvillohet edhe ndeshja miqësore. Në fund, për këtë takim miqësor, gjyqtar do të jetë italiani Rodomonti.

Ca të nënës e ca të njerkës

Sektori i garave, dy ditë më parë, ka marrë një vendim për të zhvillimin e derbit mes Tiranës dhe Partizanit ditën e diel. Normalisht, derbi duhej të luhej ditën e shtunë, por meqenëse policia nuk e ka marrë përsipër mbarëvajtjen e saj këtë ditë, shefi i sektorit të garave ka vendosur të luhet ditën e diel. Normalisht, deri këtu nuk ka asgjë që nuk shkon. Por problemi del kur në moment, për hatër të kushedi se kujt, shtyhet edhe ndeshja Shkumbini Elbasani. Justifikimi i garave është i thjeshtë, por aspak i besueshëm. Ekipet luftojnë për kampionat dhe kështu do të luajnë në një ditë. Gjithsesi, kjo histori nuk është shumë bindëse, sepse pikërisht kohë më parë, një nga drejtuesit e Tiranës është shprehur se Elbasani favorizohet nga kalendari. Dhe kur një ditë ndodh që në kalendar Elbasani t'i zhvillojë ndeshjet para Tiranës dhe Partizanit, menjëherë federata ndërhyn dhe bën të pamundurën për të ekuilibruar gjithçka. Gjithsesi, kjo është lojë e pandershme e federatës në kurriz të kryeqytetasve, që normalisht kërkojë drejtësi, por që duket se vazhdon t'u mohohet nga federata.

[dodoni]

Edhe per te, duhet te fillojne procedurat e veshjes kuqezi sa me pare.

Besart Berisha: Jam gati për fanellën kuqezi

Driton Latifi

Ai e pranon se nuk është shumë i njohur me rrjedhat e futbollit shqiptar, por kërkon me ngulm që një dokument udhëtimi me shqiponjën dykrenore të stampuar t'i jepet sa më parë. Besart Berisha para disa kohësh kishte tentuar të merrte pasaportën shqiptare në Ambasadën e Shqipërisë në Berlin. "Kur kisha probleme me pasaportën, iu drejtova për ndihmë edhe Ambasadës Shqiptare në Berlin, por nuk ma dhanë pasaportën për arsye të caktuara. Jam i bindur se janë edhe shumë lojtarë të tjerë shqiptarë, që kërkojnë pasaportë shqiptare dhe janë të gatshëm të derdhin djersën e tyre vetëm për fanellën kuqezi. Ata nuk duhet me i lënë anash, duhet me i afrua, sepse një ditë ata do të bëhen futbollistë të mëdhenj. Nëse kombëtarja shqiptare është e interesuar për mua, ja ku jam. Nëse ka nevojë, nisem që sot nga Danimarka për të veshur një fanellë kuqezi. Mos të harrojnë, unë jam shqiptar,"- thotë Berisha. Me një kontratë si profesionist me ekipin Hamburg SV në xhep, por pa të drejtë aktivizimi për shkak të problemeve me lejen e qëndrimit në Gjermani, Besart Berisha para dy vitesh kishte bredhur nëpër institucionet kosovare për të marrë një dokument udhëtimi të UNMIK ut, që do t'i lejonte atij hyrje legale në Gjermani dhe për të vazhduar me punën e profesionistit. "Trajneri Klaus Topmëler, kur bisedoja me të, pasi më kishte marrë nga Berlini, thoshte se më llogariste në planet e tij dhe ishte duke më pritur. Në Prishtinë nxjerrja e pasaportës po vonohej. Isha vërtet i dëshpëruar, mendoja se nuk do të arrija të kthehem te Hamburgu dhe duhej të luaja në Kosovë,"- thotë që në fillim të bisedës, Besart Berisha. Ai ishte futur ilegalisht me familjen e tij në Gjermani, që kur ishte shtatë vjeçar, më 1992, në tentim për t'i shpëtuar dhunës serbe dhe për të siguruar një leje qëndrimi. Atje Berisha kishte filluar të lunte futboll te disa skuadra moshash, për të kaluar te TeBe Berlin, nga ku talentin e tij e kishin nuhatur ekspertët e Hamburgut, që i kishin ofruar një kontratë profesionale në moshën 17 vjeçare. Por këtu kishin filluar problemet, pasi autoritetet gjermane, me rregullimin e situatës në Kosovë, i kishin kërkuar edhe atij të kthehej në vendlindje. Pas rregullimit të pasaportës, që kishte zgjatur disa muaj, Berisha ishte kthyer te Hamburgu. "Kur u ktheva skuadra kishte përfunduar fazën përgatitore dhe për mua ishte një sezon i dështuar. Ekipi më huazoi te skuadra e ligës së parë daneze, Aalborg, por ekipi i Hamburgut, në tentativë që të më ruante, kishte kërkuar nga danezët shuma të mëdha parash për çdo ndeshje që unë do të luaja për këtë skuadër. Pas një viti, Hamburgu më huazoi sërish te AC Horsens, sepse kishte angazhuar sulmues me eksperiencë dhe shpreheshin se unë kam nevojë për diçka të tillë,"- thotë ai. Deri tani 20 vjeçari Berisha ka shënuar 7 gola në kampionatin danez. "Kampionati danez është shumë i vështirë të përballohet, sidomos në ekipin ku jam, që është një skuadër e re. Sezonin e ardhshëm Hamburgu ka shprehur interesim dhe kërkon të më kthejë, sepse kam kontratë me ta, por janë edhe disa skuadra të tjera të interesuara për mua në Gjermani dhe Danimarkë. Trajneri aktual Doll i njeh aftësitë e mia dhe unë besoj se Hamburgu më llogarit mua për të ardhmen, pasi më ndjekin gjatë ndeshjeve, ndërsa trajneri Thomas Doll, me të cilin kam punuar për katër muaj, ka njoftuar se do të asistojë në një ndeshje timen të kampionatit danez", - përfundon kosovari Besart Berisha, i cili është i gatshëm dhe në pritje të një ftese nga ana e FSHF-së, për të provuar aftësitë e tij me fanellën kuqezi të kombëtare.

[zeus]

-----------------------------------------------------

Lista anti Gjeorgji

1.Ilion Lika Dinamo
2.Isli Hidi Tirana
3.Armend Dallku Vorksla Polltava
4.Debatik Curri Vorskla Polltava
5.Arjan Pisha Tirana
6.Altin Lala Hanover 96
7.Altin Haxhi Anorthosis
8.Klodian Duro Tirana
9.Ervin Skela Kaizersalutern
10.Ansi Agolli Nojshatel Ksamaks
11.Ardit Beqiri Partizani
12.Erion Bogdani Siena
13.Bekim Kastrati B.Mynchengladbah
14.Hamdi Salihi Tirana
15.Edmond Kapllani Karlsruhe
16.Redi Jupi Diarbakirspor
17.Dorian Bylykbashi Partizani
18.Erion Xhafa Dinamo
19.Admir Teli Vllaznia
20.Endri Vrapi Elbasani
21.Ervis Kraja Besa

-----------------------------------------------------

[zeus]

--------------------------------------------------
U-21

1.Andrea Koliqi Iraklis, Greqi
2.Xhimi Tufina Savona, Itali
3.Olsi Bishami Vllaznia
4.Andi Lila Besa
5.Jetmir Sefa Tirana
6.Marlon Dollaku Teuta
7.Gilman Lika Vllaznia
8.Restiald Agolli Skënderbeu
9.Erion Dushku Kastrioti
10.Aldo Bello Turbina
11.Denis Mema Apolonia
12.Emiljano Veliaj Besa
13.Rigers Hysko Tomori
14.Juliam Gërxho Apolonia
15.Bledar Hodo Teuta
16.Erald Guma Flamurtari
17.Orjand Abazaj Shkumbini
18.Renato Arapi Besa
19.Eleandro Pema Dinamo
20.Elis Bakaj Partizani
21.Arbër Abilaliaj Partizani
22.Besion Çeliku Tirana
23.Bledion Guga Flamurtari
24.Aldo Dyrmishi Triestina, Itali

--------------------------------------------------