Bashkëkombës të nderuar,
Kur e filluam këtë projekt para gjashtë vjetësh, kishim shpresë edhe frikë njëkohësisht.
Shpresë se edhe gjuhën shqipe do ta fusnim në mesin e gjuhëve të kompjuterizuara, ndërsa frikë sepse ishim të vetëdijshëm se do të ballafaqoheshim me shumë vështirësi, që nga vështirësitë gjuhësore me të cilat kombi ynë ballafaqohet për dekada të tëra, vështirësitë financiare e deri të pengesat burokratike në institucionet tona shkencore e shtetërore.
Shpresën nuk e humbëm asnjëherë, ndërsa frikën e mposhtëm me punën e zellshme dhe me përkushtimin e punëtorëve, të bashkëpunëtorëve dhe të partnerëve tanë.
Realizime të këtilla janë të rralla në historitë e gjuhëve, madje edhe te kombet e zhvilluara. Për këtë arsye, pa modesti e me kënaqësi të madhe, para jush paraqesim doracakun, përkatësisht programin kompjuterik për drejtshkrim AS 2.0, të realizuar nga Qendra për Edukim dhe Përparim (QEP).
Ky program është një pjesë e projektit “Gjuha shqipe dhe kompjuteri”, projekt me synime edhe më të mëdha. Në kuptimin e plotë të fjalës, mendojmë se ky projekt, i mbështetur nga gjuhëtarët më të shquar shqiptarë, shënon një epokë të re për gjuhën shqipe, konstatim ky i bazuar në përvojat që kanë pasur gjuhët e kombeve të zhvilluara.
Programi AS 2.0 është i njëjtë me programet e gjuhëve të tjera në kuadër të Microsoft Office-s dhe në pajtim me programin operativ Microsoft Windows të çdo versioni. Me këtë program për drejtshkrim korrigjohen mbi 1 milion fjalë e trajta fjalësh, përkatësisht rreth 4 milion trajta të përsëritshme.
Shfrytëzuesit nuk i duhet trajnim i veçantë për përdorimin e këtij programi, mjaftojnë pesë minuta për përvetësimin e tij.
Madje, korrigjimi automatik mund të ketë ndikim të madh edhe nëse shfrytëzuesi nuk e di që programi është i instaluar në kompjuterin e tij.
Bashkëkombës të nderuar,
Kur shumëkush kishte hequr dorë nga zgjidhja e problemit të drejtshkrimit të gjuhës shqipe, ne e morëm atë si prioritet që duhej zgjidhur. Me punë ekipore, me një Ekip të mbikëqyrjes së saktësisë gjuhësore, me partnerë ndërkombëtarë dhe vendës dhe me përkrahje morale të institucioneve tona me të larta shtetërore, ia arritëm qëllimit.
Ndërsa tash, në saje të licencës ekskluzive që Qeveria e Kosovës ka blerë nga QEP-i, çdo banor i Kosovës, brenda dhe jashtë vendit, do të ketë të drejtën e shfrytëzimit falas të këtij softueri.
Ndonjëherë në jetë gjendemi para sfidave të mëdha, por, përkundër vështirësive të shumta, dashuria e madhe për gjuhën shqipe bëri që ky projekt të kurorëzohet me sukses.
Me përdorimin e këtij programi ju nuk do të jeni më vëzhgues të rëndomtë të bastardimit të gjuhës amtare, por do të kontribuoni në ngritjen e nivelit të saj çdo ditë e më shumë.
Ky projekt është një tregim që do të vazhdojë…
Lulëzim Shishani,
Nismëtar dhe udhëheqës i projektit
GJUHA SHQIPE DHE KOMPJUTERI
---------------------------------------------------------
Mesazhi më lart është marrë nga faqja zyrtare e projektit, prej ku mund të shkarkoni edhe programin kompjuterik për drejtshkrim AS 2.0. Stafi i forumit do studiojë mundësitë që programi i drejtshkrimit të mund të përdoret edhe në shkrimet e forumit. Ndërkaq, të gjithë duhet të përpiqemi që të studiojmë dhe të shkruajmë sa më mirë gjuhën shqipe.
Falënderoj ekipin e Qendrës për Edukim dhe Përparim, e të gjithë personat që kanë ndihmuar në realizimin e këtij projekti kaq të rëndësishëm.
Përgjigju Duke Cituar
Krijoni Kontakt