GK: Jo ndarje, jo bashkim, jo ish statusit të Kosovës

[Harudi]

Nesër në Prishtinë mblidhet Grupi i Kontaktit Plus

Prishtinë, 14 qershor - Nesër në Prishtinë mblidhet Grupi i Kontaktit Plus, i cili do të ketë disa takime me drejtuesit më të lartë insitucionalë e politikë të Kosovës. Në këto takime do të marrë pjesë edhe Kai Aide, i dërguari i Kofi Ananit, i cili është caktuar për vlerësimin gjithëpërfshirës të standardeve.
Gazeta "Zëri" duke cituar burime ndërkombëtare në Prishtinë, shkruan se diplomatët nga Grupi i Kontaktit do të kenë takime të veçanta me zyrtarët më të laatë të Kosovës: Presidentin Ibrahim Rugova, Kryeministrin Bajram Kosumi dhe Kryeparlamentarin Nexhat Daci, ndërkaq takimin e dytë me drejtuesit e partive opozitare, si dhe një takim tjetër me përfaqësuesit serbë.
Në këto takime pritet të bëhet vlerësimi i zhvillimeve më të rëndësishme ndërmjet dy takimeve të Grupit të Kontaktit sidomos i dy çështjeve: përmbushjes së standardeve prioritare dhe i reformimit të pushtetit lokal.
Takimet organizohen nga Zyra amerikane, ndërkaq qeverinë amerikane do ta përfaqësojë Çarls Inglish, drejtor për çështje të Evropës Juglindore në Departamentin e Shtetit, kurse veenet e tjera në Grupin e Kontaktit do të përfaqësohen nga drejtorët politikë të ministrive të jashtme.

Kosova Home Page

[Harudi]

E mërkurë, 15. Qershor, 2005

DECENTRALIZIMI DHE LIRIA E LËVIZJES- TEMAT QËNDRORE NË TAKIMIN E GRUPIT TË KONTAKTIT



Zijadin Gashi, Prishtinë


Përshpejtimi i zbatimit të pilot-projekteve dhe përparimi në lirinë e lëvizjes, janë çështje në të cilat në Kosovë duhet të punohet më shumë, është thënë sot pas takimit, që Grupi i Kontaktit Plus ka mbajtur me udhëheqësit e institucioneve të Kosovës, ata të opozitës, si dhe ata të pakicave. Nikoqir i takimit të sotëm ka qenë Zyra Amerikane në Prishtinë, ku kanë qenë të pranishëm dhe udhëheqësit më të lartë të Misionit të Kombeve të Bashkuara, komandanti i KFOR-it, si dhe i deleguari special i zotit Kofi Anan për standardet, ambasadori Kai Eide. Presidenti i Kosovës Ibrahim Rugova, tha se e çmonte lartë përkushtimin e Grupit të Kontaktit për Kosovën dhe priste që Kai Eide të materializonte në letër përparimin e arritur në Kosovë, duke i hapur rrugën kështu, sipas tij, pavarësimit të Kosovës:
"Është vlerësim i tyre si grup që ka punuar prej një viti me ne dhe është me rëndësi që ka progres që e vlerësojnë. Natyrisht raporti i Kai Eides është një formalizim i këtij progresi, i cili do të hapë dritën e gjelbërt për të ardhmen për pavarësinë e Kosovës sipas rrugës ndërkombëtare. Unë përsëri po them që insistoj për një njohje të drejtpërdrejtë të pavarësisë, që është më e mirë për këtë pjesë të Evropës dhe botës".
Ndërkohë, kryeministri i Kosovës, Bajram Kosumi, tha se Grupi i Kontaktit kishte dhe disa kërkesa specifike për qeverinë e tij, në të cilat kërkohej më tepër angazhim, e që kryesisht ndërlidhen me pozitën e pakicës serbe në Kosovë:
" Janë evidentuar disa prej çështjeve ku duhet punuar më shumë në Kosovë. Unë mund të them tani dy prej atyre çështjeve, decentralizimi dhe minoritetet. Duhet të fillohet sa më shpejt që është e mundur me pilot-projektet, të cilat janë debatuar në Kuvend dhe janë bërë rekomandimet e deputetëve. Duhen bërë veprime të tjera për lëvizjen e lirë të qytetarëve në tërë Kosovën."
Në anën tjetër, përfaqësuesit e opozitës veçuan dhe disa çështje të tjera të ngritura në takim me Grupin e Kontaktit. Kryetari i PDK-së, Hashim Thaçi, tha se Grupi i Kontaktit po dëgjon çdo herë e më tepër edhe vizionin e opozitës. Ai kërkoi funksionalizimin sa më të shpejtë të Forumit politik dhe unifikimin e platformës politike të palës kosovare, para diskutimeve për statusin e Kosovës:
"Mendoj se optimizmi i Grupit të Kontaktit varet nga puna konkrete që ne bëjmë. Jemi optimistë dhe jemi duke punuar konkretisht që suksesi të ndodhë dhe nga ky sukses, jam i sigurt se do të ndodhë vlerësimi pozitiv teknik, por natyrisht dhe një vlerësim pozitiv në aspektin politik, me vërejtje dhe sugjerime, të cilat janë evidente, veçanërisht sa i përket funksionimit demokratik të institucioneve, ku ka vërejtje të mëdha lidhur me autoritarizmin në parlamentin e Kosovës, për mostransparencën në punën e qeverisë dhe mosrespektimin e ligjeve", tha Hashim Thaçi. Ndërkaq kryetari i partisë politike “Ora”, Veton Surroi, tha se me Grupin e Kontaktit janë biseduar dhe çështje të tjera që kanë të bëjnë me funksionalizimin e institucioneve, luftimin e krimit dhe mënjanimin e strukturave paralele:
"Çështjet janë ato që janë thënë edhe më herët, domethënë është funksionimi i institucioneve demokratike. Kuvendi nuk mund të rrijë e të mbajë mbledhje një herë në muaj, trajtimi me çështje më serioze siç janë strukturat paralele të sigurisë, çështja e krimit të organizuar dhe e krimit të organizuar të lidhur me strukturat politike, çështja e konsensusit në decentralizim, çështja e konsensusit për krijimin e platformës unike për pregatitjen për statusin e Kosovës. Këto janë çështje të cilat duhen trajtuar në shoqëri".
Më pas Grupi i Kontaktit ka zhvilluar takim edhe me përfaqësuesit serbë nga Lista Serbe për Kosovën e Metohinë. Goran Bogdanoviq tha se me Grupin e Kontaktit është biseduar për decentralizimin, kthimin e serbëve në institucione dhe standardet:

“I kemi paraqitur Grupit të Kontaktit se edhe ne si Listë Serbe, jemi të ndarë në qëndrime lidhur me pjesëmarrjen tonë në institucionet e Kosovës”, tha Bogdanoviq. Këto qëndrime të ndara sipas tij, janë rezultat i mungesës së një qëndrimi të qartë të Beogradit.
Grupit të Kontaktit Plus mban takime të rregullta me përfaqësuesit më të lartë të pranisë ndërkombëtare dhe ata vendore në Kosovë çdo gjashtë javë, ku bëhet shqyrtimi i zhvillimeve aktuale dhe jepen sugjerime në lidhje me proceset, me të cilat aktualisht po ballafaqohet Kosova.

RFE

[Harudi]

GK SHPREHU SHQETËSIME PËR NGADALËSINË E PROGRESIT NË FUSHAT QË KANË TË BËJNË ME PAKICAT



Rrahman Paçarizi, Prishtinë


Përfaqësuesit e vendeve anëtare të Grupit të Kontaktit që kanë zyrat e tyre në Prishtinë, i kanë shprehur sot kryeministrit të Kosovës Bajram Kosumi shqetësimin e tyre të thellë për ngadalësinë në proceset që kanë të bëjnë me pozitën e pakicave, ndërkohë që kanë theksuar se ka pasur përparime në shumicën e standardeve. Duke folur në emër të Grupit të Kontaktit, shefi i zyrës amerikane në Prishtinë, Philip Goldberg, tha se ata ishin pajtuar me kryeministrin që kishte përparime në shumicën e standardeve në Kosovë. Duke theksuar se shprehte qëndrimin e Grupit të Kontaktit dhe të Shteteve të Bashkuara të Amerikës, zoti Goldberg ka tërhequr vërejtjen se raporti i zotit Eide nuk mund të merret si një punë e kryer, pasi çështja e vlerësimit pozitiv apo negativ mbetet një çështje e hapur:
"Ne duam që procesi të ecën përpara dhe bisedimet për statusin përfundimtar të fillojnë sa më shpejt që të jetë e mundur, por raporti që po përgatit ambasadori Kai Eide për Kombet e Bashkuara, nuk është një çështje që dihet më parë," tha Goldberg, duke shpjeguar se ky ishte një nga qëndrimet e mbledhjes së fundit të drejtorëve të Grupit të Kontaktit me ambasadorin Kai Eide në Londër:
"Ne kemi ardhur sot për të shprehur disa shqetësime, disa shqetësime tonat të thella për përparimin e ngadalshëm që është bërë në disa fusha të caktuara, në ato fusha që përgjithësisht kanë të bëjnë me gjendjen e komuniteteve pakicë të Kosovës," tha zoti Goldberg. Ai tha se Grupi i Kontaktit është përqendruar në përkushtimin politik dhe lidershipin që nevojitet për të bërë përparim në fushat siç është decentralizimi.
Ndërkaq, duke folur lidhur me porositë e sotme të Grupit të Kontaktit, kryeministri i Kosovës Bajram Kosumi, tha se një porosi të tillë përmbante edhe letra që kishte marë tre ditë më parë nga drejtori politik i Ministrisë së Jashtme të Britanisë së Madhe, John Sawers:
"Grupi i Kontaktit mendon se ka një ngadalësim të madh në këtë proces dhe unë e pranova sot këtë mesazh nga GK dhe dëshiroj t’ju them se në Kosovë ka një progres shumë të madh në të gjitha sferat, sidomos në realizimin e standardeve, ndërsa ka një përparim më të ngadalshëm në procesin e decentralizimit, edhe pse edhe aty ka ecje përpara".
Kryeministri i Kosovës bëri të ditur para zotit Philip Goldberg se qeveria kishte destinuar së fundi 500 mijë euro për pilot-projektet dhe tash ishin në kërkim të emrave të këshilltarëve për njësitë provuese komunale. Kryeministri Kosumi tha se kjo ishte një punë e vështirë për shkak të pengesave që po paraqet Beogradi në këtë drejtim:
"Këtu ka disa vështirësi, sepse këtu përfshihet edhe obstruksioni që bëhet nga qeveria e Beogradit. Ajo është duke i penguar serbët e Kosovës që të jenë pjesë e këtij procesi – është duke bërë presion mbi ta dhe është duke i shantazhuar madje, që të mos jenë pjesë e procesit", tha kryeministri i Kosovës Bajram Kosumi, ndërsa shefi i zyrës amerikane në Prishtinë, Philip Goldberg lidhur me këtë tha:
"Është e vërtetë se Beogradi nuk bashkëpunon në këtë projekt, por ne po kërkojmë lidershipin dhe vullnetin e qeverisë në emër të popullit të Kosovës, për statusin përfundimtar të të cilës është me shumë rëndësi që procesi të shkojë përpara ashtu siç u është premtuar drejtorëve politikë të Grupit të Kontaktit," tha Goldberg.
Shefi i zyrës amerikane duke folur në emër të Shteteve të Bashkuara, ka thënë se për shumë çështje në Kosovë ka nevojë për ndërtimin e konsensusit ndërmjet komunitetit politik shqiptar të Kosovës, qeverisë, opozitës dhe shoqërisë civile, për mënyrën se si të shkohet përpara në këto çështje që kanë të bëjnë me pakicat e posaçërisht me serbët, për t’i bërë ata të ndihen të sigurt dhe të dëshirojnë të qëndrojnë në Kosovë, si dhe për t’u siguruar që ata që nuk janë në Kosovë, do të kthehen me krijimin e një ambjenti të tillë.

RFE

[Harudi]

E diele, 7. Gusht, 2005

ARIFI: QEVERIA DO T'I DËSHMOJË Z. EIDE SHUMËÇKA NGA PËRPARIMET NË STANDARDET



Kai Eide fillon turin final në Kosovë


Qeveria e Kosovës është e gatshme t’ia prezantojë të arriturat e deritashme në përmbushjen e standardeve, ambasadorit Kai Eide, i cili javën e ardhshme do të vijë në turin e tretë të vizitave të tij Kosovës, në cilësinë e të dërguarit të posaçëm të Sekretarit të Përgjithshëm të Kombeve të Bashkuara, Kofi Anan, për vlerësimin e thellësishëm të standardeve dhe aspekteve të tjera politike të situatës në Kosovë. Koordinatori i Qeverisë së Kosovës për standardet, Avni Arifi tha për Evropën e Lirë se përderisa në vizitat e mëhershme zoti Kai Eide, pjesën më të madhe të kohës e ka kaluar në terren, duke vlerësuar të arriturat dhe përparimet në përmbushjen e standardeve, këtë radhë më shumë do të diskutojë me vetë institucionet:
"Në fazën e tretë ne presim që një pjesë të madhe të kohës do ta kalojë me ne duke shikuar pikërisht të dhënat që dalin nga plani për implementimin e standardeve, rezultatet dhe dokumentacionin e ndryshëm që ekziston lidhur me implementimin e këtyre standardeve."
Koordinatori i qeverisë për standardet zoti Avni Arifi tha se qeveria ka shumëçka nga përparimet në përmbushjen e standardeve për të dëshmuar para zotit Kai Eide, duke pasur parasysh dokumentin me 460 pika, shumica e të cilave tashmë janë përmbushur, ndërkohë që sfida më e vështirë mbetet kthimi i të zhvendosurve:
"Në implementimin e këtyre detyrave është një progres shumë i madh, të cilin edhe KS e ka vlerësuar më 27 maj. Ne do të bisedojmë për të gjitha këto të arritura, ndërsa sa u përket sfidave kryesore që dalin, kryesore mbetet, sfidë e vetme dhe më vështirë numri i vogël i të kthyerve."
Në të vërtetë pas një takimi me ambasadorin Eide, Grupi i Kontaktit pati bërë vërejtje lidhur me numrin e vogël të personave të zhvendosur që kanë vendosur të kthehen në Kosovë, duke kërkuar njëkohësisht angazhim konkret të liderëve në terren. Zoti Arifi tha se sa i përket kësaj sfide qeveria ka argumentet e veta, pasi fakti që donatori më i madh për kthimin mbetet qeveria e Kosovës është një dëshmi e përkushtimit të sinqertë dhe konkret të institucioneve për realizimin e këtij procesi, ndërkohë që secila komunë e Kosovës tashmë ka miratuar strategjinë për kthim:
"Nuk ka asnjë rezistencë në asnjë komunë të Kosovës ndaj kthimeve dhe ata qytetarë që janë kthyer në shumicën e rasteve sa i përket akceptimit të tyre janë të kënaqur, mirëpo komponenti ekonomik është një prej faktorëve që po e pamundëson edhe qëndrimin e tyre, edhe kthimin e më shumë serbëve."
Sipas zyrës së UNMIK-ut për kthim dhe komunitete deri më tash në Kosovë janë kthyer 13 mijë persona të zhvendosur, ndërkohë që kanë mbetur edhe rreth 150 mijë të tjerë. Fondet për realizimin e kthimit të qëndrueshëm janë të pamjaftueshme kanë thënë zyrtarët e UNMIK-ut, serbët e kthyer disa herë kanë theksuar se pengesa kryesore për kthimin nuk është tashmë mungesa e sigurisë, por komponenti ekonomik.
Sidoqoftë, kjo pritet të jetë vizita e fundit e zotit Eide në kuadër të misionit të tij, ndërsa raporti i tij pritet të jetë i gatshëm deri në fund të shtatorit, edhe pse vetë zoti Eide ka thënë se nuk do të donte që koha e përpilimit të raportit t’i kufizohej. Një raport pozitiv i zotit Eide, do të hapte rrugën për procesin e përcaktimit të statusit përfundimtar të Kosovës.

Rrahman Paçarizi
RFE

Koordinatori i qeverisë për standardet zoti Avni Arifi tha se qeveria ka shumëçka nga përparimet në përmbushjen e standardeve për të dëshmuar para zotit Kai Eide, duke pasur parasysh dokumentin me 460 pika, shumica e të cilave tashmë janë përmbushur, ndërkohë që sfida më e vështirë mbetet kthimi i të zhvendosurve:

Søren Jessen Petersen,kohë më parë deklaroi se nga Institucionet e Kosovës,pritet të përmbushen vetëm 63-65 pika nga dokumenti për tetë standartet,(nga gjithësej 460 pika)me çka Kosovës do t'i ipej drita jeshile për të filluar biosedimet për statusin politik.
Avni Arifi thot se shumica nga 460 pikat qenkan përmbushur...!!!
GK,ka vërejtje serioze ndaj Institucioneve të Kosovës për dembelizëm...
Muajin tjetër,pra në shtator Institucionet e Kosovës kanë provim para Kai Eide...


A ka vend për optimizëm,se do të kalojmë?

[Harudi]

E premte, 12. Gusht, 2005

QEVERIA MERR MBËSHTETJEN E GK-SË DHE UNMIK-UT PËR DECENTRALIZIMIN, SERBËT ENDE PA QËNDRIM






Pas mbështetjes që ka marrë nga Grupi i Kontaktit varianti B i planit të Qeverisë së Kosovës për decentralizimin, zëvendësshefi i UNMIK-ut Larry Rossin, ka nënshkruar pesë vendime ekzekutive për përkufizimin territorial të pesë pilot-njësive komunale. Sipas këtyre vendimeve, pilot-komuna e Junikut do të ketë në vete fshatrat Junik, Gjocaj, Rastavicë, Sllup dhe Voksh. Në kuadër të pilot-komunës së Parteshit, me shumicë serbe, do të jenë edhe Budriga e Poshtme dhe Cërnica. Në kuadër të Hanit të Elezit do të jenë 11 fshatra - Dimca, Dromjaku, Goranca, Kriveniku, Neçavci, Palivodenica, Pusteniku, Rezhanca, Seqishta dhe Vërtollnica. Në kuadër të Graçanicës do të jenë Ajvalia, Llaplasella, Preoci dhe Sushica, ndërsa Mamusha me shumicë turke do të jetë një zonë e vetme kadastrale.
Paraprakisht, pas një takimi me zëvendësshefin e UNMIK-ut Larry Rossin, përfaqësuesit e vendeve anëtare të Grupit të Kontaktit i kanë dhënë mbështetje unike variantit B të planit të qeverisë së Kosovës për decentralizimin. Ata njëkohësisht ftuan serbët e Kosovës që të rishqyrtojnë qëndrimet e tyre dhe t’i përgjigjen reciprokisht gatishmërisë së qeverisë për të mundësuar fillimin e jetësimit të pilot-projekteve, pasi zoti Rossin sot paradite kishte vlerësuar bashkë me kryeministrin e Kosovës Bajram Kosumi se varianti B ishte një ofertë e sinqertë dhe serioze drejtuar serbëve të Kosovës për jetësimin e njësive provuese për reformën e pushtetit lokal.
Shefi i zyrës amerikane në Prishtinë, Philip Goldberg tha se qeveria e Kosovës i ka marrë seriozisht kërkesat e Grupit të Kontaktit dhe në dobi të veten dhe të së ardhmes së Kosovës ka bërë një ofertë e cila do mbështetur:
"Grupi i Kontaktit ka qenë unik lidhur me këtë çështje dhe ka mbështetur UNMIK-un dhe qeverinë në përpjekjet për ta mbajtur derën të hapur dhe për të qenë më të dobishëm, dhe në këtë kuptim, ne e kemi mbështetur planin", tha Goldberg. Ai tha se puna më e rëndësishme e qeverisë është nisja e dialogut me serbët vendorë:
"Unë mendoj se qeveria, kryeministri dhe ministri Haziri sinqerisht e kanë rishqyrtuar planin e njësive provuese për zonat serbe dhe kanë diskutuar me bashkësinë ndërkombëtare. Por ajo që është me rëndësi ato kanë nisur një dialog me disa nga liderët e serbëve të Kosovës", tha Goldberg, ndërkohë që shefi i zyrës franceze në Prishtinë, Thierry Reynard e quajti planin e qeverisë të arsyeshëm:
"Ka pasur një konsensus të gjerë në mesin e Grupit të Kontaktit dhe kemi një propozim të arsyeshëm nga institucionet e Kosovës, prandaj mendojmë se pilot-projektet mund të ecin përpara."
Ndëkrohë që serbët e Kosovës kanë thënë dje se varianti B i shpallur nga qeveria nuk është një ofertë e mjaftueshme për serbët, zoti Ryenard i ka ftuar serbët e Kosovës të marrin pjesë në proces:
"Shpresojmë se të gjithë do të jenë pjesë e procesit dhe që serbët e Kosovës do t’i rishqyrtojnë qëndrimet e tyre dhe të marrin pjesë", tha Reynard, ndërsa shefi i zyrës amerikane, Philip Goldberg tha se askush nuk mund t’i detyrojë njerëzit të jenë pjesë e një procesi. Kjo është një mundësi dhe ka ide për rrugët përpara për të mbajtur derën të hapur dhe për t’u thënë atyre se nëse duan mund të vijnë:
"Mendoj se në të njëjtën kohë ka probleme me palën serbe, e sidomos me Beogradin për të dhënë më shumë hapësirë për të ecur përpara lidhur me këto çështje", tha zoti Goldberg, duke ftuar serbët që t’i përgjigjen me reciprocitet ofertës së qeverisë.

Rrahman Paçarizi

RFE