Schiavo vdes.

[manoklla]

Gati dy javë pas heqjes së tubit ushqyes, gruaja me tru të dëmtuar jep shpirt. Çështja e saj angazhoi edhe Kongresin amerikan

Vdekja e Schiavos ndez debate në SHBA


FLORIDA – Është shuar dje jeta e Terri Schiavo-s, gruas me tru të dëmtuar, e cila u bë qendra e një debati mbarëkombëtar në SHBA. Ajo jetoi gati dy javë që nga koha kur me vendim gjyqësor iu hoqën tubat ushqyes që e mbanin në jetë për gati 15 vjet. Schiavo vdiq dje në moshën 41 -vjeçare ndërkohë që ajo jetonte që nga viti 1990 në një gjendje të vazhdueshme vegjetative, pas një pushimi zemre. Mjekët kishin konstatuar se gjendja e saj nuk do të përmirësohej kurrë, megjithatë palët e përfshira në debat kanë kërkuar që pas vdekjes asaj t’i bëhet një autopsi për të parë se sa të shkatërruar ishin trutë e saj dhe a kishte mundësi për ndonjë përmirësim të mundshëm. Historia e Terri Schiavos ka kaluar për gati 7 vjet në gjyqe dhe së fundi në këtë çështje u përfshi dhe Kongresi amerikan dhe presidenti Bush. Nga njëra ana e procesit gjyqësor qëndronte i shoqi, Michael Schiavo i cili kërkonte heqjen e tubave ushqyes dhe lënien e Territ të vdiste natyrshëm, dhe nga ana tjetër qëndronin prindërit e saj të cilët donin që ajo të mbahej në jetë artificialisht. I shoqi argumentonte që Terri nuk donte të jetonte në një gjendje të tillë për gjithë jetën dhe ajo duhej të lihej e qetë. Por vdekja e Territ dje ka shkaktuar një emocion të madh mes gjithë të interesuarve në këtë çështje, veçanërisht mes përkrahësve të prindërve të Territ. Një grup protestuesish që qëndronin përballë spitalit ku po jepte shpirt Terri, me vdekjen e saj nisën të këndonin himnet mortore. Përkrahës të prindërve të Territ, që ajo të vazhdonte të jetonte kanë qenë kryesisht aktivistët fetarë konservativë, aktivistët kundër abortit, dhe mbrojtësit e njerëzve të paaftë, po kështu shumica e politikanëve republikanë. Por pavarësisht nga apelimet e vazhdueshme, Kongresi u mblodh dhe nënshkroi një ligj ku i jepte juridiksionin federal gjykatave shtetërore për çështjen në fjalë. Bush e nënshkroi këtë ligj. Kjo nënkuptonte që vendimi i Gjykatës së Apelit që vendosi që Territ të mos i riviheshin tubat, të kishte fuqi absolute. Në këto kushte as politikanët, as prindërit e Territ dhe as protestuesit nuk mund të bënin asgjë, veç të pranonin në heshtje vdekjen e Terri Schiavos. Gjykata Supreme e SHBA-së refuzoi që të merrte në shqyrtim këtë çështje, pasi ajo u vendos në bazë të një procesi të rregullt ligjor në shtetin e Floridas.
Protestuesit vajtojnë
Një nga protestueset që qëndronte jashtë spitalit, Dawn Kozsey, 47 vjeç qau kur mësoi lajmin e vdekjes së gruas. “Fjalët nuk mund të shprehin zemërimin që ndiej”, -tha ajo. Presidenti i senatit Tom Lee në shtetin Tallahasse ndërpreu debatin për pak çaste për të njoftuar vdekjen e Schiavos. Edhe senatori Daniel Webster, i cili mbështeste prindërit e Schiavos, mbylli sytë nga dëshpërimi. Pavarësisht se në SHBA respektohet totalisht pavarësia e gjykatave, edhe presidenti Bush kur firmosi për çështjen e Territ u shpreh: “Në rrethana të jashtëzakonshme si kjo, është gjithnjë më me vlerë të mbajmë anën e jetës”. Megjithatë ishin gjykatat që i dhanë fund këtij debati. Gjykatat në përgjithësi nisen nga parimi “e drejta për të vdekur”, ndaj dhe argumentet e prindërve nuk u vlerësuan.
Edhe sëmundja e Territ, e cila më parë ka qenë një vajzë shumë e bukur, ishte mjaft shokuese. Ajo donte të humbte në peshë dhe nga betejat e shumta që bënte, pësoi një çrregullim të ngrëni dhe zemra i pushoi në moshën 26 -vjeçare. Sipas mjekëve zemra i pushoi për shkak të dizbalancës së potasiumit. Doktorët thanë se kjo i kishte shkaktuar shkatërrimin e truve që nuk u furnizuan me oksigjen për gati 10 minuta para se ajo të rikthehej në jetë. Por me ato dëmtime në tru, mjekët thanë se ajo nuk do të përmirësohej kurrë. Edhe buzëqeshja dhe ndryshimet e mimikës së saj ishin thjesht reflekse dhe asgjë e vetëdijshme. Ajo nuk mundi të linte asgjë të shkruar se çfarë duhej të bënin me jetën e saj

[Prototype]

U prehte ne paqe shpirti i saj