Vendimi: Papa do prehet në Vatikan

[Sherri]

Funerali do të zhvillohet të premten

Vendimi: Papa do prehet në Vatikan

-----------------------------------------------------------------

Papa Gjon Pali do të varroset të premten, më 8 prill, në Bazilikën e Shën Pjetrit. Në ceremoninë e funeralit kanë konfirmuar pjesëmarrjen liderët e botës. Ndërsa Roma, prej tri ditësh në zi, është në pritje të 2 milionë vizitorëve që do të përcjellin Atin e Shenjtë.

LAJMI

QYTETI I VATIKANIT

Trupi i pajetë i Papa Gjon Palit II nisi dje udhëtimin e tij të fundit drejt Bazilikës së Shën Pjetrit, ku edhe do të varroset të premten. Mijëra besimtarë të dëshpëruar shoqëruan rrugëtimin nga pallati i Vatikanit për në bazilikë, ku Atit të Shenjtë do t'i jepet lamtumira e fundit gjatë katër ditëve në vazhdim. Kardinalët e Vatikanit vendosën që varrimi të kryhet paraditen e së premtes në Bazilikën e Shën Pjetrit, duke i dhënë fund debateve për varrosjen e rij në vendin e lindjes, në Poloni, njoftoi agjencia e lajmeve ANSA. Ndërkohë, 200 liderë të botës kanë konfirmuar pjesëmarrjen në ceremoninë mortore të Papa Vojtilës. Presidenti amerikan Xhorxh Bush; kryeministri britanik Toni Bler; princi i Anglisë, Çarls; liderët e Francës; Rusisë; Polonisë dhe të vendeve të tjera do të mbërrijnë të premten në Vatikan për të përcjellë Atin e Shenjtë drejt banesës së fundit. Dje trupin e Papës e kanë shoqëruar mes për mes sheshit të Shën Pjetrit tremijë priftërinj, qindra ipeshkv dhe dhjetëra kardinalë. Ndërsa qindra mijëra besimtarë në Itali dhe gjithë botën kanë mbajtur zi për Atin e Shenjtë.

Funerali
Zëdhënësi i Vatikanit, Joaquin Navarro-Valls, bëri të ditur se funerali do të zhfillohet në orën 10.00 në Bazilikën e Shën Pjetrit dhe do të drejtohet nga kardinali Joseph Ratzinger, si dhe nga kardinalët e patriarkët e Kishave lindore. Papa Gjon Pali II do të varroset në varrezën e Vatikanit, ndoshta aty ku ishte varrosur Papa Gjon Pali XII para se të shenjtërohej. Zyrtarët e lartë të Vatikanit ende nuk kanë bërë të ditur asgjë lidhur me hapjen e testamentit të Papës dhe as fillimin e konklavës, por ata thanë se, sipas ligjit, mbledhja e kardinalëve do të nisë 15 ditë pas varrimit të Papës. Ndërkohë, kardinalët janë mbledhur dje për të përcaktuar të gjitha detajet e ceremonisë mortore, si dhe për shkatërrimin e unazës papnore, që nënkupton fundin e një papati.

Ceremonia
Trupi i Papa Gjon Palit do të qëndrojë në bazilikë për katër ditë radhazi, ndërsa Vatikani është në pritje të dy milionë vizitorëve që presin t'i japin lamtumirën e fundit Atit të tyre. Kjo është hera e parë në historinë e Papatit, që trupi i një pape paraqitet në publik për homazhe. Mijëra pelegrinë kanë nisur që dje homazhet për Papën që nxiti bashkimin e feve dhe ndikoi aq shumë në historinë e botës. Autoritetet italiane po përgatiten për mbërritjen në Romë të një numri shumë të madh besimtarësh katolikë, për të mbajtur zi për Papa Gjon Palin e Dytë. Ndërsa në Sheshin e Shën Pjetrit do të vendosen dhe ekranë gjigantë në mënyrë që ata që nuk do të jenë dot në gjendje t'i afrohen Sheshit të Shën Pjetrit të munden t'i ndjekin ceremonitë përmes tyre. Sheshi i Shën Pjetrit në Vatikan është mbushur me lule, qirinj dhe mesazhe të vendosura nga dritat e bulevardit. "Lamtumirë Ati, heroi e miku ynë", shkruhej në një prej mesazheve të besimtarëve të mbledhur në shesh për të përcjellë Papa Gjon Palin drejt banesës së fundit, me dhimbje e pikëllim.


Katër Papë shqiptarë në Vatikan

Një Papë shqiptar ka drejtuar Selinë e Shenjtë për 21 vjet. Historia 2000-vjeçare e Papatit i ka rezervuar Papa Klementit XI autoritetin më të lartë në Vatikan nga viti 1700 deri në vitin 1721. Papa me origjinë shqiptare vjen nga familja Albani, e themeluar nga dy vëllezër shqiptarë: Giorgio dhe Filippo di Michele de Lazi, ish-luftëtarë nën urdhrat e Skënderbeut, të cilët u vendosën në Urbino të Italisë. Ata morën mbiemrin Albanesi, që më pas u ndryshua në Albani. Nga kjo familje rrodhën edhe kardinalë të shquar, diplomatë të mëdhenj dhe burra shteti të sërës së lartë, si Giovanni Girolamo, kardinal dhe kont e kandidat për papë në dy konklave; Orazio, diplomat, emëruar senator i Romës nga Papa Urbani VIII (1623-'44); Annibale kanunor i Shën Pietrit, president i Dhomës Apostolike, kamerleng i Kishës së Shenjtë të Romës etj. Autoriteti i Papa Klementit dha rezultate të gjëra në Shqipëri, ku Kisha katolike dhe ajo ortodokse bashkëjetuan për një periudhë. Ai u interesua per rilindjen politike dhe fetare të atdheut të vet. I përket asaj periudhe mbajtja e "Këshillit fetar të parë kombëtar shqiptar" (1703), i cili shënoi ndryshimet rrënjësore në linjën e veprimit të klerit për çështjet dogmatike, morale, kanunore dhe ipeshkvore. Në fillim u arrit një farë bashkimi, porse më tej, meqë nuk ishte në lartësinë e duhur, u arrit hapja e selive të kryepeshkopatave për dioqezat latine të Ohrit dhe Shkupit. Para papës Klementi XI, tre papë të tjerë kishin qenë me origjinë shiptare: San Eleuterio (175-189), San Caio (283-296) dhe Giovanni IV (640-642).

[Sherri]

GJON PALI I MREKULLUESHEM

Nga Albri BRAHUSHA


Të flasësh për Gjon Palin e II, është e thjeshtë, pasi veprimtaria e tij ishte aq e dukshme, kuptimplote dhe e mbushur me pasion dhe besim sa nuk ka nevojë për shumë koment. Ai ishte Papë në një kohë ndryshimesh të mëdha, sfidash të jashtëzakonshme, dhe për më tepër në ndërrimin e mijë-vjeçarëve. Të diskutosh për rolin e tij në mbylljen...
në paqe të luftës së ftohtë dhe bashkëjetësën mes feve dhe kulturave është e tepërt. Të flasësh për udhëtimet e tij pa fund, për shpresën që na dha, për dashurinë që na mëkoi, për paqen, për jetën, prapë është e tepërt.
Në fakt ajo për të cilën tani ia vlen të flitet është se Karol Voitila ishte Papa i Fjalës, ai e dëshmoi këtë në të gjitha takimet, fjalimet dhe konferencat, forca e tij e mrekullisë nuk ishte misteri, as fuqia, as pushteti, por fjala e thjeshtë. Ai i riktheu Europës dinjitetin e fjalës, ai nuk profetizoi, ai nuk kërcënoi, ai nuk citoi, ai foli, u foli të gjithëve. Ai nuk heshti kurrë, nuk reshti kurrë së kujtuari se lufta nuk prodhon fitimtarë por veç të humbur.
Në një botë ku teknologjia dhe televizioni po krijojnë vlera të panjohura, në një botë ku besimi po resht, në një botë ku dashuria është shmangur, në një botë të parasë dhe fitimit, Gjon Pali i II ia doli të ishte një hero i mbarë njerëzimit duke pranuar diversitetin e kulturave, racave dhe ideve. Dhe ky nuk ishte një kompromis, por besimi i tij i patundur në vlerat universale të njeriut, në favor të jetës, dinjitetit dhe paqes. Por me të njëjtin heroizëm ai drejtoi me guxim Vatikanin drejt një politike universale, në shërbim të bashkëjetesës të të gjitha kombeve në botë.
Kohëra të mëdha prodhojnë individë të mëdhenj. Dhe vërtetë Karol Voitila ishte bir i kohës së tij, por jo vetëm kaq, ai ishte një njeri që udhëhoqi njeriun modern, njeriun me dilemma të mëdha, njeriun e hutuar, të uritur, duke mos u lodhur së luturi, së dhëni shpresë për një jetë më të mirë. Ai i takoi të gjithë, i pranoi të gjithë, pa iu shterur besimi se ne duhet "të ndërtojmë një qytetërim të bazuar tek dashuria". Larg dogmës por afër zemrës, ai hyri pa zhurmë në historinë tonë moderne me urtësinë e kohërave, me duart e tij që përshëndesin gjithkend, kudo shkoi ai puthi tokën, duke falenderuar Krijuesin dhe duke bekuar njerëzit në emër të Zotit.
Fjala e tij është një mrekulli, pasi Gjon Pali i II e përdori fjalën për të shëruar mendjet dhe zemrat tona, inatet dhe pakënaqsitë, mëritë dhe luftrat, urinë dhe mjerimin. Për 27 vjet me rradhë ai na la të kuptojmë se fjala është pasuria më e madhe që Zoti na dha, fjala e dashurisë dhe e paqes, një dhuratë që ne shpesh e harrojmë, pasi kemi shumë urrejtje, lakmi dhe babëzi që na shtyn në keqen.
Gjon Pali i II, foli. Fjala e tij do vazhdojë të johojë gjatë, ai na përshëndeti, na buzëqeshi, na edukoi të flasim dhe të kuptojmë se jeta duhet jetuar në paqe dhe me dinjitet. Ai na foli shpesh, në të gjitha gjuhët, por mbi të gjitha na foli me gjuhën e të gjithëve. Me gjuhën e dashurisë.

[Sherri]

Konklava pas 15-20 ditësh. Dilema për drejtuesin e ri të Vatikanit

Mbledhja e kardinalëve, ja kriteret e Papës së ri

QYTETI I VATIKANIT

Krejt ndryshe nga Papa Gjon Pali II, me përvojë kishtare, europian apo ndoshta i botës së tretë. Janë këto karakteristikat e mundshme të Papës së ri, që do të drejtojë Vatikanin dhe Kishën katolike pas vdekjes së Papa Vojtilës e do të përballet me sfidat e reja të botës. 117 kardinalët që do të zgjedhin pasardhësitn e Papës polak u mblodhën dje në Vatikan, në ditën e parë të bisedimeve të tyre, që i hapin rrugë një papati të ri. Ata janë të gjithë të rinj në procesin e ndërlikuar dhe tepër sekret të zgjedhjes së një pape. Sipas agjencisë së lajmeve ANSA, vetëm tre prej tyre: amerikani Uilliam Baum, gjermani Jozef Ratcinger dhe filipinasi Jaime Sin, janë të vetmit që kanë marrë pjesë në dy konklave në vitin 1978. Të tjerët votojnë për herë të parë për një papë që mund të jetë konservator apo progresist, italian, europian apo amerikano-latin. Në garën për drejtimin e Vatikanit janë më shumë se 100 kandidatë, mes të cilëve kardinali italian Angelo Sodano, gjermani Ratzinger, spanjolli Eduardo Martinez Somalo, indiani Ivan Diaz. Mes emrave të tjerë janë edhe braziliani Claudio Hummes, meksikani Norberto Rivera Carrera, hondurasi Oscar Maradiaga, argjentinasi Jorge Mario Bergoglio, të gjithë me të njëjtin besim, si dhe një sensibilitet të fortë social, ndërsa kandidatë të fortë për variantin e një Pape me ngjyrë janë nigeriani Francis Arinze dhe afrikanojugori Ëilfrid Fox Napier. Por, për të kuptuar sesi do të jetë Papa i ri, duhet pasur parasysh një traditë dhe dy variante kryesore. Tradita është se pas një papati të gjatë, linja që duhet ndjekur është ajo e ndryshimit. Pikërisht kjo traditë mund të eliminojë kardinalët me personalitet të afërt me Papa Gjon Palin II e ndoshta do të evitohen kandidatë me moshë më të re, për të sjellë ndryshim në drejtimin e Kishës katolike. Ndryshimi do të jetë çështja kryesore në lidhje me zgjedhjen e Papës së ri, gjë që pritet të ndodhë ndoshta pas një muaji, përpos përvojës së tij, personalitetit dhe karizmës. Se duhet zgjedhur një papë që t'u përgjigjet sfidave të së ardhmes. Ashtu siç ndodhi me Karol Vojtilën, i cili pati në ndihmë një element po kaq të rëndësishëm, atë gjeopolitik. Papati i tij, që shërbeu për bashkimin e Europës, vërtetoi zgjedhjen e duhur në vitin 1978. Por tashmë zgjedhja e Papës së ri nuk do të jetë aspak e lehtë. Kardinalët kanë deklaruar se Kishës i duhet një personalitet po aq i fortë sa Karol Vojtila, por që do të përballet me sfidat e reja të botës. Që nuk janë pak.

(marre nga GSH)

[shkodra13]

"...Papa Gjon Pali II do të varroset në varrezën e Vatikanit, ndoshta aty ku ishte varrosur Papa Gjon Pali XII para se të shenjtërohej...."

Qi ka pase nji pape Gjon Pali XII kete mundesh me e mesue vetem prej gazetave shqiptare. As ne Vatikan nuk e dine! Gjithashtu ndoshta kishte me ju dashte me u informue pak per me kuptue qi kripta nuk perkthehet shqip "varreze".

Po keshtu Brahusha gabon kur tue e levdue Papen shkruen "larg dogmes e afer zemres"

[Brari]

gazeta Tema

---


SPECIALE

Miliona njerëz i japin lamtumirën Karol Vojtilës në
një ceremoni varrimi ku morën pjesë mbi 200 udhëheqës
botërorë

Bota përcjell Papa Gjon Palin II

Presidentë, monarkë, përfaqësues të klerit, me qindra
e mijëra besimtarë i dhanë lamtumirën ditën e premte
Papa Gjon Palit të Dytë, në ceremoninë më madhështore
të varrimit të këtyre 100 viteve të fundit.

Pjesëmarrje e jashtëzakonshme në ceremoni

Katër mbretër, pesë mbretëresha dhe të paktën 70
presidentë dhe kryeministra ishin të pranishëm në
ceremoninë e zhvilluar.
Mijëra pelegrinë kanë mbërritur në Vatikan për të
marrë pjesë në lamtumirën e Papës. Sheshi Shën Pjetër
dhe i gjithë Vatikani është rrethuar nga “lumenj”
njerëzish që valëvisin flamuj të ndryshëm, shumica
prej tyre bardh e kuq, ngjyrat e flamurit të Polonisë,
vendlindjes së Papës. Kordonë të gjatë policie
përpiqeshin që të mbanin mbrapa pelegrinët, të cilët
synonin të afroheshin më shumë, ndërsa kishte shumë
prej tyre që u binte të fikët nga emocionet.

Ekrane gjigante për ceremoninë

Më shumë se 2 milion njerëz e panë këtë ceremoni
përmes ekraneve gjigante të vendosura rreth e qark
Romës. Trupi i tij u vendos në një arkivol të
thjeshtë dhe mbi fytyrën e tij ishte vendosur mëndafsh
i bardhë. Fillimisht u lexua një histori e shkurtër e
jetës së tij. Papa Gjon Pali vdiq pas pothuajse një
dekade sëmundjesh dhe vuajtjesh. Mes 2.500
personaliteteve që kanë mbërritur në Romë ishte dhe
presidenti i Shteteve të Bashkuara, Bush, Sekretari i
Përgjithshëm i OKB, Kofi Annan, Princi Çarls i
Britanisë dhe udhëheqës të ndryshëm arabë.

Stimul për paqe mes kombeve

“Ndoshta kjo ditë do na bëjë të besojmë për një të
ardhme në paqe, larg konflikteve dhe urrejtjeve,” tha
presidenti iranian, Mohammad Khatami në një intervistë
për gazetën “Corriere della Sera”. Presidenti
kubanez, i cili nuk mori pjesë në këtë funeral e
akuzoi presidentin Bush për hipokrizi në pjesëmarrjen
e tij në funeral, duke thënë se Papa ishte një kritik
i madh i abuzimeve të kapitalizmit.

Masa të rrepta sigurie

Italia e mbylli hapësirën e saj ajrore mbi Romë dhe
kërkoi forca shtesë, vendosi raketa tokë-ajër, dhe
blindoi zonën përreth Vatikanit. Larg nga Vatikani,
Roma ishte më e qetë, pasi autoritetet kishin
urdhëruar që të mbylleshin të gjithë institucionet,
shkollat dhe muzetë, si dhe kishte ndaluar qarkullimin
e makinave në rrugë.

Miliona njerëz para ekraneve

Katolikët që nuk mund të shkonin në sheshin Shën
Pjetër dhe në Romë, e ndoqën ceremoninë përmes
ekraneve. Në Azi, katër ekrane të mëdha ishin
vendosur në Manila Luneta Park, aty ku Gjon Pali
mbajti një meshë para 5 milion filipinasve gjatë një
vizite në vitin 1995. Pas funeralit, arkivoli i tij u
dërgua në Bazilikën e Shën Pjetrit, ku u vendos në një
arkivol prej zinku, për t’u mbyllur përgjithmonë.
Ndërkohë kardinalët pritet që të hapin më 18 prill
konklavën për të zgjedhur papën e ri. “Ky papë kishte
një problem, dhe do të jetë një problem në të ardhmen,
për të vendosur unitet në diversitet,” tha kardinali
belg, Godfried Danneels, i cili shihet si një nga
kandidatët e mundshëm për t’u zgjedhur papë.

Khatami përkrah Bushit, Mugabe thyen rregullat
europiane

Prania e presidentit iranian Mohammad Khatami - në të
njëjtin vend me homologun e tij amerikan George W.
Bush - sugjeron diçka lidhur me mënyrën se si
vlerësohet puna e këtij pape në botë. Kjo ishte një
ditë për përshpirtje dhe reflektim, por politika nuk
mund të jetë asnjëherë shumë larg. Qeveria kineze nuk
pranoi të dërgonte përfaqësues, e indinjuar nga
vendimi i paprecedent i presidentit tajvanez Chen
Shuey Bien për të marrë pjesë. Presidenti Robert
Mugabe i Zimbabves shkaktoi gjithashtu një të
papritur, ai në fakt po shkelte kufizimet për të
udhëtuar vendosur ndaj tij nga vendet e Bashkimit
Europian. Kisha Katolike mbetet një prej organizmave
më të jashtëzakonshëm ndërkombëtarë dhe Papa vetë
kishte pikëpamje të qarta lidhur me një numër të madh
çështjesh politike, që shkonin nga kundërshtimi për
luftën në Irak, tek kritika e tij ndaj kufizimeve të
modelit liberal ekonomik.

Thjeshtësia mbizotëroi në varrimin e Papës

Papa Gjon Pali II u varros në katedralen e Shën
Pjetrit në një ceremoni private që shënoi edhe fundin
e funeralit të papës.
Një nga këmbanat e bronxta të Shën Pjetrit binte
vazhdimisht ndërsa arkivoli i thjeshtë prej druri u
çua në një dhomë të nëndheshme ku janë varrosur shumë
prej 264 papëve të Kishës Katolike. Qindra mijëra
njerëz morën pjesë në ceremoninë para Katedrales së
Shën Pjetrit për të përshëndetur Papën përmes
duartrokitjesh, por pati gjithashtu edhe shumë lotë.
Në shenjë mirënjohjeje të thellë për Papën e ndjerë,
turma thërriste emrin e tij dhe kërkoi që kisha ta
shpallë atë shenjtor tani, për të shmangur procesin e
zakonshëm që mund të vazhdojë për dekada. 12 burra
mbajtën arkivolin e thjeshtë të papës nga Katedralja e
Shën Pjetrit në zonën e hapur para altarit. Një libër
i madh i kuq me shkrime të shenjta ishte vendosur mbi
arkivol ndërsa kardinalët dhe arkipeshkët zunë vend
përreth altarit.
Duartrokitjet, një shenjë tradicionale italiane
respekti dhe admirimi, përshkuan turmën kur doli
arkivoli dhe gjatë gjithë shërbimeve për nder të
Papës. Miliona katolikë në mbarë globin kryen shërbesa
përkujtimore në të njëjtën kohë ndërsa miliona të
tjerë ndoqën funeralin e Papës drejtpërdrejt në
televizion.

Kardinali Ratzinger: Lutemi për njeriun e sakrificave

Para 200 udhëheqësve shtetërorë të 80 shteteve dhe
besimtarëve në Sheshin e Shën Pjetrit në Romë është
mbajtur mesha e organizuar me rastin e vdekjes se Papa
Gjon Palit te Dyte, e drejtuar nga kardinali gjerman
Joseph Ratzinger. "Na lejoni të lutem", tha Ratzinger
në gjuhën latine, për të vazhduar pastaj në gjuhën
italiane predikimet e tij. Kardinali gjerman tha se
ai, i cili e ka pare Papen, ai i cili ka degjuar
predikimet e tij, nuk do ta harrojë kurrë atë. Tek të
pranishmit, që ishin mbledhur në sheshin e Shën
Pjetrit në Romë, ishin prekëse fjalët e kardinalit
Ratzinger kur perkujtoi se si papa Gjon Pali i Dytë në
fund të jetës së tij, përkundër vuajtjeve shëndetësore
të medha, sërish shfaqej para besimtareve. Kardinali
Ratzinger foli edhe për rininë e Papës. Ai kështu e
përshkroi periudhen më të hershme të Papës: si punëtor
me pune te detyruar ne fabriken e prodhimeve kimike,
ishte i kercënuar nga terrori nacist, ai e degjoi
zerin e Zotit, i cili i tha: eja pas meje. Kujtimet
per Papen i kujtojne me mijera milione njerez ne bote,
veçanerisht ne Poloni, atdheun e tij. Me qindramijëra
polakë arriten ne Rome. Ne sheshin e Shën Pjetrit,
para 600 mije njerezeve kardinali Ratzinger tha: "Ne
duhet te jemi te sigurt se ati yne i dashur gjendet ne
shtepine e atit te tij ne dritare. Ai na shikon neve,
ai kendon me ne, keto ishin fjalet e kardinalit
Ratzinger, ne ceremonine me te madhe mortore te kohes
moderne per vdekjen e Papës. Kardinali tha se jeta dhe
vuajtja e Papes ishin nje viktimizim per gjithe
njerezimin. "Papa ynë, siç e dime te gjithe ne, nuk
deshironte që jeten e vet ta trajtonte vetem si të
veten, ai ua dhuroi të gjitheve jeten e tij, - tha
Ratzinger. Gjate predikimeve te tija, shume shpesh
eshte nderprerë nga duartrokitjet e te pranishmëve, në
veçanti kur foli per kohen e rinise se Papes, ne te
cilen ishte i rrezikuar nga nacizmi dhe ne menyre te
fshehur merrte pjese ne seminare ne Krakau, lexonte
literaturë nga teologjia dhe filozofia.


-----