CIA zbuloi anijen me cigare kontrabandë

[Sherri]

Anija "Eni" ishte në survejim që nga ngushtica e Bosforit

CIA zbuloi anijen me cigare kontrabandë

re.kro.


Një informacion i servirur nga shërbimet inteligjente amerikane ka vënë në lëvizje policinë shqiptare që të realizojë aksionin për kapjen e 2.5 milionë paketave me cigare të futura kontrabandë në portin e Durrësit. Burime nga grupi hetimor që po punon me këtë çështje, kanë pohuar dje për "Gazetën Shqiptare" se si ranë në gjurmë të kontrabandistëve të cigareve në qytetin e Durrësit. Anija 1700 tonëshe "Eni" ka qenë nën survejimin e agjentëve të shërbimeve inteligjente amerikane që nga ngushtica e Bosforit që lidh Detin e Zi me detin Marmara. Sapo anija ka mbërritur në portin e Durrësit, autoritetet shqiptare janë njoftuar për ngarkesën e saj dhe kanë organizuar menjëherë aksionin për bllokimin e ngarkesës dhe goditjen e një rrjeti shumë të fuqishëm që kishte marrë përsipër këtë aktivitet të paligjshëm me shtrirje ndërkombëtare. Nga hetimi i deritanishëm është siguruar itinerari që ka kryer anija "Eni" nga nisja në portin e Durrësit dhe deri në kthimin e saj në orët e para të mëngjesit të 29 marsit. Ndërkohë, është ende i pazbardhur vendi ku anija ka marrë ngarkesën, si dhe origjina e prodhimit të cigareve.

Zbulimi

Anija "Eni", pronë e kompanisë "Zotaj Shipping& Trading" sh.p.k, me pronar shtetasin Fatmir Zotaj, është nisur në fillim të muajit mars nga porti i Durrësit. Ekuipazhi i anijes është justifikuar se kishte shkuar për të importuar grurë në Ukrainë. Anija shqiptare ka ndaluar fillimisht në portin turk të Kumportit që ndodhet në detin Marmara dhe më pas është nisur në drejtim të Detit të Zi. Agjentët e shërbimeve inteligjente kanë fiksuar anijen "Eni" të ketë kaluar më datë 11 mars ngushticën e Bosforit. Ndalesa tjetër për anijen "Eni" ka qenë porti Ambarli, që ndodhet në bregdetin turk të Detit të Zi. Më datë 18 mars "Eni" ka kaluar sërish ngushticën e Bosforit dhe ka hyrë në detin Marmara për të marrë rrugën e kthimit. Itinerari i mëtejshëm i anijes nuk është bërë i ditur nga grupi hetimor. Rreth orës 3.00 në mëngjesin e 29 marsit anija "Eni" është futur në portin e Durrësit pa marrë leje ankorimi nga autoritetet portuale dhe ka bërë menjëherë shkarkimin e kontenierëve me cigaret kontrabandë. Justifikimi i ekuipazhit për hyrjen pa leje në port ka qenë një difekt i rëndë që kishte pësuar anija.

Cigaret

Aksioni i policisë, i mbështetur nga trupat e repartit të Ndërhyrjes së Shpejtë 712, është kryer në mesditën e 30 marsit dhe ka synuar fillimisht kontrollin e anijes "Eni". Por, kur kanë parë se ngarkesa nuk ishte aty, kanë shkuar në Shkozet dhe kanë vendosur në masën e sekuestros konservative 7 kontenierë me 5000 koli cigare të markave "Kingston", "Aura", "Marlboro", "Karelia", "Slims" etj. Sasia e cigareve ka një vlerë tregu afro 5 milionë dollarë amerikanë, ndërkohë që detyrimi i shmangur doganor, nëse malli do të futej në rrugë legale, është afro 1.5 milionë dollarë. Nga hetimi paraprak ka rezultuar se pjesa më e konsiderueshme e cigareve kanë qenë të markave "Kingston" dhe "Aura". Pesë kontenierë kanë qenë me "Kingston", kurse një tjetër ka qenë me cigare të markës "Aura". Sipas ekspertëve të grupit hetimor, rezulton se kjo ngarkesë nuk ka qenë e destinuar për tregun shqiptar, por dyshohet të ketë qenë tranzit për në ndonjë vend tjetër. Ky përfundim është arritur pasi dy markat "Kingston" dhe "Aura" nuk përdoren në tregun shqiptar dhe nuk gjenden fare në shitje. Gjithashtu, është vërejtur se cigaret e këtyre dy markave janë të një cilësie të dobët dhe dyshohet se mund të jenë prodhuar në ndonjë nga ish-republikat e Bashkimit Sovjetik ose në Kinë. Nga hetimi paraprak ka rezultuar se ky grup është mjaft i fuqishëm, ka lidhje të forta me organizata kriminale ndërkombëtare dhe disponon një arsenal të madh mjetesh logjistike.


Interesohen për sistemim e monitorimit dhe sigurisë

Pas sekuestrove tre kongresmene amerikane vizitojnë portin
Menjëherë pas kapjesë së sasisë së konsiderueshme të cigareve kontrabandë, tre kongresmene të Shteteve të Bashkuara të Amerikës, përfaqësuese të Partisë Republikane kanë bërë një vizitë pune në portin e Durrësit. Zyrtarisht ato kanë deklaruar se janë duke zhvilluar një tur për investigimin e trafikimit të qënieve njerëzore dhe përpjekjet për ta trajtuar dhe goditur këtë problem. Por sipas burimeve të besuesshme, ata kanë vëzhguar sistemin e menaxhimit total të informacionit TIMS, i cili është një sistem i instaluar pranë policisë Qarkut Durrës nga ICITAP. Sistemi në fjalë ka bërë të mundur informimin e shpejtë me anë të sistemit kompjuetik të të dhënave me të cilat operon policia e portit, për listat e pasagjerëve, anijet që hyjnë e dalin në rad, tragetet etj. Kongresmenet kanë parë nga afër punën që kryhet në sallën operative të Komisaritit të policisë së portit, vizituan edhe sheshin e trageteve, si dhe sallën e monitorimit, që është instaluar aty. Gjatë vizitës përfaqësueset e Kongresit Amerikan, janë interesuar për ecurinë e punës nga vetë punonjësit e policisë së portit.


Shpallet në kërkim biznesmeni Fatmir Zoto

Policia ka shpallur në kërkim biznesmenin durrsak Fatmir Zoto, i cili rezulton të jetë pronari i anijes "Eni" dhe i magazinës në Shkozet ku u bllokuan 2.5 milionë paketa me cigare kontrabandë. Fatmir Zoto, i njohur dhe me emrin Visi, është një biznesmen që e ushtron aktivitetin e tij tregtar qysh nga viti 1993 në qytetin e Durrësit. Ai është marrë kryesisht me import-eksport të produkteve të ndryshme dhe është pronar i anijes "Eni". Zoto banon në një vilë private pranë portit të Durrësit dhe është me arsim të mesëm. Policia nuk arriti ta arrestonte mesditën e 30 marsit dhe tashmë e ka shpallur në kërkim për disa akuza. Zoto dyshohet të ketë lidhje me një grup të fuqishëm që vepron në Durrës dhe që luan një rol të rëndësishëm në jetën ekonomike të qytetit bregdetar.

(Marre nga GSH)

[Sherri]

Presione në telefon drejtuesve të operacionit. Angazhohen forcat speciale

Cigaret, 7 arreste, sekuestro anijes
Shpallet në kërkim pronari i magazinave, Fatmir Zotaj

re. kro.


TIRANE

Furtunë arrestesh ka shkaktuar zbulimi i cigarve kondrabandë në vleftën 5 milionë dollarë, të sekusetruara gjatë ditës së djeshme në Durrës. Prokuroria dhe policia së bashku duket nuk e kanë ndalur aspak hovin për të nënshkruar arrestet për shtatë anëtarët e ekuipazhit të anijes së flotës tregtare shqiptare "ENI", filluar që nga kapiteni Bilal Koçi, deri tek marinari më i thjeshtë Hamdi Peza. Të gjithë këta akuzohen për konsumim të veprës penale të import-tranzitimit të mallrave kondrabandë. Ndërkohë masa e arrestit të flagrancë i është akorduar edhe Gentian Koçit, agjent detar pranë firmës "Zotaj Trading Co", kushëri i pronarit të anijes dhe mallit. Ai është kapur në brendësi të magazinës dhe me vete kishte edhe 10 mijë euro, të cilat janë sekuestruar. Në pranga të policisë së Durrësit nuk ka rënë pronari i mallit, anijes dhe magazinave, Fatmir Zotaj, i cili gjithsesi është duke paguar më shumë se të tjerët në këtë histori.

Sekuestrot

Pa e zgjatur shumë, Prokuroria e Durrësit ka vendosur sekuestron mbi cigaret e bllokuara, që të konvertuara në të holla, kapin shifrën rreth 5 milionë dollarë. Por sekuestros nuk i ka shpëtuar as magazina me të gjitha mallrat, përfshirë dy skafe të formatit të madh. Anija "ENI" e sapombërritur nga një udhëtim në Turqi, gjithashtu është sekuestruar. Të gjitha këto prona ishin në emër të të shpallurit në kërkim Fatmir Zotaj. Sekuestros nuk i kanë shpëtuar edhe dy autovetura luksoze, njëra e markës Volkswagen TUAREG me targa DR 4343 D, në pronësi të agjentit detar Gentian Koçi dhe një tjetër makinë Benz me targa DR 7647 C.

Presioni

Burime të Gazetës pohuan se jo gjithçka ka shkuar vaj përgjatë operacionit të arrestimeve dhe sekuestrimit të cigareve, anijes dhe magazinave. Sipas këtyre burimeve, që në hapat e parë të bërë, në adresë të drejtuesve të operacionit kanë mbërritur telefonata të shumta të personave herë anonimë, herë realë, të cilët bënin presion apo edhe kërcënonin, të mos shkohej më tej, pasi sipas tyre pas mallit të sekuestruar, qëndronin njerëz me pushtet. Nuk dihen përgjigjjet e drejtuesve të operacionit, porse menjëherë më pas, në Durrës kanë zbarkuar forca të shumta speciale, që kanë asistuar në operacionet duke marrë në ruajtje edhe objektet e sekuestruara. Njëkohësisht me këto forca speciale, në Durrës zbarkuan edhe pothuaj të gjithë drejtuesit më të lartë të Policisë së Shtetit duke marrë vetë në duar frenat e punës. Në të njëjtën kohë disa drejtues të strukturave të drejtësisë në Tiranë kishin mbyllur telefonat. Mesazhi duket ishte i qartë. "Puna" e nisur duhet të shkonte deri në fund me çdo kosto, kthim pas nuk kishte, përmendja e emravë të njerëzve me pushtet "nuk pinte ujë".


Aksioni në Tiranë, kapen 2 mijë paketa dhe 1 ton kafe

Një aksion i antikrimit ekonomik të Drejtorisë së Policisë së Tiranës bëri të mundur kapjen e 2116 copë paketave të ndryshme cigareje. Paketa të markave "Marlboro", "Cartier", "Slims", "Carelia", "Davidoff" pa pullë fiskale, u gjetën në një dyqan shumice në rrugën "Reshit Petrela", pranë stacionit të trenit në kryeqytet. Policia arrestoi dy pronarët e dyqanit, bashkëshortët Ëngjëll Hashimi dhe Bukurie Spahiu, respektivisht 58 dhe 51 vjeç. Po dje pranë tregut të madh industrial është bllokuar një kamion me 1 ton kafe kontrabandë që vinte nga Dibra. ge.xha.


PD: Duka e Koka në kontrabandën e cigareve

Cigaret e sekuestruara nga forcat e rendit janë pronë e Nard Kokës, kurse magazinat në të cilat ishin fshehur janë pronë e Ministrit Agron Duka". Kështu u shpreh dje zëdhënësi i PD, Edi Paloka gjatë një konference për shtyp. Sipas tij të dhënat për këto informacione ishin marrë nga punonjësit e doganës dhe të Ministrinsë së Rendit. Ai akuzoi Kryeministrin dhe Ministrin e Rendit Igli Toska se po bëjnë të gjitha përpjekjet për të fshehur pronësinë e vërtetë, si të mallit kontrabandë, ashtu edhe të magazinave, ku ai ishte fshehur.

(Marre nga GSH)

[Brari]

gazeta Shqiptare nuk guxon te vej pikat mbi i sepse eshte e lidhur me klanet Kokdukaduraket..

por e verteta eshte kjo:

RD
--

Nano, Toska dhe Idrizi fshehin emrin e pronarit të cigareve të kapura në Shkozet

Porti i Durrësit, një fole kontrabande e "Zemunit"

"Fatos Nano, nëpërmjet njerëzve në shërbim të tij, si Shpëtim Idrizi dhe Igli Toska, po bën të gjitha përpjekjet për të fshehur pronësinë e vërtetë si të cigareve kontrabandë, ashtu dhe të magazinave ku ishte fshehur ky duhan". Shkak për këtë reagim të zëdhënësit të Partisë Demokratike, Edi Paloka, është bërë sekuestrimi më 30 mars nga forcat e rendit të 5 mijë kolive cigare, si "Marlboro" të kuqe, "Karelia", "Slims", etj., me një vlerë prej 7 milionë dollarësh, në Shkozet të Durrësit.

Zëdhënësi i PD-së, duke komentuar ngjarjen, tha dje gjatë një konference shtypi se "të mërkurën, forcat e rendit, nëpërmjet një operacioni sekret të realizuar me udhëzim të shërbimeve të vendeve mike, sekuestruan në magazinat e ministrit Duka në Shkozet 5 mijë koli cigare, si "Marlboro" të kuqe, "Karelia", "Slims", etj., me një vlerë prej 7 milionë dollarësh dhe arrestuan një numër personash të implikuar në këtë krim ekonomik". Paloka tha për gazetarët se "PD informon opinionin se punonjës të doganave, antikontrabandës, të Ministrisë së Rendit dhe shërbimeve të tjera kompetente, pohojnë në unison se 7 kontenierët e cigareve janë pronë e Nard Kokës, kurse magazinat ku ishin fshehur, janë pronë e ministrit të Bujqësisë, Agron Duka". Siç u shpreh Paloka, "nga dje, Fatos Nano, nëpërmjet njerëzve në shërbim të tij si Shpëtim Idrizi, drejtor i Doganave dhe Igli Toska, ministër i Rendit, po bën të gjitha përpjekjet për të fshehur pronësinë e vërtetë si të mallit kontrabandë, ashtu dhe të magazinave ku ishte fshehur". Ai tha në vazhdim se "PD deklaron se kontenierët kontrabandë që kanë kaluar sistemin e doganave dhe janë vendosur në magazinat e Dukës në Shkozet, janë vetëm maja e ajsbergut të kontrabandës që drejton klani i "Zemunit", i cili me urdhër të Shpëtim Idrizit e ka kthyer edhe portin e Durrësit si një port privat".

Zëdhënësi i selisë blu deklaroi në fund se "PD ka informacione të sigurta se autoriteteve shqiptare u janë dorëzuar dosje voluminoze për veprimtarinë kriminale të këtij klani, brenda e jashtë vendit, por këto dosje janë bllokuar të gjitha prej kryeministrit Fatos Nano". Siç dihet, më 30 mars, policia bllokoi 5 mijë koli cigaresh kontrabandë, të cilat i përkisnin Nard Kokës, njërit prej miqve më të afërt të kryeministrit Fatos Nano dhe vëllait të kryetarit të Bashkisë së Durrësit, Lefter Koka. Pavarësisht bllokimit të mallit, policia nuk deshi të ndalojë fajtorin, i cili po shtiret sikur nuk ka asnjë lidhje me ngjarjen, me ndihmën e miqve të vet me influencë, mes të cilëve besohet të jetë përfshirë edhe vetë kryeministri Nano. Lajmi është bërë i ditur nga vetë Policia e Durrësit, por Ministria e Rendit është fokusuar jo tek porositësit e mallit, por tek pronari i anijes, i cili nuk është hallka kryesore e kontrabandës. Fillimisht, agjentët e zyrës së luftës kundër kontrabandës dhe trafiqeve të paligjshme kanë kontrolluar anijen shqiptare "ENI", me të cilën është bërë transportimi i mallit kontrabandë dhe më pas ata janë drejtuar në magazinat në Shkozet të Durrësit. Pronari i anijes ka lidhje të forta, të njohura botërisht, me ministrin e Bujqësisë, Agron Duka, si dhe me kunatin e tij, Nard Koka.



Policia ka shoqëruar për në Shkozet cigaret kontrabandë

Hetimi për anijen e kontrabandës së cigareve "ENI" rrezikon të kthehet në një farsë, pasi qeveria po mundohet që të fshehë pronarët e vërtetë të mallit, duke anashkaluar emrat e tyre dhe duke bërë përgjegjës vetëm pronarin fiktiv të anijes, Fatmir Zotaj. Në një njoftim zyrtar të djeshëm të Ministrisë së Rendit thuhej se përgjegjësi i vetëm i këtij rrjeti kontrabandistësh është Zotaj. Sipas këtij njoftimi, ky person është edhe pronari i kontenierëve të bllokuar me cigare kontrabandë, por edhe pronari i magazinës në të cilën u kap malli kontrabandë. Është njoftuar po dje se është arrestuar Bilal Koçiu, kapiteni i anijes "ENI", si dhe katër marinarë, ndërsa është shpallur në kërkim vetëm pronari Zotaj. Po sipas njoftimeve zyrtare është bërë sekuestrimi i pasurive të Zotajt, është sekuestruar gjithashtu anija "ENI" si dhe magazina në të cilën u kapën cigaret kontrabandë. Por sipas shumë burimeve të besueshme, në krye të rrjetit të kontrabandës qëndron Nard Koka, por ky i fundit, duke shfrytëzuar njohjet e tij me kryeministrin Nano, po mundohet të fshihet, duke nxjerrë në skenë përveç Zotajn edhe dy persona të tjerë që ende nuk identifikohen, por që janë shpallur në kërkim nga policia. Burimet thanë se Zotaj është veçse një ushtar i thjeshtë i rrjetit të fuqishëm të kontrabandës, i cili ka dhënë emrin peng në favor të shefave të tij. Pronari i anijes "ENI" është i njohur në të gjithë Durrësin dhe rrethinat si mik i ngushtë i Nard Kokës, dhe i kunatit të tij, Agron Duka.

Ajo që është konfirmuar plotësisht deri tani është fakti se trafikantët e kanë kryer kontrabandën e cigareve prej më shumë se gjashtë muajsh, pa iu hyrë gjemb në këmbë. Edhe aksioni i djeshëm i forcave të policisë është bërë i mundur vetëm pas njoftimeve të shërbimeve sekrete të vendeve mike, ndërsa nuk ishte e qartë për policinë se pas këtij rrjeti qëndronte miku i kryeministrit, Nard Koka. Burime të hetimit thanë dje se edhe largimi i Zotajt është bërë pas dekonspirimit që i është bërë operacionit nga njerëz të lartë në qeveri, të cilët sapo janë njoftuar, u kanë kërkuar miqve të tyre që të largohen. Kjo është një praktikë e njohur tashmë për zyrtarët e lartë, sa herë që ka operacione të kësaj natyre.

Ndërkohë, burime nga prokuroria thanë se ata kanë mbetur të habitur nga fakti se si kanë kaluar nga porti i Durrësit deri në magazinat e Shkozetit një sasi kaq e stërmadhe cigaresh kontrabandë. Sipas tyre, ka të dhëna se malli është shoqëruar për në Shkozet nga punonjës policie të portit të Durrësit dhe se kjo ishte një praktikë normale që ndiqej prej shumë kohësh atje.

---..mbaron artikulli i Rd-se..

--------------



Ne Dubaj nuk pranohen brek grisurit..
Duhet rrjepur shteti e populli shqiptar qe te vec atje e te hac nje pjat karkaleca.. Mendo e te flec atje disa dite sa duhen..plus me oborrtaro-kur.vo-zagare nga mbrapa te rric ne Dubaj me dite duhen bere shum kontrabanda nga durakDuk Kokat.. qe te paguac hotelet ne Dubajin e sheikve..
Kan hyre thelle Duk kokat po per hundesh do u dale..
Nuk vete.. qe ca te bejne palle dubajeve e ca te blejn fotoksin dygajeve ..

[Albo]

Kriminelet e medhenj qe nuk i ze ligji ne Shqiperi pasi i kane shpatullat e ngrohta nga miqte ne pushtet, po i ze tritoli super-fuqishem C4.

Trafikantet e droges po i kap policia shqiptare tonellatat e droges ne kufirin jugor.
Trafikantet e cigareve ne Durres, po i kap perseri policia shqiptare miliona $ mall.
Trafikantet e kafese po u kapet malli po nga policia shqiptare.

Dhe me e bukura eshte se shteti shqiptar po zbaton urdhrat qe vine nga sherbimet sekrete te vendeve fqinje, edhe pse interesat e atyre qe preken jane njerez qe kryeministrin Nano e mbledh tavolina.

Po mbyllet pak nga pak laku, por prisni se ky eshte vetem fillimi.
Shqiperia do te pastrohet nga te gjithe qente rrugace ne rruget e saj dhe ne rruget e botes brenda 3 muajsh, dosjet jane bere kapi, pritet vetem nje qeveri e re qe te kete vullnetin politik qe te zbatoje ligjin e te ndeshkoje krimin.

Albo

[manoklla]

E po keshtu eshte kjo pune. Ca qurraviten forumeve per dosje, te tjeret e shijojne jeten. Jeta eshte teper dialektike, dhe kush se kupton do rrije gjithe jeten duke u ankuar per fatin e keq qe e ka zene.

[Brari]

rd

--

Grupi kriminal që kontrollon Portin e Durrësit, kërkon t'ua faturojë trafiqet "ushtarëve" të thjeshtë

Kontrabanda, klani përpiqet të fshehë Kokën

Klani i kontrabandës së cigareve që kontrollon portin e Durrësit, por edhe shumë aktivitete të tjera të paligjshme në qytetin bregdetar, po përpiqet të fshehë gjurmët e krimit, pas kapjes së 7 kontenierëve me duhan kontrabandë në magazinat e Shkozetit. Ministri i Bujqësisë, Agron Duka, tha dje se nuk ishte pronar i magazinave të Shkozetit ku u kapën cigaret kontrabandë, duke e përdorur këtë si një mundësi për të qëndruar jashtë skemës së kontrabandës. Po kështu, kunati i tij, që dyshohet të jetë edhe truri i kontrabandës, Nard Koka, thotë se nuk është ai porositësi i mallit që u sekuestrua nga policia, pas informacioneve të shërbimeve të vendeve mike.

Por fakti që në dokumentat e kapura mund të mos rezultojnë emrat e Agron Dukës dhe të Nard Kokës, nuk i shfajësojnë kurrësesi këta të fundit nga skandali që tronditi jo vetëm qytetin e Durrësit. Burime të sigurta nga doganat, policia dhe prokuroria, kanë pohuar për gazetën se ka prova të qarta, se pas cigareve kontrabandë është Nard Koka, dhe se pronari i anijes që është shpallur në kërkim është thjesht një ushtar i rrjetit mafioz që vepron në Durrës. Po kështu janë të shumtë dëshmitarët që thonë se ekzistojnë lidhje të qarta dhe të hershme biznesi të paligjshëm mes Zotajt dhe ministrit të Bujqësisë, Agron Duka.

Fakti që policia është fokusuar vetëm tek pronari i anijes "Eni", për t'ia veshur atij të gjithë përgjegjësinë për kontrabandën që mund të ketë shkaktuar një evazion prej më shumë se 2 milion dollarësh, do të thotë se peshkaqenët e vërtetë të trafiqeve duan të fshehin kokën.

Nuk ka njeri normal në Durrës që nuk e di dhe nuk e ka dëgjuar faktin që Nard Koka është zot i portit të Durrësit, prej ku kalojnë dhjetra kontenierë kontrabandë, dhe këtu nuk bëhet fjalë vetëm për cigare. Si ka mundësi që 5 mijë koli cigaresh të kalojnë pa asnjë problem nga anija drejt e në magazinat e mikut të Agron Dukës dhe Nard Kokës pa i hyrë asnjë gjemb në këmbë?

Si ka mundësi që ky aktivitet kishte gjashtë muaj që vazhdonte dhe askush nuk ishte kapur derisa një shërbim i huaj u bë sebep që policia shqiptare të aktivizohej?

Gazeta "RD" po heton për të gjetur prova konkrete për lidhjet që ekzistojnë midis pronarit të anijes "Eni" dhe dy prej përfaqësuesve më të lartë të klanit të "Zemunit", që ka pushtuar dhe kontrollon të gjitha aktivitetet ekonomike të qytetit të Durrësit. Në numrat e ardhshëm, ne do t'ju informojmë jo vetëm për fatin e protagonistëve të kontrabandës së cigareve, por edhe për afera të tjera të zeza ku janë përfshirë ata që sot po përpiqen që t'ua faturojnë të gjithë aktivitetin e tyre kriminal disa viktimave apo ushtarëve të thjeshtë.






----

[mani]

Po nuk je pushtetar dhe ne pushtet nuk ka tregti as me droge,as me cigare as me asgje.
Pra se pari duhet te jesh kryetar partie,president ose kryeminister e pastaj te merresh me pune te ndyera.Kjo eshte demokracija e sotme!!!!


Hetimet dhe mediat italiane pohojnë se organizatori i kontrabandës së cigareve është presidenti i Malit të Zi

Cigaret kontrabandë pronë e Gjukanoviçit

Prokuroria: Fatmir Zotaj nuk është pronari i vërtetë i 3.5 milionë paketave cigare kontrabandë

Ened Janina

TIRANË- Cigaret kontrabandë me vlerë rreth katër miliardë lekë të bllokuara dy muaj më parë në magazinat në Shkozet janë pjesë e kontrabandës rajonale të organizuar nga presidenti i Malit të Zi, Gjukanoviç. Ato janë pjesë e një tregu të brendshëm cigaresh kontrabandë që qarkullojnë në të gjithë rajonin e Ballkanit dhe që me raste kontrabandohen deri në Afrikë. Deri tani, prokuroria shqiptare ka grumbulluar shumë të dhëna në lidhje me kontrabandën e cigareve por ende nuk është zbuluar emri i pronarit të vërtetë të tyre. Pronari i anijes “Eni” dhe magazinave, ku u gjetën cigaret, Fatmir Zotaj, është porositësi i tyre në Malin e Zi por realisht ai nuk është njeriu që ka paguar shumën e madhe të parave. Lajmi është pohuar dje nga burime të prokurorisë. Sipas tyre dhe mediave italiane, kjo kontrabandë rajonale cigaresh kryhet nga zyrtarë të lartë të Malit të Zi.
Hetimet
Prokuroria shqiptare ka hetuar për dy muaj në lidhje me 3.5 milionë paketa cigare kontrabandë të kapura nga policia e Durrësit. Nga hetimet e deritanishme të organit të akuzës është vërtetuar plotësisht se cigaret vinin nga Mali i Zi. Hetuesit e çështjes janë përpjekur që të zbulojnë prejardhjen e saktë të cigareve por këtu kanë hasur shumë probleme. Burime të prokurorisë pohuan se ka shumë të dhëna dhe materiale të tjera që tregojnë se cigaret kanë pasur si pronar të tyre presidentin e Malit të Zi, Gjukanoviç. Në Mal të Zi është një treg i madh kontrabande dhe cigaret kontrollohen nga kreu i shtetit. Ai është njeriu që ka ngritur një treg rajonal dhe shumë fitimprurës kontrabande cigaresh. Duke qenë se cigaret janë një mall për të cilin paguhen taksa shumë ta larta doganore, kontrabanda e tyre sjell fitime kolosale. Këto fakte, përveçse ndodhen në dosjen hetimore të prokurorisë, janë publikuar edhe nga mediat italiane. Këto të fundit e konsiderojnë Gjukanoviçin si kreun e kontrabandës së cigareve në të gjithë rajonin e Ballkanit. Madje, sipas tyre, kotrabanda e tij në disa raste shtrihet deri në Afrikë.
Pronari
Fillimisht pronari shqiptar i cigareve kontrabandë me vlerë rreth katër miliardë lekë u konsiderua Fatmir Zotaj. Ai është pronari i anijes “Eni” nga ku u shkarkuan shtatë kontenierët me cigare por njëkohësisht dhe pronar i magazinave në Shkozet ku u gjetën cigaret. Ndërkohë, hetimet e mëtejshme të organit të akuzës treguan se Zotaj nuk është pronari i vërtetë i cigareve. Ai është vetëm porositësi i tyre në Malin e Zi si dhe personi që i ka sjellë dhe magazinuar në Shqipëri. Sipas burimeve të prokurorisë, personi i shpallur tashmë në kërkim nuk është realisht pronari i cigareve. Zotaj nuk është njeriu që ka paguar shumën e katër miliardë lekëve (rreth katër milionë dollarë amerikanë). Paguesi i shumës gjigante ende nuk është identifikuar nga prokuroria shqiptare, e cila ka një listë me të dyshuar por ende asnjë emër konkret të bazuar mbi prova. Një nga pistat hetimore është se pronari i vërtetë i cigareve ka shfrytëzuar këtë rast për të bërë pastrim të mirëfilltë parash. Ai ka tentuar që të fusë 3.5 milionë paketa cigare kontrabandë nga Mali i Zi dhe shitjen e tyre ta regjistrojë në zyrën e tatimeve duke kryer kështu pastrimin e parave me prejardhje kriminale. Tashmë prokuroria shpreson se me arrestimin e Zotajt mund të zbulohet edhe pronari i vërtetë i 3.5 milionë paketave cigare kontrabandë.



Kontrabanda
Cigaret u zbuluan pas informacioneve të policisë
Cigaret kontrabandë rezultojnë të kenë hyrë në portin e Durrësit në të gdhirë të 29 marsit të këtij viti. Shtatë kontenierët, ku u gjet sasia e madhe e cigareve kontrabandë, u shkarkuan nga anija “Eni” me pronar biznesmenin Fatmir Zotaj, njëkohësisht dhe pronar i magazinave në Shkozet. Në bazë të informacioneve për një kontrabandë të mundshmë të cigareve, një ditë pasi anija “Eni” kishte mbërritur në port, policia dhe antikontrabanda ushtroi një kontroll aty, por pa mundur të zbulojë ndonjë gjurmë. Më pas, uniformat blu i janë drejtuar magazinës në Shkozet në Durrës, në pronësi të shtetasit Fatmir Zotaj. Pikërisht në këtë magazinë policia zbuloi 7 kontenierë me cigare të llojeve Karela Slims, Aura, Kongston, Rothmans dhe Marlboro, të cilat ishin futur kontrabandë. Pas numërimit rezultoi se 3,5 milionë paketa me cigare, me një vlerë prej rreth 4 milionë dollarësh, ishin pa pullë fiskale dhe të padeklaruara para autoriteteve doganore. Sipas akuzës, anija “Eni” është futur në portin e Durrësit pa njoftuar më parë autoritetet portuale dhe ka bërë shkarkimin e cigareve kontrabandë. Më pas 7 kondenierët me cigare kontrabandë janë transportuar vetëm 1 kilometër larg territorit të portit detar të Durrësit në magazinat e Shkozetit.


Të arrestuarit
Gentian Koçi, 32 vjeç, lindur në Lezhë dhe banues në Durrës, agjent detar në firmën "Zotaj Trading CO"me qendër në Durrës
Bilal Koci, 59 vjeç, lindur dhe banues në Durrës, kapiten i anijes "Eni", pronë e Fatmir Zotaj
Petrit Cila, 36 vjeç, me punë oficer i parë në anijen "Eni"
Ligor Todi, 54 vjeç, lindur dhe banues në Kavajë, marinar në anijen "Eni"
Gëzim Çyrbja, 39 vjeç, lindur dhe banues në Durrës, kuzhinier në anijen "Eni"
Adrian Gokaj, 47 vjeç, lindur në Tiranë dhe banues në Durrës, mekanik në anijen "Eni"
Hazbi Peza, 65 vjeç, lindur dhe banues në Durrës, marinar në anijen "Eni"
Admir Sulaj, 33 vjeç, inspektor në kapitenerinë e portit të Durrësit
Ngushëllim Hyzotaj, 40 vjeç, inspektor i antikontrabandës se detit në degën e doganës së Durrësit
Elmaz Stroka, 36 vjeç, radist në kalatën zero të portit detar të Durrësit



02/05/2005

[elbasanas]

Nga cila gazete e ke marr ket lajm?

[Pride]

e shkreta prokurori nuk po e gjen dot kush eshte pronari.
dihet kush eshte pronar i gjithckaje ne durres. grupi duka koka me ne krye shefin e madh tos bosin.