Gazeta Elektronike: "Futbolli Ndërkombtar"

[Davius]

Shalke, në Berlin për Championsin

Bajerni i Mynihut dhe Shalke do të jenë protagonistët e fundsezonit në Gjermani. Bavarezët shihen si favoritë nga specialistët. Me fitoret e arritura në mesjavë në Kupën e Gjermanisë, Bajerni dhe Shalke kanë dalë edhe në finalen e kësaj veprimtarie, e cila do të zhvillohet më 28 maj, në Berlin. Kjo ndeshje do të jetë një javë pas fundit të Bundesligës.

Shalke i ka fituar të dyja ndeshjet ndaj Bajernit në këtë sezoni, por bavarezët, kur mbeten edhe pesë javë nga fundi, kryesojnë me gjashtë pikë avantazh kampionatin gjerman. Sot, skuadra e Magatit do të presë Bohumin në fushën e saj, në një ndeshje relativisht të lehtë, ndërsa Shalke do të udhëtojë për në Berlin, ku do të ndeshet me Hertën e fortë, e cila renditet e katërta dhe synon një vend në Ligën e Kampioneve sezonin e ardhshëm. Shalke u rikthye te fitorja të martën në kupë, pas penalltive në gjysmëfinale ndaj Verderit, dhe la kështu pas shpine dy humbjet radhazi të pësuara në kampionat, ndaj Shtutgartit dhe Hamburgut.

Nga ana tjetër, Bajerni fitoi 0-2 në Bielefeld. Trajneri i Shalkes, Ralf Rangnik, deklaroi: "Morali ynë është ngritur pas kësaj fitoreje me 11-metërsha ndaj Verderit. Treguam se dimë të dalim nga ky moment i vështirë dhe se e meritojmë vendin e dytë në kampionat. Tani duhet ta ruajmë këtë pozicion dhe të bëjmë kujdes në ndeshjet e mbetura. Kanë mbetur edhe shumë pengesa për të kaluar dhe asgjë nuk është vendosur përfundimisht." Duket qartë se futbollistët dhe drejtuesit e Shalkes, më shumë se në një luftë për të arritur Bajernin kryesues, do të përqendrohen në detyrën e re që i kanë vënë vetes: mbrojtjen e vendin e dytë.

Vend që do t'i jepte mundësi skuadrës nga Gelsenkirshi, të merrte pjesë në Ligën e Kampioneve sezonin e ardhshëm, një frymëmarrje në aspektin financiar për klubin. Portieri dhe njëkohësisht kapiteni i kësaj skuadre, Frenk Rost, u shpreh: "Do të ishte shumë e rrezikshme nga ana jonë të mendonim për titullin kampion. Duhet të përqendrohemi te ndeshja e radhës në Berlin. Na pret një takim vendimtar për Ligën e Kampioneve dhe mund të jemi të lodhur pas 120 minutave të luajtura në mesjavë ndaj Verderit. Herta është vetëm gjashtë pikë larg nesh dhe Shtutgarti mund të na marrë vendin e dytë në rast humbjeje. Duhet të përqendrohemi vetëm te Championsi."

Edhe Herta e Berlinit është duke pretenduar për një vend në Ligën e Kampioneve. Ajo ndan vendin e katërt me Verderin, në kuotën e 50-të pikëve, gjashtë më pak se Shalke. Në vendin e tretë renditet Shtutgarti me 54 pikë. Skuadra e Samerit do të presë Volfsburgun pa pretendime, në fushën e saj, ndërsa Verderi ka një transfertë delikate të dielën, në Leverkusen. Edhe Bajernit mund t'i lindin probleme nga Bohumi, skuadër që renditet e 16-ta dhe ka nevojë për pikë, për të shpresuar në qëndrimin midis më të mirave edhe sezonin e ardhshëm.

[Davius]

Moxhi: Pezullimi i Ibrës? Një komplot

Drejtori i përgjithshëm i Juventusit, Luçiano Moxhi, ka reaguar ashpër pas pezullimit të Ibrahimoviçit për tri javë. "Është dashur një regjisor i madh për ta kapur një episod të tillë, - ka pohuar me sarkazëm, duke e pasur fjalën për pamjet e prodhuara nga televizioni "Sky", - ka qenë me të vërtetë i zoti". Dhe, për rrjedhojë, suedezi pritet të mungojë në ndeshjen ndaj Milanit: "E merrni me mend se ç'kombinim kanë bërë...", - ka qenë komenti polemik i Moxhit. Nuk dihet ende nëse Juvja do të bëjë apel apo jo.

Luçiano Moxhi ka reaguar ashpër ndaj vendimit të gjykatësit sportiv, Mauricio Laudi, i cili e ka ndalur për tri javë Zllatan Ibrahimoviçin, për goditjen e dhunshme me të cilën qëlloi Kordobën gjatë ndeshjes së të mërkurës ndaj Interit. Me përjashtim të ndonjë zbritjeje, suedezi pritet që të mungojë kështu në sfidat ndaj Lacios, Bolonjës dhe, mbi të gjitha, ndaj Milanit. Moxhi, që u informua për këtë vendim gjatë transmetimit direkt të një emisioni të "Sky"-it, reagoi në mënyrë shumë sarkastike dhe polemike, duke hamendësuar se është bërë një komplot ndaj Juventusit dhe "shpërtheu" ndaj regjisorit të televizionit me pagesë, që ka prodhuar pamjet: "Është dashur me të vërtetë një regjisor i madh për të kapur një episod të tillë, - tha ai,

- do të doja ta dija emrin e tij, ka qenë vërtet i zoti. Ka një dhunti të veçantë, ky zotëri ka bërë me siguri atë që është më e mira për futbollin, duke i bërë një shërbim të dobishëm komunitetit. Përgëzime atij dhe organizatës që e mbështet." Kur Moxhit iu vu në dijeni se Ibra do të mungojë edhe ndaj Milanit, ai shtoi: "Një fakt i tillë nuk më befason me të vërtetë aspak. Shikojeni se ç'kombinim i bukur: Ibrahimoviçi do të mungojë pikërisht ndaj Milanit. Me të vërtetë një rastësi jo e zakontë." Moxhi bën një dallim midis çështjes së Totit dhe asaj të Ibrahimoviçit: "Kanë qenë dy ndodhi krejt të ndryshme, - theksoi drejtuesi juventin, - të cilat s'mund të krahasohen mes tyre dhe këtë besoj se mund ta kuptojnë të gjithë. Mjafton të shohësh pamjet për të arritur në këtë përfundim.

Vendimi i Laudit ndaj Ibrës ka qenë si një rrufe në qiell të pastër. Në këtë pikë ndihem me të vërtetë i shqetësuar. Shuplakën ndaj Kordobës nuk e kisha vënë re, - vijoi më tej Moxhi, - me sa duket nuk jemi fotozhenikë me provat televizive." Mbetet një mister mundësia për të bërë apel: "Çfarë apelimesh, s'do të bëjmë asgjë, - tha Moxhi, i cili më pas e korrigjoi fjalinë. - Do t'i vlerësojmë me qetësi motivacionet, më pas do të shohim." Ka mundësi që Juvja të përpiqet ta ulë një javë pezullimin, për t'i mundësuar sulmuesit që të jetë në fushë në superndeshjen e 8 majit.

[Davius]

Pujol: Ronaldinjo, lideri i Barçës

Kapiteni i Barcelonës, Karles Pujol, i ka dhënë një mesazh shumë të qartë shokëve përpara ndeshjes me Malagnën: "Duhet të japim maksimumin!" Numri 5 i Barcelonës, përpara se skuadra e Rajkardit të luajë ndeshjen e 33-të në këtë kampionat, lëshon intervistën e mëposhtme, ku tregon se te Barça të gjithë e kanë të qartë atë që duhet të bëjnë për të fituar titullin kampion.

- Riktheheni në formacion ndaj Malagës më i freskët, pas javësh pushim...
- Po, ndeshja e fundit që kam luajtur ka qenë ajo e dy javëve më parë ndaj
Realit. Nuk mund të them se jam shplodhur plotësisht, sepse kam bërë një program special riaftësimi gjatë gjithë këtyre 15 ditëve të fundit. Gjithsesi, rikthehem në fushë me vetëdijen që duhet të luaj në 100% të mundësive të mia, për ta ndihmuar Barcelonën në këtë fazë delikate të sezonit. Kemi edhe gjashtë javë dhe duhet të japim maksumumin për ta arritur objektivin që i kemi vënë vetes që në javët e para të këtij sezoni.

- Keni qenë protagonist gjatë gjithë sezonit në mbrojtjen katalanase. Cili është sekreti i vazhdimësisë suaj në këtë kampionat?

- Kam pasur disa shqetësime fizike javët e fundit, por, gjithsesi, mund ta quaj veten me fat për formën fizike që kam pasur gjatë këtij sezoni futbollistik. Mendoj se kjo është meritë edhe e stafit teknik të Barcelonës, që ka punuar ashtu si duhet gjatë fazës përgatitore. Kjo ka qenë një nga pikat ku na kanë kritikuar më shumë, por tani duket qartë se kemi ende freski në këmbë. Shtatë muaj futboll, ditë pas dite, nuk janë pak.

- Cili e ka kalendarin më të vështirë, Reali apo Barcelona?

- Nuk e di se cili mund ta ketë më të favorshëm apo më të vështirë. Ajo që di është që të gjitha ndeshjet janë të vështira dhe çdo kundërshtar ka fizionominë e vet, dhe kërkon një strategji të detajuar për ta mundur. Tani të gjitha veprimtaritë janë mbyllur dhe të gjithë janë të pëqendruar te kampionati.

[Davius]

Lion, kampionët në fundin e një epoke!?

Askush nuk e mendon seriozisht se Lioni do ta humbasë titullin kampion në këtë sezon, por sot ndaj Okserit skuadra e Lë Genit do të ketë një test të vështirë moral për të kapërcyer. Duhet të fitojë për të treguar se ka një të ardhme. Duket e çuditshme, sepse bëhet fjalë për katër herë kampionët radhazi në Francë, por javët e fundit kanë treguar se për Lionin ky sezon mund të jetë fundi i një epoke. Zërat për një largim të mundshëm të trajnerit Lë Gen në fund të sezonit, dhe humbja në "Gerland" ndaj Parisit javën e kaluar, i imponojnë Lionin të kërkojë me çdo kusht suksesin ndaj Okserit, skuadër e etur për pikë në zonën UEFA; nga kjo veprimtari sivjet u eliminua në çerekfinale nga CSKA-ja e Moskës.

Pikërisht në prag të kësaj ndeshjeje, portieri Kupe, një nga simbolet e skuadrës, që duhet të grumbullojë katër pikë në pesë javë për t'u shpallur kampione, tha: "Ajo që ndodhi ndaj Parisit mund të ndodhë edhe ndaj Okserit, dhe kështu deri në fund të kampionatit. Për këtë duhet të tregohemi të kujdesshëm dhe ta hipotekojmë sa më parë të jetë e mundur titullin e katërt kampion radhazi. Kështu do të arrijmë edhe qetësinë e merituar pas këtij sezoni të gjatë, kur u treguam kompetitivë në të gjitha veprimtaritë ku morën pjesë. Të tregojmë cilët jemi në Okser, përndryshe do të vuajmë deri në fund të kampionatit."

[Davius]

Kapelo: Ibra, një ndëshkim i padrejtë

Fabio Kapelo nxjerr "shpatën" për të mbrojtur Ibrahimoviçin, i cili u pezullua tri javë: "Ndëshkimi është i padrajtë. Prova televizive duhet të dënojë edhe ata që simulojnë. A e patë Del Pieron me Kufrenë? Pas shuplakës, ai qëndroi në këmbë, ndërsa Kordoba, pas kacavjerrjes së Ibrës u rrëzua me duart në fytyrë, duke simuluar. Është e drejtë të ndëshkohen ata që godasin, por edhe për ata që simulojnë duhet marrë e njëjta masë. Kam besim tek apeli që do të bëjmë". Ndryshon pikëpamja dhe, për rrjedhojë, gjithçka duket ndryshe: nuk është Ibrahimoviçi ai që duhet të ndëshkohet nga prova televizive, por Kordoba

[Davius]

Karvalho: Gjithçka sillet rreth nesh

Mbrojtësi i Çelsit, Rikardo Karvalho, ka deklaruar se është mjaft i kënaqur me arritjet e ekipit të tij gjatë këtij sezoni. Portugezi, i ardhur nga Porto në fillim të këtij sezoni, është shprehur optimist për ndeshjen e së mërkurës ndaj Liverpulit. "E respektojmë Liverpulin, por kemi shumë besim në vetvete dhe, kësaj here nuk mund të gabojmë. Duhet t'i gëzohemi këtij sezoni dhe t'i fitojmë të gjitha ndeshjet e mbetura. Titulli është pothuajse yni, dhe tani duhet të mendojmë vetëm për gjysmëfinalen e Championsit. Liverpuli është një ekip mjaft i mirë dhe, megjithëse i kemi mundur tri herë në këtë sezon, ata kanë qenë gjithmonë të rrezikshëm. Ata kanë lojtarë mjaft të mirë, të cilët vihen në pah në ndeshje të rëndësishme si këto." - përfundoi Karvalho.

[Davius]

Nedved "grusht" Lacios, Juvja në krye

I ulur në pltronë, Milani e kishte për detyrë të besonte. Jo se Lacio po bënte gjithçka për të fituar kundër Juventusit, por të paktën mund të merrte një barazim, që do t'i lejonte kuqezinjtë të kryesonin të vetëm me dy pikë larg "Zonjës". Dhe deri në minutën e 85-të kishte të drejtë. Por ënddrën, ia prishi një gol i mrekullueshëm i Pavel Nedvedit, që përveç se fundosi Lacion në "Olimpiko", i jep tri pikë të arta Juventusit për të qëndruar në krye të renditjes, me të njëjtin ritëm me Milanin.

Ka fituar Kapeloja, në mënyrën që njeh më mirë, duke fituar pa Del Pieron (doli pas 20-të minutash lojë), Trezegenë, Ibrahimoviçin dhe Emersonin. Një "arsenal" sulmues jo i vogël për një skuadër të madhe. Në të vërtetë, çeku nuk është se luajti mirë, por përkushtimi i tij qe i dukshëm. Goli i tij, falë një zgjuarsie, i shtangu të gjithë me të majtën që tundi rrjetën laciale në një pozicion të vështirë. Pra, çdo gjë mbetet e njëjtë. Milan e Juve sërish "dorë për dore". Java e 33-të e Serisë A ka pasur si surprizë dështimin e dytë sezonal të Interit në kohë shtesë.

Shumë ndeshje u zgjidhën "in extremis", si ajo në Livorno dhe Bergamo. Sampdoria konsolidon shpresat e saj drejt Ligës së Kampioneve, duke mundur një Romë të pafat (2?1) dhe përfiton nga rrëshqitja e Palermos në Bergamo me Atalantën, 1?0. Ka fituar edhe Livornoja 1?0 ndaj Leces, duke siguruar shpëtimin para kohe. Surpriza e javës së 33?të ka qenë Mesina, e cila ka mundur Interin, duke i shkaktuar humbjen e dytë në këtë sezon dhe të parën jashtë fushe në kampionat. Ndërkohë kanë përfunduar në barazim ndeshjet Bolonja?Fiorentina 0?0 dhe Kievo?Kaljari 1?1. Interi, çfarë dështimi!

[Davius]

Balak: Titulli, çështje kohe

Një ditë pas fitores ndaj Bohumit, që e ka afruar Bajernin ndjeshëm me titullin e 19-të kampion në Gjermani, mesfushori i bavarezëve, Mikael Balak, u shpreh: "Ishte një fitore e rëndësishme, sepse kemi prekur me njërën dorë titullin kampion. Fitorja nuk ishte aspak e lehtë, por arritëm të ruajmë serinë e fitoreve dhe, falë rezultateve të tjera, fitimi i titullit është thjesht një çështje kohe. Bohumi bëri një rezistencë të ashpër, por kur mbetën me dhjetë futbollistë, loja mbaroi."

Kahn: Të festojmë kur duhet
Oliver Kahn, portieri i Bajernit të Mynihut, pas fitores ndaj Bohumit, u shpreh: "Ishte ndeshja e shtatë në 15 ditë, por treguam se kemi forca për të fituar. Janë edhe 12 pikë në lojë dhe duhet të presim përpara se të fillojmë festimet. Kemi bërë një kampionat me nivel dhe duhet të bëjmë detyrën tonë deri në ndeshjen e fundit të sezonit."

[Davius]

Benitez paralajmëron Xherrardin


Trajneri i ekipit të Liverpulit, Rafael Benitez, ka paralajmëruar mesfushorin e ekipit të tij, Stiven Xherrardin, se në qoftë se kalon te Çelsi në sezonin e ardhshëm, mund ta humbë statusin e kampionit, të fituar te Liverpuli. 24-vjeçari është përfolur shumë kohët e fundit për një kalim të mundshëm te blutë e Mourinjos, por Benitezi deklaroi: "Te Liverpuli ai është një "yll", por në çdo ekip tjetër do të ishte si gjithë të tjerët.

Nuk e di nëse do të ishte një lëvizje e zgjuar kalimi i tij te Çelsi, duke parë që ata kanë një kontigjent të madh "yjesh". Prej shumë kohësh, Xherrardi ka qenë në shënjestrën e klubit të Abramoviçit dhe, sipas shtypit, Çelsi do të ishte i disponueshëm t'i paguante lojtarit 120.000 stërlina në javë. Mesfushori i kombëtares angleze deklaroi se nuk do ta rinovonte kontratën e tij me Liverpulin deri në fund të sezonit dhe ky vendim varet nga ecuria e ekipit të tij në Ligën e Kampioneve. "Ndonjëherë ka gjëra më të rëndësishme se paraja," - përfundoi Benitezi.

[Davius]

Luksemburgo: Fitore, falë shpirtit luftarak

Vanderlei Luksemburgo, trajneri i Realit të Madridit, ka përgëzuar futbollistët e tij për shpirtin e lojës së treguar në fitoren e arritur të shtunën 2-1 ndaj Vilarealit. "Ishte një ndeshje, në të cilën fituam falë shpirtit luftarak. Dhamë gjithçka në fushën e lojës dhe fatmirësisht ia dolëm mbanë, - tha pas ndeshjes trajneri brazilian. - Fitorja ishte e merituar me atë që u pa në fushën e lojës. Futbollistët e mi dhanë zemrën në fushë dhe arritëm një fitore, e cila na lejon të shpresojmë ende te fitimi i titullit kampion." Më pas, Luksemburgo vazhdoi deklaratën e tij: "Qëndruam të bashkuar dhe shpesuam te fitorja, pavarësisht nga 11-metërshi që na u dha kundër dhe kartoni i kuq i marrë nga Samueli, të cilët na e vështirësuan punën."

Trajneri brazilian justifikon nervat e treguara nga skuadra e tij në minutat e fundit. I gjithë takimi ishte mjaft nervoz dhe në fund Reali e mbylli ndeshjen me nëntë futbollistë, ndërsa Vilareali me dhjetë futbollistë. Ai tha: "Nuk dua të flas për gjyqtarin. Nervat janë të justifikueshme në një ndeshje të tillë. Futbolli është një sport pasional dhe është e paevitueshme që të mos ketë episode të tilla." Me këtë fitore, Reali ka siguruar përfundimisht vendin e tij dhe pjesëmarrjen në Ligën e Kampioneve, pa ndeshje eliminatore sezonin e ardhshëm: "Ne shpresojmë ende te titulli kampion, por edhe sigurimi i vendit të dytë është i rëndësishëm. Jemi në rritje të vazhdueshme dhe Reali i vërtetë është parë vetëm pas eliminimit nga Liga e Kampioneve dhe humbjes me Getafen në kampionat."