Gazeta Elektronike: "Futbolli Ndërkombtar"

[Davius]

Lajme shkurt nga Premier Liga

Benitez: Ouen? Mirë se të vijë Rafael Benitez e ka lënë derën të hapur për një rikthim të Majkëll Ouenit në Liverpul. Oueni ka pasur vështirësi në sezonin e tij të parë në Spanjë me Realin e Madridit. Ai ka pasur një performancë të mirë dhe ka shënuar 10 gola në ligë, por ka qenë i destinuar që të niset nga stoli, pasi ndihet i "paketuar" nga Rauli dhe Ronaldo.

Benitezi, që në verë pati një rrugë me kah të kundërt me Ouenin, pasi la Valencian dhe erdhi në Angli, beson që do jetë gjithmonë një obsion për rikthim. "Oueni është një mbështetës i Liverpulit dhe përherë do të jetë një mundësi për atë dhe ne si një rikthim. Ai ka shpirtin që na nevojitet dhe e dashuron Liverpulin. I.C Dajer: E kam falur Bojerin Kiron Dajer i Njukasëllit e ka falur Li Bojen për incidentin që pati gjatë takimit me Aston Vilën.

"Unë tashmë e kam falur Linë për atë që ndodhi, pasi kam qenë shumë herë i falur në karrierën time dhe do të ishte hipokrite për mua që të mos falja dikë, - tha ai. - Nuk kam pasur asgjë me të para këtij takimi," - shtoi ai për gazetarët. Henri i afrohet rekordit të Rajtit Tierri Henri është shumë afër thyerjes së rekordit të Ian Rajt, që ka shënuar 185 gola me Arsenalin. Ai është 4 gola larg, por ky rekord është lehtësisht i thyeshëm, duke parë edhe formën e mirë që po kalon francezi. Ai ka shënuar 9 gola në 6 takimet e fundit dhe mund ta kalojë këtë rekord para përfundimit të sezonit.

Mourinjo sulmon trajnerët "parazitë" Mourinjo u jep një shuplakë trajnerëve "parazitë" si Sër Bobi Robson e Gordon Straçen. "Puna më e mirë në botë është të jesh trajner i shkarkuar, pasi nuk ke çfarë të bësh, vetëm të flasësh për të tjerët. Prandaj është mirë për ata që të gjejnë ndonjë punë dhe nëse sduan, duhet të lënë të tjerët të qetë në punët e tyre," - tha ai. Xhol: Do të ndryshoj sulmin e Totenhemit Trajneri i Totenhemit ,Xhol, e shikon të ardhmen e sulmit të tij në dyshim." Dëshiroj që Robi Kin të qëndrojë, por asgjë nuk mund të them përpara përfundimit të sezonit. Duke pasur 22-23 lojtarë, duhet të bësh zgjidhje të vështira, si ajo midis Kinit dhe Defos, ku ky i fundit ka qenë shumë rezultativ," - tha ai për një radio.

[Davius]

Milani në kor: Ishte faji i derbit


Pas fitores në euroderbi, Milani pagoi kusurin në kampionat, duke barazuar me një Breshia të shkëlqyer. Ndeshja ndaj Interit u kushtoi shumë energji kuqezinjve. "Derbi ndikoi shumë, ? tha Rui Kosta, ? është normale që në një ndeshje si kjo, të hysh në fushë me pak derbi në mendje." I të njëjtit mendim ka qenë edhe Ançeloti: "Paguam trysninë tepër të fortë të derbit. Derbi na rëndoi nga pikëpamja fizike dhe psikologjike, - deklaroi trajneri. - Konsumuam shumë energji dhe s'mund të shkëlqenim.

Unë e kisha thënë në vigjilje se do të kishte qenë një sfidë delikate." Rui Kosta, që shënoi ndaj Di Biaxhios me shokë për herë të parë në këtë sezon, e ka në dorë "recetën" anti-Inter. "Për fat të keq nuk do të kemi kohë të rikuperojmë, - tha portugezi, - por ndaj Interit do të luajmë sikurse të kishim fituar 10?0. Nuk do të kushtëzohemi nga asgjë. Fakti që shënuam në minutat e para, e kushtëzoi në mënyrë negative ndeshjen tonë.

Në fakt, në minutat e fundit u vu re një rënie. Breshia e ngriti rrezen e lojës dhe arriti të barazonte. Tani, - përfundoi Rui, - duhet të nisim të rikuperojmë pikët që lamë në San Siro." Një hap fals pas shumë fitoresh nuk ia ul moralin Tomasonit, i cili në të vërtetë u duk vetëm hija e vetvetes. "Unë dhe shokët e mi ndihemi të qetë, nesër në Champions nuk do të kemi probleme psikologjike". Por ka edhe nga ata, si Kostakurta, që shohin diçka pozitive në barazimin ndaj "Dallëndyshkave" në kuadër të euroderbit:

"Në kuadër të derbit, ndalesa ndaj Breshias mund të jetë pozitive, madje ndoshta është fakti pozitiv i kësaj ndeshjeje, sepse pamë edhe një herë tjetër se është tepër e rrezikshme po ta ulësh ritmin." Më pas, një batutë: "La Korunja? Këtë gjë e thonë gjithnjë gazetarët dhe e përsërisin ata të Interit. Mua më bëhet qejfi që të gjithë na e kujtojnë vazhdimisht atë humbje. Për ne është diçka e mirë."

[Davius]

Vieri: Në fëmijëri më cilësonin të dobët...

I natyrshëm dhe ekstravagant si gjithnjë, Bobo Vieri rrëfehet 360 gradë në një intervistë, e cila nis me debutimin e tij për të ardhur deri tek Interi, duke kaluar nga perspektiva e lënies së futbollit, e deri tek argumentet përvëluese si dopingu. "Nëse filloj të mendoj se një ditë s'do të luaj më, kaloj në depresion. Ndoshta do të shkoj në Majemi me miqtë e mi, për të hapur një bar". Bobo kujton shkelmat e parë që i ka dhënë topit, të cilat babai i tij Roberto i cilësoi pak premtuese.

"Kur fillova të luaja, thoshin se isha i dobët, por u përmirësova duke punuar shumë." Lidhur me skandalin e dopingut që ka përfshirë skuadra si Juventusi, Vieri theksoi: "Dopingu? Kur isha te Juvja, nuk kam përdorur kurrë asgjë". Futbollistët më të fortë me të cilët ka luajtur ndonjëherë? "Zinedin Zidan, Ronaldo dhe Paolo Maldini".

Miqtë e tij më të ngushtë janë "Kristian Broki, Paolo Maldini, Pipo Inzagi, Pipo Pankaro, Stefano Betarini, mes futbollistëve, dhe më pas Fiorelo dhe Laura Pauzini". Pyetjes nëse ka menduar ndonjëherë të largohet nga Interi për të fituar më shumë, Bobo i përgjigjet: "Unë jam tek Interi, pra te një skuadër e madhe dhe ndihem i lumtur që ndodhem këtu. Futbolli është me cikle, ka periudha kur një skuadër fiton gjithçka, duhet të kesh fat dhe ta gjesh atë cikël."

[Davius]

UEFA, përsëri e pakënaqur me Çelsin

Organizata e Futbollit Europian, UEFA, është shprehur përsëri e pakënaqur me sjelljen e klubit londinez të Çelsit. Kësaj here, arsyeja ka qenë dalja e trajnerit të fitnesit në konferencën për shtyp të ditës së djeshme. Ekipi i Çelsit ndodhet në Gjermani për ndeshjen me Bajernin dhe Mourinjo nuk ishte në stolin e tij, për shkak të pezullimit të dhënë pikërisht nga UEFA.

Delegati i UEFA-s, Volfang Eikler, u shpreh i zhgënjyer që ekipi i Çelsit nuk kishte lejuar të merreshin intervista të tjera, përveç asaj të trajnerit të fitnesit, Rui Faria, dhe të lojtarit Mikael Forsell, ndërsa Bajerni në konferencën e shtypit kishte vënë në dispozicion të UEFA-s, trajnerin Magat, portierin Kahn dhe mesfushorin Ouen Hergrivs. Zyrtarisht, Çelsi nuk shkeli asnjë rregull, por Eikleri deklaroi se këtë ndodhi do ta raportonte në zyrat qendrore të UEFA-s në Bruksel.

"Nuk mund t'i detyrojmë të bëjnë asgjë dhe për këtë nuk ka ndonjë sanksion. Por, po të shohësh Bajernin, ata na sollën trajnerin Magat, kapitenin Kahn dhe mesfushorin Hergrivs, ndërsa Çelsi nuk denjoi as të na sillte dikë për të na thënë se kush do të vinte. Kjo nuk është korrekte dhe këtë do të më duhet ta raportoj në zyrat e UEFA-s," - deklaroi Volfang Eikleri.

[Davius]

Interi, 4 takime me dyer të mbyllura

Katër ndeshje të kupës me porta të mbyllura, edhe dy të tjera nëse në tri vitet në vazhdim do të ndodhin të tilla episode të dhunshme. Ky është vendimi i Komisionit Disiplinor të UEFA-s për Interin, pas incidenteve për hedhje objektesh tymuese, ku një nga të cilat goditi portierin e Milanit, Nelson Dida, në euroderbin e Ligës së Kampioneve të 12 prillit me Milanin. Kundrejt klubit zikaltër, komisioni i UEFA-s gjithashtu ka konfirmuar rezultatin 0-3 në tavolinë dhe i ka vendosur një gjobë prej 300.000 frangash zvicerane (afërsisht 200.000 euro).

Komisioni Disiplinor, i drejtuar nga spanjolli Jozef Luis Vilaseka Guash, ka vlerësuar raportin e arbitrit gjerman Markus Merk, të vëzhguesit të UEFA-s, suedezin Lars-Ake Lagrel për të gjithë ndeshjen. Më pas ka dëgjuar delegacionin e Interit, i përfaqësuar në Nion nga presidenti Xhaçinto Faketi, nga përgjegjësi për sigurinë dhe raportet institucionale, Stefano Filuki, dhe nga avokati Adriano Rafaeli. Të gjithë këta përfaqësues të Interit u janë përgjigjur pyetjeve të Komisionit. Tre antarët e tjerë, përveç presidentit Guash në komisionin që u mblodh për të hetuar ngjarjet e ndodhura në "San Siro", ishin dhe zvicerani Zhak Antenen, danezi Xhim Stjerne Kansen dhe austriaku Tomas Partël.

Pra, asnjë "stuhi" në dukje. Në shtëpinë e zikaltërve ekzistonte frika e skualifikimit për gati një vit, nga të gjitha kupat. Erdhi ky gjykim i fortë që i ndëshkon zikaltrit në një mënyrë paksa të ashpër, por jo i paparë ndonjëherë në futboll, dhe që lëshon një sinjal të fortë dhe të pastër (që tashmë është përcaktuar: nëse do të përsëriten epsode të tjera dhune, Interi s'do të luajë edhe dy ndeshje të tjera në "San Siro") për të ardhmen. Milanisti Ligresti kërkon të blejë Interin Paolo Ligresti, sipërmarrësi simpatizues milanist, mund të jetë pronari i ardhshëm i Interit, nëse Masimo Morati vendos ta shesë klubin. "A do ta blejë Interin? Nëse është një biznes, mund të vlerësohet, sepse mua më interesojnë gjithnjë bizneset, - deklaroi ai.

- Nëse do të vijë një rast i tillë, do të vendosja të bëhesha pronari i shoqërisë pa u menduar fare për afeksionet e mia kuqezi. Por nuk mendoj se Morati e shet klubin." E ardhmja e Interit mund të ngjyroset kuqezi, por mos ua thoni këtë tifozëve, që pas gjithë atyre viteve të zhgënjyera, asnjëherë s'do ta imagjinonin të binin në duart e një milanisti. Paolo Ligresti shkoi në Milanelo për të prezantuar një sërë iniciativash të lidhura ngushtë me zinxhirin hoteleve të tij "Atahotels". Aty ka hedhur kandidaturën e tij për të përvetësuar shoqërinë zikaltër, nëse Masimo Morati, edhe pas zhgënjimeve të fundit sportive dhe episodeve të rënda që kanë sjellë pezullimin e euroderbit, vendos që ta shesë. Hipoteza që vetëm gjatë ditës së premte, padroni i ka larguar ("Situatat e vështira nuk më lodhin, por më shtohet më shumë dëshira që ta mbroj klubin tim" - shpjegoi ai), por që mund t'i kthehet përsëri çështjes në rast të ndonjë përballjeje të mundshme, siç ka ndodhur në një të shkuar të largët.

[Davius]

Barosh: Nuk kemi asgjë për të humbur

Milan Barosh, sulmuesi i Liverpulit, ka deklaruar se do të vendosë për të ardhmen e tij në përfundim të këtij sezoni. Lojtari i kombëtres çeke është golashënuesi më i mirë për Liverpulin në këtë sezon, por performanca e tij nuk ka qenë konstante në të gjithë sezonin. Baroshi është kërkuar nga disa ekipe të kampionatit italian dhe kohët e fundit është shtuar në listë edhe ekipi i Valencias, i cili ka shprehur interesimin e tij për 23-vjeçarin.

Edhe ekipi i Juventusit, i cili u eliminua nga Liverpuli në Ligën e Kampioneve, ka shprehur interesimin e tij për sulmuesin çek. Vetë Baroshi është shprehur i pavendosur për të ardhmen e tij dhe ka mohuar një marrëveshje të mundshme me ekipin e Valencias, duke thënë: "Nuk kam asgjë për të thënë. Duhet të prisni edhe katër javë të tjera." Për zërat për një kalim te Juventusi, ai u shpreh: "Këto i lexoj vetëm në gazeta. Nuk kam pasur asnjë ofertë dhe askush nuk më ka kontaktuar. Me sa di unë, as menaxherit tim nuk i kanë ofruar ndonjë ofertë.

Tani jam i fokusuar vetëm për Liverpulin. Ka akoma një muaj para përfundimit të sezonit dhe për momentin jam i qetë." Baroshi ka luajtur një rol të rëndësishëm në kualifikimin e ekipit të tij për në gjysmëfinalet e Championsit dhe ai mendon se Liverpuli i ka të gjitha mundësitë për të fituar ndaj Çelsit. "Eshtë e vështirë të parashikosh ekipin që do të shkojë në finalen e Stambollit. Çelsi është një nga ekipet më në formë në Europë dhe për ne do të jetë mjaft e vështirë. Të gjitha ekipet gjysmëfinaliste kanë dëshirë të fitojnë trofeun. Jemi shumë afër ëndrrës, por nuk do të jetë e lehtë. Arritëm të kualifikoheshim për në gjysmëfinale dhe tani nuk kemi asgjë për të humbur," - deklaroi Baroshi.

[Davius]

Ançeloti: Më mirë nëse Juvja qëndronte në Europë
Karlo Ançeloti s'ka qenë aspak i kënaqur nga eliminimi i Juves nga Championsi. Trajneri kuqezi, edhe pse beson në mënyrë të verbër në forcën e organikës së tij të gjerë dhe tepër të aftë, beson se bardhezinjtë janë tani thuajse favoritë në kampionat. "Kualifikimi i Liverpulit është një rezultat befasues, - pohoi trajneri i kampionëve të Italisë, - dhe unë do të kisha preferuar të fitonte Juvja. Tani, në sprintin për titull, ata mund të kenë ndonjë avantazh më shumë.

Në fakt, ndeshja direkte (në San Siro) është në program katër ditë pas takimit të dytë gjysmëfinal të kupës. Le të themi se tani mundësitë janë të barabarta. Kampionati mund të vendoset përpara ndeshjes së madhe." Kështu që Milani do të jetë i detyruar të luajë më shumë ndeshje se Juvja. Gjithsesi, Ançeloti është gjithnjë e më i ndërgjegjshëm, se ka një organikë të cilësuar të dyfishtë nga vetë Fabio Kapelo. Ai e lavdëroi edhe kolegun e tij bardhezi: "Kemi shumë armë në dispozicion dhe do të përpiqemi t'i shfrytëzojmë të gjitha, edhe pse i druhem zemërimit juventin. Ajo është një skuadër që ka një karakter të shkëlqyer dhe është e padrejtë që të kritikohet Kapelo. Tani është e lehtë të thuhet se Olivera duhej zëvendësuar, por ai i kishte zgjidhur shumë telashe. Zalajeta gjithashtu ka qenë shpeshherë vendimtar."

[Davius]

Zemërimi i Kakasë: Ky s'është më futboll

Pamjet e asaj mbrëmjeje të marrë, të ngulitura në mendje, frika e atyre çasteve të tmerrshme me Didën e goditur nga një fishekzjarr që e shtrin përdhe, ndërsa zjarrfikësit përpiqen të pastrojnë fushën. Rikardo Kaka s'do ta harrojë kurrë atë derbi që përfundoi mes aromës së rëndë të tymuesve, hedhjen e pandalueshme të shashkave dhe objekteve që e shndërruan zonën milaniste të rreptësisë në një fushë beteje.

"Ndjeva frikë, habi dhe nuk u besoja syve. U merakosa për mikun tim Dida që u godit në shpinë, sepse ajo që po ndodhte, më dukej e pamundur, s'u besoja syve. Nuk mendoja se një ndeshje e Ligës së Kampioneve mund të përfundonte në atë mënyrë. Stadiumi ishte plot, bota po na shihte, Milani po fitonte dhe po kualifikohej, më pas mbërriti ai fund aq i trishtueshëm." - A patët vallë edhe frikë se mos tifozët hynin në fushë?

- Jo, por nga shkallët po hidhej gjithçka dhe e kishim të vështirë të futeshim në tunelin e stadiumit. Edhe gjyqtari e anësorët u bllokuan në mesfushë, në pritje që situata të normalizohej. - Derbi i parë i pezulluar në 97 vjet histori milaneze...

[Davius]

Barça-Real, përgjigje dhe kundërpërgjigje

Reali i Madridit ka fituar 0-2 në Levante dhe ka arritur kështu fitoren e katërt radhazi. Skuadra e Luksemburgos, me nga një gol në çdo pjesë, fitoi ndaj një kundërshtari që nuk duroi më shumë se 30 minuta klasin e "galaktikëve". Reali mund të krehohet pas këtij takimi me suksesin që po korr skema me tre sulmues, Ouen titullar dhe Figo në stol.

Gjithashtu, Levante ka qenë dëshimtare e rilindjes së Ronaldos. "Fenomeni", me nga një gol në secilën pjesë dhe me një lojë të shkëlqyer në përgjithësi, duket se po i afrohet formës së ditëve më të mira. Mbeten edhe gjashtë javë nga fundi i kampionatit dhe duket se tani janë duke u shijuar "galaktikët" e vërtetë. Në ndeshjet e tjera të luajtura në javën e 32-të të kampionatit spanjoll të futbollit, Vilareali la pikët e tij të para në nëntë takimet e fundit brenda fushës së tij, teksa barazoi dje me ekipin e Real Betisit, me rezultatin 0-0.

Ekipi i drejtuar nga Manuel Pelegrini humbi një shans të mirë për të siguruar një vend në Champions dhe nuk mundi të merrte më shumë se një pikë në një ndeshje që gjithsesi ishte mjaft e bukur. Rastet ishin të shumta për të dyja skuadrat, por goli mungoi. Ky rezultat e la Vilarealin në kuotën e 54 pikëve, po aq sa Sevilja në vend të katërt të renditjes. Andalusianët humbën të shtunën me rezultatin 1-0, por janë në vend të tretë, pasi kanë golavarazh më të mirë. Në fundin e renditjes, Numansia u mund nga Real Saragoza me rezultatin 4-1 dhe tashmë shpresat për shpëtim janë të pakta. Edhe Albasete duket se do t'i bashkangjitet Numansias në divizionin e dytë, pas humbjes së djeshme me Malagën.

Kjo situatë ka favorizuar ekipin e Hektor Kuperit, Majorkën, e cila arriti të merrte një pikë në barazimin 0-0 ndaj ekipit të Valencias. Tashmë Numansia ndodhet në fund të renditjes me 23 pikë, Albasete ka 24 pikë dhe Majorka 25. Në vend të katërt nga fundi ndodhet ekipi i Rejsing Santanderit, me 34 pikë, i cili humbi dje ndaj Atletiko Bilbaos me rezultatin 0-2. Në ndeshjet e ditës së shtunë, Atletiko u ndal në barazim në Madrid nga Espanjoli, Osasuna "ngadhënjeu" në Sevilja, ndërsa Sociedadi fitoi në "Anoeta" ndaj Deportivo La Korunjës

[Davius]

Milani bie në Sienë, Juvja merr kreun

Ndërsa të gjithë prisnin takimin direkt të 8 majit, Milani dhe Juventusi i shkëputën "duart" nga njëri-tjetrit dje, me bardhezinjtë që largohen tri pikë larg kuqezinjve. Dhe gjithçka ndodhi kur Milani është dorëzuar në Sienë, duke humbur 2-1 dhe Juvja ka shpartalluar pa problem Leçen 5-2. Një shkëputje e papritur mes dy skuadrave, që duket se kanë ndarë edhe trofetë për këtë sezon: "Zonja" titullin kampion dhe "Djalli" Ligën e Kampioneve, edhe pse janë për t'u luajtur ende gjysmëfinalja dhe finalja.

Në ndeshjet e tjera, Interi u rikthen buzëqeshjen tifozëve zikaltër, pas incidenteve dhe skualifikimit në Europë, duke mundur Kaljarin 2-0 në "San Siro". Lacio rikthehet te fitorja dhe mund Bolonjën 2-1 në "Dal'Ara". Derbin toskan mes Livornos e Fiorentinës e ka fituar skuadra e Donadonit 2-0, falë dygolëshin të Kristiano Lukarelit. Në sfidën e shpëtimit, Kievo fiton kundër Parmës në "Bentegodi".

Në "Rigamonti", një gol i shënuar me 11-metërsh nga Di Biaxhio në minutën e 94-t fundos Atalantën dhe i jep Breshias shpresë për të shpëtuar. Atëherë kur nuk e pret, Juventusi ndëshkon me një goditje të veçantë "Djallin" dhe e largon nga kreu i renditjes, por për këtë duhet të falënderojë Sienën. Dukej si "e vdekur", vetë Kapelo e kishte cilësuar organikën plot me probleme formacionin bardhezi në prag të ndeshjes. Dhe në të vërtetë fillimi ishte i vështirë, sepse Leçe e zhbllokon rezultatin menjëherë me një gol të Vuçiniçit. Por bardhezinjtë kanë barazuar me ganezin Apiah dhe kanë shpërthyer më pas me Nedvedin dhe para së gjithash me Ibrahimoviçin, që ka shënuar tre gola në "Dele Alpi" ndaj puljezëve.

"Nëntë pikë për tri ndeshje", - kishte deklaruar të shtunën Ançeloti. Teori për t'u riparë. Por në "Franki", Siena përmbush një kryevepër "arti", duke mundur Milanin 2-1. Humbje që bie ndesh me tri pikët e marra të Juves ndaj Leçes, që tani është më e lehtësuar pas skualifikimit nga Championsi. Toskana duket një fushë e mallkuar për skuadrën e Ançelotit, duke parë edhe dështimin me Livornon e Donadonit. Edhe dje, sikundër edhe atëherë, mungonte Pirlo, "gjeometri" i domosdoshëm i Milanit në mesfushë.

Një repart, ku dje mungonte gjithçka, fantazia, idetë dhe talenti. Goli i Krespos i kënaqi para kohe kuqezinjtë dhe në momentin që duhej t'i jepnin dorën e fundit fitores, Siena zgjohet duke përmbysur rezultatin me gola të Kiezës dhe Kocës. Në pjesën e parë, gjyqtari Kolina i anulon një gol të rregullt Shevçenkos, pas një pasimi të Krespos për pozicion jashtë loje. Një fitore e ardhur në momentin e duhur ajo e djeshmja për Interin ndaj Kaljarit.

Ze Maria dhe Martins rikthejnë qetësinë e duhur pas "stuhisë" europiane që zuri Interin në javën e shkuar. Nuk ishte një ndeshje spektakolare, por e rëndësishme për pikët në renditje, që duhen për të siguruar vendin e tretë. Lacio fiton në Bolonjë dhe fluturon në renditje, duke parakaluar edhe Romën. Odo, me 11-metërsh, dhe Roki vendosin suksesin ndaj emilianëve, që në fillim kishin shënuar me anë të Xhiuntit.