Gazeta Elektronike: "Futbolli Ndërkombtar"

[Davius]

Shevçenko: Tifozë, na mbështetni!
Sulmuesi ukrainas ka deklaruar për të përditshmen italiane "Corriere della Sera": "Do të doja t'u thosha të pavendosurve që ta blinin biletën për në Stamboll. Të dashur tifozë, ne luajmë për ju dhe kemi nevojë për mbështetjen tuaj në këtë takim. Edhe sepse Milani nuk tradhëton kurrë, ai jep gjithnjë shpirtin." Diçka edhe për presidentin Berluskoni: "Me siguri mund t'i dhurojmë një gëzim të madh. E dimë se presidenti mezi e pret. Për të, Milani është një pjesë e zemrës."

Stam: S'kemi frikë, por do të jetë e vështirë
Ndërkohë, në faqet e "La Gazzetta dello Sport" përcilleshin fjalët e Jap Stamit: "Është e bukur të luash në një stadium të stërmbushur, por ajo që dëgjon kur je në fushë dhe luan në finale, është vetëm zhurma. Përqendrohesh dhe s'sheh më asgjë, ajo që mund të urosh nëse mundesh, është vetëm që të shpërthejë hareja. Ne s'kërkojmë vetëm lojën e bukur, sepse emocionet e vërteta i jep fitorja. Do të jetë një finale tepër e fortë. Ata mbrohen dhe sulmojnë të gjithë. Do ta kemi të vështirë të gjejmë hapësira për të shënuar, por kjo s'do të thotë se e kemi të pamundur të fitojmë."

Pipo Inzagi: Jemi gati!
Pipo Inzagi ndoshta do të niset nga stoli, pasi Krespo është më në formë, por ai s'do të dëgjojë të flitet për një Milan të "shterruar". "Jemi 100% të gatshëm, - garantoi ai. - S'jemi aspak të lodhur, jemi të përqendruar në pikën e duhur. Jemi përgatitur në mënyrën më të mirë për t'u përballur me Liverpulin. Është një ndeshje tepër e rëndësishme për ne, do të japim maksimumin. Mendoj se ndeshja mund të vendoset nga një episod.
S.KONDI

Zyrtare, Mejuto Gonzales, gjyqtari
Gjyqtari spanjoll, Mejuto Gonzales, do të drejtojë finalen e Ligës së Kampioneve ndërmjet Milanit dhe Liverpulit, nesër në Stamboll. Kështu ka vendosur UEFA të hënën. Gjyqtari 40-vjeçar ka gjykuar edhe në Euro 2004 dhe bëhet spanjolli i tretë që do të drejtojë një finale Championsi. Mejuto Gonzales e ka filluar karrierën e tij si gjyqtar i FIFA-s, në vitin 1999, dhe ka gjykuar 57 ndeshje ndërkombëtare. Ajo e nesërmja do të jetë për të e 19-ta në Ligën e Kampioneve.

Venger: Liverpuli është favorit
Trajneri i Arsenalit, Arsen Venger, ka dhënë mendimin e tij në lidhje me ndeshjen finale të Ligës së Kampioneve, e cila do të luhet nesër në Stamboll ndërmjet Milanit dhe Liverpulit: "Personalisht shoh si favorit Liverpulin, sepse mendoj se Milani ka ende pasojat psikologjike të humbjes së titullit në ndeshjen ndaj Juves. Kuqezinjtë nuk kanë arritur të fitojnë dy ndeshjet e fundit të rëndësishme, ndaj Juves dhe PSV-së. Liverpuli ka shansin më të mirë për të përfituar dhe besoj se skuadra e Benitezit e ka kuptuar këtë."

Haman-Liverpul, fundi i përkryer?
Duket se finalja e Ligës së Kampioneve do të jetë ndeshja e fundit për mesfushorin gjerman, Ditmar Haman, me fanellën e Liverpulit. Në një deklaratë përpara finale,s ish-mesfushori i Bajernit u shpreh: "Nuk e kam vendosur ende të ardhmen time, por ka shumë mundësi që ajo e Stambollit të jetë ndeshja ime e fundit me Liverpulin. Kam mundësinë të futem në historinë e këtij klubi, ashtu si të gjithë shokët e mi, në rast se fitojmë këtë finale. Do të ishte një mbyllje e përkryer. Lamtumira me trofeun e Championsit, ëndrra e çdo futbollisti."

[Davius]

Barcelona, 30 milionë euro për Ferdinandin

Presidenti i ekipit të Barcelonës, Joan Laporta, kërkon të sjellë në "Kamp Nou" mbrojtësin e ekipit të Mançesterit, Rio Ferdinandin. Interesimi i katalanasve për Ferdinandin ka ardhur pas refuzimit të klubit anglez, për t'ia rritur pagën lojtarit, i cili nuk ka firmosur akoma rinovimin e kontratës së tij. Ferdinandi ka edhe dy vjet të mbetura në kontratë dhe agjenti i tij, Pini Zahavi, ka kërkuar një rritje të pagës deri në 125.000 stërlina në javë. Kjo gjë do ta bënte Ferdinandin mbrojtësin më të paguar në botë. Por drejtuesit e Junajtidit kanë deklaruar se nuk do të ketë asnjë rritje të pagës së lojtarëve aktualë. Ferdinandi erdhi te Mançesteri në vitin 2002, nga ekipi i Lidsit, dhe u përball me një pezullim 9-mujor, pasi refuzoi t'i nënshtrohej testit antidoping. Gjithashtu, gjatë muajit të kaluar, Rio Ferdinand u pa në një lokal të Londrës me drejtorin e përgjithshëm të Çelsit, Piter Kenionin, dhe tashmë nuk është më një nga lojtarët e preferuar të tifozerisë së "Djajve të kuq". Trajneri Aleks Ferguson i kishte kërkuar mbrojtësit të kombëtares angleze ta firmoste sa më shpejt kontratën e tij të re me klubin, por kjo nuk ka ndodhur ende. Tani, pas fitimit të titullit në Primera Divizion, Barça ka shprehur interes ndaj mbrojtësit 27-vjeçar, duke përfituar edhe nga mosmarrëveshjet në "Old Traford". Presidenti Laporta deklaroi:

"Ferdinandi është një nga mbrojtësit më të mirë në botë. Ardhja e tij në "Kam Nou" do të zgjidhte shumë probleme në mbrojtjen tonë. Nuk kemi folur akoma me Mançesterin ose me lojtarin, por nëse ai ka ndër mend të largohet, do të ishim të gatshëm ta sillnim këtu. Bëmë një sezon të shkëlqyer, por në Champions vuajtëm presionin e kundërshtarëve në mbrojtje. Këtë vit nuk kemi ndër mend të bëjmë të njëjtat gabime si në ndeshjen ndaj Çelsit," - përfundoi Laporta. Barcelona është e gatshme të ofrojë deri në 30 milionë euro për mbrojtësin anglez. Kjo shifër është e njëjtë me atë që shpenzoi Mançesteri për të marrë Ferdinadin nga Lidsi, tre vjet më parë.

[Davius]

Lajme shkurt nga Primera Division

Ouen këmbëngul: Nuk iki nga Reali
Sulmuesi i Realit, Majkëll Ouen, duket i vendosur në zgjedhjen e tij për të luajtur edhe sezonin e ardhshëm me Realin e Madridit. Pavarësisht nga zërat e shumta të merkatos që janë ngritur në lidhje me të, sulmuesi britanik deklaroi: "Nuk do të largohem nga Reali. Kam një kontratë për të respektuar me këtë klub dhe kam ndër mend ta respektoj. Në Madrid kam gjetur gjithçka që kërkoja dhe jam optimist për sezonin e ardhshëm. Nuk shoh asnjë arsye për t'u larguar."

Kuper: E meritojmë Primerën
Trajneri i Majorkës, Hektor Kuper, ia ka dalë mbanë. Për herë të parë, një javë nga fundi i kampionatit, skuadra ishullore është një vend lart skuadrave që sezonin e ardhshëm do të bien nga kategoria. Pas fitores 0-3 në La Korunja dhe barazimit të Levantes 0-0 me Valencian, Majorka ka një pikë avantazh ndaj Levantes, kur duhen edhe 90 minuta nga fundi i Primera Divizionit. "Në një muaj kemi rikuperuar 10 pikë ndaj Levantes. Kemi bërë një punë të mrekullueshme dhe e meritojmë qëndrimin midis më të mirëve."
E.LUBANI

Baraha-Ksavi, pushime të parakohshme
Ruben Baraha, mesfushori i Valencias, nuk do të ketë mundësinë të luajë në ndeshjen e fundit të kampionatit ndaj Osasunës, për shkak të një dëmtimi të pësuar të dielën në Levante. Të njëjtin fat do të ketë edhe mesfushori i Barcelonës, Ksavi. Katalanasi është dëmtuar ndaj Vilarealit. Spanja humbet kështu dy titullarët e mesfushës në prag të ndeshjeve për eliminatoret e kampionatit botëror, ndaj Lituanisë dhe Bosnjës.

Rud Gulit largohet nga Fejënordi
Rud Gulit është larguar nga posti i tij si trajner i Fejënordit. Divorcin e ish-futbollistit të famshëm me skuadrën holandeze e ka bërë të ditur një radio e Roterdamit, në orët e para të ditës së hënë. Nën drejtimin e Gulitit, Fejënordi e mbylli kampionatin jashtë zonës Champions, në vend të katërt, me 25 pikë disavantazh ndaj PSV Eindhovenit. Guliti më parë ka qenë trajner i Çelsit dhe Njukasëllit.

[Davius]

Magat: Santa Kruz, në planet e mia


Trajneri i ekipit të Bajernit të Mynihut, Feliks Magat, deklaroi se sulmuesi Roke Santa Kruz do të qëndrojë tek ekipi kampion i Bundesligës, edhe në sezonin e ardhshëm. Pas një sezoni të mbushur me dëmtime, u fol për një largim të mundshëm të paraguajanit, por Magati u shpreh se Kruzi ishte në planet e klubit dhe nuk do të largohej. "Kam nevojë për praninë e tij në ekip, për sezonin e ardhshëm. Ai ka një potencial të madh dhe konkurron për një vend titullari, bashkë me Makain dhe Pizarron," - përfundoi trajneri bavarez.

[Davius]

Juventus: Në merkato, blerje me karar


Një ditë pas festës për titullin e 28-të, Fabio Kapelo mendon për të ardhmen e tij ("Nuk mendoj për daljen në pension, më pëlqen të vihem në diskutim") dhe të Juves: "Është e drejtë t'i kemi parasysh llogaritë, e kemi bilancin thuajse të barabartë me vjet dhe do të përpiqemi të marrim lojtarë që të jenë në gjendje ta përmirësojnë skuadrën. Ne mendojmë që tani për objektivat e ardhshme. Del Piero? Zëvendësimet janë zgjedhje që një trajner duhet të ketë guximin të bëjë." Krahasimi me Xhiovani Trapatonin e nderon Fabio Kapelon: "Do të bëj si Trapatoni, do të rivihem në diskutim. Shija e jetës është pikërisht të dish të rivihesh në diskutim, sikurse bën Xhiovani. Atë dua ta përgëzoj përzemërsisht, sepse të shkosh të rrezikosh imazhin tënd jashtë vendit, s'është e lehtë. Është një mision i vështirë, të fitosh jashtë shtetit, është më e vështirë se në Itali." Trajneri bardhezi ka cilësuar ndeshjen e "Olimpikos" të fituar ndaj Lacios, me një gol të Nedvedit në fund, si ndeshjen kyç për titull dhe ka pranuar superioritetin e organikës së Milanit, të paktën në letër. "Në letër Milani kishte një organikë më të gjerë, - ka shpjeguar Kapelo, - dhe me emra të mëdhenj. Ne u përgjigjëm me emra më pak të rëndësishëm, por me shumë vullnet. Në fakt, e rëndësishme është të mos dorëzohesh kurrë dhe të mos demoralizohesh. Ne besuam dhe pika kyçe ishte fitorja ndaj Lacios, thelbësore për renditjen dhe për moralin. Përkushtimi dhe grupi janë thelbësorë për të arritur rezultate."

Asnjë dyshim për atë që ka qenë blerja më e arrirë në merkto, përsa i takon raportit çmim/rendiment. "Blerja më e bukur ka qenë ajo e Ibrahimoviçit, blerja dhe shlyerja e tij brenda 5 vjetëve është diçka e pabesueshme. Kanavaro, Emerson dhe Ibra kanë qenë ndërthurjet që i kanë mundësuar kësaj skuadre të bëjë hovin cilësor përpara, sepse janë lojtarë të medhenj. Më pas, të mos harrojmë "gardën e vjetër": Pesoto është simboli i bashkimit mes së resë dhe së vjetrës, një lojtar serioz dhe gjithnjë i pranishëm, ai ka qenë i zoti dhe i kujdesshëm edhe në grup, çka është diçka plus."
I pashmangshëm diskutimi për Del Pieron, të cilin Kapelo e ka përgëzuar për shembullin e sportivitetit që ka treguar gjithnjë në fushë. "Sikurse i ndodh shumëkujt, Del Piero pati momente të mira dhe të dobëta forme, ? tha tekniku. ?

Trajneri duhet të ketë guximin të bëjë disa zgjedhje që mund të bien ndesh me dëshirën e një shkalle të gjerë, por që sjellin rezultate. Zëvendësimet i kam kryer kur kam pasur në stol lojtarë që mund të jepnin më shumë se ai. Të dielën do të jetë në fushë. Del Piero dha një shembull të madh, duke mos simuluar një shuplakë si një "knock-down". Të njëjtën gjë bëri edhe Turami kur u godit me një grusht. Ne nuk simulojmë, por qëndrojmë në këmbë për të bërë të mundur që ndeshjet të përfundojnë në mënyrë të rregullt." Heshtja për shtyp rezultoi efikase dhe e ndihmoi skuadrën në fazën e fundit të sezonit. "Ishte një sinjal se ishim të zemëruar, - ka thënë trajneri i Juves. - Për të mos shkaktuar polemika dhe për t'u përqendruar, u larguam nga vëmendja dhe mundëm të punonim qetësisht. Ndoshta sponsorëve mund t'u ketë mbetur pakëz qejfi, por të dielën ua plotësuam sërish dëshirën."

[Davius]

Roberto Betega tani mendon për të ardhmen: "Kemi një detyrim ndaj avokatit për atë batutë të tijën për yllin e tretë." Juventusi celebron titullin nr. 28, por ëndërron Europën dhe shifra të tjera rekordesh. Zv.presidenti bardhezi, gjatë një interviste, shpjegoi: "Suksesin e sivjetëm ia kushtojmë doktor Umbertos, por ka edhe të tjerë. Ne që tani që kemi 2 yje, jemi ndryshe nga të tjerët dhe po të qëndisnim mbi gjoks edhe një tjetër yll, do të bëheshim me të vërtetë shumë superiorë." Sivjet Juventusi ka gabuar vetëm një herë, duke paguar me eliminimin nga Liga e Kampioneve: "Do të përpiqemi ta ndreqim sa më parë të jetë e mundur këtë rrëshkitje këmbe në Europë, - shpjegoi Betega. - Por pa e lënë kurrë pas dore kampionatin."

Lamtumira e Protit: Krenar për Livornon
Igor Proti i jep lamtumirën futbollit. Këtë e bëri në pasarelën prestigjioze të Juves kampione, me një gol që e ndezi publikun. "Nuk e prisja një përshëndetje kaq të ngrohtë, ? pohoi sulmuesi 38-vjeçar. ? Do të krenohem gjithë jetën për këtë. "Topi i artë" i tifozëve për mua dhe Lukarelin? Ishte një shaka tipike "alla'livorneze". Edhe pse s'është "Topi i artë" i vërtetë për ne, vlen shumë më tepër. Ne dy, lojtarë-tifozë? Vetëm ai që do ta ketë fatin ta veshë këtë fanellë do ta kuptojë. Skuadra ka një traditë të madhe dhe, mbi të gjitha, njerëzit dhe pasioni i tyre janë motori i vërtetë i klubit."

Inter, Mançini do Xhilardinon
Tani mosmarrëveshjet mes Mançinit dhe Adrianos e kanë një shpjegim. Në mes të tyre do të kishte një histori xhelozie. Me sa duket, trajnerit të Interit i ka hyrë në zemër Alberto Xhilardino. Golashënuesi i Parmës i ka magjepsur sërish të gjithë, me një tjetër sezon fantastik. Trajneri nga Jesi mendon se parmensi mund t'u përshtatet më mirë skemave të tij dhe për më tepër që Morati ka në dorë një mundësi konkrete për t'i bërë një shaka pa kripë Milanit për Xhilën.

Emerson: Nuk më intereson Real Madridi
Të gjithë thoshin se ishte i Real Madridit. Braziliani i Juves u duk se do të shkonte ta mbyllte karrierën me yjet e "merengesëve" të qëndisura mbi fanellë, por më pas Moxhi përgënjeshtroi gjithçka dhe tani ka qenë edhe vetë mesfushori që e ka mohuar kategorikisht këtë mundësi. "Për Realin s'më intereson asgjë, jam i Juves dhe do të qëndroj këtu. Unë kam një kontratë me klubin bardhezi, të cilën kam ndër mend ta respektoj."

Moxhi: Te Juvja s'ka vend për Kasanon
Moxhi thotë se s'do të vijë, çka do të thotë se e ka blerë. Por, duke e lënë veçmas ironinë, drejtori i përgjithshëm bardhezi, i ftuar në një emision televiziv, i ka mbyllur dyert blerjes së Antonio Kasanos. "Kemi sulmin dhe mbrojtjen më të mirë, - tha ai, - do ta kemi të vështirë të integrojmë lojtarë të rinj. Kasano është një prej sulmuesve më të mirë në qarkullim, por s'do të vijë te Juvja për dy arsye. E para, sepse jam i bindur se s'do të lëvizë nga Roma. E dyta, sepse nuk e di se si mund ta përfshinim në një sulm plot kampionë."

Kanavaro: Ëndërroj ta mbyll te Napoli
Ëndrra e Fabio Kanavaros është që ta mbyllë karrierën në Napolin e tij të dashur. Mbrojtësi i Juventusit, në rastin e prezantimit të "Çiro Ferrara Goodbye Foootball", i ka lënë dyert e hapura mbi rikthimin e tij: "Objektivi dhe ëndrra e të gjithë napoletanëve, është ajo që të vesh fanellën e Napolit, - tha mbrojtësi i Juventusit, - por për fat të keq, unë nuk kam qenë në Napoli në momentin kur gjërat po fillonin të shkonin keq. Shpresoj që ky klub ta rimarrë veten shpejt. Të shohim, ndoshta pas disa vjetësh mund të kthehem

[Davius]

Dela Vale: Ky qytet s'e meriton rënien


Hidhërimi në fund të ndeshjes u shpreh dhe nga presidenti i toskanëve, Andrea Dela Vale, i cili la të kuptohet se klubi po paguan disa përplasje politike: "Të themi se nëse do të ktheheshim sërish pas, nuk do të bënim gjëra të tilla. Kemi mësuar shumë gjëra nga ky sezon. Shpresoj që në fund të sigurojmë qëndrimin. Dhe më pas, në sezonin tjetër, ne do ta ndryshonim shumë mënyrën e sjelljes. Sot nuk jam i mërzitur, por i hidhëruar për atë që i ndodhi Fiorentinës që nga muaji janar. Momente që nuk u panë nga arbitrat, duke filluar në ndeshjen e parë më Lacion dhe duke përfunduar në ndeshjen tjetër, po me Lacion. Janë disa lojtarë të rinj në dhomat e zhveshjes që po qajnë. Nuk është e drejtë që kjo skuadër dhe ky qytet të shkojnë kështu në Serinë B."

Lacio, Sivilja: Meritoj konfirmimin
"Jam i gëzuar mbi të gjitha se shpëtimi është akoma më afër". Kështu, Sebastiano Sivilja komentoi barazimin 1-1 të arritur në shtëpi ndaj Fiorentinës, falë golit të tij me kokë. "Sigurisht, - vazhdoi mbrojtësi, - shënimi i golit ishte një gëzim më shumë. Personalisht mendoj se kam treguar që e kam veshur me dinjitet bluzën e Lacios dhe shpresoj që të konfirmohem dhe vitin tjetër."

Mesina: Janagisava, edhe 3 vjet kontratë
Në afërsi të firmosjes së kontratës midis Universitetit të Mesinës dhe Momojamës, presidenti i verdhekuqve, Pietro Franxa, deklaroi se Janagisava do ta zgjasë kontratën e tij edhe për tri vite të tjera. Firma e lojtarit do të vijë së shpejti dhe për më tepër është deklaruar ardhja e presidentit të Kashima Antlers në Mesinë

[Davius]

Ronaldinjo: Paratë nuk ndikojnë në ecurinë time


Barcelona po përpiqet të blindojë Ronaldinjon, duke i ofruar një kontratë dhjetëvjeçare, nga e cila do të përfitojë 130 milionë euro në çdo kampionat. Kjo, pasi dëshira e Rajkardit dhe ndihmësit të tij, Tksiki Begiristain, është që ta mbajnë sa më gjatë brazilianin në radhët e skuadër katalanase. Ndërkohë, vetë Ronaldinjo ka luajtur ndaj Vilarealit ndeshjen e fundit në këtë kampionat, sepse për shkak të kartonit të verdhë të marrë, nuk mund të luajë në ndeshjen e fundit të kampionatit spanjoll, në San Sebastian, ndaj Sociedadit. Pas stërvitjes së djeshme, braziliani u shpreh:

"Jam shumë i lumtur te Barcelona. Ndihem mirë dhe është e qartë që do të më pëlqente të qëndroja edhe më tej në "Kamp Nou". Më mbeten edhe tre vjet kontratë dhe më pas, se ç'do të ndodhë, do ta tregojë koha. Gjithsesi, jam i hapur për të filluar bisedimet për rinovimin e kontratës, edhe pse paraja nuk ndikon në rendimentin tim. Nuk ka rëndësi nëse paguhem 1 apo 10 milionë euro, kur zbres në fushën e lojës. Unë mendoj vetëm për futbollin e luajtur, ndërsa me të tjerat merret im vëlla, Roberto." Më pas, kur i është dashur të komentojë ofertën e Barcelonës, e cila ishte 130 milionë euro për dhjetë vitet e ardhshme, fantazisti brazilian u shpreh: "Rinovimin e kontratës do ta pranonte çdo futbollist që po luan mirë dhe ndihet mirë në skuadrën që është. Kështu besoj se do të ndodhë edhe me mua. Jam ende i ri dhe titulli i sivjetshëm me ka shtuar urinë për suksese të tjera. Kam shumë objektiva deri në fund të karrierës sime dhe mendoj se Barcelona është skuadra ideale, tek e cila mund të bazohem për t'i realizuar ato. 130 milionë euro?

E thashë edhe më parë. Për mua nuk kanë rëndësi paratë, por vetëm numri i golave dhe asisteve gjatë një ndeshjeje. Me këtë mentalitet kam filluar të luaj futboll dhe kështu do të vazhdoj." Pra duket se aspektin ekonomik të karrierës së tij, Ronaldinjo e ka lënë në duart e të vëllait Roberto dhe i është përkushtuar vetëm futbollit të luajtur. Për këtë, braziliani nuk heziton të bëjë të ditur objektivat që i ka vënë vetes, sezonin e ardhshëm: "Dua të bëj një vit të mirë me Barcelonën, ku synoj Ligën e Kampioneve. Por ndryshe nga ky sezon, vitin e ardhshëm më duhet të mendoj edhe për Brazilin, pasi kam edhe një kampionat botëror, të cilin duhet ta fitoj medoemos. Pra, vitit 2006 do të jetë viti i së vërtetës. Kam mundësinë të fitoj gjithçka, por duhet të tregohem i kujdesshëm dhe të luaj përtej mundësive të mia për t'ia dalë mbanë."

[Davius]

Van Nistëlroi: Unë, fajtori disfatës me Arsenalin

Sulmuesi holandez i ekipit të Mançesterit, Rud Van Nistëlroi, pranoi se ishte shkaktari kryesor i humbjes së "Djajve të kuq" në finalen e Kupës së Anglisë, ndaj Arsenalit. Holandezi pohoi se dëmtimi në kavilje e kishte kushtëzuar shumë performancën e tij gjatë këtij sezoni. Në dy muajt e fundit, Van Nistëlroi ka shënuar vetëm katër gola për ekipin e Mançesterit. "Përpara se të dëmtohesha, arrija të shënoja normalisht. Por që kur u riktheva, kam kuptuar që shënimi i golave nuk është më aq i lehtë. Të shënosh shpesh, është thelbësore për një sulmues, por të shënosh rregullisht në çdo ndeshje, ashtu siç bëra unë në sezonin e kaluar, është diçka shumë e vështirë," - deklaroi sulmuesi holandez.

Van Nistëlroi shënoi 30 gola për ekipin e Mançesterit në sezonin e kaluar, por gjatë këtij sezoni ai ka arritur të shënojë vetëm 16. Rastet e shumta të humbura nga holandezi, në ndeshjen ndaj Arsenalit, i kushtuan kupën ekipit të Mançesterit, i cili humbi pas gjuajtjeve të 11-metërshave. "Nuk ka qenë një sezon i mirë për mua dhe Mançesterin. Kemi arritur të shënojmë shumë pak gola dhe sigurisht që unë jam përgjegjës për këtë. Humbja në finalen e kupës e ka lënë Mançesterin pa asnjë trofe gjatë këtij sezoni. Holandezi pranoi se ekipi i tij duhet të përmirësohej shumë, nëse kërkon të rivalizojë ekipin kampion të Çelsit. "Çelsi luajti shumë më mirë se ne, gjatë këtij sezoni. Ata zhvilluan një kampionat pothuajse të përkryer dhe e merituan plotësisht fitimin e titullit", - përfundoi Van Nistëlroi.

[Davius]

Roma-Toti, bashkë deri më 2011-n


E ardhmja e Totit mendohet të vazhdojë sërish në Romë. Në fakt, pas disa muajsh plot zëra dhe takimesh të shtyra, ditën e hënë ai do ta kishte zgjatur deri më 2011-n kontratën që e lidh me klubin verdhekuq, për një shifër që do të sillej rreth 5 milionë e 800 mijë eurove "kesh" në sezon. Lajmërimi i përzgjatjes pritet të bëhet i ditur të dielën, në javën e fundit të kampionatit, me rastin e ndeshjes Roma?Kievo.

Kështu që kutiza e parë për ndërtimin e mozaikut të Romës së re duket se është vendosur në vendin e saj. Një ditë e rëndësishme për ngjyrat verdhekuqe ajo e së hënës, me administratoren e deleguar Rozela Sensi, që ka çelur një shpresë të madhe për të ardhmen dhe tani pret që të festojë e të gëzojë së bashku me të gjithë tifozët e Romës, të dielën, për këtë arritje të madhe. Por për çfarë të gëzohet? Ndoshta për rinovimin me Totin. Bëhet fjalë për një zë më shumë sesa për një lajm, i cili ka marrë dhenë ditën e hënë në mjediset e klubit kryeqytetas, thuajse në përmasat e zyrtarizimit. Por, duke qenë se bëhet ende fjalë vetëm për zëra, edhe pse janë shumë këmbëngulës, është e detyrueshme të përdoret kushtorja, ashtu sikurse edhe për shifrat që duhet folur më tepër me hamendje.

Do të bëhej fjalë për një kontratë pesëvjeçare, e cila do të përfundonte kështu në qershor të 2011-s, për një shpërblim prej 5 milionë e 800 mijë eurosh "kesh" në sezon. Në atë kohë, Toti do të jetë 35 vjeç dhe kështu që mund të thuhet se me firmosjen e mundshme të kësaj kontrate, lojtari do të kishte vendosur ta mbyllte karrierën e tij te Roma.
Zërat kanë gjetur konfirmim, sikurse thamë, në fjalët që ka deklaruar ditën e hënë administratorja e deleguar e Romës, Rozela Sensi, e cila ka lajmëruar për disa të reja ditën e diel: "Ju pres të dielën në stadiumin "Olimpiko", sepse do të flasim për programe, - u kishte thënë ajo tifozëve. - Na lini të punojmë, pasi po e bëjmë mirë një gjë të tillë. Do të flasim kur të jetë momenti i duhur. Ju pres të dielën dhe shpresoj që të gëzojmë edhe me këtë rast". Kështu që duket se lajmërimi zyrtar do të bëhet pikërisht ditën e diel, me rastin e ndeshjes së brendshme ndaj Kievos. Rindërtimi i Romës mund të nisë pikërisht nga njeriu i saj simbol.


Verdhekuqtë mendojnë për strukturën drejtuese
Rinovimi i Françesko Totit është vetëm hapi i parë i Romës që, pasi kaloi makthin e rënies nga kategoria, tani mendon për të ardhmen. Rozela Sensi, përveç skuadrës, po mendon edhe për strukturën e klubit. Daniele Prade do të jetë drejtori i përgjithshëm i sektorit teknik, ndërsa Bruno Konti, pas përvojës në stol, do të bëhet drejtor teknik. Në rolin e trajnerit, ëndrra mbetet Ançeloti, por janë pranë edhe Prandeli e Spaleti.
Bëhej fjalë sa të kapërcehej momenti i vështirë, për të lënë pas makthin e një sezoni për t'u harruar, i cili për një çast paraqiti në horizont një perspektivë të rrezikshme, sikurse do të kishte qenë një rënie e mundshme tragjike në kategorinë e dytë. Por ja që mjaftoi një prekje e Kasanos të dielën e kaluar në Bergamo, për të ribashkuar figurat e një "puzzle"-i që duket se dikush ishte zbavitur ta përziente.