Gazeta Elektronike: "Futbolli Ndërkombtar"

[Davius]

Venger, "përjetësisht" me Arsenalin


Trajnerit Arsen Venger do t'i ofrohet një post në bordin drejtues të Arsenalit, kur të largohet nga roli i trajnerit. Vengeri, pas ndeshjes ndaj Mançesterit, deklaroi se pas 2006-s, mund të largohej nga drejtimi i ekipit londinez. Por zv.presidenti i Arsenalit, Deivid Dein, deklaroi: "Kam besim se Vengeri do të qëndrojë këtu për një kohë shumë të gjatë. Nëse është lodhur në postin e trajnerit, mund të vijë të zërë një vend në bordin drejtues të klubit. Pas fitimit të Kupës së Anglisë, Vengeri tha: "Një ditë, një trajner i ri do të ketë mundësinë ta drejtojë ekipin në stadiumin e ri. Kur të kalojmë te stadiumi i ri, besoj se do të kem arritur synimet e mia si trajner i Arsenalit."

Ekipi i Arsenalit do të largohet në 2006-n nga stadiumi "Hajburi Park", për të luajtur në stadiumin e ri "Eshbarton Grouv". Zv.presidenti Dein deklaroi se Vengeri është pjesë e së ardhmes së klubit. "Besoj se ai është trajneri më i mirë që ka pasur Arsenali. Zemra e tij, dëshirat dhe ambiciet janë të lidhura me këtë klub dhe e kemi thënë edhe më parë që nuk duam të largohet. Ai po formon një ekip të ri, që ka premisa shumë të mira. Rekordi i tij me Arsenalin është pothuajse i pakalueshëm. Në tetë sezone, ai ka fituar shtatë trofe, 4 kupa Anglie dhe 3 kampionate. Ai ka sjellë në ekip talentet e reja, si Fabregas, Kliçi, Van Persi dhe Filip Senderos. Kemi një ekip tjetër pas këtij të tanishmit, prandaj e ardhmja jonë është e sigurtë." Më pas, Deini u shpreh se në sezonin e ardhshëm, nuk do të largohej asnjë lojtar nga ekipi. "Nuk kemi ndër mend të shesim asnjë lojtar. Përkundrazi, do të kërkojmë të forcojmë skuadrën, duke sjellë në "Hajburi" 2 ose 3 lojtarë të rinj. Asnjë nuk do të largohet nga klubi," - deklaroi zv.presidenti Dein.

Mbrojtësi Eshli Kol u përfshi nga polemika të shumta, pas zërave për një kalim të mundshëm tek ekipi i Çelsit, por Deini deklaroi se Koli ka marrëdhënie të mira me klubin e Arsenalit dhe dëshiron të qëndrojë. "Eshli Kol është dhe do të mbetet një lojtar i Arsenalit. Nuk kemi asnjë problem me të dhe kemi marrëdhënie të shkëlqyeshme. Mund të kemi ndonjë problem me të tjerët, por... Besoj se edhe ai ndihet shumë mirë këtu. Ai është një lojtar, i cili është rritur këtu dhe fakti që ai është një nga mbrojtësit më të mirë në botë, e tregon këtë. Dhe ne nuk kemi ndër mend të humbasim një nga lojtarët tanë më të mirë," - përfundoi Deini. Të shtunën, Arsenali arriti të fitonte trofeun e vetëm të këtij sezoni, pasi mundi me penallti ekipin e Mançesterit.

[Davius]

Lajme shkurt nga Premier Liga

Pires: Nuk luajtëm mirë
Arsenali fitoi Kupën e Anglisë, pasi mundi ekipin e Mançesterit 5-4, pas gjuajtjeve të 11-metërshave. "Nuk luajtëm mirë, pasi kishim ndryshuar modulin 4-4-2 dhe luajtëm vetëm me një sulmues. Nuk kishim bërë shumë praktikë me këtë formacion, prandaj vuajtëm në fushën e lojës. Për mendimin tim, kjo ka qenë edhe dobësia jonë në Ligën e Kampioneve," - deklaroi Piresi.

Kol konfirmon qëndrimin tek Arsenali
Eshli Kol, mbrojtësi i ekipit të Arsenalit, deklaroi se dëshiron të qëndrojë edhe për disa vite tek ekipi i Arsenalit. Pasi e ndihmoi Arsenalin të fitonte Kupën e Anglisë, Koli hodhi poshtë zërat për një largim të mundshëm nga ekipi londinez. "Shumë gjëra janë shkruar për mua në javë e fundit, por asgjë nuk është e vërtetë. Mendoj se penalltia e gjuajtur, tregon përkushtimin tim ndaj këtij klubi," - deklaroi Koli.

Mojes: Mund të isha larguar nga Evertoni
Trajneri i Evertonit, David Mojes, u shpreh se mund të ishte larguar nga Evertoni në fund të këtij kampionati. Trajneri Mojes arriti ta çonte Evertonin në vend të katërt të renditjes, duke i dhënë një vend në Ligën e Kampioneve. "Nëse nuk do të kisha arritur vendin e katërt në klasifikim, do të isha larguar nga klubi drejt një ekipi tjetër të Premier Ligës," - deklaroi Mojesi.

Arsenali kërkon biellorusin Hleb
Arsen Venger kërkon të sjellë në ekip biellorusin Aleksandër Hleb, nga ekipi i Shtutgartit. Gjatë dy sezoneve të fundit, Hlebi ka treguar se është një mesfushor i talentuar, i cili mund edhe të shënojë shpesh. "Ka pasur oferta nga ekipe angleze, por Arsenali ka bërë një ofertë për Hlebin", - deklaroi trajneri Matias Samer.

Kahn, te Bajerni deri më 2008-n
Ekipi i Bajernit të Mynihut ka bërë të ditur se Oliver Kahni do të qëndrojë në Mynih deri në vitin 2008. Disa kohë më parë u fol për një largim të portierit 36-vjeçar, nga ekipi kampion i Gjermanisë, por drejtori ekzekutiv, Uli Hënes, deklaroi: "Oliveri do të jetë me ne deri në 2008-n, më pas të shohim."

M'gladbahu gjobit kapitenin Mur
Borusia e Mynshengladbahut ka gjobitur kapitenin e ekipt, Kreig Mur, për përdorim alkooli në orar të punës. Muri hyri i dehur në fushën e lojës, në ndeshjen ndaj ekipit të Bokumit, por më pas u zëvendësua nga trajneri Pander. "Ata duhet të jenë lojtarë profesionistë dhe unë nuk mund të lejoj që të ndodhin këto gjëra në fushën e lojës."

[Davius]

Bekham, skualifikimi "i llogaritur"

Kapiteni i kombëtares angleze, Devid Bekham, është skualifikuar për në ndeshjen e fundit të Primera Divizionit, pasi është ndëshkuar me karton të verdhë në barazimin e Realit 0-0 ndaj Atletikos, në derbin e Madridit. Mesfushori është kështu i lirë t'i bashkohet skuadrës së Eriksonit në turneun amerikan, që do të zhvillojë kjo e fundit. Pas faullit të shkaktuar ndaj Kolsës në minutën e 61-të, Bekhami ka mundësinë t'i kërkojë leje Realit për në turneun amerikan, të cilën më parë drejtuesit "merengesë" ia kishin refuzuar. Trajneri i Realit, Vanderlei Luksemburgo, në lidhje me këtë episod, tha: "Do të bisedoj me Bakhamin të hënën, sepse sezoni nuk është mbyllur ende.

Më pas do të vendosim nëse do të niset apo jo për në turin amerikan." Anglia do të luajë ndeshjen e parë të këtij turi në Çikago, më 28 maj." Bekhami ka lënë të dyshohet edhe në fillim të këtij sezoni. Ish-mesfushori i Mançesterit u duk qartë se mori me qëllim një karton të verdhë në ndeshjen ndaj Uellsit, sepse ishte i dëmtuar dhe llogariti që pas katër ditësh, të shlyente skualifikimin në ndeshjen ndaj Azerbaixhanit. Në këtë mënyrë, ai do të ishte i skualifikuar për një ndeshje, në të cilën gjithsesi nuk do të luante, për shkak të dëmtimit. Ndërkohë, shoku i tij i skuadrës, Majkëll Ouen, do të lihet i lirë nga Reali vetëm më 31 maj, në ndeshjen e fundit të Anglisë ndaj Kolumbisë

[Davius]

Luksemburgo: Derbi, si një miqësore


Trajneri i Realit, Vanderlei Luksemburgo, pas barazimit 0-0 që skuadra e tij arriti në derbin e Madridit, u shpreh: "Të dyja ekipet nuk kishin motivacion në prag të kësaj ndeshjeje. Për këtë, e gjithë ndeshja ishte e ngjashme me një takim miqësor. Kësisoj, na duhet punë gjatë gjithë javës, që skuadra të gjejë stimujt e duhur për ta mbyllur kampionatin me fitore, në Saragozë. Nuk jam i kënaqur me këtë barazim, sepse detyra ime si trajner i Realit është që të fitoj."


Amorozo, sulmuesi i Malagës, ka marrë disa oferta, të cilat mund ta shtyjnë të vazhdojë karrierën e tij në Angli. Braziliani 30-vjeçar nuk do të qëndrojë më në Primera Divizion dhe e ka gati skuadrën dhe kontratën milionere në Katar, por më parë ka shprehur dëshirën për të luajtur në Angli. Portsmuthi, Liverpuli dhe Sëlltiku janë skuadrat e interesuara për të.


Hierro ka zbritur për herë të fundit në fushën e "Santiago Bernabeut", për të marrë një çmim special për karrierën e tij nga klubi i Realit, përpara derbit që u luajt të shtunën në Madrid. Hierros iu dha çmimi nga kapteni Raul. Hierro ka vendosur të largohet nga futbolli, pas sezonit të mylli me Boltonin. Për Realin, ai luajti 14 vjet dhe shënoi 21 gola.

Policia polake ka arrestuar një gjyqtar futbolli, emri i të cilit nuk është bërë ende i ditur, me akuzën e trukimit të ndeshjeve në kampionatin polak të futbollit. Sipas zëdhënësit të policisë, ata kanë prova në dëm të gjyqtarit, pasi e kanë filmuar duke marrë 35 mijë euro për trukimin e një ndeshjeje, e cila nuk dihet ende se cila ka qenë

[Davius]

Magjia "e zezë" në sulmet europiane

Moska fiton për herë të parë një Kupë Europiane dhe e bën vetëm dy vjet pasi sponsori i saj është bërë Roman Abramoviç. Kjo tregon se është rritur rëndësia e parasë në futbollin modern dhe vlera e futbollistëve të rëndësishëm është rritur ndjeshëm. Portugalia, Franca, por edhe Holanda me Gjermaninë janë kampionatet e ashtuquajtura "të varfëra". Mungojnë kontratat miliardere, por jo rezultatet në fushën e lojës. Sezonet e Portos, Benfikës, Lionit, Monakos, Okserit, Ajaksit, PSV Eindhovenit, Bajernit, Verderit dhe Shalkes e tregon këtë.

Në Itali, Spanjë dhe Angli kostot janë më të mëdha dhe qytete të tilla si Milano, Londra, Madridi dhe Barcelona janë mësuar me këto. Pra, në futbollin modern ka më shumë para, por çfarë duhet blerë? Në aspektin teknik, ky sezon ka qenë disa herë ndryshe në krahasim me vite më parë. Dy vjet më parë, në Itali pesë sulmuesit më të mirë ishin Alesandro Del Piero, Kristian Vieri, Adrian Mutu, Filipo Inzagi dhe Klaudio Lopez. Sivjet, Ibrahimoviç, Shevçenko, Xhilardino dhe Adriano tregojnë se ku qëndron diferenca. Edhe në Gjermani, dy vjet më parë Kristiansen dhe Elber shënuan gola pa fund, ndërsa sivjet shënuesi më i mirë i Bundesligës u shpall sllovaku "i panjohur" Mintal.

Sulmuesi i Nurenbergut, dy vjet më parë, do të konsiderohej si fantazist për mënyrën e lojës që ka, por në futbollin e sotëm ai është sulmuesi i dytë ideal për çdo trajner. Në Spanjë, pas largimit të Makait, pati një rilindje të lehtë të Ronaldos. Në Angli, sulmuesi i momentit mbetet Henri, ndërsa Van Nistëlroi, Shirer dhe Haselbank kanë kaluar vitin më të "zi" në karrierën e tyre. Ndërkohë, për rëndësinë e golave të shënuar, për ecurinë e tij gjatë gjithë harkut të sezonit, sulmuesi më i mirë në Europë pa dyshim ka qenë Eto. Një forcë e natyrës me cilësi teknike dhe me një shkathtësi mbresëlënëse. Ronaldinjo është simboli i Barcelonës, por Eto bën pjesë në listën e tre sulmuesve më të mirë në botë. Ibrahimoviç dhe Drogba janë dy sulmuesit e tjerë zbulim të këtij sezoni. Njëri i bardhë, ndërsa tjetri me ngjyrë, ashtu siç duhet të jetë sulmi ideal.

Drobga-Gudjonsen te Çelsi, Barros-Size te Liverpulit dhe Eto-Xhuli te Barcelona janë shembujt më të mirë të sulmit të përbërë nga dy raca të ndryshme, një i gjatë dhe me ngjyrë, ndërsa tjetri i shkurtër dhe i bardhë, dhe shumë efikas. Ka edhe nga ato raste kur Martins-Adriano shkojnë aq mirë, sa të vjen të mendosh se fuqia "e zezë" është ajo ideale për sulmin e futbollit europian. Me gjithë respektin për futbollistët shtatlartë si Vieri, Lukareli, Toni apo Morientes, të cilët gjithsesi kanë pasur një sezon pozitiv. Nga ana tjetër jemi bindur se lojtar të tillë si Shevçenko, Raul, Del Piero, Kasano apo Makai nuk do të dalin asnjëherë nga moda. Trajnerët e skuadrave që janë përfaqësuar më mirë në Europë, sivjet u kanë dhënë shumë rëndësi edhe futbollistëve të krahut. Zakonisht është luajtur me dy anësorë të avancuar, që mund të krosojnë rrezikshëm, por edhe të godasin portën kundërshtare. Por këto tipe futbollistësh kanë vënë në vështirësi anësorët e mirëfilltë. Kjo tregon se ky rol në fushën e lojës nuk ekziston ende në librat e futbollit.

Gigs, Pires, Ljunberg dhe Figo po vuajnë pikërisht për këtë fakt. Duke treguar risinë e këtij pozicioni, spikat edhe mosha e re e futbollistëve, të cilët e aplikojnë më mirë. Janë të gjithë talente: Roben, Daf, Hoakin, Roten, Krisitano Ronaldo dhe shumë të tjerë... Po rezistojnë "senatorët" e vjetër si Kafu, Nedved apo Roberto Karlos. Këta të fundit po përdorin një pjesë të mirë të aftësive të tyre të pakufijshme, për të qenë sa më bashkëkohorë në këtë futboll modern. Spektakli që pritet ende në këtë sezon, finalja e Ligës së Kampioneve, është rritur ndjeshëm dhe kjo falë njerëzve si Abramoviç, Laporta, Perez, Morati apo Berluskoni. Por kjo është një çështje tjetër, pasi në futbollin modern ka spektakël edhe në zyrat e drejtuesve.

[Davius]

Del Piero: Një vit për t'u mbajtur mend


Pas disa javësh të heshtura, titulli i ka kthyer fjalët Juventusit. Fabio Kapelo e ka mbyllur merkaton bardhezi: "Mund të garantoj se lojtarët e rëndësishëm s'do të largohen nga Juventusi, pra as Trezegeja. Ai ka pasur disa probleme fizike, por ka arritur të shënojë gjithnjë. Ku ta gjejmë një tjetër si ai?". Më pas, për sezonin: "Momenti kyç ka qenë fitorja në Romë ndaj Lacios, më shumë sesa fitorja e San Siros". Ka qenë një Fabio Kapelo tejet i kënaqur ai që komentoi sezonin e bardhezinjve dhe madje duke e lëshuar veten edhe për disa çështje të merkatos. Por le t'i marrim gjërat me radhë: sezoni bardhezi, nga momentet më të rëndësishme te përdorimi i Del Pieros. "Kemi treguar se kemi shumë cilësi, vendosmëri dhe dëshirë për të rezistuar deri në fund. U rikuperuam dy herë dhe ishte kjo gjëja më e vështirë. Momenti thelbësor ishte fitorja në Romë ndaj Lacios, kur ishim në emergjencë të plotë. Ndeshja në Milano ishte e vështirë dhe përcaktuese, por pa fitoren ndaj Lacios s'do të na kishte shërbyer për asgjë." Ai u bën nderimet e duhura kundërshtarëve:

"Milani s'u dorëzua për asnjë çast, kreu një kampionat të madh. Del Piero? I kam trajtuar të gjithë në të njëjtën mënyrë, për respekt të grupit, dhe nganjëherë mund të kem vepruar drejtë, ashtu sikurse mund të ketë ndodhur që kam gabuar. Ka pasur momente kur duhet ta zëvendësoja dhe unë këtë kam bërë. Kur ka qenë në formë, e kam lënë në fushë. Një trajner mund të marrë disa vendime që mund të mos pëlqehen nga një shkallë e gjerë, por asnjëherë me qëllimin për të dëmtuar një lojtar." Për të përfunduar, një koment për merkaton: "Kemi qenë me fat që i kemi goditur në shenjë, pasi të gjitha blerjet kanë rezultuar të arrira. Nëse do të ketë largime? Mund të garantoj vetëm se futbollistët më të rëndësihëm do të qëndrojnë, pra edhe Trezegeja."

Ndërkohë, Aleks Del Piero kishte një fyturë si ajo e çdo juventini, për të cilin tanimë fitorja është kthyer në një zakon. "Zonja" ka fituar titullin nr.28, i gjashti personal për "Pinturikion": "Një kënaqësi e madhe, ? ka qenë ky komenti i kapitenit, i cili e ka prishur heshtjen për shtyp pas fitimit të trofeut. - Nuk e di nëse duket nga fytyra ime, por jam me të vërtetë i lumtur. Ka qenë një sezon tepër i vështirë, sidomos nga pikëpamja e dëmtimeve. Qëndrova katër muaj jashtë dhe dëshiroja me çdo kusht ta mbyllja kampionatin kaq mirë. Nuk e di nëse ka qenë ky sezoni im më i mirë, por me siguri ka qenë një vit për t'u mbajtur mend".
E pyesin për Kapelon: qetësia e Aleksit do të ishte për t'u futur në librat e psikoterapisë. "Ai i çoi përpara zgjedhjet e tij me koherencë dhe vendosmëri. S'është vetëm ai arkitekti i këtij triumfi, sigurisht, ashtu sikurse nuk jam vetëm unë. Ka qenë një punë e madhe grupi."

[Davius]

Luçiano Moxhi: Një sukses i merituar

Në përfundim të ndeshjes ndaj Livornos, Juventusi ka thyer heshtjen për shtyp dhe ka çliruar të gjithë gëzimin që kishte brenda. "E fituam me meritë kampionatin, ? tha Luçiano Moxhi. ? Kemi dëgjuar gjithçka gjatë vitit, se kishim një organikë të varfër, por askush s'e përmendte se kishim luajtur paraeliminatoret e Championsit dhe se kishim pësuar shumë dëmtime". Më pas, një "shigjetëz" ndaj Interit. "Kanavaro? Të gjithëve u ndodh të gabojnë..."
Moxhi përgëzon organikën e Juventusit dhe u jep nga një "pickim" gazetarëve. "Thanë se s'kishim rezervat e duhura, por askush s'e vuri në dukje se luajtëm shumë kohë pa Trezegenë, më pas pa Nedvedin, më vonë pa Del Pieron, dhe tani në fund pa Zebinanë, - deklaroi drejtori. - Luajtëm shkëlqyeshëm në fazën finale të kampionatit dhe s'ishte e lehtë, duke qenë se e nisëm sezonin që në gusht. Por s'ka rëndësi, aleati ynë ishte fusha, ku treguam se jemi më të mirët.

Ndihem i kënaqur që fituam një kampionat të luftuar pas një dueli të stërgjatë me Milanin." I pari që e theu heshtjen për shtyp në kampin juventin, ishte Antonio Xhiraudo, i cili, së bashku me Moxhin dhe Betegën, ka qenë një nga ndërtuesit e këtij triumfi. Xhiraudo i ka bërë një kushtim të veçantë Umberto Anjelit, i cili ndërroi jetë në fillim të sezonit, si për ironi të fatit në të njëjtën ditë kur Juventusi shpalli blerjen e Fabio Kapelos, trajneri i titullit të 28-të. "Kjo është një fitore tepër e rëndësishme, sepse ishte një vit shumë i veçantë. Një fitore që lindi nga një situatë shumë e vështirë, sepse na iku Umberto Anjeli që për ne kishte qenë një pikë referimi gjatë këtyre viteve dhe këtë skuadër e ndërtuam bashkë me të. Këtë titull ia kushtojmë atij, që është personi që e meriton më shumë."

[Davius]

Roma, Konti: Në 1 javë ndryshoi gjithçka


Një frymëmarrje e gjatë shumë e thellë dhe e merituar. Pas fitores në Bergamo, që i dha Romës qëndrimin matematik në Serinë A, edhe fytyra e Bruno Kontit kishte një tjetër pamje: "Më në fund do të më zërë gjumi, ? bëri shaka trajneri verdhekuq, ? që kur kam ardhur kam parë vetëm vuajtje. Këtë javë ndryshoi gjithçka, në Udine dhe Bergamo ia ndryshuam fytyrën sezonit. I falënderoj të gjithë djemtë, disa prej të cilëve zbritën në fushë me disa probleme".

Lacio, Papadopulo: S'kemi shpëtuar ende
Trajneri i Lacios, Xhiuzepe Papadopulo, nuk i zë besë renditjes, pasi skuadrës së tij i duhet edhe 1 pikë për ta siguruar matematikisht qëndrimin në kategori. "S'kemi shpëtuar ende, - tha trajneri bardhekaltër, - është më mirë të marrim edhe një tjetër pikë. Të dielën e ardhshme përballemi me Palermon, një kundërshtar jo i lehtë që e meriton pozicionin që ka në renditje." Lidhur me ndeshjen ndaj Fiorentinës, Papadopulo tha: "U treguam të zotë që e barazuam rezultatin. Treguam se jemi mirë fizikisht. S'është e lehtë të luash në orën 15.00 në këtë vapë".

Akuza nga Spanja: Adriano manipuloi gjakun
Nga Spanja lind një çështje lidhur me Adrianon. Sipas së përditshmes "El Pais", për t'i mundësuar brazilianit që të ishte i gatshëm në euroderbin e kthimit, do të ishin përdorur shiringa me gjak në limitet e normave antidoping. Çështja do të ishte denoncuar pranë Ëada-s (Agjencia Botërore Antidoping) nga Milani. Por si kuqezinjtë, ashtu edhe zikaltrit e kanë përgënjeshtruar kategorikisht këtë.

Ironia e Dela Vales: Zauri? Pritje e bukur
"Kanë që në janar që na masakrojnë. Sot kishte një arbitrim shqetësues, edhe sepse episodin e Zaurit e patë të gjithë, kreu një pritje goxha të bukur..." Andrea Dela Vale ka qenë mjaft nervoz në ballafaqimin me gazetarët, pas barazimit me Lacion në "Olimpiko". "Është një mëkat i madh, ? tha presidenti i Fiorentinës, ? sepse ajo ndeshje mund të kishte shkuar ndryshe, po të kihet parasysh se në atë aksion duhej të ishte dhënë një penallti dhe një karton i kuq. Besoj ende te shpëtimi, sepse kjo skuadër s'mund të bjerë në Serinë B".

Samp, Novelino: Humbëm një takim kyç
Sampi humbi një pikë shumë të rëndësishme për zonën Champions. Në "Marassi" fitoi Interi, edhe pse duhet thënë se gjenovezët nuk patën aspak fat. Tani Udinezja ndodhet një pikë më lart, por Novelino nuk dramatizon: "Interi veproi ashtu sikurse duhet të vepronte, ? deklaroi trajneri në përfundim të ndeshjes. - Ndihem i kënaqur për paraqitjen e skuadrës: mund të kishim marrë të paktën një barazim, por në shumë raste na mungoi fati. Humbëm një ndeshje të rëndësishme dhe më vjen keq, por djemtë dhanë gjihçka në fushë."

Mançini braktis konferencën për shtyp
Roberto Mançini, në fund të ndeshjes së fituar kundër Sampdorias në "Marasi", ka vendosur ta braktisë konferencën tradicionale për shtyp pas ndeshjes për trajnerët. Arsyeja duket se është deklarata e lëshuar nga Françeska Mantovani, vajza e presidentit të paharrueshëm gjenovez të viteve 90', Paolo Mantovani në një gazetë. Gjatë intervistës, vajza e ish-presidentit blukaltër, mes të tjerave ka thënë: "Isha "mançiniane", por Mançini si njeri, doli një zhgënjim i vërtetë".

[Davius]

Vieira: Të shmangim largimet e lojtarëve


Pas fitimit të Kupës së Anglisë, kapiteni i ekipit të Arsenalit, Patrik Vieira, u kërkoi shokëve të tij të skuadrës, Eshli Kolit dhe Hoze Antonio Rejesit, të qëndrojnë në ekip edhe në sezonin e ardhshëm. E ardhmja e Kolit është vënë në dyshim, pas zërave për një kalim të mundshëm të mbrojtësit 25-vjeçar, drejt ekipit të Çelsit, ndërsa Rejesi është shprehur disa herë se dëshiron të rikthehet në Spanjë. Pas ndeshjes ndaj Mançesterit, Vieira u shpreh se një largim i dy futbollistëve gjatë kësaj vere, mund të dobësonte organikën e ekipit të Arsenalit. "Për ne është e rëndësishme të mbajmë lojtarët në ekip, pasi vetëm kështu mund të ruajmë nivelin e ekipit tonë. Lojtarët që do të vijnë gjatë verës, do ta përforcojnë akoma më shumë ekipin. Sigurisht, është shumë e rëndësishme që Eshli Kol dhe Antonio Rejesi të qëndrojnë me ne, por nuk dua të flas për këtë, sepse vitn e kaluar u thanë të njëjtat gjëra për mua dhe asnjë nga lojtarët nuk shprehu asnjë mendim. Do të ishte mirë të mos largohej asnjë lojtar nga ekipi, pasi kjo është mënyra e vetme që ne të vazhdojmë të përmirësohemi," - deklaroi Vieira. Mesfushori francez deklaroi se Eshli Kol është shumë i përkushtuar ndaj klubit dhe Arsenali duhet të bëjë çmos për ta mbajtur anglezin në "Hajburi": "Mënyra se si ai ka luajtur gjatë kohëve të fundit, tregon se sa i lidhur është Eshli me këtë klub. Ai dëshiron të qëndrojë këtu dhe është plotësisht i përkushtuar ndaj klubit. Drejtuesit e Arsenalit duhet të bëjnë çmos për ta mbajtur në "Hajburi" dhe për mua kjo është normale. Mund të pyesni këdo dhe të gjithë e dinë se sa i lidhur është Eshli me këtë klub. Këtë e tregoi edhe gjatë finales së të shtunës." Gjithashtu, Vieira u shpreh i kënaqur, që Denis Berkamp do të qëndrojë tek Arsenali edhe për një vit: "Denisi do të firmosë një kontratë 1-vjeçare dhe ky është një lajm shumë i mirë për ne, sepse largimi i Edusë do të lërë një boshllëk të madh në skuadër. Eksperienca e Berkampit do t'u shërbejë edhe lojtarëve të rinj." Vieira u shpreh se gara për titull do të jetë e vështirë në sezonin e ardhshëm, pasi Çelsi dhe Mançesteri po përmirësohen shumë. "E merituam Kupën e Anglisë, pasi zhvilluam një sezon të mirë dhe do të kishte qenë mëkat po të mos fitonim asnjë trofe. Nëse vazhdojmë kështu, kam besim se do të kemi shumë mundësi për ta fituar titullin. Po të mos fitonim asgjë gjatë këtij sezoni, do të kishim më shumë presion për sezonin e ardhshëm. Në finale, Mançesteri tregoi se do të jetë një nga rivalët për titull në sezonin e ardhshëm. Në dhjetë vitet e fundit, Arsenali dhe Mançesteri kanë qenë rivalët kryesorë për titull, por tani ka katër skuadra, të cilat mund të fitojnë titullin. Fitimi i Kupës së Anglisë ka qenë një çlirim i madh për mua, pasi në finalen e UEFA-s, tri vite më parë, gabova penalltinë vendimtare, por kështu fiton dhe humb në jetë dhe kësaj here fati ishte nga ana jonë", - përfundoi Vieira.


Arsenal: Koli dhe Berkampi do të qëndrojnë
Duket se mbrojtësi Eshli Kol nuk ka ndër mend të largohet nga ekipi i Arsenalit, pas deklaratës së zv.presidentit të klubit londinez, Deivid Dein, i cili deklaroi se në verë nuk do të largohej asnjë lojtar nga ekipi. "Asnjë nuk do të largohet. Do të mundohemi të përforcojmë ekipin, duke sjellë disa lojtarë të rinj. Berkampi do të firmosë një kontratë 1-vjeçare, kurse Eshli Kol është dhe do të mbetet një lojtar i Arsenalit," - përfundoi Deini.

[Davius]

Masë disiplinore për trajnerin Sounes
Trajneri i ekipit të Njukasëllit, Grem Sounes, do të përballet me një masë disiplinore, pas komenteve të bëra pas humbjes 2-0 ndaj ekipit të Evertonit. Drejtuesit e Federatës Angleze të Futbollit deklaruan se Sounesi ka kohë deri më 6 qershor, për t'iu përgjigjur akuzave të bëra ndaj tij. Në rast se ai shpallet fajtor, Sounesi do të duhet të paguajë një gjobë prej 15.000 stërlinash.

Rednap: Do të rikthej S'themptonin në Premier
Ekipi i Sauthemptonit ka bërë të ditur se trajneri Herri Rednap do të qëndrojë edhe në sezonin e ardhshëm, pavarësisht rënies nga kategoria. "Më vjen keq që nuk mundëm të siguronim qëndrimin në Premier Ligë, por nuk do të largohem, pasi kam dëshirë ta përfundoj punën e nisur këtu," - deklaroi Rednapi. Sauthemptonit do t'i duhet të përballet me largimet e shumë lojtarëve titullarë, të cilët nuk kanë pranuar t'i rinovojnë kontratat e tyre.

Roi Kin: Mançesteri do të "rilindë"
Kapiteni i ekipit të Mançester Junajtidit, Roi Kin, deklaroi se ekipi i tij tashmë duhej të hidhte pas humbjen në finalen e kupës dhe duhet të mendojë për sezonin e ardhshëm. "Kemi mundësi të rikthehemi si më të mirët. Mënyra se si reagon ekipi, pas zhgënjimeve, tregon karakterin e fortë të Mançesterit. Dominuam ndeshjen, por Arsenali mori kupën," - deklaroi Kini.

Mançester Siti, në sulm për D'Alesandron
Ekipi i Mançester Sitit është hedhur në sulm për argjentinasin e Volfsburgut, Andres D'Alesandron, i cili është pranë largimit nga ekipi gjerman. Trajneri Stjuart Pirs ka deklaruar se do të donte ta kishte në ekip argjentinasin, por çdo gjë varej nga vetë lojtari. "Më pëlqen shumë si lojtar, por i takon atij të vendosë," - deklaroi Pirsi.

Nanta, edhe më afër rënies nga kategoria
Trajneri i ekipit francez të Nantës, Serzh Le Dizet, u shpreh pesimist për perspektivat e klubit për të qëndruar në Ligën 1. Nanta ndodhet në zonën e ftohtë të renditjes, pas humbjes 1-0 ndaj Soshosë. "Jemi më afër Ligës 2 sesa qëndrimit në Ligën 1, por nuk duhet të dorëzohemi. E dua këtë klub dhe kjo situatë më dëshpëron shumë", - deklaroi trajneri i Le Dizet.

Fanfan: Të jesh kapiten, është e vështirë
Kapiteni i PSG-së, Zhose Pier-Fanfan, deklaroi se roli i kapitenit ka qenë shumë i vështirë për të, gjatë këtij sezoni. PSG-ja ka zhvilluar një sezon të dobët dhe tashmë renditet në mesin e tabelës. "Nuk e mendoja asnjëherë që roli i kapitenit do të ishte kaq i vështirë. Nuk e kërkova këtë detyrë, por nuk refuzova ta kryeja atë. Lojtarët nuk kanë pasur harmoni midis tyre dhe kjo ma ka vështirësuar shumë punën."