Gazeta Elektronike: "Futbolli Ndërkombtar"

[Davius]

Butragenjo: Një natë e jashtëzakonshme për Realin

Pas fitores ndaj Vilarealit, një nga drejtuesit e "galaktivëve", Emilio Butragenjo, ish-sulmuesi i njohur spanjoll, deklaroi: "Ishte një natë e paharrueshme për Realin. Treguam se jemi një skuadër që funksionon dhe fituam me dhjetë futbollistë një takim mjaft të rëndësishëm ndaj të tretëve në kampionat. Publiku i "Bernabeut" u argëtua."

Ferrando: Kupa e Mbretit, shansi i fundit
Mbeten edhe pesë javë nga fundi i Primera Divizionit, por duket qartë se Atletiko e Madridit u ka dhënë lamtumirën shanseve për të siguruar një vend në kupat e Europës sezonin e ardhshëm, me anë të kampionatit. Këtë e pranon edhe trajneri i kësaj skuadre, Ferrando, i cili, pas humbjes së dytë brenda katër ditëve në Osasuna, tha: "Duhet të mundim Osasunën në Madrid për Kupën e Mbretit. Eshtë shansi ynë i fundit për të marrë pjesë në kupat e Europës sezonin e ardhshëm. Por në rast se nuk do të shndërrojmë në gol rastet e shumta që na dalin gjatë ndeshjes, do ta kemi shumë të vështirë."

[Davius]

Barça ruan ritmin, titulli më pranë

Barcelona mban hapin e Realit dhe fiton bindshëm 0-4 në fushën e Malagës, duke ruajtur avantazhin e gjashtë pikëve ndaj "merengesëve". Barcelona e nisi mirë pjesën e parë, duke iu afruar disa herë golit dhe në minutën e 22-të, Oleguer shënoi golin e parë për katalanasit. 12 minuta më pas, francezi Zhuli shënoi golin e dytë për Barcelonën, duke e vendosur mjaft shpejt fatin e lojës. Pas pësimit të golit të dytë, Malaga "u zgjua" dhe sulmoi disa herë portën e mbrojtur nga Nunjo Valdesi. Barcelona vuajti shumë në dyluftimet ajrore dhe Malaga iu afrua disa herë golit me anë të Rodrigesit. Pjesa e dytë ishte më e balancuar për të dyja ekipet, por në minutën e 69-të, Zhuli shënoi golin e tretë për Barcelonën.

Në minutën e 75-të, sulmuesi Amoroso doli jashtë me karton të kuq dhe një minutë para përfundimit të takimit, Zherardi dhunoi golin e katërt për katalanasit, të cilët hedhin një hap përpara titullit kampion. Në ndeshjet e tjera, Espanjoli fitoi ndaj Real Saragozës dhe u ngjit në vendin e tretë në renditje, duke siguruar një vend në Champions. Sulmuesi i kombëtares spanjolle, Raul Tamudo, ka kaluar Espanjolin në avantazh në minutën e 33-të dhe Maksi Rodrigez shënoi golin e dytë, pak para përfundimit të pjesës së parë. Devid Vila shkurtoi diferencën për ekipin e Saragozës, por Tamudo vulosi gjithçka dhe shënoi golin e tij të dytë personal gjatë këtij takimi. Valencia u ngjit në vend të pestë, pas fitores 2-0 ndaj Albasetes, teksa Mista dhe Migel Angel Angulo shënuan golat e fitores për ekipin e drejtuar nga trajneri Lopez.

Real Betisi dhe Deportivo La Korunja u ndalën në luftën për Champions, pas humbjeve të pësuara, respektivisht nga Real Sociedadi dhe nga Rejsing Santanderi. Sociedadi humbi me rezultatin 3-2, ndërsa Deportivo u "shkatërrua" brenda nga Santanderi, me rezultatin 1-4. Për ekipin e Santanderit, Josi Beajoun shënoi një tripletë, duke i dhënë fitoren ekipit të tij, pas disavantazhit 1-0. Real Majorka mban gjallë shpresat për t'i shpëtuar rënies nga kategoria, duke mundur ekipin e Numansias me rezultatin 2-1. Ndërsa Levante i komplikon shumë pozitat në renditje, pas humbjes 1-0 ndaj Gedafes.

[Davius]

PSV Eindhoven shpallet kampion në Holandë


PSV Eindhoven ka mundur 3-0 Vitesen në "Filip Stadium" dhe mund të festojë fitimin e titullit të 18-të kampion në Holandë, kur duhen edhe katër javë nga fundi i kampionatit. Skuadra e drejtuar nga Gus Hidink ka grumbulluar 79 pikë në 30 ndeshje dhe është matematikisht e paarritshme nga Ajaksi i vendit të dytë, që pas 30 ndeshjeve ka grumbulluar 65 pikë. Kështu, PSV-ja është shumë pranë përsëritjes së vitit 1989, në të cilin skuadra holandeze fitoi titullin kampion dhe Ligën e Kampioneve.

Veprimtari, ku nesër do t'i duhet të ndeshet në gjysmëfinale me Milanin. Për më shumë, në fitoren e arritur ndaj Viteses, trajneri Hidink ka lënë pushim disa nga pikat kyçe të kësaj skuadre, Bouman, Aleks, Koku, Franfan dhe Vengor. Gus Hidink shihet edhe si protagonisti kryesor i sezonit të suksesshëm të Eindhovenit. Ai e ka filluar karrierën si trajner në vitin 1982, me De Grafshapsin dhe është bërë i njohur dy vjet më vonë kur kaloi te PSV-ja. Pas një dominimi gjashtëvjeçar në Eindhoven, ku fitoi gjithçka, Hidinku ka drejtuar disa skuadra kombëtare. Paraqitja e tij në botërorin e vitit 1998 me Holandën dhe në botërorin e vitit 2002 me Korenë e Jugut, e kanë bërë të famshëm në të gjithë rruzullin tokësor.

[Davius]

Ferguson: Do të fitojmë Kupën e Anglisë


Trajneri i Mançester Junajtidit, Aleks Ferguson, është i vendosur ta mbyllë këtë sezon duke fituar të paktën një trofe. Pas fitores në gjysmëfinale ndaj Njukasëllit, "Djajtë e kuq" do të ndeshen në finale ndaj ekipit të Arsenalit dhe për trajnerin skocez, kjo është mundësia e vetme për të shpëtuar një sezon të dështuar. E ardhmja e Fergusonit është vënë në dyshim gjatë kohëve të fundit, por për skocezin, largimi nga "Old Traford"-i është akoma larg.

"Rezultatet e këtij viti nuk kanë qenë rezultat i plakjes sime, - deklaroi skocezi. - Kupa e Anglisë do të jetë mundësia ime për ta treguar këtë. Në qoftë se do të fitojmë kupën, do të tregojmë se ky sezon nuk ka qenë i dështuar dhe se trajneri ka akoma energji për të shpenzuar. Për këtë mendoj se do ta fitojmë këtë veprimtari." Në fillim të këtij muaji thuhej se trajneri Ferguson ishte pranë largimit nga klubi, por tekniku 59-vjeçar deklaroi se do të mbijetonte ashtu si dhe klubi i Mançesterit.

Gjatë kësaj jave, Fergusoni u shpreh se Roi Kin do të ishte njeriu i duhur për të marrë postin e trajnerit, pas largimit të tij, por të dielën ai deklaroi: "Roi mund të luajë në këtë nivel edhe për dy vitet e ardhshme, për këtë nuk kam asnjë dyshim. Mendoj se do të jetë me ne deri në moshën 36-vjeçare. Ai ka qenë i mrekullueshëm për ne gjatë këtij sezoni dhe do të jetë shumë i vështirë për t'u zëvendësuar pas largimit të tij. Nuk shoh asnjë arsye që mund ta largonte Kinin nga ne edhe në dy sezonet e ardhshme," - përfundoi Fergusoni. Mançesteri më 21 maj do të ndeshet ndaj Arsenalit, i cili ashtu si ekipi i Fergusonit, nuk ka fituar asgjë në këtë sezon.

[Ryder]

Fergusonin edhe pak e pret azili i pleqve. Me behet qefi qe Roy Keane qeka kandidat per trajner se ne ket mnyre urrejtja per Manchesterin vazhdon e paprekun...bile e multiplikume per aq here sa Roy Keane ka shag a sheep ne katunet e dublinit. lol (megjithse kam respekt per te vllain, Robbien)

Sa per finalen, normalisht do kisha frike mbrojtjen se Manchesteri nuk fal nga gabimet e mbrojtjes, po me Senderos qe esht shpresa e re, Toure, Lauren e Cole, Arsenali ka 9 ndeshje qe ka pesu vec 1 gol...edhe tu pas parasysh rezultate si Norwich - Manchester 1-0, s'esht pengese e pakalushme Manchesteri sivjet.

Ne radhe te pare pres nej shkaterrim te fuqishem te Spursave te Tottenscumit sonte, (kam vu ca lek per 4-2 lol...oddsat 40/1)...megjithse Henry e Ljungberg s'do lunin, ndoshta Wengeri do filloje me Reyes e Bergamp e te fusi Van Persie ne pjese te dyte ne vend te Bergampit.
Chelsky i Abramobitchit per here te pare ne histori do beje tifozllek me Spursat sot kshuqe do jet e forte.
Go Gooners!

[Davius]

Bundesliga, në kërkim të bukurisë së humbur

Në sezonin 1991-92, klubet gjermane renditeshin në majat e futbollit europian, falë një dominimi të gjerë në Kupën UEFA dhe në Ligën e Kampioneve, asokohe të quajtur Kupa e Kampioneve. Edhe Bundesliga ishte bërë një nga kampionatet, për të mos thënë, më i bukuri në botë. Gjatë viteve '80-të, Hamburgu fitoi Ligën e Kampioneve në vitin 1983 dhe arriti në finale në vitin 1980, ndërsa Bajerni i Mynihut arriti finalet në vitet 1982 dhe 1987. Leverkuseni fitoi Kupën UEFA në vitin 1988, duke bërë më mirë se Këlni dhe Shtutgarti, që u ndalën në finalet e kësaj veprimtarie, respektivisht në vitet 1986 dhe 1989. Ishte një kohë e artë për futbollin gjerman, shumë larg ditëve të sotme. Me eliminimin e Bajernit nga Çelsi, në çerekfinalet e Ligës së Kampioneve, u shua edhe shpresa e fundit për skuadrat gjermane në këtë edicion të kupave të Europës. Këto rezultate të dobëta kanë bërë që skuadrat gjermane, pjesëmarrëse në Ligën e Kampioneve, të jenë vetëm tri, ndryshe nga tri kampionatet e tjera, Angli, Spanjë dhe Itali, që kanë të drejtën të prezantohen me nga katër skuadra në veprimtarinë më të rëndësishme në rang klubesh. Për më shumë, kampionati gjerman zë vetëm vendin e pestë në renditjen speciale të UEFA-s, ku përveç tri kampionateve të lartpërmendura është kaluar edhe nga kampionati francez. Këta të fundit kanë bërë hapa gjigantë përpara dhe vjet u përfaqësuan me dy skuadra në finale. Monako, në Ligën e Kampioneve, dhe Marseja, në Kupën UEFA. "Nuk mund ta kuptoj këtë rënie të skuadrave gjermane në kupat e Europës - thotë legjenda e portës italiane, Dino Zof. - Skuadra e fundit gjermane që ka kaluar gjysmëfinalet e Ligës së Kampioneve, ka qenë Leverkuseni, në vitin 2002. Duhet të kenë kujdes që kjo të mos bëhet diçka e zakonshme." Skuadrat e tjera gjermane në Ligën e Kampioneve arritën të kalojnë fazën në grupe, por më pas Leverkuseni u eliminua nga Liverpuli dhe Verderi nga Lioni, në 1/8 e kësaj veprimtarie. "Për vite me radhë, njerëzit kanë admiruar bukurinë e futbollit gjerman, - shpjegon portieri i Shalkes, Frenk Rost. - Në të kaluarën kemi dominuar, ndërsa tani jemi disa hapa prapa në krahasim me klubet italiane, spanjolle apo angleze." Shalke, Shtutgart dhe Açen ishin skuadrat gjermane në Kupën UEFA sivjet, por të trija këto skuadra nuk shkuan më larg se 1/16. Një kopje e dhembshur e saj që ndodhi sezonin e kaluar. Rikthimi i skuadrave gjermane në elitën e futbollit europian nuk do të jetë e lehtë, por drejtuesi i Bajernit, Uli Hënes, duket se e ka kuptuar se ku qëndron problemi: "Në një veprimtari që zgjat nëntë muaj, ne e kemi shumë të vështirë të tregohemi kompetitivë deri në fund. Në Bundesligë qarkullojë shumë pak para dhe nuk investohet siç duhet te futbollistët e rinj." Kriza në fushë duket se pasqyrohet edhe në arkat e klubeve. 150 milionë euro në sezon shitet e drejta televizive e kampionatit anglez, 65 milionë ajo e kampionatit italian dhe 35 ajo e atij spanjoll. Ndërsa Bundesliga përfiton vetëm 12 milionë. Shifër qesharake kjo kur mendon se Bajerni mori Roi Makain nga Deportivo, për 18.75 milionë euro. Pra, përderisa në Gjermani do të mungojnë paratë, do të mungojnë edhe futbollistët "yje", që e bëjnë më të bukur këtë sport. Pasi vetëm me ta mund të fitohet në Europë, për të bërë të mundur që suksesi i Bajernit në Ligën e Kampioneve në vitin 2001, të mos mbetet një mirazh i bukur.

[Davius]

Roberto Mançini: Thjesht një sezon i pafat

Pikërisht atëherë kur u duk se skuadra kishte gjetur hapin prej ekipi të madh, pas fitores prestigjioze në fushën e Juventusit, që ishte suksesi i katërt radhazi, rënia në Mesinë rinxori në pah defektet e zakonta të Interit të Mançinit. Trajneri u është përgjigjur me tone të ashpra kritikave të gazetarëve, por Huan Sebastian Veron ka qenë më pak optimist lidhur me sezonin e zikaltërve: "Nëse kemi ndonjë gjë që duhet ta rishikojmë, - citoi ai, - gjithçka do të thosha..."

Nuk është faji as i lojës dhe as i lojtarëve. Interit të Mançinit i mungon mendësia. Është me të vërtetë çështje mentaliteti, problem që u rishfaq pikërisht atëherë kur u mendua se skuadra kishte gjetur njëfarë ekuilibri, edhe duke e sakrifikuar disi spektaklin që e kishte karakterizuar në pjesën e parë të sezonit zikaltër. Por ja që në "San Filipo" skuadra iu kthye "zakonit të vjetër". Shpërdoroi rast pas rasti dhe nuk arriti të mbyllte një ndeshje që e kishte në dorë, për t'u dorëzuar më pas, dhe duke pësuar humbjen e parë jashtë fushe pas gjithë atyre rezultateve të dobishme larg "San Siros".


Një humbje, e cila duket befasuese, por që në të vërtetë fsheh një problem të mirëfilltë. Huan Sebastian Veron e vë në dukje, sikurse ka bërë edhe herë të tjera në të kaluarën: "Mbetet gjithçka për t'u rishikuar, ? tha argjentinasi, ? kemi gjithë sezonin që mes dritë-hijesh kemi mbetur po në të njëjtën rrugë. Nuk ka shumë fjalë për të komentuar, pasi shfaqet gjithnjë i njëjti Inter, me amnezitë e zakonta." Nga ana e tij, Roberto Mançini është thuajse në një gjendje "lufte" me gazetarët dhe nuk ka më ndër mend të lejojë që ata të flasin për një sezon negativ të Interit: "Ka qenë vetëm ters, - ka theksuar trajneri, - ju i harroni gjërat e shumta pozitive të këtij sezoni." Dhe përbri kërkesës për të radhitur të paktën një, ai kërcënoi: "Nëse doni polemika, po çohem dhe po iki". Tani mbetet vetëm që zikaltrit ta mbyllin sezonin sa më mirë të jetë e mundur, për të hedhur themelet e sezonit të ardhshëm. Që nga java e ardhshme, ata do të rihidhen sërish në kërkim të ekuilibrit të humbur.

Ndërkaq, Emre Belozoglu komentoi paraqitjen e tij në Mesinë. "Më vjen keq për rezultatin e së dielës. Në pjesën e parë luajtëm mirë, por unë s'jam ende në formën më të mirë fizike. Kam bërë vetëm katër-pesë stërvitje me skuadrën pas problemit që pata, por nëse do të vazhdoj të punoj me vazhdimësi, do të jem gjithnjë e më mirë. Në harkun e 90 minutave luajtëm më mirë se kundërshtarët tanë, - vijoi turku.

- Ishte një humbje e padrejtë, ata i shfrytëzuan në maksimum rastet e pakta që patën." Mesfushori, në pjesën e parë të ndeshjes së Mesinës, ishte protagonist i një rasti të madh personal, që u mbyll me një gjuajtje, në të cilën ishte vendimtare ndërhyrja e portierit kundërshtar: "E pashë portierin dhe u mundova ta dërgoja topin në cep, - deklaroi 24-vjeçari, - por ai arriti ta kapte gjithsesi. Sidoqoftë, duhej ta kishim shënuar një tjetër gol me gjithë ato raste që krijuam. Tani duhet të shohim përpara dhe duhet të përpiqemi të fitojmë sa më shumë ndeshje të jetë e mundur, për të ruajtur vendin e tretë."

[Davius]

Nedved: Lufta me Milanin vazhdon...

Quhet Nedved njeriu i shpëtimit të bardhezinjve. Në mbrëmjen më të vështirë, pa Ibrahimoviçin dhe Trezegenë, dhe me Del Pieron në fushë vetëm disa minuta përpara se të dëmtohej dhe ta linte tapetin e blertë, ka qenë një tjetër herë mesfushori çek ai që e ka udhëhequr Juven drejt kapërcimit të një tjetër pengese. E kërkoi Paveli atë gol pesë minuta përpara përfundimit. E "rrëmbeu" me dhëmbë dhe me dëshirën e shfaqur gjatë gjithë pjesës së dytë, pas një pjese të parë në të cilën shpesh la për të dëshiruar, pasi ishte në kërkim të pozicionit dhe të veprimit vendimtar. "Nuk rreshtëm kurrë së besuari dhe në fund u nderuam, - kanë qenë fjalët e Nedvedit.

- Pikërisht si ndaj Interit, vetëm se të mërkurën nuk patëm fat dhe nuk arritëm ta kthenim rezultatin." Më pas, ai ka rrëfyer golin: "E stopova topin, por vajta shumë anash. Vura re se kishte disa kundërshtarë përpara portës dhe mendova ta kryqëzoja dhe ta ngreja gjuajtjen. Më shkoi mirë. Sigurisht, dëmtimi i Del Pieros nuk ishte diçka e mirë për ne, por në atë pikë kuptuam se mund të kishim fituar duke u mbështetur vetëm te forca jonë." Ish-laciali s'është një person, të cilit i pëlqen të ndalet dhe t'i shijojë situatat pozitive, vështrimi i tij fiksohet menjëherë drejt horizontit: "S'duhet të dorëzohemi, që tani e deri në fund çdo ndeshje mund të jetë vendimtare. Lufta me Milanin për titull do të jetë ende e gjatë, shumë e gjatë." Ndërkaq, Juvja kujton Andrea Fortunaton, i cili ndërroi jetë 25 prillin e dhjetë vjetëve më parë. Një kampion që ishte shembull pasioni dhe ndershmërie, që shkruajti faqe të rëndësishme në historinë e bardhezinjve.

Fabio Kapelo, natyrisht, ka qenë i kënaqur për fitoren e Juves në "Olimpiko", çka u ka mundësuar bardhezinjve që të qëndrojnë në krye së bashku me Milanin: "Reaguam ashtu siç bën një skuadër e madhe, - tha trajneri. - Ua kisha thënë djemve edhe përpara ndeshjes se ata janë në gjendje të luajnë me nivel shumë të lartë. Në disa raste desh më la zemra, - vijoi ai buzagaz, - por me gjithë ato mungesa që kishim, mora një sinjal pozitiv nga ekipi. Reagimi i karakterit që patëm, ishte madhështor, kjo gjë më dha sigurinë se do të luftojmë për titull deri në fund." Sa për duelin me Milanin, objektivi i Juves "është që të mbërrijmë të paktën me pikë të barabarta në përballjen direkte."

[Davius]

Runi: Kam akoma për të mësuar

Sulmuesi 19-vjeçar i Mançesterit, Uejn Runi, pas fitimit të titullit "Lojtari i ri më i mirë i vitit", ka deklaruar se ka akoma shumë për të mësuar, që të arrijë në nivele akoma më të larta. "Natyrisht që fitimi i këtij çmimi është një arritje e madhe për mua, pasi është votuar nga kolegët e mi profesionistë. Si futbollist kam kërkuar gjithmonë të përmirësohem dhe të mësoj nga njerëzit që kam përreth. Nëse vazhdoj të mësoj dhe të qëndroj me këmbë në tokë, shpresoj se do të arrij të fitoj shumë çmime të tjera," - deklaroi Runi.

[Davius]

Eto: Forca e Barçës i ka bindur të gjithë

Samuel Eto është rikthyer në fushë në ndeshjen ndaj Malagës, pas problemeve që pati në kofshën e djathtë gjatë ndeshjes ndaj Realit. Sulmuesi nga Kameruni ka lëshuar një intervistë, ku pohon se Barcelona është skuadra më e mirë në Spanjë dhe se e gjithë bota e ka parë se katalanasit janë më të fortë se Reali. Ja cila ka qenë intervista e tij:

- Si ndiheni pas dëmtimit të pësuar në "Barnabeu"?
- Jam shumë mirë dhe në formë, më mirë se kaq është e pamundur.
- Si e përjetuat një javë të tërë pa u stërvitur me skuadrën e parë?
- Gjithmonë futbollisti vuan kur nuk mund të zbresë në fushën e lojës dhe të punojë me topin. Por ajo javë pushimi ishte e domosdoshme për t'u rikthyer në formën më të mirë.
- Fitorja në Malaga tregoi se Barcelona di ta durojë presionin dhe mbetet po ajo skuadër e fortë që kryeson kampionatin...
- E kam thënë edhe më parë, kur fillon ndeshja, presioni zhduket, sepse ne futbollistët e dimë se cilat janë detyrat tona gjatë një ndeshjeje dhe fokusohemi tek ato. Mendojmë vetëm për mënyrën si duhet fituar ndeshja. Derisa të vazhdojmë me fitore, çdo lloj presioni është i durueshëm.
- Çfarë keni për t'u thënë madrilenëve që kanë deklaruar, se Barça është në krye falë ndihmës së gjyqtarëve?
- Po kryesojmë kampionatin dhe e gjithë bota e ka parë se cila është skuadra që luan më mirë në Spanjë, që ka fituar më shumë ndeshje dhe që ka më shumë pikë. Gjithmonë flitet për skuadrën që kryeson dhe mendoj se të gjithë janë të bindur për forcën tonë.
- Cili është sekreti i Barçës?
- Kemi diçka më shumë se të tjerët. Se për çfarë bëhet fjalë, më mirë pyesni trajnerët dhe futbollistët kundërshtarë.
- Keni menduar si ta fitoni sa më parë titullin kampion?
- Duhet të vazhdojmë fitoret në kampionat dhe titulli do të vijë kur të jetë momenti i duhur.
- Ju jeni golashënuesi më i mirë i kampionatit spanjoll. Sa i rëndësishëm është për ju titulli i golashënuesit më të mirë në vitin tuaj të parë me Barcelonën?
- Një titull i rëndësishëm që do të ishte qershia mbi tortë pas fitores së titullit kampion. E kam thënë edhe më parë se pavarësisht nga puna ime, me një skuadër si Barcelona ke shumë mundësi të shënosh. Ndihem me fat që luaj në këtë skuadër.
- Cili mendon se ka qenë "çelësi" i përshtatjes suaj të përkryer me skuadrën dhe me qytetin e Barcelonës?
- Këtu kam gjetur një ambient ideal. Të gjithë shokët e skuadrës duan të fitojnë dhe duket se e kemi gjetur mënyrën për ta bërë diçka të tillë.
- Te Barça shënojnë të gjithë. Golat e Oleguerit dhe Zherarit ndaj Malagës, e tregojnë më së miri këtë...
- Sivjet kemi shënuar pothuajse të gjithë. Jam i lumtur për golin e Zherarit, e kishte shumë të nevojshëm pas një sezonin të karakterizuar nga dëmtimet. Ai është një element mjaft i rëndësishëm për skuadrën tonë dhe mendoj se me golin e shënuar, ka marrë edhe ai çmimin e duhur për sakrificat e bëra gjatë gjithë sezonit. Oleguer dhe Zhuli kanë shënuar edhe herë të tjera.