Gazeta Elektronike: "Futbolli Ndërkombtar"

[Davius]

Balak: Në Gjermani s'kemi rivalë

Bajerni ka mundësi t'i fitojë të dyja veprimtaritë e futbollit gjerman, Bundesligën dhe Kupën e Gjermanisë. Kjo, pasi bavarezët mposhtën 0-2 Arminian në Bielefeld dhe fituan të drejtën për t'u ndeshur me Shalken në finale. Shalke është njëkohësisht edhe kundërshtari kryesor i Bajernit në kampionat. Trajneri i skuadrës që kërkon të fitojë kampionatin e gjashtë në nëntë vitet e fundit, Feliks Magat, u shpreh:

"Në Bielefeld fituam një ndeshje të vështirë ndaj një kundërshtari të fortë dhe të vendosur. Ata patën disa raste për të kthyer fatet e ndeshjes, por gabuan në metrat e fundit para portës. Ata po luanin ndeshjen e vitit dhe bënë të pamundurën për të mos dalë të humbur. Gjithsesi, ne ishim në nivelin e duhur dhe krijuam deri në fund raste për shënim. Në fillim të pjesës së dytë edhe mund të ishim ndëshkuar, sepse vendësin po luanin me të vërtetë mirë, por Kahni u tregua i jashtëzakonshëm.

Konfirmoi edhe një herë se është shumë pranë formës së tij më të mirë. Paraqitja e tij ishte vendimtare për kualifikimin tonë." Vetë portieri i Bajernit dhe i kombëtares gjermane, Oliver Kahn, një ditë pasi Bajerni siguroi finalen e kupës, u shpreh: "Kjo ishte ndeshja jonë e shtatë në dy javë dhe lodhja u pa qartë në fushën e lojës. Arminia në këtë periudhë ka luajtur të paktën gjysmën e ndeshjeve tona. Ishin të freskët dhe duke qenë se luanin ndeshjen e jetës, na vunë shpeshherë në vështirësi.

Ishte një ndeshje e vështirë për ne dhe në fund të takimit ishim krenarë për kualifikimin e arritur në fund të një beteje të vërtetë në fushën e lojës." Bajerni i Mynihut qëndroi në mbrojtje në pjesën më të madhe të lojës, pasi e gjeti shumë shpejt golin e avantazhit. Balaku shënoi në minutën e tretë të takimit për bavarezët. Edhe autori i golit është i të njëjtit mendim me Kahnin dhe Magatin, Arminia e bëri Bajernin të vuante. Balaku tha pas ndeshjes: "Goli në fillim na ndihmoi, por më pas fitorja u vështirësua për ne, sepse Arminia tregoi karakter dhe kërkoi me të gjitha mundësitë golin e barazimit.

Treguam se dimë të mbrohemi dhe përballë kishim një skuadër që përpara publikut të saj, kërkonte të fitonte për të luajtur në Kupat e Europës vitin e ardhshëm. Gjithsesi, ne kërkonim me çdo kusht finalen dhe e arritëm atë. Tani duhet të mendojmë se si t'i fitojmë të dyja veprimtaritë në të cilat jemi ende të lojë, për të treguar se në Gjermani nuk kemi rivalë."

[Davius]

Ndryshon formati i eliminatoreve të Euro 2008-s

Pas fitores surprizë së Greqisë në Euro 2004, UEFA ka ndër mend të ndryshojë formatin e eliminatoreve të Euro 2008-s. Në eliminatoret e ardhshme, ekipet që do të renditen në vend të parë dhe të dytë do të kualifikohen automatikisht për në finalet e europianit, pa pasur nevojë për ndeshjet e "play-off"-it.

Gjashtë grupe paraeliminatore do të përbëhen nga shtatë ekipe, ku do të dalin 16 ekipet finaliste që do të marrin pjesë në Euro 2008. Ky format i ri i eliminatoreve u vendos nga komiteti drejtues ditën e martë. Eliminatoret për europianin e ardhshëm do të fillojnë të luhen në shtator të 2006-s, pas zhvillimit të botërorit të Gjermanisë. Formati i vjetër konsistonte me 10 fituesit e grupeve dhe pesë fituesit e "play-off"-it, që bashkë me ekipin organizator përbënin 16-shen e kualifikuar për në europian.

[Davius]

Champions, çdo skuadër, katër lojtarë U-20

Ekipet e mëdha në Europë duhet të paraqesin listën e plotë të lojtarëve para fillimit të kompeticioneve europiane dhe kësaj here duhet të përfshijnë në këtë listë edhe katër lojtarë që vijnë nga ekipet e reja të klubeve. Ky rregull u vendos të enjten nga UEFA dhe u votua unanimisht nga pjesa më e madhe e kësaj organizate. Këto rregulla të reja do të aplikohen vetëm në Ligën e Kampioneve dhe në Kupën UEFA, por organizata europiane shpreson që kjo të aplikohet në të ardhmen edhe në kampionatet e ndryshme.

Që nga fillimi i sezonit 2006-07, klubet do ta kenë të detyrueshme përfshirjen e katër lojtarëve të rinj në skuadër. Zv.presidenti i UEFA-s, Per Ravn Omdal, pas konferencës deklaroi: "Kjo është shumë e rëndësishme për të ardhmen e futbollit. Katër lojtarë të rinj është një numër i vogël në një skuadër të përbërë nga 25 veta, por ky është një fillim i mbarë."

[Davius]

Ferguson: Gjyqtari nuk e duroi presionin


Sër Aleks Ferguson, trajneri i Mançesterit, pas ndeshjes së humbur ndaj Evertonit, akuzoi këtë të fundit për ndikimin që pati dhe presionin e bërë ndaj gjyqtarit të takimit. Mançesteri humbi me rezultatin 1-0 dhe trajneri skocez u shpreh i revoltuar nga gjykimi i dobët i gjyqtarit Devid Mojes, pas nxjerrjes me karton të kuq të Geri Nevillit dhe Pol Skolsit. "Mendoj se Evertoni e dinte që gjyqtari ishte shumë i dobët dhe mund të influencohej lehtë. Nuk u vë faj atyre, sepse, nëse të jepet një rast i tillë, sidomos kur luan në fushën tënde, patjetër që do të përfitosh.

Që në fillim të takimit, vendimet e gjyqtarit ishin të njëanshme. Kur mendon për kartonin e kuq të Pol Skolsit, për një ndërhyrje të gabuar, por jo të rëndë, të vjen vërtet për të qeshur. Gjithsesi, e përgëzoj Evertonin për këtë fitore. Luajtën një ndeshje të mirë dhe luftuan për çdo top në mesfushë. Ishin vërtet të vështirë për t'u mundur. Rastet e vetme që patëm, i kishim në luftën në ajër dhe Najxhëll Martin tregoi se është një nga portierët më të mirë në Angli. Skolsi pati një mundësi mjaft të mirë për të shënuar gjatë pjesës së parë, por edhe një herë Martini ishte i pakalueshëm. Nuk e di arsyen që e shtyu Nevillin të gjuante topin drejt tifozëve të Evertonit, por në ditët e sotme këto gjëra nuk janë të tolerueshme dhe Geri duhej ta dinte këtë. Gjithmonë do të ketë ngacmime dhe fyerje nga tifozeritë, por Geri nuk duhej ta kishte bërë kurrë një gjë të tillë," - përfundoi Fergusoni. Kjo humbje e ka lënë Mançesterin 4 pikë pas Arsenalit në luftën për vendin e dytë.

[Davius]

Ferguson: Roi Kin, pasardhësi im
Trajneri i Mançesterit, Aleks Ferguson, dëshiron që Roi Kin të jetë pasardhësi i tij në krye të stolit të "Djajve të kuq." Fergusoni ka deklaruar se do të qëndrojë te Mançesteri, të paktën edhe për një vit, por është shprehur se mesfushori Kin i ka të gjitha cilësitë e kërkuara për rolin e trajnerit në "Old Traford". "Do të qëndroj këtu edhe në sezonin e ardhshëm, pasi kam një kontratë për të respektuar. Por, kur të largohem, do të kisha dëshirë të shihja Roi Kinin si trajner të ri të Mançesterit. Ai është një lider në fushë dhe këtë mund ta bëjë edhe në stol." Fergusoni është shprehur më parë se asistenti i tij, Karlos Queroz, do të kishte qenë njeriu i duhur për këtë post, por deklaratat e fundit të bëra nga ai, e kanë vënë Kinin në krye të kandidaturave. Roi Kin, 33-vjeçar, ka arritur të marrë çertifikatat e tij si trajner dhe ka shprehur dëshirën e për t'u bërë trajner.

Ardhja e Kinit mund të përshpejtohet, nëse Mançesteri nuk do të përmirësojë rezultatet dhe Fergusoni mund të largohet edhe para përfundimit të kontratës së tij. Blerja e Runit, vitin që kaloi, nuk solli rezultatet e pritura në sulmin e "Djajve të kuq", i cili ka shënuar vetëm 48 gola në 33 ndeshje. Finalja e Kupës së Ligës ndaj Arsenalit më 21 maj është mundësia e vetme për Mançesterin, për të fituar të paktën një trofe në këtë sezon. I pyetur për suksesin e Mourinjos në këtë sezon, ai u shpreh: "Mourinjo ka një kulturë krejtësisht të ndryshme te Çelsi nga ajo e imja te Mançesteri. Këtu unë jam menaxher, jo thjesht një trajner. Unë marr vendimet për kontratat e reja dhe për blerjet e klubit. Mbaj përgjegjësi për të gjithë lojtarët e ekipit."

[Davius]

Juventinët "theren" mes tyre

Një ngjarje e pabesueshme, e cila i bashkangjitet kapitullit të dhunës nëpër stadiume. Tre tifozë të Juves janë arrestuar në Torino, me akuzën për tentativë vrasjeje, pasi kanë rrahur dhe goditur me thikë, të enjten në mëngjes, një tjetër tifoz bardhezi, por të një grupi rival.

[Davius]

Trezege: Dua të qëndroj te Juvja

Kanë mjaftuar pak orë për t'i ndryshuar mendjen David Trezegesë. Dy ditë më parë, golashënuesi francez i kishte dërguar mesazhe dashurie, përmes së përditshmes angleze "The Sun", Arsenalit të patriotit Venger dhe ku luan bashkatdhetari tjetër i tij, Henri. Dje mbërriti menjëherë përgënjeshtrimi nga ana e lojtarit. "Jam te Juventusi dhe dua të qëndroj te Juventusi, - ka deklaruar sulmuesi francez. - Lidhur me deklaratat e shfaqura te "The Sun" dhe të përcjellura nga agjencia dhe gazeta italiane, - ka thënë Trezegeja, - mohoj të kem folur me gazetën në fjalë dhe për rrjedhojë që të kem bërë deklarata, në të cilat do të kisha pohuar se dua të luaj tek Arsenali."

[Davius]

Bartez skualifikohet për gjashtë muaj

Portieri i Francës dhe Olimpikut të Marsejës, Fabian Bartez, është dënuar për gjashtë muaj, tre nga të cilët do të jenë muajt e verës, për shkak se ka pështyrë një gjyqtar futbolli. Ky ka qenë vendimi i marrë nga komisioni i disiplinës pranë Federatës Franceze të Futbollit. Bartezi do të ketë kështu mundësi të luajë për kombëtaren franceze në ndeshjet e 3 dhe 7 shtatorit ndaj Ishujve Faroe dhe Irlandës, dhe në ndeshjet e 8 dhe 12 tetorit ndaj Zvicrës dhe Qipros. Në faqen zytare në internet të Federatës Franceze të Futbollit shkruhej:

"Komiteti disiplinor i Federatës Franceze të Futbollit vendosi të skualifikojë për gjashtë muaj Fabian Bartezin dhe ta gjobisë me 1000 euro." Bartezi ka dhjetë ditë në dispozicion për të apeluar këtë dënim. Portieri 32-vjeçar kishte pështyrë gjyqtarin maroken, Abdelah El Ashiri, gjatë ndeshjes miqësore ndërmjet Marsejës dhe Kazablankës, luajtur në muajin shkurt. E ardhmja e numrit 1 të portës franceze është vënë në dyshim. Ai kishte deklaruar se do të tërhiqej në fund të vitit 2006, vendim ky që ndoshta do të rishikohet, për shkak të këtij skualifikimi gjashtëmujor. Ndërkohë, kapiteni i Marsejës, Frenk Dehu, një tjetër protagonist në zënkën me gjyqtarin afrikan, nuk është dënuar nga Federata Franceze e Futbollit.

[Davius]

Inter, kontakte për Piresin

Robert Pires mund ta lërë Arsenalin përpara përfundimit të kontratës së tij (verë 2006), për të provuar një eksperiencë në kampionatin italian. Interi do të ishte i gatshëm ta priste krahëhapur. Agjenti i lojtarit, Stefan Kurbis, tanimë ka folur me Marko Brankën. Në Rrugën "Durini" kanë një konsideratë të veçantë për anësorin francez, i cili e lë të hapur çdo munësi: "Do të më pëlqente të qëndroja në Londër, por hëpërhë s'kam marrë asnjë sinjal. Kështu që tani jam i hapur ndaj të gjitha mundësive, do të më pëlente të provoja një venturë tjetër, në një kampionat ndryshe nga Premier Liga."

[Davius]

Gigs: Jemi më të fortë se Çelsi!

Mesfushori i Mançesterit, Rajan Gigs, ka bindjen se ekipi i tij është ende më i mirë se ekipi i Çelsit. "Djajtë e kuq" ndodhen në vend të tretë të renditjes, 15 pikë larg Çelsit, i cili ka vënë një dorë mbi titullin kampion. Pavarësisht dominimit total të Çelsit, gjatë këtij sezoni, Gigsi deklaroi se nuk ka asnjë arsye për t'u shqetësuar për sezonin e ardhshëm. Gigsi komplimentoi ekipin e Mourinjos për rezultatet e arritura, por theksoi se Mançesteri mbetet akoma ekipi më i mirë në Angli, edhe pse rezultatet e fundit nuk e konfirmojnë këtë.

"Avantazhi i 15 pikëve nuk do të thotë që ne jemi më të dobët se Çelsi. Aktualisht ne besojmë se jemi më të fortë se ata. Nuk dua t'i heq asnjë meritë Çelsit për sezonin e mrekullueshëm që zhvilloi, por ne, gjatë këtij sezoni, barazuam shumë herë ndaj ekipeve që duhej të fitonim. Nuk arritëm rezultate të mira, por nuk patëm as mundësinë për t'iu afruar Çelsit, për të parë nëse do ta mbanin presionin," - deklaroi Gigsi. Humbjet e fundit ndaj Noruiçit dhe Evertonit e kanë lënë Mançesterin katër pikë pas kampionëve në fuqi të Arsenalit. "Sezonin e ardhshëm do të jemi akoma më të motivuar. Tani kemi finalen e kupës për të luajtur dhe besoj se do të arrijmë të fitojmë."