Gazeta Elektronike: "Futbolli Ndërkombtar"

[Davius]

Bajern, skuadra pa rival në Gjermani

Bajerni i Mynihut shihet disi i sigurt për të fituar titullin e 19-të, por fuqia më e madhe gjermane me të vërtetë e meriton falë rezultateve që ka arritur. Ai është ndihmuar edhe impotenca e rivalëve kryesorë. Goli i anglezit Ouen Hargrivs, që shënoi në minutën e fundit të takimit ndaj Hanoverit të shtunën, bëri që Bajerni të shkonte 6 pikë larg vendit të dytë, kur kanë mbetur edhe pesë takime për t'u luajtur.

Pasi pa Hargrivsin të shpëtonte ditën e Bajernit, trajneri Magat mund të ketë fshirë sytë nga mosbesimi që rivalët e Shalkes dhe Shtutgartit kanë humbur. Shalke u mund nga Hamburgu 2-1 dhe Shtutgarti çaloi nga ajo humbje 2-1 ndaj Hansa Rostokut, duke e lënë Bajernin në një pozicion të rehatshëm. Para katër takimesh, Shalke kryesonte tabelën me tri pikë më shumë, pasi mundi Bajernin 1-0, por një kolaps ndodhi për të, pasi e shikon veten gjashtë pikë poshtë rivalëve të betuar.

"Ndoshta ne menduam që arritja në krye ishte e mjaftueshme, - tha sulmuesi Ebe Sand. - Por kjo është gjithmonë e rrezikshme." Shalke humbi ndaj të ardhurve, si Mainzit, Shtutgartit dhe Hamburgut, duke i thyer shpresat për të fituar titullin e parë që nga 1958-a. "Ne jemi si një lepur që sulmohet nga një gjarpër i rrezikshëm, - shtoi kapiteni i Shalkes, Frank Rost. - Tani duhet të mbrojmë vendin e dytë.

" Shalke ka humbur nëntë takime këtë sezon, statistikë kjo jo rezultative për një skuadër që kërkon të dalë kampione. Pas triumfit 3-0 ndaj Shalkes para një jave, Shtutgarti mendonte të rivalizonte Bajernin, pasi do të luante ndaj vendit të dytë nga fundi, Hansa Rostok, i menduar si përballje e lehtë. Por Hansa fitoi 2-1 dhe e la Shtutgartin tetë pikë larg Bajernit.

"Ne duam të bëhemi kampionë, por nuk kemi mentalitet fituesi, gjë që bavarezët e kanë," - tha portieri i Shtutgartit, Timo Hilderbrand. Natyrisht, Bajerni ka shprehur dëshirën e tij për të fituar, por është larg të përsosurës. Bavarezët kanë tri pikë më shumë se ata, të cilët kishin në të njëjtin moment një vit më parë dhe janë gjashtë pikë larg ndjekësve më të afërt. Kampionët në fuqi, Verder Bremen, kishin 67 pikë pas 29 javësh, sezonin e kaluar, ndërsa Bajerni kishte 62 pikë në këtë moment.

Verderi po e shikon veten të shtrydhet në këto momente, për të siguruar një vend në programin e Ligës së Kampioneve. Diçka që ata kanë bërë, nuk ka lidhje me sezonin e kaluar, duke e lënë Bajernin të luftojë me Shalken, që nuk ka eksperiencë. Me Borusian e Dortmundit, që akoma po qahet nga problemet financiare, është vështirë të shikosh ndonjë rival për bavarezët për sezonin që do të vijë. Në të kaluarën, në tetë sezone, Bajerni ka fituar pesë tituj kampion dhe duket që do të fitojë titullin e gjashtë në nëntë sezone dhe dominimi i tij duket se do vazhdojë

[Davius]

Benitez: Jepini kohë Morientesit

Trajneri i Liverpulit, Rafael Benitez, ka deklaruar se Fernando Morientesit i duhet kohë për t'u rikthyer në formën e tij më të mirë, pas një fillimi zhgënjyes të karrierës së tij në "Anfild Road". 29-vjeçari i ardhur nga Reali i Madridit nuk ka mundur të shkëlqejë në Premier Ligë, me dy gola të shënuar në nëntë takime.

Trajneri Benitez ka besim se sulmuesi i kombëtares spanjolle do të rigjejë formën e tij të mëparshme. "Fernandos i duhet një gol për t'u çliruar. Për të është e vështirë, sepse para se të vinte këtu, kishte pesë muaj pa luajtur te Reali. Eshtë mjaft i talentuar, por duhet të jetë më i shkathët." Morientesi ishte shënuesi më i mirë në edicionin e vjetshëm të Ligës së Kampioneve, ku ekipi i tij, Monako, arriti të shkonte deri në finale.

[mad]

Lajm pak si i vjeter ky......b u r i m i

14 prill 2005

Cana injoron Realin dhe Bayern-in

Futbolli shqiptar ne rritje te dukshme perkedhel yllin e tij te ri: Lorik Cana, mesfushor i PSG dhe i kombetares se Vendit te shqiponjave, i lejon vetes luksin ti thote JO, tani per tani, Bayernit dhe Real Madridit.

Sipas "Le Parisien", ne fakt, javen e ardhshme lojtari me origjine kosovare, do zgjase kontraten e tij, me skadence ne 2006, me ekipin kryeqytetas francez, qe e kishte zbuluar ne moshen 16 vjecare, deri para se Vahid Halilhodzic ta leshonte ne ekip te pare vitin e kaluar.

"Nese nuk do te kete te reja do te rinovoj ne Paris, ambienti me pelqen, klubi dhe drejtuesit kane besim tek une, besim ky qe duhet shpaguar. Jane te pelqyeshme zerat rreth interesimit te gjigandeve te Europes si gjermanet dhe spanjollet, por besoj qe eshte me mire mos ndryshoj dhe te eci perpara me PSG".

{^_^}

[Davius]

Erikson: Lampard dhe Terri, më të mirët

Trajneri i ekipit kombëtar të Anglisë, Sven Goran Erikson, mendon se është e pamundur të zgjedhësh fituesin e çmimit "Lojtari i vitit", pasi dy kandidatët kryesorë për ta fituar këtë çmim, Xhon Terri dhe Frenk Lampard, kanë zhvilluar që të dy një sezon të mrekullueshëm. Dyshja e Çelsit, bashkë me Tieri Henrinë dhe Stiven Xherrardin, janë katër kandidaturat për fitimin e këtij çmimi që jepet nga Federata e Futbollistëve Profesionistë të Anglisë.

Fituesi i këtij çmimi do të shpallet të dielën në një mbrëmje "gala", të organizuar në Londër. Mesfushori Lampard dhe mbrojtësi Terri kanë luajtur një rol mjaft të rëndësishëm në arritjet e Çelsit gjatë këtij sezoni. Çelsi këtë vit ka fituar Kupën e Ligës, ka arritur të kualifikohet për në gjysmëfinalet e Championsit dhe është në krye të kampionatit anglez. Eriksoni ka përfituar mjaft nga forma e lojtarëve të Çelsit, të cilët në kombëtare kanë luajtur mjaft mirë. Anglia është në vend të parë të grupit të saj eliminator dhe tashmë ka hedhur një hap të sigurtë drejt finaleve të botërorit të Gjermanisë. I pyetur se për kë do të votonte, suedezi u përgjigj:

"Eshtë e pamundur të zgjedhësh njërin prej tyre, pasi këtë sezon kanë qenë të dy të jashtëzakonshëm. Seriozisht, që këtë vit unë do ta ndaja në dy pjesë çmimin." Eriksoni shprehu admirimin për dy lojtarët e Çelsit, duke shtuar: "I njoh të dy lojtarët prej kohësh dhe do të thosha që e kanë një gjë të përbashkët, janë që të dy lojtarë të nivelit të lartë. Kanë qenë talente të reja dhe janë shndërruar në lojtarë shumë të rëndësishëm. Frenk Lampard ka qenë talent që kur luante tek Uest Hemi dhe mua nuk ma priste kurrë mendja se një ditë do të bëhej lojtari që është sot. E njëjta gjë vlen edhe për Terrin. Në kombëtare kanë qenë vendimtarë dhe, në qoftë se arrijmë të kualifikohemi, ata do të jenë shumë të rëndësishëm në Gjermani."

[Davius]

Figo: Real, kam ende për të dhënë

Luis Figo i ka zët polemikat. Ai beson tek ëndrra e pamundur, fitimi i titullit kampion në Spanjë. Pavarësisht se ka fituar gjithçka në karrierën e tij, Figo ka ende uri për fitore dhe trofe. Mesfushori portugez nuk duket i shqetësuar as nga fakti që në dy takimet e fundit të Realit, e ka filluar ndeshjen nga stoli. Ja cila ka qenë intervista e tij:

- A mundet Reali i Madridit ta fitojë titullin? - Eshtë shumë e vështirë, por jo e pamundur. Nuk varet vetëm nga ne. Ne po e bëjmë mirë detyrën tonë, duke i fituar të gjitha takimet. Eshtë e pamundur të parashikosh se ç'do të ndodhë deri në fund. - Si e shihni skuadrën? - Skuadra fiton. Na duhet qetësia për të luajtur në nivelet tona të zakonshme. Jam shumë i kënaqur si po shkojnë gjërat në këtë periudhë. Nuk e kam problem stolin dhe kam njerëzit e duhur që më mbështesin këtu në Madrid. Shpresoj të luaj në nivele të larta deri në vitin 2007.

- Do të riktheheni te kombëtarja portugeze? - Nuk e kam vendosur ende rikthimin tim në kombëtare. Për këtë çështje dua të flas vetëm me shtypin portugez. E lashë kombëtaren, sepse më duhej më shumë kohë për t'i kushtuar Realit. Por tani që nuk luaj shpesh, ndoshta mund të kem kohë edhe për Portugalinë.

- Si ndiheni moralisht, pas dy ndeshjeve të fundit, të cilat i keni filluar nga stoli? - Mirë. Jam një futbollist profesionist. E kam kuptuar mirë se çfarë kërkojnë prej meje në Madrid. Jeta vazhdon pa asnjë lloj problemi. Kam një kontratë me Realin deri në vitin 2006 dhe dua ta përfundoj denjësisht atë. - Të është dhënë mundësia për rinovimin e kontratës? - Jo, por ka ende kohë. Eshtë detyra e drejtuesve për t'i kënaqur të dyja palët, sepse edhe unë po përpiqem ta bëj si duhet detyrën time në fushën e lojës.

- Pra, qëndrimi juaj në stol është vetëm një zgjedhje teknike e trajnerin dhe nuk fsheh asgjë pas... - Sigurisht. Nuk ka asnjë arsye tjetër për të cilën duhet të qëndroj në stol. Nuk kam asnjë dyshim dhe nuk jam unë ai që vendos se kush do të luajë dhe kush jo.

- Kanë ndryshuar marrëdhëniet tuaja me presidentin Perez? - Marrëdhënia ime me presidentin nuk ka ndikuar dhe nuk do të ndikojë ndonjëherë në aktivizimin tim si titullar. Nuk kemi asnjë problem përsa kohë drejtuesit janë korrektë me mua dhe unë me ta.

- Jeni në stol, sepse rendimenti juaj nuk ka qenë ai i zakonshmi? - Po të ishte kështu, do të ma kishin thënë. Mendoj se për momentin, Reali po luan me një vendosje taktike, së cilës nuk i përshtatem, por jam i vlefshëm në çdo moment që trajneri do të ketë nevojë.

- Jeni i sigurtë se edhe nëse qëndroni në stol, do të mbeteni te Reali? - Të ardhmen time e vendos vetëm unë. Përderisa klubi nuk më konsideron si një futbollist stoli, unë nuk kam përse të largohem. U siguroj të gjithëve se kam ende për të dhënë me fanellën e Realit.

- Në fund, si e pritët lajmin se do ta fillonit nga stoli ndeshjen ndaj Barçës? - Nuk u shqetësova. Nuk kam firmosur që të jem gjithmonë titullar. Përvoja dhe kultura ime nuk më lejon të diskutoj një vendim të trajnerit. Nuk më ka pëlqyer vetëm mënyra sesi e mora vesh. Nuk kërkoj shpjegime, por nëse do ta filloj ndeshjen nga stoli, këtë të ma thotë trajneri dhe jo gazeta.

[Davius]

Doping: 4 çështje me vlera të dyshimta

Kontrollet e kryqëzuara gjak?urinë, të kryera deri tani në Itali, kanë nxjerrë në pah 4 raste të dyshimta. Por kundëranalizat e urinave nuk e kanë konfirmuar përdorimin e Epo-s. Dhe është pikërisht kjo pikë ku përfaqësuesit ligjorë të Juves e mbështesin mbrojtjen e tyre. Sepse kështu del se vetëm vlerat e gjakut nuk janë të mjaftueshme për të dëshmuar përdorimin e eritropoietinës, ndryshe nga ajo që ka bërë të ditur gjykatësi që ka dënuar mjekun Agrikola.

Katër futbollistët (jo të Juventusit) që i janë nënshtruar vullnetarisht testit fill pasi kanë luajtur një ndeshje, kishin në gjak vlera hemoglobine, hematokriti dhe retikolociti, të tilla që, në bazë të parametrave, e kanë bërë të deyrueshme kryerjen e një kontrolli shtesë të urinave. Në apelimin e bërë në gjyqin kundër Juventusit, avokatët Luixhi Kiapero dhe Emiliana Olivieri kanë përfituar nga kjo rrethanë, për të pohuar se vlerat e gjakut, të marra në mënyrë të veçuar, s'janë të mjaftueshme për të zbuluar përdorimin e eritropoietinës, ndryshe nga ç'kishin bërë të ditur gjykatësit, të cilët e kanë dënuar për këtë arsye shefin e stafit mjekësor bardhezi, Rikardo Agrikola.

"Në planin shkencor, - shkruhej, ? parametrat e gjakut nuk japin atë qartësi që, po ta kalojmë nga fusha sportive në atë penale, do të thotë mungesë provash." Nuk ka si të shpjegohet ndryshe, - thoshte teza, - fakti që fedarata ka përfshirë edhe testin e urinës. Prokurori i shtuar, Rafaele Guarinielo, në bazë të asaj që kanë verifikuar këshilltarët e tij, nuk e kundërshton vlefshmërinë e metodës gjak?urinë, por mënyrën se si është përdorur ajo.

Epruvetat nuk janë vendosur asnjëherë në ngrirje, kështu që kërkimi i gjurmëve të eritropoietinës ka qenë i kotë. Madje edhe teknikët e laboratorit antidoping të "Acqua Acetosa"-s kanë arritur në përfundimin se për 30% të provëzave, diagnoza ka qenë "e patregueshme". Pra, me fjalë të tjera, nuk mund të hipotezohej as pozitiviteti dhe as negativiteti.

[Davius]

Deshamp: Kupa, çlirim për ne

Monako ka arritur të kualifikohet për në gjysmëfinalen e Kupës së Francës, falë një goli në konën shtesë të Sulejman Kamarës, i cili i dha fitoren 1-0 ekipit të tij ndaj Klermontit, i cili luan në kategorinë e dytë franceze. Kjo fitore ishte mjaft e rëndësishme për ekipin e Monakosë, i cili është jashtë luftës për titull dhe është eliminuar edhe nga Liga e Kampioneve. Ekipi i drejtuar nga Didië Deshamp shfaqi lodhjen e këtij fundsezoni dhe iu desh të priste minutën e 105-të për të arritur kualifikimin për në gjysmëfinale.

Kamara, i cili zëvendësoi Jaroslav Plasilin, shfrytëzoi mirë një kros të mesfushorit Lukas Bernardi dhe shënoi golin e fitores për ekipin e tij. Ekipi i Klermontit, i cili kishte eliminuar Lionin në fazën e mëparshme, pati rastin ta fitonte takimin në minutën e 79-të, por sulmuesi Stefan Samson humbi një rast të shkëlqyer për të shënuar me portën e boshatisur. Pas ndeshjes, trajneri Deshamp deklaroi: "Fitorja është një çlirim i madh për ne, pasi kupa është i vetmi trofe i arritshëm për këtë sezon. Në këtë ndeshje kishim gjithçka për të humbur.

Klermonti luajti ndeshjen e tij të vitit dhe në përfundim të kohës së rregullt mendoja se do ta humbnim takimin. Ndihem i kënaqur për kualifikimin dhe mendoj se luajtëm mirë për 120 minuta. Kemi akoma disa ndeshje në kampionat, të cilat duhet t'i fitojmë nëse duam të fitojmë një vend në Champions." Klermonti ishte shumë afër realizimit të një ëndrre, por nuk mundi të fitonte dhe për trajnerin Olivier Shevanon, kualifikimi do të kishte qenë i merituar. "Humbëm, sepse nuk arritëm të shfrytëzonim shumë raste. Kur eliminohesh në këtë mënyrë, të vjen vërtet keq."

[Davius]

Çelsi, gati padia për Mutunë

Çelsi ka marrë leje nga drejtuesit e Premier Ligës dhe mund ta hedhë në gjyqin e FIFA-s Adrian Mutunë, duke i kërkuar dëmshpërblime për prishjen e një anshme të kontratës. Çelsi e kishte përjashtuar nga skuadra sulmuesin 26-vjeçar rumun, pasi ky i fundit kishte rezultuar pozitiv në disa analiza antidoping, për përdorim kokaine. Mutu më pas nënshkroi një marrëveshje, në bazë të së cilës do të luajë me Juventusin sezonin e ardhshëm dhe kjo iu duk e padrejtë drejtuesve të Çelsit, të cilët do ta hedhin çështjen në gjykatë. Klark:

Nuk na intereson Ferdinand Trajneri i dytë i Çelsit, krahu i djathtë i Mourinjos, Stiv Klark, ka deklaruar në lidhje me zërat që qarkullojnë prej disa ditësh në Angli, për një transferim të Ferdinandit te Çelsi: "Ne kemi katër nga qendërmbrojtësit më të mirë në botë, Galas, Terri, Karvalho dhe Huth, një i pestë nuk na duhet. Nuk e kuptoj përse njerëzit vazhdojnë të besojnë tek absurditetet që shkruhen në shtyp. Ne nuk jemi takuar asnjëherë me Ferdinandin apo menaxherët e tij."

[Davius]

Venger: Çelsi e meriton titullin

Trajneri i ekipit të Arsenalit, Arsen Vengeri, ka deklaruar pas ndeshjes së "Stemford Brixhit", se Çelsi e meriton titullin kampion në këtë sezon. Ekipi i Arsenalit nuk mundi ta ngushtonte diferencën e 11-të pikëve, pasi nuk mundi të merrte më shumë se një barazim ndaj ekipit të drejtuar nga Hoze Mourinjo. Shpresat e Vengerit për të fituar titullin, u shuajtën në mbrëmjen e së mërkurës, ku Arsenali barazoi 0-0 ndaj Çelsit, të cilit i duhen vetëm dy fitore për t'u shpallur kampion i Anglisë, për herë të parë në 50 vitet e fundit. Një fitore ndaj Fulhamit të shtunën dhe një gafë e Arsenalit ndaj Totenhemit, do t'i jepte sigurinë matematikore ekipit të Çelsit.

Pas ndeshjes në Londër, trajneri Venger u shpreh: "Çelsi e meriton plotësisht titullin, pasi ka qenë i vazhdueshëm në rezultatet e tij. Kjo është gjëja më e vështirë për t'u arritur në Premier Ligë. E përgëzoj klubin e Abramoviçit, për atë që ka arritur gjatë këtij sezoni. Fakti që barazuam para dy ditësh ndaj tyre, do të thotë që janë kampionët e rinj të Anglisë. Do të duhej një mrekulli që ne të shpalleshim kampionë. Kemi dëshirë t'i fitojmë të gjitha ndeshjet e mbetura, por e dimë mirë që këtë vit nuk do të shpallemi kampionë. Këtë e dinim që para se të fillonte takimi, por për ne ishte e rëndësishme të shpresonim deri në fund." Ndeshja ishte e bukur, edhe pse nuk u shënua asnjë gol dhe ekipet dukeshin të kënaqura me këtë rezultat. Vengeri u shpreh mjaft i kënaqur me paraqitjen e ekipit të tij:

[Davius]

Kapelo, polemika me "Mançion"

Pas ndeshjes Juventus-Inter shkëmbehen opinionet mes Roberto Mançinit dhe Fabio Kapelos. Komentimi i ndeshjes nga tekniku zikaltër (ku thuhet se të vetmet raste të bardhezinjve, kanë pasur ideator Ibrahimoviçin) nuk i ka pëlqyer aspak trajnerit të Juves, që do të shprehej: "Do të më falni, por them se ka qenë Toldoja një nga më të mirët në fushë, kurse ne kemi krijuar më shumë raste goli se ata. Juvja e luajti ndeshjen e saj, ndërsa Interi ka luajtur mirë vetëm në pjesën e parë".

Mançini do të shprehej kështu: "Interi ka bërë lojë më të mirë në pjesën e parë, ku pësuam dhe një traversë, kur Kordoba ishte jashtë lojës, për shkak të një dëmtimi. Në pjesën e dytë, Juventusi sulmoi më shumë, sepse i duhej të ndryshonte rezultatin. Por ai që na bëri të vuanim me të vërtetë shumë, ka qenë vetëm Ibrahimoviçi, i fortë po ta shohësh nga aftësitë e tij fiziko-teknike". Ky pra ka qenë komenti i Roberto Mançinit, në intervistën e dhënë për mikrofonët e RAI-t, që e ka "tërbuar" së tepërmi Fabio Kapelon. Tekniku i bardhezinjve dëgjon komentin e bërë nga kolegu i tij dhe reagon: "Do të më falni, por ishte Toldoja ai që ka shkëlqyer gjatë gjithë ndeshjes, kemi krijuar më shumë raste për gol, madje më shumë se ata. Juventusi e luajti ndeshjen e tij, kurse Interi ka luajtur mirë vetëm në pjesën e parë. Kemi qenë të pafatë, nuk e meritonim të humbisnim.

E luajtëm mirë lojën, duke treguar se jemi në një formë të mirë dhe vetëm rezultati ka qenë negativ. Toldoja ka pritur topa të vështirë, ndërsa Bufoni s'e ka bërë një gjë të tillë. Interi e ka zotëruar mjaft mirë lojën në pjesën e parë, por më pas i humbi dëshira për të sulmuar dhe për të shënuar drejt portës sonë". Mançini, që u largua nga vendi ku bëhej intervista, tani për tani nuk e ka mundësinë që të përgjigjet, por ekziston mundësia që ky debat i vogël s'mund të mbarojë me kaq.