Gazeta Elektronike: "Futbolli Ndërkombtar"

[Davius]

Ouen Hargrivs, nga hiçi në hero

Të shtunën po shfaqej barazimi i dytë 0-0 për Bajernin në këtë sezon, por kjo nuk u realizua falë golit që u shënua në minutën e 90-të. Sanjol krosoi topin e fundit drejt zonës dhe Lusio e shtroi topin për Klaudio Pizarron, i cili po luftonte me mbrojtësin Mertesaker për të zënë pozicionin. Topi u kalon dhe do të jetë Ouen Hargrivs që arriti në kohë dhe shënon.

24-vjeçari bëri disa hapa, derisa arriti ta dërgonte topin në krahun e djathtë të portës së Hanoverit. Ky gol arriti në çastet e fundit, përpara se gjyqtari të vërshëllente për përfundimin e takimit, duke konfirmuar lojtarin e kombëtares angleze si fituesin dhe heroin e ndeshjes. Fitorja e ngushtë e Bajernit, e kombinuar me humbjet e Shtutgartit dhe Shalkes, i lejon bavarezët që të kenë njërën dorë te tofeu. Gjërat ishin krejt ndryshe para disa ditësh për Hargrivsin, pasi ishte lënë jashtë takimit të së martës dhe disi në dyshime dhe nga trajneri Sven Goran Erikson.

Trajneri i Bajernit, Feliks Magat, nuk shikonte ndonjë rol specifik atë mbrëmje të Ligës së Kampioneve. Është e paimagjinueshme se çfarë do të ketë ndjerë anglezi në atë moment dhe, me sa duket, këtë mllef ai e shprehu me atë goditje prej 116 kilometrash në orë drejt portës së Hanoverit, duke bërë mrekullinë e bavarezëve.

"Jam i kënaqur që fituam dhe për atë gol vendimtar që shënova," - tha Hargrivsi. Magati e ka çmuar anglezin për atë reagim pozitiv. "I mrekullueshëm. Këtë gjë dua ta shikoj edhe nga të tjerët," - tha ai. Hargrivsi ishte ai që shmangu ndonjë dramë që mund të ndodhte në Honover. Reagimi i tij të shtunën kishte vlerën e tri pikëve dhe rëndësia tyre do të shikohet në mesin e muajit maj

[Davius]

Çelsi "prenoton" Mourinjon për një dekadë

Klubi londinez i Çelsit po planifikon ta mbajë për një dekadë trajnerin Mourinjo në "Stemford Brixh". Para pak kohësh, Mourinjo firmosi një kontratë 5-vjeçare me klubin, me një vlerë prej 5 milionë dollarësh në vit. Drejtuesi ekzekutiv, Piter Kenion, po planifikon një kontratë të re 10-vjeçare për portugezin, pas rezultateve të shkëlqyeshme të arritura nga ekipi i Çelsit. Edhe Mourinjo është mjaft i kënaqur me klubin, duke parë dhe mbështetjen e këtij të fundit pas pezullimit dyjavor të marrë nga UEFA.

Pas kualifikimit për në gjysmëfinalet e Championsit, Kenioni u shpreh i gatshëm për ta mbajtur Mourinjon në Londër deri në 2014-n. "Nuk ka arsye pse mos ta mbajmë Mourinjon edhe për 10 vitet e ardhshme. Ekipet si Arsenali dhe Mançesteri kanë pasur mjaft sukses me dy trajnerët e tyre, të cilët kanë vite që drejtojnë aty. Hoze është vetëm 41 vjeç dhe unë kam besim se do të jetë trajneri ynë edhe për shumë vite në vijim. Te Çelsi ka pasur një ndryshim të madh që nga ardhja e tij," - deklaroi Kenioni.

[Davius]

Luksemburgo: Edhe Reali skuadër cinike

Reali i Madridit ka fituar 2-0 ndaj Levantes, por nuk ka arritur t'i afrohet Barcelonës kryesuese, e cila mposhti Getafen. Një ditë pas ndeshjeve, trajneri i "galaktikëve", Vanderlei Luksemburgo, dha këtë intervistë: - Si e vlerësoni fitoren e arritur në Levante? - Si një fitore shumë të rëndësishme në këtë moment të kampionatit. Ne jemi të detyruar të fitojmë gjithçka dhe nëse nuk do t'ia dalim mbanë, do të ushtrojmë deri në fund presion ndaj Barcelonës. Kjo është detyra e fundit që na ka mbetur për këtë sezon. - Si u duk Levantja e Shusterit? - Eshtë një ekip që punon shumë.

Në 20 minutat e para kishin kontrollin e lojës dhe sulmonin mirë nga krahët. Kjo ishte edhe arsyeja për të cilën vendosëm që në çastet e para të ndeshjes, të përdornim kundërsulmin. - Mund të luajë Reali me kundërsulm? - Përpara se të shënonte Ronaldo, ndeshja ishte e ekuilibruar dhe duke parë shpejtësinë e sulmuesve tanë, kundërsulmi ishte një armë shumë e vlefshme. Jeni mësuar duke parë një Real që mban kontrollin e lojës, por në Levante treguam se jemi të rrezikshëm dhe mund ta fitojmë ndeshjen duke u bazuar te kundërsulmi. - Kasiljas, më i miri në fushë... - Nuk e kuptoj ku qëndron problemi. Skuadra ka 11 futbollistë. Ronaldo shënon, Kasiljas pret. Kur secili futbollist e bën siç duhet detyrën e tij, Reali fiton. - Në fund, a ju duket e merituar fitorja në Levante? - Po, sepse u treguam të saktë në rastet që na u paraqitën. Me sa duhet, tani edhe ne jemi shndërruar në një skuadër cinike që shënon dy nga tri goditje në kuadrat.

[Davius]

Shevçenko: Nuk heqim dorë nga titulli



Milani dje u rizgjua i mundur dhe pa kryesimin në renditje. Një makth edhe për Andrij Shevçenkon, i cili gjithsesi kishte arritur ta shënonte një gol. Për të dhe për natën e tij pa gjumë është diçka edhe më e rëndë. Një gabim i pafalshëm i gjyqtarit, kur mungojnë shtatë ndeshje nga përfundimi i kampionatit. "U shtriva të flija në orën 06.00 dhe në ato pak orë nuk arrita as të çlodhesha mirë". Por ekziston përshtypja se fati shumë i celebruar i Milanit ka përfunduar. "Besoj se po, - bëri shaka ukrainasi, ? sepse humbëm një ndeshje, të cilën me siguri nuk duhej ta kishim humbur." Një "shuplakë", e cila duhet harruar sa më parë, por a do të jetë më e rëndësishme që të reagohet në planin psikologjik apo në atë fizik?

"Që të dyja gjërat janë të rëndësishme, por nuk besoj se Milani ka pasur një rënie fizike. Mund të ndodhë që të shkaktohet ndonjë gabim dhe kjo mund të mos u ndodhë vetëm lojtarëve..." Fjala është e gjitha për gabimin e treshes së gjyqtarëve, lidhur me golin që iu anulua pikërisht Shevçenkos në pjesën e parë. "Topi i artë" buzëqesh: "As që e mora mundimin t'i shihja filmimet, sepse isha i sigurt që në fushë se goli ishte mëse i rregullt. Në pushimin e pjesës së parë ma konfirmuan këtë gjë. Ne me siguri shkaktuam disa gabime shpërqendrimi, por edhe gjyqtarët duhet të tregohen më të kujdesshëm, sepse gjykimi i gabuar që bënë në rastin e golit tim, mund të na kushtojë shtrenjtë. Nuk dua të bëj polemika, them vetëm se më vjen keq, do të kishte qenë më mirë sikur gjithçka të kishte shkuar "vaj".

Gjëja e mirë është se na pret menjëherë një ndeshje tjetër, kështu që mund të harrojmë gjithçka sa më parë. Po ta mposhtim Kievon, natyrisht". A ju tremb fakti që Juvja tani ndodhet sipër jush? "S'ka asgjë të keqe, dikush duhet të ndjekë dhe dikush qëndron përpara. Ky është ligji i sportit, por në fund do të shihet. Kampionati është ende brenda mundësive tona, e rëndësishme do të jetë që tani e tutje ta luajmë çdo ndeshje si të ishte një finale." Championsin Milanit, kampionatin Juves, a mund të ndodhë edhe kështu? "Unë s'kam dëgjuar kurrë deri më sot një lojtar apo një drejtues të Milanit që ta thotë këtë gjë. Dhe besoj se e njëjta gjë vlen edhe për Juven. Të shohim se deri ku mund të shkojmë duke luajtur sa më mirë të jetë e mundur në të gjitha ndeshjet, që tani e deri në fund, sepse mund të synojmë edhe t'i fitojmë të dy trofetë."

Ndërkohë, nesër Juvja luan kundër Interit... "Është e vërtetë, por unë mendoj vetëm për Milanin, për ndeshjet tona dhe për atë çfarë mund të përmirësojmë. Për fat të keq kemi lënë goxha pikë ndaj skuadrave më pak të forta. Ajo mes Juves dhe Interit është padyshim një ndeshje e rëndësishme, shpresoj të jetë një spektakël i bukur, por besoj se ne s'duhet të bëjmë tifo për askënd. Mund ta arrijmë gjithsesi Juventusin, në javën e ardhshme apo në javët e tjera të mbetura. Kemi edhe ndeshjen direkte në fushën tonë. Nëse më pas ata do t'i fitojnë të gjitha ndeshjet, kjo do të thotë se kanë qenë më të fortë. Milani duhet të mendojë vetëm të fitojë ndeshjet e veta". Duke nisur nga Kievo, një tjetër ekip "i vogël". "Ndaj ekipeve të vogla hasim vështirësi, e kemi më të vështirë të krijojmë lojë, sepse mbrohen shumë. Në këtë aspekt duhet të përmirësohemi medoemos. Është e pafalshme që ndaj Sienës, takimi na rrëshkiti nga duart pasi kaluan edhe në avantazh..."

[Davius]

Venger: Suksesi i Çelsit, i përkohshëm

Trajneri Arsen Venger ka besim se Arsenali do t'i japë fund dominimit të Çelsit në këtë kampionat. Arsenali do të ndeshet nesër ndaj ekipit të Çelsit në "Stemford Brixh" dhe do të kërkojë të ndalë ekipin e drejtuar nga Hoze Mourinjo, i cili është 11 pikë para "topçinjve", të cilët vjet u shpallën kampionë pa pësuar asnjë humbje gjatë të gjithë kampionatit. Ekipi i drejtuar nga Vengeri arriti të siguronte finalen e Kupës së Anglisë, pasi fitoi të shtunën ndaj ekipit të Blekbërnit, me rezultatin 3-0.

Tekniku francez u shpreh optimist për ndeshjen dhe deklaroi se suksesi i Çelsit nuk do të vazhdonte gjithmonë. "Më duhet të pranoj se kur zhvillon një sezon të mirë, më pas çdo gjë bëhet akoma më e vështirë. Sido që të luash, anjëherë nuk është e mjaftueshme. Edhe ne na ndodhi kjo gjë në tetorin e kaluar kur humbëm në "Old Traford" ndaj Mançesterit, pas 49 ndeshjeve pa pësuar humbje. Arritëm në kulmin tonë, por vjen gjithmonë një moment që zbret me këmbë në tokë. Më pas duhet kohë që të rikthehesh në nivelin e mëparshëm," - deklaroi Vengeri. Aresenali nuk do të ketë të gatshëm sulmuesin e tij, francezin Tieri Henri, për shkak të dëmtimit që e la jashtë ndeshjes ndaj Blekbërnit.

[Davius]

Juventus buzëqesh, Del Piero jo!

Erion Abule


Te Juventusi që buzëqesh në vendin e parë të renditjes, ka edhe nga ata që nuk janë të kënaqur. Për shembull, Alesandro Del Piero kundër Leçes është zëvendësuar në minutën e 46-të të pjesës së dytë, por pas ndeshjes ka dalë nga "Dele Alpi" i nxirë në fytyrë, pa thënë asgjë, as për ndeshjen dhe as për zëvendësimin e tij të 25-të të sezonit në drejtimin e Kapelos. Vetëm shtatë herë, pesë në kampionat dhe dy në Ligën e Kampioneve, kapiteni bardhezi ka pasur kënaqësinë ta përfundojë një ndeshje. Fabio Kapelo, në fund të ndeshjes me Leçen, shpjegoi:

"E zëvendësova Del Pieron në pushim të ndeshjes, mbi bazën e vlerësimeve të bëra gjatë pjesës së parë. Unë kam një organikë dhe e vendos formacionin në bazë të asaj që kam. Ndonjëherë edhe mund të gaboj". Kjo e fundit mund të përkthehet edhe si një pendim mbi zgjedhjen e aktivizimit në fushë të "Pinturikios" që nga minuta e parë. Megjithatë, mbetet fakti që lojtarit, zëvendësimi i 17-të në kampionat, respektivisht kundër Breshias, Sampdorias, Palermos, Sienës, Romës, Fiorentinës, Leçes, Lacios, Bolonjës, Milanit, Parmës, Livornos, Kaljarit, Udinezes, Romës dhe Kievos, nuk i ka pëlqyer.

Në shumicën e rasteve ka ulur kokën dhe nuk e ka parë fare në sy Kapelon, nuk është parë as t'i shtrëngojë dorën, siç ndodh zakonisht në raste të tilla mes lojtarit e trajnerit. 15 golat e shënuar (12 në kampionat dhe 3 në Ligën e Kampioneve), nuk kanë mjaftuar për ta bërë për vete "Don Fabion", që gjithsesi i ka dhënë besimin e tij, duke e aktivizuar 32 herë si titullar. Edhe Luçiano Moxhi mbështet zgjedhjet e trajnerit juventin: "Është e qartë që Del Piero është zhgënjyer, por edhe qëndrimi në fushë apo jashtë saj është pjesë e futbollit. E dimë që është një kampion dhe duket nga golat që ka shënuar këtë vit. Është një lojtar që nuk diskutohet, por kur s'luan mirë, është e drejtë që të zëvendësohet dhe nuk duhet të ndiejë keqardhje".

Moxhi: Falënderoj Moratin, por s'largohem Nesër, me rastin e javës së 32-të të Serisë A, Juvja kryesuese do të presë në "Dele Alpi" Interin, në atë që cilësohet si "Derbi i Italisë". Luçiano Moxhi po mendon për sfidën kundër asaj, që nga shumë shihet si skuadra e tij e mundshme në të ardhmen: "Të gëzon fakti kur dëgjon që dikush mendon për mua, - tha drejtori i përgjithshëm bardhezi. - Duket që puna ime çmohet. Por unë ritheksoj atë që kam thënë edhe në të shkuarën: te Juvja jam mirë dhe nuk shoh motiv për t'u larguar, edhe pse kam respekt për padronin zikaltër Masimo Morati".

[Davius]

Nedved: Titullin, për të harruar Championsin

Fitorja kundër Leçes dhe rikthimi te goli nuk ia kanë fshirë nga mendja skualifikimin nga Liverpuli në Ligën e Kampioneve, Pavel Nedvedit. "Vetëm titulli mund të më bëjë të harroj zhgënjimin e skualifikimit nga Europa, - thotë çeku. - Dëmtimi? Nëse do të isha ende keq dhe do të vuaja, do të hiqja dorë së luajturi futboll, por nëse do të ndihem mirë fizikisht, do të rifilloja të luftoja".

Për të, Liga e Kampioneve është një farë mallkimi. Më 2003-shin, kur Juventusi doli në finale me Milanin në Mançester, ai u detyrua ta shikonte ndeshjen nga tribuna, për shkak të kartonit të verdhë që kishte marrë në gjysmëfinale kundër Realit të Madridit në "Dele Alpi". Më 2004-n, Juvja u skualifikua nga Deportivo La Korunja dhe tani dështimi me Liverpulin, pavarësisht se çeku bëri të pamundurën për të qenë i gatshëm për sfidën e dyfishtë me anglezët.

"Nuk arrij ta harroj dot skualifikimin, - shpjegon mesfushori juventin. - Gjithnjë e kam në mendje ndeshjen me Liverpulin. E kam riparë atë ndeshje në shtëpi tri herë në televizor i vetëm. Më mundon shumë mungesa e fitores". Një gjysmë ide për ta braktisur futbollin e ka pasur, por objektivi për të fituar një Ligë Kampionesh para se të varë "këpucët në gozhdë", është i qartë: "Dëshirën për të luajtur e kam ende, - komenton Nedvedi,

- do të vazhdoj sigurisht derisa shëndeti të ma lejojë. Kontrata ime skadon më 2006-n, shpresoj t'ia arrij. Nuk e di nëse tani Juvja do të ma rinovojë kontratën, por dëshira për të fituar Ligën e Kampioneve, më ka dhënë forcë për të shkuar përpara. Kur isha në spital, pasi kisha parë shokët e mi që kishin fituar ndaj Realit, e kuptova që duhej të ngrihesha me shpejtësi për të dhënë ndihmën time, të paktën në fazën finale të kampionatit. A do të jetë për sezonin tjetër? Nuk e di, nuk jam largpamës, do të përqendrohem në çdo ndeshje".

Përsa u përket kuqezinjve, çeku lëshon sfidën për titull: "Pavarësisht nga tri pikët ndaj Milanit, nuk jam i kënaqur, - vazhdon numri 18 bardhezi. - Tani kemi Interin dhe Lacion, dy sfida të rëndësishme që mund të jenë vendimtare ende para duelit direkt me kuqezinjtë më 8 maj. Milani ndoshta është më i bukur për t'u parë, por ne nuk dorëzohemi asnjëherë. Çfarë ka më shumë se ne? Nuk e di, por tani ka tri pikë më pak".

Mbi gjendjen e tij fizike, Nedvedi nuk zhbilancohet: "Po ndodh që nga fillimi i vitit, që mes një dëmtimi dhe një tjetri, jam gjithnjë me vonesë në përgatitje. Megjithatë, tani jam kthyer dhe shpresoj të jap ndihmën time për titullin, e vetmja gjë që mund të më ripaguajë zhgënjimin për Championsin. A jam i lumtur? Duhet të buzëqeshim vetëm në fund. Pas golit të së dielës, rigjeta disi optimizëm"

[Davius]

Mourinjo: Ta sigurojmë titullin

Trajneri i Çelsit, Hoze Mourinjo, u shpreh i zhgënjyer nga mungesa e besimit e treguar nga komisarët e UEFA-s, gjatë ndeshjes çerekfinale të Ligës së Kampioneve, ku Çelsi triumfoi ndaj Bajernit. Mourinjo u pezullua për dy javë nga stoli, pas çështjes "Frisk" dhe e kishte të ndaluar çdo lloj komunikimi me stolin e tij gjatë dy ndeshjeve të luajtura ndaj Bajernit. Në përfundim të ndeshjes në Gjermani, zëvendëstrajnerit Rui Faria iu kërkua të hiqte kapelen, për të provuar se nuk kishte ndonjë mjet komunikimi me Mourinjon. Dje, në një intervistë të dhënë për një televizion portugez, Mourinjo u shpreh:

"Nuk kam asgjë me UEFA-n, por ajo që ndodhi në Mynih, ishte një veprim qesharak, i bazuar në një lajm të rremë." Gjatë ndeshjes, zëvendëstrajneri Faria mbante në duar disa shënime, të cilat ia kalonte vazhdimisht kolegëve të tij. "Shënimet që qarkullonin në stol ishin ato që kishim përgatitur para ndeshjes. Asistentët ishin të organizuar dhe të përgatitur. Ata komunikuan vetëm ndërmjet tyre dhe jo me mua," - deklaroi Mourinjo.

Gjatë pjesës më të madhe të emisionit, Mourinjo foli në përgjithësi për futbollin portugez. Ai deklaroi se e kishte ndjekur takimin e parë ndaj Bajernit, jashtë "Stemford Brixhit", kurse në Gjermani e ndoqi nga dhoma e hotelit të tij. Mourinjo pohoi se nuk kishte pasur asnjë kontakt me stafin e tij: "Nuk shkela asnjë rregullore të UEFA-s: "E respektova pezullimin dyjavor, edhe pse, sipas mendimit tim, ishte një vendim i padrejtë." Trajneri portugez i ka evituar daljet në publik, që nga polemikat në Barcelonë, të cilat u interpretuan në mënyra të ndryshme nga media angleze.

Në Portugali, Mourinjo është mjaft i famshëm dhe inervistat e tij ndiqen rregullisht nga publiku. Fotografitë e tij shihen kudo dhe është një nga figurat e para kryesore në programet e ndryshme televizive. Mourinjo e çoi Porton në fitimin e Ligës së Kampioneve vitin e kaluar dhe shpreson ta përsërisë këtë me ekipin e Çelsit, i cili do të ndeshet në gjysmëfinale me ekipin e Liverpulit, në javën e ardhshme. Gjithashtu, Çelsi ka vënë një dorë mbi tiutllin kampion të Anglisë, për herë të parë pas 50 vitesh, dhe ndodhet 11 pikë para Arsenalit të vendit të dytë.

Megjithatë, për Mourinjon nuk është akoma momenti për të festuar. Sipas tij, në Champions do të jetë mjaft e vështirë kualifikimi për në finalen e Stambollit. "Do të doja të shpalleshim kampionë sa më shpejt, që t'i jepja disa ditë pushim lojtarëve. Së shpejti do të luhet gjysmëfinalja dhe ata kanë luajtur 54 ndeshje në katër kompeticione," - përfundoi Mourinjo.

[Davius]

Mançini: Milani mund ta kapë Juven

Për Interin, nëse ndal Juven, do të thotë që t'i bëjë pa dashje një nder Milanit. "Besoj se Milani mund t'i rikuperojë tri pikë disavantazh në shtatë ndeshje, - shpjegoi Mançini. - Do të jenë shtatë ndeshje të vështira për të gjithë dhe këtë e dëshmon takimi Siena?Milan. Sigurisht, ndeshja e sotme do të jetë e rëndësishme, por ndoshta jo vendimtare.

Gjithsesi, mendoj se për Juven dhe Milanin çdo ndeshje do të jetë thelbësore deri në fund të kampionatit." Si vëzhgues, Mançini e sheh lehtësisht të favorizuar Milanin në sfidën për titull. Kuqezinjtë, sipas tij, janë më lart në nivelin teknik: "Milani është skuadra më e mirë në nivelin teknik, por Juventusi është një skuadër me karakter të madh, që e ka trashëguar nga fitoret dhe koha. Nganjëherë arrin edhe të fitojë vetëm për këtë arsye. Milani teknikisht është më lart si skuadër dhe si lojtarë, por gjithsesi nuk kanë shumë diferencë.

" Mançini nuk i ka zgjidhur ende dyshimet lidhur me formacionin që do të hedhë në fushë ndaj Juves. Vështirë se Vieri do të aktivizohet që nga minuta e parë: "Ai mund të mos jetë i gatshëm për të luajtur 90 minuta, pasi s'është në gjendje për ta bërë këtë. Natyrisht, mund edhe të hyjë në fushë, por është diçka e pamohueshme se ai s'po kalon një formë të mirë." Gjithashtu, edhe mungesa e Adrianos është diçka e sigurt. Braziliani u dëmtua sërish në derbin e Ligës së Kampioneve ndaj Milanit.

Por Mançini, në atë rast, s'kishte si të hiqte dorë nga ai: "Po të mos e kishim aktivizuar Adrianon në derbin e kthimit, ? shpjegoi ai, ? për faktin se nuk gëzonte formën më të mirë, sot do të thoshim të gjithë se humbëm, pasi nuk patëm guximin ta rrezikonim. Nganjëherë, një lojtar e ka për detyrë të sakrifikojë, në futboll mund të ndodhë që të dëmtohesh sërish, sapo rikthehesh në fushë.

Por problemi që ai pati në shpinë, s'kishte aspak lidhje me dëmtimin e mëparshëm, besoj se nuk bëmë gabim që e aktivizuam". Edhe Stankoviçi e Emreja nuk gëzojnë formën më të mirë: "Mund të kesh gjithnjë ndonjë problem të vogël kur kthehesh pas dëmtimit, s'mund të jesh menjëherë në kulmin e formës. Të shohim si do të ndihen, - përfundoi Mançini, - por nëse do t'i grumbullojmë, me siguri s'do të luajnë që nga minuta e parë."

[Davius]

Kasiljas: Kam ende për t'u përmirësuar

Iker Kasiljas po kalon një nga momentet më të mira të karrierës së tij. Pavarësisht nga sezoni jo i mirë i Realit të Madridit, për ironi të fatit, numri 1 i "merengesëve" ka zhvilluar një sezon për t'u mbajtur mend. Deri aty, sa ka filluar të flitet se është portieri më i mirë i planetit. Në lidhje me këtë, vetë Kasiljasi mendon: "Ka shumë portierë të mirë në botë. Bufon, Dida, Çeh dhe Kahn janë disa prej tyre. Më vjen mirë që më krahasojnë me ta, sepse janë me të vërtetë portierë të mëdhenj.

Kam ende për t'u përmirësuar, sepse besoj se vetëm në moshën 28-vjeçare një portier mund të konsiderohet i kompletuar." Më pas, kur i duhet të shpjegojë se nga ka ndryshuar Kasiljasi aktual nga ai i kampionatit të kaluar, spanjolli thotë: "Kam ndryshuar shumë. Kjo është mosha. Vit pas viti mësoj sekrete të tjera dhe ndihem më i sigurtë në fushën e lojës. Kam më eksperiencë në situata delikate gjatë një ndeshjeje, të cilat zgjidhen vetëm nga një portier i aftë." Në fund, portieri i kombëtares spanjolle tregon se beson ende te fitimi i titullit kampion nga Reali: "Po besoj se mund ta fitojmë kampionatin. Fitorja e Barcelonës ndaj Getafes nuk na e ka zbehur besimin."