Gazeta Elektronike: "Futbolli Ndërkombtar"

[Davius]

Luksemburgo: Kjo skuadër nuk preket


"Nuk do të ndryshoj asgjë, kjo skuadër nuk preket." Ky ka qenë thelbi i intervistës së lëshuar nga trajneri i Realit të Madridit, Vanderlei Luksemburgo, në prag të derbit të sotëm ndaj Atletikos. Braziliani beson te ky Real dhe është i bindur se ndeshjet e fundit janë baza ku do të ndërtohen projektet e reja të klubit "merenges". Ja cila ka qenë intervista e Luksemburgos:
- Do të luajë Zidan në derbi?
- Po. Francezi ndihet më mirë dhe do ta fillojë ndeshjen nga minuta e parë.
- Mund të thuhet se me dy skuadra pa pretendime, derbi i Madridit ka humbur bukurinë e tij?
- Nuk mendoj kështu. Ne kërkojmë tri pikë shumë të rëndësishme, sepse e kemi si detyrë të grumbullojmë sa më shumë pikë të jetë e mundur, deri në fund. Mos harroni që është një ndeshje klasike dhe gjithçka mund të ndodhë.
- Si ju duket fakti se të gjithë futbollistët kanë kërkuar që të jeni ju trajneri i skuadrës sezonin e ardhshëm?
- Në aspektin profesional më vjen mirë të shoh se e gjithë skuadra përkrah idetë e mia. Jam i kënaqur me marrëdhëniet që kam pasur në Madrid, që në ditën e parë. Futbollistët kanë kuptuar mesazhet e mia dhe tani po përgjigjen. Kjo është parë edhe në dhjetë ndeshjet e fundit që kemi zhvilluar.
- Pra, do të jeni ju trajneri i Realit sezonin e ardhshëm...
- E gjithë bota ma bën këtë pyetje. Lexoj se në vendin tim do të vijë Kapelo, por për momentin jam unë trajner i "merengesëve" dhe kam edhe një vit kontratë për të respektuar.
- Robinjo dhe Adriano janë dy nga objektivat e një Reali gjithnjë e më shumë brazilian...
- Flitet shumë për merkato. Sigurisht, ne do të bëjmë lëvizjet tona për të mirën e skuadrës dhe nuk do të kushtëzohemi nga fakti nëse janë apo jo brazilianë.
- Pra, të presim një merkato të zjarrtë madrilene...
- Jo. Ne do të marrim disa përforcime dhe largimet do të jenë në minimum. Kjo skuadër më pëlqen mua, i pëlqen stafit drejtues dhe nuk do të preket.
- Oueni do të qëndrojë?
- Kampionatin e ardhshëm do të luajë me ne. Unë jam i kënaqur me të gjithë futbollistët që kam në dispozicion.
- Ç'mendim keni për Fernando Torresin?
- Shpresoj që sot të mos shënojë. Eshtë një futbollist i ri, me të ardhme të sigurtë përpara, por luan me Atletikon dhe është kundërshtari ynë.
- Në fund, çfarë kujtimesh keni nga derbi i fazës së parë. Ishte derbi juaj i parë në Madrid...
- Kam kujtime të bukura. Ishte një ndeshje, në të cilën fituam 3-0 në "Visente Kalderon", por Kasiljas ishte më i miri në fushë. Ka evituar tre apo katër gola të sigurtë për Atletikon. Ishte një fitore me shpirt nëpër dhëmbë, por në fund të fundit këto ndeshje mbahen mend më mirë edhe nga njerëzit

[Davius]

Mourinjo bën "tifo" për Mançesterin

Trajneri i ekipit të Çelsit, Hoze Mourinjo, ka deklaruar se do të dëshironte që Kupën e Anglisë, ta fitonte Mançesteri. Mourinjo u shpreh se do të kishte dëshirë që dy portugezët, Kristiano Ronaldo dhe Karlos Kueiroz, të dilnin fitimtarë ndaj ekipit të Arsenalit. Portugezi, i cili fitoi titullin në Premier Ligë, foli edhe për marrëdhëniet e tij me trajnerin e ekipit të Mançesterit, Sër Aleks Fergusonin. "E respektoj shumë si person, madje do të thosha që më pëlqen si njeri. Eshtë një person shumë korrekt. Prej tij kam filluar të mësoj shumë gjëra. Besoj se një trajner si ai e meriton këtë trofe. Eshtë normale që Vengeri nuk e pëlqen Çelsin e sotëm. As unë nuk e pëlqeja Arsenalin në fillim të sezonit, ku fitonin me të gjithë. Rashë në dashuri me ata, vetëm kur filluan të humbnin pikë në mes të sezonit, prandaj arrij ta kuptoj pse Vengeri nuk e pëlqen ekipin tonë," - përfundoi Mourinjo.

[Davius]

Parreira thërret Brazilin e yjeve

Trajneri i kombëtares braziliani ka grumbulluar Ronaldon në skuadrën kombëtare, që do të marrë pjesë në Kupën e Konfederatave, dhe e ka ftuar sulmuesin e Realit që t'i harrojë problemet personale të kohëve të fundit. Ronaldo është divorcuar nga bashkëshortja e tij, Daniela Çikareli, javën e kaluar, jo më larg se tre muaj pas dasmës madhështore në një kështjellë në periferi të Parisit. "Janë gjëra që ndodhin në jetën e çdo njeriu, - tha Parreria për gazetarët. - Tani ai do të qëndrojë rreth një muaj i grumbulluar me kombëtaren dhe do të luajë për eliminatoret e Kupës së Botës dhe në Kupën e Konfederatave. Kjo do ta ndihmojë Ronaldon. Mendoj se pas pushimeve, Roni do t'i ketë harruar krejtësisht problemet." Sulmuesi i Realit do të jetë titullar ndaj Paraguajit, më datë 5 qershor, dhe në derbin e Amerikës Latine, tri ditë më vonë, në Argjentinë. Për këto ndeshje, duke parë edhe Kupën e Konfederatave në mesin e muajit qershor, Parreira ka grumbulluar dy skuadra. Nuk mungojnë elementët e përbashkët, por ka edhe ndryshime. Brazili renditet në vendin e dytë në eliminatoret e zonës së Amerikës së Jugut, për botërorin Gjermani 2006, me 24 pikë pas 13 ndeshjesh. "Selesao" është katër pikë larg Argjentinës kryesuese. Katër vendet e para do të luajnë në botëror, ndërsa vendi i pestë do të luajë një ndeshje "play off"-i ndaj fitueses së zonës së Oqeanisë. Parreira ka deklaruar se për Brazilin, skuadra e vetme që ka marrë pjesë në të gjitha kampionatet botërore, ndeshjet e ardhshme ndaj Paraguajit dhe Argjentinës do të jenë vendimtare për të ardhmen e fazës eliminatore. Trajneri brazilian u shpreh: "Paraguaji është një skuadër e fortë dhe me eksperiencë në ndeshje të rëndësishme. Këto dy ndeshje do të jenë thelbësore për ecurinë tonë në fazën eliminatore. Kafu dhe Roberto Karlos do të përdoren vetëm për ndeshjet eliminatore, sepse në Kupën e Konfederatave, vendin e tyre do ta zënë futbollistët e rinj, Çiçinjo dhe Leo. Për Kupën e Konfederatave do të grumbullohet për herë të parë në kombëtare edhe portieri i PSV Eindhovenit, Gomesh. Ja lista e plotë e futbollistëve të grumbulluar nga Karlos Parreira:
Portier: Dida, Markos, Gomesh
Mbrojtës: Huan, Luçio, Rr.Zhunior, Luizao, Kafo, Leo, R.Karlos, Beleti, Xhilberto
Mesfushorë: Emerson, Xh.Silva, Zhuninjo, Ze Roberto, Kaka, Rikardinjo, Renato, Aleks
Sulmues: Ronaldo, Adriano, Robinjo, R.Oliveira, Ronaldinjo


Bekenbauer deklaroi se dënime si ai i pësuar nga Republika e Koresë do të minimizojnë huliganizmin në stadiume. Organizatori i botërorit Gjermania 2006 u shpreh: "Shtetet ku luhet futboll, duhet të jenë më të kujdesshme në ndeshjet që organizojnë. Vetëm me dënime dhe masa mund të ruajmë sigurinë e futbollistëve dhe njerëzve që merren me futboll."

Armenia ka bërë të ditur emrin e trajnerit të ri që do të drejtojë skuadrën kombëtare deri në fundin e eliminatoreve për kampionatin botëror. Ai do të jetë holandezi Uisman, 48-vjeçar, dhe do të zëvendësojë të shkarkuarin Kasoni. Uismani e merr këtë detyrë në prag të dy ndeshjeve delikate që Armenia do të luajë për grupin 1 ndaj Maqedonisë dhe Rumanisë.

Trajnerët e të gjitha skuadrave që do të fitojnë të drejtën për të luajtur në kampionatin botëror në Gjermani, do të takohen në Dysedorf nga data 6 deri më 8 mars 2006. Ky takim është kërkuar nga ministri i Brendshëm i Gjermanisë, Oto Shili, dhe në të do të flitet për masat e sigurisë dhe mënyrat e bashkëpunimit për një botëror me sa më pak episode dhune në fushë dhe jashtë saj.

[Davius]

Lipi: Pas kombëtares, një ekip bregdetar

Pas shumë vitesh, te Juventusi nuk mund të shkoj të drejtoj një tjetër skuadër kreu, do të më pëlqente të kisha një skuadër si Palermo, Napoli apo Sampdoria". Trajneri i kombëtares italiane, Marçelo Lipi, ka folur shkurtimisht për të ardhmen e tij: "Siç e shihni, të gjitha skuadrat që kam zgjedhur, u përkasin qyteteve që kanë det, sepse, sikurse e dini, një prej pasioneve të mia të mëdha janë varkat, anijet dhe mjetet e tjera të lundrimit".
Por e ardhmja e tij më e afërt është përfaqësuesja "axurre": "Më parë, - tha Lipi, - të kualifikohemi një herë në botëror. Hapi i mëpasëm duhet të jetë ai që të përpiqemi të përfaqësohemi sa më mirë në të. Më pas mund të mendoj sërish që të kthehem të drejtoj ndonjë skuadër klubesh." Lipi ka komentuar edhe këtë fazë të fundit të luftuar në kampionat: "Besoj se titulli mund të dorëzohet që këtë javë, sepse, nëse kishim nodnjë dyshim për skuadrën që do ta fitonte, besoj se pas fitores së Juventusit në "San Siro", sot këto dyshime kanë ardhur duke u shuar. Ndërkohë, mendoj se për vendin e katërt mund të zhvillohet edhe ndonjë ndeshje shtesë dhe besoj se kjo gjë do të jetë e pashmangshme edhe për të vendosur se kush do të bjerë dhe kush do të qëndrojë në kategori."
Marçelo Lipi, i ftuar në një mbledhje detare në portin e Shën Margaritës Ligure, përfitoi nga rasti për të përmendur disa nga kujtimet e tij si lojtar i Sampit, si dhe për të folur për aktualitetin e ekipit gjenovez: "Sampi, - tha ai, - është si një port i bukur dhe i rëndësishëm detar. Pronari ka ditur t'i zgjedhë shumë mirë bashkëpunëtorët e tij, duke nisur që nga trajneri. Besoj se kjo skuadër është surpriza e vitit."


Mançini: Finalja me Romën, e vështirë
Trajneri i Interit, Roberto Mançini, edhe pse të gjitha parashikimet janë në vafor të skuadrës së tij, është i ndërgjegjshëm se finalja e Kupës së Italisë ndaj Romës s'do të jetë një ndeshje e lehtë. "Të gjitha finalet janë ndeshje të veçanta, - tha ai. - Do të përballen dy ekipe shumë të forta. Roma ka pasur probleme gjatë vitit, por besoj se do t'i ketë zgjidhur kur të vijë në këto sfida. Kështu që do të jetë një sfidë shumë e vështirë. Roma ka një organikë shumë të fortë, e cila sivjet s'ka arritur të japë më të mirën e saj, - saktësoi ai, - por edhe Udinezja do të kishte qenë një pengesë e vështirë, pasi sivjet ka zhvilluar një kampionat madhështor."

Konti: Fitorja, moral në ndeshjet e mbetura
Më në fund ka mbërritur fitorja e Bruno Kontit në stolin e Romës: "Ndihem i kënaqur, sepse arritëm të fitonim ndaj një skuadre të madhe, - pohoi trajneri i verdhekuqve, - shpresojmë që ky sukses të na japë moral për ndeshjen e së dielës ndaj Atalantës".
Romës do t'i mungojë Françesko Toti: "E dimë atë që ka ndodhur, - përfundoi ai, - por duhet të shohim gjithsesi përpara dhe të përpiqemi të dalim nga kjo situatë."

Çështja "Mekses", gjobë 8 milionë euro Romës?
Sipas disa burimesh të besueshme, Dhoma e Zgjidhjeve të Kontradiktave pranë FIFA-s pritet ta detyrojë Romën t'i paguajë 8 milionë euro dëmshpërblim Okserrit, për çështjen "Mekses". Dhe në rast se kjo gjë do të konfirmohet, Roma rrezikon edhe të përjashtohet 3 vjet nga merkatoja ndërkombëtare. Por klubi verdhekuq ka përgënjeshtruar, duke pohuar se deri tani nuk ka marrë asnjë komunikim zyrtar nga FIFA, lidhur me këtë çështje. Roma ka përgënjeshtruar gjithashtu që të kenë ndërmarrë ndonjë bisedim për shitjen e Kristian Çivusë, lojtar që klubi verdhekuq e konsideron të domosdoshëm për skuadrën.

Udineze: Shumë adhurues për Pizarron
Një ditë pas eliminimit nga Kupa e Italisë, në kampin e Udinezes diskutohet për merkato. Një prej objektivave kryesore të dëshirës që ndodhet te bardhezinjtë, është David Pizarro. Lojtari kiljan, që i pëlqen Juves, Interit dhe Milanit, ndodhet në shënjestrën e Atletiko Madridit, sipas asaj që bënte të ditur e përditshmja spanjolle "Marca".

Spaleti: Të mendojmë për vendin e katërt
Trajneri i Udinezes, Luçiano Spaleti, ka qenë i zhgënjyer pas eliminimit të ekipit të tij nga Kupa e Italisë ndaj Romës. "U treguam naivë, duke i lënë shumë hapësira Romës, e cila diti të përfitonte." Pasi finalja e kupës nuk u bë realitet, trajneri tani përqendrohet te kampionati. "Tani duhet të mendojmë vetëm për vendin e katërt. Shkojmë në Kaljari për të marrë tripikëshin".

[Davius]

Adriano: Nuk e prisja lënien në stol

Adriano "shpërthen" sërish. Sulmuesit të Interit s'i ka ardhur aspak mirë për lënien jashtë në gjysmëfinalen e së mërkurës ndaj Kaljarit dhe prishjes së fytyrës pas ndeshjes tanimë i ka bashkangjitur edhe një koment veçanërisht kritik: "Isha përgatitur shumë për të luajtur në atë ndeshje, - ka deklaruar ai për agjencinë "DIRE", - dhe s'më erdhi mirë që qëndrova në stol, nuk e prisja. Gjithsesi, nuk kam folur ende me askënd për këtë".
Deklarata, të cilat në vetvete përmbajnë njëfarë pakënaqësie. Por në këtë pikë është klubi ai që duhet t'i sqarojë gjërat. Nuk është hera e parë që Adriano i kritikon zgjedhjet e trajnerit, kjo kishte ndodhur edhe në derbin e fundit në kampionat ndaj Milanit. Ndërkohë, shtypi spanjoll nuk ka asnjë dyshim: Real Madridi dhe Çelsi po i ndjekin zhvillimet e çështjes me interes. Liga do të ishte kampionati më i pëlqyeshëm për brazilianin, në rast divorci me klubin zikaltër, dhe tifozët e "merengesëve", të cilët kanë kohë që i kanë bërë "dalje" Ronaldos, do ta prisnin krahëhapur.
Ndërkaq, komisari teknik brazilian, Parreira, e ka mbajtur fjalën: në Kupën e Konfederatave, që është në program nga 15 deri më 29 qershor, janë grumbulluar lojtarët më të mirë. Kështu që Adriano do të mungojë në finalet e Kupës së Italisë, por mbi të gjitha golashënuesi do t'i shtyjë pushimet dhe ekziston një hipotezë konkrete, se pyka mund të mungojë edhe në paraeliminatoret e Ligës së Kampioneve në gusht. Interit, që është përpjekur me të gjitha mënyrat ta mbajë kampionin e tij, i është dashur të dorëzohet.
Ditën e enjte, drejtuesit e Selesaos kanë shpallur listën e "frikshme" të të grumbulluarve dhe në të, me rastin e angazhimit të dyfishtë të eliminatoreve për Botërorin 2006 (kundër Paraguait dhe Argjentinës) si dhe për Kupën e Konfederatave, që do të zhvillohet në Gjermani 15-29 maj, ndodhej edhe emri i "Pernadorit" zikaltër (së bashku me të edhe Dida, Kakà dhe Emerson, që aktivizohen në Itali). Nuk ka shërbyer për asgjë puna diplomatike e klubit të Rrugës "Durini", që ka një angazhim të dyfishtë në finalen e Kupës së Italisë ndaj Romës (më 12 dhe 15 qershor). Trajneri Parreira ka dashur të grumbullojë të gjithë më të mirët, me përjashtim të Kafusë dhe Roberto Karlosit, të cilët do të largohen nga grupi pas ndeshjeve eliminatore të botërorit.
Në këtë pikë lind problemi i çlodhjes së lojtarit, i cili edhe në verën e kaluar, për shkak të Kupës së Amerikës, s'kishte mundur të pushonte: jo rastësisht, Interi ka pasur të bëjë me një lojtar të "shteruar" gjatë këtyre muajve të fundit. Kështu që braziliani s'do të jetë në nisjen e përgatitjeve dhe do t'i bashkohet grupit vetëm në fillim të gushtit. Për rrjedhojë, ai s'do të jetë as në paraeliminatoret e Ligës së Kampioneve, çka është një tjetër dëm për klubin. Për sa kohë s'do të ketë një kalendar të vetëm, do të vazhdojë të ketë situata të tilla, me lojtarë tejet të angazhuar dhe, për rrjedhojë, do të jenë më të shumta edhe rreziqet e dëmtimeve. Forma e Adrianos kohët e fundit është një tregues i qartë për këtë.


Kupa e Italisë, finalja e parë në Romë
Takimi i parë, më 12 qershor në Romë, kurse ai i kthimit, më 15 qershor në Milano. Liga e futbollit ka zyrtarizuar rendin e takimeve të finales së Kupës së Italisë mes Romës dhe Interit, që u përcaktua nga shorti i hedhur dje. Oraret dhe programimet televizive do të bëhen të ditura në ditët në vazhdim.

[Davius]

Kafu: Championsi, trofeu që më mungon

Duhet kurajë e madhe për t'u bërë një nga anësorët e djathtë më të mirë të botës, por duhet edhe një sedër e madhe dhe fat për të qenë sërish në qendër të vëmendjes së finales së Championsit. Markos Evangjelista Kafu ka fituar në Itali thuajse gjithçka, sikundër dhe me Brazilin, përveç Ligës së Kampioneve. Dhe ka fatin e mirë që ta arrijë këtë objektiv të mërkurën në mbrëmje kundër Liverpulit.
- A jeni i shtangur që Milani do të luajë finalen e dytë të Championsit në tre vjet?
- Të them të vërtetën, jo. Kemi një organikë të jashtëzakonshme, që nuk tërhiqet asnjëherë prapa, kur bëhet fjalë për arritjen e objektivave të rëndësishëm. Është një çmim ndaj përkushtimit tonë, sidomos kur kemi mundur skuadra të mëdha si këtë vit. Derbi i Milanos është gjithnjë një takim special dhe përkushtues, "Djajtë" e Mançester Junajtidit njihen në të gjithë Europën dhe Psv Eindhoveni na bëri të kuptojmë se sa e vështirë është kjo veprimtari.
- Xhibril Sise, Milan Barosh dhe Luis Garsia janë të gjithë lojtarë shumë të shpejtë të Liverpulit. Jeni ndjerë ndonjëherë inferior në vrapim ndaj një kundërshtari?
- Kanë qenë të ndryshëm kundërshtarët që kanë qenë më të shpejtë se unë. Por doja të shtoja se shpejtësia është një term relativ në futboll dhe varet nga pozicioni që ndodhesh në fushë. Nuk është një ndeshje shpejtësie! Megjithatë parapëlqej të mos citoj emrat e lojtarëve që janë më të shpejtë se unë.
- Mendoni se e keni marrë mirënjohjen që meritoni si futbollist?
- Pa asnjë dyshim. Besoj se jam respektuar shumë, si lojtar dhe si njeri. Në Itali dhe Brazil, si dhe në vende të tjera ku kam qenë, njerëzit më ndalojnë në rrugë për të më thënë gjëra të bukura. Është gjë e mirë dhe e konsideroj të rëndësishme për një futbollist profesionist, kur fiton trofe. Duhet të jemi si shembull për publikun, në veçanti për të rinjtë.
- Cili nga lojtarët e Liverpulit mendoni se do t'i krijojë probleme Milanit në Stamboll?
- Nuk më pëlqen të citoj asnjë emër të veçantë, sepse, nëse ka ndonjë gjë që e kam mësuar si profesionist, është se grupi luan një rol më të rëndësishëm se lojtarët e veçantë. Ndonjëherë shpresohet që ndonjë lojtar, të mund ta fitojë ndeshjen i vetëm dhe pastaj zhgënjen, por është normale, sepse të gjithë jemi njerëz. Duhet të kemi kujdes ndaj të gjithë lojtarëve të Liverpulit.
- A jeni i kënaqur që keni shmangur Çelsin në finale?
- Jam i lumtur që kam arritur finalen e një trofeu që nuk e kam fituar asnjëherë dhe kënaqësia ime nuk varet nga kundërshtari që do të kem përballë. Nuk është nevoja të kujtojmë që Milani duhet t'i respektojë të gjithë kundërshtarët, por pa iu frikësuar askujt. Pastaj, Çelsi u mund nga Liverpuli, që e meriton të jetë në finale. Ky është futbolli.
- Ç'do të thotë për ju fitimi i Ligës së Kampioneve?
- Është një trofe që gjithnjë e kam ëndërruar ta fitoj dhe është i vetmi që më mungon në karrierë. Është e çuditshme të rimendoj faktin që 13 vjet më parë kam luajtur me Sao Paulon në Brazil kundër Milanit në Tokio, për Kupën Interkontinentale. Fituam 3-2 dhe tani pyes veten se çfarë provon kur luan për një titull europian.


Abiati, e ardhmja jashtë Italisë
Pas gjashtë vjetësh, aventura e Kristian Abiatit te Milani duket se ka ardhur në fund. Këtë e konfirmon menaxheri i lojtarit, Vinçenco Morabito: "Besoj se ka ardhur momenti të synojmë "fluturimin", sepse deri dy vjet më parë Abiati ishte portieri i tretë i kombëtares. Nëse hapësira i është mbyllur nga Dida, tani ai është disi si Xhilardinoja, sepse e duan të gjithë. Ka interesim nga Vilareali dhe Arsenali. Palermo dhe Roma janë pista të hapura, por shumë të vështira. Dy vjet më parë nuk e pranoi Arsenalin, por tani nuk do të bëjë të njëjtin gabim". Nëse largohet Abiati, te Milani do të vijë Kudiçini.

Di Kanio: Trapatoni te Lacio? Pse jo!
Paolo Di Kanio, kapiteni i Lacios, ndez "dritën" jeshile për një ardhje të mundshme të Trapatonit në stolin lacial: "Nëse vërtet klubi ka vendosur të synojë tek ai, ndodh sepse Trapatoni është një njeri me karizmë të madhe, një njeri imazhi". Numri 9 bardhekaltër lëshon edhe një paralajmërim për Papadopulon: "Nëse qëndron ai, shpresoj që të krijojë marrëdhënie ndryshe nga ata që kanë drejtuar deri më sot. E ardhmja ime? Më bëhet qejfi që kam oferta nga Anglia, por unë kam bërë një zgjedhje për ta mbyllur karrierën time këtu".

Emerson te Reali, në këmbim të Samuelit?
Në merkaton e ardhshme verore mund të kthehet në modë një aks, ai mes Torinos dhe Madridit, i hapur disa vjet më parë me kalimin e Zinedine Zidanes te "merengesët". Në ditët e shkuara, nga Spanja pati zëra mbi një interesim të Realit për Emersonin. Megjithatë, Fabio Kapelo nuk ka ndër mend të privohet nga braziliani që mezi e mori nga Roma një vit më parë. Vetëm këmbimi me një lojtar tjetër të spanjollëve mund ta bindë trajnerin ta shesë dhe bëhet fjalë për mbrojtësin argjentinas, Samuel, i cili do t'i shërbente shumë Juventusit.

[Davius]

Arsenal-Mançester, finalja erdhi...


Mançesteri dhe Arsenali do të luajnë sot në finalen e Kupës së Anglisë, për të kërkuar trofeun e vetëm të këtij sezoni. Për Arsenalin nuk do të jetë i gatshëm Tieri Henri, i cili vuan një dëmtim në kavilje. Megjithëse trajneri Ferguson u shpreh se do të donte që Henri të luante në finalen e sotme, vendin e tij do ta zërë Denis Berkamp, i cili do të ketë në krah spanjollin Rejes. Vengeri duhet të përcaktojë edhe mbrojtësit që do të luajnë në ndeshjen e sotme. Pas rikthimit nga dëmtimi, Sol Kembëll kërkon të luajë që nga minuta e parë. Por, mbrojtësi i ri zvicerian, Filip Sanderos, ka luajtur mjaft mirë gjatë mungesës së Kembëllit dhe mund të mos e lërë lehtë vendin si titullar. Edhe suedezi, Fredi Ljunberg, është në dyshim për ndeshjen e sotme dhe në vend të tij mund të luajë Çesk Fabregas, i cili mund ta fillojë takimin në Kardif, që nga minuta e parë. Ekipi i Mançester Junajtidit do të hyjë në fushë pa mbrojtësin Gabriel Heinze, i cili u dëmtua gjatë ndeshjes me Njukasëllin. Geri Nevill ishte në dyshim për aktivizimin e tij, në fillim të kësaj jave, por pritet të luajë në ndeshjen e sotme që nga minuta e parë. Mikael Silvestre e ka fituar duelin me irlandezin O'Shi dhe do të luajë në krah të majtë të mbrojtjes, bashkë me Heinzen. Edhe Uesli Braun do ta fillojë ndeshjen si titullar, përkrah Rio Ferdinandit. Në mesfushë do të aktivizohet treshja e përbërë nga Darren Fleçer, Kristiano Ronaldo dhe Pol Skols. Fleçeri po kalon një formë të mirë, pas shënimit të golit të fitores ndaj ekipit të Sauthemptonit. Beniamini i Fergusonit, portugezi Ronaldo, do të luajë në qendër të mesfushës. Ronaldo ka bërë një paraqitje mjaft të mirë në kupë, ku ka shënuar 5 gola. Në gjysmëfinale ndaj Njukasëllit, portugezi shënoi tri herë. Edhe pse Skolsi nuk ka qenë në formën e tij më të mirë, në ndeshjet e fundit, Fergusoni ka vendosur ta përfshijë në formacion që nga minuta e parë. "Djajtë e kuq" janë përsëri në dilemë për aktivizimin e portierit Roi Karoll, i cili u shpreh i zhgënjyer për mosaktivizimin e tij në ndeshjet e fundit. Në vend të tij mund të luajë përsëri amerikani Tim Hauard. Karolli nuk pranoi të firmoste një kontratë të re me Mançesterin dhe pritet të largohet gjatë kësaj vere. Në ndeshjen e sotme, Mançesteri ka avantazhin e tri fitoreve të arritura ndaj Arsenalit, gjatë këtij sezoni. Arsenali u rendit në vend të dytë në këtë sezon të Premier Ligës, 8 pikë para Mançesterit. Trajneri Venger u shpreh optimist për fitoren, pavarësisht mungesës së Henrisë: "Humbja e Henrisë na dëshpëron të gjithëve, por në ekip ka sulmues që mund ta zëvendësojnë Henrinë më së miri. Kam besim se në ndeshjen e sotme do të arrijmë një rezultat pozitiv. Kemi luajtur mirë përgjatë gjithë sezonit dhe besoj se e meritojmë një trofe. Ndaj Mançesterit do ta kemi të vështirë fitoren, por ndeshja do të vendoset mbi episodet e veçanta," - përfundoi Vengeri.


Ferguson-Venger, përplasje "titanësh"
Që nga ardhja e tij tek Arsenali, në vitin 1996, Arsen Venger ka zhvilluar disa ndeshje titanësh me ekipin e drejtuar nga Aleks Ferguson. Disa nga këto ndeshje kanë qenë shumë të tensionuara dhe emocionante. Në finalen e Kupës së Anglisë, në vitin 1999, Denis Berkamp humbi një penallti në minutën e fundit, duke i dhënë humbjen ekipit të tij. Në përballjet e tyre, Fergusoni dhe Vengeri kanë fituar të dy nga 11 takime, kurse një takim ka përfunduar në barazim. Pra ai që do të dalë fitimtar në finalen e kupës, do të kryesojë në betejën e dy trajnerëve.

Ferdinand: I bindur për fitore
Mbrojtësi i Mançesterit, Rio Ferdinand, kërkon fitoren ndaj ekipit të Arsenalit, në finalen e sotme të Kupës së Anglisë. "Nuk e kam fituar asnjëherë Kupën e Anglisë dhe është diçka që dua ta fitoj vërtet. Nuk kemi luajtur shumë mirë gjatë këtij sezoni, por duam ta mbyllim sa më mirë. Për të dyja ekipet, ky është shansi i vetëm për të fituar një tofe për këtë sezon, por unë jam i bindur se do të jemi ne fituesit e kupës," - përfundoi Ferdinandi.

Mekmanaman largohet nga Man.Siti
Ish-lojtari i Realit dhe i kombëtares angleze, mesfushori Stiv Mekmanaman, është larguar përfundimisht nga ekipi i Mançester Sitit. 33-vjeçari, i cili e nisi karrierën e tij te Liverpuli dhe më pas fitoi dy Champions me ekipin e Realit, ka vendosur të largohet për një vit nga futbolli. "Pata një bisedë të shkurtër me Stivin dhe më tha se do të largohej me pushime. Më pas ai do të vendosë për të ardhmen e tij," - deklaroi trajneri i Sitit, Pirs.

Ljunberg: Pata frikë nga kanceri
Suedezi i Arsenalit, Fredi Ljunberg, i operuar dy javë më parë në krahun e djathtë, tregoi momentet kritike para operacionit: "Mjekët kishin parë një infeksion, por nuk dinin se çfarë mund të ishte. M'u desh të bëja disa analiza të mëtejshme, por dyshohej edhe për kancer. Më duhet të them se nuk e pata të lehtë ta pranoja idenë e të qenit me kancer. Më pas çdo gjë u qartësua dhe tani ndihem mjaft mirë," - përfundoi Ljunbergu.

Smith, i lumtur te Mançesteri
Sulmuesi Alan Smith ka deklaruar se nuk ka ndër mend të largohet nga ekipi i Mançesterit, edhe pse pritet që në ndeshjen e sotme ndaj Arsenalit, ai ta fillojë takimin nga stoli. "Ndihem i lumtur për çdo minutë që luaj me ekipin e Mançesterit. Shpresoj që kjo të vazhdojë sa më gjatë. Sot ndaj Arsenalit na pret një ndeshje e vështirë. Kemi luajtur mirë në ndeshjet e tjera ndaj tyre, por takimi i sotëm ka një rëndësi të madhe," - përfundoi Smithi.

Çelsi fiton 1-0 në Kore
Një gol i Xho Kolit i ka dhënë fitoren ekipit të Çelsit, në takimin e zhvilluar në Seul të Koresë ndaj kampionëve koreanë të Suon Bluings. Anglezët nuk zhvilluan një takim të shkëlqyeshëm, por e merituan fitoren. "Kemi luajtur 70 ndeshje dhe të gjithë lojtarët nuk kanë pushuar fare, që nga ardhja në Kore. Duke marrë parasysh kushtet e lojtarëve, jam i kënaqur me paraqitjen e tyre," - deklaroi Mourinjo.

[Davius]

Kjuell: Stambolli? Kujtime të hidhura për mua


Mesfushori i ekipit të Liverpulit, Herri Kjuell, iu rikthye tragjedisë që u kushtoi jetën dy tifozëve të Lids Junajtidit. Kjuelli do të rikthehet në Stamboll për finalen e Ligës së Kampioneve, por nuk ka harruar ende tragjedinë e ndodhur pesë vite më parë. Kjuelli luante për Lidsin në gjysmëfinalen e Kupës UEFA ndaj Gallatasarait dhe para ndeshjes së zhvilluar në Stamboll, u vranë me thikë dy tifozë anglezë të Lidsit. "Ajo periudhë ka qenë pika më e ulët e karrierës sime. Dy tifozë vdiqën, pasi ishin në vendin dhe në momentin e gabuar. Ishte një tragjedi e tmerrshme dhe nuk do të doja ta përjetoja përsëri, teksa kthehem në Stamboll.

Do të mundohem të hedh të shkuarën pas krahëve, kur të arrijmë në Turqi, por do t'i kujtoj gjithmonë dy tifozët e vrarë. Nuk do ta harroj kurrë atë natë. Mendoj gjithmonë për atë, kur shoh ekipet angleze në transfertë. Nuk mendoj se tifozët duhet të kenë shumë kujdes, pasi tani jetojmë në një kohë tjetër dhe kjo ndeshje është e ndryshme nga ajo e pesë viteve më parë, por gjithsesi u kërkoj që të kenë kujdes. Mbaj mend që hymë në fushë të rrethuar nga një varg policësh, të cilët na mbronin nga sendet që na hidheshin nga tifozeria turke. Ajo ndeshje ishte shumë larg futbollit, por fatmirësisht, të mërkurën, do të ndeshemi ndaj një ekipi italian. Nuk ishte se i trembeshim Gallatasarait, por mendoj se ndeshja duhej të ishte ndërprerë që në fillim. Më e mira për ne do të kishte qenë të fitonim, por ajo që ndodhi, nuk na hiqej nga mendja. Për ne ishte e pamundur të luanim dhe humbëm me rezultatin 2-0. Trajneri ynë, Devid O'Leri, na kërkoi të përqendroheshim te loja, por për ne ishte shumë e vështirë. Besoj se ishim në gjendje të fitonim ndaj Gallatasarait dhe më pas, Kupën UEFA të atij viti, por pas tragjedisë nuk na u dha asnjë mundësi tjetër," - deklaroi Kjuelli. Mesfushori 26-vjeçar shpreson të kthehet nga Stambolli me trofeun e Ligës së Kampioneve, pas një sezoni të vënë në hije nga dëmtimet e shumta. Atij do t'i duhet ta nisë takimin nga stoli, por ndihet i gatshëm për ndeshjen më të rëndësishme të karrierës së tij: "Ky sezon ka qenë i vështirë për mua, pasi jam dëmtuar disa herë. Gjithsesi, nëse do ta dija që do të luaja në finalen e Stambollit, nuk do të isha mërzitur. Kjo ndeshje është më e rëndësishmja e karrierës sime dhe ndihem i gatshëm për të luajtur. Nuk kam fituar asgjë më parë, kështu që Championsi do të ishte një fillim i mirë. Njerëzit që mendojnë se unë nuk kam qenë vërtet i dëmtuar, nuk dinë ç'thonë. Kur jam në 100% të formës sime, mund të jap gjithçka për ekipin, por psikologjikisht ka qenë një periudhë shumë e vështirë për mua. Jo vetëm sepse isha i dëmtuar, por edhe se më duhej të dëgjoja disa njerëz që më akuzonin se nuk kisha dëshirë të luaja futboll. Nuk ka asnjë futbollist në botë që nuk ka dëshirë të luajë në çdo ndeshje. Këtu po ndërtohet diçka e veçantë dhe unë dua të bëhem pjesë e saj.

Trajnerit mund t'i duhen edhe disa vite të tjera për të organizuar një ekip të nivelit të lartë, por kjo do të ndodhë dhe unë dua të jem këtu në atë kohë. Njerëzit thoshin se nuk do të arrinim të mundnim Juventusin ose Çelsin, por ja që fituam dhe jemi të gatshëm të fitojmë edhe ndaj ekipit të Milanit," - përfundoi Kjuelli. Të mërkurën, ai do të veshë fanellën me numrin shtatë, të cilin e kanë mbajtur më parë Kevin Kigani dhe Kenio Dalgish, dy nga legjendat e Liverpulit.

[Davius]

Kuqezinjtë: Jemi gati për në Stamboll

Milani ka dalë dje për herë të fundit përpara gazetarëve. Kjo, pasi deri të martën, në bazë të asaj që kanë vendosur drejtuesit e klubit, futbollistët kuqezinj do të stërviten me dyer të mbyllura dhe nuk do të flasin me gazetarët. Kaka, përpara se të vendosej heshtja për shtyp, tha: "Eshtë hera e parë që do të luaj një finale në Ligën e Kampioneve dhe jam shumë i motivuar. E gjithë bota më sheh, është një finale, një spektakël unik. Kam biseduar me Paolo Maldinin dhe Kostakurtën, e kuptoj që ata në finalen e shtatë nuk përjetojnë të njëjtën gjë si unë. Edhe për ata, ajo e Stambollit do të jetë një ditë e madhe, por në një mënyrë ndryshe nga unë. Jam gati, jemi gati. Në një finale, lodhja fizike nuk ndikon." Si braziliani, edhe Krespo do të luajë finalen e parë. Sulmuesi argjentinas, i cili është favorit ndaj Inzagit, për ta filluar ndeshjen nga minuta e parë, u shpreh:

"Në rast se do të jem titullar në Stamboll, do të jetë qershia mbi tortë e këtij sezoni të jashtëzakonshëm që kam kaluar. Gjithsesi, ajo që është e rëndësishme, është që Milani të mundë Liverpulin, vetëm më pas shihet se kush luajti dhe kush shënoi. E vetmja gjë që më intereson, është të bëj të lumtur publikun kuqezi." Nga ana tjetër, Inzagi deklaroi: "Jam gati dhe më vjen mirë që pas një sezoni të karakterizuar nga dëmtimet, do të kem mundësinë të jem në dispozicion të Ançelotit për ndeshjen e Stambollit. Nuk është e vërtetë që jemi të lodhur dhe po presim me padurim ndeshjen. Jemi gati, ndihemi të fortë, të sigurtë dhe të vendosur. Nuk mund ta humbasim këtë kupë."

[Davius]

Beluskoni viziton Milanin

Presidenti i Milanit, Silvio Berluskoni, ka takuar futbollistët e Milanit dje në orën 16.45, në Milanelo. Kuqezinjtë kanë ndërprerë stërvitjen dhe kanë biseduar me bosin kuqezi për ndeshjen e Stambollit. Berluskoni është parë të bisedojë i qeshur edhe me futbollistë të veçantë. Ndërkohë, Milani ka bërë programin për ndeshjen e Stambollit. Skuadra do të stërvitet të hënën, më pas, po atë ditë në orën 16:00, do të nisen për në Stamboll. Një ditë, përpara ndeshjes, pritet edhe deklarata e fundit e Ançelotit në konferencën për shtyp në orën 10:30.


Milani pranon interesimin për Xherrardin
Trajneri i ekipit të Milanit, Karlo Ançeloti, do të ishte i interesuar të sillte kapitenin e Liverpulit, Stiven Xherrardin, në "San Siro", nëse ky i fundit do të largohej sezonin e ardhshëm nga "Anfield Road". Dy ekipet do të ndeshen në finalen e Ligës së Kampioneve ditën e mërkurë dhe Ançeloti u shpreh me superlativa për mesfushorin 24-vjeçar: "Xherrardi është një lojtar i shkëlqyeshëm. Tani për tani është një lojtar i Liverpulit dhe unë nuk dua të mërzis tifozët anglezë, duke folur më shumë për të. Por do të jetë ndryshe nëse ai vendos të largohet nga Liverpuli, në fund të këtij sezoni. Ai është një nga mesfushorët më të mirë në botë. Çdo klub do të donte ta kishte në skuadër", - përfundoi Ançeloti.

Karager, euforik: Do ta mundim Milanin
Tanimë nuk flitet për gjë tjetër, përveç finales Liverpul-Milan. Mbrojtësi i skuadrës së Rafael Benitezit, Xhimi Karager, i cili është votuar nga tifozët si mbrojtësi i vitit, u shpreh: "Liverpuli ka mundësinë të shkurajë të ardhmen e tij. Ky klub ka fituar shumë, por tani kemi një shans të madh. Nëse fitojmë, për 20 vjet në Liverpul do të flitet vetëm për ne. Sigurisht që Milani është favorit, por ne do të fitojmë. Mendoj se një gol do të vendosë gjithçka."

K.Alonso: Të mbrohemi me kujdes
Ksabi Alonso, në prag të ndeshjes së finales së Ligës së Kampioneve ndaj Milanit, u shpreh: "PSV-ja luajti në sulm ndaj Milanit dhe gjithsesi u eliminua. Kjo tregon se kuqezinjtë nuk penalizohen nga ky fakt. Për këtë duhet të mbrohemi me kujdes. Eshtë një finale dhe në rast se nuk pëson gol, mund ta fitosh trofeun nga një moment në tjetrin."

Barros: Ndaj Milanit duhet të jem
Sulmuesi i Liverpulit, Milan Baros, pas stërvitjes së zhvilluar dje nga skuadra e Benitezit, u shpreh në lidhje me finalen e Ligës së Kampioneve: "Eshtë ndeshja e jetës për çdo futbollist dhe unë dua të jem. Shpresoj që trajneri Benitez të më zgjedhë si titullar dhe në rast se ndodh kështu, do të përpiqem me të gjitha mundësitë e mia për t'ia dalë mbanë."

Dudek, e ardhmja mbetet dilemë
Një rast i veçantë ai i Jerzi Dudekut. Portieri i Liverpulit mund të largohet pas finales së Ligës së Kampioneve dhe mund ta bëjë diçka të tillë si kampion i Europës. Portieri polak tha: "Asnjë nga drejtuesit e Liverpulit nuk më ka kontaktuar për rinovimin e kontratës, për këtë mendoj se kanë bërë plane të tjera. Gjithsesi, në rast se do të më duhet të largohem, dua ta bëj diçka të tillë si kampion i Europës.

Reina i afrohet "Anfild Road"-it
Portieri spanjoll i Vilareali, Reina, duket se do të luajë vitin e ardhshëm me Liverpulin. Benitezi e ka shprehur prej kohësh simpatinë e tij për portierin 22-vjeçar, i rritur te Barcelona. Vetë Reina u shpreh: "Vilareali më ka ofruar rinovimin e kontratës, por nuk bëhet fjalë për para. Liverpuli është një mundësi e rrallë në karrierën e një futbollisti."