Gazeta Elektronike: "Futbolli Ndërkombtar"

[Davius]

Bekham: S'jam unë tersi i Realit


Devid Bekham është shprehur i zhgënjyer nga fakti se nuk ka fituar asgjë që kur ka mbërritur te Realit i Madridit, dy vjet më parë, por beson se nën drejtimin e Luksemburgos, "merengesët" do të rikthehen fitues. Ai u përgjigjet atyre që e kanë cilësuar si tersi i skuadrës madrilene. "S'jam unë tersi i Realit. Terma të tillë më duken qesharakë dhe normalisht të tillë janë edhe njerëzit që i përdorin ato. Nuk jam mësuar të kaloj dy vjet radhazi pa fituar asnjë trofe, - tha kapiteni i kombëtares angleze.

- Kjo është hera e parë që ndodh në karrierën time. Sigurisht, edhe unë, si e gjithë skuadra e Realit, jam shumë i mërzitur që nuk pata mundësi të fitoja asgjë në fund të sezonit." Mesfushori 30-vjeçar tha se ndryshimi i katër trajnerëve, që kur ai luan me Realin, ka ndikuar në ecurinë zhgënjyese të "galaktikëve": "Nuk jam mësuar të punoj me katër trajnerë të ndryshëm brenda një sezoni. Unë jam detyruar të ndryshoj shpeshherë vendin në fushën e lojës me trajnerë të ndryshëm dhe kjo nuk është e lehtë për askënd. Bekhami, i cili e ka fituar Ligën e Kampioneve kur luante te Mançesteri në vitin 1999, u shpreh se nën drejtimin e Luksemburgos, ai kishte bindjen se skuadra do të fitonte vitin e ardhshëm:

"Luksemburgo është trajneri që u kuptua më mirë nga skuadra, që kur ai mori drejtimin e Realit. Unë jam i lumtur me vendin që kam aktualisht në skuadër dhe i kam kuptuar idetë e brazilianit. Më pëlqen edhe roli që më ka caktuar dhe do të jem i gatshëm të luaj ku ta shohë ai më të arsyeshme. Më pëlqen Luksemburgo si trajner dhe si njeri, mendoj se Reali ka bërë zgjidhjen e duhur. Ai na ka bërë të punojmë shumë në stërvitje dhe të kemi të qartë në kokë atë që kërkon prej nesh." Gjithsesi, Bekhami ka qenë një nga elementët më të spikatur në "rilindjen" e Realit, në fazën e dytë. Në lidhje me këtë, anglezi thotë: "Jam shumë i lumtur që Reali beson tek unë dhe që loja ime kënaq drejtuesit. Dua të qëndroj në Madrid sa më gjatë të jetë e mundur dhe do të bëj gjithçka për t'ia dalë mbanë." Në fund, Bekhami jep mendimin e tij për Barcelonën, e cila festoi titullin kampion të shtunën e kaluar: "Barça fitoi me meritë. Kanë qenë të fortë gjatë gjithë sezonit. Për më shumë, ata kanë edhe Ronaldinjon, i cili është padyshim një nga futbollistët më të mirë që ka parë bota në dhjetëvjeçarin e fundit."


Luksemburgo i hap derën K.Ronaldos
Trajneri i Realit, Vanderlei Luksemburgo, ka thurur elozhe për mesfushorin e djathtë të Mançesterit, Kristiano Ronaldo. "Nuk më pëlqen të flas për merkato, - tha braziliani. - Kam lexuar shtypin këto ditë dhe kam parë emra të ndryshëm futbollistësh që i afrohen dhe largohen Realit. Përsa i përket Kristiano Ronaldos, nuk mund ta fsheh që më pëlqen si futbollist. Eshtë mjaft i shpejtë, ka energji dhe mund të jap rezultate edhe në sulm. Ai është një futbollist me nivel, ashtu si edhe Hoakin, por ka një kontratë me Mançesterin. Gjithsesi, duhet të jemi të kujdesshëm në blerjet tona, sepse nuk mund t'i lejojmë vetes ta fillojmë sezonin me 50 futbollistë."

[Davius]

Lajme shkurt nga Liga 1 franceze

Abidal kërkon të qëndrojë te Lioni
Mbrojtësi i ekipit të Lionit, Erik Abidal, ka shprehur dëshirën e tij për të qëndruar tek ekipi kampion i Francës, pavarësisht interesimit ndaj tij nga ana e Çelsit. Trajneri portugez, Hoze Mourinjo, ka shprehur dëshirën e tij për ta pasur mbrojtësin francez në ekip, për sezonin e ardhshëm, por Abidali tha se do të pëlqente të luante edhe një sezon tek ekipi i Lionit. "Jam shumë mirë këtu. Kam firmosur për pesë vjet, prandaj nuk do të largohem që në vitin tim të dytë," - deklaroi Abidali.

Lioni synon Tomasonin nga Milani
Ekipi i Lionit ka shprehur interesimin e tij për sulmuesin danez të Milanit, Jon Dahl Tomasonin. Sulmuesi 29-vjeçar nuk ka mundur të gjejë shumë hapësirë në sulmin e ekipit të tij, pas ardhjes së Hernan Krespos nga ekipi i Çelsit. Vendi i titullarit është bërë akoma më i vështirë për Tomasonin, pas rikthimit të sulmuesit Filipo Inzagi. Pas largimit të trajnerit Lë Gen, presidenti i Lionit, Aulas, kërkon të përforcojë ekipin, duke sjellë në Lion danezin Tomason.
B.Nenaj

Peseiro: Fati nuk ishte nga ana jonë
Trajneri i ekipit të Sportingut, Hoze Peseiro, shprehu keqardhjen e tij për humbjen e dytë të pësuar brenda kësaj jave. Sportingu doli jashtë luftës për titull, pas humbjes ndaj rivales së Benfikës, ndërsa humbja në finalen e UEFA-s ndaj CSKA-së e ka luhatur stolin e mbajtur nga Peseiro. "Kupa u fitua nga më të mirët. Nuk mendoj se ekipet patën shumë ndryshim midis tyre, por fati ishte nga ana e moskovitëve."

Monako, "ëndrra" quhet Zherard
Ekipi francez i Monakos, pas një sezoni zhgënjyes, kërkon të përforcojë ekipin për sezonin e ardhshëm. Trajneri Deshamp ka kërkuar të ketë në ekip mesfushorin e Barcelonës, Zherard, i cili nuk ka luajtur rregullisht me "katalanasit". Mesfushori 28-vjeçar nuk ka pasur një karrierë të shkëlqyeshme tek ekipi i Barcelonës, por mosha e tij lejon që t'i jepet të paktën një mundësi jashtë Spanjës.

Deshamp kërkon lojtarë të rinj
Trajneri i ekipit të Monakosë, Didië Deshamp, deklaroi se dëshiron të ketë ekipin e kompletuar para fillimit të përgatitjes për sezonin e ardhshëm. "Qëllimi ynë është të mos mbetemi pas me përgatitjet, prandaj dëshiroj t'i kem të gjithë lojtarët në dispozicion para muajit gusht," - deklaroi Deshampi. Te Monako pritet të vijnë shumë lojtarë të rinj. Disa prej tyre janë Adebajor, Kapo, Zokora etj.

[Davius]

Ronaldo: Eto s'është mësuar me trofe

Mbeten edhe dy ndeshje nga fundi i kampionatit spanjoll dhe Ronaldo ka një disavantazh prej katër golash me shënuesin më të mirë të Primera Divizionit, Samuel Eto. Gjithsesi, sulmuesi brazilian nuk heq dorë nga titulli i golashënuesit më të mirë në Primera Divizion. Ja cila ka qenë intervista e "Fenomenit", ku nuk mungojnë sulmet ndaj Etosë:
- Mendoni se mund ta kaloni Etonë në duelin për t'u shpallur shënuesi më i mirë i Primera Divizionit?
- Mua nuk më pëlqen të heq dorë nga objektivat që i kam vënë vetes dhe për këtë do të synoj me çdo kusht të shpallem shënuesi më i mirë. Ky i sivjetshmi ishte një kampionat disi i rrallë. Kalova tetë ndeshje pa shënuar dhe kjo ndihet tani në fund. Por tani jam katër gola pas, kur mbeten edhe dy ndeshje, dhe do të provoj të shënoj sa më shumë të jetë e mundur.
- U keni kërkuar shokëve tuaj t'ju pasojnë më shumë topa, në mënyrë që të keni më shumë raste për të shënuar?
- Nuk u kam thënë asgjë. Jemi një skuadër dhe shokët e mi do të më ndihmojnë të shënoj, ashtu siç kanë bërë gjithmonë.
- Si do ta përshkruanit sezonin e Realit?
- Të rrallë. Faza e parë ishte nën nivelin e duhur. Më pas ndërruam tre trajnerë dhe për një skuadër nuk është asnjëherë e lehtë të ndryshojë trajner shpesh brenda vitit. Kur erdhi Luksemburgo, u rikthye besimi në skuadër dhe rezultatet patën rritje, por jo të mjaftueshme për të fituar diçka në këtë sezon.
- Mendoni se po të ishte Luksemburgo trajneri i Realit që në fillim të sezonit, do të ishit shpallur kampionë?
- Nuk mund ta them. Çdo trajner ka bërë punën e tij te Reali. Vetëm një gjë e kam të sigurtë, tri ndryshime trajnerësh në një sezon janë shumë për këdo.
- Në fund, një koment për fjalët e Etosë...
- Eto s'është mësuar me trofe dhe nuk di të flasë pasi fiton ndonjë prej tyre. Për këtë ka lindur edhe ky keqkuptim. Nuk e di se çfarë ndien ai për Realin e Madridit, di vetëm që unë i respektoj të gjitha skuadrat dhe kolegët kundërshtarë.

[Davius]

Rajkard dhe Ksavi, elozhe për Van Bomelin

Pas zyrtarizimit të blerjes së holandezit Mark Van Bomel nga PSV Eindhoveni, kanë ardhur edhe reagimet e para brenda skuadrës së Barcelonës. Trajneri i katalanasve, Frank Rajkard, tha për bashkëkombasin e tij: "Eshtë një futbollist i shkëlqyer, me një mentalitet fitues. Kemi kohë që e ndjekim këtë futbollist dhe mendoj se kemi gjetur momentin e duhur për ta afruar në skuadër. Van Bomel do të na ndihmojë në mbrojtjen e titullit.

Më pëlqen si futbollist, ndihmon sulmin duke shënuar shpesh, por di edhe të thyejë aksionet e kundërshtarëve në mesfushë. Një mesfushor modern, të cilin jam i lumtur që do ta kemi në skuadër vitin e ardhshëm." Ndërsa Ksavi, i cili do të luajë përkrah Van Bomelit, u shpreh: "Ka eksperiencë, punon shumë dhe jam i lumtur që do të luajë me ne vitin e ardhshëm. E njoh mirë Markun, ai është mesfushori tipik holandez. I ka të gjitha mundësitë për të bërë një punë të mirë në "Kamp Nou'."

[Davius]

Mojes, në mbrojtje të Runit

Trajneri i Evertonit, David Mojes, u hodh në mbrojtje të sulmuesit 19-vjeçar të Mançesterit, Uejn Runi, duke kritikuar gazetarët që e kanë cilësuar një adoleshent kriminel. "Gjithë ky tension po ia vështirëson jetën Runit. Ai është vetëm 19 vjeç dhe ka përgjegjësi të jashtëzakonshme. Djemtë e rinj kanë nevojë të rriten. Jam i bindur se të gjithë kemi bërë atë që po bën Runi," - deklaroi Mojesi. Runi është kritikuar disa herë nga shumë njerëz, si "një model negativ i të rinjve" dhe presidenti i UEFA-s, Sep Blater, deklaroi se atij i nevojitej "një tërheqje veshi". "E kam parë gjatë të gjithë sezonit. Eshtë shumë i talentuar dhe ne do të donim të ishte akom këtu. Por ai u largua, kështu që i uroj fat të mbarë," - përfundoi Mojesi.


Klaivert, sulmuesi holandez i ekipit të Njukasëllit, deklaroi se parapëlqen rikthimin e tij në Spanjë, sesa ofertën për të luajtur me ekipn turk të Fenerbahçes. Ekipi i Njukasëllit deklaroi se nuk do t'ia rinovonte kontratën holandezit, për shkak të rendimentit të ulët, gjatë këtij sezoni.

Rednep, trajneri i Sauthemptonit, u shpreh se nuk do të largohej nga ekipi anglez, pavarësisht rënies nga kategoria. "Bisedova me presidentin e klubit dhe vendosa të qëndroj edhe në sezonin e ardhshëm. Eshtë e rëndësishme të jemi gati për sezonin e ardhshëm."

Drogba, sulmuesi i ekipit të Çelsit, ka deklaruar se do të qëndrojë tek ekipi londinez, pavarësisht sezonit jo të shkëlqyeshëm të zhvilluar këtë vit. Agjenti i tij deklaroi: "Didië nuk është shumë i lumtur tek Çelsi, por ka vendosur të qëndrojë."

Birmingemi kërkon sulmuesin e Kristal Palasit, Endi Xhonsonin, i cili ka shënuar 21 gola gjatë këtij sezoni në Premier Ligë. Ekipit të Birmingemit i duhet të pëballet me konkurrencën e fortë të disa ekipeve europiane që janë vënë në ndjekje të lojtarit 24-vjeçar.

Tifozët e Mançesterit kanë organizuar një mbledhje për të diskutuar çështjen e ardhjes së Malkom Glazerit në krye të ekipit anglez. "U kërkojmë tifozëve të vishen me të zeza, pasi këto janë ditët më të errëta të historisë së klubit," - deklaroi një tifoz i Junajtidit.

[Davius]

Një tjetër Juve është pranë titullit


Miq, të njohur, menaxherë dhe miq të miqve. Titulli juventin po konkretizohet dhe sot në mbrëmje mund të shfrytëzohet matematika për ta fituar, gjithnjë nëse Milani do të humbasë ndaj Palermos në "San Siro". Por si po i afrohen këtij objektivi djemtë bardhezi? Në heshtje, natyrisht, por plot me një entuziazëm, të gatshëm për të shpërthyer në momentin e duhur. Me miq dhe me njerëz të tjerë të njohur lejohet të flitet. Dhe ja tek dalin në skenë menjëherë anekdoda, frikë, kënaqësi dhe shpresë. Dhe është rasti i Çiro Ferrarës e Fabio Kanavaros. Babai dhe djali, në aspektin futbollistik, të dy napoletanë dhe të dy të çmendur për detin, përveç topit. Antonio Fumo është një nga titullarët e "Çiro a Margellina".

Jo, mos ia kushtoni Çiros sonë, por restorantit të parapëlqyer të "Mister 500-shit". Ai tregon: "Kam folur para sfidës vendimtare me Milanin, - tregon miku i Ferrarës. - Ishte i karikuar dhe optimist si zakonisht. Të njëjtat shaka, të njëjtat batuta. Por jo vetëm kaq. Ai dhe Fabio kanë blerë një varkë të re, një mjet të bukur. Besoj një "Pershing" ose një "Itama", nuk e kujtoj mirë. Secili nga një, të jetë e qartë..."

Edi Reja, trajneri aktual i Napolit, tregon për Fabio Kapelon: "Nuk bën të duket asgjë rreth tij, si zakonisht, por do të jetë me siguri i emocionuar. Ai kështu është gatuar, ka një siguri të qëndrueshme brenda vetes, që e ka udhëhequr si mos më mirë, duke u kujdesur për gjithçka dhe për të gjithë. Çfarë do të bëjë nëse fiton titullin? Nuk e di me siguri. Por duke parë se beson shumë, mund të shkojë të falënderojë "Santuarion e Madonës së Barbanës".
Silvano Martino është menaxheri i Bufonit: "Xhixhi nuk është aspak skeptik, - thotë përfaqësuesi i portieri bardhezi.

- Është një djalosh i qetë, që e përjeton gjithçka me çiltërsi të madhe. Vetëm dy herë e kam parë të shqetësuar si një kordë violine: herën e parë disa vjet më parë, në prag të finales së Kupës së Italisë në Firence. Dhe pastaj dy javë më parë, para ndeshjes në "San Siro", në mënyrë shumë intensive. Atë ndeshje filloi ta ndiejë shumë pas skualifikimit nga Liga e Kampioneve. Pas ndeshjes së kthimit ndaj Liverpulit, darkuam bashkë dhe e pashë shumë të mërzitur. Dukej që nga gjërat e vogla, se si fliste dhe se si reagonte. "Mezi po pres orën për të luajtur ndaj Milanit, por një tjetër dështim nuk do ta duroja dot," - më tha. Jam i sigurtë se ky titull do t'i japë shumë kënaqësi, për dy arsye: e para, në përmbysje ndaj Interit ishte totalisht i papritur, ndërsa e dyta, sepse është frut i një galopimi triumfues, por jo i sigurtë". Mino Raiola kujdeset për interesat e Ibrahimoviçit dhe Nedvedit: "Zllatani ka zbuluar një pasion të madh që kur ka ardhur në Torino, biçikletën, - rrëfen Raiola për suedezin.

- Ai jeton në qendër dhe duke parë se ka gjithnjë vështirësi për të qarkulluar dhe parkuar, ka blerë një biçikletë, me të cilën shkon në stërvitje. Zbavitet dhe i pëlqen, i është bërë thuajse një pasion. Përsa i takon Nedvedit, atij i pëlqen të qëndrojë në shtëpi, - vazhdon Raiola. - Adhuron gjimnastikën, lëvizjet, aq sa e ka kthyer shtëpinë në një palestër. Por Pavelit i pëlen të vrapojë gjatë në kodrat e Mandrias, një mënyrë e mirë për t'u zbavitur, duke përmirësuar formën fizike". Ai që mungon prej pak kohësh në shtëpi, është David Trezege: "Për herë të fundit jemi parë para një muaji, - tregon miku i tij i ngushtë, Horge Keiroz, - kur kemi drekuar bashkë në Kanë, në restorantin e mbrojtësit të Nisës, Hoze Kobos. Ishte një ditë e bukur. Edhe atë ditë folëm gjatë, jo vetëm për futbollin, duke ngrënë mish. Por në frëngjisht, jo në gjuhën argjetinase".

[Davius]

Juve-Xhanikeda, në "lojë" edhe Interi

Fluturim final për Xhuliano Xhanikedën. Në orët e fundit, Juvja duhet të përballë edhe një ofertë të Interit për mesfushorin që i skadon këtë verë kontrata me Lacion. Por ora e zgjedhjeve është përqendruar te skuadra të tjera, duke parë që lojtari tashmë nuk e ka pranuar ofertën e presidentit Lotito, i cili i ka afruar 800 mijë euro për tri sezone. Në "lojë" kanë hyrë edhe zikaltrit. Roberto Mançini i paska kërkuar Moratit të blejë Xhanikedën, i cili ka qenë nën urdhrat e "Mançios" (ishte një nga lojtarët e tij të parapëlqyer) kur drejtonte bardhekaltrit. Padroni zikaltër i ka bërë një ofertë "in xetremis", ndaj Luçiano Moxhi duhet të marrë një vendim sa më shpejt të jetë e mundur. Deri tani, mesfushori 30-vjeçar ka kërkuar një kontratë 3-vjeçare, me një përfitim prej 1 milionë e gjysmë euro. Por merkatoja bardhezi nuk mbaron me kaq. Dy ditë më parë, Reali i Madridit ka kërkuar brazilianin Emerson. Por Juvja i është kundërpërgjigjur dje, duke nisur bisedimet me Ivan Helguerën. Futbollisti i kombëtares spanjolle nuk ka rinovuar ende me "merengesët" (i skadon kontrata vitin e ardhshëm) dhe Moxhi ka dalë menjëherë në skenë, edhe pse nuk bëhet fjalë për një lëvizje shqetësuese apo një interesim i vërtetë. Ndërkohë, përveç Xhanikedës, Juvja me Interin janë në radhë edhe për Miguelin. Anësori i djathtë i mbrojtjes së Benfikës së Trapatonit është një hap larg titullit dhe i pëlqen shumë, si Kapelos, ashtu edhe Mançinit, edhe pse duhet parakaluar konkurrenca e Realit të Madridit. Për kartonin e lojtarit, klubi portugez kërkon 10 milionë euro. Duke qëndruar te lojtarët me çmimin zero, që i interesojnë Juves, problemet sa kanë filluar. Robert Kovaç, lojtari kroat që i skadon kontrata me Bajernin, i "prenotuar" nga bardhezinjtë, po vlerëson një ofertë të Spartakut të Moskës, edhe pse Juvja aktualisht nuk mund ta blejë, duke parë se është lojtar jo komunitar.

Roma-Baldini, "shkëndija" rikthimi
Dy muaj pas lamtumirës së tij nga një Romë që e kishte ndihmuar ta bënte të madhe, Franko Baldini mund të kthehet në hapat e tij. Rënia vertikale që po përjeton skuadra verdhekuqe, e ka bërë të ndjeshëm për gjendjen delikate. "Kemi folur për Romën me Sensin dhe për faktin që nuk shihemi më si dikur, si dy miq të vjetër që e vlerësojmë njëri-tjetrin. Nuk jemi takuar shpesh, për shkak të largësisë së punëve mes nesh. Por kjo nuk do të thotë se mes nesh do të rihapet një marrëdhënie e re".

Nuk ka festë, nëse sot fitohet titulli
Asnjë festë e organizuar. Lojtarët dhe drejtuesit e Juventusit do të qëndrojnë secili për llogari të tyre në mbrëmjen e festës së titullit të 28-të, gjithnjë nëse Milani humb sonte kundër Palermos. Lojtarët do të ndahen në grupe për të bërë tifo për skuadrën siçiliane. Do të jenë vetëm tifozët, që si traditë do të vërshojnë në rrugët e Torinos (jo vetëm aty), për nder të titullit.

Lotito ndez "semaforin" për Fioren
Stefano Fiore mund të kthehet të veshë fanellën e Lacios. Presidenti Klaudio Lotito ka thënë se shpreson ta ketë sërish mesfushorin e talentuar: "Fiore është një lojtar i mirë dhe pa dyshim do të na pëlqente ta rimerrnim te Lacio, por po përjetojmë një periudhë të vështirë ekonomike dhe nuk jemi në gjendje të bëjmë shpenzime të mëdha. Por nëse Valencia na e jep hua, mund ta rikthejmë te Lacio".

[Davius]

Vieri: Adri, mësohu ta pranosh stolin


Pavarësisht nga vajtja në finalen e Kupës së Italisë, në kampin zikaltër atmosfera s'është nga më të mirat. Ajo që krijon një gjendje ankthi është pakënaqësia e Adrianos, i cili ndaj Kaljarit u la në stol nga Mançini gjatë gjithë 90 minutave të lojës. Brazilianit s'i ka ardhur aspak mirë për këtë dhe në fund të ndeshjes u largua nga stadiumi pa dhënë asnjë deklaratë.

Por Vieri e ka qetësuar: "Adriano s'duhet të mërzitet, ai është një lojtar i madh dhe ka shënuar shumë gola, por, nganjëherë stoli edhe duhet pranuar. Megjithatë, askujt s'i shkon nëpër mend ta vërë në diskutim atë. Më vjen keq që momentet tona pozitive sivjet s'kanë përkuar kurrë me njëra-tjetrën. Personalisht, tani jam mirë dhe shpresoj që Lipi të më thërrasë në kombëtare, sepse dëshiroj të luaj në botëror dhe për këtë duhet të zhvilloj një sezon madhështor. E ardhmja ime? Do të qëndroj tek Interi, nëse s'do të ndodhë ndonjë e papritur e madhe. Unë te Milani? Mos bëni shaka pa kripë!"
Adriano?Mançini, sërish shkëndija. Edhe pse trajneri nga Jesi e ka përgënjeshtruar gjithnjë që të ketë pasur probleme me lojtarin, është e pamohueshme se marrëdhëniet mes tyre po vijnë duke u zbehur.

Nga lënia jashtë në derbin e kampionatit ndaj Milanit, që e xhindosi brazilianin, te stoli i së mërkurës në sfidën e Kupës së Italisë ndaj Kaljarit, marrëdhënia mes tyre është bërë gjithnjë më e tendosur dhe e vështirë për t'u kontrolluar. Të mërkurën, Adriano duhej të kishte hyrë në fushë në 10 minutat e fundit, por dëmtimi i Kordobës e detyroi Mançinin t'i ndryshonte planet dhe ta ftonte sulmuesin "karioka" të rizinte vend në stol. Një vendim, të cilin Adri ende s'e ka kapërdirë. Në fund të ndeshjes, ai u kthye në dhomat e zhveshjes sa për të marrë çantën dhe u largua menjëherë drejt garazhit, aq shpejt, saqë as Morati s'arriti ta haste rrugës. Është e kotë të mohohet se forma e fazës së parë e kampionatit, kur i vetëm me golat e tij e udhëhoqi Interin, është larg, por pikërisht për këtë talenti nga Rio de Zhaneiro është i bindur se ka nevojë të luajë për të arritur formën më të mirë. Gjithsesi, Adriano rrezikon të kthehet në çështjen e vërtetë të Interit këtë verë, në rast se lojtari do të grumbullohet me kombëtaren e Brazilit për Kupën e Konfederatave, pa i marrë parasysh kërkesat e Interit.

[Davius]

Rajkard për Laportën: O unë, o Rosëlli


Pavarësisht nga fitimi i titullit të 17-të kampion në historinë e Barcelonës, pas gjashtë vitesh, atmosfera në elitën e klubit katalanas nuk është nga më të mirat. Trajneri holandez, Frank Rajkard, i ka dërguar me anë të menaxherit të tij një ultimatum presidentit Joan Laporta. Ish-trajneri i kombëtares holandeze ka deklaruar: "Në rast se Barcelona nuk e largon Rosëllin, unë do të iki." Duket se Rajkard nuk i ka falur ende Rosëllit kontaktet që ka pasur me Skolarin dhe dështirën e trajnerit brazilian që të merrte drejtimin e Barcelonës, pas problemeve që pati Rajkardi në fillimin e sezonit të kaluar. Nga ana tjetër, Laporta po mendohet mirë. Rosëlli është një nga drejtuesit më të aftë që ka afër dhe një nga të paktit që ka ndikim total te Ronaldinjo. Me largimin e tij, rinovimi i fantazistit brazilian nuk do të ishte më kaq i lehtë sa duket.

[Davius]

Eto: Ronaldo, asnjëherë kampion olimpik

Sulmuesi kamerunas i Barçës u përgjigjet "sulmeve" të "Fenomenit"

Me kampionatin e mbyllur, pas fitores së titullit nga Barcelona, e gjithë vëmendja në Primera Divizion është përqendruar te lufta Ronaldo-Eto, për titullin e shënuesit më të mirë. Sulmuesi i Barcelonës ka një avantazh prej katër golash, kur duhen edhe dy ndeshje nga fundi. Ronaldo deklaroi dje se Eto nuk ishte mësuar me trofe të rëndësishëm dhe menjëherë ka ardhur përgjigjja e kamerunasit. "Ronaldo ka fituar më shumë se unë, sepse ka pasur fatin të luajë me skuadra më të mira, por e pranoj se talenti i tij është parë rrallëherë në fushat e lojës. Braziliani nuk mund të mburret, pasi nuk ka qenë asnjëherë kampion olimpik. Unë e kam fituar një medalje ari me Kamerunin dhe kur të kem moshën e Ronaldos, ndoshta do të kem fituar edhe diçka tjetër, me të cilën do të krenohem. Në Spanjë nuk kam asgjë më pak se Roni." Eto konfirmon se do të japë gjithçka për t'u shpallur shënuesi më i mirë: "Në radhë të parë dua të ndihmoj Barcelonën në festën e nesërme në "Kamp Nou" ndaj Vilarealit dhe më pas do të mendoj për titullin e shënuesit më të mirë. Ky është një trofe i rëndësishëm për çdo sulmues, aq më tepër për mua. Pas titullit kampion, kjo do të ishte qershia mbi tortë. Ronaldo? Nuk është kundërshtari im i vetëm. Oliveira dhe Forlan janë të rrezikshëm." Në fund, ish-sulmuesi i Majorkës flet për të ardhmen: "Sivjet e gjithë bota e kuptoi forcën e Barcelonës. Vitin e ardhshëm do të jetë edhe më e vështirë, por jemi gati të tregojmë forcën tonë, të bindur për aftësitë që kemi. Fillim cikli? Nuk mund t'ju përgjigjem. Viti i ardhshëm do ta tregojë."

Del Horno i shkel syrin Çelsit
Mbrojtësi i majtë i Atletikos së Bilbaos, Asier del Horno, ka konfirmuar se do të ishte i gatshëm të luante me blutë e Mourinjos, sezonin e ardhshëm. Futbollisti i kombëtares spanjolle tha: "Çelsit nuk mund t'i thuhet jo. Eshtë një rast që të paraqitet vetëm një herë në karrierë. Edhe Bilbao do të përfitonte financiarisht nga kjo marrëvjeshje."

Atletiko, gjobë qesharake nga antiracizmi
Komisioni antiracizëm pranë Federatës Spanjolle të Futbollit ka gjobitur vetëm me 600 euro skuadrën e Atletikos së Madridit, pas sharjeve raciste që tifozët e kësaj të fundit kishin bërë në drejtim të portierit kundërshtar, Karlos Kameni, në ndeshjen ndaj Espanjolit.

Zherardi pranon kontaktet me Monakon
Mesfushori i Barcelonës, Zherard, ka konfirmuar kontaktet e tij me Mokanonë dhe me trajnerin Didië Deshamp. Mbërritja e Van Bomelit e detyron kështu 26-vjeçarin të shohë alternativa të tjera dhe Monako duket ajo më e mira për momentin. Zherardi ka kaluar te Barcelona në verën e vitit 2001, nga Valencia.