Gazeta Elektronike: "Futbolli Ndërkombtar"

[Davius]

CSKA e Moskës fiton Kupën UEFA

Futbolli është bërë një sport gjithnjë e më i paparashikueshëm. CSKA-ja e Moskës ka fituar Kupën UEFA dhe është bërë kështu skuadra e parë ruse që fiton një trofe në kupat e Europës. Skuadra e Gazaevit, e ndihmuar edhe nga fati, ka dalë me kokën lart nga Lisbona. Një ndeshje, e cila u dominua nga Sportingu, pa të fitonte një kundështar të pagabueshëm përpara portës kundërshtare. Një kundërshtar cinik që diti të godasë pikërisht në momentet kur skuadra e Peseiros kishte kontrollin e lojës. Pjesa e parë ishte e tëra për skuadrën vendëse, që kaloi në avantazh me anë të Roxherios në minutën e 29-të. Gjithsesi, rastin më të pastër për shënim e pati CSKA-ja, por Vagner Love nuk arriti ta kontrollonte topin i vetëm me portierin. Kjo gjë nuk do të ndodhë në pjesën e dytë.

Në minutën e dhjetë të pjesës së dytë, mbrojtja portugeze "harron" një nga vëllezërit Berezutski dhe Aleksei barazon rezultatin. Nën mbështetjen e publikut vendës, Sportingu e rrit volumin e lojës dhe i shkon shumë pranë golit të barazimit. Por me një zbritje të rrezikshme, rusët përfitojnë nga hapësirat që kanë lënë pas portugezët dhe gjejnë golin e avantazhit. Eshtë mesfushori 21-vjeçar Zhirkov që e bën Lisbonën të heshtë në minutën e 66-të. Më pas ndodh e pabesueshmja... Roxherio, i vetëm me portën, një metër larg saj, godet shtyllën dhe humbet rastin më të mirë për të barazuar. Topi përfundon në duart e portierit të CSKA-së, i cili e rivë menjëherë në lojë në të majtë për te braziliani Karvalho. Ky i fundit kroson në zonë, atje ku Vagner Love tregon aftësitë e tij dhe fiton duelin me Rikardon. 1-3, CSKA-ja fiton Kupën UEFA.

Pra, pas golit të tretë u vendosën fatet e kësaj finaleje, pavarësisht nga këmbëngulja e Sportingut. Peseiro nuk arriti të përsërisë suksesin e 40 viteve më parë, ndërsa Gazaevi ka hyrë në histori si trajneri i skuadrës së parë ruse që fitoi në Kupat e Europës. CSKA-ja ka imituar ecurinë e Valencias sezonin e kaluar, pasi edhe rusët si skuadra e Benitezit një vit më parë, fituan Kupën UEFA duke ardhur në këtë veprimtari pas eliminimit nga Liga e Kampioneve. 2000 tifozët e CSKA-së, të pranishëm në Lisbonë, kanë fituar me skuadrën e Gazaevit. Klubi rus, në të cilin aksioner është edhe presidenti i Çelsit, Roman Abramoviç, i kthen Europës Lindore Kupën UEFA, pas 38 vitesh kur fitonte Dinamo e Zagrebit në vitin 1967.

[Davius]

Me kë flet Ronaldo?

1. Duke parë imazhet e Ronaldos që fliste me Shimon Perezin në Tel-Aviv, pasi kishte shkelmuar topin e parë në fillimin e një turneu për të rinjtë dhe firmoste autografe për fëmijët e Ramallahut, pasi kishte folur me kryeministrin palestinez, mbase Masimo Morati (për të mos thënë Masimo Moreti) e ka kuptuar dhe një herë tjetër se çfarë gabimi kanë bërë që nuk e kanë zënë në kurth Realin e Madridit, ashtu siç u shkrua në shtator të 2002-shit. Madhështia e Ronaldos qëndron më shumë faktin se është një personazh i përmasave botërore, sesa të qenit një sulmues prej 40 golash në një sezon (edhe pse është më e thjeshtë që të flasësh për martesa të kurdisura apo për prezervativë të gjetur në kroskotin e makinës), gjë që është ende subjekt për "çili" dhe për shtypin e keq, sidomos atij që ushqehet nga Interi, e cila mbizotëron në Itali. Nëse Ronaldo është një ikonë, pavarësisht se është një ambasador i ONU-së, ndërsa lojtarë të tjerë kanë thjesht përmasa futbollistike, nuk është se në kthinën e Bento Ribeiros studiohej diplomaci ndërkombëtare. Tifozët e Interit, që ende vazhdojnë të flasin për tradhti dhe vendosin banderola me karakter ofensiv, nganjëherë të financuar, në fund të fundin nuk e meritonin një si Ronaldo. Shumë herë më mirë sahanlëpirësit që nuk dorëzohen kurrë...
2) Vazhdon lufta mes Agjencisë Botërore të Antidopingut, WADA, dhe FIFA-s për skualifikimet në futboll, shumë qesharake në krahasim me ato në sportet e tjera. Gjithçka për t'u fshehur nga serioziteti i ndryshueshëm i kontrollove, pa hyrë fare në diskutimin e "qeskave të ngrira"... Në thelb, presidenti i WADA-s, Dik Paund, ka shpjeguar se asnjë kampionat botëror i një federate të regjistruar krah CIO-s, nuk do të zhvillohet nëse sanksionet antidoping nuk do të jenë të barasvlefshme. E përkthyer: Botërori i Gjermanisë, i luajtur në kushtet aktuale të dënimeve, mund të quhet i jashtligjshëm nga CIO, ose më mirë mund ta shtyjë CIO-n që ta përjashtojë FIFA-n dhe të bëjë presion te shtete të ndryshme që të mos zhvillojnë asnjë kompeticion me logon e FIFA-s. Ky është një ekstremizëm i dukshëm, duke qenë se CIO e di shumë mirë që futbolli "i droguar" i mbush stadiumet në të gjithë botën, në të kundërt të shumë disiplinave të tjera të mrekullueshme, por që nivelin më të lartë e prekin vetëm në një apo dy shtete. GJithsesi, nuk kuptohet përse FIFA nuk e bashkon antidopingun e saj me atë të sporteve të tjera. Përkundrazi, duke parë numrin e ndeshjeve të një kombëtareje në një vit, kuptohet...
3. Nëse Vieri dhe Del Piero do të konsiderohen edhe një herë të "kombëtarizuar" për Gjermani 2006, nuk kuptohet përse Parreira duhet të harrojë Rivaldon, që edhe pa u aktivizuar luante kur ishte 20 vjeç, edhe pse një drejtor i një të përditshmeje sportive i kishte vënë notën 10 kundrejt 7-s së Ronaldos... Tani ai është 33 vjeç dhe emri i tij është shndërruar në një aktualitet në Brazil, sidomos pasi Pele deklaroi që lojtari i Olimpiakosit meriton të paktën dhe një shans, duke parë atë që ka dhënë me përfaqësuesen.

Vetë Rivaldo, i kthyer në një krahasim, edhe pse nuk është afër atij Rivaldos së vërtetë pas aventurës milaniste, ka deklaruar se është i gatshëm për Kupën e Botës. Edhe si zëvendësues, pa pretendime, edhe si titullar. Një Rivaldo, me këtë përulësi që shfaq, meriton të paktën të dëgjohet. Përveç meritës së deklaratës, përse Pele është përfshirë në këtë çështje? Çfarë dreqin i hyn në xhep atij nëse thirret apo jo Rivaldo? E thjeshtë, kur ka lëshuar këtë deklaratë, O Rei ndodhej në Greqi, për të inaguruar një impiant sportiv të Ksanthit dhe për gjëra të tjera personale. Duhet thënë gjithmonë ajo që njerëzit kanë dëshirë të dëgjojnë

[Davius]

Barça "blindon" Ronaldinjon, merr Van Bomelin

Në shtator të vitit të kaluar, Joan Laporta është parë duke darkuar me Ronaldinjon dhe menaxherin e futbollistit brazilian. Në atë darkë ishin të pranishëm edhe Ferran Soriano e Alehandro Eçaverria, drejtuesit më të lartë të klubit katalanas.

Në atë takim, drejtuesit e Barcelonës kërkonin të njiheshin me dëshirën e futbollistit dhe më pas të fillonin të merreshin me detajet e kontratës së re që do ta lidhë braziliani me Barcelonën. Aso kohe nuk u tha asgjë, sepse drejtuesit e Barçës prisnin titullin kampion përpara se të plotësonin kërkesat e fantazistit të blerë nga Parisi, për 30 milionë euro. Kësisoj, Laporta ka bërë gati dhe i ka propozuar kontratën e re Ronaldinjos. Një kontratë e rrallë, pasi Barcelona i ofron Ronaldinjos të qëndrojë edhe dhjetë vjet në Katalonjë dhe të përfitojë 130 milionë euro. Shifra rekord, që në rast se do të vërtetohen kur braziliani të firmosë, do ta bënin Ronaldinjon futbollisti më i paguar në botë. Pra, përgatitet një lidhje e përjetshme Barcelona-Ronaldinjo, duke përgënjeshtruar zërat për një largim të fantazistit nga "Kamp Nou", pas largimit të deklaruar të mikut të tij të ngushtë, zv.presidentit të Barcelonës, Sandro Rosel. Kontrata e Ronaldinjos me Barcelonën përfundonte në fund të vitit 2008 dhe tani do të zgjatet deri më 2015-n.

Por përveç konfirmimit të kampionëve të këtij sezoni, katalanasit kanë filluar serinë e blerjeve. Mesfushori i PSV Eindhovenit, Mark Van Bomel, ka firmosur një kontratë trivjeçare me Barcelonën, të mërkurën. Lajmin e ka konfirmuar vetë futbollisti holandez. Futbollisti 28-vjeçar i skuadrës së Hidinkut ka deklaruar se do të bashkohet me skuadrën e tij të re, porsa kjo të ketë mbyllur sezonin. Van Bomeli do të prezantohet zyrtarisht në "Kamp Nou", më 8 qershor, katër ditë pasi të luajë me Holandën ndeshjen ndaj Rumanisë, të vlefshme për eliminatoret e kampionatit botëror, Gjermani 2006. Kështu, Rajkardi do të bazohet te bashkatdhetari i tij për të mbrojtur titullin në sezonin e ardhshëm. Van Bomel do të luaj përkrah Ksavit dhe Dekosë në mesfushë, duke i dhënë mundësi Markezit të rikthehet në rolin e tij natyral si qendërmbrojtës. Van Bomel do të bëhet holandezi i dytë në "Kamp Nou", përkrah Xhovani Van Bronkorstit. Futbollistët e tjerë nga vendi i tulipanëve që kanë luajtur më parë me Barcelonën në sezonet e fundit, kanë qenë: Patrik Klaivert, Filip Koku, Mikael Reiziger, Mark Overmars dhe Edgar Davids. Van Bomel ka kaluar te PSV Eindhoveni në vitin 1999 dhe me këtë skuadër ka luajtur 169 ndeshje në kampionatin holandez, duke shënuar 46 gola. Ende nuk janë bërë të ditur termat financiarë të kalimit të Van Bomelit në Primera Divizion.

[Davius]

Laporta largon Çelsin: Eto, i paprekshëm

"Eto është i paprekshëm." Joan Laporta e ndien se ka krijuar një grup fitues dhe ka deklaruar se nuk do të shesë asnjë prej "yjeve" të Barcelonës. Presidenti katalanas i përgjigjet kështu ofertës prej 70 milionë eurosh që Abramoviçi ka përgatitur për Etonë: "Etonë nuk e shes edhe sikur të më jepnin paratë e të gjithë botës. Ai është një futbollist, tek i cili do të bazohet Barcelona edhe për shumë vite të tjera."

[Davius]

Lajme shkurt nga Primera Division
Kasiljas: Nuk kam rinovuar me Realin
Pasi shtypi spanjoll publikoi disa artikuj, ku flitej se portieri i Realit, Iker Kasiljas, do të rinovonte deri në vitin 2011 me "merengesët", vetë numri 1 i "galaktikëve" u shpreh: "Kam 13 vjet që luaj në Madrid dhe do të më pëlqente të qëndroja këtu, por deri tani, as unë, as menaxheri im nuk kemi pasur asnjë kontakt me drejtuesit e Realit. Pra, nuk e kam rinovuar kontratën."

Samuel Eto "shpëton" pa gjobë
Komisioni i antidhunës në Federatën Spanjolle të Futbollit ka vendosur të mos e gjobisë Etonë për deklaratat fyese të bëra nga sulmuesi i Barcelonës për Realin. Ky vendim u mor pasi kamerunasi u kërkoi falje publike "merengesëve" dhe këta të fundit nuk kërkuan asnjë masë disiplinore për çështjen në fjalë.

Vilareali kërkon Abiatin nga Milani
Me Hoze Reinën, i cili vitin e ardhshëm ka të ngjarë të luajë me Liverpulin, drejtuesit e Vilarealit janë vënë në kërkim të një portieri të ri. Drejtuesi sportiv i kësaj skuadre, Hoze Manuel Laneza, ka konfirmuar interesimin e spanjollëve për portierin e dytë të Milanit, Kristian Abiati. Marrëveshja mund të arrihet vetëm në rast se Vilareali do të luajë në Ligën e Kampioneve sezonin e ardhshëm

[Davius]

Lioni, bien alternativat Hitcfeld dhe Kuman

Presidenti i ekipit të Lionit, Zhan-Mishel Aulas, pohoi se faktori i gjuhës së huaj është një barrierë për trajnerët Otmar Hitcfeld dhe Ronald Kuman, të cilët aspirojnë për të zënë vendin e trajnerit të larguar, Pol Lë Gen. Lë Geni konfirmoi largimin e tij nga ekipi kampion i Francës, në fund të këtij sezoni, pas fitimit të titullit të tretë radhazi me ekipin e Lionit. Shumë emra janë përmendur si pasardhës të Lë Genit, edhe pse Aulasi përjashtoi nga lista trajnerët francezë, Klod Pol dhe Didië Deshamp. Edhe Loren Blank është në listën e trajnerëve të mundshëm, por presidenti Aulas u shpreh se mungesa e eksperiencës si trajner, e largon Blankun nga lista. Ish-trajneri i Bajernit të Mynihut, Otmar Hitcfeld, dhe ish-trajneri i Ajaksit, Ronald Kuman, kanë qenë dy kandidaturat e tjera për postin e trajnerit. Drejtuesit e Lionit do të marrin një vendim brenda javës tjetër dhe Aulasi u shpreh se të dy trajnerët i kanë të gjitha cilësitë për të ardhur te Lioni, por deklaroi se mungesa e njohjes së gjuhës franceze, mund të kushtëzojë suksesin e tyre. "Javës tjetër do të kemi zgjedhur trajnerin e ri.

Me Hitcfeldin kemi një problem të madh me gjuhën dhe mund të mos gjejmë zgjidhje. Kumani është një trajner me shumë referenca, por edhe me të qëndron problemi i gjuhës." Edhe ish-trajneri i Liverpulit, Zherrard Hulier, është një nga kandidaturat e mundshme për postin e trajnerit të Lionit, por Aulasi u shpreh se dëshiron të ketë garanci që gjendja shëndetësore e francezit nuk do të kushtëzojë punën e tij. "Hulieri është një nga trajnerët më të mirë në qarkullim, por problemet e tij kardiake e kanë kushtëzuar disa herë te Liverpuli. Nëse do të vinte këtu, do të doja të isha i sigurtë që kjo nuk do të ndodhte," - përfundoi presidenti Aulas.

[Davius]

Gazaev: Futbollistët e mi janë heronj


Menjëherë pas fitores së Kupës UEFA, trajneri Valeri Gazaev u shpreh shumë entuziast për rezultatin e takimit. Për herë të parë një skuadër ruse fiton një veprimtari të kësaj rëndësie dhe në një deklaratë për televizionet ruse, menjëherë pas suksesit 1-3, në Lisbonë ndaj Sportingut ,u shpreh për futbollistët e tij: "Ata janë heronj. Sot bëmë të pamundurën. Që nga ndeshja e parë në Kupën UEFA kishim vetëm këtë qëllim, të fitonim këtë veprimtari. Dhe tani jemi të lumtur sepse kryem detyrën që i kishim vënë vetes. Lojtarët e meritojnë plotësisht këtë fitore, pasi kanë luajtur mirë gjatë gjithë kësaj veprimtarie."

[Davius]

Klinsman mbledh skuadrën për Konfederatën

Trajneri i kombëtares gjermane, Jurgen Klinsman, ka grumbulluar sërish në kombëtare mesfushorët Sebastian Daizler dhe Ditmar Haman. Klinsmani ka bërë të ditur emrat e 23 futbollistëve që do të luajnë për Gjermaninë në Kupën e Konfederatave. Në këtë veprimtari që fillon më 15 qershor, skuadra e Klinsmanit do të ndeshet me Tunizinë, Australinë dhe Argjentinën. Në listën e futbollistëve figuron edhe emri i debutuesit Henke. Ja lista e plotë:

Portier: Hildebrand, Kahn, Lehman
Mbrojtës: Fridrish, Hinkel, Huth, Mertesaker, Ovomojela, Shulc Mesfushorë: Balak, Borovski, Daizler, Ernst, Frings, Haman, Hitzlsperger, Shnaider, Shveinstaiger
Sulmues: Asamoah, Hanke, Klose, Kuranji, Podolski

[Davius]

Lajme shkurt nga Premier Liga

Ferguson: Hainze, në mëdyshje për finalen
Trajneri i ekipit të Mançester Junajtidit, Sër Aleks Ferguson, mund të mos ketë Gabriel Hainzen të gatshëm për finalen e kupës ndaj Arsenalit. "Po bëjmë një garë me kohën për të arritur të rikuperojmë Gabrielin para finales. Ai është një lojtar mjaft i rëndësishëm për ne," - u shpreh Fergusoni.

Rejes kërkon të qëndrojë tek Arsenali
Sulmuesi i Arsenalit, Hoze Antonio Rejes, shpreson që finalja ndaj Mançesterit të shtunën, të mos jetë ndeshja e tij e fundit me fanellën e Arsenalit. "Disa njerëz thonë që kjo mund të jetë ndeshja ime e fundit me Arsenalin, por unë nuk e mendoj kështu. Kam një kontratë me Arsenalin dhe dëshiroj ta respektoj".

Boltoni synon Patrik Klaivertin
Trajneri i ekipit anglez të Boltonit, Sam Alerdais, pranoi interesimin e klubit të tij për sulmuesin holandez të Njukasëllit, Patrik Klaivertin. Ish-sulmuesi i Barcelonës nuk ka mundur të "shkëlqejë" në "St.Xheims Park" dhe është lënë jashtë planeve të trajnerit të Njukasëllit, Grim Sounesit. "Eshtë një lojtar që mund të japë shumë për ekipin tonë", - deklaroi trajneri Alerdais.

Edu: Mund të kisha qëndruar tek Arsenali
Pas kofirmimit për largimin e tij nga ekipi i Arsenalit, braziliani Edu pohoi se mund të kishte qëndruar në "Hajburi", nëse drejtuesit e klubit do të ishin treguar më "dorëlëshuar" për rinovimin e kontratës së tij. "Negociatat nisën që para një viti dhe, nëse ata do të kishin folur me mua, si tani, do të kishte qenë më e lehtë për të qëndruar

[Davius]

Interi, tani "grepat" brazilianit Aleks

Interi dhe Çelsi kanë javë që flirtojnë. Dhe jo vetëm për të ardhmen e Huan Sebastian Veronit. Ka edhe shumë interesa të tjera mes klubit të Roman Abramoviçit dhe atij të Masimo Moratit. Në fakt, nga klubi londinez mund të mbërrijë edhe një mbrojtës i bëshëm, që në këtë sezon ka shkëlqyer te PSV Eindhoveni, kundërshtari krenar i Milanit në gjysmëfinalen e Ligës së Kampioneve dhe zotërues i kampionatit holandez. E kemi fjalën për Aleksin, një gjigant që veç të mbrojë, di edhe të jetë vendimtar në goditjet standarde: në fakt, qendërmbrojtësi 22-vjeçar, përveç se shkëlqen në goditjet me kokë, shquhet edhe për goditjet shumë të fuqishme të dënimit. Kurrikulumi i tij sezonal është domethënës: 27 ndeshje në kampionat dhe 3 gola. Edhe më e lartë përqindja e tij realizuese në Ligën e Kampioneve, duke parë se në 13 ndeshje ka shënuar 2 herë. Aleksi mbërriti në Europë verën e kaluar nga Santosi, me një pozicion kurioz kontraktual.

PSV Eindhoveni e ka marrë hua për dy vjet, pikërisht nga Çelsi, që vendosi ta ndihmonte në këtë mënyrë klubin holandez për blerjen e mesfushorit mëngjërash, Arien Roben. Kështu që Aleksi ka një kontratë me klubin e Abramoviçit, deri më 2008-n. Arsye për të cilën tani Interi duhet të trokasë në derën e Pitër Kenionit, për të mësuar se sa kushton kartoni i brazilianit. Sipas disa burimesh angleze, Aleksi kuotohet rreth 8 milionë euro, një shifër e rëndësishme, por jo e pamundur. Pasi, tek e fundit, mbrojtësi nga Niteroi është thuajse 10 vjet më i ri se Marko Materaci, lojtarit të cilit mendohet se do t'i zërë vendin. Ja përse në Rrugën "Durini" po e ndjekin me shumë vëmendje.

Të hënën, në martesën e Hernan Krespos, këshilltari i merkatos, Lele Oriali, nuk është kujdesur vetëm për kortezitë lidhur me këtë ngjarje. Për të përfaqësuar Çelsin, ndodhej një prej këshilltarëve të Abramoviçit: si për rastësi një prej protagonistëve të blerjeve të Krespos dhe Veronit. Dhe takimi shërbeu për të programuar kohët e kësaj çështjeje. Nuk ka një datë të saktë, por ekziston vullneti reciprok për t'u ritakuar shpejt. Që në prill, Marko Branka dhe Lele Oriali kishin qenë në Londër për të kontaktuar për herë të parë. Por në atë moment, Çelsi ishte i shpërqendruar nga angazhimet sportive, ndërsa Interi sapo kishte filluar të mendonte për merkaton. Kësaj here (më shumë se kurrë), klubi i Masimo Moratit ka nevojë të ruajë ekuilibret e organikës. Ja përse çdo ardhje duhet të shoqërohet të paktën me një shitje, për të mos thënë me më shumë. Dhe kjo, natyrisht, për të shpenzuar pak dhe për t'i krijuar Roberto Mançinit mundësi sa më të mira për të administruar grupin.