Gazeta Elektronike: "Futbolli Ndërkombtar"

[Davius]

Vieri, ai që mban në ankth Interin

Në kampin e Interit s'kanë të sosur telashet për Kristian Vierin. Të enjten, golashënuesi nuk u stërvit me grupin dhe kreu vetëm një seancë të lehtë në palestër. Lojtari ka që prej 27 shkurtit që ka një problem në gju dhe tani është në dyshim për transfertën në Bolonjë, por mbi të gjitha për derbin e parë në Champions të mërkurën. Nëse s'do t'ia dalë mbanë, dyshja titullare do të jetë ajo Kruz-Martins. Në këtë pikë ekziston rreziku që sulmin zikaltër në euroderbin e parë ndaj Milanit, ta përcaktojë infermieria. Adriano dhe Rekoba janë të dëmtuar, kurse Vieri s'gëzon formën më të mirë, kështu që dyshja titullare, me përjashtim të ndonjë të papriture të madhe, do të jetë ajo e përbërë nga Martins dhe Kruz

[Davius]

Maradona: Optimist për të ardhmen

Pas një "peligrinazhi" të gjatë në disa vende të botës, Diego Armando Maradona është rikthyer në Argjentinë. "Pibe D'Oro", i cili duket se ka "shpëtuar" edhe këtë herë nga problemet shëndetësore, do të marrë pjesë në festën që do të zhvillohet në Buenos Aires, për 100-vjetorin e Boka Zhuniorsit. Maradona është rikthyer në vendlindje për të qëndruar pranë vajzës Dalma, e cila nesër do të festojë 18-vjetorin. Legjenda e futbollit botëror duket tani një njeri tjetër, i buzëqeshur dhe në aeroportin e Buenos Airesit ka konfirmuar fjalët e thëna në Venezuelë: "E shoh botën ndryshe dhe jam optimist për të ardhmen. Shëndeti? Më shqetëson, por mendoj se do t'ia dal mbanë edhe këtë herë

[Davius]

Ferguson: Çelsi është kampion

Trajneri i Mançesterit, Aleks Ferguson, ka pranuar se ekipi i tij nuk ka më shpresa për të fituar kampionatin anglez. Pas barazimit me Blekbërnin ditën e shtunë në "Old Traford", trajneri i "djajve të kuq" ka deklaruar se për Mançesterin kampionati tashmë është i humbur. Mançesteri zbriti në vend të tretë të renditjes, me pikë të barabarta me Arsenalin, dhe me 13 pikë diferencë në 7 ndeshje të mbetura nga fundi, shpresat për titull janë shuar plotësisht. Ekipi i Çelsit arriti fitoren e radhës të shtunën ndaj Sauthemptonit, me rezultatin 3-1, duke hedhur një hap të sigurtë drejt titullit....

[Davius]

Milani, një tjetër shuplakë për Interin

Edhe këtë herë derbi i Milanos ka folur për kuqezinjtë e Ançelotit. Në takimin e parë çerekfinal, Milani ka fituar pastër 2-0 ndaj një Interi që nuk mundi të bënte asgjë, përveç disa përpjekjeve të dështuara të Martinsit dhe Mihajloviçit. Milani, që në këtë ndeshje ishte ekipi pritës, kaloi në epërsi pikërisht në minutën e vetme shtesë së pjesës së parë, kur Stam devijoi saktë me kokë topin e krosuar nga Pirlo, nga krahu i djathtë. Kjo bëri që kuqezinjtë ta fillonin pjesën e dytë më të qetë, ndërkohë që trajneri Mançini zëvendësoi Kruzin titullar me Vierin, ndërsa Adriano nuk luante, pasi ishte i dëmtuar.

Pas shumë përpjekjeve, Milani shënon edhe golin e dytë me anë të sulmuesit ukrainas, Shevçenko, i cili rikthehej pas një mungese disajavore. Goli i dytë e shokoi Interin dhe lojtarët e tij kaluan në nervozizëm, duke shkaktuar shumë faulla në mesfushë.

Trajneri Mançini hodhi në fushë edhe Karagunisin dhe Van Der Meiden, por këto zëvendësime nuk sollën asnjë rezultat. Për t'u përmendur është një goditje e Karagunisit nga një pozicion diagonal, kur topi u përplas në shtyllë, ndërkohë që Toldo shpëtoi Interin nga goli i tretë, kur devijoi topin e goditur fort nga Shevçenko. Përfundimisht, një fitore e pastër për Milanin, i cili ka hedhur një hap të sigurt drejt gjusmëfinales, megjithëse interistët kanë dispozicion edhe 90 minuta të tjera.

Ndërkohë, ndeshja tjetër, Çelsi-Bajern Mynih, përfundoi me fitoren 4-2 të londinezëve. Golat për Çelsin u shënuan nga Kol, Lampard (2) dhe Drogba, ndërsa për gjermanët shënuan Shvajstajger dhe Balak.

[Davius]

Çelsi, shumë i fortë për Bajernin

Dje u luajtën ndeshjet e dyta çerekfinale në Ligën e Kampioneve. Ekipi anglez i Çelsit ka fituar bindshëm ndaj ekipit gjerman të Bajernit, me rezultatin 4-2. Dy golat e mesfushorit të kombëtares angleze, Frenk Lampard, i kanë dhënë kontrollin e ndeshjes ekipit të Abrahamoviçit. Çelsi u imponua që në fillim të ndeshjes dhe në minutën e katërt, Xho Kol ka shënuar golin e avantazhit për vendësit, pas një topi të goditur nga Xhon Terri. Goli i ardhur në minutat e para e uli pak ritmin e lojës dhe bavarezët përfituan në fillim të pjesës së dytë, duke shënuar golin e barazimit në minutën e 52-të.

Për Bajernin, autori i golit ishte Bastian Shveinsteiger, i cili përfitoi nga një rrëmujë në zonën e portierit Çeh, duke i dhënë ekipit të tij golin e barazimit të përkohshëm. Vazhdimi i pjesës së dytë ishte i papërmbajtshëm për Çelsin, i cili arriti të shënonte edhe tre gola në portën e Kahnit. Frenk Lampard, i cili në pjesën e parë qëndroi në hije, e justifikoi famën e tij ndërkombëtare, duke shënuar dy gola spektakolarë në portën e Bajernit, në minutën e 60-të dhe në minutën e 70-të . Më pas ishte sulmuesi i rikthyer, Didië Drogba, ai që shënoi golin e katërt për ekipin e drejtuar nga Hoze Mourinjo.

Në kohën shtesë të takimit ishte Balak ai që i dha shpresë Bajernit, duke transformuar në gol penalltinë e marrë nga ai vetë. Me Kezhmanin të pezulluar dhe Arjen Robenin të dëmtuar, ekipi i Çelsit luajti në sulm me Didië Drogbanë, të mbështetur nga Xho Koli dhe Damien Dafi. Për Bajernin nuk ishin të disponueshëm të dy sulmuesit kryesorë, Klaudio Pizarro dhe Roi Makai, për shkak të dëmtimeve. Trajneri Feliks Magat ka vendosur në fushë vetëm sulmuesin Hoze Paolo Ferrero, i cili nuk ka mundur të rrezikojë seriozisht portën e Çeslsit.

Për Çelsin janë për t'u përmendur shumë raste në pjesën e dytë, kurse për Bajernin pati vetëm një rast për t'u shënuar, kur lojtari anglez i Bajernit, Ouen Ergrivsit, rrezikoi portën me një goditje dënimi mjeshtërore. Ky rezultat e çon Çelsin më të qetë në ndeshjen e kthimit të martën e ardhshme në Mynih. Trajneri i Çelsitm, Mourinjo, e pa ndeshjen jashtë ambienteve të "Stemford Brixhit", për shkak të pezullimit të dhënë nga UEFA, pas akuzave për shpifje, të ngritura ndaj tij. Ekipi i mundshëm kampion i Anglisë ka treguar dje edhe një herë se është një nga pretendentët kryesorë për fitimin e Ligës së Kampioneve. Për ekipin e Feliks Magatit, ky rezultat i mban akoma gjallë shpresat për kualifikim. Në ndeshjen e kthimit, Bajernit i duhet të fitojë të paktën 2-0 për t'u kualifikuar për më tej.

[Davius]

Lajme shkurt nga Seria A

Donadel: Me Juventusin, si një derbi "Është një ndeshje e ndjerë me shumë pasion nga qyteti dhe nga tifozët vjollcë". Marko Donadel vlerëson sfidën me Juventusin dhe tregon pritjen e tij: "Është një ndeshje e përjetuar me të njëjtin intensitet që ka edhe derbi, - thotë mesfushori i Fiorentinës. - Një ndeshje që çdo lojtar kërkon ta përjetojë dhe unë jam i lumtur që jam këtu. Po dashurohem me këtë qytet dhe me mjedisin, por tani, me nëntë ndeshje për t'u luajtur, mendojmë vetëm për shpëtimin, pastaj do të ketë kohë për konsiderata të tjera. Kë do të doja t'i hiqja Juves? Bufonin".

Sensi përgënjeshtron shitjen e klubit Sërish përgënjeshtrim në shtëpinë e Sensit për blerjen e klubit. "Italpetroli", klubi kryesor i grupit të Sensit, që kontrollon shumicën e aksioneve të Romës, mohon me forcë shitjen e paketës aksionere të klubit verdhekuq: "As kompania "Italpetrol" dhe as "Roma 2002", nuk kanë marrë ndonjë vendim për shitjen e paketës aksionere të kontrollit të Romës, - shkruhej në një komunikatë të klubit romanist. - Nuk është duke u zhvilluar asnjë bisedim për finalizimin e shitjes".

Dabo: Dyert e kombëtares mbyllen për mua Osman Dabo, francezi i Lacios, e pret me padurim modulin e ri: "Me skemën 3-4-1-2, unë dhe Xhanikeda do të zgjerohemi dhe mund të përparojmë". Mesfushori francez sulmon më pas Domenekun, trajnerin e kombëtares franceze: "Dera e kombëtares është gjithnjë e mbyllur për mua, luaj në Itali dhe trajneri nuk i sheh me sy të mirë lojtarët që luajnë "jashtë". E ardhmja? Jam 28 vjeç dhe kam ende shumë për të luajtur. Kam edhe një vit kontratë me Lacion. Do të flasim vitin që vjen, por unë dua të qëndroj".

Sheva: Deri më 2009-n s'lëviz nga Milani Andrij Shevçenko po nxeh motorët që të rikthehet në kampionin e madh që njohin të gjithë. Ndërkohë, zërat e merkatos për ukrainasin nuk ndalen. Roman Abramoviçi nuk heq dorë nga ëndrra për ta veshur me fanellën e Çelsit. Por sulmuesi frenon lidhur me këtë: "E ardhmja ime, ? deklaroi ai për "L'Equipe", ? është te Milani, klub me të cilin jam i lidhur deri më 2009-n. Hëpërhë s'e imagjinoj dot veten në një skuadër tjetër. Të shohim në fund të kontratës sime.

Abramoviçi? E respektoj dhe më pëlqen si njeri, ai e adhuron futbollin, e njohim njëri-tjetrin dhe kemi folur." Livorno: Tifozët duan qëndrimin e Spinelit Tifozët duan ta bindin Spinelin të qëndrojë. Qendra e Koordinimit "Club Amaranto" ka dërguar një letër të nënshkruar nga të gjithë presidentët të klubeve të ndryshme, për t'i kërkuar presidentit që të qëndrojë në krye të shoqërisë. Ndërkohë, dje pasdite skuadra ka kryer një seancë stërvitore, në të cilën ka marrë pjesë e gjithë organika, me përjashtim të Vargasit. Sot është në program një ndeshje në familje.

Lacio, vëmendja tek Abidali i Lionit Ëndrra e Lacios është francezi Erik Abidal. I krahasuar nga shumëkush me bashkatdhetarin Turam, 26-vjeçari i Lionit është "bllokuar" nga drejtori i përgjithshëm bardhekaltër, Martino, i cili të mërkurën mbrëma ndodhej në stadiumin "Gerland" të Lionit, për ta vëzhguar nga pranë. Kontrata e tij përfundon më 2008-n dhe për Lacion s'do të jetë e lehtë t'ua marrë francezëve, duke qenë se mbrojtësi i pëlqen edhe Çelsit, Milanit e PSG-së. Verdhekuqtë, homazhe për Atin e Shenjtë Pas Lacios (pardje), edhe Roma ka bërë homazhe për Papa Gjon Palin II, i cili vdiq të shtunën në mbrëmje. Në bazilikën "Shën Pjetrit", mes njerëzve të ndryshëm kanë "sfiluar" para arkivolit të hapur të Atit të Shenjtë, edhe lojtarë e drejtues të verdhekuqve. Fytyra të nxira dhe shumë dhimbje dukej në sytë e lojtarëve të Bruno Kontit, që nuk i mbajtën dot as lotët.

[Davius]

Bekham: Reali nuk do të zhgënjejë

Devid Bekham, përpara ndeshjes ndaj Barcelonës, në një intervistë për shtypin spanjoll, midis të tjerash tha: "Barcelona është një skuadër e ndërtuar me futbollistë të mëdhenj, por në rast se Reali për të fituar titullin duhet t'i mundë, do ta bëjë diçka të tillë. Jam i bindur se nuk do të zhënjejmë, por mbi të gjitha shpresoj të jetë në ndeshje madhështore. "Bernabeu" e meriton diçka të tillë


Surpriza, jashtë Figo, titullar Ouen!?

Duket se trajneri brazilian, Vanderlei Luksemburgo, ka përgatitur një surprizë për ndeshjen ndaj Barcelonës. Me sa është parë në stërvitjet e fundit, të zhvilluara nga "merengesët", Luksemburgo nuk do të heqë dorë nga Majkëll Ouen dhe pas riaftësimit të Raulit ka menduar ta aktivizojë Ouenin në vend të Luis Figos, duke luajtur me tre sulmues të mirëfilltë, Raul-Ronaldo-Ouen.

[Davius]

Sulmuesi brazilian nuk merret me kritikat dhe përqendrohet vetëm te sfida ndaj Barcelonës 09-04-2005

Ronaldo: Ronaldinjo, "armiku" numër 1

Me Ronaldon si kundështar, mbrojtjet e skuadrave të tjera nuk kanë qoftë edhe një moment qetësie. Pavarësisht nga forma që po kalon "Fenomeni", do të jetë rreziku numër 1 për Barcelonën në ndeshjen ndaj Realit, e cila do të luhet nesër në "Santiago Bernabeu". Ja cila ka qenë intervista e Ronaldos përpara kësaj sfide.

- Barça, treni i fundit për Realin në këtë sezon...
- Nuk mendoj kështu. E konsideroj thjesht si një ndeshje që duhet fituar me çdo kusht, në rast se do pretendojmë për fitimin e Primera Divizionit. - Ndeshja më e mirë për të rigjetur golin...

- Në çdo ndeshje, goli është i rëndësishëm. Unë kam shënuar shumë gjatë karrierës sime dhe ju siguroj se ndaj Barçës kam një dëshirë të shfrenuar për të gjetur golin. Gjithsesi, e rëndësishme është të fitojë skuadra. Në rast se ndeshja përfundon 3-0 dhe unë nuk do të shënoja, sërish do të isha një njeri i lumtur.

- Si e shihni Barcelonën?
- Ka luajtur mirë gjatë gjithë kampionatit dhe po vazhdon ta bëjë diçka të tillë. E qarkullojnë shumë mirë topin, sidomos në qendër të mesfushës. Çdo skuadër ka mënyrën e saj të lojës.

- Si e keni ndjekur dilemën për pjesëmarrjen e Pujolit?
- Nuk e kam ndjekur aspak. Si gjithmonë, nuk e shoh asnjëherë formacionin e ekipit kundërshtar.

- Kush humbet më shumë, Reali pa Gutin apo Barça pa Dekon?
- Humbet vetëm spektakli, sepse futbollistët që do t'i zëvendësojnë, mendoj se do ta bëjnë si duhet detyrën e tyre.

- Ç'mendim keni për stërvitjet me dyer të mbyllura të Luksemburgos?
- Për ne futbollistët ka momente të caktuara, në të cilat duhet të punojmë të bashkuar, larg njerëzve dhe gazetarëve. Por ka edhe momente, në të cilat mbështetja e tifozëve në stërvitje na jep shtysë për të punuar më mirë.

- Në rast se fitoni ndaj Barçës, mund të shpalleni kampionë?
- E rëndësishme është të fitojmë dhe më pas të bëjmë llogaritë. Barça, edhe në rast humbjeje, do të kishte gjashtë pikë avantazh, në shtatë javë të mbetura dhe gjithçka mund të ndodhë.

- Do të viheni përballë Ronaldinjos...
- Më vjen shumë mirë, sepse është një nga futbollistët më të mirë të botës, për të mos thënë më i miri për momentin. Do ta takoj para ndeshjes si gjithmonë, por për 90 minuta do të jetë "armiku" im kryesor.

- Mund të na jepni një parashikim për rezultatin e ndeshjes?
- Shpresoj të fitojë Reali, pas një ndeshjeje spektakolare dhe me shumë gola.

[Davius]

Sheva: Goli, një çmim për vuajtjet e mia

Që prej vitit 1999, gjumi i interistëve është plot ëndrra të këqija, në veçanti ai i Kordobës. 14 derbi të luajtur, 12 gola të shënuar! Interi është "viktima" e radhës për Andrei Shevçenkon, golashënuesi 28-vjeçar ukrainas. Një gol i shënuar prej tij, 2 vjet më parë, ndaloi hapin e Interit për të shkuar në finalen e Ligës së Kampioneve, ndërsa goli i së mërkurës rrezikon të përsërisë të njëjtën skenë të dy viteve më parë, që do të thotë rrënimin e ëndrrës zikaltër për në Europë.

Pas golit, rendja e tij pa fanelë poshtë tribunës së kuqezinjve, gati sa nuk shkatërroi përfundimisht frikën dhe ankthet e një traume rrënqethëse. "E prisja atë gol, e shpresoja, e ëndërroja. Nuk e ndieja frikën aspak dhe kur pashë të mbërrinte drejt meje krosi Pirlos, godita i bindur me kokë. Më vjen keq për ndëshkimin me karton të verdhë. Goli është një dedikim special për bashkëshorten time Kristen dhe djalin Xhordan, të cilët ndodhen gjithnjë pranë meje". Më 19 shkurt, kur luhej ndeshja kundër Kaljarit, sulmuesi rrezikoi jetën. Frakturë e dyfishtë në tëmth, pas një përplasjeje me Lorian.

"Çfarë ndjesie të çuditshme kisha kur shikohesha në pasqyrë, pamja ime ishte shpërfytyruar, - tregon sulmuesi kuqezi. - Kanë qenë të zotë mjekët, të cilët bënë një punë madhështore, ndërsa mua m'u desh të duroja shumë dhimbje. Goli kundër Interit ka qenë çmimi i gjithë atyre vuajtjeve. Tradita kundër zikaltërve është e pabesueshme, të martën dua të shënoj golin e 13-të. Gjysmëfinalja është afër, por duhet të jemi të kujdesshëm, megjithëse nuk do të ndodhë siç ndodhi dhe kundër Deportivos...

" Në Ligën e Kampioneve ka arritur në kuotën e 32 golave, por goli i parë është realizuar këtu e 10 vjet të shkuara. "Aktivizohesha me Dinamon e Kievit dhe isha vetëm 18 vjeç kur tekniku vendosi të luaja si sulmues i tretë. Ai gol që shënova kundër Bajernit të Mynihut, ishte i pamjaftueshëm, sepse ishin gjermanët ata që shkuan në finale, por mbi të gjitha ka qenë një moment i rëndësishëm i karrierës sime.

Pastaj ka qenë penalltia vendimtare kundër Bufonit në Mançester, gëzimi më i madh për një futbollist. Championsi është gjithçka për mua, përderisa nuk më është dhënë kurrë mundësia të luaj një finale të një kampionati europian ose të një botërori. Shpresoj që Ukraina të kualifikohet në Botërorin Gjermania 2006, mund t'ia dalë mbanë".

[Davius]

Lajme shkurt nga Primera Division


Ferrando: Në Numansia i bëmë keq vetes Atletiko e Madridit ka humbur një shans të mirë për të zënë vendet në dispozicion të Kupave të Europës për sezonin e ardhshëm, pas humbjes në Numansia ndaj skuadrës së vendit të fundit. Pas ndeshjes, trajneri bardhekuq, Ferrando, u shpreh: "Një gabim foshnjarak na vështirësoi synimin tonë për të marrë pjesë në Kupat e Europës në sezonin e ardhshëm. Kjo nuk duhet të ndodhë më në të ardhmen. Eshtë e vërtetë që edhe nuk patëm shumë raste për shënim, por një pikë në Numansia do të na kishte shërbyer.

Tani kthehemi në Madrid me vetëdijen që i bëmë keq vetes, duke vështirësuar sigurimin e vendit të gjashtë." Valverde përgëzon Atletikon e Bilbaos Pas derbit bask, të fituar nga Atletiko e Bilbaos ndaj Sociedadit, me rezultatin 3-0, trajneri i kësaj skuadre, Valverde, u shpreh: "Të fitosh derbin, është gjithmonë e bukur dhe më vjen mirë që publiku i "San Mamesit" u dëfrye. Më vjen mirë që skuadra vazhdoi të luftonte për kërkimin e golit edhe pasi gjeti avantazhin. Na duhej kjo fitore, pas rezultateve të dobëta që kishim arritur javët e fundit. Tani kemi moralin e duhur për të bërë një mbyllje të mirë sezoni. Kovaçeviç: Bilbao ishte më lart se ne Sociedadi ka humbur derbin bask 3-0 ndaj Atletikos së Bilbaos.

Pas kësaj ndeshjeje, sulmuesi kryesor i kësaj skuadre, Darko Kovaçeviç, deklaroi: "Atletiko ishte një shkallë më lart se ne. Në fillim të ndeshjes duhej të kishim shfrytëzuar rastet që patën, sepse kur Bilbao shënoi golin e dytë, gjithçka mori fund. Tani duhet të mendojmë për Deportivo La Korunjën. Një kundërshtar i vështirë ndaj të cilit duhet fitojmë me çdo kusht."