Gazeta Elektronike: "Futbolli Ndërkombtar"

[Davius]

Galiani: Championsi s'krahasohet me kampionatin

Qëndrimi i ri është ai i "fair play"-t. Adriano Galiani ka mbetur vërtet i shastisur nga sjellja e kolegëve europiano-veriorë, të cilën tani ai e përdor si mburojë kundër pakënaqësive për titullin e humbur. "Kam fjetur i qetë, edhe pse Juvja na mposhti, dhe mendoj se të njëjtën gjë kanë bërë edhe tifozët e Milanit, që janë njerëz të zgjuar." Në këtë mënyrë, administratori i deleguar i ka thënë "mirupafshim" me lezet kampionatit, për t'u përqendruar tek etapa finale europiane, ajo në Stamboll, ndaj Liverpulit. "E marr vesh që ka nga ata që bëjnë tifo për dështimin tonë të dyfishtë, janë ziliqarë, por zilia është një ndjenjë që nuk më përket."

- Si ndiheni pasi i keni thënë lamtumirë titullit?

- Ndihem i kënaqur, sepse këto kanë qenë tri vite të mbushura me gëzime. Juvja dhe Milani kanë të njëjtën forcë, pak a shumë. Kanë fituar ata, por unë s'kam asnjë lloj kompleksi dhe duke parë rezultatet stratosferike të këtyre sezoneve, s'kemi si të kemi komplekse. Sigurisht, do të kisha preferuar të dilnim 1?0 në vend të 0?1, sepse titulli më pëlqen edhe mua, por nëse në fillim të javës do të më kishin pyetur, "preferon të shkosh në finale të Championsit apo të mposhtësh Juven?", s'do të isha menduar dy herë. S'do ta vija kurrë finalen e Championsit me titullin.

? Por edhe në finale ka humbje dhe shumë njerëz shpresojnë në një dështim të dyfishtë të Milanit...

- E rëndësishme është të luftosh deri në fund në të gjitha frontet. Jemi në finalen e shtatë të epokës sonë, ku doni të dilni? Në Europë, në këtë sezon, askush s'është si ne. Në fakt, jemi të parët në renditjen e UEFA-s dhe është ajo renditja që më intereson. Kanë qenë tri vite të shkëlqyera.

? Edhe Berluskoni ndihet i kënaqur?

- Ishte i qetë, u nis për në Moskë fill pas ndeshjes Milan?Juve, pa qenë aspak i shqetësuar.

? Por, nëse humbisni edhe në Stamboll, do të mbeteni duarbosh...

- Nuk kam asnjëherë frikë kur luaj një finale në Champions. Edhe sikur të na shkojë keq, do të marim me vete disa madalje argjendi, por në Europë askush s'ka arritur rezultate më të larta se ne. Është e qartë se do të doja të fitoja të paktën një medalje ari dhe do të doja të shtoja se kampionati s'është mbyllur: Juvja ka mundësitë e saj, por ne duhet të bëjmë detyrën tonë.

? Por Milani do të shkojë shumë i lodhur në mbrëmjen përcaktuese...

- Disa janë në formë, kurse disa të tjerë jo.

? Thonë se Pirlo mezi qëndron në këmbë...

- A e keni parasysh se ç'ka bërë Pirlo sivjet? Europian, Olimpiadë, gjithçka. Shevçenko pësoi një dëmtim të rëndë, por është një kampion i madh dhe kemi besim tek ai. Ndihem i kënaqur nga të gjithë.

? Jeni i kënaqur edhe nga loja?

- Patjetër. Kam 20 vjet që e drejtoj Milanin dhe në këto vite e kam mësuar diçka: askush s'mund të jetë në formë 11 muaj. Ndihem krenar për këtë skuadër dhe për këtë trajner, dhe besoj se të tillë ndihen edhe tifozët. Bëra një testim të vogël, vajta në këmbë nga shtëpia ime në selinë e Milanit dhe rrugës mora vetëm përgëzime dhe lëvdata. Nga ana tjetër, tifozët e Milanit s'kanë si të mos jenë të kënaqur: askush s'e ka parë botën sa ata. Shkojmë nga Mançesteri në Stamboll dhe them se edhe finalet e humbura janë gjithsesi një arritje e madhe, sepse ata që ndodhen prapa, s'mund të mendojnë se të humbasësh një finale është njëlloj si të mos kesh luajtur në të.

? Kush duhet ta marrë Milanin mbi supe në këto ditë të fundit?

- As Van Basteni s'e merrte dot Milanin mbi supe. Për të arritur në majë të Europës, çdokush duhet të japë kontributin e tij.

? Por juve ju intereson që t'ia kaloni Real Madridit, përsa u takon trofeve të fituar ndërkombëtarë...

- S'e kam përmendur më këtë, pasi na solli ters në Yokohama. Jemi shumë në rregull edhe nëse mbetemi në një rang me Realin. Duhet t'i mësojmë njerëzit që të mos dramatizojnë për një humbje. Ne duhet të luftojmë për të fituar, gjëja vërtet e shëmtuar është t'i shohësh të tjerët që luftojnë. Vërshëllimat e fundit, shumë të drejta, i kam dëgjuar në grumbullimin e 2001-shit, por në këtë hark të gjatë kohe, me Berluskonin në krye, kemi shkuar në shtatë finale dhe kemi fituar shtatë kampionate. Tani të marrim atë që na jepet dhe s'dua të sillem as si fatalist dhe as si dinak.

? A do t'i bëni ndonjë telefonatë Xhilardinos apo Karminjanit përpara sfidës Juve?Parma?

- S'do të bëjmë asnjë telefonatë, çdokush duhet të mendojë për veten. Ata duhet të shpëtojnë, besoj se ky është një motivim shumë i madh, megjithatë jemi të qetë. Dua të mësoj nga kolegët e mirë të Europës Veriore, që reagojnë gjithnjë me buzëqeshje

[Davius]

Luksemburgo kritikon Valencian

Trajneri i Realit, Vanderlei Luksemburgo, i pyetur në lidhje me fitoren e Barcelonës ndaj Valencias, ka kritikuar skuadrën e Antonio Lopezit: "Valencia nuk luajti ashtu siç pritej. Mendoja se ata do të kërkonin fitoren për të marrë pjesë në Champions vitin e ardhshëm, por nuk ndodhi kështu. Barcelona dominoi dhe e bëri diçka të tillë me lehtësinë më të madhe." Ndërsa për titullin, ai u shpreh: "Do të fitojmë edhe tri ndeshjet e mbetura, për të mbyllur sezonin me dhjetë fitore radhazi. Të shohim ç'do të ndodhë me Barcelonën."

[viganv]

Tierri Henri është përfshirë në skuadrën e Arsenalit për ndeshjen që kjo e fundit do të luajë sot ndaj Evertonit, por trajneri i "topçinjve" ka deklaruar se nuk do ta rrezikojë sulmuesin francez, të cilin kërkon ta ketë në 100% të mundësive të tij, për finalen e Kupës së Anglisë ndaj Mançesterit. Henri ka lënë kështu pas shpine një dëmtim njëmujor dhe shënuesi më i mirë i Premier Ligës, me 25 gola, do të jetë rregullisht në fushë për ndeshjen e shumëpritur të 21 majit në Kardif. "Tierri është rikthyer dhe ka filluar të stërvitet me skuadrën, - tha trajneri Venger përpara ndeshjes ndaj Evertonit. Jam shumë i habitur nga ky riaftësim i shpejtë, por nuk do ta aktivizoj ndaj Evertonit. Për të është e rëndësishme të rigjejë ritmin e stërvitjes dhe më pas atë të lojës. Mendova se sezoni ishte mbyllur për të, por Henri ka bërë një punë të jashtëzakonshme dhe fatmirësisht është rikthyer në skuadër." Më pas, trajneri francez vazhdoi: "Ndaj Evertonit është një ndeshje prestigji, sepse të dyja skuadrat nuk mund të humbasin apo të fitojnë ndonjë pozicion në renditjen përfundimtare. Henri më ka thënë se është gati luajë, por nuk duhet të rrezikojmë. Tani do të punojmë me futbollistin një program special, që ai të jetë plotësisht i gatshëm për finalen ndaj Mançesterit." Një tjetër futbollist i dëmtuar i Arsenalit që mund të rikthehet për finalen e Kupës së Anglisë, është edhe mesfushori suedez Frederik Ljunberg. Në lidhje me të, Vengeri u shpreh: "Mjekët më kanë thënë se Frederiku do të jetë gati për ndeshjen e së dielës ndaj Birmingemit, kështu që jam optimist se do të jetë në fushë edhe në Kardif."


Edu: Lamtumirë Arsenal...
Mesfushori brazilian Edu ka pohuar edhe një herë se është i vendosur të largohet nga Arsenali në fund të këtij sezoni. Në janar, ai ishte pranë kalimit te Valencia, por trajneri Venger nuk pranoi. Pas katër muajsh, Edu u shpreh për shtypin anglez: "Kam vendosur të largohem pas finales së Kupës së Anglisë, por nuk e kam vendosur ende skuadrën time të ardhshme. Menaxheri im gjatë verës ka biseduar me drejtuesit e Realit, Barcelonës, Valencias dhe Juventusit." Më pas, mesfushori i kombëtares braziliane ka deklaruar se do ta zgjedhë me kujdes skuadrën e ardhshme, sepse do të kërkojë të luajë si titullar në sezonin e ardhshëm: "Nuk dua të nxitohem. Reali zgjodhi Gravesenin gjatë kohës që po vazhdonte bisedimet me menaxherin tim, por për mua nuk ka shumë rëndësi kjo, pasi e njëjta gjë ndodhi me Barcelonën. Rajkardi zgjodhi Albertinin. E rëndësishme është që sezonin e ardhshëm të luaj rregullisht. Jam në kulmin e karrierës sime dhe nuk mund ta pranoj stolin."


Lë Gen, ndihmësi i Vengerit!?
Sipas shtypit britanik, Arsenali ka kërkuar shërimet e trajnerit të Lionit, Pol Lë Gen, i cili dha dorëheqjen pas ditë më parë, pasi kishte fituar titullin kampion në Francë, me Lionin. Mendohet se "topçinjtë" do të mbajnë për një vit Lë Genin si trajner të dytë, pra ndihmës të Vengerit. Kështu, Arsenali kërkon të sigurojë trajnerin e së ardhmes, pasi Vengeri ka deklaruar se pas dy vjetësh, kur të përfundojë kontrata e tij me klubin londinez, do të largohet nga Premier Liga.

[Davius]

Ouen këmbëngul: Nuk jemi dorëzuar

Majkëll Ouen, sulmuesi i Realit të Madridit, vazhdon të shpresojë se skuadra e tij mund ta kapë Barcelonën dhe të fitojë titullin kampion. Ai gjithashtu është i gatshëm të ndihmojë Ronaldon në betejën me Etonë, për titullin e shënuesit më të mirë në Primera Divizion. Ja cila ka qenë intervista e britanikut:

- Mund të themi se e keni humbur titullin, pas fitores së Barcelonës në Valencia?

- Ende jo. Ata arritën një fitore shumë të rëndësishme, por ne nuk jemi dorëzuar,
sepse matematika na e lejon të shpresojmë. Kemi fituar shtatë ndeshje radhazi dhe do të përpiqemi deri në fund që të bëjmë detyrën tonë.

- Megjithëse kampionati nuk është mbyllur ende, si e konsideroni vitin tuaj të parë në Madrid?

- Një vit i mirë do të thosha, përsa u përket golave të shënuar dhe jetës sime private në Madrid, por më vjen keq të nuk fitova asgjë. Për këtë, ky sezon nuk mund të konsiderohet perfekt.

- Eto ka kritikuar Realin...

- Nuk më intereson se ç'ka thënë dhe nuk kam ndër mend t'i përgjigjem. Eto ka zhvilluar një sezon të mirë dhe meriton komplimente. Më shumë nuk mund të shtoj.

- A ka mundësi Ronaldo të shpallet shënuesi më i mirë i Primera Divizionit?

- Do të më pëlqente shumë. Ronaldo ka filluar të shënojë rregullisht dhe unë do të përpiqem me të gjitha mundësitë që ai ta fitojë këtë titull. Për sulmuesit, një çmim i tillë në fund të sezonit është shumë i rëndësishëm.

- Liverpuli, edhe po fitoi Ligën e Kampioneve, sezonin e ardhshëm do ta ketë të vështirë të luajë në Champions...

- Eshtë e kotë të vazhdojë ky debat. Liverpuli duhet të fitojë me Milanin në Stamboll dhe vetëm më pas mund të kërkojë të luajë në Champions vitin e ardhshëm

[viganv]

Roziçki zbut sherrin në skuadër



Fantazisti i Borusias, Tomas Roziçki, gjatë ndeshjes në kampionat ndaj Verderit, pati një zënkë me portierin e ekipit të tij, Roman Ueidenfelerin. Dy lojtarët e Borusias patën një mosmarrëveshje në fitoren 1-0 të arritur ndaj Verderit. Konflikti nisi si pasojë e një rasti të humbur nga mesfushori çek në fund të takimit. Pas gjuajtjes së Roziçkit, portieri Ueidenfeler vrapoi drejt Roziçkit duke e kritikuar, por pas ndeshjes të dy lojtarët e kishin lënë pas atë ndodhi. "Patëm një zënkë të vogël. Ishte një ndeshje shumë delikate dhe u luajt me emocione të mëdha. I bërtitëm pak njëri-tjetrit dhe nuk e mora vesh saktësisht se për çfarë u grindëm," - deklaroi Roziçki. Edhe numri një i portës së Borusias deklaroi se ishte thjesht një incident i vogël. "Këto gjëra ndodhin në futboll. Patëm një mosmarrëveshje, por tani sqaruam gjithçka. Tomasi është një lojtar i shkëlqyer. Jam i lumtur që e shënoi ai golin e fitores," - përfundoi Ueidenfeleri.

[viganv]

Drogba: Nuk jam i kënaqur me veten



Sulmuesi i Çelsit, Didie Drogba, pranoi se sezoni i tij i parë tek ekipi kampion i Anglisë, nuk ka qenë nga më të mirët. Sulmuesi nga Bregu i Fildishtë erdhi në "Stemford Bridge" nga Marseja, në fillim të këtij sezoni, me një marrëveshje prej 24 milionë eurosh, por paraqitja e tij nuk e justifikoi plotësisht shumën e shpenzuar. Në sezonin e kaluar, ai u shpall lojtari më i mirë në Ligën 1. Me Çelsin, ai shënoi gjithsej 16 gola, gjatë këtij sezoni dhe në kampionat nuk ka "shkëlqyer", edhe pse ekipi i tij e fitoi titullin dy javë para përfundimit të kampionatit. Pas fitores 1-0 ndaj Çarltonit, Drogba deklaroi se ishte i pakënaqur me paraqitjen e tij në këtë sezon, por u shpreh optimist për vitet në vijim: "Nuk jam i kënaqur me sezonin tim të parë këtu. Duhej të kisha qenë më i saktë dhe të kisha shënuar më shumë gola. Në fillim e pata mjaft të vështirë, pasi m'u desh të përballesha me ndryshimet kulturore dhe mënyrën e ndryshme të të luajturit në Angli. Këtu duhej të mësohesha me një mënyrë krejt të ndryshme jetese. Pastaj u komplikua gjithçka në tetor, kur dëmtova gjurin, por asnjëherë nuk harrova që kisha ardhur te Çelsi për të fituar. Fitimi i Kupës "Karling" ishte fillimi i një sezoni të suksesshëm. E di mirë që këtu nuk jam sulmuesi i parë, siç isha te Marseja, por jam i bindur se në sezonin e ardhshëm do të shënoj më shumë. Këtu ka shumë lojtarë të mirë që shënojnë vazhdimisht, por në sezonin e ardhshëm do të jap 100% të formës sime." Drogba ka qenë disa herë vendimtar për Çelsin. Ndaj Bajernit, në Champions, ai shënoi dy herë, duke i siguruar ekipit të tij kalimin për në gjysmëfinale.

[viganv]

D'Alesandro mohon mosmarrëveshjet me Geretsin



Organizatori i ekipit të Volfsburgut, Andres D'Alesandro, ka mohuar çdo mosmarrëveshje me trajnerin e ekipit të tij, Erik Gerets. Kjo u mendua, pasi argjentinasi ishte larguar më parë se lojtarët e tjerë nga seanca stërvitore e klubit. D'Alesandro nuk kishte qenë dakord me qëndrimin e tij në stol, në ndeshjen ndaj Hertës së Berlinit, por mohoi çdo mosmarrëveshje me trajnerin e tij. "Kur ishim në dhomat e zhveshjes, trajneri më tha se nuk do të luaja dhe unë nuk kam asnjë problem me këtë fakt," - deklaroi D'Alesandro.

Hamburgu kërkon Van Der Vartin nga Ajaksi
Ekipi gjerman i Hamburgut kërkon mesfushorin e Ajaksit, Rafael van Der Vartin, i cili ka bërë një paraqitje mjaft të mirë gjatë këtij sezoni. Hamburgu konfirmoi se po përpiqej të arrinte një marrëveshje me klubin e Ajaksit. "Kemi kohë që po përpiqemi të sjellim Van Der Vartin tek ekipi ynë," - deklaroi drejtori ekzekutiv i Hamburgut, Dietmar Beiersdorfer. Holandezi 22-vjeçar kërkohet edhe nga disa klube angleze si Arsenali dhe Man.Siti.

[viganv]

Santini, drejt rikthimit te Lioni.

Ish-trajneri i Lionit, Zhak Santini, mendohet si një nga kandidatët e mundshëm për postin e trajnerit të Lionit, pas largimit të Pol Lë Genit. Santini mund të rikthehet përsëri te Lioni, pas largimit në 2002-shin, ku fitoi edhe titullin në Francë. Ai u largua nga Lioni për të marrë përsipër rolin e trajnerit të kombëtares franceze dhe tashmë është në krye të kandidaturave, për të marrë drejtimin e ekipit kampion të Francës. Lë Geni, i cili fitoi titullin e tretë radhazi me ekipin e Lionit, vendosi të largohej në fund të këtij sezoni. Presidenti i Lionit, Zhan-Mikel Aulas, u shpreh i zhgënjyer nga vendimi i Lë Genit dhe konfirmoi kontaktet me Zhak Santininë, i cili aktualisht është i papunë, që nga largimi i tij nga stoli i Totenhemit.

"Nuk kemi vendosur akoma për trajnerin e ardhshëm, por nuk e përjashtojmë mundësinë e rikthimit të Santinisë. Gjithashtu, po konsiderojmë edhe disa trajnerë të huaj. Idealja do të ishte sikur të gjenim një kopje të Lë Genit, pasi na duhet një trajner që të ketë eksperiencë në Ligën e Kampioneve. Trajneri i ardhshëm duhet të ketë ambicie dhe të mbajë lart nivelin e klubit tonë. Prioritet për ne është klubi. Në Formulën 1, piloti nuk e zgjedh makinën, por e nget atë. Ne nuk duam të ndryshojmë makinën," - u shpreh Aulasi. Ndër kandidaturat e tjera për postin e trajnerit të Lionit janë edhe Zhan Tigana, trajneri i Lilës, Klod Pol dhe trajneri i Monakosë, Didie Deshamp. Trajneri i Monakosë pëlqehet mjaft nga presidenti i Lionit, megjithatë ai deklaroi: "Ai ka një "kurrikulum" ideal, por ka një kontratë 3-vjeçare me Monakonë dhe mendoj se do të jetë e vështirë të vijë te Lioni.

[Davius]

Maradona: Ronaldinjo është numri 1

Diego Armando Maradona, në formë të mirë fizike, ka mbërritur në Madrid dhe ka deklaruar se ka lënë pas problemet me shëndetin dhe se do të takojë disa miq të vjetër në botën e futbollit. Ish-kapiteni i kombëtares argjentinase, i shoqëruar nga gazetarë dhe kameramanë të shumtë nga Kuba, ka deklaruar porsa ka mbërritur në aeroportin "Barahas": "Kam ardhur këtu për të takuar Ronaldon, Roberto Karlosin dhe për të biseduar me Sakin, të cilin e njoh prej kohësh, që kur luaja në Itali. Do të kem edhe një takim me Luksemburgon." Saki ka qenë trajner i Milanit dhe kombëtares italiane, dhe aktualisht është drejtor teknik te Reali, ndërsa Luksemburgo është bërë trajneri i "merengesëve", në fundin e vitit 2004.

Maradona thotë për ta: "Duhet t'i jepni më shumë kohë Luksemburgos dhe Sakit, për të organizuar një skuadër fituese. Me futbollistët që ka Reali, nuk mund të jetë kurrë në krizë. Shumë shpejt do t'u rikthehen fitoreve, kjo sepse te "merengesët" nuk ka as edhe një futbollist të vetëm që nuk ka dëshirë të dominojë."

Më pas, "El Pibe d'oro" tregon programin e tij në Spanjë: "Dua të përfshihem sërish në botën e futbollit. Pas Madridit do të vizitoj edhe Barcelonën dhe do të takohem me Ronaldinjon, më pas do të shoh ndeshjen e Kupës së Mbretit, Atletiko Madridit-Osasuna." Me paraqitjen e tij më të mirë, që kur u largua nga futbolli në vitin 1997, Maradona, i cili ka humbur 27 kilogram pas operacionit në stomak, të bërë gjatë muajit mars në Kolumbi, dhe tani peshon 121 kilogram, u shpreh:

"Shpresoj të humbas edhe 75 kilogram. Dua ta bëj diçka të tillë për shëndetin tim, për fëmijët e mi dhe për njerëzit që më duan." Maradona, i cili i dha Argjentinës titullin kampion bote në vitin 1986, ka kaluar vitet më të vështira të jetës së tij dhe pak kohë më parë ka fituar sfidën më të madhe, atë me vdekjen. 44-vjeçari vazhdoi deklaratën e tij: "Jam më mirë, por nuk jam shëruar plotësisht. Për mua është një betejë e vazhdueshme. Kam bërë shumë gabime në jetën time dhe tani po përpiqem t'i ndreq me sa kam mundësi."

Maradona ka luajtur për Barcelonën nga viti 1982 deri në vitin 1984, më pas u transferua te Napoli, ku mrekulloi të gjithë botën me talentin e tij të padiskutueshëm. Argjentinasi tha se titulli kampion në Spanjë është i mbyllur dhe se Barça është kampione: "Barça është kampione. Ka pasur qëndrueshmëri gjatë gjithë sezonit dhe e meriton titullin.

Frank Rajkard ka bërë një punë të shkëlqyer, duke ndërthurur një fantazist të lindur si Ronaldinjo, me një sulmues efikas si Eto. Mendoj se Ronaldinjo është futbollisti më i mirë në botë. Ai është në gjendje të dhurojë spektakël, gjë për të cilën futbolli ka shumë nevojë." Në fund, legjenda e futbollit botëror ka deklaruar se po mendohet ende për të pranuar vendin e trajnerit të të rinjve te Boka Zhuniors: "Jam ende në bisedime me drejtuesit e Bokës dhe është një detyrë që më pëlqen. Nuk dua të filloj një karrierë të re si trajner, por thjesht kam dëshirë të punoj me talentet e reja

[Davius]

Kupa e Mbretit - Sot, gjysmëfinalja e parë...

Do të luhet gjysmëfinalja e parë e kthimit për Kupën e Mbretit në Spanjë. Betisi do të udhëtojë në Bilbao, ku do të ndeshet me skuadrën vendëse, pas barazimit 0-0 në takimin e parë në Sevilja. Përballja ndërmjet këtyre dy skuadrave në kampionat është mbyllur në barazim 4-4, për këtë, kjo ndeshje premton spektakël. "Edhe në rast se do të përsëritej ai rezultat dhe unë do të pësoja katër gola, do të isha i lumtur, sepse do të arrinim në finale," - u shpreh portieri i Betisit, Antonio Doblas.

Bilbao e ka fituar 23 herë Kupën e Mbretit, skuadra që e ka bërë më shumë diçka të tillë në futbollin spanjoll. Në "San Mames" nuk ka më vende, por Doblasi nuk i druhet Bilbaos dhe thotë: "Ne luajtëm mirë në "Kamp Nou" ndaj Barcelonës dhe mposhtën Seviljen në derbi. Jemi mësuar me presionin." Betis mund të mos ketë në radhët e tij Hoakinin. Mesfushori i talentuar vuan një lodhje muskulare dhe mund t'i bashkohet mungsesës së sulmuesit të dëmtuar Edu.

Nga ana tjetër, trajneri i Atletikos së Bilbaos, Ernesto Valverde, u shpreh: "Eshtë një ndeshje, të cilën duhet ta luajmë me kokë dhe jo me zemër. Kjo e fundit na ka bërë të humbasim ndeshje që mund t'i administronim pas një avantazhi prej dy golash." Baskët luajtën më mirë në ndeshjen e parë gjysmëfinale dhe mund të fitonin, në rast se goditja e mbrojtësit Asier Del Horno nuk do të përfundonte në shtyllë. Gjysmëfinalja tjetër e Kupës së Mbretit do të luhet nesër dhe përballë do të jenë Atletiko e Madridit dhe Osasuna, në "Kalderon". Ndeshja e parë është fituar 1-0 nga Osasuna