Gazeta Elektronike: "Futbolli Ndërkombtar"

[Davius]

Raul: Nuk kishim të ngopur

Sulmuesi i Realit, Raul Gonzalez, është rikthyer ai i ditëve më të mira. Kapiteni "merenges" e tregoi diçka të tillë me dy golat e shënuara të shtunën në "Bernabeu", ndaj Santanderit. Pas kësaj ndeshjeje, spanjolli u shpreh: "Kemi luajtur një ndeshje të madhe dhe këtë e bëjmë sa herë luajmë si një skuadër e vërtetë. Po ndërthurim siç duhet cilësitë tona individuale, për të mirën e skuadrës. Nuk kishim të ngopur me gola dhe nuk lëshuam pe edhe pasi rezultati shkoi në 3-0."

[Davius]

Magat: Pashë një Bajern të bukur

Ekipi i Bajernit tregoi përsëri se është ekipi më i fortë në Bundesligë, duke fituar 4-2 ndaj Mainzit. Kjo ishte fitorja e tetë radhazi për ekipin e drejtuar nga trajneri Feliks Magat. Pas ndeshjes, trajneri bavarez tha: "Jam krenar për ekipin, pasi luajti një futboll vërtet të bukur në ndeshjen e sotme." Sulmuesi holandez, Roi Makai, shënoi tripletën e dytë radhazi, duke u rikonfirmuar si "arma" më e fortë e sulmit bavarez. "Jemi kampionë dhe sot treguam se kemi dëshirë t'i fitojmë të gjitha ndeshjet e mbetura. Po bëjmë detyrën tonë kundrejt ekipeve që po luftojnë për një vend në kupat e Europës dhe ndaj atyre që luajnë për të qëndruar në kategorinë e parë. Ishte një ndeshje e bukur edhe për tifozët. Dua të përgëzoj edhe lojtarët e Mainzit, të cilët luajtën mirë. Nuk mund të ankohen për një humbje 4-2 ndaj Bajernit," - përfundoi Makai. Trajneri Magat përgëzoi lojtarët e tij për lojën e bërë:

"Pashë një Bajern vërtet të bukur sot dhe bëmë të qartë se nuk e kemi përfunduar akoma sezonin tonë. Pra, jam krenar dhe entuziast për lojën e treguar sot." Edhe Balaku u shpreh i kënaqur për fitoren dhe pas ndeshjes deklaroi: "Qëllimi ynë është që të fitojmë të gjitha ndeshjet e mbetura. Duam të kënaqim tifozët dhe publikun. Sot treguam se nuk i kemi filluar akoma pushimet. Kemi finalen e kupës për të luajtur dhe duam me çdo kusht ta fitojmë atë. Jemi në formë shumë të mirë dhe këtë po e tregojmë çdo javë. Shpresoj të vazhdojmë kështu edhe në sezonin e ardhshëm", - përfundoi Balaku.

[Davius]

Juventusi, me një dorë te titulli

Supersfida e titullit mes Milanit e Juventusit ka parë si fitues bardhezinjtë, falë një goli të Trezegesë. Ka qenë një Milan i dobët në pjesën e parë dhe më kërkues në të dytën, ku ka pasur disa raste për të barazuar rezultatin, sidomos me Inzagin. Por "Zonja" ka qenë e kujdesshme në mbrojtje dhe ka ditur të reagojë me zgjuarsi ndaj sulmeve të kuqezinjve. Tani Juvja ka tri pikë më shumë se skuadra e Ançelotit, por kur kanë mbetur edhe tri javë deri në fund të kampionatit, asgjë nuk është e sigurtë për titullin, ndonëse e ka vendosur një dorë aty.

Ndërkohë edhe ndeshjet e tjera të kampionatit nuk kanë shprehur asnjë verdikt përfundimtar. Tepër e pasigurtë lufta për vendin e katërt, pa harruar që duhen ende të luhen tri javët e fundit për skuadrat që rrezikojnë bien në Serinë B, të cilat janë 11-të. Lacio humbet në shtëpi me Udinezen, që shënon falë sulmuesit Iakuinta dhe vazhdon të ëndërrojë Championsin.

Edhe Sampdoria, që fitoi ndaj Leçes 3-0 synon Europën dhe javën që vjen do të ndeshet ndaj friulanëve për Champions. Interi ka siguruar vendin e tretë pas fitores së djeshme në Breshia, me një dygolësh të Martinsit dhe Vierit. Parma fiton ndaj Romës dhe i largohet zonës së ftohtë të renditjes. Edhe fitorja e Fiorentinës ndaj Kievos, u jep vjollcëve më siguri për të shpëtuar. Siena shkatërron Livornon në shtëpi 6-3. Rezultat "tenistik" që i lejon toskanët t'i largohen fundit. Atalanta mund Mesinën dhe shpreson te shpëtimi nga kategoria.

[Davius]

Ançeloti: Nuk do të dorëzohemi

Ka qenë një Karlo Ançeloti i hidhëruar ai që komentoi humbjen e Milanit ndaj Juventusit, në ndeshjen për titull. "Ne luajtëm ndeshjen tonë dhe u penalizuam nga një rast i veçantë. Nuk kam asgjë për t'i qortuar skuadrës sime." Për penalltitë e pretenduara: "Kafu u tërhoq nga Zambrota. Të fitojmë tri ndeshjet e ardhshme dhe më pas të shohim. Por me siguri, ne s'do t'i dorëzojmë armët".

Më pas, trajneri i kuqezinjve analizoi ndeshjen: "Bëmë gjithçka për ta ndryshuar rezultatin, megjithëse i shkuam fare pranë, me një pjesë të dytë të shkëlqyer. Nuk e nisëm shumë mirë ndeshjen, - tha Ançeloti, - por në pjesën e dytë e mbyllëm Juven në gjysmëfushën e saj. Ne bëmë atë që mundëm, barazimi do të kishte qenë rezultati më i drejtë." Shumëkush priste aktivizimin e Ambrozinit në vend të Sedorfit, por ja që luajti sërish holandezi: "Donim të zhvillonim një ndeshje cilësore, në të cilën ta udhëhiqnim ne lojën."

Një prej lojtarëve kyç të sezonit të kuqezinjve, Andrea Pirlo, u duk disi i stërmunduar: "Mund të rastisë që në këtë fazë të sezonit, dikush të jetë i lodhur". "Është më mirë të mos flas". Adriano Galiani u largua tepër i zemëruar nga tribuna, pas humbjes së Milanit ndaj Juves. Ai nuk donte të fliste, por, përbri pyetjes së një gazetari, "shpërtheu": "Është më mirë të mos flas, sepse përndryshe do të thosha disa gjëra për Kolinën...

Megjithatë pas kësaj humbjeje, nuk kemi ndër mend të futemi ne heshtje shtypi si Juvja".
Paolo Maldini e komenton i qetë dështimin e pësuar në Milano kundër Juventusit, ku sipas tij episodet e diskutueshme nuk munguan: "Nuk ka mbaruar ende, por është e pamohueshme që ata kanë një epërsi të rëndësishme, - tha kapiteni kuqezi. - Çfarë ndodhi në fund në dhomat e zhveshjes? Pas një ndeshjeje të tillë, është normale që të ketë pak qetësi, por gjithsesi, Ançeloti na përgëzoi të gjithëve. Kemi luftuar nga fillimi deri në fund. Mbi gjykimin e Kolinës nuk pashë gjë, gjithsesi janë vetëm episode. A ka Juvja një kalendar më të lehtë? Jo, ka tri pikë më shumë në renditje. Nëse në fund do të fitojë Juvja, do të thotë se e ka merituar më shumë, por nuk besoj se ka organikën më të fortë. Të gjithë ndiejnë keqardhje në një kampionat me 38 javë, të gjithë me përjashtim të atij që fiton titullin, sepse të gjithe kemi humbur pikë në mënyrë të papritur. Kolina? Gabimi qëndron, por nëse një gjyqtar fishkëllen në mënyrë koherente, atëherë gabimi edhe mund të falet", - përfundoi Maldini.


Berluskoni: Penalltia ishte e qartë
Silvio Berluskoni e ka komentuar kështu humbjen e brendshme të Milanit ndaj Juventusit, me rezultatin 1?0: "Pjesa e parë nuk ishte pozitive për ne, në pjesën e dytë u përpoqëm të ndreqnim diçka, por nuk u treguam të saktë. Problemi nuk janë individët, por një lodhje e përgjithshme që rëndon mbi ne. Juvja pati një moment fati dhe zotësie, por nuk është se ne nuk ishim në lartësinë e duhur. Penalltia? Me siguri që ishte. Megjithatë, shpresoj shumë që titulli të mos mbyllet me kaq."

[Davius]

Lajme shkurt nga Seria A

Samp, Novelino: Ndeshje e përkryer
Valer Novelino, trajner i Sampdorias. "Zhvilluam një ndeshje thuajse të përsosur, ? deklaroi trajneri. ? Këto tre pikë ishin siguria që na mungonte për Europën." Të dielën do të luhet sfida vendimtare ndaj Udinezes së Spaletit. "Shpresoj të jem edhe unë, ? saktsoi Novelino, që u nxorr jashtë fushe nga arbitri Gabriele pasi kishte kaluar disa herë zonën teknike të rezervuar për të. ? Dëmtimi i Saketit? Është për të ardhur keq, por kush do të zbresë në fushë do të dijë me siguri ta zëvendësojë."

Leçe, Zeman: Sampdoria superiore
Zdenek Zeman, trajner i Leçes. "Ata u treguan të zotë në shfrytëzimin e rasteve që iu paraqitën, kurse ne jo". Trajneri çek ia kushtoi një fjali ndeshjessë madhe të San Siros, e cila u fitua nga Juvja falë një goli të Trezegesë: "Milani ishte më i lodhur, kjo u pa edhe në Ligën e Kampioneve. Besoj se në këtë pikë Juvja do ta fitojë titullin."

Fiorentina, Zof: Të fitojmë ndeshjen direkte
Dino Zof, trajneri i Fiorentinës: "Është diçka shumë e rëndësihme që arritëm të fitonim këtë ndehsje direkte tepër të rëndëishme, - deklaroi trajneri Dino Zof, ? por e kemi mendjen që tani te sfida e ardhshme me Atalantën: skuadra e Rosit është në formë dhe ka ende mundësi të shpëtojë. Dje luajtëm një ndehsje të mirë, më në fund arritëm ta korrim atë që mbjellim. Më pëlqeu mbitëgjitha paraqitja e mbrojtjes."

Kievo, Bereta: U ndëshkuam nga Mikoli
Mario Bereta, është i dëshpëruar pas humbjes me Fiorentinën në "Bentegodi". "Nuk pashë një Kievo të dobët, - tha trajneri venet, - kemi luajtur thjesht ndeshjen tonë. U ndëshkuam vetëm një një mrekulli e një kampioni. Pa magjinë e Mikolit, ndeshja duhej të mbyllej 0-0. Ne patëm dy raste, ndërsa ata një, pastaj ajo goditje e tij përmbysi ndeshjen. Në fund të ndeshjes pati një episod të dyshimtë në zonën e rreptësisë, por nuk më pëlqen të komentoj punën e gjyqtarit".

Roma, Konti: Shkaktojmë shumë gabime
Bruno Konti, trajneri i Romës. "Sikurse na ka ndodhur shpesh, jemi ndëshkuar sërish nga dy episode. Na mungon aftësia e zotërimit të topit. Për shembull, në barazimin e Morfeos muri u hap duke e gënjyer Kurçin dhe kjo s'duhet të ndodhë". Roma tani do të luajë gjysmëfinalen e parë të Kupës së Italisë ndaj Udinezes, ama duke menduar edhe për derbin e së dielës ndaj Lacios. Drejtori i përgjithshëm Daniele Prade' mendon që tani për bardhekaltrit: "As që e çoj nëpër mend barazimin, duhet medoemos t'i kthejmë dinjitetin këtij ekipi."

Parma, Karminjani: Edhe Juves pikë!
Pietro Karminjani, trajner i Parmës. "Morëm tre pikë në fund të një ndehsje shumë të ndezur, ? tha Karminjani. ? E nisëm shumë keq, në pushim fola me skuadrën për disa gjëra dhe më pas, falë edhe shpirtit të lojtarëve në fushë, arritëm ta përmbysnim rezultatin. Tani na pret sfida me Juven në Torino, por s'është e thënë se s'mund të marim pikë. Parma mund t'i hapë probleme çdo skuadre, sigurisht, do të na mungojnë shumë lojtarë të rëndësishëm, por do të shkojmë atje për të arritur diçka."

Bolonja, Macone: I kënaqur me barazimin
Karlo Macone, trajner i Bolonjës. "E pranojmë këtë pikë të marë ndaj një Rexhine zotëruese. Por nuk i pranojmë akuzat e atyre që thanë që përpara takimit se rezultati ishte i paracaktuar." "Në pjesën e dytë patëm dy raste shumë të rëndësishme me Nervon dhe Zagoraqisin, ? vijoi trajneri. ? Le të themi se u tregua i zoti Soviero dhe disi më pak të zotë lojtarët e mi. Por ëhstë një rezultat që çmon dy kuadra që luftuan, duke i bërë ballë edhe një stresi të madh psikologjik."

Kaljari, Arrigoni: Nuk rrezikuam shumë
Trajneri i Kaljarit, Daniele Arrigoni e komenton kështu barazimin e djeshëm me Palermon: "Rastet më të mira në pjesën e parë i pati Palermoja, por edhe Kaljari pati të vetat, - tha Arrigoni. - Rezultati është i rëndësishëm për të dyja dhe nuk rrezikuam. Kaljari frenoi. Është normale, ishte e rëndësishme të kërkonim pikë për të shpëtuar. Nëse do të kishim bërë pikët e marra në fazën e parë, do të ishim në UEFA, por ende nuk jemi jashtë".

[Davius]

Lajme shkurt nga Premier Liga

Sanjol: Më kërkon Mançesteri
Mesfushori i ekipit të Bajernit, Uilli Sanjol, konfirmoi interesimin ndaj tij të ekipi anglez të Mançester Junajtidit. Mbrojtësi i Bajernit është pranë largimit nga Bundesliga, për t'u drejtuar drejt Premier Ligës, dhe ekipi i tij i ardhshëm mund të jetë Mançesteri. Pas interesimit të Arsenalit, "Djajtë e kuq" janë hedhur në sulm për të marrë kartonin e francezit. "Mançesteri dhe Arsenali janë interesuar për mua në kohët e fundit. Nëse do të largohem nga Bajerni, do të më pëlqente të luaja në Premier Ligë," - u shpreh Sanjoli.

Klaivert, drejt rikthimit për në Spanjë
Sulmuesi holandez, Patrik Klaivert, konfirmoi largimin e tij nga ekipi i Njukasëllit, në fund të këtij sezoni. Drejtuesit e Njukasëllit i ofruan lojtarit një kontratë të re, por Klaiverti refuzoi pas një sezoni zhgënjyes në "Seint Xheims Park". Klaiverti kërkohet nga disa ekipe spanjolle, përfshi Valencian, Seviljan dhe Real Betisin, dhe flitej edhe për një kalim në Turqi tek ekipi i Fenerbahçes. "Ka shumë mundësi të rikthehem në Spanjë," - përfundoi holandezi.

Barça mohon interesimin për Piresin
Ekipi i Barcelonës ka mohuar zërat për një interesim të mundshëm për mesfushorin francez, Robert Pires. Për mesfushorin 27-vjeçar, edhe një vit në kontratë me Arsenalin, u fol në mediat spanjolle për një kalim të mundshëm drejt ekipit kryesues të Primera Divizionit.
Drejtori sportiv i Barçës, Tziki Beguristein, tha se Piresi nuk ishte në planet e katalanasve. "Në këto momente jemi të interesuar vetëm për kampionatin. Nuk kemi folur me askënd dhe për më shumë nuk kemi pasur asnjë kontakt me Piresin."

Man.Siti përgënjeshtron shitjen e klubit
Klubi anglez i Mançester Sitit është distancuar nga spekullimet e kohëve të fundit, të lidhura me blerjen e klubit nga ish-bosi i Formula 1-shit, Edi Xhordan. Në kohët e fundit flitej se Xhordani dhe milioneri Brajan Riçardson kishin ofruar 100 milionë stërlina, për blerjen e klubit anglez, por ky lajm u përgënjeshtrua menjëherë nga drejtuesit e klubit anglez. "Nuk kemi pasur asnjë kontakt me zotin Xhordan ose me zotin Riçardson. Madje jemi të sigurtë që Xhordani zotëron disa aksione te Mançester Junajtidi, prandaj në ato që thuhen, nuk ka asgjë të vërtetë."

[Davius]

Luksemburgo: Gjithçka sipas planeve

Reali i Madridit ka arritur fitoren e shtatë radhazi në këtë kampionat. Eshtë hera e dytë që skuadra e Luksemburgos arrin diçka të tillë në këtë sezon. "Merengesët" mbajnë kështu ende gjallë shpresat për fitimin e titullit kampion. Ja cila ka qenë intervista e trajnerit Vanderlei Luksemburgo:
- Si ju duk 11-metërshi i fituar nga Ronaldo. Santaderi protestoi shumë...
- Nuk dua të flas për gjyqtarët. Nuk e pashë këtë episod në televizor kur shkova në shtëpi, sepse nuk m'u duk shumë me interes për fatet e ndeshjes.
- Rauli tregoi pjesët më të mira të repertorit të tij. Sidomos në rastin e golit të parë...
- Në atë aksion, Rauli dhe Ronaldo u kombinuan në mënyrë të shkëlqyer. Braziliani krijoi hapësirën dhe Rauli diti të përfitonte.
- Ndërsa Oueni ka shpërblyer edhe një herë besimin që i keni dhënë...
- Futbollistët nuk duhet të më shpërblejnë asgjë. Ata, ashtu si unë, punojnë vetëm për të mirën e kësaj skuadre. Oueni dhe Ronaldo luajnë të avancuar, ndërsa Rauli lëviz pas tyre. Topat për këtë treshe vijnë nga Bekham dhe Zidan. Kështu funksionon me pak fjalë loja jonë.
- Përse e goditi Ronaldo 11-metërshin?
- Nuk ka problem se kush e godet 11-metërshin. Varet si është gjendja psikologjike e futbollistit. Ishte vetë Zidan ai që i dha topin brazilianit.
- Ju vjen keq që nuk keni ardhur më parë në Madrid?
- Nuk është mirë të kritikosh punën e bërë nga të tjerët që kanë pasur vendin tënd. E rëndësishme është të jam këtu dhe puna po ecën ashtu siç duhet. Gjithçka vazhdon sipas planeve. Kemi dështuar vetëm në një ndeshje, atë ndaj Juventusit.

[Davius]

Roma-Lacio, derbi i frikës së madhe

Tifozët romanë janë mësuar me derbi, kur në valle kanë qenë objektiva shumë më prestigjioze se shpëtimi. Por sfida e së dielës që do të vërë përballë Romën dhe Lacion, do të ketë si pikësynim pikërisht atë për t'i qëndruar sa më larg zonës së rrezikshme. Në fakt, verdhekuqtë dhe bardhekaltrit ndodhen përkatësisht 4 dhe 5 pikë larg zonës së rënies nga kategoria, ku mund të përthithen në rast humbjeje. "Për ne do të jetë derbi i frikës", - ka thënë Çivu. Duken shumë larg derbet e sezoneve 2000 dhe 2001, të atyre sezoneve që u mbyllën me fitimin e titullit nga ana e skuadrave romane. Tani Roma dhe Lacio po zvarriten në luftën për shpëtim, në fazën finale të një sezoni që u ka dhënë të dyja ekipeve vetëm zhgënjime përvëluese.

Bardhekaltrit vijnë në derbin e së dielës me një pikë më shumë, që në këtë pikë të sezonit, tri javë përpara përfundimit, përbën një thesar jo me pak vlera. Por Lacio vjen pas tri humbjesh radhazi, e fundit ajo e brendshme ndaj Udinezes të dielën, dhe vetëm me një pikë të marrë në pesë ndeshjet e fundit: një barazim mund t'u shërbente të dyja skuadrave, por Papadopulo s'është dakord. "Do të luajmë për të fituar sikurse do të bëjë edhe Roma, - tha ai, - në një ndeshje, e cila mund të na shtyjë goxha përpara në renditje. Në futboll s'mund të parashikohet kurrë se ç'do të ndodhë.

S'mund ta prashikoj se ç'do të bëjnë kundërshtarët tanë dhe se ç'do të bëjmë ne." Pjesa e mbetur e kalendarit favorizon Romën, që do të përballet me Atalantën dhe Kievon, ndërsa bardhekalrit, në dy javët e fundit, do të kenë përballë Fiorentinën dhe Palermon. "S'kemi si të jemi të qetë, - pohoi Bruno Konti. ? Nëse do të isha dakord për një barazim me Lacion? Tani duhet të mendoj për Udinezen. Sigurisht, nëse do të kishim marrë një pikë në Parmë, do të kish qenë gjithçka ndryshe". Ndërsa, sipas Çivut, do të jetë thjesht "derbi i frikës. Nuk dua të mendoj për humbjen. Një skuadër si Roma nuk mund të bjerë në kategorinë e dytë". Si gjithnjë, do të jetë një sfidë me tension të lartë. Vetëm se kësaj here, tensioni do të jetë disi ndryshe.

[Davius]

Shevçenko: Ne besojmë ende te titulli

Humbja ndaj skuadrës së Kapelos djeg ende, por Karlo Ançeloti përpiqet ta analizojë me mendje të ftohtë ndeshjen si dhe atë që mund të ndodhë në të ardhmen: "Fitorja e Juves ishte e merituar? Nuk besoj". Për "Radio Anch'io", trajneri ka dhënë mendimin e tij lidhur me rezultatin e ndeshjes së madhe, edhe pse e ka pranuar në mënyrë sportive verdiktin e fushës. "Juvja u paraqit mirë në këtë ballafaqim, me mendje të qetë.

Ata u treguan të zotë në konkretizim, ndryshe nga ne, pos s'kam asgjë për t'u qortuar lojtarëve të mi, të cilët bënë gjithçka që mundën. Juvja ishte shumë e vendosur. Pamë në fushë dy skuadrat më të mira të Italisë, njëra prej të cilave fitoi. Por barazimi do të kishte qenë më i drejtë po të shohim pjesën e dytë." Ançeloti nuk do të ankohet së tepërmi për penalltinë që s'u dha në rastin e Kafusë. "Unë kam shumë besim te Kolina dhe nëse nuk e dha, kjo ndodhi sepse nuk e pa ose sepse nuk e konsideroi për penallti atë tërhqje. Kemi luajtur 10 ndeshje në 30 ditë dhe të gjitha me një trysni shumë të fortë. Mendoj se vepruam mirë, me pak fjalë na vjen keq, por jemi të qetë. Championsi? Me atë pjesë të dytë që luajtëm, nuk mendoj se treguam se jemi të lodhur."

Ançeloti nuk i druhet rënies së kuqezinjve pas rezultatit të së dielës dhe në kuadër të finales së Championsit, dhe theksoi qartë se që tani e deri më 25 maj, çdo rast do të jetë ai i duhur për të përgatitur takimin e rëndësishëm të Stambollit. "Të dorëzohemi në planin psikologjik? S'e besoj, nuk mungon shumë. Dy ndeshjet përpara kupës do të na shërbejnë për ta mbajtur të lartë përqendrimin, duke pritur ndoshta një hap fals të Juves. Ata favoritë? Juvja do të ndeshet me Parmën, që vjen nga disa rezultate të rëndësishme, por që s'e ka siguruar ende qëndrimin në Serinë A. Ne do të ndeshemi me Leçen, Palermon dhe mbi të gjitha me Udinezen, që synon të kualifikohet në Ligën e Kampioneve. Është e vështirë të bësh llogari, megjithatë, që të shpresojmë, duhet t'i fitojmë të gjitha."

Asnjë "dribling" orator edhe nga Shevçenko. Pavarësisht nga zhgënjimi, kampioni ukrainas s'është tërhequr prapa, edhe pse mundësia ishte e madhe: "Nuk kisha shumë dëshirë, do të kisha qëndruar me kënaqësi në shtëpi. Erdha sepse është një ngjarje e Milanit." Shevçenko ka marrë pjesë në etapën e dytë të "Milan Golf Tour", që po zhvillohet në "Golf Club Villa d'Este", në Montorfano (provincë e Komos). "Na vjen shumë keq, ? ka deklaruar sulmuesi kuqezi, ? edhe pse kjo humbje nuk është se na vret së tepërmi, sepse të paktën ne luftuam deri në fund, duke krijuar shumë raste në pjesën e dytë. Juventusi u tregua i zoti."

Dhe tani, kur mungojnë tri javë nga përfundimi, bardhezinjtë kanë tri pikë më shumë. "Nuk ka mbaruar ende, kampionati italian është gjithnjë i vështirë. Ne duhet të vazhdojmë të besojmë, edhe pse e humbëm rastin tonë. Nëse ata do të tregohen të zotë deri në fund, atëherë është e drejtë që të fitojnë. Ne të lodhur? Me siguri, të luash shumë, nuk të bën mirë dhe ne kemi zhvilluar 10 ndeshje të rëndësishme brenda një muaji. Por tani duhet të përgatitemi sa më mirë për ndeshjet e ardhshme, duke qenë se kemi kohë për ta bërë këtë."

[Davius]

Makelele: Respekt maksimal për Mançesterin

Pas fitores 1-0 ndaj Çarltonit në "Stemford Bridge", Çelsi do të ndeshet sot ndaj ekipit të Mançester Junajtidit dhe do të kërkojë të mbajë rekordin e 27-të ndeshjeve pa pësuar asnjë humbje. Çelsi kryeson me 91 pikë, një më pak se rekordi i Mançester Junajtidit, i cili në sezonin 1996-97 e mbylli kampionatin në kuotën e 92 pikëve. Gjithashtu, ata mund të thyejnë edhe rekordin e Arsenalit, i cili e mbylli sezonin e vjetshëm vetëm me 17 gola të pësuar. Mbrojtja e Çelsit ka pësuar vetëm 13 gola gjatë këtij sezoni.

Mesfushori francez, Klod Makelele, ndaj Çarltonit shënoi golin e tij të parë me fanellën e Çelsit. "Jemi një grup profesionistësh dhe duam ta mbyllim sa më mirë këtë sezon. Kemi respekt për ekipet kundërshtare dhe ndeshjet ndaj Mançesterit dhe Njukasëllit nuk do të nënvleftësohen absolutisht. Makelele ka qenë një nga lojtarët decizivë për Çelsin, edhe pse Reali nuk e konsideroi si një lojtar të rëndësishëm. "Ndihem më i çliruar tani që fituam titullin. Me gjithë vështirësitë që kam kaluar gjatë karrierës, tani jam vërtet në formë. Te Çelsi ka lojtarë të rinj, të cilët kanë dëshirë të fitojnë gjithçka, kurse te Reali lojtarët ishin afirmuar dhe kishin fituar mjaft trofe," - deklaroi Makelele. Për francezin, objektivi i ardhshëm do të jetë fitimi i Ligës së Kampioneve dhe ai u shpreh se kjo nuk do të jetë aspak e lehtë:

"Në dy sezonet e fundit kemi treguar se jemi një ekip mjaft i fortë. Gjatë këtij sezoni treguam se mund të arrinim diçka në Europë. Me ardhjen e Mourinjos, Çelsi u përmirësua shumë në të gjitha repartet e fushës. Në sezonin e ardhshëm do të përmirësohemi akoma më shumë dhe kam besim se Çelsi do të ketë cilësitë për të mposhtur ekipe si Reali dhe Milani," - përfundoi Makelele.
Trajneri portugez i ekipit të Çelsit, Hoze Mourinjo, deklaroi se ekipi i tij do të mësonte nga dështimet e këtij viti në Ligën e Kampioneve, për të motivuar lojtarët e tij për sezonin e ardhshëm. Mourinjo u shpreh optimist dhe deklaroi se ekipi i tij dëshiron të fitojë akoma më shumë në të ardhmen.

Ekipi i Çelsit fitoi titullin kampion pas 50 vitesh, por u eliminua në gjysmëfinalet e Championsit nga ekipi i Liverpulit. Edhe në edicionin e kaluar të Championsit, blutë u eliminuan në gjysmëfinale nga ekipi i Monakosë, por Mourinjo u shpreh i bindur se në sezonin e ardhshëm, Çelsi do të jetë përsëri një nga favoritët për fitimin e këtij trofeu. "Nuk jemi akoma të "ngopur" me sukseset. Mendoj se në futboll duhet të kërkosh gjithmonë motivacionin e duhur. Aspekti negativ i këtij sezoni është eliminimi nga Liverpuli, pasi nuk do të kemi mundësi të luajmë në finalen e Stambollit.

Por, nga ana tjetër, ky do të jetë një motivacion mjaft i mirë për sezonin e ardhshëm. Fituam Premier Ligën, por nuk jemi 100% të lumtur, pasi humbëm gjysmëfinalen ndaj Liverpulit. Këtë mendim kanë të gjithë lojtarët e ekipit. Në sezonin e ardhshëm do të më duhet të punoj më shumë në dobësitë e skuadrës, por jam i sigurtë që të gjithë lojtarët do të kenë të njëjtën dëshirë dhe ambicie, për të fituar Championsin dhe titullin. Po të fitoja gjithçka, do të isha vërtet i lumtur. Nëse humb diçka, nuk mund të jesh plotësisht i lumtur," - deklaroi Mourinjo.