Gazeta Elektronike: "Futbolli Ndërkombtar"

[Davius]

Ferguson: Ferdinandi, i lirë të vendosë

Aleks Ferguson ka deklaruar se nuk do të bëjë presion mbi mbrojtësin Ferdinand, për të firmosur kontratën e re me klubin e Mançesterit. Ky reagim i Fergusonit erdhi pas deklaratave të 26-vjeçarit, i cili disa ditë më parë shprehu dëshirën e tij për të qëndruar tek ekipi i "djajve të kuq". "Nuk duam që t'i bëjmë presion askujt. Mund t'u kërkosh lojtarëve disa gjëra, por nuk mund t'i detyrosh për asgjë. E rëndësishme është që ai e di se ne duam që ai të qëndrojë me ne edhe në vitet e ardhshme. Prandaj nuk duam që të detyrojmë askënd të firmosë pa vullnetin e tij. Nëse nuk është akoma i sigurtë, le të mendohet gjatë para se të vendosë," - deklaroi Fergusoni.

Kërbishli: Nuk largohem nga Çarltoni
Trajneri i Çarltonit, Alan Kërbishli, ka deklaruar se nuk ka ndër mend të japë dorëheqjen nga klubi anglez. Ekipi i tij pësoi një humbje 4-0 ndaj Mançesterit në javën e kaluar, por në intervistën e tij pas ndeshjes, ai tha: "Po mendoj për të ardhmen dhe dëshiroj të qëndroj këtu. Ky rezultat nuk na kënaq aspak, por mendoj se në sezonin e ardhshëm, gjithçka do të jetë ndryshe. Kemi shumë punë për të bërë gjatë verës," - përfundoi Kërbishli.

[Davius]

Benitez: Radha jonë për të festuar

Liverpuli do të luajë sot ndaj Çelsit të gjitha shpresat e tij, për ta bërë të paharrueshëm këtë sezon. "Të kuqtë" do të synojnë finalen e gjashtë në Champions dhe për ta bërë diçka të tillë, duhet të mundin në "Anfild Road" kampionët e rinj të Anglisë, Çelsin. Trajneri i Liverpulit, në prag të kësaj ndeshjeje, thotë: "Duam me çdo kusht arritjen e finales, sepse kjo ndeshje është e paharrueshme për futbollistët, deri në fund të karrierës së tyre. I kemi të gjitha mundësitë të fitojmë dhe ka ardhur radha e Liverpulit të festojë. Do të jetë një ndeshje e bukur, e cila do të vendoset nga episode të veçanta. Ai që gabon, do të ndëshkohet.

" Liverpuli, në rast se fiton Ligën e Kampioneve dhe nuk renditet e katërta në kampionat, nuk mund të marrë pjesë në Champions sezonin e ardhshëm. UEFA ka deklaruar se do ta rishikojë vendimin e saj, ndërsa trajneri Benitez u shpreh: "Duket qesharake që të fitosh Championsin dhe të mos luash në vitin e ardhshëm. Me logjikë, fituesi duhet të kualifikohet automatikisht, por në qoftë se arrijmë të renditemi në vend të katërt, nuk ka rëndësi se çfarë do të ndodhë. Eshtë e rëndësishme të renditemi në vend të katërt, për të mos qenë të varuar nga vendimi i UEFA-s dhe për këtë duhet t'i fitojmë të gjitha ndeshjet e mbetura."


Size: T'i sjellim blutë me këmbë në tokë
Sulmuesi i Liverpulit, Dijbril Size, në prag të ndeshjes që skuadra e tij ka me Çelsin, në gjysmëfinalen e Ligës së Kampioneve, u shpreh: "Nuk e kemi frikë Çelsin. Në përballjet e mëparshme me ta kemi treguar se mund t'i mundim. Duhet t'i sjellim blutë me këmbë në tokë dhe ta shpërngulim festën në Liverpul."

[Davius]

Kafu: PSV-ja, më e fortë nga ç'duket

Fillon java "e zjarrit". Ajo e Milan-Juve, që thuajse sigurisht mund të vendosë pikat mbi "i", përsa i përket fituesit të kampionatit. Në kampin kuqezi duket një atmosferë e qetë. Dhe Marko Evagjelista Kafu shpreh të gjithë entuziazmin e tij: "Skuadra është mirë, madje shumë mirë, duke parë që jemi të parët në renditje dhe që po luajmë në gjysmëfinalen e Ligës së Kampioneve". Titull dhe Champions. Milani rrezikon të përmbushë një "dopjetë" historike. Por anësorit brazilian nuk i pëlqejnë ndeshjet nën diell: "Të luash pasdite, për ne është keq, ankohet Kafuja.

- Bën shumë nxehtë. Para ndeshjes me Juven, duhet të mbyllim llogaritë me PSV Eindhovenin nesër." Fitorja 2-0 e ndeshjes së parë do ta lejojë Milanin ta drejtojë më së miri lojën në "Philips-Stadium". "Do të jetë më e vështirë nga ç'mund të parashikohet, - shpjegon numri 2 i Milanit për ndeshjen me holandezët. - Që në ndeshjen e parë, ata luajtën një takim të shkëlqyer. Ne arritëm të merrnim një rezultat shumë të mirë, shpresojmë ta përsërisim dhe të kualifikohemi. Kujt i druhem? PSV-ja ka një mesfushë të vendosur mirë, e qarkullon mirë topin. Duhet të kemi kujdes nga topat e lartë".
Në fillim PSV-ja, pastaj Juvja.

Një sfidë tërheqëse për t'u luajtur dhe fituar. Por Kafusë nuk i intereson heshtja për shtyp e "Zonjës së vjetër", videoja e Kanavaros apo polemikat pas pezullimit të Ibrahimoviçit. "Parashikoj një ndeshje të ngarkuar emocionalisht dhe të bukur, - vazhdon mbrojtësi kuqezi. - Gjithçka që thuhet jashtë fushave të futbollit, nuk na intereson. Besoj se Kapeloja do të përpiqet t'i japë qetësi skuadrës së tij dhe të punojë gjatë javës i qetë. Edhe ata e dinë se është një ndeshje shumë e rëndësishme. Do të kërkojnë ta luajnë sa më mirë. Komplot? Nuk kam dëgjuar asgjë. Sot po bëhen shumë diskutime, por duhet të mendojmë vetëm të luajmë. Sa më pak të flitet dhe sa më shumë të luhet, aq më mirë është.

Nëse Juvja ka vendosur të hyjë në heshtje shtypi, duhet respektuar vendimi i saj. Kanavaro? Nuk flas për këto gjëra, them vetëm se e njoh dhe për mua është i madh. Kaq". Braziliani i Milanit mendon vetëm për futbollin e luajtur: "Arrij të fle mirë, pavarësisht nga pak alergji, por punoj si gjithnjë, - shprehet braziliani. - E di që kemi përgjegjësi të madhe. Në katër ditë do të luajmë në fillim një ndeshje vendimtare për kualifikimin në finale të Championsit dhe nëse kalojmë, do të jetë një sezon i mrekullueshëm, pastaj sfidën që mund t'i japë një përmbysje të gjithë kampionatit. Sekreti im? Dëshira për të fituar. Vrapoj shumë, edhe pse karikohem nga objektivat që po i afrohemi shumë. Unë përpiqem vetëm të stërvitem mirë dhe të pushoj shumë. Objektivi im? Botërori 2006".

[Davius]

UEFA, "dritë jeshile" për Liverpulin

Presidenti i UEFA-s, Lenart Johanson, deklaroi se Anglia mund ta ketë mundësinë të përfaqësohet nga pesë ekipe, nëse Liverpuli do të fitonte Ligën e Kampioneve të këtij viti. Ekipi i Rafa Benitezit ndodhet në vend të pestë në kampionat, tri pikë pas Evertonit. Vetëm katër të parat do të kualifikohen për në edicionin e Championsit të ardhshëm dhe këta do të jenë Çelsi, Arsenali, Mançesteri dhe Evertoni. Për këtë arsye u hap një debat i gjatë ndërmjet UEFA-s dhe drejtuesve të Premier Ligës, të cilët kërkonin një vend shtesë, nëse Liverpuli do të fitonte këtë edicion të Championsit. Më 1999-n, në Spanjë ndodhi e njëjta gjë dhe atëherë Reali i vendit të pestë zuri vendin e Real Saragozës dhe u kualifikua, pasi kishte fituar Championsin.

UEFA kishte bërë të ditur se nuk mund të pranonte që Anglia të përfaqësohej nga pesë ekipe dhe se u takonte drejtuesve të Premier Ligës të vendosnin se cili ekip duhej të luante në Championsin e ardhshëm, por Johansoni deklaroi para pak ditësh se rasti i mundshëm i Liverpulit, mund të merrej në konsideratë. "Dera është gjithmonë e hapur. Ne jemi aty për t'i shërbyer futbollit dhe jo për të vënë diktatin tonë. Ata do të jenë të mirëpritur të bëjnë një kërkesë, në qoftë se Liverpuli do të fitojë Championsin. Nëse do të jetë e mundur, mund të bëhet një përjashtim për fituesin e këtij edicioni," - deklaroi Johansoni

[Davius]

Ançeloti: Championsi, objektivi ynë kryesor


Në prag të ndeshjes së kthimit të gjysmëfinaleve të Ligës së Kampioneve ndaj Psv Eindhovenit, Karlo Ançeloti ka pohuar: "Finalja e Ligës së Kampioneve është objektivi ynë kryesor, duhet të tregohemi shumë të kujdesshëm, sepse jemi të vetëdijshëm se mund të kryejmë një arritje të madhe." Më pas, për ndeshjen ndaj holandezëve: "E dimë se mund ta shfrytëzojmë më së miri avantazhin pa bërë shumë llogari. Skuadra e ka marrë veten dhe është mirë". Ka qenë një Ançeloti shumë i qetë, ai që është shfaqur në prag të sfidës ndaj PSV-së, një ndeshje që paraprin një tjetër takim të një rëndësie thelbësore për sezonin kuqezi. Në fakt, të dielën do të luhet ndeshja për titull ndaj Juves.

"Ndihemi shumë të qetë dhe kemi besim te ballafaqimi si me këtë ndeshje, ashtu edhe me këtë javë kaq të rëndësishme, - theksoi Ançeloti. - Përsa i takon ndeshjes së sotme mbrëma, vlen e njëjta tezë që vura në dukje në prag të çerekfinales së kthimit ndaj Interit. Pra, do të jetë e rëndësishme të arrijmë të shënojmë sa më parë të jetë e mundur.

PSV-ja nuk ka ritme tepër të larta, por do të luajë në një tjetër mënyrë në krahasim me "San Siron". Do të ushtrojë më shumë trysni në fillim, por ky mund të jetë një avantazh për ne, sepse prapa, nëse e befason me kundërsulm, ajo lëshon disi pe. Është një transfertë shumë e rëndësishme, është në lojë finalja e Ligës së Kampioneve, pikërisht objektivi ynë kryesor, duhet të tregohemi shumë të kujdesshëm, sepse jemi të vetëdijshëm se mund të arrijmë një objektiv të madh." Championsi ka përparësi, por lufta për titull me Juven vlen shumë për kuqezinjtë.

Milani ndodhet një hap larg "Parajsës". Kështu që trajneri kuqezi, gjatë nisjes së ekipit për në Eindhoven, edhe pse e cilëson më të rëndësishme Ligën e Kampioneve, nuk e lë aspak pas dore kampionatin. Përsa i takon këtij të fundit, ka nisur të merret parasysh edhe një ndeshje shtesë me Juven, për të përcaktuar se kush do të jetë fituesi. "Jo, s'ma merr mendja se do të ketë një ndeshje shtesë, ? ka pohuar trajneri. ? Por kjo s'do të thotë se do të fitojë Milani".

Në fakt, njëfarë frike për lodhjen e shumtë të grumbulluar në këtë sezon nga lojtarët kuqezinj, edhe ekziston. "Është e vërtetë, jemi të lodhur, ? ka pohuar Paolo Maldini. ? Në këtë pikë të kampionatit, të gjitha skuadrat janë të lodhura, por kjo s'përbën një kambanë alarmi për ne".

[Davius]

Sheva: Të japim gjithçka në fushë

Pas një 2?0-je, vetëm një i marrë do të lejonte të mposhtej. Milani kërkon në Eindhoven rrugën drejt Stambollit, ku më 25 maj do të luhet finalja e Ligës së Kampioneve. Të gjithë sytë e milanistëve sonte mbrëma do të jenë të drejtuar nga ai, Andrij Shevçenko, i cili mund të jetë sulmuesi i vetëm në skemën karakteristike të Ançelotit, 4?3?2?1, me Sedorfin dhe Kakanë në mbështetje të "carit". "Kjo është një ndeshje e veçantë, ? ka bërë të ditur ukrainasi. ? Ata janë të rrezikshëm, do të luajnë një ndeshje shumë taktike, duke u përpjekur t'i shfrytëzojnë ritmet e larta sipas teorive të Hidinkut. Pra, me qarkullim topi në mesfushë dhe me kundërsulme të papritura brenda hapësirash të ngushta." Sheva bën llogaritë. Mungojnë edhe katër ndeshje në kampionat dhe një në Champions, pasi atë në Turqi ai nuk e merr ende në konsideratë. Por, në këtë pikë, sikurse do të thoshte Kafuja, është e volitshme t'i luash të gjitha, duke dhënë maksimumin.

"Lodhje? Sigurisht që jemi të lodhur, sepse kemi luajtur 8 ndeshje në 26 ditë, por është e bukur të jesh i lodhur dhe të luash ndeshje të tilla", - ka qenë teoria e golashënusit ukrainas. Ai ka vijuar më tej: "Është çështje mendësie, por kur luan ndeshje si kjo e mbrëmjes së sotme, s'ke ku të shkosh. Duhet të japësh gjithçka, pasi, siç dihet, futbolli mund të të bëjë edhe ndonjë shaka pa kripë. Sot duhet të jemi të vetëdijshëm për forcën tonë". Eindhoveni dhe më pas në Milano për t'u rihedhur në kampionat, ku kuqezinjtë të dielën në orën 15.00 do të ndeshen me Juventusin. "Juvja s'më intereson, - pohoi Sheva, - tani ka rëndësi vetëm PSV-ja, që është shumë e rëndësishme

[Davius]

Vieri: Edhe një vit patjetër me Interin

E vetmja gjë që nuk mund ta shtynte, ishte ai gol. Pjesa tjetër edhe mundet, para së gjithash kur bëhet fjalë për të ardhmen, që Kristian Vieri ka ditur gjithnjë ta menaxhojë me kujdes. Dhe një gjë e tillë fillon me datën e skadencës së kontratës së tij. "Që është me Interin dhe ka vlerë ende edhe për një vit", - ka përsëritur për të disatën herë të dielën që shkoi. Po ku i dihet nëse do të vazhdojnë të jenë sërish bashkë Vieri dhe Morati. Përsa u takon golave, "Boboja" gjithnjë ia ka dalë i vetëm. Edhe pse më parë nuk ka luajtur kushedi se çfarë, të dielën, në minutën e 31-të në Inter-Siena, rikthehet te goli, i cili i mungonte që prej 6 shkurtit, kur sulmuesi shënoi me 11-metërsh golin e barazimit ndaj Parmës. "Duke parë që jam 32 vjeç dhe po luaj prej kohësh, nuk duhet t'i tregoj asgjë askujt, - thotë Vieri, - sepse në stërvitje tallem gjithnjë me Kili Gonzalesin, pasi nuk jep asnjë kros të saktë. Duke u përpjekur për të shënuar, rrezikova ta godisja topin me hundë, sepse e kam pak të madhe. Por gjithsesi më shkoi mirë".

Shumë mirë i shkoi në pjesën e parë, kur Vieri hyri në fushë i vendosur, duke zëvendësuar të dëmtuarin Kruz. "Kisha kohë që nuk luaja më shumë se një orë (që nga derbi i kampionatit më 27 shkurt, që mbetet ndeshja e tij e fundit si titullar), - tregon sulmuesi zikaltër, - dhe në fund isha pak i lodhur, siç u pa mirë kur Adrianoja më dha atë top dhe unë e goditja në qiell. U përpoqa ta godisja në shtyllën e dytë, por nuk kisha më fuqi. Pastaj ishte edhe një temperaturë e nxehtë, ndaj vuajtëm të gjithë". Në të vërtetë, në dy muajt e fundit, Vieri ka vuajtur për shumë gjëra të tjera. Ndoshta i është dashur të pranojë, duke iu dorëzuar zgjedhjeve të Mançinit, që më shumë se një herë e ka detyruar të ulet në stol, saktësisht 8 herë mes kampionatit dhe Championsit, pas atij derbi të dy muajve më parë, që ishte "fotografia" e saktë e filozofisë së trajnerit.

Mançini filloi ta shikonte me sy tjetër sulmuesin, por koha do ta tregojë nëse marrëdhëniet e mira mes të dyve do të jenë të mira dhe normale. Të dielën, kur Mançini foli me diplomaci: "Nuk mrekullohem nëse Vieri nuk ka qenë i kënaqur të shkojë në stol. Asnjë nuk është dhe jo vetëm Vieri. Unë e çmoj Bobon si njeri dhe si lojtar, dhe nëse kohët e fundit nuk ka luajtur shumë, ka ndodhur për shkak të problemeve në gju. Nëse një lojtar nuk luan, është e dukshme që ka probleme.

Nuk varet nga fakti që trajneri bëhet në mënyrë të papritur i çmendur. Por nuk kam ndryshuar ide për Vierin. Nëse është mirë dhe stërvitet rregullisht, është një lojtar i rëndësishëm". Ndërkohë, Vieri mendon kështu: "Trajner është Mançini dhe formacionin e bën ai, - shpjegoi numri 32 i Interit. - Jam ulur shpesh në stol, por ajo që ka rëndësi, është të jesh i gatshëm në momentin e duhur. Kam pasur probleme në gju, sepse është një problem i vjetër dhe ndonjëherë i duhet pak "vaj".

Tani jam më mirë dhe jam i gatshëm. Diplomatik? Mos duhet të bëj gjithnjë rrëmujë, përndryshe duket se jam gjithnjë dhe vetëm unë ai që krijoj probleme. Jo, jo, me Mançinin është gjithçka mirë, nuk ka asnjë problem. E ardhmja ime tek Interi është gjithnjë një problem? Me Interin kam një tjetër vit kontratë, ndaj i mbyll të gjitha "portat". Sa i takon mbylljes së karrierës dhe barit që do të hapë në Majemi, në fillim do të luajë edhe 5-6 vjet dhe të paktën njëri nga këta do të jetë me Interin, sepse këtë e thotë kontrata".

[Davius]

Bekenbauer: Magati do të na japë Championsin

Presidenti i ekipit të Bajernit të Mynihut, Franc Bekenbauer, beson se ambiciet e trajnerit Feliks Magat do të sjellin suksese në edicionin e ardhshëm të Ligës së Kampioneve. Bajerni siguroi titullin e 19-të në Bundesligë, tri ndeshje para përfundimit të kampionatit, por eliminimi në çerekfinalet e Championsit nga Çelsi, ka prishur një sezon pothuajse të përkryer. Bajerni humbi me rezultatin e përgjithshëm 6-5 ndaj londinezëve, por Bekenbaueri u shpreh se ekipi bavarez i ka të gjitha cilësitë për të fituar Championsin e vitit të ardhshëm. "Kam besim te Magati.

I njoh ambiciet e tij dhe e di që ai nuk do të dorëzohet derisa të fitojë një Ligë Kampionesh. Ndaj Çelsit nuk patëm fatin nga ana jonë, por jam i bindur se kolektivi që kemi formuar në ekip, do të ketë sukses vitin e ardhshëm," - deklaroi Bekenbaueri. Lojtarët e tanishëm të Bajernit mund të reduktohen si pasojë e planit të klubit, për të kursyer në merkaton e verës, edhe pse drejtori ekzekutiv, Uli Hënes, dhe trajneri Magat kanë deklaruar se vitin e ardhshëm kërkojnë të sjellin në Mynih një lojtar të nivelit botëror. Me largimin e Robert Kovaçit në fund të këtij sezoni, Bajernit do t'i duhet të sjellë në "Olimpia Stadium" një mbrojtës qendre, për të zëvendësuar largimin e tij.

Prioritet për Bajernin do të jetë edhe zëvendësimi i Mikael Balakut, në qoftë se ky i fundit nuk pranon ta rinovojë kontratën e tij me klubin bavarez. Gjithashtu, Bekenbaueri i këshilloi klubit të tij t'i zgjasë kontratën francezit Biksente Lizarazu, të cilit i përfundon aktualja në fund të sezonit. Kampioni i botës dhe i Europës është akoma në dilemë për të ardhmen e tij, por pas deklaratave të presidentit të klubit, ai mund të mos largohet nga kampionët e Gjermanisë. "Ai është një shembull për të gjithë ekipin. Do të doja që të qëndronte me ne edhe për sezonin e ardhshëm." Lizarazu, 35 vjeç, u kthye te Bajerni pas një eksperience jo të suksesshme tek ekipi francez i Marsejës.

[Davius]

R.Karlos: Në futboll ndodh gjithçka

Natyra e tij optimiste nuk e lejon të dorëzohet. Për këtë, Roberto Karlos vazhdon të shpresojë te titulli kampion: "Në futboll ndodh gjithçka. Barcelona nuk është shpallur ende kampione." Kur duhen edhe katër javë nga fundi i Primera Divizionit dhe Reali është gjashtë pikë larg Barcelonës kryesuese, Roberto Karlos ka lëshuar këtë intervistë:
- Situata në kreun e Primera Divizionit ka mbetur e njëjtë edhe pas kësaj jave...
- Nuk ka ndryshuar asgjë, por nuk do të ishte kështu në rast se ne nuk fitonim në San Sebastian. Ishte një ndeshje e vështirë ndaj një skuadre që ushtroi presion të vazhdueshëm dhe nuk u dorëzua deri në fund. Ne arritëm të fitojmë, duke treguar se jemi një skuadër e fortë.
- Besoni se Barcelona mund të ndalet në "Mestaja"?
- Po flitet shumë për këtë ndeshje, por në radhë të parë duhet të mendojmë të fitojmë ndeshjen tonë. Santanderi po luan një futboll të mirë dhe na duhet me çdo kusht fitorja, për të mbajtur ende gjallë shpresat për titull. Në rast se nuk arrijmë të marrim tri pikët në këtë ndeshje të vështirë, atëherë është e kotë të flasim për Barcelonën.
- Ndihet presioni i vendeve të para në renditje?
- Të jesh në majën e renditjes është gjithmonë e bukur. Por kur fillon të humbasësh, vihesh shumë shpejt në qendrër të kritikave. Kjo ndodhi me ne në fillim. Më pas e ngushtuam diferencën nga 11, në katër pikë me Barcelonën, por gabuam sërish. Kemi lënë pikë në "Bernabeu" ndaj Deportivos, Getafes dhe Bilbaos, kjo na ka penalizuar shumë. Në rast se Barcelona do të fitojë, atëherë do të meritojë të gjitha komplimentet e mia, por nuk mund të dorëzohemi. Të shtunën do të luajmë në "Bernabeu" dhe duam me çdo kusht fitoren.
- Katalanasit kanë thënë se nuk janë të shqetësuar nga presioni...
- Psikologjikisht, për ta kjo thënie është shumë e rëndësishme, i japin moral vetes, sepse në të vërtetë presioni mbi skuadrën kryesuese është gjithmonë shqetësues. Ky presion vjet na kushtoi titullin kampion.
- U rikthye Ronaldo...
- Nuk është larguar asnjëherë dhe për këtë nuk mund të flasim për rikthim. Roni mbetet i njëjti, kaloi një periudhë të pafat dhe tani filloi të shënojë rregullisht. Nuk ka kaluar një periudhë të mirë, por golat e tij nuk rreshtin kurrë.
- Mund të shpallet golashënuesi më i mirë i Primera Divizonit?
- I duhen edhe katër gola për të arritur Etonë dhe Roni mund t'i shënojë. Por të mos harrojmë që edhe Eto ka bërë një sezon të jashtëzakonshëm dhe ka shënuar gola të rëndësishëm.
- Patë një Barça nervoze ndaj Albasetes?
- Më shumë pashë një skuadër që nxitohej sesa nervoze. Gjithsesi, ky nxitim po vononte golin e tyre ndaj një Albaseteje që mbrohej me kujdes. U desh talenti i Ronaldinjos dhe Etosë që katalanasit të zgjidhnin ndeshjen në 20 minutat e fundit.
- Në fund, nga ndeshjet që kanë mbetur, cila është më e vështira për Realin?

- Për vetë pozitat që ka në renditje, përballja me Seviljen do të jetë më e vështira.

[Davius]

Deko i sigurt: Barça kampione!

Mesfushori portugez i Barcelonës, Deko, është shprehur i sigurtë dhe ka deklaruar se skuadra e tij do ta fitojë titullin kampion. Kur duhen edhe katër javë nga fundi i kampionatit, Barcelona ka një avantazh prej gjashtë pikësh ndaj Realit ndjekës. Këtë javë, skuadrën e Rajkardit e pret përballja e vështirë në "Mestaja", me Valencian vendëse. Gjithsesi, Deko thotë: "Titulli është i yni dhe për këtë jam plotësisht i sigurtë. Jam shumë i lumtur që arrita një objektiv kaq të rëndësishëm në vitin tim të parë te Barcelona.

Nuk mund të shpresoja për më mirë. Kam luajtur rregullisht dhe njerëzit më duan, kushtet ideale për të festuar si duhet fitoret." Ish-mesfushori i Portos, pasi ka "hipotekuar" titullin e 20-të në historinë e klubit katalanas, flet për skuadrën e Rajkardit: "Kemi fituar më shumë kurajo dhe personalitet në fushën e lojës. Fitoret na kanë dhënë sigurinë dhe qetësinë e duhur për të përballuar këtë fund sezoni. Kjo u pa edhe në ndeshjen ndaj Albasetes, ku nuk e humbëm toruan, por me qetësi kërkuam golin derisa Eto na dha avantazhin." Në fund, Deko mendon se titulli kampion do të ishte plotësisht i merituar për Barcelonën: "Në fillim të sezonit jemi goditur nga dëmtimet e disa futbollistëve të rëndësishëm, por gjithsesi javë pas jave treguam se jemi skuadra më e fortë në Spanjë. Më vjen keq vetëm që aventura jonë në Kupën e Mbretit dhe Ligën e Kampioneve, nuk vazhdoi aq sa duhej."