Gazeta Elektronike: "Futbolli Ndërkombtar"

[Davius]

Mançini: Po të pësojmë pak, jemi të përsosur

"Pjesa jonë e parë ishte tepër e bukur, ndoshta duhej të kishim shënuar një gol më shumë, për të qenë më të qetë në pjesën e dytë, e cila u kushtëzua nga një vapë e madhe. Ata pësuan menjëherë një gol dhe më pas e patën gjithçka më të vështirë, madje e përsëris: luajtëm vërtet mirë në pjesën e parë, ishim thuajse të përkryer." Roberto Mançini ka bërë një analizë fill pas ndeshjes ndaj Sienës. "Tani po rikuperojmë Vierin dhe Adrianon, ? vijoi ai, ? është e rëndësishme t'i kesh këta sulmues të mëdhenj në formë. Më vjen keq për Kruzin, pati një problem në këmbë, do të shohim në ditët e ardhshme se si do të ndihet. Për fat të keq, sivjet kemi pësuar shumë gola në minutat e para, çka na ka dëmtuar shumë. Kampionatet fitohen duke pësuar më pak, sezonin e ardhshëm duhet të përmirësohemi në këtë aspekt." Një pyetje merkatoje për Adrianon. "Radio?mercato" flet për një ofertë prej 100 milionë eurosh nga ana e Çelsit për Adrianon: "Ai është një lojtar i rëndësishëm për ne, është një sulmues i jashtëzakonshëm dhe në fillim të vitit shënonte një gol në çdo ndeshje. Adriano do të qëndrojë me ne, edhe pse këto gjëra nuk duhet të m'i pyesni mua.

100 milionë janë shumë, por për ne ai është një lojtar shumë i rëndësishëm."
Mançini më pas komentoi paraqitjen e Kili Gonzalesit: "Sikurse Kruzi, ai po gjen ritmin e ndeshjes duke luajtur. Që të dy kanë cilësi dhe përvojë, janë lojtarë të rëndësishëm". Për të përfunduar, një pyetje për çështjen e videos së Fabio Kanavaros: "Duhen nxjerrë rregulla, të cilat të respektohen. Ka njerëz që kur janë keq, i shmangin të gjitha ilaçet, kurse disa të tjerë marrin këshilla nga doktori. Duhen vënë vetëm disa rregulla, të cilat më pas duhet të respektohen nga të gjithë." Fytyra e Mançinit rrezantonte një kënaqësi të përgjysmuar: "Ishte shumë vapë, ? ka komentuar trajneri i Interit, ? ishte e vështirë të luanim. I falemi Kruzit që po kalon një formë të shkëlqyer. Sezonin e ardhshëm, vetëm duke pësuar më pak gola, do të jemi në lartësinë e Juves dhe Milanit."
"Sot hyra, luajta 60 minuta dhe shënova, ndihem i kënaqur për golin dhe për formën time", - ka qenë ky komenti i Kristian Vierit pas fitores ndaj Sienës. "Për fat të keq kemi dalë nga Championsi dhe në kampionat jemi disi prapa, tani duhet të përpiqemi të renditemi në vend të tretë dhe të fitojmë Kupën e Italisë. E rëndësishme është të përpiqemi të japim gjithnjë maksimumin, duhet të mundohemi të japim gjithnjë maksimumin

[Davius]

Sheva: Të përpiqemi të fitojmë gjithçka

Kanë mjaftuar 10 minutat e Shevçenkos më të mirë, për ta kthyer Milanin te fitorja ndaj Fiorentinës: "Ka qenë një hap i rëndësishëm. Milani tani nuk shkëlqen së tepërmi, por kemi arritur të fitojmë një ndeshje të vështirë, çka s'është gjë e vogël, - deklaroi ukrainasi. - Tani të shohim rezultatet e të tjerëve, me vetëdijen se shpejt mund të bëjmë më shumë. Juvja? Do të jetë një betejë deri në fund, tani duhet të përpiqemi të fitojmë gjithçka". Andrij Shevçenko e ndryshoi në dhjetë minuta historinë e një ndeshjeje, që për kuqezinjtë ishte vendosur në mënyrën më të keqe:

"Fiorentina luajti mirë në pjesën e parë, - deklaroi ukrainasi në fund të ndeshjes, - ne ishim disi të çekuilibruar, ndërsa më pas, në pjesën e dytë, ndryshuam qëndrim dhe arritëm t'i shfrytëzonim ato dy topa. Më pas, për ne nisi një tjetër ndeshje, të cilën arritëm ta kontrollonim mirë. Ka qenë një hap i parë i rëndësishëm, ndërsa tani të presim rezultatet e kësaj të diele dhe më pas Juven." Por, para bardhezinjve e ka radhën PSV-ja, që vlen finalen e Ligës së Kampioneve.

"Tani rikthehen Maldini, Kaladze, Ambrozini, lojtarë të rëndësishëm që i mundësojnë trajnerit të kryejë ndërrime. Është e rëndësishme të kesh lojtarë të freskët, na pret një betejë, edhe pse tanimë jemi mësuar. Ne na paraqitet një mundësi e rëndësishme, duhet të përpiqemi të luajmë për të fituar gjithçka. Është e kotë ta mohojmë, pasi objektivi ynë ky është. Ajo e Firences mund të konsiderohej një tjetër provë për të verifikuar formën tonë. Dhe tani mund të themi se Milani është mirë. Është ende në gjendje t'i arrijë të gjitha synimet. Tani s'na mbetet gjë tjetër, veçse të arrijmë të fitojmë gjithçka."


Milani kthehet në shtëpi me tri pikë me tepër vlera. Në Firence kuqezinjtë përmbysën golin e shënuar nga Mareska në pjesën e parë, falë Shevçenkos, autor i një dygolëshi, dhe u kthyen në krye të renditjes, në pritje të takimit Juventus?Bolonja. Karlo Ançeloti, pavarësisht nga një paraqitje jo e shkëlqyer e skuadrës së tij, ka qenë i kënaqur: "Në pjesën e parë vuajtëm shpejtësinë e Fiorentinës, pozicionin e Jorgensenit dhe zhvendosjet e Mikolit drejt qendrës." Trajneri kuqezi e ndryshoi qëndrimin e skuadrës dhe arriti ta fitonte ndeshjen: "U kërkova djemve të luanin më tepër nga krahët, pasi në pjesën e parë nuk u krijuam shqetësime kundërshtarëve. Në fakt, golat mbërritën nga dy harkime. Sigurisht, po të kemi parasysh atë që ndërtoi Fiorentina, na shkoi mirë, por unë kam fatin që kam disa lojtarë të shkëlqyer që s'dorëzohen kurrë."

[Davius]

Xherrard: Ndaj Çelsit, ndeshja e jetës

Stiven Xherrard ka paralajmëruar Çelsin, duke thënë se Liverpuli është i vendosur ta prishë festën e bluve pas fitimit të titullit. Kapiteni i "redsave" pohoi se kjo do të ishte ndeshja më e madhe në karrierën e tij si lojtar. Mesfushori i kombëtares angleze deklaroi se të jesh kapiten i Liverpulit në gjysmëfinalen e Championsit, ishte arritja e tij më e madhe në karrierë. Sipas Xherrardit, gjysmëfinalja ndaj kampionëve të sapokurorëzuar të Anglisë do të jetë shumë e vështirë, por ai u shpreh optimist për kualifikimin për në finalen e Stambollit. "Kjo ndeshje është padyshim më e rëndësishmja e karrierës sime dhe jam i sigurtë se kjo gjë vlen për të gjithë shokët e mi të ekipit. Në fillim të këtij sezoni, asnjë nuk mendonte se do të arrinim deri këtu. Fakti që ndodhemi këtu, do të thotë se trajneri dhe lojtarët kanë bërë një punë fantastike. Rezultatet e fundit i kanë habitur të gjithë, por dua të theksoj se ne nuk kënaqemi me kaq. Duam finalen dhe do të djersitim për ta arritur atë. Të jesh kapiten i Liverpulit në finalen e Championsit, do të ishte dita më e madhe e jetës sime. E dimë mirë se Çelsi është më favorit se ne, por askush nuk duhet të mendojë se do të dorëzohemi lehtë. Në kampionat dhe në kupë nuk kemi fituar asnjë ndeshje ndaj Çelsit, gjatë këtij sezoni, por në Champions gjithçka është ndryshe.

Rezultati i ndeshjes së parë në "Stemford Brixh" ka lënë gjithçka të hapur dhe besoj se kemi ekipin e duhur për të dalë fitimtarë në ndeshjen e sotme. Sot do të kemi mundësinë të luajmë përballë publikut tonë dhe besoj se ky fakt do të na ndihmojë shumë. Humbja e Ksabi Alonsos, për shkak të kartonit të marrë në ndeshjen e parë, është një goditje e rëndë për ne. Ai është një lojtar i mrekullueshëm dhe një nga lojtarët "asist" më të mirë në botë. Çdo ekipi do t'i mungonte një lojtar si Ksabi Alonso. Fatmirësisht kemi Hamanin, i cili i jep një obsion tjetër trajnerit. Të gjithë jemi të trishtuar për mungesën e Ksabit, por shpresoj që të kualifikohemi, kështu që ai të luajë në finalen e Stambollit," - përfundoi Xherrardi. Pas barazimit 0-0 në ndeshjen e parë, ekipi i Çelsit do të kërkojë finalen e parë të tij në Ligën e Kampioneve.

[Davius]

Terri: Të shkruajmë historinë e Çelsit

Kapiteni i ekipit të Çelsit, Xhon Terri, u shpreh i kënaqur për fitimin e titullit, por deklaroi se ekipi i tij nuk duhet të shpërqendrohet në prag të ndeshjes së kthimit ndaj Liverpulit, në gjysmëfinalen e Championsit. Pas fitores 0-2 ndaj Boltonit, ekipi i drejtuar nga Hoze Mourinjo u shpall kampion pas 50 vitesh në Premier Ligë. Dy golat e shënuar nga mesfushori Frenk Lampard, i dhanë fitoren e merituar ekipit të Çelsit, i cili e siguroi titullin dy ndeshje para përfundimit të kampionatit.

Mbrojtësi i kombëtares angleze, Xhon Terri, në prag të ndeshjes ndaj Liverpulit u shpreh i shqetësuar për lodhjen fizike dhe mendore të ekipit të tij. Vjet Çelsi u eliminua pikërisht në këtë fazë të Ligës së Kampioneve, nga ekipi i Monakosë. Pas barazimit 0-0 të ndeshjes së parë dhe pas ndeshjeve në kampionat, të dyja ekipet janë të lodhura fizikisht, por Terri deklaroi: "Më besoni, se kur të arrijmë atje dhe të jemi para tifozëve tanë, lodhja do të largohet. Do të jetë një natë e madhe dhe për ne kjo është mundësia për të shkruar historinë e klubit tonë.

Në sezonin e kaluar, ne u eliminuam në këtë fazë dhe për mua ajo ishte dita më e trishtuar e jetës sime. Dëshirojmë të gjithë të kualifikohemi për në finale dhe unë jam optimist për këtë. Jemi të vendosur të luftojmë deri në fund dhe kam besim se do të arrijmë të kualifikohemi. Kemi fituar ndaj ekipeve më të mira në Europë dhe kemi treguar se jemi vërtet në formë. Mendoj se në dy sezonet e fundit, kemi treguar se e meritojmë një vend midis më të mirave. Rruga deri në gjysmëfinale ishte mjaft e vështirë dhe tani kualifikimi për më tej varet vetëm nga ne." Ekipi i drejtuar nga Mourinjo, gjatë këtij edicioni të Championsit, ka eliminuar disa nga ekipet më me zë të Europës. Pas Barcelonës, blutë arritën të nxirrnin jashtë kompeticionit edhe ekipin kampion të Gjermanisë, Bajernin e Mynihut. Derbi i sotëm anglez do të vendosë se cila nga dy skuadrat do të ndeshet në finale me fituesin e çiftit PSV-Milan. Ekipi italian i Milanit duket se e ka siguruar kualifikimin për më tej, pas fitores 2-0 brenda në "San Siro".

[Davius]

"Anfild Road" pret gjysmëfinalen e shekullit


Liverpuli ka avantazhin e fushës, por Çelsi ka moralin në qiell pas titullit kampion të fituar në Premier Ligë, në prag të ndeshjes së kthimit në gjysmëfinalen e Ligës së Kampioneve. Përballja e parë e dy skuadrave britanike është mbyllur barazim 0-0, në "Stamford Brixh". Rezultat ky që i jep shpresë Liverpulit për të arritur finalen e Stambollit, më 25 maj, ndaj skuadrës që do të kualifikohet nga çifti PSV Eindhoven-Milan.

Nga ana tjetër, Çelsi ka mundësi të fitojë gjithçka në këtë sezon, pasi festoi titullin e dytë kampion në historinë e tij, pas suksesit 0-2 në Bolton, të shtunën. Çelsi, pavarësisht nga disa dëmtime të lehta, do të luajë për fitore në "Anfild Road". Kështu, trajneri portugez Hoze Mourinjo do të ketë mundësinë të përsërisë me Çelsin atë që bëri me Porton në edicion e kaluar të Championsit. 12 muaj më parë, Portoja barazoi në fushën e saj ndaj Deportivo La Korunjës dhe fitoi 1-0 në Spanjë, duke kaluar në finale, ku mposhti 3-0 Monakonë.

Mourinjo shpreson të ketë në dispozicion për këtë ndeshje Arjen Robenin. Holandezi e ka nisur nga stoli ndeshjen e parë dhe duket se është riaftësuar plotësisht. Për 21-vjeçarin, kjo do dë ishte ndeshja e parë si titullar, pas dëmtimit të pësuar më 21 shkurt. Damien Daf përbën një tjetër problem për Hoze Mourinjon. Irlandezi nuk ka luajtur në dy ndeshjet e fundit, por gjithsesi bën pjesë në listën e futbollistëve të grumbulluar nga Mourinjo, për transfertën e Liverpulit. Në rast se të dy këta futbollistë do ta fillojnë ndeshjen si titullarë, atëherë londinezët do të zbresin më fushë me vendosjen e tyre të preferuar 4-3-3. Galasi do të luajë në të majtë të mbrojtjes, rol të cilin holandezi e mbulon që pas dëmtimit në Bidxhit, në fillim e këtij viti kalendarik. Mourinjo do të bëhej kështu trajneri i tretë që fiton Ligën e Kampioneve me skuadra të ndryshme, por i pari që e fiton dy vite radhazi. Më parë e kanë fituar dy herë këtë veprimtari Ernst Hapel (me Fejënordin, në vitin 1970, dhe me Hamburgun, në vitin 1983) dhe Otmar Hitcfeld (me Dortmundin në vitin 1997 dhe me Bajernin e Myhihut më 2001-shin). Në edicionin e kaluar të Ligës së Kampioneve, Çelsi, i drejtuar nga Ranieri, u eliminua në gjysmëfinale, pasi humbi 3-1 në Monako dhe barazoi 2-2 ndaj francezëve në Londër.


Gjithsesi, Liverpuli është gati të japë maksimumin për të arritur finalen e Kupave të Europës, që i mungon nga viti 1985. Kështu, skuadrës së drejtuar nga Rafael Benitez do t'i duhet një fitore për të harruar 20 vitet e fundit të ecurisë së saj, më të dobëta që kur është themeluar. Trajneri spanjoll nuk do të ketë në dispozicion për këtë ndeshje Ksabi Alonson, të skualifikuar, por ka gjetur zëvendësuesin e tij. Gjermani Ditemar Haman është riaftësuar plotësisht dhe ka mundësi ta fillojë nga minuta e parë ndeshjen në "Anfild Road", përkrah kapitenit Stiven Xherrard.

Në sulm, titullar do të jetë Dijbril Size, i cili e nisi nga stoli ndeshjen e parë. Tifozët e Liverpulit pritet të jenë një tjetër faktor në favor të "të kuqve". Ata kanë kaluar në delir, pasi skuadra e tyre arriti të eliminonte Juventusin në gjysmëfinale. Liverpuli në Ligën e Kampioneve ka luajtur me një fytyrë fituese, ndryshe nga ç'ka bërë në Premier Ligë. Do të jetë një ndeshje shumë e fortë, në prag të së cilës vetëm diçka është e parashikueshme, mbrëmja e "Anfild Road"-it do të jetë e paharrueshme.


Shifra dhe fakte
Liverpul - Çelsi
LIVERPULI
Të skualifikuar: K.Alonso
Të dëmtuar: Kirkland
Në mëdyshje: asnjë
Nuk luan në ndeshjen e ardhshme, në rast se merr karton të verdhë: Karrager, Finan, Haman, Vranok

ÇELSI
Të skualifkuar: asnjë
Të dëmtuar: Brixh, Ferreira, Parker
Në mëdyshje: Daf, Roben
Nuk luan në ndeshjen e ardhshme, në rast se merr karton të verdhë: Xhonson, Galas, Karvalho

Bilanci
(1 ndeshje në Europë, 1 barazim)
27.04.05 Çelsi - Liverpul 0-0
Përballjet në këtë sezon:
3 tetor 04 Çelsi - Liverpul 1-0
1 janar 05 Liverpul - Çelsi 0-1
27 shkurt 05 Çelsi - Liverpul 3-2
Përballet në Premier Ligë:
Ndeshje: 135
Fitore Liverpuli: 62
Barazime: 47
Fitore Çelsi: 26

- Liverpuli nuk ka pësuar gol në fushën e tij, vetëm në dy nga shtatë ndeshjet e fundit që ka luajtur për Ligën e Kampioneve.
- Liverpuli ka fituar katër nga pesë ndeshjet e fundit të zhvilluara në "Anfil Road" për Championsin.
- Liverpuli ka fituar vetëm një nga shtatë përballjet e mëparshme në fushën e tij, ndaj skuadrave angleze në kupat e Europës.
- Liverpuli luan gjysmëfinalen e shtatë të Ligës së Kampioneve. Eshtë eliminuar vetëm nga Interi në vitin 1965.
- Çelsi ka shënuar 12 gola në 11 ndeshjet e zhvilluara në këtë sezon të Ligës së Kampioneve.
- Çelsi nuk ka humbur asnjë nga dy ndeshjet e luajtura jashtë fushe, në përballjet me skuadrat angleze në kupat e Europës.
- Çelsi ka fituar dy herë Kupën e Kupave. Këto kanë qenë edhe dy finalet e vetme të bluve në kupat e Europës.

- Çelsi ka humbur tri nga katër ndeshjet e fundit, të luajtura jashtë fushe në këtë edicion të Ligës së Kampioneve.

[Davius]

Mourinjo: Sido që të shkojë, mbetemi heronj

Trajneri i ekipit të Çelsit, Hoze Mourinjo, deklaroi se lojtarët e tij do të ktheheshin në Londër si heronj, edhe sikur të mos arrinin të kualifikoheshin për në finalen e Stambollit. "Mendoj se i gjithë presioni është mbi Liverpulin. Pavarësisht nga rezultati i ndeshjes së sotme, ne do të kthehemi në Londër si heronj, pasi kemi fituar titullin kampion. Nëse ata humbasin në "Anfield Road", do ta përfundojnë sezonin pa asnjë trofe. Mourinjo theksoi se ekipi i tij nuk është shpërqendruar aspak nga festa për fitimin e titullit në Premier Ligë. "Eshtë e lehtë të fokusohesh te kjo ndeshje, pasi e kemi pritur gjatë këtë moment. Lojtarët kishin të drejtë të festonin për titullin, pasi e merituan atë, por kjo nuk do të thotë që ata do të jenë të shpërqendruar për ndeshjen e sotme. Të gjithë jemi koshientë për rëndësinë e këtij takimi. Pas ndeshjes së sotme do ta festojmë ashtu siç duhet fitimin e titullit. Në Bolton bëmë një ceremoni modeste, pa ftuar familjet dhe pa shampanjë. Thjesht qëndruam në hotel dhe folëm për ndeshjen e sotme. Nesër dhe të enjten, lojtarët do të kenë mundësi të festojnë denjësisht, përkrah familjeve të tyre. Tani për tani ata duan medoemos të fitojnë ndaj Liverpulit. Kemi fituar Kupën "Karling" dhe kampionatin, por lojtarët dhe unë dëshirojmë akoma më shumë," - përfundoi portugezi. Nëse Çelsi fiton sot ndaj Liverpulit, do të ndeshet në finalen e 25 majit në Stamboll, ndaj Milanit ose PSV-së. Milani do të luajë të mërkurën në "Philips Stadium", pas fitores 2-0 në ndeshjen e parë.


Lampard: Të tregojmë se jemi më të fortët
Në prag të ndeshjes Liverpul-Çelsi, mesfushori i bluve, Frenk Lampard, tha: "Duhet të fitojmë në Liverpul, për të dalë në finale dhe të gjithë jemi të bindur se mund ta bëjmë diçka të tillë. Kemi ende forcë në këmbët tona dhe duam të tregojmë se jemi më të fortët në Europë, duke fituar Ligën e Kampioneve."

[Davius]

Xhilardino: Milani më intereson, por...

Katër golat që i shënoi Livornos, që e çuan në 21 shifrën e golave të tij në këtë kampionat, e ka rritur çmimin e tij të paktën 5 milionë euro. Edhe pse shpëtimi nuk është siguruar ende, në kampin e Parmës po mendohet se si ta rregullojnë sa më mirë sulmuesin 23-vjeçar, i cili vazhdon të magjepsë me gola përrallorë dhe një vazhdimësi rendimenti mbresëlënëse. Janë tri skuadra që janë gati të ndërmarrin një luftë me miliona euro për ta blerë:

Milani, Interi dhe Real Madridi. Kuqezinjtë janë në "pole-position", sepse kanë qenë të parët që janë vënë në lëvizje, duke u ofruar emilianëve 30 milionë euro, por në këtë pikë, në mungesë të një marrëveshjeje, ekziston me të vërtetë rreziku i një ankandi të mirëfilltë. Kurse spanjollët mund të mbështeten te marrëdhëniet e privilegjuara mes Sakit dhe klubit emilian. Në takimin mes Sakit dhe Baraldit është folur për kryegolashënuesin e Serisë A. Finalja e sezonit të Xhilardinos mund të cilësohet jashtëzakonisht e qetë. Por tani po përpiqet të shpëtojë "varkën" e Karminjanit dhe për më shumë që nuk arrin të qëndrojë indiferent ndaj "sirenave" kuqezi, që bien prej kohësh për të. Madje, këtë herë të lë të kuptosh se destinacioni i ardhshëm i parapëlqyer, duket se është pikërisht Milani. "Sigurisht, - shpjegon "bomberi" 23-vjeçar i dukalëve,

- një klub si Milani më intereson shumë, por pas 29 majit do të vlerësohet roli im dhe do të vendosim se çfarë do të bëjmë. Për momentin, Parma e di se cilat janë zgjedhjet e mia". Mes të tjerash, në luftën për titull, Xhilardinoja i shikon kuqezinjtë si favoritë: "Milani ka diçka më shumë se Juvja, që është gjithsesi një skuadër e shkëlqyer dhe nuk dorëzohet, por takimi direkt do të vendosë gjithçka". Mbi gjurmët e sulmuesit emilian, sipas "radio-merkatos", është edhe Reali i Madridit, që tani në timon ka një njohje të vjetër të Xhilës: "Nuk do të më shpifej fare nëse do të shkoja te Reali i Madridit, që është një skuadër e madhe, - nënvizon Xhilardinoja.

- Saki më njeh mirë, duke parë se ka qenë drejtori sportiv i Parmës dhe besoj se më çmon si lojtar, por të shohim në të ardhmen". Megjithatë, takimi i parë në axhendë është të shpëtojë Parmën e tij, e cila ka një sfidë vendimtare të dielën që vjen në "Tardini", ndaj Romës: "Verdhekuqtë kanë individualitete të mira, por kanë vetëm 40 pikë, - vijoi numri 11 i verdhebluve. - Sigurisht, ata nuk do të shpërqendrohen, sikundër dhe ne. Kemi probleme që të dyja, sepse shpesh kemi mungesë vëmendjeje, si për shembull ndaj Livornos". Në fund, kapitulli "axurr": "Në kombëtare jap më pak, sepse luaj shpesh me shokë të rinj në sulm dhe nuk është e lehtë të gjesh menjëherë gjendjen e duhur. A mund të luaj bashkë me Totin e Kasanon? Shpresoj që ky "tredhëmbësh" të përsëritet në kombëtare. Ndihem mirë me ta".

[Davius]

Rajkard: Faleminderit "Kamp Nou"!

Trajneri i Barcelonës, Frank Rajkard, ka pohuar edhe një herë se ngrohtësia përreth ambientit katalanas, është arma më e fortë e skuadrës që ai drejton: "Tifozët e mbështetën skuadrën gjatë gjithë ndeshjes dhe kjo është shumë e rëndësishme për ne." Më pas, në lidhje me padurimin e të gjithë qytetit të Barcelonës, për të festuar titullin kampion, Rajkardi pranon: "Të gjithë po presin me padurim fitimin matematik, por mendoj se tifozët katalanas në këto javë po përjetojnë çaste mjaft të lumtura. Na ndihmuan në fitoren ndaj Albasetes dhe si rrjedhojë kjo fitore u kushtohet atyre." Trajneri i Barcelonës, Frank Rajkard, vazhdon deklaratën duke pranuar vështirësitë e hasura nga skuadra e tij në ndeshjen ndaj Albasetes. Sipas holandezit, media po ndikon negativisht te skuadra e tij kohët e fundit: "E pranoj se nuk ishim në maksimumin tonë, por Albasete nuk bëri asgjë që të mos meritonte humbje. Valdesi e ndoqi ndeshjen si spektator dhe përpara se të shënonim ne, ishim të pafat duke goditur shtyllën. Skuadra ishte shumë e kontraktuar në fillim, por fitorja ishte plotësisht e merituar. Albasete, si të gjitha skuadrat e nivelit të saj, luajti ndeshjen e jetës, duke u përpjekur të futej në histori si skuadra që ndali Barçën, por nuk ia doli mbanë." Gjithsesi, të dielën Barcelona mori tri pikët jetike për titullin kampion, pasi skuadrën katalanase, javën e ardhshme, e pret një ndeshje delikate në "Mestaja" ndaj Valencias. Për këtë takim, Rajkardi tha: "Kemi filluar të mendojmë për rivalin e ardhshëm. Valencia kërkon pikë për zonën e Ligës së Kampioneve dhe për këtë na pret një ndeshje shumë e vështirë. Teorikisht mund të kënaqemi edhe me barazimin, por në rast se një skuadër futet në fushë për barazim, atëherë gjithçka është e humbur. Do të bëjmë lojën tonë, të vetëdijshëm që kjo ndeshje nuk na shpall kampionë në rast fitoreje dhe nuk na heq titullin në rast se humbasim." Rajkardi flet edhe për Mesin, futbollisti i ri, i cili shënoi golin e dytë të Barcelonës, vetëm pak minuta pasi ishte aktivizuar: "Më vjen mirë për të. Eshtë një talent i së ardhmes dhe ky gol padyshim do ta ndihmojë për të fituar eksperiencën e duhur." Në fund, trajneri holandez komenton golin e Etosë: "Një gol i shkëlqyer që praktikisht na dha tri pikët. Samueli është një kampion, si shumë të tjerë te Barça, që vendosin fatet e ndeshjes me një goditje të vetme."

[Davius]

H.Zaneti: Kupën, për të hapur një cikël

Havier Zaneti, kapiteni i Interit, dëshiron të fitojë Kupën e Italisë, e vetmja veprimtari në të cilën zikaltrit janë ende në "valle". Sipas argjentinasit, fitorja e këtij trofeu mund të jetë e rëndësishme për klubin, për të hapur një cikël suksesesh.
"Shpresojmë ta fitojmë Kupën e Italisë. Eshtë e rëndësishme të fillojmë të fitojmë diçka, që të hapim një cikël. Të gjithë së bashku po përpiqemi të ndërtojmë diçka të rëndësishme, në mënyrë që të arrijmë ato rezultate që presin të gjithë prej nesh, - ka deklaruar Havier Zaneti, në emisionin sportiv italian të kanalit "Rai 2", "Domenica Sportiva". ? Më vjen keq që dhuruam shumë pikë në fillim të sezonit. Nga njëra anë, u nisëm me një skuadër dhe një trajner të ri, dhe për të ndërtuar diçka të rëndësishme, duhet kohë. Nga ana tjetër, është po aq e vërtetë se në një klub të madh si Interi duhet të përpiqesh gjithnjë të fitosh menjëherë."
Ndërkohë afron përfundimi i kampionatit dhe tek Interi kthehet në modë ajo që tanimë është kthyer në një zakon në stinën e verës: të diskutohet për të ardhmen e Kristian Vierit. Skeçi i filmit është i dëgjuar: përshpëritet se klubi zikaltër do të kishte ndër mend të lirohej nga kontrata e shtrenjtë e numrit 32, i cili konsiderohet edhe "i moshuar", dhe do të kishte nisur bisedimet me Juven për t'ia shitur kësaj të fundit. Por Vieri ka dashur të saktësojë se nuk ka aspak dëshirë të largohet: "Kam edhe një tjetër vit kontratë. I mbyll të gjitha dyert. Marrëdhënia me Mançinin? Jam nën urdhrat e tij, nuk kam asnjë problem me të". Ka qenë vetë trajneri që ka përgënjeshtruar çfarëdo lloj zëri lidhur me keqkuptimet me Bobon: "E çmoj Vierin si njeri dhe si lojtar, nuk kam ndryshuar aspak mendim për të. Nëse në këtë fazë të fundit të sezonit nuk ka luajtur shumë, kjo ka ndodhur për shkak të problemeve që ka pasur në gju."

[Davius]

Juve, dalja nga Championsi i kthen shkëlqimin

Milanin në "shënjestër". Juventusi do të paraqitet me pikë të barabarta në ndeshjen direkte me kuqezinjtë, falë fitores së arritur të dielën ndaj Bolonjës. Një sukses pa defekte, që vuri në dukje një përmirësim të skuadrës së Kapelos, përsa i takon anës atletike. Eliminimi nga Liga e Kampioneve i ka ndihmuar më shumë bardhezinjtë që t'i rikuperojnë forcat dhe të kryejnë një përgatitje të goditur për kampionatin.
Jo të gjitha të këqijat lënë pasoja. Eliminimi nga Liga e Kampioneve i ka sjellë më shumë të mira Juventusit, të paktën nga pikëpamja fizike. Kapelo ka mundur të rinisë të punojë me qetësi, lidhur me formën fizike të djemve të tij, duke e sistemuar përgatitjen në bazë të kësaj faze të fundit të kampionatit. "Don Fabio" e ka thënë gjithnjë: organika e Juventusit nuk është edhe aq e gjerë dhe kur cungohet nga dëmtimet, bëhet edhe më pak konkurruese. Dhe në këtë kuadër është për t'u parë si një gjysmë mrekullie rendimenti i skuadrës, përpara eliminimit nga Liga e Kampioneve. Në këtë sezon, sipas rendit, Kapelos i është dashur të bëjë pa Del Pieron, Trezegenë, Nedvedin dhe Emersonin, çka në fakt janë boshti i ekipit të tij. Edhe pse nganjëherë s'ka qenë fort bindës, Juventusi ka arritur të qëndrojë gjithnjë në krye, më shumë me forcën e karakterit sesa me lojë. Tani, ky i fundit është përmirësuar ndjeshëm dhe ka edhe një lajm të mirë: Nedvedi është në kulmin e formës. Në të majtë, ndaj Bolonjës arriti të çante me dhjetëra herë, ka rigjetur vrapimin dhe driblimin, dhe në gjuajtje e harkime është i saktë si gjithnjë. E gjithë kjo, kur mungon një javë nga ndeshja e madhe e "San Siros", që me shumë mundësi do t'i japë një të shtyrë vendimtare drejt titullit, atij që do ta fitojë. Ndaj Milanit pritet të kthehet nga minuta e parë edhe Trezegeja, ashtu sikurse pritet të rishfaqet edhe Emersoni. Dy rikuperime që mund të rezultojnë kyçe dhe në gjendje që të mos ndihet së tepërmi mungesa e shënuesit më të suksesshëm të bardhezinjve për këtë sezon, Ibrahimoviçit. Ndërkohë, Juvja vazhdon të mbajë heshtje për shtypin, një lëvizje dinake dhe ndoshta e arrirë pas një jave plot polemika dhe në prag të shtatë ditësh të tjera plot tension.

"Zonja", sot i kthehet stërvitjes në heshtje
Vazhdon heshtja e bardhezinjve. Fabio Kapelo i ka dhënë një ditë pushim të gjithë grupit, i cili do t'i rikthehet stërvitjes sot në mëngjes, në kuadër të sfidës së ardhshme në kampionat ndaj Milanit. Sot do të vlerësohet gjendja e Birindelit dhe e Takinardit, ndërsa në ditët e ardhshme Zebina dhe Montero pritet t'i bashkohen stërvitjes me grupin.