Gazeta Elektronike: "Futbolli Ndërkombtar"

[Davius]

Federata gjerman ndalon bastet

Federata Gjermane e Futbollit ka bërë të ditur ditën e enjte se të gjitha llojet e basteve do të jenë të ndaluara të vihen nga lojtarët, trajnerët dhe zyrtarët, që kanë lidhje me futbollin, apo gjyqtarët. Kjo masë vjen pas skandalit të shitjeve të ndeshjeve që është zbuluar në Gjermani. "Ne duam që gjithçka të jetë e drejtë. Nuk mund të lejojmë që futbolli të jetë një platformë që mund të shfrytëzohet nga të tjerët," - ka thënë presidenti i federatës gjermane, Teo Zvaxiger. Bastet e futbollit kapin një shifër prej 3.9 miliardë dollarësh në vit. Vendimi është marrë pas një mbledhjeje të jashtëzakonshme që është zhvilluar. Ky reagim ka ardhur pas skandalit të shitjeve të ndeshjeve që është zbuluar kohët e fundit. Gjyqtari Robert Hojzer ka pranuar se ka marrë 87,000 dollarë nga bastexhinjtë kroatë, për ta shitur këtë ndeshje. Pas këtij rasti janë nën kontroll edhe 25 persona të tjerë. Nën hetim janë gjithashtu 4 gjyqtarë dhe 14 lojtarë

[Davius]

Interi, 80 milionë euro humbje

Për Interin ka ardhur monenti ta mbyllë portofolin dhe të mendojë mbi të gjitha për merkaton, sidomos përsa i takon frontit të largimeve. Në fakt, asambleja e aksionerëve konstatoi dje një humbje në bilanc prej 80 milionë eurosh. Tani do të jetë i nevojshëm një kujdes i veçantë në merkato, do të kryhen shumë shitje dhe pak blerje, duke synuar mbi të gjitha lojtarët e lirë. Drejt largimit janë Rekoba, Emre, Davids, Ze Maria, Koko dhe Kili. Mbeten për t'u verifikuar situatat e Vierit dhe Toldos.
Për tifozët e Interit ka përfunduar momenti i blerjeve të mëdha në merkato, që deri pak sezone më parë ishin të garantuara çdo sezon nga pronari Morati, edhe pse më pas në shumë raste kanë rezultuar vetëm "vrima në ujë". Bëhet fjalë për një prirje që u verifikua edhe verën e kaluar. Në fakt, edhe vjet klubi zikaltër ishte treguar shumë i kujdesshëm me bilancin dhe i vetmi investim i madh, ai i Edgar Davidsit, nuk doli aspak i suksesshëm. Sivjet situata paraqitet edhe më e zymtë. Bëhet fjalë për 80 milionë euro humbje, çka u konstatua nga asambleja e aksionerëve, e mbledhur dje, çka do ta detyrojë Moratin, Tronketi Proverën dhe aksionerët e tjerë të hapin portofolin dhe, mbi të gjitha, klubin që të mos bëjë "marrëzi" në merkato.
Emri i parë në listën e largimeve është ai i Françesko Toldos. Në vend të tij Interi tanimë ka blerë Hulio Sezarin, zëvendësin e Didës në kombëtare, por nuk përjashtohet as rikthimi i Freit. Do të ikë edhe Alberto Fontana, ndërsa Fabian Karini ka mundësi shumë të mira të rikonfirmohet. Me valixhet gati në dorë janë edhe Ze Maria, Koko, Gamarra dhe, ndoshta, Materaci. Ky i fundit s'e ka bindur kurrë plotësisht Mançinin, i cili ka parapëlqyer në shumë raste ndaj tij Mihajlloviçin. Në mesfushë duken të sigurta largimet e Davidsit, Emresë dhe Kili Gonzalesit, ndërkohë që mbetet për t'u verifikuar pozicioni i Van der Meides dhe Karagunisit.
Edhe më delikate paraqitet situata në sulm. I vetmi i sigurt për qëndrimin është Martinsi, ndërsa për të tjerët mbetet gjithçka për t'u parë. Eshtë thuajse i sigurt largimi i Rekobës, që me Mançinin ka gjetur fare pak hapësirë, kurse Kruzi mund të ketë fituar rikonfirmimin me paraqitjet e mira të ndeshjeve të fundit. Vieri mund të shitet, por me siguri jo për disa "kacidhe", ndërsa për Adrianon çështja shtrohet ndryshe. Klubi do të donte ta shtrëngonte fort nën gji, megjithatë do ta kishte me të vërtetë shumë të vështirë të rezistonte përbri ndonjë super-oferte

[Davius]

Galiani: Toti le të qëndrojë te Roma

Asambleja e ortakëve të Milanit ka aprovuar modifikimin e statusit që ishte parashikuar disa muaj më parë, kur Silvio Berluskoni la presidencën, për shkak të konfliktit të interesave. Ndërkohë, Adriano Galiani do të mbetet zëvendëspresident me fuqi speciale: "Është një akt mirënjohjeje për Silvio Berluskonin, në pritje që të kthehet president i ligjshëm". Galiani, në krye të asamblesë, ka prekur një seri argumentesh. Në fillim, gjysmëfinalja e Championsit mes Çelsit e Liverpulit. "M'u dukën dy skuadra pak angleze, shumë të mbyllura dhe shumë kompakte, - tha administratori i deleguar kuqezi. Duket që Championsi po luhet në mënyrë ndryshe. Të dyja kanë mundësi të kualifikohen në finale". Mbi mungesën e reduktimit të pezullimit të Ibrahimoviçit, pas vendimit të Disiplinorit që la në fuqi dënimin me 3 ndeshje pa luajtur, Galiani nënvizoi: "Nuk dua të komentoj drejtësinë sportive. Shpesh ka dezinformim dhe po përfitoj të them diçka. Gjykatësi sportiv dhe drejtësia sportive nuk kanë asnjë lloj lidhjeje as me mua dhe as me ligën. Këtë, shumë tifozë nuk e dinë. Unë pastaj nuk kam bërë asnjëherë tifo nëse nuk luan ndonjë lojtar i pezulluar, edhe pse dihet që ai mund të zëvendësohet. Prova televizive? Parapëlqej të flas kur të mbyllet kampionati, përndryshe rrezikoj të keqkuptohem për diçka". Eshtë i pashmangshëm një mendim mbi merkaton, që ka lidhje me Totin. Berluskoni kishte ngjallur shpresat para dy ditësh për romanistin, për ta marrë te Milani, por Galiani mbyll gjithçka: "Unë nuk e kam parë "shenjën" e famshme të Berluskonit ndaj Totit. Fola me Silvion, por është i përkushtuar me çështjet e tij politike. Mund të them vetëm si administrator i deleguar i Milanit, që Toti është një "flamur" i Romës dhe asnjë nuk do ta largojë andej. Personalisht bëj tifo që të qëndrojë te Roma". Për marrëdhëniet me Juven, Galiani sqaron: "Asnjë problem. Flas thuajse çdo ditë me Xhiraudon, me të cilin më lidh një miqësi personale. Nuk do ta dramatizoja ndonjë fjalë mes Moxhit e Ançelotit. Si ne dhe Juvja, duam të fitojmë kampionatin. Ndeshje shtesë? Shpresoj që jo, por nëse do të humbisnim më 8 maj, më mirë ndeshje shtesë".

[Davius]

Turam: E dëmtojmë futbollin me gjëra të tilla

Lilian Turam, ish-lojtari i Parmës që tani luan te Juvja, ka thënë të tijën lidhur me filmimin shokues, ku shihet një ish-lojtar verdheblu që merr doping me shiringë: "Ai është një filmim që e bëmë ne lojtarët në dhomat e zhveshjes për shaka, - tha ai. - Por duke qenë se për të pasur audiencë, bëhet gjithçka, ndaj edhe u transmetua. Tani njerëzit do të mendojnë se ishte një substancë e ndaluar, se futbollistët janë të gjithë të dopuar. Kështu ndotet imazhi i një lojtari të ndershëm." Edhe pa ia përmendur kurrë emrin, Lilian Turam e mbron ish-shokun e tij me të cilin ka të bëjë filmimi shokues dhe për të cilin është folur aq shumë ditët e fundit: "Është tepër e lehtë të sulmosh dikë, ai ka dhënë vetëm një imazh pozitiv të futbollit, duan vetëm të hedhin baltë mbi figurën e tij, ? ka thënë francezi. ? Të gjithë e dinë se ajo provëz nuk ishte farmaceutike, por tani njerëzve do t'u mbetet dyshimi. Në këtë mënyrë po hyjnë në një rrugë të gabuar, e cila e shkatërron futbollin. Qëllimi i atij filmimi ka qenë vetëm që të tërheqë sa më shumë audiencë dhe të ushqejë dyshimet. Ndodh shpesh që dikush prej nesh merr një telekamer në dhomat e zhveshjes dhe filmohen edhe shaka, marrëzi që duhen të mbeten aty dhe të mos çohen nëpër televizione. Ndoshta dikush mund të bëjë një batutë dhe t'i thotë tjetrit "je një i droguar", dhe më pas ç'të shohim, në befasi ajo del në televizon. Më parë, ata që transmetojnë, duhet të dinë përse ndodh ai episod, sepse nëse transmetojnë direkt, pa marrë parasysh asgjë, kjo tregon se janë të interesuar të paraqesin një imazh të keq të futbollit, gjë që s'e kuptoj se kujt mund t'i shërbejë."

[Davius]

Xherrard: Tifozët, arma jonë ndaj Çelsit

Stiven Xherrard ka paralajmëruar Çelsin dhe ka deklaruar se tifozeria do të jetë një faktor shumë i rëndësishëm që mund ta ndihmojë Liverpulin në arritjen e finales së Ligës së Kampioneve. Pas barazimit në ndeshjen e parë 0-0, skuadra e Rafael Benitezit duhet të fitojë me çdo kusht ndeshjen e kthimit ndaj Çelsit, për të vazhduar më tej në finalen e Stambollit. Të martën e ardhshme, "Anfild Road" do të jetë teatri i përballjes në derbin britanik, më të ndjekur në dekadën e fundit. Kapiteni i Liverpulit, Stiven Xherrard, një ditë pas barazimit në "Stemford Brixh", tha:

"Të martën në "Anfild Road" do të jetë një ndeshje e madhe dhe unë jam i bindur se me koret e tyre, tifozët tanë do t'ia vështirësojnë punën Çelsit. Dinë të jenë të magjishëm dhe ndikojnë në një ndeshje futbolli. Rasti më i mirë kur tifozeria mund të quhet futbollisti i 12-të. Në Londër barazuam në fund të një ndeshjeje, ku u përballëm si të barabartë me Çelsin, për këtë mendoj se me ndihmën e faktorit fushë mund të arrijmë finalen e Ligës së Kampioneve. Do të na duhet edhe pak fat dhe, në rast se do të jetë nata e duhur, mund të bëjmë mrekullinë duke vazhduar më tej."

Më pas, mesfushori i kombëtares angleze vazhdon: "Jemi një grup i bashkuar futbollistësh. Humbasim së bashku dhe fitojmë së bashku, përfshi edhe futbollistët e stolit. Jemi një grup i mirë futbollistësh dhe po na jepet mundësia të arrijmë në finalen e Ligës së Kampioneve. Jam optimist dhe besoj se do ta shfrytëzojmë rastin që po na jepet. Nuk duhet të mendojmë se barazimi 0-0 është rezultat i pranueshëm dhe do ta dërgonte ndeshjen në shtesë. Llogari të tilla janë të kota. Duhet të fitojmë për të arritur finalen." Petr Çeh bëri dy pritje të rëndësishme në pjesën e parë, në goditjet e Rises dhe Barrosit, duke i mohuar fitoren Liverpulit në Londër.

Xherrardi tha: "Ne u mbrojtëm shumë mirë, por edhe mund ta kishim fituar ndeshjen, në rast se Çeh nuk do të kishte bërë atë pritje të mrekullueshme në rastin për shënim të krijuar nga Barrosi. Me pak fat, edhe Rise mund të kishte shënuar. Këto dy episode janë treguesi më i mirë se mbrojtja e Çelsit nuk është e pathyeshme dhe se i kemi të gjitha mundësitë të shënojmë në ndeshjen e kthimit." Në fund të deklaratës së tij, 26-vjeçari u shpreh: "Të them të drejtën, kur përfundoi ndeshja, nuk e dija nëse të festoja apo të hidhërohesha me barazimin. Ndoshta e kam gabim, por mendoj se Liverpuli ka diçka më shumë se Çelsi në ndeshjen e parë."

[Davius]

Ferguson, me sytë nga e ardhmja

Aleks Ferguson beson se ekipi i tij, në sezonin e ardhshëm, do të jetë më kompetitiv si në kampionat, ashtu dhe në Europë. Skocezi pranoi se ky sezon i "Djajve të kuq" kishte qenë i dështuar, edhe pse Mançesteri do të ndeshet në finalen e Kupës së Anglisë ndaj ekipit të Arsenalit. Mançesteri gjendet në vend të tretë në kampionat dhe në javët e fundit do të kërkojë vendin e dytë, i cili mbahet nga kampionët në fuqi të Arsenalit. Pas eliminimit në Ligën e Kampioneve nga ekipi i Milanit, Fergusoni u shpreh optimist për të ardhmen e ekipit të tij. "Jemi të gjithë të zhgënjyer për kampionatin dhe për rezultatet e dobëta në Europë, por jemi një ekip relativisht i ri dhe kam besim se në sezonin e ardhshëm do të jemi akoma më kompetitivë se këtë vit. Edhe mbrojtësi i kombëtares, Rio Ferdinand, u shpreh i kënaqur me arritjen në finalen e kupës. "Shpresoj të jemi ne ata që do të ngrejnë kupën në Kardif," - deklaroi Ferdinandi.

[Davius]

Xho Kol: Shanset janë të barabarta

Mesfushori i ekipit të Çelsit, Xho Kol, u shpreh optimist për ndeshjen e kthimit të gjysmëfinales së Ligës së Kampioneve në "Anfield Road". Lojtari i komëtares angleze deklaroi se Liverpuli është shumë larg kualifikimit, pavarësisht nga barazimi 0-0 në ndeshjen e parë në "Stemford Bridge". Koli është i bindur se shanset e Çelsit për kualifikim janë të barabarta me ato të Liverpulit. "Ata nuk janë favoritë për t'u kualifikuar, pasi çdo gjë është e barabartë. Çdo gjë do të vendoset të martën e ardhshme në "Anfield". Mendoj se jemi më të favorizuar, pasi do të jemi më të qetë në ndeshjen e kthimit", - përfundoi Koli.


Trajneri portugez, Mourinjo, pas ndeshjes deklaroi se tifozët e Liverpulit mund të mendonin për një kualifikim të mundshëm, por kjo do të mbetej vetëm një ëndërr për ta. Liverpuli nuk ka arritur akoma të fitojë asnjë ndeshje ndaj Çelsit në këtë sezon, por trajneri Benitez ka besim në kualifikimin për në finale. Liverpuli, në ndeshjen e kthimit, nuk do të ketë të gatshëm mesfushorin Ksabi Alonso, i cili u ndëshkua në takimin e djeshëm me karton të verdhë. Xho Kol u shpreh i kënaqur me lojën e treguar nga ekipi i tij, por jo me rezultatin: "Nuk ishte saktësisht rezultati i pritshëm, por jemi të kënaqur edhe me këtë rezultat. Ata nuk shënuan asnjë gol këtu dhe ne e dimë mirë se në të tilla ndeshje golat e pësuar në fushën tonë, mund të jenë fatalë. Nuk u çuditëm nga loja e Liverpulit, pasi, siç kemi thënë më parë, është një ekip i madh dhe ne e respektojmë shumë."

[Davius]

Lajme shkurt nga Primera Division

Ish-kapiteni i kombëtares franceze të futbollit, 36-vjeçari Marsel Dezai, ka deklaruar se do të luajë edhe për një vit, përpara se të varë këpucët në gozhdë: "Skuadra ime në Katar fitoi titullin kampion dhe unë u ndjeva i lumtur. Ky sport më jep ende kënaqësi dhe nuk kam përse të heq dorë prej tij. Do të luaj edhe sezonin e ardhshëm."

Zyrtare, Pekin 2008, sponsori i Barçës
Pas muajve të tërë bisedimesh dhe hipotezash, tani është zyartare: Barcelona, për herë të parë në historinë e saj, do të ketë emrin e sponsorit në fanellë. Komiteti organizator i Lojërave Olimpike Pekin 2008 do të paguajë 18 milionë euro dhe në tri sezonet e ardhshme, skuadra katalanase do të mbajë logon e saj në fanellë. Lajmin e ka bërë të ditur presidenti Laporta, i cili tha: "Vitin e ardhshëm do të pranojmë ofertat e sponsorëve."

Reali: Zidan nuk është i sëmurë!
Reali i Madridit ka përgënjeshtruar lajmin e bërë të ditur nga e përditshmja spanjolle "Marca", në të cilin thuhej se Zinedin Zidan vuan nga një formë talasemie që ndikon në qëndrueshmërinë e tij fizike. Në përgjigjen zyrtare të Realit thuhej: "Stafi mjekësor i Realit nuk ka konstatuar asnjë problem te shëndeti i Zidanit. Lajmi i "Marca"-s është i pabazuar."

Valencia, lind ideja Klaivert
Në rast se Valencia do të marrë pjesë në Ligën e Kampioneve, sezonin e ardhshëm, pritet që trajneri Lopez të bëjë ndryshime në repartin e sulmit. Spanjollët kërkojnë shërbimet e Barrosit të Liverpulit, por në rast se ky i fundit nuk pranon të kalojë në "Mestaja", atëherë presidenti Orti ka bërë gati një ofertë për Njukasëllin, për të rikthyer në Spanjë ish-sulmuesin e Barcelonës, Patrik Klaivert.

[Davius]

Mourinjo: Abramoviç, presidenti ideal

Trajneri i Çelsit, Hoze Mourinjo, ka deklaruar se gjatë këtij sezoni, presidenti Roman Abramoviç e ka ndihmuar shumë profesionalisht. Blutë e drejtuar nga trajneri portugez fituan titullin e dytë kampion në historinë e tyre, pas fitores 0-2 të shtunën në Bolton. Tani objektivi i londinezëve është fitorja ose barazimi me gola në "Anfild Road" ndaj Liverpulit. Çelsi vetëm kështu mund ta eliminojë Liverpulin në gjysmëfinale dhe të arrijë finalen e Ligës së Kampioneve.

Veprimtari që, në rast se skuadra e Mourinjos do të dalë fitimtare, do të imitojë Mançesterin e sezonit 1999-2000, kur "djajtë" fituan Kupën e Ligës, titullin kampion dhe Ligën e Kampioneve. Mourinjo, për shtypin britanik, tha për presidentin Ambramoviç: "Abramoviçi më ka bërë trajner më të mirë. Një president duhet të jetë gjithnjë një figurë shembullore për skuadrën e tij. Romani kishte në duart e tij Kupën e Ligës dhe tani ka edhe trofeun e Premier Ligës. Objektivi ynë i ardhshëm është Liga e Kampioneve. Presidentët nuk bëjnë trajnerë, por i ndihmojnë të përmirësohen në profesionin e tyre. Kur ke një president si Abramoviçi, entuziazmi në punë nuk mungon asnjëherë. Për këtë do të më pëlqente të qëndroja sa më shumë të jetë e mundur. Romani është presidenti ideal, me të cilin çdo trajner do ta kishte ëndërr të punonte."
Gati kontrata 10-vjeçare për portugezin...

Drejtori ekzekutiv i Çelsit, Piter Kenion, ka deklaruar se blutë janë gati t'i propozojnë Mourinjos një kontratë 10-vjeçare. Kjo, pasi portugezi e ndihmoi Çelsin në fitimin e titullit kampion që mungonte prej 50 vitesh në "Stamford Brixh". "I kemi thënë disa herë Mourinjos që duam ta mbajmë sa më gjatë të jetë e mundur në Londër. Eshtë një trajner special, më i miri i Premier Ligës, për këtë nuk mund të lejojmë të largohet." Më pas, Kenioni, një nga arkitektët e Çelsit të këtij sezoni, deklaroi se dukej që në fillim të sezonit se ky do të ishte viti i bluve: "Ndërtuam një skuadër të re, por që në verën e kaluar e kuptuam se ky do të ishte një grup fitues dhe jam i bindur se do të dominojë gjatë gjithë dekadës së ardhshme. Këtë dominim mund ta bëjmë vetëm në rast se në stol do të kemi Mourinjon."
Grupi është formuar, ndalen shpenzimet...
Drejtuesit e Çelsit, pas fitimit të titullit kampion, kanë deklaruar se nuk kanë ndër mend të shpenzojnë në merkaton e këtij sezoni. Këtë e konfimon vetë Piter Kenion: "Mos mendoni që në çdo merkato vere, Çelsi të shpenzojë 200 milionë euro. Nuk do të kishte logjikë. Normalisht do ta ndjekim merkaton, por shpenzimet do të jenë shumë më të ulta sesa në dy edicionet e fundit. E kemi ndërtuar grupin fitues dhe tani do të punojmë vetëm për ta ruajtur të tillë."

[Davius]

Ronaldo: Golat, kënaqësia ime

Sulmuesi brazilian i Realit të Madridit, Ronaldo, ka mbajtur gjallë shpresat për titull, pas shënimit të dy golave në ndeshjen e së shtunës ndaj Real Sociedadit. Kampioni i botës tregoi edhe një herë se ka rigjetur formën e tij, pas një periudhe të dobët në mes të sezonit, duke shënuar të dy golat e fitores për ekipin e tij. "Po vazhdojmë të bëjmë presion mbi Barcelonën. Në pjesën e parë nuk mundëm të shënonim, por pas pushimit arritëm të merrnim një fitore shumë të rëndësishme. Ky ishte goli i 18-të për Ronaldon, i cili ka katër gola më pak se sulmuesi i Barcelonës, Eto, që kryeson renditjen e golashënuesve, me 22 gola. "Mendoj se kam akoma mundësi ta arrij atë, por shpresoj të mos pësoj asnjë dëmtim deri në përfundim të sezonit. Megjithatë, për mua e rëndësishme është që të fitojmë titullin, me apo pa golat e mi. Sigurisht që golat më japin kënaqësi, sidomos pas periudhës së vështirë që kalova në mesin e sezonit," - deklaroi Ronaldo.

Trajneri Vanderlei Luksemburgo u shpreh i kënaqur me fitoren e arritur në Sociedad dhe deklaroi se rruga për titull është mjaft e vështirë, por jo e pamundur. "Çdo gjë është e mundur. Barcelona duhet të jetë e bindur se ne nuk do të dorëzohemi lehtë. E merituam fitoren, pasi luajtëm një futboll të bukur për 90 minuta. Real Sociedadi e qarkulloi më shumë se ne topin, por, nga ana tjetër, ne e rrezikuam më shumë portën e tyre. Në minutat e fundit të takimit ishim më të freskët se ata dhe përfituam nga lodhja e tyre, duke shënuar dy gola të mrekullueshëm. Luajtëm me durim dhe shumë qetësi", - përfundoi Luksemburgo.