Postuar më parë nga
Davius
Brigel, është koha për ndryshim. Ik, Brigel, ik! 03-09-2005
Fenomeni brigelian i "harresës"...
Duke ndjekur rubrikën sportive tek stacioni shteror grek ERT, ku i ftuar si opinionist për ndeshjen e Olimpiakosit ishte legjenda shqiptare Foto Strakosha, me statusin e ish-lojtarit të klubit të Pireut, sinqerisht jam ndier i fyer dhe keq nga sjellja mosmirënjohëse deri prej batakçiu e njëfarë Brigeli, që është sjellë me shumë futbollistë tanë të kombëtares me një element mentaliteti mesjetar. I ashpër do të thotë dikush, por kur mosmirënjohja dhe abuzimi me detyrën kalon kufijtë edhe nga vetë ai, përse duhet të kemi frikë t'i themi të vërtetën në sy.
Brigeli sistematikisht ka treguar se është një hakmarrës ballkanik, ku edhe nga përvoja e psikologjisë shqiptare që i kanë injektuar ata që na i poftisën, ndoshta e ka shtuar dozën e pabesisë. Brigeli duhej të ishte larguar dhe jo Bonaçiçi, sepse kroati kërkonte të edukonte te lojtarët respektin dhe kuptimin për detyrën dhe profesionalizmin futbollistik, kurse Brigeli ka treguar se është një trajner që ka ardhur vetëm të përfitojë në karrierë, financa, CV, pazare, menaxhime etj.
Në këto 2 vjet, ai ka treguar se nuk di të ndërtojë raport profesionisti me lojtarët tanë, ku grumbullimet e tyre për disa ndeshje miqësore (ka fituar me ekipe te treta a të katërta të Suedisë, Azerbajxhanit, Vietnamit etj.) janë shoqëruar më vonë me një "harresë" të qëllimshe të tij, them harresë sepse ai nuk pati asnjëherë guximin, ndershmërinë, profesionalizmin, përgjegjësinë institucionale t'u thoshte në sy disa të larguarve se tashmë e kanë kryer misionin me përfaqësuesen apo ai nuk i honeps dot.
Po ju sjell disa shembuj. Fatmir Vata asnjëherë nuk pati mundësinë të bisedonte me të direkt, por e akuzon nga larg, megjithëse ai luan në një kampionat tepër të mirë. Brigeli, që e ka cilësuar kampionatin tonë në nivelin e kategorive të katërta amatore të Gjermanisë, është kompetent dhe nuk pranon të provojë, ofrojë edhe F.Vatën, a thua se ata trajnerët gjermanë të Bundesligës janë syleshë e injorantë dhe ky Brigeli është babai i trajnerllëkut. Por e theksoj se e largoi Vatën në mënyrën kaçake, obskurantiste mesjetare dhe jo atë profesioniste. Dhe këtu cilin Brigel të besojmë, atë që thotë se Shqipëria nuk ka futboll, apo atë se lojtarët e Bundesligës nuk mund të luajnë në përfaqësuesen tonë?
Arian Beqaj, një nga portierët më të mirë në kampionatin grek, sistematikisht në njëmbëdhjetëshen e javës, pas një aktivizimi-fantazmë me lente ose pa lente, i parapërgatitur apo i befasishëm në Irlandën e ftohtë, u fut ashtu kaçakçe në rrethin e harresës së Brigelit, përse jo hajdutshe apo për pazare të prishura, apo nga marrëveshje me antiBeqaj shqiptarë. Nuk besoj të keni qenë në kontakt të ndonjë justifikimi zyrtar a profesional të një gjermani tepër të përkëdhelur për eliminimin e Arian Beqajt. Pak po përmend thirrjen me aq vonesë të E.Bogdanit për të mos i prishur punë, se ku i dihet hakmarrjes apo nenit 55 brigelian të harresës.
Devi Muka përsëri i pathirrur me një motavicion që vetëm ai dhe kompetentët që e frymëzojnë e dinë. Thonë se ishte gjatë fazës së katërt dobët, por ai vjen pas përgatitjes së verës, pas ndeshjeve mjaft të mira me Tiranën në turin paraeliminator, pas një ndeshjeje brilante në Shkodër, por ky gjermani ynë milioner tinzak dhe arrogonat e "harroi" edhe Devin, dhe jo për herë të parë, dhe përsëri sipas metodës së tij, larg balafaqimit dhe profesionalizmit.
Redi Jupi. Sa herë është luajtur me personalitetin e tij nga ky gjerman, që problemet e abuzimeve ekonomike ende s'i ka mbyllur me Kaizerslauternin dhe nuk është konseguent në detyrën e tij, për të menduar dhe ftuar në ekip në mënyrë korrekte sportistë tanë më të mirë.
Fortuzi, do apo nuk do Brigeli, është nga korifejtë e futbollit shqiptar, po luan denjësisht dhe shënon rregullisht në Greqi, por një djall i ka fryrë në vesh babait të trajnerllëkut që atë ta "harrojë" po ashtu tinëzisht, si një mjeshtër i prapaskenave.
Mund të vazhdoj edhe me të tjerë, si thirrjet e harresat e N. Dedës, Dabullës, Beqirit, D. Xhafës, J. Ahmatajt, Pishës, Bogdanit, Fakajt, Licit, Shkëmbit etj., por po ndalem tek rasti që më ngacmoi, që më dha shtysën për këtë shkrim, tek Altin Rraklli dhe fenomeni brigelian i harresës dhe i mosmirënjohjes.
Në fakt, ky lojtar është në formë, ka tërhequr Tiranën drejt suksesit në momente të vështira, ka shënuar rregullisht, ka një përvojë të gjatë, shpirt gare, profesionist i vërtetë. Siç e shikoni, nuk marr guximin të detyroj Brigelin se kë të thërrasë në ekipin përfaqësues, por e dënoj për mosmirënjohjen dhe obskurantizmin prej batakçiu për të mos biseduar me ta dhe për të mos argumentuar largimin tinzar nga ekipi.
Rraklli është një legjendë dhe ka rolin e tij të padiskutueshëm në kombëtaren tonë, ai ka kontribuar shumë në të gjitha pikëpamjet dhe, në qoftë se Panionosi grek respekton një "allvanos" për ato që ka dhënë, ky Brigeli a mund t'i thotë një lojtari, një gazete, apo një shtetari: Altin Rraklli, faleminderit për çfarë ke dhenë, tashmë koha jote ka ikur, ti nuk e meriton më ekipin përfaqësues! Sepse kështu ka ndodhur me Boriçin, Resmjen, Spahiun, Panon, Përnaskën, Zhegën, V.Rucin, Gëzdarin, Mingën e sa e sa sulmues të tjerë dhe kjo do të ishte normale jo vetëm për Rrakllin, por për të gjithë ata që kanë arritur në limitet e mbylljes së karrierës me kombëtaren.
Por Brigeli, sikur të jetë rritur me ligjin e hakmarrjes apo vrasjes prapa shpine, i "harron" pa guxuar të flasë ballas me ata, sepse ai e di mirë se çfarë trajneri është, se çfarë licensë dhe përvojë ka, se çfarë rezultatesh ka. Ndonjëri mund të thotë janë shumë pikë, por harrojnë Shyqyri Rrelin që luajti me Poloninë, Belgjkën e Finlandën dhe sa pikë mori, nuk llogarisin as numrin e ndeshjeve, as koeficientin e kundërshtarët, sepse nuk është njëlloj si t'i marrësh pikë Belgjikës së Kulemansit, Pfafit, Van Der Elstit e kompani, që ishte e katërta në botë, dhe një Kazakistani si kooperativë bujqësore, apo 20 shkallë më poshtë se Belgjika dhe Polonia në nivel.
Altin Rraklli është rasti për të reaguar dhe ndërgjegjësuar këtë trajner nga më të përkëdhelurit në botë, që nuk ka asnjë objektiv serioz me kombëtaren, por vetëm vendin e pestë, këtë trajner që asnjëherë nuk pati guximin të përballej as me lojtarët që largonte, por në nivel teknik as me trajnerët shqiptarë, si Hafizi, Zhega, Sejdini, Liçaj, Gëzdari, Marko, Birçe, Bajko, Dauti, Musta, Tomorri, Starova, Demollari, Josa, Dedja, Bici, Ferko. Ai iu shmang nivelit të ballafaqimit a kualifikimit, sepse e di mirë sa i vlen lëkura, çfarë kualifikimi dhe përvoje ka etj. Shoku Brigel ndoshta bën leksione dhe seminare me punonjësit e shoferët e federatës, sepse ndaj kolegëve ai është inferior.
Shpesh kam kërkuar të largohet ky trajner i superpaguar, i superpërkëdhelur, arrogant, që vetëm bredh nëpër botë me lekët e një federate "të varfër". Që vetëm të qëndrojë në Shqipëri nuk ka kohë, por edhe për talljen dhe harresën prej batakçiu të Rrakllit e kompani.
Madje interesante besoj është të verifikohet edhe evazioni fiskal i këtij gjermani të gjithëpushtetshën në mbretërinë shqiptare të futbollit, sepse ai ende nuk ka fituar asgjë, sepse ai ende nuk ka treguar profesionalizëm, sepse ai ende është inatçor ballkanik etj., por ndoshta ky është dhe fenomeni brigelian i internimit apo neni 55 i agjtacion-propagandës. Mos vallë edhe këtë e ka ditur gjermani?
Brigeli, ky trajner i dështuar, mosmirënjohës, deri dhe batakçi, duhet të ikë, sepse provoi se është më poshtë se niveli i trajnerëve shqiptarë jo vetëm në profesionalizëm, por sidomos në mentalitetin e harresës, mosmirënjohës, hakmarrës dhe me ndonjë zullum tjetër. Ai duhet të ikë për të na lenë ne të respektojmë ata idhuj dhe vlera që kemi, qoftë për faktin se ne mësojmë nga bota e përparuar, aplikojmë dhe gjithsesi jemi të një gjaku, atë të shqiptarit.
Krijoni Kontakt