45,5mld lek per Tiranen evropiane

[ganoid]

Bashkia, gati strategjinë “Tirana, një qytet evropian”. Sa kushton infrastruktura e kryeqytetit dhe si duhet punuar

Strategjia, 45.5 miliardë lekë për Tiranën evropiane

Drejtori i përgjithshëm i Punëve Publike, Dritan Agolli: Tirana Evropiane, gati për 9 vjet

Bruna Prifti

Bashkia e Tiranës për herë të parë ka gati një strategji të plotë për punën që i duhet metropolit shqiptar për t’u bërë evropian. Plot 9 vjet dhe një shumë prej 45.5 miliardë lekësh, nevojiten që Tirana të mos ketë gjë mangut nga qytetet e tjerë të Evropës. Së paku sa i përket infrastrukturës.
Strategjia “Tirana një qytet evropian”, e para në llojin e vet për kryeqytetin, tregon me detaje se sa kushton infrastruktura e qytetit dhe mënyrën e detajuar të punëve që duhen bërë. Bashkë me këtë edhe rrugën që duhet ndjekur në realizimin e prioriteteve të bashkisë nisur nga interesi dhe nevojat e qytetarëve.
Strategjia
Sipas studimit të detajuar që është bërë për çdo qoshe të kryeqytetit, rrugëve kryesore e atyre mes blloqeve të banimit, përfshirë edhe infrastrukturën arsimore e pa lënë mënjanë as gjelbërimin, koha që nevojitet është disi e gjatë. “Sipas studimit të bërë, për të realizuar gjithë punimet e nevojshme, ndërhyrjet dhe hapjen e segmenteve të reja, do të duheshin 13.5 vjet”,- thotë drejtori i përgjithshëm i Punëve Publike pranë Bashkisë së Tiranës, Dritan Agolli. Kohë që sipas tij, është e konsiderueshme për durimin e banorëve. Të cilët me zor presin të prekin ndryshimin në qytetin ku jetojnë. Ndërkaq edhe gjithë të tjerët që vizitojnë kryeqytetin, përfshirë këtu edhe shumë të huaj. Por sipas Agollit, kjo kohë, me punën intensive të bashkisë do të reduktohet. “Gjithçka e studiuar për Tiranën Evropiane do të realizohet për 9 vjet”,- premton drejtori Agolli, duke garantuar se brenda kësaj kohe kryeqytetasit do të shohin ndryshimin e madh, si dhe duke sqaruar se pse gjithçka në një kohë më të shkurtër, se parashikimi. “Them për 9 vjet, për disa arsye. Së pari, sepse qytetarët presin dhe meritojnë të prekin ndryshimin. Së dyti, pasi ky është një synim i bashkisë dhe njëherësh prioritet i drejtorisë për të bërë përmirësimin tërësor të infrastrukturës”,- shpjegon ai.
Ndarja, 101 blloqe banimi
Një qytet që tregohet me harta. Mijëra rrugë të vijëzuara me ngjyra të ndryshme, e të tjera të shënuara me yje. Blloqe të shumta banimi, ku punimet kanë përfunduar, diku tjetër ku sapo kanë nisur e shumë syresh (në numër më të madh këto), ku është planifikuar të ndërhyhet. Sipas strategjisë, prezantuar nga drejtori i Punëve Publike, Dritan Agolli, kryeqyteti numëron 101 blloqe banimi. Të gjitha në listën e punëve të bashkisë për rehabilitim të plotë. Në shumë puna ka nisur, si ndodh realisht në bllokun “50 -vjetori” banorët e të cilit, shprehen se zgjerimi i rrugëve, prishja e kioskave dhe shtimi i gjelbërimit, kanë për ta bërë këtë zonë, krejt ndryshe nga ajo në të cilën kanë banuar vite me radhë. Krahas blloqeve të banimit, hartat vijëzojnë 81 rrugë ekzistuese, 12 nyje e struktura, si dhe domosdoshmëria për punime në 36 rrugë të reja. “Në 10 blloqe banimi punimet kanë përfunduar. Ndërkohë që kanë nisur punimet apo do të nisin shumë shpjet në 91 blloqet e tjera të banimit në Tiranë”,- thotë Agolli.
Së pari, rrugët
Pjesa më e madhe e gjithë fondit të parashikuar për Tiranën Evropiane nevojitet për infrastrukturën rrugore. Kjo sipas drejtorit Agolli nuk është thjesht një zgjedhje. “Së pari ka ardhur pas një studimi të mirëfilltë e të detajuar mbi infrastrukturën në Tiranë e së dyti nga vetë anketimi i banorëve të kryeqytetit”,- thotë ai. Mjaft të kujtojmë që bashkia përpara hartimit të projektbuxhetit dhe ndarjes së tij në zëra të veçantë, përmes një ankete mblodhi mendimet e banorëve të Tiranës. Vetëm për infrastrukturën rrugore sipas strategjisë, duhen 35.71 miliardë lekë. “Për rrugët kryesore duhen vënë në përdorim 3.9 miliardë lekë, ndërsa për rrugë të reja, 9.6 miliardë lekë”,- thuhet në strategji. Përpos këtyre, ku kuptohet rëndësia që do t’i kushtohet nga ana e bashkisë segmenteve të reja, një shumë mbi 20 miliardë lekësh nevojiten për infrastrukturën e blloqeve të banimit.
Arsimi
Renditur i dyti, por jo më pak i rëndësishëm. Pavarësisht se shuma e parashikuar nga strategjia për Tiranën evropiane është konsiderueshëm më e vogël se ajo e përcaktuar për infrastrukturën rrugore. Plot 5.23 miliardë lekë sipas studimit i duhen infrastrukturës në arsimin parauniversitar. Shumë kjo që parashikohet të shkojë për rikonstruksionin e shkollave ekzistuese dhe ndërtimin e objekteve të reja në sistemin parauniversitar të Tiranës. Në mënyrë, që nxënësit e arsimit fillor e të mesëm të Tiranës, të mos ankohen pambarimisht për kushtet e vështira ku mësojnë, godinat e papërshtatshme apo klasat me numër shumë të madh nxënësish. Kjo natyrisht vlen edhe për pajisjen me mjete didaktike e laboratorë për orë të veçanta. “1.99 miliard lekë duhen për rikonstruksion të shkollave ekzistuese dhe 3.24 miliardë lekë për shkolla të reja”,- thuhet në strategji.
Gjelbërimi
Shtimi i sipërfaqeve të gjelbra dhe rikonstruksioni i parqeve ekzistuese. Gjithçka me synimin që Tirana të ketë 7 metrë katrorë gjelbërim për frymë. Që do të thotë natyrisht më pak pluhur e më shumë ajër të pastër. “Tirana Evropiane”, i kushton jo pak rëndësi hapësirave të gjelbra për kryeqytetin, ndërsa shuma e planifikuar për arritjen e synimit, është 4.536 miliardë lekë. Prej këtyre, sipas detajimit të bërë në strategjinë e bashkisë, 2.209 miliardë lekë duhen për rikonstruksionin e hapësirave të gjelbra ekzistuese dhe 2.127 miliardë lekë për shtimin e sipërfaqeve të reja. E po të kesh parasysh punën e bashkisë për rrugët, ku krahas të tjerave, synon edhe gjelbërimin rrugor, ky i fundit është padyshim pjesë e strategjisë. Por, që kushton natyrisht më pak. Vetëm 0.2 miliard lekë nevojiten për këtë lloj gjelbërimi, që në shumicën e rasteve numëron pemë të mbjella anës rrugëve.

Të dhënat
35.71
miliardë lekë sipas strategjisë nevojiten për infrastrukturën rrugore të kryeqytetit

5.23
miliardë lekë, nevojiten për rikonstruksionin e shkollave ekzistuese dhe ndërtimin e të rejave

4.536
miliardë lekë, sipas strategjisë nevojiten për shtimin dhe mirëmbajtjen e sipërfaqeve të gjelbra

Arsimi
1.99 miliardë lekë për rikonstruksionin e shkollave ekzistuese
3.24 miliardë lekë për ndërtimin e shkollave të reja

Gjelbërimi
2.209 miliardë lekë për mirëmbajtjen e atij ekzistues
2.127 miliardë lekë për shtimin e sipërfaqeve të reja
0.2 miliard lekë për gjelbërimin rrugor



23/03/2005

[angeldust]

Jam kurioze te di, a publikohet diku ky studim dhe menyrat qe u perdoren per te arritur ne keto konkluzione per sa i perket shumave te te hollave qe nevojiten? A informohet publiku se nga dhe si u gjenden keto shifra?

Pastaj artikulli thote 45.5 mld L, mariglennora ne titull ka vene 4.5 mld L. Akoma me parate e vjetra te flasin keta ne artikull thua? Paksa e cuditshme nqs. ende vazhdojne ta bejne nje gje te tille. Nqs. eshte thjesht lapsus, atehere dakord.

Hajde te na rroje kryeqyteti thuaj.