Tifozët e FC Real Madridit...#4

[Davius]

Si duket sezonin e ardhshem do ju prishet harmonia ne ekip, me duket se do te ndryshojen ca gjera vitin tjeter....

[Davius]

Saki projekton rikthimin e "galaktikëve"

Arrigo Saki ka filluar nga puna për të ndërtuar skuadrën e Realit të Madridit, për sezonin e ardhshëm futbollistik. Nuk do të jetë aspak e lehtë, por drejtori teknik i "merengesëve" ka një objektiv të qartë për sezonin e ardhshëm: "Duhet të formojmë një skuadër që të luajë mirë dhe të fitojë titullin." Në sezonin e ardhshëm, duke filluar nga presidenti Perez dhe deri te rezerva e fundit madrilene, do të kenë si objektiv fitimin e trofeve. Dy vjet duarbosh janë shumë për "Santiago Bernabeun", tifozët e të cilit kërkojnë rikthimin në majat e futbollit botëror.

Në lidhje me këtë, Saki thotë: "Në këto dy vitet e fundit nuk kemi fituar asgjë, edhe pse kemi pasur futbollistët më të mirë të planetit në skuadër. Kjo tregon se ndeshjet e veçanta edhe mund të fitohen vetëm falë ndonjë "ylli" që ke në skuadër, por titujt i fiton vetëm duke luajtur si një ekip i vërtetë gjatë gjithë sezonit. Dhe ky është objektivi ynë: të ndërtojmë një skuadër." Italiani është i vetëdijshëm që te Reali i Madridit nuk vlen vetëm të fitosh: "Eshtë normale që duhet të fitojmë duke kënaqur njerëzit që mbushin "Bernabeun". Kjo është një traditë që vazhdon prej vitesh në këtë stadium. Kam besim se në sezonin e ardhshëm nuk do të zhgënjejmë, pasi skuadra është e etur për trofe." Më pas, Arrigo Saki kujton kohën kur nuk rrinte i mbyllur në zyrë, por vishte tutat dhe punonte me skuadrën në stërvitje.

Ish-trajneri i Parmës, Milanit dhe kombëtares italiane u shpreh: "Në futboll duhet të dish të sulmosh dhe të mbrohesh. Duhet të dish të mbash nën presion kundërshtarin dhe të sulmosh për 90 minuta, por duhet edhe të dish të përdorësh kundërsulmin. Duhet të luajmë si një trup i vetëm dhe të shfrytëzojmë në maksimum qarkullimin e rrjedhshëm të topit." Saki i premton liri të plotë Luksemburgos në zgjidhjet e tij dhe e ndihmon trajnerin brazilian: "Trajneri është ai që vendos. E rëndësishme është të fitojë skuadra dhe jo nëse luan apo jo ndonjë "galaktik". Vjet përbënte më shumë lajm formacioni i Realit, sesa rezultati i ndeshjes. Një sezon është i gjatë 70 ndeshje dhe asnjë futbollist, sado i aftë qoftë, nuk mund të jetë gjithmonë titullar." Saki vazhdon deklaratën e tij duke dhënë nga një mendim për disa nga futbollistët aktualë të Realit: "Rauli është ende i ri dhe mendoj se do të japë më shumë për Realin vitin e ardhshëm. Në rast se do të më duhej të përshkruaja futbollistin më perfekt brenda dhe jashtë fushës, do të zgjidhja Zidanin. Udgejti është riaftësuar dhe do të jetë pjesë e skuadrës vitin e ardhshëm. Guti?

Dera për të është e hapur. E ka në dorë të ardhmen e tij, sepse ne nuk duam të mbajmë në skuadër futbollistë që nuk kanë dëshirë të qëndrojnë." Në fund, italiani flet për merkaton e Realit dhe për punën që po bën në këtë aspekt së bashku me Butragenjon dhe presidentin Perez: "Eshtë një merkato konfuze. Ka shumë futbollistë që janë të gatshëm të luajnë për ne, por klubet e tyre kërkojnë çmime stratosferike. Marrëveshjet janë shumë të vështira, sepse futbolli është shndërruar në një biznes të vërtetë dhe nuk është e vërtetë që gjatë verës pushon. Eshtë e vërtetë që nuk luhet në fushë, por në zyrat e presidentëve vendosen fatet e sezonit. Pablo Garsia dhe Serxhio Ramos janë dy futbollistë që më pëlqejnë, por ende nuk kemi arritur një marrëveshje me ta."

[Davius]

Robinjo: Jam pranë Realit


Talenti 20-vjeçar brazilian, Robinjo, duket se është vetëm një hap larg ëndrrës së tij, kalimit te Reali në Primera Divizion. Sulmuesi i Santosit është i impenjuar me Kupën e Konfederatave, por në një deklaratë të tijën, pas ndeshjes me Japoninë, braziliani u shpreh: "Nuk dua të flas për merkato, sepse do të më akuzonin që nuk jam i përqendruar te Brazili. Kupa e Konfederatave është shumë e rëndësishme për mua, por nuk mund ta fsheh që kalimi im te Reali, është çështje ditësh, për të mos thënë orësh." Robinjo i përgjigjet kështu presidentit të klubit të tij, Santos, i cili të mërkurën mohoi një kalim të talentit te Reali.

Gjithsesi, Tekseira pranoi se është në program një takim me drejtuesit e Realit më datë 24 qershor. Pra, sot në Madrid do të vendoset e ardhmja e Robinjos, që, sipas të gjitha gjasave, do të jetë me fanellën "merengese". Santosi ka kërkuar 50 milionë dollarë për Robinjon, por marrëveshja pritet të arrihet në një shifër shumë më të ulët, 20 milionë euro. Robinjo vetëm përpara fillimit të Kupës së Konfederatave refuzoi rinovimin e kontratës deri në vitin 2008, me Santosin. Kësisoj, drejtuesit brazilianë janë të detyruar ta shesin talentin e tyre, përndryshe ai mund të largohet nga skuadra me parametër zero në fundin e sezonin. Edhe menaxheri i Robinjos ka konfirmuar disa herë që vetëm detajet e pengojnë kalimin e futbollistit të tij në "Santigo Bernabeu".

[Davius]

Reali, ultimatum Santosit për Robinjon?!

Reali i Madridit u ka kërkuar drejtuesve të Santosit, që të japin një përgjigje përfundimtare për ofertën e bërë nga "merengesët", për të marrë shërbimet e Robinjos. Në rast se Santosi deri më tetë korrik nuk do të pranojë 20 milionë eurot e ofruara nga presidenti Florentino Perez, për talentin 20-vjeçar, marrëveshja do të dështojë. Lajmin e ka bërë të ditur menaxheri i sulmuesit që aktualisht është i impenjuar me kombëtaren braziliane në Kupën e Konfederatave. Ribeiro tha: "Drejtuesit e Realit më kanë thënë që në rast se Santosi nuk i pranon 20 milionë eurot brenda tetë korrikut, ata do ta mbyllim përfundimisht këtë çështje."

Pra, "merengesët" e kanë humbur durimin dhe synojnë me çdo kusht një përgjigje nga brazilianët. Vetëm kështu, Saki dhe Luksemburgo mund të fillojnë të projektojnë skuadrën e tyre. Nga mbërritja e Robinjos është e varur e ardhmja e emrave të tillë si Figo, Ouen apo Solari. Kështu, drejtuesit spanjollë kërkojnë të mos humbasin më kohë.

Edhe vetë Robinjo, përpara finales së Kupës së Konfederatave ndaj Argjentinës, u shpreh se javën e ardhshme do të vendosej e ardhmja e tij. Ndërkohë, sipas së përditshmes braziliane Folha, problemi i vetëm Santos-Real ka të bëjë me mënyrën e pagesës dhe valutën. Reali ofron 20 milionë euro, që do të paguhen me dy këste 6-mujore, ndërsa Santosi kërkon 25 milionë dollarë, të gjitha në dorë.

[Davius]

Ja edhe fanelat e reja te Realit jane shume te bukura, e sidomos me pelqeka shumi fonti ne pjesen e prapme...

Vamos REAL MADRID..............

[Davius]

Ja edhe nje fanelle qe do shfrytzohet kur do luhen ndeshjet jashta Madridit....

[Davius]

Ronaldo: Po rrezikoj vendin e titullarit

Pas fitores së Brazilit ndaj Argjentinës, sulmuesi Ronaldo deklaroi se vendi i tij prej titullari nuk ishte i sigurtë në ekipin e "Selesaos". Megjithatë, sulmuesi i Realit të Madridit nuk ishte penduar për vendimin për të mos marrë pjesë në Kupën e Konfederatave. Ronaldo mungoi në kompeticionin 2-javor, pasi kërkoi të pushonte dhe zëvendësuesi i tij, Adriano, e shfrytëzoi më së miri mundësinë e dhënë, duke u shpallur golashënuesi më i mirë i Kupës së Konfederatave, me 5 gola.

"Trajneri Parreira deklaroi se vendi im në kombëtare është i garantuar, por unë nuk e mendoj kështu. Jam i bindur se në qoftë se nuk arrij të shënoj gola, nuk do ta kem të sigurtë vendin e titullarit. Brazili ka shumë sulmues të talentuar dhe këtë e tregoi edhe në Kupën e Konfederatave. Adriano është i jashtëzakonshëm dhe këtë ai e ka treguar edhe tek ekipi i Interit. Edhe Robinjo është zhvilluar teknikisht dhe është një ndër pretendentët për një vend në Botërorin e Gjermanisë. Nuk mora pjesë në këtë kompeticion, pasi kisha nevojë të pushoja.

Nuk pendohem për vendimin tim, sepse ishte e nevojshme për mua në prag të botërorit të ardhshëm. Dëshiroj të jem 100% gati për në botërorin e ardhshëm. Dëshiroj që viti 2006, të jetë viti i jetës sime. Jam i lumtur për paraqitjen e Brazilit në Kupën e Konfederatave, por në botëror dua të luaj dhe të shënoj rregullisht", - deklaroi Ronaldo.

Robinjo pas fitores: Dua Realin

Sulmuesi brazilian Robinjo ka thënë pas fitores së Brazilit ndaj Argjentinës, se do t'i pëlqente të luante sezonin e ardhshëm me Realin e Madridit. "Shpresoj të luaj te Reali. Kam biseduar me ta dhe mendoj se është hapi i duhur për karrierën time," - tha talenti 20-vjeçar për një televizion brazilian. Robinjo ka dalë kështu edhe një herë kundër dëshirës dhe fjalës së presidentit të Santosit, Marselo Teikseira, që e ka mohuar një kalim të sulmuesit në Madrid. Santosi kërkon 50 milionë dollarë dhe Reali është gati të ofrojë vetëm 25.

Gjithsesi, dëshira e futbollistit për të luajtur në "Bernabeu", duket se do të ndikojë në arritjen e një marrëveshjeje përfundimtare. Në vazhdimin e deklaratës së tij, Robinjo u shpreh: "Në Brazil nuk mund të jetoj i qetë. Kam pasur shumë strese që nuk më kanë lejuar të përqendrohem totalisht te futbolli. Për këtë do të më pëlqente Spanja dhe sidomos Madridi. Atje do të kem fatin të punoj me një trajner që e njoh mirë, siç është Vanderlei Luksemburgo."