Bano: Qeveria, 30 milionë USD abuzime

[Albo]

Kryetari i komisionit parlamentar për hetimin e prokurimeve publike deklaron rezultatet e para

Qeveria, 12.5 milionë USD abuzime

Bano: Këshilli i Ministrave, 77% e tenderave me prokurim të drejtpërdrejtë

N.Perndoj

TIRANE - Kryetari i komisionit për hetimin e prokurimeve publike në Kryeministri dhe ministritë, Ilir Bano, deklaroi dje se nga shmangia e përdorimit të tenderit të hapur, shteti ka humbur plot 1 miliard e 250 milionë lekë të reja. “Nga 40.7 miliardë lekë të prokuruara nga institucionet nën hetim parlamentar, 10.1 miliardë lekë ose rreth 25% e shumës, janë prokuruar me procedura të tenderit të kufizuar, kërkesës për kuotim ose prokurim të drejtpërdrejtë, duke anashkaluar procedurën e tenderit të hapur, me qëllimin e vetëm shtimin e vjedhjes së parave të taksapaguesve shqiptarë”, - tha dje Bano. Ai theksoi se dëmi i madh ekonomik nga këto shkelje ligjore del qartë krahasuar me kursimin, ose e thënë më saktë, “raportin e vjedhjeve të kryera në tenderat e hapur me format e tjera të prokurimit”. “Konkretisht megjithë korrupsionin dhe shkeljet e panumërta, të konstatuara në zhvillimin e prokurimeve publike, pavarësisht nga procedura e përdorur, që ne do t’i paraqesim në ecuri, rezulton se në tenderat e hapur, për 1000 lekë të prokuruara janë kursyer 140 lekë ose 14%, ndërsa në tenderat e kufizuar vetëm 20 lekë ose 2%, dhe siç dihet, në prokurimet e drejtpërdrejta asnjë lekë”,- tha Bano. E kthyer në vlerë absolute, sipas tij, shteti ka pësuar një humbje shtesë në tenderat e kufizuar dhe kërkesën për kuotim rreth 898 milionë lekë, ndërsa në prokurimet e drejtpërdrejta 353 milionë lekë, gjithsej rreth 1 miliard e 250 milionë lekë. “Duhet theksuar fakti se aparati i Këshillit të Ministrave, në krahasim me fondet që ka prokuruar, është më keq në këtë drejtim. Kështu nga 290 milionë lekë të prokuruara gjithsej në tre vjet, 224 milionë ose 77.2%, janë prokuruar me procedurë të drejtpërdrejtë, vlerë, e cila pa asnjë justifikim ligjor ka shkuar kryesisht për rikonstruksionin e Kryeministrisë”, - tha ai. Në rast se kjo vlerë, vazhdoi Bano, do të prokurohej në tender të hapur, me të njëjtat parametra që janë zhvilluar tenderat e tjerë nga ky subjekt, shteti do të kursente 25 milionë lekë më shumë. “Gjithashtu, të gjithë tenderat e zhvilluar me procedurë tender i kufizuar dhe ftesë për kuotim në tre vjet, janë fituar nga konkurrentët me 100% të vlerës së fondit limit. Si vlerë, humbjet më të mëdha nga shmangia e tenderit të hapur janë shkaktuar nga Ministria e Transporteve në masën 347 milionë lekë. Theksojmë se prokurimet, për të cilat është shmangur tenderi i hapur, kanë qenë në shumicën dërrmuese, rreth 90% e tyre, me vlera kur duhej përdorur kjo procedurë ose tenderi i hapur ndërkombëtar”,- tha Bano. Sot kryetari i komisionit për hetimin e prokurimeve publike në Kryeministri dhe ministritë do të bëjë publik një tjetër raport që është vazhdim i dëmit ekonomik, që shteti ka pësuar si rezultat i shmangies së përdorimit të tenderit të hapur.

[Fiori]

Bano: Prokurimet, Nano në një ditë shiti 20% të investimeve vjetore

N.Perndoj

TIRANE- Ministria e Transportit dhe Telekomunikacionit ka hedhur poshtë dje të gjitha shifrat që ka bërë publike për tre ditë rresht, kryetari i komisionit hetimor për prokurimet publike, Ilir Bano. Zëdhënësja e Ministrisë së Transportit dhe Telekomunikacionit, Mirela Ndini, ka sqaruar përmes një njoftimi zyrtar se kjo ministri në tërë veprimtarinë e saj për prokurimin dhe realizimin e fondeve publike është udhëhequr dhe ka respektuar vetëm dispozitat e ligjit. “Procedurat e prokurimeve të drejtpërdrejta dhe me kërkesë për kuotim janë përdorur për të siguruar zgjidhjen e problemeve emergjente, realizimin e cilesisë së nevojshme të punimeve, përdorimin me efikasitet të fondeve buxhetore etj. Në të gjitha rastet këto procedura kanë respektuar kërkesat e ligjit. Aparati i ministrisë dhe strukturave ekzekutive të saj, kanë qenë gjithmonë të hapur dhe transparentë, si ndaj organeve të specializuara të kontrollit ashtu dhe publikut të gjerë për t’u informuar dhe njohur me çdo aspekt që ka të bëjë me përdorimin e fondeve publike”, - thuhet në njoftimin për shtyp të Ministrisë së Transporteve. Dy ditë më parë, kryetari i komisionit hetimor për prokurimet, Ilir Bano, deklaroi se humbjet më të mëdha nga shmangia e tenderit të hapur janë shkaktuar nga Ministria e Transporteve në masën 347 milionë lekë. Ndërsa dje në një konferencë për shtyp, Bano deklaroi se, “vetëm në një ditë, kryeministri Fatos Nano shiti 20% të investimeve vjetore të buxhetit të shtetit me financim të brendshëm, duke shmangur tenderin e hapur dhe në disa raste atë të hapur ndërkombëtar”. “Ekspertët krahasuan vlerën e financimit të segmentit të rrugës Sukth-Durrës me katër korsi, bazuar në situacionin e datës 28.11.2003, dhe vlerën e parashikuar për përfundimin e dy korsive të rrugës Rrogozhinë-Lushnjë. Pas përllogaritjeve për punimet e shqyrtuara, të dy lotet e rrugës Rrogozhinë –Lushnjë duhej të kushtonin 613.809.820 lekë, ndërsa në fakt, nga qeveria e z.Nano është vendosur që qytetarët shqiptarë të paguajnë për to 1.017.760.577 ose 403.950.757 lekë më tepër se vlera me të cilën janë ndërtuar objekte të njëjtë me tender të hapur”,- tha dje Bano.

[Albo]

Ilir Bano, kryetari i komisionit hetimor për prokurimet bën publike shifrën e dëmit të shkaktuar

Prokurimet, vjedhja 30 milionë dollarë

Bano: Vjedhja që është bërë me prokurimet është e përmasave akoma më të mëdha

N.Perndoj

TIRANE- Qeveria shqiptare ka shpërdoruar 30 milionë dollarë me prokurimet publike. Kjo është shifra, që ka bërë publike dje për “Shekullin”, kryetari i komisionit hetimor për prokurimet publike, Ilir Bano, i cili ka pothuajse gati edhe raportin përfundimtar të punës së komisionit. “Unë mund t‘ju them se shpërdorimet dhe vjedhjet që janë bërë me prokurimet publike kapin vlerën e rreth 30 milionë dollarëve. Dua të sqaroj gjithashtu se kjo shifër është vërtetuar vetëm nga përllogaritjet, që ne kemi nxjerrë, pasi vjedhja që është bërë me to është e përmasave akoma më të mëdha, dhe se ajo nuk përcakton dëmin real, pasi ky dëm shkon akoma edhe më shumë“, - tha dje Bano. Prej një jave, kryetari i komisionit hetimor për prokurimet publike, ka bërë publike shkeljet që sipas tij janë evidentuar me prokurimet publike. Në konferencën e tij të parë për shtyp për prokurimet, në Kryeministri dhe ministri, Ilir Bano deklaroi se nga shmangia e përdorimit të tenderit të hapur, shteti ka humbur plot 1 miliard e 250 milionë lekë të reja. Sipas tij, nga 40.7 miliardë lekë të prokuruara nga institucionet nën hetim parlamentar, 10.1 miliardë lekë ose rreth 25% e shumës, janë prokuruar me procedura të tenderit të kufizuar, kërkesës për kuotim ose prokurim të drejtpërdrejtë, duke anashkaluar procedurën e tenderit të hapur. Bano theksoi se shteti kishte pësuar një humbje shtesë në tenderat e kufizuar dhe kërkesën për kuotim rreth 898 milionë lekë, ndërsa në prokurimet e drejtpërdrejta 353 milionë lekë, gjithsej rreth 1 miliard e 250 milionë lekë. Edhe aparati i Këshillit të Ministrave, në krahasim me fondet që ka prokuruar, sipas Banos, ishte më keq. Ai deklaroi se nga 290 milionë lekë të prokuruara gjithsej në tre vjet, 224 milionë ose 77.2%, janë prokuruar me procedurë të drejtpërdrejtë. Si vlerë, humbjet më të mëdha nga shmangia e tenderit të hapur, sipas Banos, janë shkaktuar nga Ministria e Transporteve në masën 347 milionë lekë. Ministria e Mbrojtjes ka qenë një tjetër ministri që është shigjetuar jo pak me shifra nga kryetari i komisionit, Ilir Bano. Tre ditë më parë, Bano deklaroi se qeveria ka kryer veprime antiligjore me pasojë vjedhjen e deri 5,5 milionë dollarëve nga prokurimi i 20 automjeteve për Ministrinë e Mbrojtjes. Bano tha se një çështje e tillë kërkon hetim të mëtejshëm, ndërsa ka paraqitur disa të dhëna në lidhje me këtë akuzë të bërë publike prej tij. Një nga aferat më të dyshimta dhe me madhësi dëmi më të lartë, ka thënë Bano, është prokurimi i 20 automjeteve për Ministrinë e Mbrojtjes me metodën barter, (shkëmbimi mall me mall), me këmbim me skrap, realizuar sipas vendimit të Këshillit të Ministrave, nr. 232, datë 10.04.2003.
Edhe për Ministrinë e Rregullimit të Territorit dhe Turizmit, kryetari i komisionit hetimor për prokurimet publike, Ilir Bano, ka deklaruar se ka pasur abuzime në masën 45 milionë lekë në dy prokurime rrugësh në Ministrinë e Rregullimit të Territorit dhe Turizmit. Ndërsa dy ditë më parë, Ilir Bano deklaroi se qeveria ka harxhuar 1.21 miliard lekë karburant.

[Qerim]

Mire na e kane thene te huajt, NE SHQIPARET NUK DIME T`A MBAJME SHTETIN.

Kedo te vesh, te gjithe hajdute. Ne shqiptaret e kemi konceptin se shteti eshte per fitime personale .

[Kleitus]

Te reja apo te vjetra keto milionat ?

[Zarathustra.]

Nje sekonde se po i bejme hesapet pa hanxhine me duket.

Buxheti i qeverise shqiptare krahasuar me 96, vitin e piramidave ku paraja ne qarkullim ishte ne kulmin e saj dhe kishte mundesi te rriteshin shume te ardhurat, eshte rreth 5.2 here me i laret duke arritur ne 2.7 miliarde dollare.

Shuma prej 30 milione dollaresh, perben vetem 1% te ketij buxheti. Besoj se kjo shume si % e shumes totale nuk eshte aspak alarmate dhe e papare edhe per vendet e zhvilluara. Nuk ka vend ne bote qe buxheti i shtetit nuk abuzohet, por shifra 1% eshte teper minimale, sidomos per shqiperine. Ketu mos harrojme se PD mori 2 miliarde dollare ndihma nga bota dhe i abuzoi te gjitha, pa perjashtim, shto ketu edhe rreth 500 milione dollare ne vit, qe ishte buxheti i shtetit dhe shkojme ne LLAHTARE abuzime. Me keto 2 miliarde e me qindra miliona nga buxheti i shtetit per 5 vjet u shtruan vetem 5 km autostrade, dhe mbi keto u vodhen edhe 1.2 miliarde te tjere nga "Gjigandet ekonomike" te PD. Keshtu qe Bano, nuk duhet te qelloje me gure nga shtepia e tij e qelqte.