Femije te braktisur

[shigjeta]

Cili eshte opinioni juaj ne lidhje me problemin qe trajton artikulli me poshte. Cfare mund te behet qe te kete me pak braktisje femijesh neper plera e cepa pallati

Fëmijët e braktisur nga materniteti deri në familje

Rastet e rruges, mungojne statistikat zyrtare: Shume raste zhduken
Pasi kalojnë nëntë muaj shtazanie të fshehtë, një ditë nga ato që nuk do të donin ta kujtonin kurrë behin në maternitet. Po! Pranojnë se do të lindin një fëmijë, por për arsye nga më të ndryshmet, asnjëra prej tyre nuk e rrit dot vetë. Me një emër të rremë, adresë të rreme, moshë të rreme rregjistrohen për të lindur një fëmijë që në më të shumtën e rasteve nuk do ta shohin më kurrë. Kur kanë kohë ju vënë edhe një emër, pastaj ikin. Ka raste në mes të natës të pashoqëruara nga askush. Ka raste kur kthehen sërish me lot në sy, sepse nuk kanë më një mitër, nuk do të kenë më kurrë kënaqësinë e të lindurit të një fëmije. Kërkojnë krijesën e tyre, që nuk dihet më në ç'shtëpi fëmije ndodhet a mbase edhe është adoptuar.

Fëmijë të braktisur në vite

1999 janë 33 bebe
2000 janë 34 raste
2001 janë 39 raste
2002 janë19 bebe


Mesatarja në tre muaj është deri në 10 fëmijë
Qëndrimi në "djepin e engjëjve", në maternitet zgjat nga 10 ditë deri në 3-4 muaj

"Pse"-të
"Për mua janë nëna heroina. Lindin një fëmijë që për arsye të ndryshme nuk e mbajnë dot. Nuk e vrasin, të paktën e lënë për adoptim. Kjo është zgjedhja më e mirë, nuk i braktisin nëpër kosha plehrash u'a dhurojnë jetën", shprehet nëndrejtori i maternitetit të madh, Zyhdi Eshja. Mosha mesatare e nënave që i braktisin fëmijët e tyre është 18-20 vjeç. Por nuk mungojnë edhe rastet e tjera, raste të vajzave 15-vjeçare apo edhe të grave të veja, që një lidhje e fshehtë dashurie i zbulon lakuriq para opinionit. Vetëm për vitin 2002 ka pasur 19 raste bebesh të braktisura. Për këta fëmijë në maternitet kanë krijuar kushte mjaft të mira. Ata mbahen aty për disa ditë me radhë apo edhe për shumë muaj dhe pastaj shpërndahen nëpër befotrofet e Shqipërisë. Kur fëmijët braktisen në fshehtësi nga nënat e tyre, fillimisht ju dërgohet një telegram në adresën e dhënë nga vajza para lindjes, në të gjitha rastet kthehet përgjigje negative, "Kjo adresë nuk ekziston apo kjo adresë nuk është e saktë". Pas kësaj fëmijës i plotësohet një kartelë ku ndodhet gjithë informacioni fillestar dhe dokumentacioni i plotë dhe shpërndahen nëpër befotrofe prej nga adoptohen nga çifte shqiptare apo të huaj.

Punonjësja sociale
Të gjitha femrat që bëjnë lindje të tilla kontaktojnë fillimisht me punonjësen sociale. Tek ajo "zbrazin" hallet e tyre, zhgënjimet, dashuritë e pamundura apo edhe flirtet pa krye. "Gjërat kanë ndryshuar. Në vitet e mëparshëm vinin vajza që kishin pasur një histori të vërtetë dashurie, një vit apo edhe më shumë. Ndërsa sot vijnë shumë vajza që nuk kanë një lidhje të qëndrueshme, që djalin me të cilin janë lidhur e kanë takuar rastësisht në kafene apo diku tjetër", shprehet ajo. Janë të rralla rastet kur vajzat arrijnë të mbajnë një kontakt me familjen që birëson fëmijën e tyre. Në Repartin e Engjëjve gjen gjithmonë fëmijë që presin të lëvizin nëpër befotrove, javën e shkuar katër prej tyre u dërguan në shtëpinë e fëmijës në Korçë. Largohen nga materniteti pa mbiemër. Quhen, Eno. Kledi, Sofi, Brajan dhe vetëm kaq. Nënat që i kanë braktisur në një nga ditët e shumta të jetës së tyre në përgjithësi e kanë të pamundur t'i gjejnë më. Fëmijët shpërndahen nëpër të gjithë Shqipërinë dhe pasi kalojnë pak kohë nëpër befotrofe adoptohen sipas një procedure të rregullt nga shqiptarë apo të huaj.

Skafisti
Doktor Zyhdiu dhe punonjësja sociale Mira e kujtojnë me të qeshur djalin e vogël nga Vlora që në të vërtetë nëna e tij e quajti Brajan. I thonë skafisti dhe shprehen se Brajan ndenji 6 muaj në maternitetin e tyre. Vetëm 10 ditë pasi vajza nga Vlora lëshoi një deklaratë braktisjeje, në maternitet u shfaq nëna e saj. Kërkonte nipin. E bija kishte pasur një hemoragji pas lindjes dhe më pasi i kishin hequr mitrën. Fakti që nuk do të lindte kurrë më fëmijë i detyroi familjarët e saj që të kapërcenin opinionin dhe të merrnin djalin në shtëpi. Megjithatë, kthimi i Brajanit tek e ema kaloi në disa proçedura dhe ajo si rregull u detyrua t'i drejtohej gjykatës. Fëmija u dërgua në befotrofin e Vlorës sa të mbarojë maratona e gjyqit. Familjarët shkojnë dhe e marrin për fundjavë, deri ditën që vendimi i gjyqit t'ua kthejë përgjithmonë.

Rastet e rrugës
Askush nuk e di sa fëmijë gjenden të varrosur në oborre shtëpish, aq më pak nuk ka statistika të sakta për abortin. Por në rastet më të rralla, kur nëna nuk ka mundësi ta abortoj pasi e mëson me vonesë faktin që është shtazanë ajo pret pa ndonjë plan lindjen e fëmijës. Sipas statistikave në vit ka 2 ose 3 raste kur fëmijë të lindur në shtëpi apo diku tjetër braktisen në cepa pallatesh apo në rastin më të keq hidhen si një qese mbeturinash në kosh plehrash. Dy rastet më të fundit janë në dhjetor të vitit të kaluar dhe në korrik të këtij viti. E para një grua e pamartuar nga Farka me profesionin e lypsares dhe jo rrallë edhe atë të prostitutës 5 mijë lekëshe. Braktisi një mbrëmje në derën e një pallati foshnjen e sapo lindur. Ishte ora 20 e mbrëmjes kur një banore e pallatit u përball me një foshnje të mbështjellë me rroba të vjetra. Pas lajmërimit të policisë së komisariatit një, nisi kërkimi për gruan që braktisi fëmijën. Nuk vonoi shumë që të gjendej gruaja nga Farka e cila pranoi se të birin Shpëtimin (emër që ju vu foshnjës nga uniformat blu) e kishte lindur një ditë më parë në vetminë e tmerrshme të një gabine elektrike, e cila i shërbente si strehë. Ajo nuk kishte pasur mundësi ta abortonte të birin, pasi e kishte mësuar me vonesë faktin që ishte shtazanë. Burri, me të cilin kishte ngelur shtatzanë nuk dihej se ku ndodhej, ai kishte ardhur një ditë për punë nga Saranada, atëherë kishte takuar edhe gruan. Kundrejt një pagese prej 5 mijë lekësh të vjetra, sarandioti, mbase nuk e ka lexuar as nëpër gazeta se në një befotrof shqiptar ndodhet një fëmijë që ka në deje gjakun e tij. Rasti i dytë ishte ai i foshnjes së sapolindur i cili u gjënd i hedhur në një kazan plehash në datën 10 korrik. Sipas ekspertizës, fëmija ishte hedhur i gjallë në koshin e plehrave pranë ambasadës Kroate. Aktualisht, as sot policia nuk ka rënë në gjurmët e gruas, që një mbrëmje vere vulosi me vdekje fatin e fëmijës së padëshiruar.

Gazetare Irena SHABANI

Marre nga revista Reportazh

[Brari]

Fukaralleku maskaralleku thot fjala popullore..

Vec kesaj ne Shqiptaret i vrasim njerzit me opinionin tone obskurantist.

Para dy javesh u gjet ne buz shkumbinit ne Elbasan nji foshnje e vdekur dhe ajo gjithashtu ishte vendosur ne nji kuti bananesh.
Tani perseri nji foshnje tjeter por fati qe eshte gjetur gjalle.

Ja cthot gazeta.Shekulli.
------------
E kanë mbajtur për mbi 12 orë në shtëpi dhe më pas e kanë dorëzuar në maternitet


Gjendet në park foshnja e braktisur.


Elbasan,fëmija është gjetur nga një çift bashkëshortësh që nuk kishin fëmijë


ELBASAN - Në foshnjë e braktisur u gjet mbrëmjen e së mërkurës në parkun 'Rinia" të qytetit të Elbasanit nga një çift bashkëshortësh që nuk kishin fëmijë, por dje në mëngjes është dorëzuar në maternitetin e Elbasanit. E porsalindura është një vajzë që, me një peshë mjaft të vogël, ka kaluar të paktën disa orë nën qiell të hapur derisa u zbulua nga dy bashkëshortët të cilët pasi u menduan gjatë nëse do ta mbanin apo jo, më në fund kanë vendosur që ta çonin atë në maternitet. Në spitalin e lindjes foshnja u vu nën kujdesin e menjëhershëm të bluzave të bardha. Pesha e fëmijës është vetëm 1.470 kg megjithatë nuk paraqet asnjë rrezik për jetën falë shpejtësisë me të cilën ajo u gjet, thanë për gazetën mjekët. Bluzat e bardha, dyshojnë se foshnja mund të jetë binjake, për vetë peshën mjaft të vogël krahasuar me shumicën e lindjeve. Mendohet që nëna ka lindur dy fëmijë, dhe ka mbajtur vetëm njërin prej tyre. Gjithsesi, saktësohet se lindja nuk është bërë në maternitetin e Elbasanit. Dyshohet që lindja të jetë bërë në kushte shtëpiake, nën kujdesin e ndonjë mamie.
Zbulimi
Çifti i bashkëshortëve që gjeti foshnjen, (nuk duan të identifikohen) ka treguar peripecinë dhe luftën me veten, për mbi 12 orë, para se të bindeshin për ta dorëzuar në maternitet. Rreth orës 21.30 një çift i martuar prej disa vitesh, banues në lagjen "Beqir Dardha", po kalonte në zbrazëtinë e parkut çlodhës, fare pranë qendrës së qytetit. Në një skutë të errët, dëgjojnë një qarje të mekur dhe në dritëhije, një foshnjë të porsalindur, të futur në një kuti bananesh, mbështjellë shkujdesur me pelena. Afrohen dhe e marrin në krahë. Për një çast sytë u shkëlqejnë, duke kujtuar ankthin e madh, që nuk bëjnë dot fëmijë, ankth që i mundon prej vitesh. Vendosin ta marrin në shtëpi dhe e ngrohin me shpejtësi. Fëmija qante vazhdimisht dhe donte të pinte. E ushqejnë dhe nisin dilemën nëse do ta mbajnë apo dorëzojnë. Në mëngjes binden se nuk mundeshin ta mbanin dot, për shkak se foshnja nuk ndodhej në gjendje të mirë. Prandaj dhe e çuan në maternitet, ku atje gjithsesi do të ishte nën kujdesin e mjekëve.
Përkujdesja
Bluzat e bardha thanë se foshnja do të jetojë pavarësisht se është braktisur me qëllim. Gazmenda Strumaj, infermierja që përkujdeset, tha për gazetën se foshnja mbërriti me një peshë 1400 gr dhe vetëm gjatë një dite shtoi 70 gr. Ata kanë vendosur ta "pagëzojnë" vajzën. Nga sot ajo do të quhet Artemisa Arbëri, emër dhe mbiemër i sajuar me qëllim identifikimin e saj. Pas një përkujdesjeje 90 ditore në maternitetin e Elbasanit, fëmija që tashmë ka edhe një emër, do të dërgohet në Befotrofin e Tiranës. Në Elbasan,ky ishte rasti i pestë i braktisjes në mjedise publike të fëmijëve të porsalindur. Tre prej tyre janë gjetur pajetë në rrugë qendrore dhe periferike ndërsa një i katërt u gjet në një kazan plehrash dhe shpëtoi pasi u gjet nga kalimtarë të rastit. Ndërsa në spitalin Obstetrik- Gjinekologjik të Elbasanit mësohet se janë edhe më shumë se 10 raste të braktisjes së foshnjave të porsalindura, por brenda këtij spitali dhe konform rregullave që përcakton ligji.

Soni Kurani
...........

[Fiori]

Nuk ka me keq...

Nq se vazhdoj te gezoj te njejtin shendet qe kam sot, jam e sigurt jo vetem do kem femije natyrore por do adoptoj aq sa te mundem femije nga Shqiperia.

Brari me ato dy rreshtat e pare i ke thene te gjitha...

[ornament]

Jo s'i ka thene te gjitha, ka harruar kryesoren.

BUDALLALLEK, FUKARALLEK, MASKARALLEK!

Mendoj se injoranca eshte NENA e dy te tjerave.

[Fiori]

ornament, megjithese kjo ja vlen per teme tjeter, do te thoja se jo gjithmone injoranca eshte nena e fukarallekut. Ndodh me shpesh ne jeten reale qe injoranca te jete me e pasur, materialisht flas...

[Estella]

uhhhhhhhh sa gjynah. Mjere ata femije. I bekofte zoti dhe rencin ne duar te mira per te shijuar jeten qe i eshte falur.

[Mina]

Eshte nje akt makaber! Per cfardolloj arsyeje, nuk e braktis femijen! Kohe me pare keto raste ishin shume te rralla. Kishte nga ato qe nuk e braktisnin femijen dhe benin lufte per te mos e sakrifikuar krijesen e tyre te pafajshme. Kesaj i them nene une!

[Estella]

Mendoj se kjo vjen kultura dhe arsimimi qe ka marre ai ose me mire ajo ose te dy bashke kur vendimi eshte marre nga te dy prinderit. Ka te beje shume me abjentin ku keto femra dhe meshkuj jane rritur. Nuk dua te them kete qe te fajesoj prinderit e tyre por nga eksperienca ime dhe leximet qe kam bere nje gje e tille vjen nga shthurrja e familjes dhe ne fare menyre apo nje tjeter e gjithe shoqeria njerzore ka ndikuar tek ky person qe ajo te arrije ne kete faze. jane shume gjera qe e kane komplikuar ceshtjen dhe kete person qe te arrije te mohoje edhe femijen e vet, gjakun, shpirtin e vet.
Shume femra qe kane kryer kete akt me vone jane penduar, por ka qene teper vone dhe asnje percapje nuk vlen atehere.

[rrufiani]

Shume e drejte Estella!Sepse femija eshte shpirti dhe gjithcka per nje prind!E ata femije qe rriten duke menduar se s'kane prinder rriten te vetmuar dhe e vuajne kaq shume nevojen per ta.Ka edhe mrekullira kur femija mund te njihet me prindin e tij pas vitesh te tera mohimi dhe mendo sa mire do ishte te nisnin nje raport te ri,do ndryshonte cdo aspekt te jetes se tyre.

[Letersia 76]

Mos i braktisni femijet se ato jane krenaria e familjes ,kombit dhe e ardhmja jone .......