Lajmet më të reja nga Formula 1 (2004-2005)

[viganv]

Briatore: Më bëhet qejfi për Fizikelën



Në përfundim të garës së Italisë, Flavio Briatore, menaxheri i përgjithshëm i skuderisë Renault, është shprehur shumë i kënaqur. "Mund ta kishim parakaluar edhe Montojën, megjithatë me këtë rezultat jemi të kënaqur. Për më shumë, Xhankarlo arriti të ngjitej në podiumin e garës së "shtëpisë". Mungojnë dhe katër gara deri në përfundim të kampionatit, tashmë për ne do të jetë më e thjeshtë sesa ka qenë deri tani," ﷓ ka përfunduar Briatore.

Michelini: Nuk duhet të jemi të vetëm në F1

Pier Dypaskie, drejtori i përgjithshëm i firmës franceze të gomave Michelin, nuk ka pranuar që në të ardhmen e Formulës 1 të jetë vetëm një firmë gomash. Një propozim i tillë është bërë nga FIA për projektin e saj për sezonin 2008. Ky ndryshim, sipas tyre, do të ulte akoma më shumë shpenzimet e këtij sporti. "Ne jemi kryesuesit e kampionatit botëror në këtë sezon dhe nuk mund të pranojmë një propozim të tillë. Në këtë mënyrë, ne humbim imazhin e gomave tona. Për më shumë, me këtë zgjidhje do të ulet akoma më shumë siguria e garave," ﷓ ka përfunduar Dypaskie.

[viganv]

Red Bull﷓i, me qen robot në bokset e Monzës

Thonë me të vërtetë se qeni është miku më i mirë i njeriut, por, me sa duket, në skuderinë Red Bull thonë se qeni është miku më i mirë i mekanikut. Në bokset e pistës së Monzës, skuderia e Milton Keinesit ka pasur një qen robot, i cili quhej Aibo. "Ai bën gjithçka që mund të bëjë një qen i vërtetë," ﷓ ka thënë një pjesëtar i kësaj skuderie. Por në formë shakaje dikush ka thënë se Aibo mund të përdoret edhe si spiun, duke e çuar në bokset e skuderive të tjera, për të bërë fotografi dhe për të grumbulluar të dhëna.

Akte vandale në pistën e Monzës

Gjatë mbrëmjes së të shtunës janë kryer akte vandale mbi pistën e Monzës, ku të nesërmen u zhvillua gara. Në disa pjesë të pistës u është vënë flaka disa reklamave, të cilat më pas i kanë hedhur në të. Gjithsesi, rreth orës 04.00 të mëngjesit, zjarrfikësit kanë mundur ta fikin zjarrin dhe të pastrojnë asfaltin. Gjithashtu, mbi pistë janë hedhur edhe shishe të thyera apo objekte të tjera.

[viganv]

Alonso, një tjetër hap drejt titullit



Fernando Alonso ka mundur të renditet në vendin e dytë në Çmimin e Madh të Italisë, duke përfituar edhe pak në klasifikimin e përgjithshëm për pilotë ndaj Kimi Raikonenit. Tashmë diferenca mes tyre ka shkuar në 27 pikë. Finlandezi Kimi Raikonen e ka përfunduar garën në vendin e katërt, pasi u nis nga vendi i 11﷓të. Në gjysmë të garës, Raikoneni arriti ta parakalonte Alonson, por ka pasur një problem me gomën e pasme, që e ka detyruar të rikthehet në bokse dhe të humbasë pozicione të tjera. "Kisha probleme me gripimin kur dola për herë të parë nga bokset, ndoshta gomat nuk ishin në gjendje të mirë, ﷓ ka thënë Fernando Alonso në përfundim të garës. ﷓ Në ato momente humba shumë kohë, por më pas, me sa duket, isha me fat që nuk pata asnjë duel dhe pista përpara ishte bosh. Të them të drejtën, në përgjithësi kjo garë ishte e lehtë për mua." Kur kishin mbetur dhe 5 xhiro nga përfundimi i garës, Fernando Alonso mund të tentonte të fitonte edhe garën, pasi Huan Pablo Montoja, që ndodhej në krye, pati probleme me gomën e pasme. Gjithsesi, ato 5 xhiro, kolumbiani i McLaren﷓it arriti t'i menaxhonte shumë mirë. "Në përfundim të garës, në radio më njoftuan për problemin e Montojës dhe unë tentova të rrisja disi ritmin që ta vija nën presion, por ishte shumë vonë," ﷓ ka shtuar spanjolli. Gjithsesi, edhe pas kësaj gare, Fernando Alonso së bashku me Renault﷓në vazhdojnë të ruajnë klasifikimet si për pilotë, ashtu edhe për konstruktorë. "Një vend i dytë për mua është një rezultat shumë i mirë. Objektivi im për këto garat e fundit është që të jem gjithmonë në podium, mundësisht përpara Kimit, ashtu siç ndodhi në Monza," ﷓ ka përfunduar Alonso.

[viganv]

Renault﷓ja: Eshtë turp për McLaren﷓in



Sipas inxhinierëve të skuderisë Renault, McLaren﷓i ka pasur probleme për fajin e tyre. "Nuk kanë pasur një problem me çarjen e gomave, ﷓ ka thënë Pet Saimonds, shefi i inxhinierisë së skuderisë Renault. ﷓ Për mendimin tim, ata kanë dëmtuar gomat dhe si rrjedhojë ka humbur ajri. Ndoshta ka qenë një problem me amortizatorin. Në të dyja rastet, goma e tyre e majtë është dëmtuar në pjesën e jashtme, një problem ky që vjen si rrjedhojë e mungesës së balancimit të mirë." Gjatë garës, sipas disa zërave të brendshëm të Michelinit, thuhej se ishte një problem me gomën, por kjo gjë është përgënjeshtruar shumë shpejt nga McLaren﷓i. "Ishte një shpërbërje e gomës, nuk kishte asnjëra vrimë, këtë gjë e treguan mjaft mirë dhe të dhënat që merrnim nga makina gjatë garës," ﷓ ka thënë Martin Uitmarsh, drejtori i skuderisë McLaren. Më pas ai ka shtuar se në të dyja rastet e këtyre problemeve, ishte për fajin e tyre. "I njëjti problem ndodhi në të dyja gomat tona. Ndoshta ishte një problem i gomave, ndoshta një problem i makinës, por sido që të jetë, është turp për ne," ﷓ përfundon Uitmarshi.

[viganv]

Raikonen në "pole", Montoja niset i pari


Ka qenë kolumbiani Huan Pablo Montoja ai që ka marrë "pole-position"-in e Çmimit të Madh të Italisë dhe menjëherë prapa tij është renditur Fernando Alonso, një nga pretendentët kryesorë për fitimin e titullit kampion në këtë sezon. Shoku i skuadrës së kolumbianit, Kimi Raikonen, ka qenë piloti më i shpejtë në provat e djeshme zyrtare, megjithatë është detyruar të zbresë 10 vende prapa, pasi ka ndërruar motorin. Finlandezi vazhdon të ketë një disavantazh prej 24 pikësh me Alonson, kur kanë mbetur dhe 5 gara për t'u zhvilluar. Në Çmimin e Madh të Italisë, Raikoneni do të niset nga vendi i 11-të. Me zbritjen e finlandezit ka përfituar edhe Xhenson Baton, i cili ka kaluar në vendin e tretë përpara shokut të tij të skuadrës, Takuma Satos. Kampioni i botës në fuqi, Majkëll Shumaker, u rendit në vendin e gjashtë dhe do të niset nga linja e tretë së bashku me italianin e Toyotës, Jarno Trulin. Në përfundim të këtij sesioni zyrtar provash, Kimi Raikonen ka qenë disi i zhgënjyer për atë që i ndodhi pikërisht në momentet kur nuk duhej. Tashmë objektivat e finlandezit kanë ndryshuar; nga fitorja, edhe një vend në podium e vë në dyshim. "Podiumi? Do të jetë shumë e vështirë." Në të vërtetë ishte më i shpejti, por, për shkak të një defekti në motor gjatë provave të lira, është vendosur që t'i ndryshohet për të mos rrezikuar të gjithë garën. "Do të nisem i 11-ti dhe rikuperimi në një pistë të shpejtë siç është kjo e Monzës, është shumë i vështirë. Kemi fituar shumë në shpejtësi, më vjen shumë keq që pata atë problem në motor, megjithatë shpresoj t'i zgjidhim problemet sa më shpejt," - ka përfunduar Kimi Raikonen. Krejtësisht e kundërta ndodh me shokun e tij të skuadrës, Huan Pablo Montojën. Pas tërheqjes së finlandezit, ai ka arritur të marrë "pole-position"-in, në krye të klasifikimit të këtyre provave zyrtare. "Jam i kënaqur për këtë rezultat që kam arritur, por më vjen keq për Raikonenin, sepse gjendja për të është komplikuar shumë." Kështu, Montoja ka përfituar në njëfarë mënyre nga ajo që i ndodhi shokut të tij, për të regjistruar një tjetër "pole-position" në karrierë. Më pas kolumbiani ka shtuar: "Gjithçka shkoi shumë mirë dhe unë jam i kënaqur. Jemi skuadra më e shpejtë dhe kjo gjë është parë qartë gjatë gjithë këtyre ditëve që kemi testuar në Monza. Objektivi im për këtë garë pa dyshim që do të jetë fitorja. Nuk mund të bëj asgjë më shumë për Kimin, si skuderi kemi si qëllim të fitojmë titullin kampion për konstruktorë. Tashmë, me sa duket, ky është më i mundshëm, pasi, siç e thashë edhe më sipër, gjendja për Raikonenin është komplikuar shumë."

[viganv]

Ekleston: Vë bast që Raikoneni do të kalojë te Ferrari



Pronari i Formulës 1, Berni Ekleston, është i gatshëm të vendosë një bast për kalimin e Kimi Raikonenit te Ferrari, në vitin 2007. "Pa dyshim që Majkëll Shumaker do ta përfundojë karrierën te Ferrari dhe tërheqja e tij ka shumë mundësi të vijë në fund të 2006-s, - ka thënë 74-vjeçari britanik për shtypin italian. - Dua të shtoj se jam i gatshëm të vë bast që Raikoneni do të kalojë te Ferrari në sezonin 2007. Do të më pëlqente shumë sikur të ishte dhe Valentino Rosi shoku i tij i skuadrës, megjithatë, të them të drejtën, nuk kam pasur asnjë informacion në lidhje me të. Ky sezon ka qenë një dështim për Ferrarin pas gjithë atyre viteve të suksesshme. Kohët e fundit, drejtuesit e kësaj skuadre e kanë bërë të qartë se objektivi i tyre i parë për pilotë, është pikërisht finlandezi Kimi Raikonen. Një ditë, Majkëll Shumaker do të largohet nga ky sport dhe padyshim që zëvendësuesit e tij më të denjë janë Fernando Alonso dhe Kimi Raikonen." Në këtë sezon, finlandezi ka arritur të fitojë 5 gara, ndërsa spanjolli 6. Pikërisht këta dy emra janë dhe pretendentët për fitimin e titullit kampion për pilotë në këtë sezon. Në krye të klasifikimit vazhdon të qëndrojë Fernando Alonso, me 24 pikë diferencë ndaj Kimi Raikonenit.

[viganv]

Alonso: Ne do të bëjmë garën tonë



Ka qenë sërish me fat Fernando Alonso edhe në këtë fundjavë në Monza. Pas një paraqitjeje të frikshme të McLaren-it që në ditën e parë të porvave të lira me Kimi Raikonenin, vjen një lajm i mirë edhe për spanjollin e skuderisë Renault. Finlandezi, pasi mori "polin" në provat zyrtare, është detyruar të zbresë 10 vende më poshtë për nisjen e garës, pasi ka ndryshuar motorin. Tashmë Alonso është më i çliruar, pasi do të niset nga vija e parë përkrah një tjetër McLaren-i, atë të Huan Pablo Montojës. Kolumbiani nuk është një rival i spanjollit, megjithatë ideja që Raikoneni ndodhet prapa, e çliron më shumë nga presioni 24-vjeçarin. "Shpresojmë që të kemi një ritëm të qëndrueshëm në garë. Raikoneni? Pa dyshim që ne nuk do të ndryshojmë strategji për atë që i ndodhi. Makina jonë nuk ishte perfekte gjatë provave zyrtare, megjithatë shpresoj që për sot t'i kemi zgjidhur problemet. Do të jetë një garë interesante dhe ne do të bëjmë garën tonë. Me të vërtetë nuk jemi të shpejtë sa McLaren-i, por podiumin do ta arrijmë." Disi më i zhgënjyer është shoku i tij i skuadrës, Xhankarlo Fizikela. "Bëra gabim që në fillim, mund të kisha regjistruar një xhiro shumë më të shpejtë. Më vjen keq për këtë rezultat. Do të më duhet të nisem pothuajse nga mesi i pilotëve." Më pas italiani ka shtuar. "Përpara se të dilja nga bokset, vendosëm të ndryshonim strategjinë dhe të furnizohesha me më shumë karburant. Shpresoj të arrij të përmirësohem nesër gjatë garës."

Haidfeld nuk do të marrë pjesë në garë

Piloti gjerman, Nik Haidfeld, nuk do të marrë pjesë në garën e Monzës. Në vend të tij, për skuderinë Williams-BMW, do të pilotojë braziliani Antonio Piconia. Këtë gjë e ka bërë të ditur vetë skuderia e gjermanit. Haidfeldi ka qenë protagonist në një incident të rëndë gjatë provave të lira që janë zhvilluar dje. "Nuk është në gjendje të mirë fizike dhe për këtë arsye nuk do të marrë pjesë në garë," - ka thënë një zëdhënës për shtyp i skuderisë Williams-BMW. Vitin e kaluar ka qenë sërish Piconia ai që ka zëvendësuar Ralf Shumakerin, i cili ishte i dëmtuar.

[viganv]

BAR-Honda, drejt një rekordi në Formulën 1

Skuderia BAR-Honda po mendon për të thyer një rekord shpejtësie në Formulën 1, me kolaudatorin e saj afrikano-jugor Alan van der Merve. Drejtuesit e skuderisë BAR-Honda kanë bërë të ditur se do të modifikojnë nga ana aerodinamike një makinë të këtij sezoni dhe nga data 4 deri më 11 tetor do të provojnë të kalojnë kufirin e 400 km/h në një pistë në SHBA. Momentalisht, rekordin e shpejtësisë së makinave të Formulës 1 e mban kolumbiani Huan Pablo Montoja. Në testimet e javës së kaluar në Monza, ai arriti shpejtësinë 372 km/h.

Rosi, në 2006-n "kolaudator" i Ferrarit

Kampioni i botës në motoçiklizëm, Valentino Rosi, do të testojë rregullisht Ferrarin në sezonin e ardhshëm. Drejtori teknik i skuadrës së Maranelos, Ros Braun, ka deklaruar se nuk ka arsye që të mendojnë se Rosi nuk ka mundësi të kalojë nga garat me motorë në garat me makina. "Në këtë sezon dimri dhe gjatë gjithë vitit të ardhshëm, ai do të zhvillojë më shumë testime me makinën tonë. Kjo është si një lloj marrëveshjeje e hapur që kemi bërë me të," - ka thënë Ros Braun një ditë përpara garës së Monzës. "Nuk do të kemi ndonjë objektiv. Thjesht, ai do të gjejë më shumë kohë për të testuar me ne. Unë mendoj se do të jetë i pranishëm te ne një herë në muaj ose një herë në 6 javë. Ky do të jetë një program i vazhdueshëm, i cili do të na japë më shumë mundësi për të gjykuar mbi aftësitë e tij," - ka përfunduar Brauni.

[viganv]

Montoja: Ndihmë Kimit? Pse jo...



Një nga pretendentët kryesorë për fitimin e titullit kampion në këtë sezon, Kimi Raikonen, mesa duket tashmë do të ketë edhe mbështetjen e shokut të tij të skuadrës për duelin që po zhvillon me Fernando Alonson. Kolumbiani Huan Pablo Motnoja e ka shpjeguar qartë rolin që do të ketë në këto 5 garat e fundit të këtij sezoni. "Do të përpiqem të jap maksimumin dhe të bëj më të mirën për skuadrën." Më pas Montoja ka deklarar se e ka lënë vetë Kimi Raikonenin ta parakalonte që në xhiron e parë në garën e Hungarisë muajin e kaluar. Në të vërtetë ishte në të mirë të skuderisë McLaren-Mercedes që të fitonte piloti finlandez dhe, në të vërtetë kështu ndodhi. "Të them të vërtetën, e lashë vetë Raikonenin të më parakalonte, por në mënyrë që të mos binte shumë në sy, ashtu si fitoret që bënte dikur Majkëll Shumaker, - ka thënë në konferencën për shtyp piloti kolumbian. - Pra, nëse del një mundësi e tillë për të ndihmuar shokun e skuadrës, jam shumë dakord. Përse të mos e ndihmoj?" Momentalisht Kimi Raikonen ndodhet me një diferencë prej 24 pikësh ndaj Fernando Alonsos në klasifikimin e përgjithshëm për pilotë. Finlandezi deri tani ka arritur të fitojë 5 gara, ndërkohë që Montoja vetëm një. Kjo, pasi ai nuk ka marrë pjesë në 2 gara në këtë sezon për shkak të një dëmtimi. Sipas Montojës, ai nuk do të humbasë asgjë nëse Raikoneni arrin të fitojë titullin kampion. "Nëse Kimi do të arrijë të fitojë titullin kampion në këtë sezon, do të jetë një arritje e madhe për të. Gjtihsesi ky nuk është objektivi im, pasi unë synoj ta fitojmë titullin kampion për konstruktorë. Mendoj se më duhet të punoj edhe më shumë me makinën time, për të gjetur një balancim ideal. Megjithatë jam i kënaqur deri tani nga makinat që më kanë vënë në dispozicion," ka përfunduar kolumbiani Huan Pablo Montoja.

[viganv]

Raikonen dërgon "sinjale" te Ferrari


Në një kohë kur po zhvilloheshin provat e lira të garës së Monzës, merkato e pilotëve është hapur sërish. Në një kohë kur shtypi gjerman bën të ditur që Majkëll Shumaker do të largohet nga Ferrari, Kimi Raikonen nuk bën gjë tjetër vetëm sa i nxeh edhe më shumë zërat që qarkullonin. "Do të qëndroj te McLaren-i? Në vitin 2007 do të jem i lirë; do të vendos muajt e ardhshëm se çfarë do të bëj," ka thënë Kimi Raikonen në një konferencë për shtyp që ka mbajtur në Monza.