Drejtori i përgjithshëm i skuadrës së Maranelos ka bërë të ditur se mund të largohen nga F1-shi 10-02-2005
Ferrari lëshon alarmin e kuq
Endi Tufa
Zhan Todt ka deklaruar se Ferrari do të largohet nga Formula 1, nëse Berni Ekleston nuk do t'i japë 100 milionë dollarët që i ka premtuar për shtyrjen e kontratës deri në vitin 2012. Skuderia italiane është kritikuar shumë herë, pasi ka thyer rregullat. Ata kanë firmosur një kontratë me FIA-n për shtyrjen e "Marrëveshjes Konkord", pa skuderitë e tjera. Ajo kontratë duhej firmosur nga Eklestoni dhe të gjitha skuderitë, jo vetëm me atë të Maranelos. Por drejtori i përgjithshëm i Ferrarit ka deklaruar se skuadrat e tjera ende nuk po e kuptojnë se çfarë duan. "Ne jemi një kompani e vogël dhe mbulojmë të gjitha shpenzimet e Formulës 1. Shpeshherë kemi diskutuar për t'u larguar nga Formula 1, sepse ky sport po na kushton shumë para. Ndryshimet që po bëhen dhe rritja e çmimeve ka bërë të mundur që ne të diskutojmë shumë seriozisht për t'u larguar. Në fund të fundit, ne do të shohim atë që është në interes të Ferrarit," - ka thënë Zhan Todt. Më pas, francezi u ka bërë thirrje dhe skuadrave të tjera që ta ndjekin, pasi kampioni i Formulës 1 që kanë propozuar ata, do të jetë shumë i pasigurtë. "Herët a vonë, të gjithë do ta kuptojnë këtë realitet. Unë e kuptoj se për disa nga skuadrat, këto që po them tani, nuk kanë kuptim, por do të kenë shumë shpejt. Ne duhet të biem dakord për të ardhmen dhe për sigurinë tonë. Ne nuk mund të bëjmë një zgjedhje dhe të vazhdojmë përpara pa siguruar të ardhmen e Ferrarit," - ka përfunduar Todti. Ndërkohë, nga ana tjetër, piloti Rubens Barrikelo duket se ka ndezur alarmin për makinën që piloton. Piloti brazilian, i cili është duke zhvilluar testimet, ka bërë të ditura për herë të parë dyshimet mbi F2004M. "Ka shumë probleme, sidomos në xhirot e para, pasi nuk arrijmë të jemi të shpejtë. Nëse gara e parë e sezonit do të zhvillohej sot, ne do të kishim shumë probleme në krahasim me rivalët. Ndoshta i kishim marrë gjërat më ngadalë se ç'duhej." Duket se tashmë po vërtetohen dhe fjalët e rivalëve, të cilët për 2005-n kanë bërë të ditur se dominimi i Ferrarit do të përfundojë. Edhe pilotët e skuadrës së kuqe kanë ndezur alarmin për problemet e makinave. Ndryshimet e reja në rregullore janë duke u nxjerrë probleme inxhinierëve të Ferrarit. Qëndrueshmëria e motorit tashmë ka ndryshuar nga 300 km në 700 km. Ky është dhe ndryshimi kryesor që u ka sjellë problemet më të mëdha të gjitha skuderive. Gjithsesi, Ferrari është një skuderi që e ka ndjerë më shumë nga të tjerat këtë ndryshim. "Në distanca të gjata mund të arrijmë rezultate të mira, - ka thënë Rubens Barrikelo, pas ditës së parë të testimeve që ka zhvilluar dje në Jerez. - Por problemi ynë kryesor qëndron në xhirot e para. Nëse gara e parë e sezonit do të zhvillohej sot, ne do të kishim shumë probleme në krahasim me rivalët." Gjithsesi, nga gara e parë e Melburnit mungon rreth një muaj dhe për më shumë, taktika që ka zgjedhur Ferrari për ta filluar sezonin me një makinë hibride, e avantazhon disi. "Ka mundësi që të humbasim disa pikë në garat e para, por jam i sigurtë që do ta marrim veten shumë shpejt," - ka shtuar piloti brazilian. Përpara disa ditësh, një alarm të tillë e ka dhënë dhe Shumakeri. "Me këtë makinë të modifikuar, ndoshta do të kemi probleme në garën e parë të Melburnit." Gjithsesi, tifozët e Ferrarit shpresojnë që ky të jetë një alarm fals.
{^_^}
Ferrari, ne Bahrain me F2005-en
Krijoni Kontakt