KAKOMEJA ceshtja e dites

[ganoid]

Kakomeja eshte bere keto dite qendra e vemendjes se politikes, shoqerise civile dhe te biznesit. Eshte vene ne qender te vemendjes kombetare dhe nderkombetare. Vetem para 5 ditesh lexova nje artikull te nje gazete e perditshme Ceke e cila shkruante per kete ceshtje.

Ja se cfare shkruan gazeta Biznesi:

Kakome, dita e tretë e protestës

Banorët e Kakomesë kaluan sërish natën jashtë në përpjekje për të ndalur fillimin e punimeve për ndërtimin e një fshati turistik në tokën nën pronësi të tyre


“Kemi ngritur çadrat dhe kemi ndezur zjarr për të kaluar natën e tretë të protestës”. Kjo ishte përgjigjja e një banori të Nivicës dje, pyetur nga “Biznesi”. Dëshmitarët në vendngjarje thonë se policia ka vënë në punë disa gjeneratorë për prodhimin e energjisë elektrike, me qëllim që të ndriçojnë zonën. Deri tani nuk ka patur përleshje mes dy palëve, por trupat e gatshme të policisë janë të pajisuara me skafandra dhe shkopinj gome. Fadromat e kompanisë Riviera SH.P.K, të cilat kanë shkuar atje për të filluar punimet, nuk kanë lëvizur nga vendi. Banorët kanë bllokuar grykën mes dy maleve që lidh rrugën kombëtare Vlorë-Sarandë me plazhin e vogël të Kakomesë.
Fshati i Nivicës ka aktualisht vetëm disa qindra banorë, kryesisht të moshuar. Shumica e fshatit jeton në Greqi ku ka emigruar prej vitesh. Niviciotët kanë dokumentet e pronësisë së të gjithë zonës, nga fshati i tyre deri në Sarandë, që prej vitit 1872, kur sulltani i Turqisë firmosi kalimin nën pronësi të tokës së tyre, së bashku me toka të tjera të popullatës shqiptare me fe orthodokse.
Ndërkohë, në mbështetje të banorëve të Kakomesë u radhitën dje Partia Demokratike dhe Partia Bashkimi për të Drejtat e Njeriut. Zëdhënësi i PD-së Edi Paloka i kërkoi qeverisë të ndalë menjëherë presionin mbi banorët e Kakomesë, ndërsa kryetari i PBDNJ-së, Vangjel Dule, kërkoi që Komiteti i Kthimit dhe Kompensimit të Pronave të marrë urgjentisht nën shqyrtim dokumentet e zotëruara nga palët në konflikt dhe të dalë me një konkluzion ligjor se kujt i takon toka ku pretendohet të ndërtohet filiali shqiptar i Club Med. Më parë, shoqata “Omonia” kërkoi ndaljen e punimeve me argumentin se një pjesë e tokës së dhënë nga qeveria për Club Med i takon Kishës Ortodokse shqiptare. Një sipërfaqe e konsiderueshme toke në fakt është nën pronësinë e këtij institucioni fetar dhe aty gjendet edhe manastiri i Kakomesë, një objekt arkeologjik i rëndësishëm i zonës.
Banorët e Nivicës janë të vendosur të mos lejojnë ndërtimin e një fshati turistik të tokat e tyre dhe kërkojnë njohjen dhe kthimin e të gjithë pronave. Sipas dokumenteve të paraqitura prej tyre, 126 familje të fshatit janë pronarë të 4300 hektarëve kullota. Por pjesa më e madhe e kullotave janë toka pa vlerë të konsiderueshme financiare ndërsa gjiri i Kakomesë është pjesa më e rëndësishme e kësaj prone. Banorët e Nivicës u shpronësuan në vitin 1946 nga kullotat e tyre dhe u konsideruan shpesh si kulakë, ndonëse fshati ka qenë historikisht i varfër dhe mbetet i tillë edhe sot.
Qeveria shqiptare vendosi të lëshojë me koncesion hapësirën prej 70 hektarësh në gjirin e Kakomesë gjashtë muaj më parë. Koncesioni u dha në bazë të një ligji të vitit 1993, i cili nuk njeh pronësinë private në tokat pranë bregut të detit. Por në një interpelancë të thirrur në parlament për këtë çështje, kryeministri Fatos Nano u përpoq të justifikonte koncesionin duke deklaruar se toka në fjalë ka qenë nën pronësi shtetërore edhe në kohën e mbretit Zog.
Club Mediterane dëshiron të investojë 75 milionë euro për një resort luksi në Kakome. Ajo synon të përfundojë punimet në vitin 2007 dhe fshati do të jetë pjesë e rrjetit turistik mesdhetar të kësaj kompanie. Por para se të nisin punimet, kompania duhet të përballet me kundërshtimet e banorëve, të cilët duken të vendosur të rezistojnë deri në fund. Dje ishte dita e tretë e protestës së vazhdueshme. Banorët e Kakomesë kanë ndërtuar çadra dhe po qëndrojnë 24 orë në 24 për të bllokuar punimet.