Irena Seli 40 vjeç, nje tjeter e zhdukur.

[BlueBaron]

Irena e zhdukur, për herë të fundit emri i është shënuar në Trieste. Zbritja e Irenës në portin e Durrësit mbështetet vetëm nga personeli i tragetit. Njihej, pasi udhëtonte shpesh me atë linjë.


Emri i Irena Selit, 40-vjeçares së zhdukur pa asnjë gjurmë që prej 31 ditësh është shënuar për herë të fundit në regjistrat e policisë së portit të Triestes. Në portin e Durrësit, as Irena dhe as bashkëshorti i saj nuk i kanë vulosur pasaportat, fakt ky që shton “dozat” e misterit në zbardhjen e kësaj çështjeje. “Në portin e Durrësit, as e zhdukura dhe as bashkëshorti i saj nuk i kanë vulosur pasaportat. Atë ditë ka pasur rreth 8 mijë vetë të ardhur nga Italia për festat e fundvitit, ndaj edhe punonjësit e policisë kanë kontrolluar vetëm pasaportat e atyre që largoheshin nga Durrësi ”,-thotë një zyrtar i policisë së Durrësit. Kështu, asnjë punonjës i policisë së portit të Durrësit, nuk mund të vërtetojë zbritjen e Irenës nga trageti i linjës së Triestes, duke u bazuar në dokumentacionin zyrtar. Burime nga grupi i hetimit pohojnë se për zhdukjen e 40-vjeçares kanë denoncuar shumë vonë si bashkëshorti i saj, ashtu edhe të afërmit, duke e vështirësuar zbardhjen e kësaj çështjeje.
Personeli i tragetit
Rrugëtimet e shpeshta të Irena Selit dhe bashkëshortit të saj, Agim Musha me tragetin e linjës së Triestes, duket se i kanë familjarizuar pronarët e kompleksit të njohur në Tiranë me personelin. Në fakt, policia e portit më të madh në vend ka në dorë si të vetmen provë që mbështet zbritjen e Irenës në Durrës, dëshmitë e personelit të tragetit të linjës së Triestes. Burime zyrtare pranë policisë së Durrësit pohojnë për “Shekullin” se janë marrë në pyetje punonjësit e këtij trageti, të cilët kanë pohuar se gruaja e pronarit të “Bruno”-s ka zbritur në portin e Durrësit. “E kemi fiksuar atë grua, pasi udhëtonte shumë shpesh, bashkë me të shoqin, me tragetin tonë. Ajo ka zbritur në Durrës, pasi nuk është kthyer me ne, për në Itali”,-mësohet të kenë dëshmuar në polici punonjësit e tragetit. Përveç Agim Mushës, punonjësit e tragetit të linjës së Triestes janë të fundmit persona që e kanë parë Irena Selin. “Ne dyshojmë se zhdukja e saj mund të ketë ndodhur pas zbritjes nga trageti”,-shtojnë zyrtarët e policisë së Durrësit, duke u bazuar mbi dëshmitë e punonjësve të tragetit me të cilin Irena dhe Agim Musha po ktheheshin në vendin tonë.
Dyshimet
Zhdukja e Irena Selit, për hetuesit e çështjes “përkthehet” në një sërë pistash dhe versionesh. Burime pranë grupit të hetimit pohojnë për “Shekullin” se deri më tash nuk është përjashtuar apo vërtetuar asnjëra prej tyre, ndaj edhe dyshimet shtrihen që nga arratisja e Irenës nga jeta aspak e qetë bashkëshortore e deri tek një vrasje e mundshme e 40-vjeçares. “Ka dëshmitarë që e kanë parë atë të zbresë në portin e Durrësit. Nga ana tjetër, nuk ka të dhëna që ajo të jetë kthyer mbrapsht, nga Durrësi për në Itali apo të ketë udhëtuar nëpërmjet Rinasit”,-pohojnë burime nga grupi hetimor, të cilët kanë kryer verifikime edhe në aeroportin e vetëm ndërkombëtar. Emri i Irena Selit nuk figuron gjëkundi, pasaporta e saj, ku ndodhej edhe një vizë amerikane, nuk është vulosur në asnjë pikë të kalimit kufitar. Ndërkaq, njerëzit më të afërt të Irenës janë pozicionuar në anë të kundërta të “medaljes”. Bashkëshorti i saj, i larguar që prej 5 janarit drejt Dortmundit të Gjermanisë ka pohuar nëpërmjet një gazete të përditëshme se e shoqja është larguar prej tij, duke i vjedhur edhe 100 mijë USD. Në të njëjtin front ndodhet edhe i biri i Irenës, Bruno, i cili nuk ka hezituar aspak të kërcënojë nëpërmjet telefonit dajën e tij, Ylli Selin. Nga ana tjetër, vëllai i të zhdukurës dhe daja i saj enden nëpër dyert e policisë apo të prokurorisë, për të marrë vesh ndonjë lajm prej Irenës. 31 ditë e zhdukur dhe asnjë sinjal. Për familjarët Seli, pak shpresa ka që Irena të jetë gjallë.

[BlueBaron]

Hetimi i punonjësve të policisë përfshin edhe jetën private të bashkëshortëve Musha-Seli. Burime nga grupi hetimor pohojnë se kontradiktat e lindura prej kohësh mes çiftit, muajt e fundit janë pasuar edhe në shpërthime dhune. Xhelozia dyshohet të jetë shkaku i grindjeve mes pronarit të kompleksit “Bruno” dhe bashkëshortes së tij, që rezulton e zhdukur që prej 16 dhjetorit. Agjentët e policisë kriminale të policisë së Tiranës janë duke kryer verifikime, të cilat pritet të zbardhin një pjesë të së vërtetës mbi zhdukjen e Irena Selit. Versionin e keqtrajtimeve nga i shoqi e pohojnë edhe familjarët Seli. Sipas tyre, mësohet se Irena nuk mbante telefon celular, ndërsa shtohet se nuk kanë munguar edhe rastet e dhunës mbi të. Por familjarët e të zhdukurës nuk janë dakord me versionet e Mushës që Irena është larguar me dëshirën e saj, pasi ata janë të bindur se ajo do t’i kishte marrë në telefon, sa për t’i qetësuar.

[BlueBaron]

“Agim Musha gënjen”. Familjarët Seli pohojnë kështu, duke u bazuar në të dhënat kontradiktore që dhëndri i tyre ka thënë, pas zhdukjes së të shoqes. “Në telefon, Agimi më ka thënë se po merreshin me tërheqjen e makinës, në kohën që Irena ishte zhdukur. Më pas, ai nuk pranoi të na japë shpjegime, edhe pse ishte njeriu i fundit që e ka parë time motër”,-shton Ylli Seli. Sipas tij, Agimi ka pohuar fillimish grindjen që ka pasur me Irenën në traget, por pak ditë më vonë e ka mohuar, duke u hequr se gjithçka shkonte mirë mes tyre. Por ç’është më e rëndësishmja për vëllanë e Irenës, Agim Musha nuk duhej të largohej nga Shqipëria, derisa autoritetet e hetimit të jepnin një version për zhdukjen e saj. “Ai është i vetmi njeri që e di se ç’ka ndodhur me Irenën. Ai nuk duhej lënë të dilte jashtë vendit”,-shton Ylli Seli për “Shekullin”.

Në port

Irena Seli dhe Agim Musha nuk i kanë vulosur pasaportat në portin e Durrësit, për shkak të fluksit të madh të emigrantëve që ktheheshin për festat e fundvitit.

Në traget

Policia e Durrësit ka marrë dëshmitë e punonjësve të tragetit. Sipas tyre, Irena Seli ka zbritur në Durrës. Ajo nuk është parë të udhëtojë mbrapsht drejt Triestes.

Në Rinas

Policia e Durrësit ka kërkuar verifikim në aeroportin e Rinasit, nëse Irena Seli kishte dalë jashtë vendit. Përgjigjja e autoriteteve të aeroportit ka qenë negative.

[BlueBaron]

Zhdukja e gruas mbetet peng në portin e Durrësit.

Edhe pse lë përshtypjen e një njeriu të freskët dhe të përmbajtur në gjykimet e veta, Agim Musha, ish-pronari i kompleksit "Bruno", të cilin e akuzojnë si të dyshuar për zhdukjen e së shoqes, Irena Seli, ka gabuar. Të paktën në katër momente dëshmitë e tij përpara personave të ndryshëm për ngjarjen, nuk përputhen. Dhe gjithçka mbetet enigmë në portin e Durrësit. Ka zbritur apo jo bashkë me të shoqin nga trageti gruaja e zhdukur? Më tej, nëse ka zbritur, është larguar duke i shpëtuar syrit të të shoqit, apo është nisur bashkë me të dhe ka "humbur" rrugës për në Tiranë. Pikëpyetjet dhe mospërputhjet për këtë pikë fillojnë me faktin e një sherri mes tyre gjatë udhëtimit prej 24 orësh më traget nga porti i Triestes në atë të Durrësit. Në këtë pikë, dëshmitë thënë personave të ndryshëm nga Agim Mushaj nuk korespondojnë. Kështu gjatë një bisede me Gazetën më 20 dhjetor 2004 Agim Musha pohoi se kishte patur një grindje me të shoqen në traget dhe se ajo e kishte paralajmëruar se në rast të përsëritjes së një sherri të tillë, do e braktiste përfundimisht. Sherrin në traget Musha i'a ka pohuar edhe motrës së vet, pasi ka mbërritur në Tiranë. Ndërkohë që gjatë një interviste nga Gjermania me Gazetën, (data 16 janar 2005) Agimi tha se nuk kishte ushtruar dhunë ndaj së shoqes në traget, madje mohoi të kishte patur një sherr mes tyre. Pohimi i drejtpërdrejtë i tij ishte: "Si mund të bëhet i dhunshëm një burrë pas 20 vitesh martesë?" Në të njëjtën kohë Agim Musha në asnjë moment nuk ka pranuar para të afërmve të Irenës, se në traget mes tij dhe së shoqes kishte patur një sherr. Një tjetër mospërputhje, në pamje të parë jo shumë e dukshme, lexohet në pohimet e Mushajt për momentin e zbritjes nga trageti në Durrës. Sipas pohimeve të tij në polici, për njerëzit e gruas apo edhe gjatë intervistave për mediat, Mushaj e ka përshkruar të tillë momentin e zhdukjes: "Në kohën që unë shkova të merrja makinën, ajo u zhduk në sheshin e trageteve". Ndërkohë që të afërmit e Agim Mushjat pohuan se pas zënkës në target, Irena ishte larguar menjëherë pas zbritjes. Por nuk mbarojnë me kaq enigmat e këtij momenti. Në një kohë që trageti mbërrin në orën 15.30 në Durrës, në orën 16.10 mes Agim Mushajt dhe Ylli Selit, vëllait të gruas së zhdukur, ka patur një bisedë telefonike. Në momentin që Ylli i ka kërkuar Mushajt të flasë më të motrën në telefon, ky i është përgjigjur se në atë çast kjo nuk ishte e mundur, pasi i kishte ndaluar policia. Këtë përgjigje Agim Mushaj e ka justifikuar me prezencën e policinë në momentet e telefonatës. Pra sipas sqarimit të tij, i kishte dhënë një përgjigje të tillë Yllit për ta "h-equr qa-fe", pasi e kishte mendjen te policia që po i bënte kontroll.
Më tej ka edhe një tjetër përplasje në arsyetimet e Agim Mushajt. Sipas shpjegimeve të tij, ai nuk kishte bërë denoncimin për zhdukjen e së shoqes në policinë e Durrësit për një arsye krejt të veçantë. Sipas Mushajt, ai nuk kishte bërë denoncimin, pasi në policinë e këtij qyteti kishte punuar një person, që ai e akuzonte si ishte i dashuri i gruas së vet. Pra sipas Mushajt, ai nuk kishte besim se në Durrës do t'i kushtonin rëndësi denoncimit të tij persona, që mund të ishin miq të të dashurit të gruas së vet. Një arsyetim që duket i habitshëm po të konsultosh kohën se kur ky polic, që Mushaj akuzon për lidhje me të shoqen, ka shërbyer në Durrës. Del që polici që akuzohet, ka qenë efektiv i kësaj policie 3 vite më parë dhe logjikisht, që nuk mund të ketë ruajtur shumë lidhje me policinë e këtij qyteti pas reformave të njëpasnjëshme me kuadrot e policisë, që në Shqipëri ndodhin sa herë ndërrohen ministrat e Rendit..


Dosja e Irenës i kalon Krimeve të Rënda

Ende nuk mund të thuhet se ka nisur një hetim i vërtetë për të zbardhur rrethanat e zhdukjes së mistershme të një muaji më parë të Irena Selit, bashkëshortes së pronarit të ish-kompleksit "Bruno", Agim Mushos. Burime nga prokuroria e Tiranës, ku u regjistrua rreth një javë më parë procedimi penal për këtë ngjarje, janë shprehur dje për Gazetën, se kjo dosje i ka kaluar për kompetencë Prokurorisë së Krimeve të Rënda. Sipas burimeve të lartëpërmendura, hetuesit e prokurorisë së Tiranës, pasi shqyrtuan materialin e ardhur nga Komisariati nr.2 i policisë dhe pasi morën në pyetje vëllain dhe dajën e Irenës, arritën në konkluzionin se kjo vepër është kompetencë e kolegëve të tyre të Krimeve të Rënda. Ngjarja në fjalë është kualifikuar nga hetuesit me nenin që parashikon rrëmbimin e personit, vepër e cila duhet të hetohet nga Krimet e Rënda. Ndërkaq, burime pranë kësaj të fundit, të kontaktuar dje nga Gazeta, janë shprehur se ishin në dijeni të transferimit të dosjes, por ende nuk e kanë shqyrtuar atë. Sipas tyre, fillimisht dosja do të vlerësohet nëse me të vërtetë është kompetencë e Krimeve të Rënda për të hetuar mbi këtë ngjarje. Për të përcaktuar këtë, hetuesit duhet të verifikojnë veprimet e kryera nga kolegët e tyre të Prokurorisë së Tiranës për të gjetur indiciot apo provat që mbështesin kualifikimin e ngjarjes me nenin e rrëmbimit të personit. Vetëm pas këtij verfikimi hetuesit e Prokurorisë së Krimeve të Rënda mund të nisin zyrtarisht hetimet për zbardhjen e plotë të zhdukjes së mistershme të Irena Selit. ga.ja


"Do padis kunatin për shpifje"

Gjatë një kontakti me Gazetën, Agim Mushaj, ish-pronari i kompleksit "Bruno" premtoi se më te mbërritur në Shqipëri do të depozitojë në polici një padi për shpifje në adresë të kunatit të tij Ylli Seli, vëllait të gruas. Sipas Mushjat, Ylli Seli është autori i shpifjeve në adresë të tij, të cilat kanë një qëllim të mirëpërcaktuar. Në vijim Mushaj pohoi se qëllimi i shpifjeve të Selit dhe njerëzve të tij ishte që të shkatërrohej familja e tij, të ndahej babai nga djali e vajza dhe në fund t'i merrej edhe gjithë pasuria e krijuar nga tregtia e elektroshtëpiakëve. Mushaj pretendon se shpifjet janë organizuar edhe nga ish-bashkëshortja e tij Irena Seli, e cila sipas tij ndodhet në SHBA dhe komunikon me të afërmit e saj rregullisht.


Rrëfimi i të afërmve të Agim Mushajt për zhdukjen e gruas. Natën kërkuam në Tiranë.

Agim Musha e ka konsumuar grindjen e fundit me bashkëshorten e tij, Irena Seli, në tragetin e linjës teksa ktheheshin nga Trieste. Këtë fakt e ka konfirmuar i vëllai i bosit të komplesit "Bruno", Ethem Musha. Sipas këtij, Agimi i kishte pohuar të motrës, Dritës, se ishte zënë me të shoqen dhe kjo ishte arsyeja, që ai kishte humbur kontaktet me të pas zbritjes në portin e Durrësit. Vëllai i madh, ka rrëfyer për Gazetën si rrodhën ngjarjet mbrëmjen e 16 dhjetorit 2004, menëjherë pas zhdukjes së Irenës, ku e kërkuan atë gjatë gjithë natës dhe të gjitha përpjekjet e tjera. I njëjti pohoi se ishte në dijeni të të gjitha konflikteve mes çiftit, duke pranuar historinë e të dashurit të Irenës, një fenomen i cili ishte bërë shkas, që ata të mos shkonin mirë me vëllanë e tyre Agimin, duke e akuzuar si njeri me zëmër të dobët.

Si e mësuat humbjen e Irenës?
Nga motra ime, Drita. Agimi erdhi fill në shtëpinë e saj, pasi besonte se e shoqja mund të kishte ardhur tek ajo pas sherrit në target.

Pse ishte kaq i sigurtë Agimi?
Nuk ishte hera e pare, që ajo ikte. Me Dritën ajo shoqërohej shumë prej 15 janarit të vitit të kaluar, kur nisi të shembej kompleksi. Drita më ka thënë se Agimi, besonte që do ta gjente te ajo. Dhe në momentin, që ai hyri në shtëpi, me një të qeshur të lehtë e ka pyetur në ishte Irena aty. Kishte qeshur, pasi nuk ishte situata e parë e tillë mes tyre. "Po ja u zumë në traget dhe ajo iku", i kishte thënë.

Çfarë është bërë, kur u mësua se Irena nuk ishte?
Drita nuk e ka lënë Gimin të lëvizte duke i thënë, që të qetësohej se do ta kërkonte vetë. Vetë ai, duke kujtuar se nuk kishte shkuar larg, e kishte kërkuar me makinë deri te Ura e Dajlanit në Durrës, dhe te sheshi i taksive. Duke menduar se mund të kishte shkuar te i vëllai, Ylli Seli, Drita me djalin e vet, ka shkuar te shtëpia e këtij. Kishte dhe disa pako, që Gimi duhej t'i çonte te shtëpia e kunatit, dhe kështu shkoi.

Si e pritën atje?
Ylli u duk sikur nuk dinte gjë. Kur Drita i kërkoi, që të shkonin bashkë te shtëpia e vjetër e Agimit, ai fillimisht përtoi. Atëherë vëllai im e nisi prapë Dritën dhe ata shkuan, por nuk gjetën gjë.

Si reagoi Agimi?
Faktet treguan se ajo mund të kishte ikur vetë. Ajo e ka patur një të dashur dhe ne e dimë mirë, pasi ishte ky shkaku, që nuk bëheshim me Agimin. Ne nuk e pranonim, që ai mund ta mbante përsëri atë si grua edhe pse e kishte provuar një gjë të tillë. Megjithatë ai e kërkoi për tre ditë në Tiranë madje u kërkua deri në Sarandë, ku kishin blerë një shtëpi tjetër. Pastaj, erdhi i biri, Bruno, dhe doli fakti i lekëve, që ajo kishte marrë te shtëpia e vjetër.

Kur u bë denoncimi?
Kur erdhi Bruno, ata shkuan në polici dhe deponuan të gjitha detajet. Ka qenë djali ai, që kur pa të atin në atë gjendje, i kërkoi të shkonte me të Gjermani. Kishte dhe tre javë shkollë dhe tani merr pushimet. Ne flasim gati çdo ditë me ta dhe na kanë thënë, që do të jenë në Tiranë, brenda datës 25 janar. Kanë në mendje t'i sqarojnë të gjitha dhe të ballafaqohen me thëniet e shkruara nëpër gazeta.


Gjeti numrin e sinjalit nga Los Anxhelos

Bruno, mesazh në internet për të kërkuar të ëmën
Fotografia e Irena Selit, është hedhur në internet nga i biri Bruno Musha. "Quhet Irena dhe është zhdukur. Eshtë mamaja ime, ju lutem më ndihmoni ta gjej", është mesazhi, i cili i është bashkangjitur fotos, duke shënuar numrin e telefonit dhe adresën tij elektronike. Sipas xhaxhait, Ethem Mushas, ai është shumë I zoti të bërë kërkime në internet dhe e ka përdorur atë më parë për të gjetur orgjinën e telefonatës së ardhur nga Amerika. Në fakt është i njëjti numër, që i ka rënë telefonit të dajës së tij Yllit. Bruno ishte personi i parë, që verifikoi se numri ishte i Los Angelos, në Kaliforni. Madje ai ka tentuar disa herë të komunikojë vetë nga ky numër, në të cilin i përgjigjet vetëm një sekretari telefonike. Sipas familjarëve edhe këtu, Bruno ka lënë një mesazh zanor, ku i lutej personit që kishte këtë numër t'i telefononte apo t'i jepte ndonjë të dhënë nëse ishte e vërtetë që këtë numër e ka përdorur e ëma. Duket se më rëndë zhdukjen e Irena Selit, po e përjetojnë dy fëmijët e saj, të cilët ndodhen në Gjermani. Janë thënë shumë gjera dhe janë hedhur shumë akuza nga të dyja familjet, por për këtë moment ata janë mbledhur pranë të atit, Agimit. Bruno erdhi në Tiranë dy ditë pas zhdukjes së të ëmës. Ai ka dëshmuar së bashku me atin në polici rreth ngjarjes dhe më pas ka këmbënguluar, që i ati të shkonte me të në Gjermani. Si djali dhe vajza vazhdojnë studimet atje, Bruno për Drejtësi ndërsa e motra në Shkenca Politike. Në gjithë këtë histori Bruno është pozicionuar përkrah të atit. Ndryshe nga Bruno, e motra di fare pak gjëra për zhdukjen e të ëmës. Sipas familjarëve, ata janë munduar ta mbajnë atë larg kësaj historie, për shkak të moshës së vogël.


Përplasja e dëshmive për kërkimin e Irenës

Ylli Seli, ka pranuar se zhdukjen e të motrës e ka mësuar nga e kunata, Drita. Sipas tij ajo ka qenë me të birin, kur e ka kërkuar te shtëpia e tij. Porse ndryshe nga Drita, që thotë se ai përtonte të lëvizte nga shtëpia, ai ka thënë për Gazetën, se kanë shkuar menjëherë te shtëpia e vjetër, për të kërkuar Irenën. Duke mos patur çelësin, ata janë kthyer te shtëpia e Dritës, ku kanë takuar dhe i'a kanë marrë atë Agimit. "Në shtëpi kam hyrë me djalin e Dritës, pasi ajo nuk erdhi. Kur nuk e gjetëm, thirrëm e trokitëm edhe te shtëpia e re, pranë Kishës Ortodokse", është shprehur ai.

[shkodrane82]

Une i kam lexuar qe nga dita e pare qe kane dale ne gazeta
historine e kesaj gruas, dhe te them te drejten s'di ka te anoj.
Fundi i fundit nuk i dihet a e ke zhduke i shoqi,pasi ajo ka pasur lidhje te fshehte.Dhe mundesia qe eshte zhduke me bandillin eshte nje nder me te parat. Por qe edhe atje jane ba manjaket me kile kete se mohoj....
Gjynah nqs eshte e vdekur, sepse per asnje arsye si merret jeta kujt, dhe
gjynah nqs ja ka kthy shpinen femive per nje mashkull..
Gjithe meshkujt njesoj jane pffff

[Dito]

Pak si i ngaterruar si muhabet por ishalla eshte gjalle thuaj se nuk merret jeta e tjetrit per para apo xhelozi. Zonja qeka mashallah ne foto dhe i uroj te jete mire kudo qofte pervec asaj bote te pertejme.
Perderisa dhe i biri thote qe ajo ka marre 100 mije dollare dicka te vertete duhet te kete ketu, gjithsesi jane organet hetimore ato qe do zbardhin gjithcka.

Dito.

[Brari]

Pra kan qene Burri i irenes , vellai i burrit dhe i biri ne traget me irenen..

Dhe keta denoncojne zhdukjen e irenes jo ne polici te portit.. as ne polici te durresit qe ate nate.. por mbas disa ditesh ne polici te Tiranes..
Kjo le dyshime..
Si nuk gjeten keta tre burra ca deshmitare ..udhetare apo personel trageti apo polic port-trageti qe verteton se eshte pare Irena ne traget ne mbrritje apo ne bankinen e portit apo ne axhensi te daljes se udhetareve..?
Edhe kjo le dyshime..
Si iken ne gjermani ky burre me gjith te birin kur nuk dihet asgje per fatin e irenes?
Pse ishte lavatrice Irena ..apo nje njeri e aq me teper Nene e kti Bruno cjapit dhe grua e ketij biznesmenit..
Nuk ndjejn keta pergjegjsi para Familjes se Irenes.. Miqeve dhe Ligjit sepse ishin me Irenen dhe Irena avulloi.. e ata skan nxjerre nje deshmitar te faktojne qe Irenen e prune si kokrra molles ne Token Shqiptare..
Kush me shum se keta duhej te ishte ne deren e policise Kriminale per te ndihmuar a pritur lajme..
Perkundrazi Burri dhe i biri nxitojne per te ikur nga vendi e ja mbathin ne Gjermani..

Pra Irena eshte hedhur ne det.. diku pergjate linjes detare Trieste -- Durres..dhe ska pasur Irene per te zbritur ne port..
Ajo eshte bere ushqim per peshkaqenet..
Do zoti e nxjerr deti trupin e saje diku ne Split a Tivar a Shengjin..
Sdi a ka komunikuar policia jone me Policine Kroate..malazeze etj..
Ajo qenka rrahur disa here nga i zoti..ose padroni (se grat qe kan burrat miljonere jan dhe vete mall) e duhej te mos udhetonte ne traget me padronin dhe sidomos me nje padron qe te ka rrahur dhjetra here..
gjynaf..

[friendlyboy1]

sa shum ja varni ktyre gjerave. ca pret te ndodhi ne famijle ku burru shkon me dashnore gruja me dashnorin tjeter.

[BlueBaron]

... Nuk duhet me i pare gjerat me tifozllik. Gazetat mundohen te japin shpjegime mbi ngjarjen, por edhe ato jane te paanshme dhe e paraqesin ngjarjen ndryshe nga njera-tjetra. Ishallah eshte gjalle ajo gruaja e nuk ka perfunduar si Enrieta Sina ...

[BlueBaron]

... vazhdon historia e Irena Selit ne Gazeta Shqiptare ...

"I dashuri" i Irenës: E vërteta do dalë bashkë me fajtorët. Flet oficeri i policisë, "D.B.": U njohëm 2 vjet më parë (D.B. inicialet e Durim Bomit, nga gazeta "Korrieri" 19/1/04)

Ai është një djalë elegant, ende larg të dyzetave. Shërben në policinë e Tiranës në një detyrë të rëndomtë, pas një karrierre të suksesshme, të ndërprerë në mes në vitin 2003, për shkak të një sherri të ndodhur pikërisht në lavazhin "Bruno". Aty ishte sulmuar dhe goditur fizikisht nga të afërmit e pronarit Agim Musha, i akuzuar se kishte marrdhënie intime të shoqen, Irenën. D. B., (redaktuar) është i sjellshëm, ka zë të butë dhe është i komunikueshëm. "Nuk më intereson asnjë publikim, sidomos i emrit tim, pasi kjo për mua do të jetë një shkatërrim total. Jam familjar, kam grua dhe fëmijë, dhe e kuptoni ç'do të thotë…", është refreni i vazhdueshëm gjatë gjithë ligjëratës së tij. D. B., gati lutet, që kjo histori, që e ka përfshirë, të mos shtyhet më tej. "Nëse do të dalë emri im në media, unë jam një njeri përfundimisht i shkatërruar", pohon oficeri i policies, që gjithsesi u tregua i interesuar të kthente përgjigje, të paktën për akuzat e ngritura ndaj tij prej Agim Mushajt, bashkëshoritit të gruas së zhdukur, Irena Seli. Agim Musha ju ka akuzuar se keni lidhje dashu-rore më të shoqen dhe se ju jeni pjesë e një plani, sipas të cilit do të shkonit në Shtetet e Bashkuara të Amerikës, së bashku me Irena Selin, pasi më parë të vidhnit, apo merrnit me një tjetër mënyrë, të hollat e kursyera nga ish-pronari i kompleksit "Bruno"…
Janë të gjitha pjellë fantazie. Ai njeri nuk dihet se ç'ka bërë më gruan e vet dhe nxjerr këtë histori të dy viteve më parë. Të them të vërtetën, kur lexova lajmin e parë për zhdukjen, fillova të kem frikë, mos kjo histori do të merrte përmasa jo të zakonta dhe do të dilnin historitë e vjetra. Gjithçka u bë më reale, kur në Gazetë dolën edhe inicialet e mia dhe akuzat e Mushajt, se unë isha pjesë e planit për të shkuar në SHBA, së bashku më gruan e tij. Që nga ajo ditë jam ndier vërtetë keq. Madje jam duke u shpërfyturuar. E kuptoni pozicionin tim, jam i martuar kam grua dhe fëmijë. Nuk është e paktë të hyjë sherri në familje për shkak të një historie të harruar.

Pse jeni i bindur se Musha "diçka ka bërë me gruan"?
Kam ndjekur shtypin dhe duke qenë se i njoh tipin, dyshoj se gjithçka ka për të përfunduar ashtu si janë duke dyshuar, se ai mund të jetë fajtori për zhdukjen.

Pse duhet që Agim Musha të përmendte emrin tuaj pas gjithë kësaj historie dhe të rrëfente edhe ngjarje ku, sipas tij, ju ishin personazh?
Ju përsëris se ende nuk e kuptoj, se pse duhet të dilte sërish një histori e dy viteve të shkuara. Ju thashë edhe më parë, që dalja e emrit tim dhe akuzave, që unë paskësha qenë i dashuri i të shoqes, duket janë duke u përdorur prej tij për të mbuluar diçka jo të zakontë.
Agim Musha ju ka akuzuar se teksa ishte në Gjermani me Irenën në muajtë tetor-dhjetor 2004, ka zbuluar se ju keni patur kontakte telefonike me të shoqen. Madje ai akuzon të shoqen se ju ka blerë juve një shtëpi me të hollat, që dilnin nga fitimet në kompleksin "Bruno"…
Janë të gjitha haluçinacione. Nuk kam patur asnjë lidhje telefonike. Janë të gjitha pjellë e fantazisë së një njeriu, që gjatë gjithë jetës së vet, ka marrë drogë. Do vijë dita dhe do të shikohen të gjithë tabulatet telefonike të celularit tim në lidhje me këtë akuzë dhe do ta shihni se të gjitha do të dalin shpifje. Jam i qetë nga kjo anë.
Ju kanë marrë në pyetje për këtë histori policia, SHKB apo prokuroria?
Jo, absolutisht jo. Por unë nuk kam asnjë problem të më marrin në pyetje. Madje mund të paraqitem me dëshirë, pasi nuk më bren ndërgjegjia përballë këtyre shpifjeve. Dua të zbrazem njëherë e mirë, se mbase do të ndihem më i lehtësuar.

Mund të na thoni se si jeni njohur me Agim Mushon dhe të shoqen e tij?
Jemi njohur te lavazhua, që ishte pjesë e kompleksit "Bruno". Atje lanim makinat e shtetit.

Agim Musha pretendon se dy vite më parë ka gjetur tabulatet telefonikë të celularit të së shoqes dhe ka vërtetuar se ju keni patur lidhje të shpeshta telefonike me Irenën. Më tej të tjerë persona, oficerë policie, pohojnë se ju jeni bërë objekt dhune, i sulmuar nga të afërmit e Mushajt. Si mund t'i përgjigjeni kësaj akuze?
Ju dhashë një përgjigje. Përsa i përket akuzave ndaj meje, janë të gjitha haluçinacione të një njeriu të shkatërruar nga droga…

Agimi pohon se më 30 dhjetor 2004, pak ditë pas zhdukjes së Irenës, është përplasur me ju në Tiranë dhe pasi ju ka marrë makinën, e ka dëmtuar atë. Ç'mund të na thoni?
Ju thashë njehërë që ai është një njeri që ka marrë drogë gjithë jetën, ç'përgjigje tjetër mund të ketë një shpifje e tillë? Shiko, bashkë kemi për të folur pasi gjithçka të përfundojë. Keni për të parë se cilët do të jenë fajtorët e vërtetë të gjithë kësaj historie dhe do të më jepni të drejtë.


Agim Musha: Si i përplasa makinën "të dashurit të gruas"

Agim Musha, bashkëshorti i gruas së zhdukur, Irena Seli, gjatë një kontakti me Gazetën, pohoi së më 30 dhjetor 2004, pak ditë pas zhdukjes së bashkëshortes, ishte përballur në Tiranë me personin, që ai e quan "i dashuri i ish-gruas". Sipas Mushajt, ai ishte duke ecur me makinën e tij tip "Mitsubishi" fuoristradë në anë të Lanës, pranë kryqëzimit të madh të bulevardit "Dëshmorët e Kombit", në kohën kur automjeti i tij ishte barazuar me një makinë tip BMW, në timonin e së cilës, sipas Mushajt, ndodhej "i dashuri i gruas së vet". Sipas Mushajt makinat ishin ndalur nga semafori dhe në këtë kohë ai kishte vënë re se në fytyrën e "të dashurit të gruas" ishin shfaqur shenja frike. Më tej ai, sipas Mushjat, kishte braktisur makinën në rrugë, duke u larguar me vrap i frikësuar. Mushaj pohoi se nuk e kishte kërcënuar apo bërë ndonjë shenjë, por sipas tij largimi ndodhi pasi tjetri kishte lepurin në bark, për shkak të mëkateve në adresë të tij. Duke thënë se me këtë veprim të tjetrit i ishin ngritur nervat, Mushaj pohoi se kishte zbritur nga makina e vet dhe pasi kishte nxjerrë jashtë një person të ulur në vendin e pasagjerit të makinës së "të dashurit të gruas", ishte ulur vetë pas timonit të saj duke e ndezur dhe përplasur keqas pas murit. Sipas Mushajt ky kishte qenë një veprim në gjaknxehtësi e sipër. Porse ai ishte habitur pasi "i dashuri i gruas" nuk kishte denoncuar në polici për këtë ngjarje. Sipas Mushajt, ai ishte një burracak, që ndihej fajtor për gjithçka dhe nuk kishte guxim t'i kundërvihej.


"Irena iku kur gjeta pakon e dashnorit".

Agim Musha është bërë i gjallë me dëshirën e vet duke zgjedhur televizionin News 24, për të bërë një sqarim të plotë të rrethanave të reja, të krijuara pas zhdukjes së bashkëshortes së tij, më shumë se një muaj më parë, në portin e Durrësit. Ai sqaron për herë të parë arsyen e vërtetë, pse e shoqja u zhduk, akuzon si të implikuar në këtë histori, të dashurin e saj dhe me tej edhe disa ish-drejtues të njohur të ministrisë së Rendit. Ja dëshmia e plotë e tij.

Zoti Musha, mund të na tregoni si ndodhi, sipas jush, zhdukja e gruas suaj?
Para mbërritjes në Durrës më bashkëshorten debatuam pak për shkak të një pakoje, që unë dyshova se e kishte për të dashurin e saj. I thashë se kur të shkojmë në Tiranë, do e hapim bashkë, për të parë se ç'kishte brenda. Ajo, duke e ditur se ajo pako kishte disa fotografi tip porno, seks-oral brenda, që i'a kishte kushtuar të dashurit të saj dhe një letër të shkruar me fjalë dashurie, vendosi që më mirë të largohet, sesa të gjendet para faktit konkret.

Ku mendoni se ka shkuar gruaja juaj?
Është një plan i detajuar nëpërmjet vëllait të saj, nënës se saj, që është në Gjermani dhe të dashurit të saj dhe për këtë mund të vërtetohet shumë mirë nga telefonatat. Prokuroria ka shumë gjëra në dosje. Sot është shkenca e përparuar që të kapë numrin e telefonit të vëllait të saj dhe dashnorit të saj, sa herë kanë telefonuar njëri-tjetrin. Qoftë edhe numrin e dashnorit të saj, sa herë i ka telefenuar ish-gruaja ime, kur ishte në Gjermani, nga data 31 tetor deri më 15 dhjetor. Dhe faktet janë po aq të qarta.

Pse të afërmit e gruas ju akuzojnë juve për zhdukjen?
Të afërmit e gruas sime gjithë jetës së tyre kanë parë vetëm interesa te Agim Musha, vetëm të marrin para dhe tani, kur e panë se kjo çezmë u mbyll, hidhen në këto sulme absurde. Se si mund të shpjegohet, se i vëllai i saj ka 18 vjet që rri me asistencë sociale dhe për të jetuar ka marrë lekët nga e motra. Dhe unë në rast se do kisha një qëllim të tillë, mbas djegies që u bë, që unë dyshoj 100% se është bërë nga i dashuri i saj, për të zhdukur dokumentat, që vërtetojnë lidhjen e saj me të dashurin dhe të miqve të tij të rangurt të lartë në Minsitrinë e Brendshme. Po të doni emrat mund t'i përmend, por besoj se do i përmend në vendin e duhur. Por prokuroria mund t'i gjejë tamam se kush janë miqtë e tij. Një ish-drejtor i Përgjthshëm i Durrësit, një ish-shef i Krimeve të Republikës, dhe një ish-shef kuadri, janë miqtë e tij më të ngushtë. Dhe gjatë këtyre 2 vjet e gjysmë, që gruaja ime ka patur dashuri me të dhe vazhdon të ketë, janë ngritur 100 intriga mbi kurrizin tim 50 vjeçar. Sa kanë dashur të më bëjnë iuntriga, të më fusin edhe në burg, nëpërmjet spiunëve të policisë. Është një lojë e të dashurit të gruas sime dhe kompanisë së tij. Një mafie e deklasuar nga Ministri i ri i Rendit dhe e përshëndes me këtë rast, se ka hequr shumë të deklasuar nga Ministria e Rendit.

Cili është sipas jush qëllimi i gruas suaj?
Qëllimi saj është se ajo do marrëzisht të dashurin e saj dhe këtë e ka shprehur nëpërmjet veprimeve që bën. Një grua që harron fëmijët dhe burrin e vet pas 20 vjet martese... Është çmenduri një grua që largohet në moshën 35 vjeçare, e thotë edhe shkenca që s'ka më kthim pas. Kështu që ajo nuk donte të dinte më kush isha unë. Unë isha vetëm një çadër për të. Dhe as për fëmijët e saj dhe këtë e vërtetoi më së miri shtëpia, që i ka blerë të dashurit të saj. Se unë i kërkova pronarit të pallatit emrin e listës së banorëve. Pronari është një ish-punonjës policie. Sa i përmenda emrin, më pruri emrat e 11 banorëve dhe jo 12, që ka hyrja dhe unë jam i bindur 100%, që gruaja ime i'a ka blerë shtëpinë dashnorit dhe s'është çudi, që është akoma në emër të gruas time. Që ta mbante gjithmonë më të dashurin e vet.

Ku ndodhet sipas jush Irena tani?
Ne normalisht është vertetë që të gjithëve na ka rënë telefoni nga Amerika, si mua, si djalit, si nënës, motrës dhe vëllait të saj. Jam shumë i bindur, se ka shkuar në Amerikë. Atë e kishte endërr. Këtë u'a kishte shprehur edhe fëmijvë, që do shkonte në Amerikë. Dhe ne kishim vendosur të shkonim bashkë. Duke parë që unë, një 50 vjeçar, ç'më do më me vete në Amerikë, por e kishte lidhur jetën me të dashurin e saj. Pretendonte të shkonte me të dashurin.

A keni patur probleme me gruan?
Normal po ju them, se si mund të kem patur probleme? Unë gruas time i kam blerë makinë të re BMW, që në 1996 dhe i kam marrë patentën, që ajo të shëtiste e lirë nëpër Tiranë. Kur ajo 10 herë në vit shkonte në Gjermani. I ngeli ***** avionëve. Ajo 7 herë në javë lyente flokët. Kur ajo bënte pushimet në Antalia në hotele me 5 yje ose Majorka. Ku mund të jenë problemet? Ç'donte ajo më tepër? Kush mund t'i arrijë tjetër?

A keni ushtruar ndonjëherë dhunë ndaj saj?
Nuk kam ushtruar dhunë. Kam tjetër llogjikë. Jam 50 vjeç. Në sajë të llogjikës sime e detyrova ta pranonte të dashurin e vet përballë fakteve dhë në prani të vëllait të vet. Dhe më kërkoi falje dhe unë për hir të fëmijëve thashë: U dogja vetë, të mos digjen fëmijët. Që të mos u thoshin fëmijëve të mi "fëmijët e filanit". Bëra një sy qorr dhe një vesh shurdh. Vazhdova jetën normale dhe ika nga shtëpia me gjithë gruan time dhe ia lashë të gjitha bizneset pa inventar vëllait të saj. Jo vëllezërve të mi. Po të kisha qëllime të këqija, u'a lija vëllezërve të mi pronat e mia. I kam lënë qindra miliona në dorë të vëllait të saj.


Babai i Irenës: Agimi nuk ka zemër të vrasë njeri

TIRANE - Xhemal Seli, babai i Irenës është gjendur keqazi pas mësimit të lajmit për zhdukjen e vazjës së tij dhe dyshimeve se në humbjen e saj mund të ketë gisht vetë Agimi. 66-vjeçari i divorcuar që në vitet '70, ka punuar prej vitesh në komplesin "Bruno" dhe tashmë që ai është shembur jeton ende në shtëpinë e vjetër të dhëndërit dhe me ato pak të ardhura që i siguron vetë Agim Musha. Ndërkohë, Xhemali duket se nuk ka marrëdhënie të mira me fëmijët e tij, të cilët kanë preferuar më tepër lidhjen me nënën e tyre. Ai e ka mësuar ngjarjen vetëm pasi është bërë publike në gazetë. Akuzat e hedhura nga dy familjet për konfliktet dhe dyshimet për humbjen misterioze, e kanë tronditur babanë, për më tepër që është personi që ka qëndruar më shumë me ta, dhe siç thotë edhe vetë, "i kam rritur unë, si Agimin, dhe Irenën".

Kur e mësuat zhdukjen e Irenës?
Atë e kam mësuar vetëm pasi u publikua në Gazetë. Të them të drejtën, më erdhi inat, por ime bijë gjithnjë atë kokë ka pasur…
Në fakt, Drita, motra e Agimit erdhi qysh atë natë në shtëpinë time, për të më sjellë pakon që kishte marrë Agimi, por nuk më tha gjë.

Po me dhëndrin çfarë diskutuat?
Gimin më vinte zor ta pyesja, kur e shikoja se në çfarë gjendjeje ishte katandisur. Pastaj erdhi dhe Bruno dhe ishte tepër e rëndë për mua. Gjërat u morën vesh shpejt dhe unë e kuptova që ajo na kishte braktisur.

Djali dhe kunati juaj kanë bërë një denoncim për zhdukjen, duke hedhur shumë dyshime. Ju a jeni në dijeni të kësaj?
I kam marrë vesh të gjitha ato fjalë dhe nuk dua që të vazhdohet akoma me fjalë koti. Unë nuk di të them se ku është Irena, por di të them që Agimi nuk është vrasës. Unë e njoh që fëmijë dhe e kam rritur vetë. Uroj që këto t'i zgjidhin organet kompetente. Duhet ta ketë ndihmuar edhe i dashuri, të cilin unë e njoh mirë dhe e kam rrahur për shkak të lidhjes me Irenën.