Var Veten Per Hir te Fese!!

[Shpirt Njeriu]

Irma Hoxha


FIER

Ka dashur të dalë për të përcjellë tek njerëzit mesazhet e paqes, të predikojë me pafajësinë e moshës për jetën e pasvdekjes dhe parajsën që pret besimtarët e sektit të Jehovait, por ka përfunduar e vdekur. 11-vjeçarja Esmeralda Cenaj është vetëvarur me shallin që mbante në qafë, në tualetin e shtëpisë së saj. Ngjarja e rëndë ka ndodhur rreth orës 8.30 të mëngjesit të djeshëm në lagjen "1 Maj" të qytetit të Fierit. Burime nga policia bëjnë të ditur se e mitura e ka marrë vendimin fatal vetëm pak minuta pas një sherri të ashpër me prindërit e saj. Sipas bluve, nxënësja e klasës së pestë nuk ka mundur ta pranojë kërkesën e prindërve të saj për të hequr dorë nga veprimtaritë e besimtarëve të Jehovait. Fakti i të qenit e vogël në moshë për t'u aktivizuar me veprimtari të tilla, e vënë në dukje shumë herë nga prindërit, nuk e ka bindur vogëlushen të heqë dorë nga shoqëria paqëdashëse e dëshmitarëve të Jehovait. Përkundrazi, ajo në çast ka kaluar në depresion të thellë psikologjik, i cili e ka nxitur të vetëflijohet në emër të Zotit. Po të njëjtat burime sqarojnë se e mitura është dërguar urgjentisht në spital, por nuk ka mundur të kthehet më në jetë.

Vetëvarja
Esmeralda Cenaj dje është ngritur herët në mëngjes. Duke qenë se e shtuna është pushim, rreth orës 8.30 ajo ka mbledhur broshurat që ia kishin falur dëshmitarët e Jehovait dhe ka tentuar të dalë jashtë. Ajo kishte planifikuar të trokiste në shumë shtëpi, për të përcjellë mesazhet e Jehovait edhe pse ende nuk ishte bërë anëtare e këtij sekti fetar. Më pas do ta kalonte ditën me shoqet e saj. Por, sapo ka tentuar të dalë është ndaluar nga prindërit e saj. Ata i kanë thënë që të mos merrej me një punë të tillë, pasi ishte shumë e vogël dhe se mësimet duhej të ishin preokupimi i saj i vetëm. 11-vjeçarja nuk ka pranuar të heqë dorë dhe ka këmbëngulur në të sajën. Në moment është ndezur një sherr i fortë mes vajzës dhe prindërve të saj. Duke e parë se ishte e pamundur të mos u bindej prindërve të saj, Alda është kthyer mbrapsht. Më pas ajo është futur në tualet. Vonesa e saj në tualet (rreth 25 minuta) ka shqetësuar prindërit. Ata i janë afruar derës dhe i kanë thirrur që ta hapë, por si përgjigje kanë marrë vetëm heshtjen. Ajo që i ka bërë të dyshojnë më shumë bashkëshortët Cenaj ishte një hije e zezë që dukej që prapa derës së xhamtë të banjës. Tejet të shqetësuar, prindërit e 11-vjeçares kanë thyer xhamin dhe janë futur në tualet. Ata janë llahtarisur kur e kanë gjetur vajzën e tyre të vetëvarur me shallin që e kishte hedhur në qafë vetëm pak minuta më parë. E mitura e kishte lidhur shallin në mbajtësen metalike të peshqirëve të banjës. Në çast familjarët e kanë nisur atë në spitalin e qytetit (ndodhet vetëm 300 metra larg banesës së familjes Cenaj), por më kot, pasi vajza kishte ndërruar jetë. Menjëherë në vend ka shkuar policia, e cila ka kryer veprimet e para hetimore.

Hetimi
Ekspertët e kriminalistikës kanë marrë në pyetje familjarët e viktimës në lidhje me ngjarjen. Prindërit e Esmeralda Cenajt kanë deklaruar se vajza e tyre prej disa kohësh frekuentonte sektin fetar Dëshmitarët e Jehovait. Gjithashtu, të afërmit e 11-vjeçares kanë treguar me hollësi për sherrin me të bijën. Gjatë kontrollit të bërë nga blutë në banesën e viktimës janë gjetur disa broshura të sektit fetar, të cilat vajza i lexonte për ditë. Hetuesit e çështjes pohojnë se në banesë janë gjetur edhe disa citate të prera nga këto broshura, të cilat bënin fjalë për jetën e pasvdekjes si dhe parajsën që e pret çdo dëshmitar të Jehovait. Materialet janë sekuestruar nga policia në cilësinë e provës materiale.


17-vjeçarja nga Lushnja

Në maj u vetëvra një tjetër besimtare
Më 5 maj të vitit të kaluar u vetëvra me çifte një 17-vjeçare nga fshati Karbunarë i Lushnjës, e cila prej një viti frekuentonte sektin fetar të dëshmitarëve të Jehovait. Marsela Binjaku, para se t'i jepte fund jetës së saj, shkroi një letër ku sqaronte motivet e vetëflijimit të saj. "Dua të shkoj e pastër dhe sa më shpet te Zoti. Nuk dua të përlyhem me mëkatet e kësaj bote", shkroi ajo ndërmjet të tjerave në letër. Sipas adoleshentes, dita e vrasjes së saj do të ishte e shenjtë për të gjithë ata që do të vdisnin në këtë ditë, pasi do të shkonin në parajsë. Edhe kjo ngjarje e para 9 muajve tronditi gjithë banorët e zonës përreth. Banorët e fshatit Karbunarë atëherë deklaruan se Marela ishte një vajzë shembullore, e urtë dhe e shoqërueshme me të gjithë. Edhe pse 17-vjeçarja frekuentonte rregullisht aktivitetet e organizuara nga dëshmitarët e Jehovait, ajo nuk ishte anëtare e këtij sekti fetar. Ndërkohë, një vajzë ende e parritur risjell dramën e ndodhur më 5 maj. Edhe kjo vetëflijohet në emër të Zotit.


Të afërmit: Vajza ishte tip i qetë

"Alda lexonte shumë libra e revista fetare"
Dëshpërim e lot në familjen Cenaj. Jo vetëm familjarët, por edhe të afërm të kësaj familje janë shokuar nga ngjarja e rëndë. Të tronditur pa masë, të afërmit e kësaj familjeje pohojnë se 11-vjeçarja lexonte shumë broshurat dhe revistat që i kishin dhënë falas në rrugë dëshmitarët e Jehovait. Ata sqarojnë se kurrë nuk do të mund ta besonin atë që ndodhi dje. "Vajza ishte tip i qetë. Ajo ishte e dhënë shumë pas mësimeve që jepnin dëshmitarët e Jehovait. Ne jemi shumë të dëshpëruar. Askujt nuk do t'i shkonte mendja se një sherr i vogël e normal në familje mund të çonte në një dramë të tillë", shprehen të afërmit e viktimës. Familja Cenaj ka tre fëmijë: Vajza e madhe është gjimnaziste, kurse djali i vetëm është në klasën e dytë. Kjo familje jeton në kushte të mira ekonomike, pasi ka në pronësi të saj dy pika karburanti; një në Fier dhe një në Librazhd.


Mësuesja: Nxënësja ime ishte një fëmijë ëngjëll

"Esmeralda Cenaj ishte një nga nxënëset e mia më të mira. Ajo ishte një vajzë e shkëlqyer, me temperament dhe mësonte shumë". Kështu është shprehur dje Tefta Andoni, mësuesja kujdestare e 11-vjeçares që u vetëvar, pas vizitës së ngushëllimit në familjen e viktimës. Ndërkohë, Andoni ka pohuar se nxënëses së saj i pëlqente të shkruante poezi. "Jam shumë e tronditur nga kjo humbje dhe për faktin se nuk do ta shikoj më këtë vajzë ëngjëll në bankat e klasës sime. Ajo përveçse kishte rezultate shumë të mira në mësime ishte dhe shumë e shoqërueshme me bashkëmoshatarët e saj. Alda ishte sa e ndjeshme si natyrë po aq dhe kurajoze dhe e vendosur në vendimet që merrte", është shprehur mësuesja kujdestare. Në familjen Cenaj dje kanë shkuar për ngushëllim dhe shoqet dhe shokët e 11-vjeçares. Të gjithë ndihen të trishtuar nga kjo ngjarje e rëndë. Ndërkaq, sot pritet t'i jepet lamtumira e fundit të miturës që u vetëflijua në emër të mësimeve të Zotit.

Gazeta Shqiptare

[ledio]

Per mendimin tim fajin e kane ato letra qe ndahen neper qytet. Le te ndahen po te mos ia japin nje femije qe eshte 11 vjec. ku di gje ajo. Pastaj neper ato letra flitet per vdekjen e parajsen.