Plagoset me thika ish-deputeti i PD Arben Lika

[Xhuxhumaku]

Tashmë drejtues i shkollës private "American Global High School" ndodhet jashtë rrezikut

Plagoset me thika ish-deputeti i PD
Arben Lika goditet rëndë pranë tregut elektrik


--------------------------------------------------------------------------------

Gerti Xhaja


TIRANE

Arben Lika, ish-deputeti i PD-së, është sulmuar nga tre persona, rreth orës 18.00 të ditës së djeshme, në rrugën "Mihal Grameno". Lika, tashmë drejtues i shkollës private "American Global High School", është qëlluar dy herë me thikë në trup dhe është rrëzuar i përgjakur në rrugën përballë godinës së minibashkive numër 1 dhe 2. Autorët kanë braktisur në vendin e ngjarjes një makinë me targa të huaja dhe kanë mundur të largohen në këmbë. Sipas policisë, Lika ndodhet nën terapinë intensive të mjekëve në repartin e reanimacionit të Spitalit Ushtarak në gjendje të rëndë, por jashtë rrezikut për jetën. Hetimet nuk kanë arritur të zbardhin ende një pistë të saktë për shkakun e kësaj tentative vrasjeje. Ndërsa po punohet në drejtim të krahasimit të gjurmëve të gjetura në mjetin e braktisur për të identifikuar autorët.

Ngjarja
Lika ka qenë duke zbritur shkallët e një noterie që ndodhet në katin e parë të pallatit përballë minibashkive, në zonën pranë tregut elektrik, kur është sulmuar nga agresorët. Këta, siç duket, e kanë parë të zbresë dhe në momentin që Lika ka dalë në trotuar, i kanë zënë rrugën me mjetin tip "Renault-Espace" me targë BS E35028. Ata kanë dalë menjëherë dhe e kanë qëlluar me thikë. Ngjarja ka terrorizuar kalimtarët e shumtë dhe tregtarët aty pranë. Lika ka ecur vetë zvarrë për rreth 10 metra, derisa i janë afruar disa kalimtarë të rastit, të cilët e kanë ndihmuar të shkojë për ndihmë mjekësore në spital. Largimi i autorëve me thikë në dorë, të cilët kanë mundur t'u shmangen postblloqeve të policisë, i ka tmerruar edhe më shumë kalimtarët.

Policia
Me të marrë sinjalizimin përkatës, në vendin e ngjarjes kanë mbërritur forcat e Komisariatit numër 1 të Policisë së Tiranës. Ekspertët kanë fiksuar provat materiale, ndërkohë që në mjet janë gjetur gjurmë të autorëve. Në bagazhin e mjetit janë gjetur edhe dy targa të tjera, të cilat po verifikohen. Hetuesit kanë nisur verifikimet për të gjetur pronarin e mjetit, pasi targat e huaja që ai kishte, sipas burimeve, rezultonin false. Verifikimeve u janë nënshtruar edhe targat e gjetura në bagazhin e makinës. Hetuesit kanë nisur zbardhjen e thirrjeve të fundit të kryera në celularin e viktimës. Ndërkohë, është shoqëruar edhe noterja, e cila është edhe personi i fundit që ka takuar Lika.

Pistat
Vetë ish-deputeti ka mohuar të ketë njohje apo t'i ketë takuar më parë agresorët e tij. i pyetur në momentet e para nga inspektorët, ai e ka quajtur aktin diçka të momentit, pa nënvizuar ndonjë shkak për të. Ndërkohë, krahasimi i gjurmëve të fiksuara në furgon është konsideruar si një avantazh për hetuesit në gjetjen e autorëve të ngjarjes. Në orët e vona të mbrëmjes së djeshme shërbimet e policisë kryen edhe shoqërimet e para për ngjarjen. Gjithsej janë shoqëruar 8 persona, kontigjentë dhe persona që mund të kenë dijeni për ngjarjen. Deri në orët e vona të darkës nuk ishte përcaktuar ende saktësisht motivi që mund të ketë sjellë këtë plagosje të Likës. Megjithatë, ekspertët e policisë dyshojnë se nuk bëhet fjalë për një grindje të momentit, por për një sulm të përgatitur më parë nga tre atentatorët.
http://www.balkanweb.com/gazeta/gazeta.htm

[Xhuxhumaku]

Kapen 2 pengmarrësit e sekserit të Likës

Alfred Beqiraj u mbajt i mbyllur për 4 orë në një furgon nga 3 kushërinjtë

Autori i Lajmit: Fabjola Bramo

Arrestohen nga policia e Tiranës 2 nga pengmarrësit e Alfred Beqiraj, sekserit të ish-deputetit Arben Lika. Dy kushërinjtë Arjan Topalli dhe Luan Malja u kapën pas 7 muaj kërkimesh në një banesë në periferi të kryeqytetit. Në 21 janar të këtij viti, dy të arrestuarit dhe i afërmi i tyre, Platin Malja, mbajtën të mbyllur në një furgon për 4 orë Beqirajn, i cili u kishte marrë 3000 euro në këmbim të një vize amerikane. Pengmarrja u krye vetëm 1 javë pas atentatit që iu bë Likës në afërsi të shkollës së baletit, pasi autorët humbën shpresat se do t’i merrnin paratë e tyre.

Pengmarrja

Ngjarja për të cilën ishin shpallur në kërkim dy kushërinjtë ka ndodhur më 21 janar. Pas publikimit në media të plagosjes së të dyshuarit si trafikant vizash, Arben Lika, Platin dhe Luan Malja, djem xhaxhallarësh, dhe djali i hallës së tyre, Arjan Topalli, vendosën të merrnin peng një nga sekserët e rrjetit, Alfred Beqirajn, i cili u kishte marrë 3000 euro për një vizë amerikane. Duke i bërë presion Beqirajt, djemtë nga Nikla e Fushë-Krujës pretendonin të merrnin shumën e parave nga pengu. Teksa dilte nga shtëpia e tij, në rrugën “Pandi Dardha” në Laprakë, Alfred Beqiraj u rrëmbye me forcë nga dy djem të rinj, të cilët e futën në një furgon të mbyllur tip “Benz” me targa KR 3963 A. Përballja e shikimit me Platin Maljen, të cilit i kishte marrë pak kohë më parë 3000 euro, i sqaroi gjithçka nuk kishte kuptuar më parë. “Mos u tremb Alfred. Ti më njeh mirë se kush jam, do më kthesh paratë që më ke marrë për punën e vizës dhe ne do të lëmë të lirë”, ishin fjalët e pengmarrësit. Beqiraj mësohet se qe rrekur t’i sqaronte se nuk i kishte më paratë e tij. Ato kishin përfunduar në duart e një trafikanti i cili rregullonte vizat. Duket se pengmarrësit kishin dijeni dhe për personin në fjalë, që nuk mund t’u shërbente me viza. Pengmarrja zgjati 4 orë.

Lirimi

Gjatë kësaj kohe policia kishte arritur të mësonte se Alfred Beqiraj ishte marrë peng nga një furgon. Pas një pune disaorëshe u bë i mundur lokalizimi i mjetit. Në bashkëpunim dhe me policinë rrugore u bë i mundur që furgoni të bllokohej dhe të ndalej. Luan Malja dhe Arjan Topalli arritën të zbrisnin nga furgoni, ku gjendeshin në pjesën e pasme së bashku me pengun. Teksa ata ia mbathën arave, policia arriti të kapte Pluton Maljen dhe të lironte sekserin Alfred Beqiraj. Lirimi i pengut nga policia e Tiranës është shoqëruar me habinë e madhe të efektivave kur dëgjuan motivet e rrëmbimit të tij. “Nuk kishim dijeni për lidhjen e tyre. Ne si polici kishim si qëllim vetëm çlirimin e pengut. Më pas doli në skenë se Beqiraj u kishte marrë djemve nga Fushë-Kruja 3000 euro në këmbim të një vize dhe se paratë kishin shkuar në duart e Likës”, pohuan burimet policore, të cilat thanë gjithashtu se hetimet e mëtejshme zbuluan se Alfred Beqiraj ishte pjesë e rrjetit të trafikut të vizave që dyshohet se e drejtonte Arben Lika.

Data e Publikimit: 27/07/2005

Marre nga Gazeta Ballkan.

[Xhuxhumaku]

Lika, plagosja te dera e noteres

Autori i Lajmit: F.B.

Arben Lika, ish-deputet i Partisë Demokratike, u plagos në janarin e këtij viti në afërsi të shkollës së baletit. Burime policore u shprehën se ai ishte duke zbritur shkallët e një noterie, që ndodhet në katin e parë të pallatit përballë minibashkive, në zonën pranë tregut elektrik në Tiranë, kur është sulmuar nga agresorët. Sipas thënieve të noteres Mira Marku, po dilte pasi kishte firmosur pesë kontrata për njohje borxhi, vlera e të cilave arrinte në 20 mijë euro. Nga rindërtimi i skemës së ngjarjes nga ekspertët kriminalistikë, duket se agresorët e kanë parë të zbresë dhe në momentin që Lika ka dalë në trotuar i kanë zënë rrugën me mjetin tip “Renault-Espace” me targë BS E35028. Dëshmitarët okularë kanë pohuar në polici se ata kanë dalë menjëherë dhe e kanë qëlluar me thikë Likën. I plagosuri ka ecur vetë zvarrë për rreth 10 metra, derisa i janë afruar disa kalimtarë të rastit, të cilët e kanë ndihmuar të shkojë për ndihmë mjekësore në spital. Autorët më pas janë larguar me thikë në dorë, duke mundur t’u shmangen postblloqeve të policisë. Arben Lika mësohet të ketë pohuar se nuk i ka njohur personat që e sulmuan me thikë. Ndërkaq, nga hetimet e deritanishme dyshohet që shkak i ngjarjes të ketë qenë borxhet, që sipas burimeve përbën pistën kryesore në të cilën po hetohet. Arben Lika është i dyshuar për trafikun e vizave amerikane, ku mendohet të ketë përfshirë dhe sekserë të shumtë, një prej të cilëve dhe Alfred Beqiraj.

Data e Publikimit: 27/07/2005