Pse ka dështuar prokuroria në cështjen e Shkallnuerit
Agron Gurabardhi
Jurist
Nikoll Lesi deputet i këtij legjislacioni, ish i
priviligjuar e i zgjedhur si deputet nga Partia
Socialiste, i emëruar nga Gjykata Kushtetuese,
pikërisht nga dy persona të cilët sot ai i akuzon si
trafikant armësh, Fatos Nano, kryeministër i vendit
dhe Fehmi Abdiu ish kryetar i Gjykatës Kushtetuese.
Deputeti Lesi, me datë 8 Nëntor 2004, me fjalën e tij
në parlament, bëri të mbuloheshin me djersë
kryeministrin dhe ish kryetarin e gjykatës
kushtetuese, me akuzën ndaj tyre për trafik armësh. Po
kështu edhe ministrin aktual të kulturës apo
pjesmarrësit e tjerë që mendohen të kenë qënë të
pranishëm në ngjarjen e Shkallnuerit.
I njohur fillimisht nga shkrimet në Koha Jonë e më pas
nga ekrani si politikan, fjala e tij në parlament doli
jashtë armaturës mbrojtëse të pengimit të fjalës lirë.
Lesi ishte ai që i rikujtoi mbarë shqiptarëve kudo që
janë se shteti i tyre po drejtohet nga trafikantë dhe
njerëz të inkriminuar të veshur me imunitet.
Jo pak vetë i kanë thënë zotit Lesi se "e keni
vendosur veten në rrezik", "pushteti është hakmarrës
dhe ka goditje të fortë"," duhet të bëni kujdes". Por
Lesi me veprimet e tij i shpërfilli presionet e tyre.
Dikush i ka thënë se do t'ju vrasin e ai përgjigjet
"Kokë për kokë". Nuk dihet nëse deputeti Lesi, ka
patur këtu parasysh kanunin e Skëndërbeut apo
legjendën e Kok Malçit nga Mati, i cili kur shkoi mik
diku, të zotët e shtëpisë i nxorën një qëngj të pjekur
dhe i thanë:" Kë pjesë të qingjit do prekni?". Kok
Malçi u përgjigj: "Koka han vetëm kokën". Këtë le ta
sqarojë zoti Lesi.
Deklarata e deputetit Lesi dhe zbardhja e një bisede
të regjistruar, që paraqiti ai në lidhje me ngjarjen e
Shkallnuerit, na bëjnë të analizojmë këte ngjarje, ku
mendohet si autor krimi kryeministri shqiptar dhe që
personazhe të tjerë të qeverisë e politikës shqiptare
të kishin djeni.
Ishte fillim shkurti i vitit 2001. Ishte natë dhe kohë
e keqe. Banori i Shkallnuerit, i ndjeri Petrit Islami,
po shkonte në shtëpi, pa benz e pa targa, pa
badiguardë dhe pa servila. Në shtëpi nuk e priste
ndonjë banket apo tjetër orgji sallonesh. Atë e
prisnin fëmijët, skamja, varfëria e mungesa e dritave.
I ndjeri Petrit Islami u aksidentua. Ai vdiq dhe shumë
pyetje mbeten për t'u shpjeguar nga logjika jonë.
Ndoshta këto do të kishin pak rëndësi për zbulimin e
çështjes, por ndoshta janë zgjidhja e saj. Pra të
gjendet vrasësi, të gjëndet shkaku i vrasjes, të
gjendet urdhëruesi i fshehjes së krimit dhe ata që
ndihmuan në këtë fshehje, qëllimet e tyre të
mbrapshta.
I ndjeri Petrit Islami u aksidentua me pasojë vdekje
në aksin rrugor Tiranë- Durrës dhe gjurmët e krimit u
mbuluan e u mbushën me baltë.
Bëhet një aksident, thyhet një xham, shtrëmbërohet një
llamarinë dhe policia vrapon për të bërë ekspertizën.
Bëhet një protestë nga shoqata "Mjaft" apo një
protestë pedagogësh dhe policia vrapon të zbulojë me
saktësi përgjegjësit dhe organizatorët. Aksidentohet
një fshatar me pasoja vdekje dhe askush nuk
preokupohet për të. Petriti vdiq dhe kaloi shumë kohë
e autori i krimit nuk është gjendur, as urdhëruesi i
mbulimit të krimit, as personat që janë në djeni të
këtij urdhëri, as makina që i mori jetën, as targa e
as tipi i saj. Aq i vështirë të ishte ky hetim? Vetëm
në qoftë se autori ishte ai që është përfolur e
përflitet, si në familjen e viktimës ashtu edhe në
fshatin e tij dhe në gjithë Shqipërinë. Një krim i
tillë është vështirë të mbetet mister nëse nga policia
dhe prokuroria do të ishin grumbulluar të gjitha
provat për të cilat përflitej ato ditë, nëse do të
ishin marrë në pyetje të gjithë dëshmitarët për të
cilët përflitej menjëherë pas aksidentit.
Pak minuta pas aksidentit është njoftuar policia e
Durrësit, e cila ka shkuar në vendngjarje dhe që ka
patur një detyrë, për të hetuar ngjarjen, grumbulluar
provat duke respektuar procedurën ligjore. Vallë
vrasja kishte motiv apo jo? Ishte aksident i
qëllimshëm apo jo? Ishte shkaktuar nga goditja me
makinë apo jo? Me pjesmarrjen e një apo shumë
personave? Me vdekje të menjëherëshme apo viktima
është lënë në agoni pa ndihmë? Të gjitha këto mbeten
në sfondin e pandriçuar të organeve të policisë e
prokurorisë, jo nga paaftësia e saj, përkundrazi, nga
aftësia për t'i lënë ato në hije, për të mos zbuluar
autorët, nga dëshira për të varrosur të vërtetën.
Ka shumë shkaqë që policia dhe prokuroria duhet t'i
merrte por dhe "jo" në konsideratë për të kërkuar
motivet e përbashkëta për aksidentin me pasojë vdekje
që tashmë njihet me emrin "viktima Shkallnuerit". Në
radhë të parë është i dukshën fakti, që menjëherë pas
aksidentit, përshpëritej se autori është një person
"VIP" e viktima një fshatar, i cili pas aksidentit
hidhet në kanal e mbulohet duke konsumuar një krim të
shëmtuar, por edhe një pabesi që bie ndesh me zakonet
shqiptare, të cilat janë bërë pjesë e ndërgjegjes së
njerëzve. Të vërteta të tilla nuk mund të mos zbulohen
e aq më keq të mbulohen e të mund të mos dënohen.
Kush mund të mbulojë këtë krim me plotë gjurmë e
dëshmitarë okularë, nga pala e viktimës dhe të autorit
të krimi, sic përflitej pas aksidentit?!
Këtë mund ta bëjnë veçse njerëzit servila dhe
frikacakë e të specializuar për punë të tilla, të
cilët për të mbuluar poshtërsinë e tyre thonë nëpër
bilardo, ndoshta sinqerisht të bindur, ndoshta të
paguar ose të frikësuar, apo ndoshta edhe se i është
premtuar gradimi:" Eshtë absurde të mendohet që Petrit
Islami u aksidentua nga personi VIP. Po të shohim
ngjarjen, viktima ishtë në rrugë, koha ishte e keqe.
Viktima ishte me rroba të errëta e nuk shihej. Nga
pakujdesia e drejtuesit të ndonjë automjeti, ndonjë
shofer i dehur, jo profesionist, e ka goditur dhe më
pas është larguar. A mundet që personi për të cilin
flitet, me një autoritet kaq të madh, ta ketë
aksidentuar me pasojë vdekje e më pas të jetë larguar,
e aq më tepër kur kanë qënë në makinë edhe persona të
tjerë, sic përflitet? Në asnjë mënyrë! Por kjo bëhet
për të denigruar figurën e tij e për ta përdorur ato
që e kanë përhapur këtë, për qëllimet e tyre."
Arsyetimi që bëjnë këta punonjës drejtësie, gjatë
lojrava të bilardos, duket sikur i përshkon një
logjikë e arsyeshme, por në fakt ky aspekt çon në një
rrugë të gabuar dhe në probleme me shumë pikëpyetje
për gjetjen e së vërtetës.
Për zbulimin e saj drejtësia duhet të vërtetojë çdo
hipotezë të mundëshme në kryerjen e një vepre
kriminale. Në këtë kuadër duhet shikuar edhe hetuar
edhe ndaj këtyre thënieve apo thashethemeve, pasi kjo
mund të na çojë në një tjetër vepër penale të fshehjes
së krimit nga persona, të cilët e kanë për detyrë për
ta zbuluar atë.
Pra të gjitha këto janë të mundëshme edhe përse mund
të duken absurde. Kjo do të ishte e mundur për
cështjen në rast se për të do të kishte një provë, mbi
bazën e të cilës do të ndërtohej plani i verifikimit
të hipotezës.
Të gjitha këto mbeten pa baza kur shikon se policia
dhe prokurorët e kësaj çështje, nuk kanë shfaqur
ndonjë dyshim të tillë, nuk kanë bëre asnjë hetim,
përkundrazi, janë mbuluar fakte dhe ngatërruar të
dhëna provash e targash, tipe makinash, etj. Këtë
konkluzion e mbështesin pyetjet:" A bëri prokuroria
ndonjë hetim në lidhje me makinën që u përfol se bëri
aksidentin? C'u bë me atë makinë? Ku ndodhet ajo sot?
A iu bë ndonjë ekspertizë shkencore për të verifikuar
nëse është bërë aksidenti me të e për ta krahasuar më
pas më të dhënat e ekspertizës së viktimës dhe
kqyerjes së vendit të ngjarjes?" U përfol se ajo u
fsheh në depot e një biznesmeni të Durrësit. A shkoi
prokuroria qoftë edhe formalisht për ta verifikuar një
gjë të tillë? A mbajti ndonjë proces-verbal dhe në
prani të kujt? A mori prokuroria në pyetje ndonjërin
nga personat e përfolur menjëherë pas aksidentit? A u
bë krahasimi i këtyre dëshmive për të verifikuar
kundërthëniet?
Këtu mund të shtrojmë edhe pyetjet nëse është rastësi
që nuk u morën në pyetje personat e përfolur pas
aksidentit. Përse nuk u hetua në lidhje me këta
persona, mendoni se ishte rastësi? Po emërimi si një
nga shefat e drejtorisë së ruajtjes së personaliteteve
të ish- shefit të qarkullimit rrugor të Durrësit, në
kohën e aksidentit, të jetë rastësi? Rastësi të jetë
gjithashtu që vëllai i pronarit të depos, ku përflitej
se është fshehur makina që ka bërë aksidentin,
zgjidhet drejtues i një pushteti lokal? Autori i
krimit ndoshta do të ishte gjetur dhe çështja do të
kishte marrë drejtim nëse do t'i ishin dhënë përgjigje
pyetjeve të lartpërmëndura apo rastësive, ku më duhet
të shtoj edhe "rastësinë" kur grupi parlamentar i
mazhorancës, votoi kundra ngritjes së grupit hetimor
parlamentar për këtë problem. E meqë jemi këtu mendoj
se rrëzimi në parlament i ngritjes së këtij komisioni,
për hetimin e akuzave publike për kryeministrin, është
antikushtetues. Ngritjen e këtij komisioni e lejon
interpretimi i vendimit të gjykatës kushtetuese, që
thotë shprehimisht se me firmat e 1/4 të deputetëve,
komisioni është automatikisht i ngritur. Por deputetët
e mazhorancës votuan kundër këtij vendimi. Dikush i
bindur se ashtu duhej votuar, dikush i frikësuar,
dikush mbase i paguar e dikush për premtime të ndonjë
posti. Kishte edhe nga ata ushtarë deputetë, që për të
penguar zbardhien e denoncimit publik të deputetit
Lesi, propozuan ngritjen e grupeve hetimore
parlamentare për probleme të viteve 1992-1996. Ku
ishin këta ushtarë deputetë deri tani? Kush i ka
penguar ato të bënin një gjë të tillë më parë? Ka dhe
ndonjë ish- kapter deputet, i çgraduar nga posti, që
për servilizëm e për reabilitim apo për të realizuar
ëndrra në sirtar, kap prej mëngësh ndonjë ish koleg të
vetin, për të dhënë intervista, duke arsyetuar se nuk
është e nevojshme ngritja e grupit hetimor
parlamentar. E po kështu ndonjë gjeneral, në kohën e
kushteve të gjëndjes së jashtëzakonshme, abstenon
ngritjen e këtij komisioni, me arsyetimin e thjeshtë
se nuk është dakort me mënyrën e hetimit që synon te
emrat pa hetuar më parë çështjen. A thua se për
mënyrën e hetimit dhe për emrat nuk është parlamenti
që do të vendosë, por ato që drejtojnë gomonet drejt
Italisë. Këta manekinë të politikës shqiptare nuk bënë
gjë tjetër, veçse marrjen përsipër të përgjegjësisë
për ta mbuluar këtë çështje, duke u bërë palë me
autorët e krimit. Kjo përkon edhe me deklaratën e bërë
nga kryeministri shqiptar "Unë dhe drejtësia gjëndemi
në të njëjtin krah përballë akuzave të deputetit
Lesi." të cilën një deputet i grupit"katarsis", merr
përsipër ta përkthejë anapolla, pavarësisht se ai vjen
nga nje zonë jugore e bregut, jo dygjuhëfolëse. Për
çudi deri më sot asnjë reagim nga organet e drejtësisë
në lidhje me këtë deklaratë. Kjo na bën të mendojmë
për cënimin e pushtetit gjyqësor ose akoma më keq,
nëse këto organe e konsiderojnë pushtetin e shtetit
si më të rëndësishëm se mbrojtja e individit dhe nëse
është kështu, kemi të bëjmë vërtetë me një çështje
shumë serioze, e cila duhet të marrë një përgjigje të
saktë, ndryshe mund të themi se e drejta penale dhe
shteti i së drejtës në vendin tonë, paraqiten në
mënyrë të ndryshme nga ajo e vendeve demokratike, siç
pretendohet që jemi.
E më pas prokuroria e Durrësit e ka pezulluar cështjen
për mosgjetje të autorit.
U desh fjala e Lesit në parlament për ta rifilluar,
kur shtypi shqiptar kishte muaj që shkruante për këtë
ngjarje dhe prokuroria nuk bëri asgjë për rishikimin e
kësaj dosje.
Nëse nuk do dyshohej se i ndjeri Petrit Islami ishte
aksidentuar nga persona "VIP"-ë, padyshim që do të
bëhej gjithshka, siç u bë, por jo për mbulimin, por
për zbulimin dhe dënimin e autorëve të krimit.
Thonë se viktima u aksidentua nga një fugon me targe
FR. Kush e tha këtë? U bë vallë kqyerja e vendit të
ngjarjes në mënyrë shkencore? U bë ekperimenti
hetimor? U bë eksperimenti shkencor? Cfarë provash
administroi policia? Po prokuroria ? Padyshim që
organet kompetente nuk mund t'i përgjigjen me saktësi
këtyre pyetjeve dhe pse ka kaluar gjithë ajo kohë.
Familjarët e viktimës dhe i gjithë fshati kërkojnë
autorët e krimit, por fatkeqësisht në dorën e këtyre
ka mbetur shumë pak, vetëm për të lehtësuar dhimbjen,
pasi gjetja e autorëve tashmë është e vështirë ose e
pamundur. Autorët e bënë punën e tyre dhe pasi e
mbuluan krimin i fshehën gjurmët.
Kush e aksidentoi të ndjerin Petrit Islami? Kjo enigëm
tashmë ka ngelur në duart e Prokurorisë së
Përgjithëshme, e cila ka rifilluar këte hetim pa
shpresë, për të bërë sadopak të mundur përmirësimin e
imazhit nga kjo ngjarje që ka njollosur këtë organ. Më
këtë çështje po merren prokurorë të zgjedhur, më të
mirët e Shqipërisë e që nëse do të ishte punuar më me
profesionalizëm dhe me pavarësi të plotë ajo mund të
ishte zgjidhur si zakonisht nga një prokuror i vetëm i
Durrësit.
Shpreh bindjen se të gjithë po kërkojnë rrugë për ta
futur procesin në rrugë pa krye. Askush nuk mund ta
nxjerrë të vërtetën e këtij aksidenti. Askush nuk
mendon se do gjendet makina e personit "VIP" që
mendohet se i mori jetën viktimës Petrit Islami. Ku ka
shkuar? C'është bërë me të? Askush nuk mendon të bëjë
qoftë edhe një përpjekje në lidhje me pyetjet e
shtruara më sipër. Nëse këtyre do t'i ishte përgjigjur
me kohë prokuroria e Durrësit, sot Prokuroria e
Përgjithëshme do të kishte më pak punë. Asaj do t'i
mbetej të merrej vetëm me akuzën e parë, të trafikut
të armëve, të bërë nga deputeti Lesi.
Kaloi kaq kohë pa i dhënë një njoftim familjes së
viktimës, banorëve të fshatit të tij dhe opinionit
shiptar. Atë, pas refuzimit nga mazhoranca të ngritjes
së grupit hetimor parlamentar, duhet ta japë
prokuroria, së cilës i ka ngelur si dopiogjashta në
dorë.
Gjenevë 2005
Përgjigju Duke Cituar
Krijoni Kontakt