Kosova varfërohet dita ditës

[mani]

Kjo eshe shte pritur sepse me analfabet dhe te pa ditur nuk ka aszhvillim ekonomi e as zhvillim kombetar,pra duhet te durojme.
Ata per vete kan e per ne nuk ka gajle do jetojme disi.
Kryesore ata dhe te huajt te jetojne ne lux,se per ne nuk asht rrezik edhe pa euro hiq do mbijetojme.


Kosova varfërohet dita ditës


Shekulli

Një studim i kryer nga Banka Botërore i quajtur “Memorandumi ekonomik i Kosovës”, tregon se varfëria në Kosovë është thelluar. Sipas këtij studimi, 15 % e kosovarëve jetojnë në një varfëri ekstreme, ndërkohë që 37% konsiderohen se jetojnë në varfëri. Sipas studimit që u bë publik dje në Prishtinë, 15% e popullsisë së Kosovës jeton me 0.93 euro në ditë, gjë që konsiderohet nën limitin e varfërisë ekstreme. Rreth 37 % e popullsisë jeton më 1.42 euro në ditë. Gjatë paraqitjes së raportit kryeministri Bajram Rexhepi tha se Kosova ka si qëllim të hapë tregjet dhe kjo do të bëhet nëpërmjet një strategjie zhvillimi me mbështetje institucionale. Kryeministri tha se ka nevojë për më shumë ndihma për periudha afatgjata që të ndikojnë në rritjen e prodhimit dhe në uljen e varfërisë në vend. Ai shtoi se shtyrja e zgjidhjes së statusit final pengon zhvillimin ekonomik të vendit dhe shkurajon investitorët e huaj. Në raportin e Bankës Botërore për 2002, niveli i varfërisë ekstreme ishte 12 % ndërsa tani është rritur 15%. Rritja e varfërisë në Kosovë, sipas raportit të BB, influencohet nga mungesa e zhvillimit ekonomik dhe ulja e donacioneve prej 70% gjatë periudhës 2000-2003. Balanca e pagesave në Kosovë është negative. Vetëm 4% e importeve në Kosovë mbulohet nga eksporti i produkteve, gjë që shton deficitin e tregtisë ndërkombëtare në 96%.

[Qerim]

Me te vertete Kosova per mendimin tim ka me shume halle se Shqiperia. Ata i ndihmon shume emigracioni ,por eshte ajo llafja e popullit "nuk mbahet shtepia me miell te huaj".
Une parashikoj nje dyndje te kosovareve ne Shqiperi mbas 3-4 vitesh. Kjo pasi ne Shqiperi do te investohet me shume, dhe ne Kosove papunesia eshte me e madhe se sa ne Shqiperi.

[AdmiraL]

Jo more..kosova vetem po perparo e ti thua po varfërohet keto qe i ke hudh i ke marr ne "Epoka e Re" sepse vetem ata shkruajn keshtu pa lidhje..

[hyperspeeeed]

une mendoj se pa marr parasysh se cila gazete i publikon keto te dhena duhet te shiqohen me kujdes ,sepse ndoshta "disa te tjereve" nuk i konvenon realiteti ,por ajo po ndodh ! na pelqen neve s`na pelqen ....s`kemi se qka te bejme, edhe plus keto hulumtime nuk i ben ndonje krah politik por banka boterore .
respect

[Qerim]

Sipas një studimi të UNDP-së, një në tre kosovarë mendon të emigrojë jashtë vendit për shkak të kushteve të pashpresa ekonomike

Ëndrra për “tokën e premtuar”

Bisedë me banorët e zhgënjyer të Mitrovicës, të cilët mendojnë se as pavarësia e Kosovës nuk do ta përmirësonte ekonominë e tyre

Faton Osmani

Nga Mitrovica, Faton Osmani

MITROVICË – Xhavit Neziri, një 22-vjeçar nga Tërstena e Shalës së Bajgorës, natën e Bajramit kishte zbritur në Mitrovicë për të blerë harxhin e shtëpisë, duke shfrytëzuar rastin të bënte edhe një xhiro nëpër qytet. I gjatë dhe i dobët nga shëndeti, teksa mban duart në xhepa, ai nis e tregon se tashmë e ka ndarë mendjen “të dalë jashtë Kosovës”. “Më pëlqen Gjermania, ose Italia”, thotë ai. Ai madje ka menduar një ide “interesante” për të realizuar “ëndrrën” e tij. “Duhet me këqyr me gjet ndonjë çikë me letra e m’u martu”, thotë ai, duke shtuar se këtu në atdhe nuk ka zënë ndonjë të dashur.
Florim Fazliu nga Tuneli i Parë i Mitrovicës është një tjetër i ri, i cili tashmë ka provuar një herë të udhëtojë drejt Gjermanisë, ilegalisht, por është kapur në kufi të Austrisë. Vëllai i tij, i cili jeton prej vitesh në Gjermani, i ka dërguar 1 500 euro, të cilat i shkuan dëm, ose, siç shprehet vetë ai, “ia ka hangër ujku”. Gjithashtu, Florimi për herë të parë në jetë ka provuar edhe burgun. Megjithatë ai thotë se do ta provojë prapë të dalë jashtë Kosovës, edhe pse është bërë shumë e vështirë. “Veç mos mujsha hiç. S’ka kurgjë prej këtuhit. S’ka punë, s’ka perspektivë”, thotë ky 22-vjeçar me dialektin e theksuar të zonës.
Florimi dhe Xhaviti, nga rajoni i varfër i Mitrovicës, janë vetëm dy nga shumë të rinj kosovarë që duan të ikin jashtë për të punuar dhe jetuar. Sipas një hulumtimi që ka kryer Programi për Zhvillim i Kombeve të Bashkuara (UNDP), në bashkëpunim me USAID-in dhe Institutin kosovar “Riinvest”, një në tre kosovarë mendon që të emigrojë jashtë vendit. Po sipas përfundimeve të këtij studimi, për shqiptarët dhe minoritetet joserbe faktorët kryesore që i detyrojnë të emigrojnë janë ato ekonomikë, ndërsa për serbët faktori politik është kryesori.
Mustafë Ibrahimi, nënkryetar i Institutit “Riinvest”, thotë se “tendenca e rritjes së emigrimit me të vërtetë është shqetësuese”. Ai thotë se kjo është rrjedhojë e mungesës së prespektivës së njerëzve. “Nëse njerëzit nuk gjejnë punë në Kosovë ata kanë dëshirë që të gjejnë mënyra dhe të ikin jashtë Kosovës. Kjo është shumë shqetësuese, por për këtë duhet të shqetësohen veçanërisht institucionet qeveritare”, thotë ai.
Po çfarë shpreson të fitojë Xhaviti nëse ai arrin të shkojë në “tokën e premtuar”? “Me rëndësi është me punu. Të tjerat vijnë ngadalë”, thotë ai. Xhaviti, i cili ka kryer shkollën e mesme për mekanik makinash, nuk e ka ushtruar kurrë këtë zanat. Por ai di të punojë si murator dhe ka edhe mjeshtri të tjera të ndërtimtarisë. Ai beson se këto punë do të mund t’i kryente edhe në Gjermani, ose kudo tjetër që të shkojë. “Shtëpinë e kam pas djeg në luftë. Vetë e kam ndërtu dhe aty e kam marrë zanatin”. Ai ka dalë disa herë për t’u “shitur” si mjeshtër te tregu i Mitrovicës, por se ka marrë askush. “Konkurrenca e madhe. Veç nëse ke të njofur, se s’të merr kush”.
Babai i Xhavitit ka punuar në kompleksin industrial “Fafos”, ku së fundi është kthyer të punojë sërish. “Ai merr 140 euro, po çka me ba me to. Nga me i harxhu përpara”.
Xhaviti, ashtu si shumica e kosovarëve, dëgjon shpesh lajmet dhe ka mësuar për “standardet para statusit” (kushtet që duhet të plotësojë Kosova për të fituar pavarësinë). Por ai nuk është shumë entuziast se edhe pavarësia e vendit do të ndryshonte diçka në jetën e tij. “Për me u hap vende të punës nevojitet privatizimi, sikur jashtë…Por UNMIK-u s’po don”, thotë ai.
Florimi po ashtu ka përfunduar vetëm dy vjet të shkollës së mesme teknike dhe nuk e ka vazhduar më tej. Kjo, siç thotë ai, për shkak të mungesës së kushteve. Ekonomia e Mitrovicës dikur ishte ndër më të zhvilluarat në Kosovë. “Fafosi”, “Trepça”, “Akumulatori”, ishin disa nga gjigantët e industrisë kosovare dhe që punësonin shumicën e banorëve të kësaj ane, por sot ato kanë mbetur më tepër si relikte. Babai i Florimit ka punuar në “Akumulator”, prej nga është larguar para 13-14 vjetësh. Tani familja 5-anëtarëshe mbahet kryesisht nga paratë që dërgon vëllai nga Gjermania. “Sikur mos të na kish mbajt vëllau, kishim dek të gjithë”. Vëllai vazhdon t’u dërgojë para, madje i ka sjellë edhe një veturë Florimit. “I paske punët mirë ti”, i themi. “Çfarë miri allahile, me të mbajt gjithmonë dikush”. Florimi thotë se ka provuar të gjejë punë, por më kot.
Ibrahimi, nënkryetar i Institutit “Riinvest”, thotë se ekonominë e Kosovës aktualisht e udhëheq politika, ndërsa duhet të jetë e kundërta, që ekonomia të udhëheqë politikën, në mënyrë që qytetarët të ndiejnë një perspektivë për të jetuar këtu. “Kemi një situatë të palakmueshme dhe zhvillim stihik në fushën e ekonomisë”. Ai thotë se institucionet kosovare duhet urgjentisht të punojnë për hartimin e një plani zhvillimor, sepse aktualisht Kosova nuk ka strategji zhvillimi.
Raporti i paralajmërimit të hershëm, i cili nxirret nga ky institut çdo katër muaj, synon të parashikojë krizat potenciale dhe të hartojë politikat e parandalimit të tyre. Sipas anketës që është kryer në muajin dhjetor me 1 262 të intervistuar kosovarë, rreth 32 për qind presin që situata ekonomike e familjeve të tyre gjatë 6 muajve të ardhshëm të përkeqësohet, ndërsa vetëm 16 për qind mendojnë se do të përmirësohet. Vetëm 4 për qind e të anketuarve mendojnë se mundësitë aktuale të punësimit janë të favorshme, ndërsa 76 për qind e tyre, pra shumica, mendojnë se janë të pafavorshme.

[Hyllien]

Populli kosovar u mesua pak si teper me ndihmat nderkombetare. Tanime qe ato u pakesuan u shtrengua lakthi. Eshte nje fatkeqesi e madhe kur pret çdo gje nga duart qe te zgjaten per meshire. Papunesia eshte shume e madhe dhe mbase problemi me kryesor i momentit. Shifrat zyrtare jane rreth 60% por ka dhe zera per nje numer skandaloz; 90%. Nuk eshte ndonji habi e madhe duke pasur parasysh shkaterrimin e solli lufta, por me teper pasojat qe solli paqja; nje paqe e dhimbshme per pupullin ne Kosove (Serbet dhe Shqiptaret). Serbet braktisen vendbanimet, institucionet jane nen varesine e UNMIK i cili eshte fatkeqesisht i paafte te zgjidhe problemet ne Kosove, mjaftohet me ruajtjen e nje stabilitetit minimal ne Kosove.
Le te shpresojme per me mire.