Opozita fiton zgjedhjet presidenciale në Rumani

[Albo]

Finalja dramatike në zgjedhjet presidenciale të Rumanisë, ku fitoi kandidati i opozitës, tërheq vëmendjen e gazetave evropiane.

Gazeta hungareze NEPSZABADSAG thotë se "duket qartë që partia qeverisëse socialdemokrate dhe aleatët e saj hungarezë kanë dështuar" në zgjedhjet e Rumanisë.

Gazeta shton se ka një mundësi për koalicion qeveritar të grupit opozitar me hungarezët, po të kihet parasysh një deklaratë e paqartë e partisë hungereze etnike, e cila "nuk ka përjashtuar asnjëherë zyrtarisht një marrëveshje parlamentare me koalicionin demokratik-liberal".

Në Austri, DIE PRESSE vë në dyshim mundësinë e presidentit të zgjedhur rumun Traian Basescu që të shpejtojë reformat e nevojshme për futje në BE.

Gazeta vë në dukje se në Rumani ka pasur një tendencë që zgjedhjet t'i fitojë pozita, por shton se qytetarët nuk kanë parë shumë përfitime.

Gazeta gjermane FRANKFURTER ALLGEMEINE ZEITUNG sheh shumë pasiguri përpara.

Gazeta shkruan se presidenti i zgjedhur ndoshta do të duhet t'u bëjë lëshime deputetëve që gazeta i quan "ekstremistë të krahut të djathtë" të Partisë Rumania e Madhe.

"Ndryshimet radikale në Rumanni kanë filluar, por rezultati është shumë i pasigurt," vë në dukje gazeta.

Sipas të përditshmes zvicerane, LE TEMPS, suksesi zgjedhor i zotit Basescu i ka mundësuar Rumanisë shmangien e një "skenari të stilit ukrainas".

"Fitorja e opozitës konfirmon se demokracia funksionon në këtë vend që po përgatitet për të nënshkruar traktatin e anëtarësisë në BE më 1 janar 2007," shkruan gazeta.

Padyshim që të përditshmet rumune përqëndrohen në fitoren dramatike të minutës së fundit të Basescut.

Duke e përshkruar suksesin e Basenscut si të jashtëzakonshëm, e përdishmja ZIUA përshëndet aftësinë e tij që u bë një udhëheqës i fortë i opozitës në një kohë të shkurtër.

Por gazeta paralajmëron: "Ashtu si me arrogancën e Nastases, rreziku kryesor është se Basescu mbështetet tepër në talentin politik, spontanitetin dhe intuitën."

Duke analizuar objektivat e ardhme të Basescut, një tjetër e përditshme rumune, JURNALUL NATIONAL, përshëndet deklaratën e tij se "procesi i anëtarësisë në BE duhet të jetë prioriteti kryesor i vendit".

Gazeta përshëndet premtimin e tij për të luftuar korrupsionin dhe "për të mbështetur e inkurajuar përsëri lirinë e shtypit në Rumani."