14 vjet RD dhe shtypi i lirë

[Brari]

RD

---


14 vjet RD dhe shtypi i lirë


14 vjet më parë, një grup intelektualësh vendosën të nxjerrin numrin e parë të gazetës së parë opozitare për afro gjysëm shekulli diktaturë. Gazeta "RD" do të vinte ato ditë të para të janarit të vitit 1991 si surpriza më e madhe për shqiptarët. Për të parën herë pas një kohe mjaft të gjatë censure, pushkatimi dhe persekutimi të fjalës së lirë, bëhej e mundur që çdo njeri që dinte të lexonte të njihte realitetin e ri. Një realitet që premtonte të ndryshonte gjithçka, duke e nisur me fjalën e lirë, duke e vendosur atë në piedestal.

Nuk ishte e lehtë në ato ditë janari të 1991 të merrje përsipër të luftoje me fjalën e lirë diktaturën. Dalja e numrit të parë të gazetës "RD" ndodhi vetëm një muaj pas krijimit të PD dhe ishin shenjat e para të mëdha që premtonin se opozita po organizohej gjithnjë dhe më shumë për t’u përballur me aparatin me kriminal diktatorial që kishte njohur Europa Juglindore.

Nuk ishte e lehtë krijimi i gazetës së parë opozitare po të kihet parasysh se vetëm pak muaj më parë, diktatura përmes veglave të saj si, Fehmi Abdiu kishte dënuar me varje në litar, poetin Havzi Nela, vetëm se poezitë e tij nuk pëlqeheshin nga të pashkollët e diktaturës. Përballja ishte e vështirë, qytetërimi përballë së vjetrës, ndryshimi përballë së shkuarës, dëshira për të ngritur një sistem të ri të demokracisë dhe ekonomisë së tregut përballë dëshirës për të mbajtur në këmbë "Perandorinë e së keqes". Përballë "RD" së 14 viteve më parë ishte fletushka terroriste e gazetës së PPSH, e cila me shkrimet e saj kundër intelektualëve dhe pjesës më të emancipuar të vendit që fliste për ndryshimin, kishte bërë që shumë prej tyre të përfundonin përpara togës së pushkatimit, kangjellave të burgjeve apo kampeve të internimit.

Misioni që koha i kishte vënë përpara PD për të udhëhequr procesin e ndryshimeve të mëdha nuk kishte se si të mos i bashkangjitej "RD", e cila ishte dhe mbeti tribuna e fjalës së lirë.

14-vjetori i "RD", më 5 janar, është në të njëjtën kohë edhe ditëlindja e shtypit të lirë. Ndoshta kjo ditë më shumë se çdo ditë tjetër duhet të bëjë mediat të reflektojnë se ku ishin 14 vjet më parë dhe ku janë tani, a ishin këto media më të lira 14 vjet më parë se sa mund të jenë tani, cilat kanë qenë sfidat dhe rreziqet e atyre ditëve, dhe cilat janë sfidat dhe rreziqet që kërcënojnë sot median e lirë? Përgjigja e të gjithë këtyre pyetjeve do të bëjë që të gjithë të kuptojmë se shtypi i lirë në Shqipëri është rritur shumë, jo vetëm në numër më të madh gazetash apo mediash elektronike, por edhe në aspektin profesional. Në të njëjtën kohë ajo që konstatohet, është liria e shtypit shqiptar mbetet e rrezikuar dhe një gjë e tillë konstatohet jo vetëm nga lexuesi shqiptar, por edhe nga organizmat ndërkombëtarë.

Vetëm bashkëshortja e kryeministrit dhe burri i saj, kanë ngritur mbi pesë padi penale dhe civile ndaj botuesve të medas së lirë, duke kërkuar si dëmshpërblim për denoncimin e skandaleve të tyre miliona lekë apo edhe vite të tëra burg. Ndërkaq shumë media të tjera janë të diskriminuara nga reklamat, të cilat qeveria i shpërndan. Kjo sipas edhe raporteve ndërkombëtare në mediat e preferuara të saj. Thuasje rreziku që i kanoset fjalës së lirë sot, është i njëjtë me atë që i kanosej edhe 14 vjet më parë me daljen e numrit të parë "RD". Ky rrezik është shuarje e fjalës së lirë. Në ballë të tyre është sërish e njëjta parti me emër të ndryshuar dhe e njëjta fletushkë terroriste që ishte dhe 14 vjet më parë, që si për ironi të ndryshimit të kohërave ajo nuk e ka ndryshuar as emrin. Është ky binom që vazhdon të japë pretenca për gazetarët apo botuesit, të cilët nuk i nënshtrohen qeverisë së Fatos Nanos.

Nëse 14 vjet më parë ishte "RD" e vetme që përmbushi misionin e saj të madh për të ndërgjegjësuar opinionin për nevojën e ndryshimeve, sot një mision i tillë i takon të gjitha mediave që si busull të tyre kanë fjalën e lirë.


---------------------------------------------