Lajme ekonomike

[Gerrard]

Ndër të tjera, sipërmarrësit propozojnë që pjesë e këtyre reformave të jenë edhe krijimi i një gjykate administrative dhe formalizimi i të gjitha transaksioneve tregtare. Në shumicën e vendeve evropiane përplasjet biznes-shtet zgjidhen nga gjykatat administrative, ose siç njihen ndryshe "Gjykatat Tregtare". Janë pikërisht këto institucione që thonë fjalën e fundit në çdo konflikt midis një ndërmarrjeje dhe administratës publike. Ato përbëhen nga gjykatës, të cilët janë ekspertë edhe në fushën e ekonomisë dhe ofrojnë mundësinë e zgjidhjeve në një kohë shumë të shpejtë midis përplasjeve ligjore-biznes shtet. Ndërsa kërkesa e dytë e formalizimit të transaksioneve tregtare kërkon mbylljen e ciklit të tatimit mbi vlerën e shtuar. "Ne mendojmë që me përfshirjen e biznesit të vogël në skemën e TVSH-së mundësia për evazion fiskal do të reduktohet ndjeshëm, duke patur parasysh që aktualisht kjo taksë është më problematikja për evazion", shpjegon Buxhuku. Sipas tij, është e nevojshme që edhe dy institucionet kryesore të të ardhurave publike, doganat dhe tatimet, t‘u nënshtrohen reformave të informatizimit dhe rritjes profesionalizmit të punonjësve së tyre.

[Gerrard]

Projektligji i ri për procedurat tatimore u hartua nga Ministria e Financave pa u diskutuar me parë me grupet e interesit. Qeveria pretendon se rregullimet ligjore të parashikuara në këtë draft synojnë të ulin nivelin e lartë të borxhit të akumuluar që biznesi i detyrohet administratës tatimore. Ai u kontestua në mënyrë masive nga e gjithë klasa e biznesit dhe nën këtë presion parlamenti e shtyu votimin e parashikuar në seancën plenare të së premtes. Maxhoranca duket e vendosur për të vënë në zbatim idenë e saj duke miratuar me dhunën e kartonëve në parlament ligjin, të cilin shumë nga ekspertët e cilësojnë si represiv. Për këtë shoqatat e bizneseve tashmë kanë hedhur edhe hapin e parë ligjor të kundërshtimit të kësaj nisme, duk i kërkuar zyrtarisht presidentit të republikës që të mos e dekretojë atë. Madje disa prej tyre kanë deklaruar se nuk do të mjaftohen me kaq, por në rast miratimi të tij do ta apelojnë vendimin në gjykatën kushtetuese, ku do të paraqesin edhe argumentet e tyre kundërshtues. "Besojmë se do të arrijmë, që në minutat e fundit të kemi një marrëveshje midis shtetit dhe biznesit, për të mos e aprovuar këtë ligj, i cili mund të dëmtonte rëndë një numër shumë të madh biznesesh në vend", përfundon Buxhuku.

Gazeta Shqip

[Gerrard]

Pas prononcimit publik të sipërmarrësve dhe ekspertëve të pavarur mbi problemet shumë të rënda juridike që paraqet projektligji "Për disa ndryshime të procedurave tatimore", mbi parapagimin e gjobave të biznesit para një procesi gjyqësor, qeveria është hedhur në kundërsulm. Ministri i Ekonomisë, Tregtisë dhe Energjetikës, Genc Ruli, në një intervistë televizive deklaroi se kjo çështje nuk ka lidhje me referencat kushtetuese që ekspertët i kanë përdorur si objeksion. "Ky ligj, pavarësisht përdorimit të fjalës ‘penalizim‘, nuk ka të bëjë fare me referencën që i bëhet Kushtetutës mbi prezumimin e pafajësisë. Këtu kemi të bëjmë me një marrëdhënie fiskale të shtetit me privatin", deklaroi Ruli. Përkundër asaj që ministri deklaron, Gjykata Kushtetuese e Republikës së Shqipërisë, në një vendim të sajin mbi parapagimin e TVSH-së (e cila është kryekëput, citojmë ministrin: "Një marrëdhënie fiskale e shtetit me privatin"), u është referuar pikërisht parimeve të së drejtës së një procesi të rregullt dhe prezumimit të pafajësisë, si parime themelore universale të cituara edhe në Konventën Evropiane të të Drejtave të Njeriut, anëtare e së cilës është edhe Shqipëria. Prezumimi i pafajësisë, në fakt, nuk mund të kufizohet vetëm në çështje të të drejtës penale, por shtrihet në të gjitha çështjet që trajtohen në gjykatë, duke qenë në thelb, vetë arsyeja e ekzistencës së sistemit gjyqësor. Ndërkaq, Kushtetuta e Shqipërisë, Neni 42, pika 2 thotë: "Kushdo, për mbrojtjen e të drejtave të lirive dhe të interesave të tij kushtetues e ligjorë, ose në rastin e akuzave të ngritura kundër tij, ka të drejtën e një gjykimi të drejtë dhe publik brenda një afati të arsyeshëm nga një gjykatë e pavarur dhe e paanshme e caktuar me ligj". Kësisoj, parapagimi i gjobës i parashikuar nga qeveria, bie ndesh pikësëpari me Kushtetutën tonë, pasi e inkriminon dhe ndëshkon biznesin, para se ky i fundit të ketë një proces të rregullt. Gjithashtu, Ruli thotë se: "Janë borxhe qindra milionë euro që janë grumbulluar nga bizneset pranë administratës tatimore dhe nëse shteti nuk reagon ndaj kësaj situate të krijuar, nuk reagon as ndaj detyrimit të parë kushtetues, sipas të cilit, ai duhet të mbledhë nga fisku të gjitha ato të ardhura që shkojnë në buxhet". Në fakt, referenca e parë kushtetuese që flet mbi detyrimet ekonomike të shtetit është neni 11, pika 1, i cili sanksionon: "Sistemi ekonomik i Republikës së Shqipërisë bazohet në pronën private e publike, si dhe në ekonominë e tregut e në lirinë e veprimtarisë ekonomike". Janë pikërisht dy elemente të rëndësishme të këtij neni që cenohen nga projektligji për parapagimin e gjobave të biznesit, para se të shkohet në një proces gjyqësor: prona private dhe liria e pavarësisë ekonomike. Kjo, pasi gjoba tatimore, në rastin kur figuron e padrejtë dhe e shpërpjesëtuar me mundësitë paguese të biznesit, e privon atë padrejtësisht nga prona e tij, madje dhe nga liria ekonomike.

[Gerrard]

Gjithashtu, legjislacioni shqiptar nuk mund të jetë në kundërshtim me Konventën Evropiane të të Drejtave të Njeriut, e cila shërben si platforma bazë mbi të cilën funksionon Gjykata e Strasburgut. Neni 13 i saj parashikon të drejtën e ankimit për çdo individ, i cili pretendon se është viktimë e një mase të marrë nga autoritetet shtetërore, që bie në kundërshtim me detyrimet të cilat rrjedhin nga Konventa. Në kuptimin e Konventës, neni 13 i saj lexohet në korrelacion me paragrafët 1 dhe 2 të nenit 6. Kjo, për faktin se e drejta për një ankim efektiv është e lidhur ngushtë me të drejtën për një proces të rregullt dhe me parimin e prezumimit të pafajësisë. Kështu, në çdo rrethanë që flasim për të drejtën e ankimit efektiv, duhet marrë parasysh edhe respektimi i njëkohtë i këtyre parimeve. Ligji për parapagimin e gjobave bie ndesh me të dyja këto pika. Së pari, sepse sistemi shqiptar i drejtësisë ende nuk është në gjendje të garantojë zbatimin e ligjeve dhe vendimeve të gjykatës. Kjo, për sa kohë janë të panumërta rastet, kur qeveria nuk zbaton vendimet e Përmbarimit për kompensimin apo dëmshpërblimin e subjekteve private. Së dyti, sepse që në çastin kur biznesi detyrohet ta parapaguajë gjobën e më pas të shkojë në gjykatë, bie poshtë e drejta e prezumimit të pafajësisë, pasi subjekti cilësohet automatikisht fajtor. Gjykata Evropiane e të Drejtave të Njeriut ka dhënë sakaq gjykime në favor të bizneseve që kanë paditur vende të tyre, bazuar mbi të drejtat e përmendura më lart, mbi çështje të masave të ndërmarra nga shteti, (Efstradiu kundër Greqisë, 12-18 dhjetor 1996 etj). Gjithashtu, ky projektligj krijon hapësira për të cenuar parimin e proporcionalitetit, i cili është shtylla bazë e legjislacionit evropian. Mungesa e respektimit të këtij parimi në praktikë dëmton të drejtat e individit, sepse shuma e paguar mund të jetë në disproporcion me situatën materiale të subjektit (rasti i gjykuar në Strasburg: Debord et Omer kundër Francës, 14 nëntor 2000).

[Gerrard]

Për të përmbushur vakumin ligjor dhe mangësitë kushtetuese mbi një proces të rregullt, qeveria ka sjellë në skenë mundësinë e krijimit të një Gjykate Administrative. Zgjatja disavjeçare e gjyqeve, në rastin kur një biznes ka parapaguar një gjobë abuzive marramendëse, do ta çonte atë automatikisht drejt falimentit, ndaj qeveria ka gjetur një zgjidhje, sipas së cilës gjykimi bëhet brenda 5 ditësh. Krijimi i kësaj gjykate mund të realizohet vetëm nëpërmjet një ligji organik, ku kërkohet 3 e 5-ta e votave, pra nevojitet një kompromis me opozitën. Në fakt, që para muajit nëntor të 2006-ës, qeveria ka përgatitur një projektligj për "Për organizimin dhe funksionimin e pushtetit gjyqësor", ku parashikohet mundësia e krijimit të një Gjykate Administrative. Sikur projektligji në fjalë të miratohej sot, do të nevojiteshin 6 muaj që ai të hynte në fuqi, pas botimit në Fletoren Zyrtare. Pas 6 muajsh do të nevojitej një ligji i ri "Për organizimin dhe funksionimin e Gjykatës Administrative", i cili do të kërkonte përsëri 6 muaj vetëm për t‘u përgatitur dhe 6 muaj të tjerë për të hyrë në fuqi. Si rrjedhojë, ashtu si në rastin e krijimit të Gjykatës së Krimeve të Rënda, ligji i ri i miratuar do të kërkojë zyrtarisht 1 vit kohë që të krijohen strukturat dhe kapacitetet fizike e njerëzore për të mundësuar funksionimin e gjykatës së re. Kështu, vetëm ana procedurale do të kërkonte të paktën 2 vjet, që Gjykata Administrative të jetë funksionale, ndërkohë që gjatë këtyre dy vjetëve, bizneset do të qëndrojnë në pritje për të marrë një gjykim mbi gjobat që kanë parapaguar sakaq ndaj administratës tatimore. Ndërkohë, duhen parë marrëdhëniet e ligjeve në fjalë me ato ekzistuese të institucioneve të tjera për të shmangur përplasjet e mundshme. Problem i madh është edhe përzgjedhja e stafit të kualifikuar. Neni 136 i Kushtetutës, pika 4 thotë: "Gjyqtarët emërohen nga Presidenti i Republikës me propozim të Këshillit të Lartë të Drejtësisë". Por, këto janë dy institucione, me të cilat komunikimi i qeverisë paraqitet në nivele shumë të dobëta. Nga ana tjetër, edhe projektligji ekzistues "Për organizimin dhe funksionimin e pushtetit gjyqësor" duhet rishikuar, pasi kritikohet në raportin e fundit të Komisionit Evropian, të botuar në nëntor të 2006-ës. Megjithatë, deri më sot nuk ka sinjale nga qeveria për një rishikim të problemeve të paraqitura në Raportin e Komisionit Evropian. Kjo, do të thotë, se arbitrariteti qeveritar i parapagimit të gjobave do të stimulohet, duke u bërë joshës për biznesin, nëpërmjet praktikave të mësipërme ligjore, të cilat përveçse do të luajnë rolin e një "kali Troje", paraqiten problematike dhe të dëmshme në vetvete.

Gazeta Shqip

[Gerrard]

“Në të gjithë botën, politikat që ndiqen janë të atilla që rreken të parandalojnë një dukuri”, - tha saktësisht ministri. Qeveria shqiptare, me këtë ligj të ri për procedurat tatimore, kërkon që të parandalojë shmangiet nga pagimi i taksave dhe nuk ka për qëllim të rrisë arkëtimet apo të vërë në vështirësi biznesin



Ministri i Ekonomisë, Genc Ruli, tha dje në një takim me përfaqësues të biznesit në Korçë, se pagimi i detyrimeve tatimore dhe i gjobave, përpara se të ketë një vendim të organeve të apelimit, ka për qëllim parandalimin e evazionit fiskal. Në të gjithë botën, politikat që ndiqen janë të atilla që rreken të parandalojnë një dukuri, tha saktësisht ministri. “Qeveria shqiptare, me këtë ligj të ri për procedurat tatimore kërkon që të parandalojë shmangiet nga pagimi i taksave dhe nuk ka për qëllim të rrisë arkëtimet apo të vërë në vështirësi biznesin”, - vijoi ministri. Aktualisht, në administratën e doganave procedura që ndiqet është e njëjtë me këtë që po kërkohet të bëhet edhe në tatime dhe në fakt, kjo nuk është një e re, pasi në Shqipëri, para pak vitesh kështu ka qenë. Ministri i Ekonomisë u kërkoi përfaqësuesve të biznesit në Korçë të jenë partnerë në këtë sipërmarrje të re të qeverisë dhe siguroi se asnjë biznes korrekt nuk do të kishte asnjë problem, përkundrazi kësaj i tremben vetëm bizneset që kanë probleme me pagimin e detyrimeve tatimore. “Qeveria, - tha ministri i Ekonomisë, - ka rënë dakord që të marrë në konsideratë kërkesat e biznesit dhe për këtë gjë, ajo ka vendosur që sasia e vlerës së gjobës që do të paguhet të jetë vetëm 25% dhe më pas të pritet vendimi i organeve të apelimit.” “Vendi ynë, - tha ministri, - po kërkon të rrisë standardet e zbatimit të ligjit dhe po kërkon gjithashtu të përqasë edhe legjislacionin që vepron në këtë drejtim me vendet e tjera të Bashkimit Europian.” Në këtë logjikë është edhe ligji i ri për procedurat tatimore, i cili, krahasuar me vendet e tjera të Bashkimit Europian kërkon që të paguhet një masë më e vogël e vlerës së gjobës para se të shprehet gjykata. Kësisoj, Italia e ka këtë vlerë 50% ndërkohë që ka vende të tjera që e kanë edhe më të madhe këtë vlerë. Reforma rregullatore që ka nisur dhe që brenda këtij viti do të përfundojë plotësisht, do të bëjë të mundur që biznesi të ketë një lirshmëri mjaft më të madhe, për të ushtruar aktivitetin e tij dhe kjo është pjesë e asaj që është quajtur klimë e re e biznesit dhe hapësira më të mëdha për të. Kjo reformë do të ketë për pikë përmbyllëse të saj krijimin e Qendrës Kombëtare të Regjistrimit të biznesit në një spoertel të vetëm “One stop shop”. Ministri i Ekonomisë, Ruli, e quajti mjaft të rëndësishëm dialogun me biznesin, por quajti mjaft të rëndësishëm edhe bashkëpunimin e këtij të fundit me administratën dhe kërkoi mbështetje për të realizuar formalizmin e ekonomisë.

[Gerrard]

Zëvendësministri, Mima, thotë se, ligji i ri është në kuadër të marrëveshjes me FMN-në, për të bërë ndryshime në përmirësimin e procedurave të mbledhjes së të ardhurave dhe se, në të vërtetë, puna për përpilimin e këtij projektligji ka nisur që nga muaji në nëntor i vitit të shkuar dhe po të mos ishin zgjedhjet lokale, të cilat ngadalësuan punën e parlamentit, ky ligj do të ishte miratuar që para dy muajsh



Në marrëveshjen e vendit tonë me misionin e Fondit Monetar Ndërkombëtar është parashikuar që ndryshimet në procedurat tatimore të bëhen në fillim të çdo viti, ndërsa ndryshimet në shkallën e taksave të bëhen në mesnin e çdo viti. Zëvendësministri i Financave, Florion Mima, tha se, ligji i ri i procedurave të tatimeve është në kuadër të marrëveshjes që qeveria shqiptare ka me Fondin Monetar Ndërkombëtar, për të bërë ndryshime në përmirësimin e procedurave të mbledhjes së të ardhurave dhe se, në të vërtetë, puna për përpilimin e këtij projektligji ka nisur që nga muaji nëntor i vitit të shkuar dhe po të mos ishin zgjedhjet lokale, të cilat ngadalësuan punën e parlamentit, ky ligj do të ishte miratuar që para dy muajsh. “Në marrëveshjet që kemi me Fondin Monetar, - tha zëvendësministri, - është parashikuar që të mos bëhen ndryshime të legjislacionit fiskal për shkallën e tatimit në fillim të vitit, por ato të bëhen në mesin e tij dhe po në këto marrëveshje thuhet se ndryshimet në procedurat tatimore duhet të bëhen në fillim të vitit.” Ligji i ri gjobave, siç quhet, ku një biznes që ka marrë një gjobë duhet ta paguajë atë së bashku me vlerën e detyrimeve, para se të ketë një vendim të gjykatave, është pjesë e marrëveshjes për të përmirësuar mënyrën e mbledhjes së të ardhurave dhe për të mundësuar më së shumti edhe formalizmin e ekonomisë. Në ligjin e ri të procedurave fiskale ka disa probleme, të cilat, në fakt, janë më së shumti probleme që ngërthejnë dobësinë e sistemit të drejtësisë, i cili nuk mund t’iu përgjigjet kërkesës që kanë bizneset dhe tatimet në lidhje me vendimet e inspektorëve të tatimeve. Zëvendësministri i Financave tha se, fokusi kryesor i projektligjit të procedurave të reja në tatime ka qenë mpakja e peshës që mund të ketë një inspektor në kontrollet ndaj një biznesi. Duke mundësuar me ligj pagimin e vlerës së detyrimit të tatimeve dhe të njëzet e pesë për qind të gjobës, duket sikur inspektorët janë më të fuqishëm dhe mund të bëhen arbitrarë, por, në fakt, atyre me këtë ligj nuk iu mbetet në dorë asnjë mundësi korruptimi, pasi biznesi nuk ka më aq shumë arsye të paguajë një inspektor dhe anasjelltas, por është i detyruar të shkojë në gjykatë. Ligji, tashmë është shumë më i qartë dhe lë pak vend për kompromis mes një inspektori të korruptuar dhe një biznesi. Megjithatë, zëvendësministri Mima, tha se, në administratën e tatimeve po vijion një reformë mjaft e thellë, për ta bërë atë mjaft transparente dhe mjaft të paatakueshme, kur çdo biznes do të ketë të drejtën e tij të ankohet dhe për këtë, ai do të ketë një përgjigje.

[Gerrard]

Tatimi mbi pasurinë nuk është një taksë e rëndësishme për buxhetin e shtetit, por identifikimi i pasurive dhe mbledhja e tatimit mbi pasurinë është një element, i cili do të bëjë që edhe shumë taksa të tjera të mblidhen më mirë e, pas kësaj, do të ndihmojë edhe institucione të tjera që kanë nevojë për këtë informacion





Ministria e Financave ka bërë gati një bazë të dhënash për vjeljen e tatimit mbi pasurinë.

Ministria e Financave do të ndërtojë një bazë të dhënash të sakta për pasuritë e çdo personi. Burime nga kjo administratë bëjnë të ditur se ka ardhur koha që të jetë e identifikuar çdo pasuri dhe të jetë identifikuar edhe personi që e zotëron atë. Kjo, kryesisht do të bëhet për efekt të mbledhjes së tatimit mbi pasurinë, pasi kjo administratë mban përgjegjësi. Aktualisht, mbledhja e tatimit mbi pasurinë ka një performancë, siç e quajnë zyrtarë të administratës së tatimeve mjaft të dobët e kjo, vetëm për shkak të mungesë së kësaj baze të dhënash. Në vitin aktual, në buxhetin e shtetit është parashikuar që tatimi për pasurinë të mund të mblidhet në masën e rreth 1.4 miliard lekëve ose rreth 14 milionë dollarëve. Ndërkohë që, me përpilimin e kësaj baze të dhënash, domethënë me identifikimin përfundimtar të të gjitha pasurive dhe të gjithë personave deri në fund të vitit 2009 do të kemi një nivel të ardhurash nga tatimi mbi pasurinë, që do të shkojë në 2.8 miliardë lekë ose rreth 28 milionë dollarë. Pra, shihet se të ardhurat nga tatimi mbi pasurinë do të dyfishohen. Këtu rol do të luajë, jo vetëm identifikimi i pasurive, por edhe shtimi i tyre deri në atë vit. Vetëm nga identifikimi i saktë i pasurive, tregojnë të dhëna të Ministrisë së Financave, shteti humbet në mbledhjen e të ardhurave rreth 10 milionë dollarë. Ka një mungesë të data basave të domosdoshme në identifikimin e pasurive të çdo personi. Siç dihet, administrata tatimore është futur në një proces të madh të betejës me ekonominë informale dhe identifikimi i të gjitha aseteve dhe i të gjitha pasurive që me ligj tatohen është pjesë e kësaj përpjekjeje. Siç dihet, tatimi mbi pasurinë nuk është një taksë e rëndësishme për buxhetin e shtetit, por identifikimi i pasurive dhe mbledhja e tatimit mbi pasurinë është një element, i cili do të bëjë që edhe shumë taksa të tjera të mblidhen më mirë e, pas kësaj, do të ndihmojë edhe institucione të tjera që kanë nevojë për këtë informacion.

[Gerrard]

Ministria e Financave është në proces implementimi të projektit për informatizimin e sistemit të thesarit. Sipas specialistëve të Financave Publike, aktualisht po punohet për implementimin e projektit "Për informatizimin e sistemit të thesarit" si dhe të tatimeve dhe doganave, projekte të cilat do të përmirësojnë fuqishëm infrastrukturën ligjore të fushës së financave e të kontabilitetit, duke plotësuar në këtë mënyrë edhe kërkesat që rrjedhin nga Marrëveshja e Stabilizim-Asocimit. Brenda këtij viti pritet të miratohet ligji organik i buxhetit të shtetit, i kontrollit të administrimit fiskal, ligji për kontabilitetin publik, ndërsa është miratuar tashmë ligji i prokurimeve publike.

Sipas këtyre burimeve, miratimi i këtyre ligjeve do të rrisë efikasitetin në përdorimin e fondeve publike dhe funksionimin ligjor të ekonomisë në tërësi dhe sidomos do të reduktojë në maksimum të gjithë burokracitë dhe mundësitë që çojnë në spekulime me fondet.

Shkaqet, heqja e tarifës doganore për lëndët drusore të importit, si dhe ndalimi i prerjes së pyjeve në vend

10 mijë metra kub lëndë drusore nga importi, vetëm për 3 muaj

Importi i lëndës drusore në vend, gjatë vitit 2006 e në vazhdim ka shënuar rritje progresive, njoftoi sot Drejtoria e Përgjithshme e Pyjeve dhe Kullotave.

Sipas burimeve nga kjo drejtori, heqja e tarifës doganore për lëndët drusore të importit, si dhe ndalimi i prerjes së pyjeve në vend për përdorim përpunimi, ka bërë që importuesit e drurit t'u drejtohen tregjeve të huaja për të siguruar lëndën e parë për biznesin e tyre. Kryesisht, importi i lëndës drusore bëhet nga Mali i Zi, Bullgaria dhe Kosova. Sipas këtyre burimeve, janë importuar gjatë 3-mujorit të parë të këtij viti 10 mijë metra kub lëndë drusore, nga rreth 7 mijë metra kub në vitin 2006.

Drejtoria e Përgjithshme e Pyjeve ka ndërmarrë hartimin e strategjisë 10-vjeçare për ripërtëritjen e pyjeve të dëmtuar në vend, duke përfshirë ndërhyrje financiare dhe teknike në manaxhimin e qëndrueshëm të resurseve pyjore, shtetërore dhe komunale

Çmimet e artikujve blegtoralë ulen lehtë

Në fund të kësaj jave, në tregjet vendase të shitjes së ushqimeve, çmimet në përgjithësi kanë regjistruar të njëjtat nivele si një javë më parë.

Sipas një vëzhgimi të përgjithshëm nga Drejtoria e Statistikës në dikasterin e Bujqësisë, rezultoi se, çmimet e grurit dhe misrit, në Tiranë kanë shënuar përkatësisht 34,3 lekë/kg dhe 35,1 lekë/kg, duke ruajtur të njëjtin çmim, si një javë më parë.

Të njëjtat nivele kanë shënuar edhe produktet e bulmetit, djathë i bardhë e gjalpë, të cilat u tregtuan 346,6 lekë/kg dhe 332,1 lekë/kg. Ndërsa, çmimi i vezëve nga 11 lekë/kokrra u ul në 9 lekë/kokrra. Çmimet e disa artikujve të tjerë blegtoralë, si dhe fruta perimet kanë pësuar ndryshime të vogla me tendencë drejt uljes së tyre, për shkak të sezonit.

[Gerrard]

Valutat kryesore ndërkombëtare, dollari amerikan (USD) dhe monedha e përbashkët europiane (Euro), gjatë kësaj jave që po mbyllet kanë patur pozita të kundërta në kursin e këmbimit vendas dhe ndërkombëtar. Sipas të dhënave të bankave të nivelit të dytë dhe të agjencive të këmbimit valutor në Tiranë, 1 USD u këmbye mesatarisht të hënën me 93.5 lekë dhe dje, me 93.2 lekë. Ndërsa, monedha e përbashkët u këmbye mesatarisht të hënën me 125.4 lekë dhe sot me 126 lekë. Burime të agjencive valutore bëjnë të ditur se, këto ndryshime janë ndikuar kryesisht nga bursat ndërkombëtare, ku euro ka fituar terren në kursin e këmbimit me dollarin. Në këto bursa, ditën e hënë, 1 USD u këmbye me 1.3443 Euro, ndërsa të premten në mbrëmje, me 1.3534 Euro.

Sipas ekspertëve ndërkombëtarë, edhe publikimi i të dhënave jo pozitive mbi disa tregues të ekonomisë amerikane dha ndikim negativ në kursin ndërkombëtar për valutën amerikane, ndërsa gjatë javëve në vazhdim ekspertë ndërkombëtarë parashikojnë një forcim të mëtejshëm të Euros kundrejt Dollarit. Ndërkohë, në bursën e New York-ut, një fuçi nafte ditën e premte arriti çmimin prej 64 USD, ndërsa ari u kuotua me 684 dollarë për once.

Gezeta "TEMA"