Lajme ekonomike

[Gerrard]

Nga 2002 deri në maj-qershor të vitit 2006 trendi dominues në lëvizjen e normave të interesit të bonove të thesarit ka qenë rënës. “Dhe ky trend rënës ka qenë në përputhje me politikën monetare të ndjekur nga ana e Bankës së Shqipërisë”, thotë Gjermeni. Gjatë vitit të kaluar BSH vendosi të rrisë dy herë normën bazë të interesit. Por, ky trend i ri sigurisht që ka edhe oscilacionet e tij. “Kemi periudhën e fundit të vitit që rritja është më agresive sesa ajo e iniciuar nga BSH”, tha ai. Ajo çka ka ndikuar në këtë rritje është kërkesa e lartë. Kjo, pasi kërkesa e qeverisë për likuiditete ka qenë më e madhe sesa oferta që jepte tregu.

[Gerrard]

“Ajo çfarë ka ndodhur në dy vitet e fundit mund të krijoje një pritshmëri në treg, se e njëjta sjellje mund të përsëritet edhe në periudhën që do të vijë”, vijon Gjermeni. Krijimi i këtyre pritshmërive mund të sjellë që investitorët të synojnë të investojnë fondet e tyre kryesisht në tremujorin e fundit të vitit, me synimin për të investuar në momentin kur normat e interesit të bonove të thesarit janë më të larta. Dhe në 3-mujorin e parë të vitit të kryejnë veprimin e kundërt. “Por, nëse të gjithë investitorët krijojnë pritshmëri, se do të ndodhë diçka ata do të organizojnë veten e tyre për të bërë veprimin më të favorshëm për të përfituar sa më shumë ndaj asaj që pritet të ndodhë. Por duke menduar të gjithë në të njëjtën mënyrë, ajo që pritet të ndodhë nuk do të ndodhe, pasi kërkesa dhe oferta do të synojnë të balancojnë njëra-tjetrën”, sqaron ai. Sjellja sezonale në treg është tipar i tregjeve të pazhvilluara.



Kthimi
Bazuar të dhënave më të fundit nëse krahasohen normat e interesit për depozitat 3-mujore, në konceptin e mesatares së ponderuar, me normën e interesit të bonove të thesarit 3-mujore vërehet që kthimi nga investimi në bono thesari është 1.85 më i lartë sesa kthimi nga depozita.

Pritshmëritë
Individët do të synojnë t’i investojnë paratë e tyre në bono thesari kryesisht në tremujorin e fundit të vitit, me synimin për të investuar në momentin kur normat e interesit të bonove të thesarit janë më të larta. Dhe në 3-mujorin e parë të vitit të kryejnë veprimin e kundërt.



5,5 per qind
është norma bazë e interesit të lekut. Nëntorin e vitit të kaluar Këshilli i Mbikëqyrjes i Bankës së Shqipërisë vendosi të rrisë normën bazë të interesit të lekut me një çerek pike, duke e çuar në 5.5 %, nga 5.25 % që ishte

[Gerrard]

Bonot e thesarit janë letrat me vlerë, që qeveria i hedh në tregun financiar, nëpërmjet Bankës së Shqipërisë. Sa herë qeveria ka nevojë për para, pret këto letra me vlerë, që quhen bono thesari dhe i shet nëpërmjet Bankës së Shqipërisë. Bonot e thesarit mund të blihen pranë bankave tregtare apo edhe Bankës së Shqipërisë, ose filialeve të saj në rrethe. Eshtë e mjaftueshme paraqitja e letërnjoftimit së bashku me paratë, që do investohen. Pas derdhjes së parave merret vërtetimi nga banka, si dhe plotësohet një deklaratë që i bashkëngjitet kërkesës. Dy ditë pas shpalljes së rezultateve të ankandit, mund të shkojmë të tërheqim interesin. Ankandet për bono thesari me maturim tremujor zhvillohen çdo javë, ndërsa ato për bono me maturim gjashtëmujor dhe dymbëdhjetëmujor, çdo dy javë.

[Gerrard]

Monedha e përbashkët evropiane ka fituar terren ndaj dollarit gjatë javës që u mbyll. Sipas të dhënave të agjencive të këmbimit valutor në Tiranë, 1 USD u këmbye mesatarisht të hënën me 93.5 lekë dhe dje me 93.2 lekë. Ndërsa, monedha e përbashkët u këmbye mesatarisht të hënën me 125.4 lekë dhe dje me 126 lekë. Burime të agjencive valutore, bëjnë të ditur se këto ndryshime janë ndikuar kryesisht nga bursat ndërkombëtare, ku euro ka fituar terren në kursin e këmbimit me dollarin. Në këto bursa, ditën e hënë, 1 USD u këmbye me 1.3443 euro, ndërsa të premten në mbrëmje, me 1.3534 euro. Sipas ekspertëve ndërkombëtarë, edhe publikimi i të dhënave jo pozitive mbi disa tregues të ekonomisë amerikane dha ndikim negativ në kursin ndërkombëtar për valutën amerikane, ndërsa gjatë javëve në vazhdim ekspertë ndërkombëtarë parashikojnë një forcim të mëtejshëm të euros kundrejt dollarit.

[Gerrard]

Së shpejti pritet të miratohet projektligji për krijimin e gjykatës administrative. Me krijimin e kësaj gjykate do të ketë një seksion të veçantë për çështjet fiskale. Këto kategori gjyqtarësh do të merren me çështjet gjyqësore mes administratës tatimore e biznesit. Por, pavarësisht këtij projekti të qeverisë, sipërmarrja vendëse vazhdon ta kundërshtojë projektligjin e qeverisë “Për disa ndryshime në ligjin për procedurat tatimore”. Sipas ndryshimeve të bëra, biznesi duhet të paguajë 25 për qind të vlerës së gjobës dhe më pas të ankohet në gjykatë. Gjatë një seance dëgjimore të zhvilluar pak ditë më parë në komisionin e Ekonomisë, komuniteti i biznesit i bashkuar në një zë të vetëm ka kundërshtuar ashpër projektligjin e qeverisë. Ndërkohë, javën e ardhshme ky projektligj do të kalojë për miratimin në Parlament, diskutimi i të cilit pritet të shoqërohet me debate mes opozitës dhe pozitës.

[Gerrard]

Ligji për gjobat ndaj biznesit ka pozicionuar kundër qeverisë edhe dy aleatë të tjerë të Partisë Demokratike, PR-në dhe PDK-në.

Kështu pas reagimit të dy ditëve më parë të kryetarit të PBDNJ-së, Vangjel Dule, i cili doli kundër këtij ligji dhe kërkoi shkarkimin e ministrit të Financave, Ridvan Bode, gjatë ditës së djeshme kreu i PR-së, Mediu dhe ai i PDK-së, Ndoka, kërkuan që qeveria të ulet me biznesin dhe në seancën e së hënës të bëhen amendimet e nevojshme. Kryetari i Partisë Republikane, Fatmir Mediu, tha dje para mbledhjes së Asamblesë Kombëtare të PR-së, se për sa kohë që projektligji i propozuar nga qeveria ka ngjallur reagimin e biznesit është e nevojshme që të ketë bisedime me këtë të fundit."Mendoj se ka një problem për sa kohë që biznesi është i shqetësuar dhe prandaj e theksoj se duhet të ulemi me biznesin. Por, duhet të ofrojmë tendencat. Tendencat e ligjit, e shtetit ligjor, shmangien e evazionit fiskal, dënimin e atyre që bëjnë evazion fiskal të qëllimshëm dhe në këtë mënyrë një procedim me transparencë të organeve tatimore", u shpreh dje Mediu. Më tej kreu i Partisë Republikane, i cili është edhe njëkohësisht ministër i Mbrojtjes në qeveri, shprehet se duhet të ketë diskutim mes anëtarëve të kabinetit, që janë përfshirë në hartimin e këtij projektligji, duke i qëndruar sërish bindjes se propozimet duhet të vijnë nga bota e biznesit. "Shtyrja do të shoqërohet me një diskutim dhe debat me kryeministrin dhe me anëtarë të kabinetit, që janë më të involvuar në këtë drejtim dhe një gjë shprehet e qartë në tendencën tonë. Eshtë vendosja dhe respektimi i ligjit. Duhet patjetër që propozimet që vijnë nga bota e biznesit të shikohen me interes dhe të gjendet gjuhë ë përbashkëta për atë, të cilët vijnë në shërbim të ligjit", tha Mediu. Pro shtyrjes dhe ridiskutimit të projektligjit "Për gjobat" ndaj biznesit është shprehur dje edhe kryetari i PDK-së, Nard Ndoka, i cili në një prononcim për mediat ka thënë se Gjykatës së Apelit duhet t'i lihet 15 ditë kohë për të dhënë vendimin në momentin që bizneset ankimojnë kërkesën e tyre kundër tatimorëve. "Eshtë normale që të ketë një rishikim. Pati debate për projektligjin, u debatua në seancë, u rikthye në komisione, u ridebatua përsëri. Kjo është shumë e rëndësishme që ne nuk debatuam një ligj në mënyrë arbitrare. Mund të ketë një mundësi amendimi edhe në seancën parlamentare që t'i japë mundësi gjykatave, që të shprehen qoftë edhe në një kohë të shkurtër për 15 ditë", u shpreh Ndoka.

[Gerrard]

Deputeti i Partisë Demokratike, Preç Zogaj, ka propozuar gjatë një mbledhje të grupit parlamentar që maxhoranca të ndërmarrë një nismë për ngritjen e një gjykate fiskale ose tatimore, e cila do të merret vetëm me çështjet ankimore të biznesit. Në kulmin e debateve mes qeverisë dhe biznesit për ligjin e gjobave, i cili e detyron biznesin të paguajë 25% të shumës së gjobës para se t'i drejtohet gjykatës, dhe pak para miratimit të këtij ligji në Parlament, deputeti demokrat ka propozuar një zgjidhje të mesme, që sipas burimeve brenda grupit të PD-së mund të materializohet nga fundi i muajit prill, pas hyrjes në fuqi të ligjit për gjobat.

Informacione Te Mara Nga Gazeta "Panorama"

[Zemrushja]

kam verejtur qe ne Shqipeir sidomos gjat sezonit te veres ka nje ulje te Sterlinges Britanike, ama Dollari amerikan nuk leviz edhe aq.....a mund te ma konfirmoj ndokush kte gje?

Kjo varet nga shum faktore.. Por do perpiqem te ta bej sa me te qarte..

Ne tregtine nderkombetare luan nje rol te rendesishem import - eksportimi i mallrave te ndryshme (ndermjet tyre dhe paraja) nga njeri vend ne vendin tjeter.. Nderkohe qe dihet se monedha e vendit me inflacion me te larte gjithmone do te zhvleresohet ndersa monedha e vendit me inflacion me te ulert do te vleresohet.. Dihet se inflacioni ne Shqiperi eshte me i madh se Inflacioni ne Angli. Mirepo ne Stinen e Veres Vendi yn ka me shum aktivitet se ne dimer (turizmi etj etj).

Ne rastin e Shqiperise, shumica e emigranteve ne Europe perpiqen te kalojne pushimet te themi ne Shqiperi. Kshu qe kur ata vijne ne shqiperi, kerkojne te nderrojne sterlinen anglese me lekun shqiptar. Pra ka me shum kerkese per lekun shqiptar sesa per blerjen e sterlines anglese.. Si rrjedhim sterlina zhvleresohet ne krahasim me lekun shqiptar ne stinen e veres ne Shqiperi..

(Ky eshte mendimi im, shpresoj te te kem ndihmuar ta kuptosh)

Zemrushja

[Gerrard]

Ligji per parapagimin e gjobave nga biznesi pritet te marre sot miratimin e kuvendit, ndersa nje dite me pare kryeministri, pavaresisht kundershtimeve nga ana e biznesit nuk eshte terhequr

Kryeministri Berisha nuk tërhiqet. Në një konferencë të gjatë shtypi ai premtoi dje se ligji ‘Për gjobat’ (kështu e cilësoi dhe ai vetë) do të kalojë në Kuvend dhe do të miratohet pa mëdyshje. Për-kundër kritikave të forta që i kanë ardhur kabinetit të tij nga komuniteti i biznesit, por dhe nga aleatët e tij në qeverisje, Mehdiu e Ndoka, Berisha dje pohoi se nuk kishte rrugë tërheqjeje. Dhe se miratimin e këtij ligji ai e shihte si një armë të fortë në luftën kundër informalitetit të ekonomisë shqiptare duke u përpjekur të mohojë se inisiativa e tij ka një prapavijë të qartë politike dhe për të qenë mjet në luftën politike.
Garancitë
Fjala ‘garantoj’ është përdorur me frekuencën e zakonshme që ndeshet në fjalimet publike të kryeministrit. Të dielën, zoti Berisha garantoi se një ditë më pas, të hënën ligji do të shkonte për miratim në Kuvend dhe se ai ishte një ligj brenda garancive dhe standarteve evropiane. Ai citoi një numër vendesh të BE-së, si Italinë, Greqinë, Francën, Gjermaninë, Suedinë e deri Shtetet e Bashkuara, në të cilat, sipas tij, gjoba e vendosur ndaj biznesit të gjetur fajtor, parapaguhej në fillim dhe më pas bëhej kundërshtimi i saj në gjykatë. Madje parapagimi bëhej në një masë më të madhe se ajo e përcaktuar për Shqipërinë, që është fiksuar në 25 për qind të vlerës së gjobës. “Kështu, në Itali, parapaguhet në masën 50 për qind”, tha Berisha. Por në të gjitha shembujt e dhënë, zoti Berisha nuk demonstroi në asnjë rast anën tjetër të medaljes, pra se çfarë do të ndodhte në rast se biznesi do të gjobitej në mënyrë të gabuar nga administrate tatimore. Por edhe në këtë rast, në vend të citimit të ndonjë neni të ligjit, zoti Berisha duke pranuar dhe ‘teorinë e gabimit’ nga administrata, për qortimin e saj, tha si zakonisht: Unë garantoj se ajo nuk do të gabojë, unë jam garanci për mosdëmtimin e biznesit.
Media
Transparenca e munguar ishte një nga mëkatet e vetme që zoti Berisha i zbuloi ligjit të gjobave që ai e mbrojti rishtaz publikisht në pjesën më të madhe të konferencës së tij për shtyp. Ai pranoi se një gjë e tillë nuk kishte ndodhur në masën e duhur dhe se edhe dalja e tij publike, kishte të bënte pikërisht me transparencën. ‘Të dalim në dritën e diellit, askush të mos ketë frikë nga rrezet e diellit’, tha kryeministri duke u përpjekur të justifikojë me këtë shprehje kontrollet e shumta tatimore në grupin mediatik të Top Medias. Sipas tij, Top-i nuk është i vetëm në këto kontrolle, por procedurave të ngjashme u janë afruar me qindra bizneseve të tjera, por që ndryshe nga Top-i, nuk kanë pranuar ta bëjnë publik një fakt të tillë. Duke folur pak, por duke lënë të kuptohet shumë, kryeministri dje nuk e fshehu qëllimin e tij për të goditur platfomën digitale të Top Medias, me pretekstin e luftës kundër piraterisë. Por pa mundur që edhe në këtë rast t’i shmanget standartit të dyfishtë që ai përdor: “Frekuencat televizive janë njëlloj si rrugët, janë pronë publike”, tha me të drejtë zoti Berisha, pa kujtuar se një frekuencë e tillë, për të mos përmendur të tjera, kanali 48, i është dhënë televizionit që duartroket qeverinë e tij, pikërisht si një dhuratë për duartrokitjet.

[Gerrard]

Propozohet një paketë alternative ligjore, që ndihmon në uljen e evazionit

Konfindustria kërkon nga qeveria shqiptare të shtyjë miratimin e ligjit për procedurat tatimore, që gjobit biznesin dhe e detyron atë të paguajë pa patur mundësi paraprake ankimimi në gjykatë. Ne nje letër drejtuar kryeministrit Berisha dhe të gjithë grupeve parlamentare, industrialistët më të mëdhenj në vend, bëjnë apel për mosmiratimin e ligjit, i cili parashikohet të votohet në kuvend ditën e sotme. Përfaqësuesit e "Konfindustria"-s mendojnë se në situatën aktuale, në të cilën ndodhet biznesi shqiptar, ky ligj mund të kthehet në një ‘boomerang‘. "Jemi dakord me çfarëdo ligji, sado i ashpër qoftë ai, por nuk mund të pranojmë kurrsesi politika të izoluara, efektet e të cilave mund të jenë të kundërta nga ato që priten", tha Gjergj Buxhuku, administrator i Përgjithshëm i "Konfindustria"-s. Bizneset më të mëdha prodhuese në vend kërkojnë nga qeveria që ligji për procedurat tatimore të jetë pjesë e një pakete të plotë ligjore, ku të përfshihen një sërë reformash të rëndësishme, nëpërmjet të cilave të synohet ulja e informalitetit dhe përmirësimi i klimës së biznesit në vend.