Lajme ekonomike

[Gerrard]

Fenomeni i rritjes dhe uljes së taksave, përfshi këtu edhe akcizën, është bërë i zakonshëm. Qeveria ndryshoi mendim për akcizën e disa nënprodukteve të naftës, vetëm në më pak se një vit pasi e kishte rritur me disa herë akcizën për mazutin dhe solarin. Rritja e mëparshme e nivelit të akcizës, nga 1 lekë/litri në 13 lekë/litri për këto produkte, sipas Financave, erdhi si detyrim i problemeve që u shfaqën në administrimin e produktit të heating-oil, i cili karakterizohet me të njëjtin Kod Doganor me solarin dhe mazutin dhe rezultonte e vështirë nga ana teknike, ndarja e tij me Kod më vete. Burime nga Financat sqarojnë se, meqenëse u evidentuan abuzime në dogana, ku rezultuan zhdoganime të gazoilit në vend si heating-oil, duke sjellë efekte të ndjeshme si për Buxhetin e Shtetit, ashtu dhe për konkurrencën, u gjykua të rritet niveli i akcizës për këto produkte, duke parashikuar edhe vendosjen e një skeme rimbursimi për subjektet të industrisë vendase, të cilët dëmtoheshin nga rritja e nivelit të akcizës. Por, rritja e akcizës nuk ka zgjatur shumë kohë, duke bërë që Ministria e Financave të bëjë një ulje të re për solarin dhe mazutin.

Sipas ligjit ekzistues, niveli i akcizës për këto mallra është i njëjtë me atë të gazoilit, 75%, por jo më shumë se 33 lekë/litri dhe jo më pak se 13 lekë/litri. Sipas Ministrisë së Financave, duke qenë se kjo skemë nuk ka rezultuar efikase, për t'u ardhur në ndihmë prodhuesve vendas, propozohet ulja e nivelit të akcizës për lëndët djegëse nga 13 lekë/litri, në 8 lekë/litri. Në realitet, kjo ulje e akcizës bëhet për shkak të rritjes së kontrabandës për këto produkte. Por ulja e akcizës për solarin dhe mazutin, paraqet një mundësi të mirë për abuzime në treg, referuar specialistëve të hidrokarbureve. Kjo, pasi kontrolli nga ana e strukturave përkatëse mbetet ende i dobët. "Në vend të uljes së akcizës, ne propozojmë që sektorët që kanë nevojë për përdorimin si lëndë djegëse të këtij artikulli, të rimbursohen sipas normave të konsumit, në raport me prodhimin që japin",- ka bërë të ditur Shoqata e Hidrokarbureve. Shoqata e Hidrokarbureve, me anë të një deklarate publike i ka bërë thirrje Parlamentit, që të mos miratojë këto ligje që janë në kundërshtim me zhvillimin e sipërmarrjes private.

[Gerrard]

Pa filluar efektet e para të ligjit të miratuar tashmë nga ana e Parlamentit, kanë filluar abuzimet në tregtimin e karburanteve. Një pikë karburanti në Lushnjë, në vend të naftës tregtonte solar, ndërsa në një pikë tjetër të tregtimit të karburanteve në Tiranë, janë vërejtur shkelje të rënda të cilësisë së hidrokarbureve. Deklarata është bërë gjatë ditës së djeshme nga ana e Inspektoratit të Naftës dhe Gazit, që është edhe organi përgjegjës për kontrollin e cilësisë.Ilir Kurti, kryetar i Inspektoratit Shtetëror të Naftës dhe Gazit, ka deklaruar për mediat së pas kontrollit të ushtruar në Lushnje, është evidentuar një subjekt i cili mashtronte me llojin e karburanteve, duke shitur në vend të naftës, solar. Ndërkohë, një tjetër pikë karburanti në Tiranë abuzonte me cilësinë e naftës D2. Sipas Kurtit, ndaj këtyre dy subjekteve është vendosur një gjobë prej 5 milionë lekësh.

[Gerrard]

Të gjithë zërat e grupeve të biznesit, janë kundër ligjit të ri për gjobat apriori

Nëse miratohet ky ligj siç është paraqitur, do të thotë që kompani të konsoliduara, me kapitale në treg, të jenë në dorën e falimentit nga një punonjës tatimor, që mund të jetë i pakualifikuar, i politizuar apo i paguar nga një kompani konkurrente. Kjo ka qenë edhe deklaratë e bërë dje nga Shoqata e Hidrokarbureve, që i është bashkuar grupeve të tjera të biznesit, që tashmë kanë kundërshtuar fuqimisht miratimin e këtij ligji. Në një deklaratë për mediat, Sekretari i kësaj shoqate, Viktor Nushi shprehet se zbatimi i këtij ligji vë në rrezik falimentimi biznesin. Shoqata e Hidrokarbureve kundërshton gjithashtu edhe uljen e akcizës për mazutin dhe solarin. Sipas bizneseve të hidrokarbureve, "ky ligj nuk duhet të miratohet siç është paraqitur, pasi në eksperiencën e anëtarëve të shoqatës tonë, kemi pasur raste vënie gjobe me qindra-miliona lekë, të cilat pas mbarimit të procedurave ligjore të apelimit kanë dalë të pabazuara ligjërisht. Pra, sikur të kishte qenë në fuqi një ligj i tillë, kompanitë përkatëse automatikisht do të kishin falimentuar". Një situatë e tillë, sipas këtij grupimi biznesi, vlerësohet si penalizuese vetëm për kompanitë që janë të stabilizuara në treg dhe që veprojnë në bazë të të gjitha rregullave dhe ligjeve.

[Gerrard]

Në shënjestër të këtij vendimi mbetet Biznesi i Madh dhe ai VIP, pasi edhe gjobat që vihen nga tatimet ndaj tij, kapin vlera të stërmëdha. Për çdo mosdeklarim, nëse i bëhet një shikim historikut të marrëdhënieve Biznes-Tatime, gjoba rezulton sa dyfishi i detyrimit tatimor që shkon për apelim. Vendimi i marrë nga qeveria është kundërshtuar nga ana e biznesit, duke e vlerësuar atë si një masë shtrënguese që ka karakter penalizues dhe që ka si qëllim kryesor, realizimin e të ardhurave në buxhet. Sipas mendimit të gjithë sipërmarrjes, bërë tashmë publike sipas grupimeve përkatëse, kjo është një masë që nuk ndihmon dhe stimulon sipërmarrjen private. Vendosja e këtyre ligjeve nuk lejon që institucionet përkatëse të marrin në shqyrtim vendimet e marra nga ana e institucioneve tatimore, por i bën ligjet që në pjesën më të madhe të tyre të zbatohen në mënyrë automatike. Nga ana tjetër, ndryshimi i bërë nga qeveria, heq edhe një pjesë tjetër të rëndësishme që ekziston aktualisht në ligjin "Për Procedurat Tatimore". Pavarësisht kërkesave të biznesit, ndryshimet heqin garancinë që një bankë mund të verë për një sipërmarrje në rastin e një gjobe. Heqja e kësaj pike kaq të rëndësishme, vë në vështirësi të mëdha likuiditeti kompanitë. Vendosja e një garancie bankare, lejon që kompanitë private të mos vuajnë nga mungesa e likuiditetit, në një kohë që procese të tilla vazhdojnë me vite në gjykatat tona.

Box

Sipas statistikave gjyqësore, apelimet, përfshirë apelimin administrativ dhe sidomos apelimin gjyqësor, zgjasin me vite. Nga 3 deri në 5 apo dhe më shumë vjet, zgjat një proces në Gjykatë për tatime të papaguara. Por zgjatja e procesit në gjykata, tashmë paguhet vetëm nga biznesi, i cili më shumë se tatimet ka nevojë për likuiditet. Por duke kërkuar që të realizojë planet buxhetore, qeveria përdor çdo letër që ka në dorë, duke ndryshuar ligjin sa herë të dojë.

Box

Neni 43 ndryshohet, si më poshtë vijon:

"Neni 43

Detyrimi për pagesë të menjëhershme

1. Para se të paraqiten për apelim në shkallët e apelimit administrativ, tatimpaguesit janë të detyruar të parapaguajnë detyrimin tatimor, pa përfshirë interesat dhe gjobat që lidhen me këtë detyrim.

2. Para se të paraqiten për apelim, në shkallët e apelimit për shqyrtim gjyqësor, tatimpaguesit janë të detyruar të paguajnë çdo gjobë dhe interes, që lidhet me detyrimin tatimor të apeluar.

Neni 43, para ndryshimeve

Detyrimi për pagesë të menjëhershme

Para se të paraqiten për apelim, tatimpaguesit janë të detyruar të parapaguajnë vetëm detyrimin tatimor, pa përfshirë interesat dhe gjobat e mundshme, ose të paraqesin garancitë e nevojshme. Në rastin e garancisë, për periudhën e apelimit llogariten të gjitha interesat.

[Gerrard]

• Rritja në mbi 80 për qind e masës së pagës minimale ka sjellë reagimin e ‘Konfindustrise’ nje rrjet organizatash qe mbron te drejtat e prodhuesve

Rritja e pastudiuar e pages minimale sic ka ndodhur ne vendimin 42 te qeverise ne fund te janarit te ketij viti con ne rritjen e kostos se prodhimit dhe rrzikon falimentimin e biznesit. Reagimi i forte ka ardhur nga ‘Konfindustria’ nje rrjet organizatash qe mbron te drejtat e prodhuesve vendas. Perfaqesuesit e ketij organizmi thone se rritja e kostos se prodhimit vendas ne kushtet e marrveshjeve te tregetise se lire kur mallrat e improtit hyjne me tarifa doganore zero ve ne kushtet e nje konkurence te pabarabarte prodhimin vendas. Krahas kesaj, Gjergj Buxhuku, administrator i Konfindustrise thote se kjo rritje frenon dhe investimet e huaja. Konfindustria propozon rritjen e pages minimale ne masen 25 per qind dhe jo ne kete nivel te propozuar ne vendimin e qeverise. Sipas industrialisteve vendas, vendimi ka dhe mangesi teknike ne formulimin e tij pasi ben kategorizimin vetem te punonjesve te kualifikuar, kurse shumica e punetoreve ne industrite vendase jane te pakualfikuar. Biznesi i industrive vendase kerkon rregullimin e vendimit sipas studimit te sakte te tregut te punes. Vendimi i qeverise nepermjet rritjes se nivelit te pages minimale rrit ne menyre te ndjeshme pagesat e kontributeve shoqerore per mbi 85 kategori dhe profesione te ndyshme punonjesish.

GezetaShqiptare

[Gerrard]

Raportimi i kryetarit te KKRT-se eshte kerkuar javen e shkuar nga komisioneret e medias ne Kuvend, komsisoineret opozitare thane se KKRT duhet te raportoje edhe mbi gjendjen financiare, duke ruajtur fshehtesine e te dhenave bankare, gje qe nuk eshte bere deri me tani.

Kryetari i Keshillit Kombetar te Radiotelevizioneve, Ledio Bianku, do te raportoje para deputeteve te Komisionit parlamentar te Edukimit dhe Mjeteve te Informimit Publik mbi situaten aktuale te mediave elektronike ne vend. Keshtu, paraditen e sotme, ne mbledhjen e ketij komisioni zhvillohet seanca degjimore me kreun KKRT-se, mbi ceshtjen e monitorimit te mediave. Kjo seance degjimore zhvillohet me kerkesen e deputeteve te opozites, por qe me pas u pranua edhe nga ata te mazhorances. Komisioneret e majte kane ngritur nje sere shqetesimesh, te cilet sipas tyre kane te bejne me "luften kunder mediave" qe ka ndermarre qeveria e ne menyre te vecante kryeministri Sali Berisha. Ne mbledhjen e fundit te ketij komisioni, deputete te opozites e kane vleresuar si teper te rendesishem nje raportim te drejtuesit te KKRT-se, Biankut, mbi ngjarjet e fundit. Opozita ka perqendruar sulmet e saj kunder qeverise, sidomos pasi punonjes te Policise Tatimore shkuan ne zyrat qendrore te kompanise "Digitalb", per te kryer nje kontroll. Sipas tyre, ajo vizite ishte teresisht e provokuar politikisht dhe se eshte ne linjen e sulmeve te paprecedente te mazhorances ndaj medias. Po ne mbledhjen e fundit te Komisionit parlamentar te Mediave, deputeti socialist, Alfred Dalipi, ka deklaruar se kunati i kreut te qeverise zoteron nje stacion televiziv, "Mediasat", i cili, sipas tij, nuk i eshte nenshtruar kontrolleve ne institucionit te KKRT-se. Pritet qe kjo te jete nje nder ceshtjet qe do te ngreje me force opozita gjate mbledhjes se sotme. Pakica e majte parlamentare gjate mbledhjes se komisionit mendohet t'i kerkoje llogari kreut te KKRT-se, mbi ate se cka bere ky institucion, nisur nga deklaratat e fundit te kryeministrit Berisha, sipas te cilave "mafia ka krijuar mediat e veta, qe i perdor si megafona dhe hanxhare".

Seanca e paradites se sotme nuk ka te beje me raportin vjetor qe kryetari i KKRT-se, Bianku, do te mbaje ne Kuvend, i cili do te tregoje mbi veprimtarine e ketij institucioni gjate vitit te kaluar. Brenda dates 17 prill, KKRT-ja pritet te depozitoje ne Kuvend raportin e saj vjetor. Ky raport do te diskutohet ne komisionin pergjegjes (Mediave), nga ku do te dale nje projektrezolute. Pas kesaj etape te procedurave parlamentare, Bianku do te paraqitet ne seancen parlamentare te dates 3 maj, ku do te raportoje te njejtin raport dhe ku do te votohet ajo projektrezolute qe do te dale nga komisioni parlamentar.

[Gerrard]

Flet kryetari i sindikatës në Shkodër, Fatmir Smajli

"Mënyra se si qeveria parashikon të vjelë gjobat ndaj biznesit tani po frikëson edhe punëtorët që janë të punësuar në këto biznese", kështu është shprehur kryetari i konfederatës së sindikatave të pavarura në Shkodër, që është dhe një nga sindikata më të mëdha në vend me 6400 punëtorë, jep alarmin se te punëtorët në Shkodër është kthyer pasiguria dhe ankthi nëse bizneset nuk do të kenë mundësi t‘i paguajnë më punëtorët. Në këto kushte, kryetari i sindikatës ka paralajmëruar qeverinë se, nëse kjo vjelje gjobe do të ndikojë te punëtori, atëherë do të nisin protesta dhe greva në mbrojtje të tyre.

Shkodra, qyteti më i madh verior, por me nivelin më të ulët ekonomik në vend dhe me papunësinë më të madhe në shkallë Republike, i është frikësuar më shumë se askush mënyrës se si qeveria ka parashikuar të vjelë gjobat bizneseve. Kjo mënyrë ka të ngjarë që shumë biznese të mbyllin aktivitetet në pamundësi për të shlyer gjoba marramendëse dhe me mijëra punëtorë të mbesin pa punë. Në një prononcim dhënë për gazetën "Shqip", Fatmir Smajli, kryetari i konfederatës së sindikatave të punëtorëve Shkodër, ka bërë publike situatën e frikshme që ka shkaktuar te punëtorët vendimi i qeverisë për vjeljen e gjobave ndaj biznesit.

Kjo mënyrë e vendosjes së gjobave ndaj biznesit a ka pasur efekt te sindikatat e punëtorëve që ju drejtoni?

Që kur qeveria u shpreh se gjobat e vëna do paguhen menjëherë dhe pastaj mund t‘i drejtohen gjykatës, kjo që nuk diskutohet se ka pasur efekt. Ne kemi pasur kontakte çdo ditë me kryetarët e sindikatave në të gjitha ndërmarrjet private. Vihet re se punëtorët ndihen të stresuar dhe të frikësuar, pasi pronarët e bizneseve ku ato punojnë, ndihen të kërcënuar përballë gjobave. Pasi kemi të bëjmë me gjoba që ndoshta një biznes nuk mund t‘i shlyej njëherësh e në këtë mënyrë ata punëtorë rrezikohen të flaken në rrugë. Acarimi që po ndien biznesi në Shkodër po reflektohet te punëtorët e thjeshtë. Fundi, ata që e pësojnë më shumë me këtë që po merr qeveria janë njerëzit e thjeshtë, ata që punojnë për bukën e gojës. Nëse ai i vë një gjobë biznesit, ai biznes ose mbyll aktivitetin ose e kompenson këtë gjobë, duke ulur pagat e punëtorëve.

Sa punëtorë aderojnë në sindikatën e pavarur?

Në konfederatën e sindikatave të pavarura të Shkodrës aderojnë 6400 punëtorë të përfshirë në 224 biznese në 84 kontrata kolektive. Kështu që, sindikata jonë me këtë shifër është sindikata më e madhe në Shqipëri, kemi një numër të madh punëtorësh, për të cilët jemi në mbrojtje të të drejtave të tyre. Duke ditur papunësinë dhe ato pak biznese të mëdha që ka në Shkodër e shohim me shumë frikë vendimin e qeverisë për bizneset.

Po nëse indirekt nga kjo mënyrë vjelje gjobe preken punëtorët, si do të jetë reagimi i Konfederatës?

Ne si gjithmonë kemi ditur të mbrojmë interesat e punëtorëve, ne do të mbrojmë interesat e tyre duke përdorur të gjitha mënyrat, duke filluar nga dialogu dhe më ekstremet, që janë grevat dhe protestat.

[Gerrard]

Reagojnë njerëzit e biznesit që e shohin projektligjin tepër abuziv

Projektligji më i ri për gjobat e tatimorëve ka lënë të pakënaqur edhe biznesmenët durrsakë. Një pjesë e mirë e tyre e konsiderojnë atë arbitrar dhe cenues ndaj ushtrimit të aktivitetit dhe financave të tyre. Të rrezikuara ndjehen të gjitha bizneset, të mëdha e të vogla. Shumë prej pronarëve a përfaqësuesve të tyre, ndërsa reagojnë kundër ligjit të ri, që i detyron të paguajnë qoftë dhe 25 për qind të gjobës para se ta ankimojnë atë, kanë frikë të prononcohen hapur mbi pasojat që do të sillte miratimi i projektligjit të qeverisë. "Ky ligj mund të nxisë tatimorët të ndërmarrin ndëshkime abuzive ndaj nesh. Ne jemi përballur shpesh me ta, por këtë herë synojnë të zyrtarizohen", thotë pronarja e një dyqani veshjesh në Rrugën Tregtare të qytetit bregdetar, duke dyshuar në korrektësinë e zbatimit të tij nga tatimorët. Frika e falimentimit ka mbërthyer një pjesë të mirë të pronarëve të subjekteve, të cilët shpresojnë në mosmiratimin e projektligjit në parlament. "Administrata tatimore duhet të bëjë shumë kujdes që të mos vërë gjoba denigruese për biznesin. Qeveria duhet të jetë bashkëpunuese me bizneset dhe jo t‘i dëmtojë ato", thotë biznesmeni Mustafa Koxhaj. Biznesmenët e tjerë të kontaktuar në Durrës mendojnë se abuzimet me gjobat jo vetëm do të çonte në falimentim biznesesh, por edhe do të rëndonte mbi të punësuarit. "Shteti nuk do të marrë të ardhura, punonjësit e firmave do të hidhen në rrugë, ekonomia nuk do të zhvillohej. Shteti nuk duhet të jetë i interesuar të mbyllë bizneset. Një shtet që mbyt biznesin, e çon atë drejt falimentimit, nuk është shtet për mendimin tim", vazhdon biznesmeni Koxhaj. Parapagimi i gjobave ka tronditur edhe më shumë biznesmenët e vegjël, të cilët ndjehen të pambrojtur dhe parashikojnë një mbyllje të aktivitetit në rast të miratimit të këtij projektligji, që pret të diskutohet së shpejti në Kuvendin e Shqipërisë. Në më shumë se një rast, administrata tatimore është akuzuar nga bizneset për arbitrarizëm dhe abuzivitet. Kjo në fakt është konfirmuar edhe nga statistikat zyrtare të përballjes së sipërmarrjeve dhe tatimeve nëpër gjykata. "Një numër shumë i madh gjyqesh përfundojnë me fitoren e biznesit", thotë Sotiraq Dhamo, ekspert i njohur në fushën e tatimeve. Kjo do të thotë se nga vendimet e gabuara të inspektorëve tatimorë, tendencioze apo jo qofshin këto, kjo nuk ka shumë rëndësi, penalizohen edhe bizneset e ndershme. Çdo biznes ka të drejtë të apelojë për vendimet e taksidarëve në fillim në rrugë administrative dhe më pas në gjykata. Shkalla e parë e apelimit është Drejtoria e Apelimeve pranë Drejtorisë së Përgjithshme të Tatimeve.

[Gerrard]

Skema e re e subvencioneve synon t‘u diktojë fermerëve politikat bujqësore shtetërore, përmes joshjes me mbështetje financiare

Ministria e Bujqësisë, Ushqimit dhe Mbrojtjes së Konsumatorit, njoftoi se gjatë tri muajve të parë të këtij viti në gjithë territorin e vendit janë mbjellë mbi 1 mijë hektarë sipërfaqe e re me pemëtore. Burime nga kjo ministri bëjnë të ditur se granti prej rreth 4,5 milionë dollarësh, i vënë në dispozicion nga buxheti i shtetit, me qëllim nxitjen e fermerëve për të rritur sipërfaqet me vreshta, pemëtore dhe ullinj, po rezulton i suksesshëm. Aktualisht Ministria e Bujqësisë po zbaton një projekt, i cili synon subvencionimin me para në dorë për çdo fermer që mbjell një sipërfaqe më të madhe se tre dynym me vreshta, pemë ose ullinj. Deri më tani kanë përfituar rreth 1 mijë e 700 fermerë në të gjithë vendin dhe shuma e dhënë për secilin prej tyre ka qenë 500 dollarë për çdo dynym të mbjellë.

Ministri i Bujqësisë, Ushqimit dhe Mbrojtjes së Konsumatorit, Jemin Gjana, gjatë një takimi në rrethin e Beratit me fermerë dhe blegtorë të kësaj zone, ku promovoi zbatimin e këtij projekti, tha se deri tani kanë aplikuar 2533 fermerë nga i gjithë vendi për një sipërfaqe 1523 ha vreshta e pemëtore. Nga këto, pas shqyrtimit të kërkesave, mbështetur në udhëzimin e detajuar të MBUMK-së për kriteret, kanë fituar 1704 fermerë, të cilët kanë mbjellë gjithsej 1034 ha me vreshta, pemëtore dhe ullinj.

Burimet e mësipërme bëjnë të ditur se fondi kaloi drejtpërdrejt nga buxheti i shtetit, në banka dhe më pas në llogarinë e fermerëve. Ky rast mbështetjeje mund të konsiderohet i pari lloj subvencioni vertikal, pasi deri më sot janë zbatuar skema subvencioni horizontale. Shembull tipik është ai i naftës pa akcizë për të gjithë fermerët, çka do të thotë se të gjitha subjektet përfitojnë njëtrajtësisht, pavarësisht specializimit dhe efikasitetit të subvencionit, përkthyer në produkt. Ndërsa rasti i subvencionit vertikal lidhet me mbështetjen e grupeve të subjekteve të veçanta që përmbushin kushtet jo vetëm për të përfituar mbështetje nga shteti, por edhe duke e përkthyer këtë mbështetje në rezultate krahasimisht më të larta se subjektet e tjera. Në këtë mënyrë, përmes subvencioneve, shteti u "dikton" fermerëve të kultivojnë ato produkte që mund të konkurrojnë në tregun rajonal apo më gjerë.

Strategjia e munguar

Aktualisht Shqipëria importon produkte bujqësore, por nuk arrin të importojë të tilla. Për pasojë, ekonomia përballet me një bilanc thellësisht negativ. Një handikap që bllokon eksportet shqiptare lidhet me arritjen e standardeve dhe të strukturave që i garantojnë ato. Nga ana tjetër, bujqësisë shqiptare, deri më sot, i ka munguar një orientim gjithëpërfshirës. Në këtë drejtim, shtetit shqiptar nuk i duhet të shpikë gjë, i mjafton të kopjojë ato struktura që sakaq janë të provuara nga Bashkimi Evropian, të cilat sanksionohen edhe si të detyrueshme në kuadër të nënshkrimit të Marrëveshjes së Stabilizim-Asocimit. Duke u vendosur standardet, hapen mundësitë për eksport dhe nga ana tjetër krijimi i strukturave të kontrollit garanton këto standarde, duke krijuar mirëbesim te partnerët. Platforma nuk mund të konsiderohet e plotë, pa u mbështetur prodhimi në mënyrë të orientuar, në mënyrë që t‘i ofrohet fermerit çfarë të prodhojë. Në këtë pikë, ekspertët sugjerojnë "t‘i imponohet fermerit dija e shtetit përmes subvencioneve". Aktualisht, sipërfaqja mesatare e fermave në Shqipëri është 1,1 hektar, çka do të thotë se prodhimi orientohet kryesisht për vetmbajtje, ndryshe për ushqim vetjak. Nga ana tjetër, nuk mundësohet penetrimi i mekanikës bujqësore, si traktorë etj., për shkak të ngastrave shumë të vogla, të rrethuara me gardhe. Në këto kushte, nëse shteti do të ofronte subvencion për fermat mbi 20 hektarë, fermerët do të kishin një arsye të fortë për të bashkuar parcelat e tyre, duke i shndërruar në sipërfaqe të mëdha prodhuese.

Marr nga Gezeta SHqip

[Gerrard]

Sipërmarrja nuk pranon propozimin, nuk ka asnjë efekt lehtësues për biznesin

Gjatë diskutimit të ligjit "Për Procedurat Tatimore" në Komisionin Parlamentar të Ekonomisë, pritet që Ministria e Financave të paraqesë edhe projektin e saj të fundit, por që nga sipërmarrja nuk është pranuar. Propozimi i ministrit të Financave, është për një pagesë me këste prej 25%, pas evidentimit të një detyrimi tatimor, shto këtu gjobat dhe interesat. Pra, ky propozim i lejon biznesit të penalizuar që, pas evidentimit të një detyrimi tatimor nga inspektori i tatimeve, sipërmarrjes i lind e drejta që të paguajë brenda vitit detyrimin ,plus gjobat dhe interesat, me këste prej 25%. Pagimi i këstit sipas projektit, duhet të realizohet një herë në 3 muaj. Edhe ky propozim i bërë nga kreu i Financav, Bode, nuk është pranuar nga ana e sipërmarrjes. Sipas sipërmarrësve, kjo masë e propozuar nga ana e Ministrisë së Financave nuk sjell asnjë lehtësim. "Janë të pakta ato raste, për të mos thënë se nuk ekzistojnë në praktikë, ku çështjet e gjobave të biznesit të marrin një vendim gjykate, brenda një periudhe 12-mujore",- bëjnë të ditur përfaqësues të sipërmarrjes, të përfshirë në diskutimin e këtij ligji. Argumentet që e bëjnë miratimin e këtij ndryshimi tepër të rrezikshëm për veprimtarinë e sipërmarrjes, janë të shumtë. Gjatë dy ditëve më parë, Shoqata e Hidrokarbureve ka bërë të ditur se, "ky ligj nuk duhet të miratohet siç është paraqitur, pasi në eksperiencën e grosistëve të karburanteve, kemi pasur raste vënie gjobe me qindra-miliona lekë, të cilat pas mbarimit të procedurave ligjore të apelimit, kanë dalë të pabazuara ligjërisht. Pra, sikur të kishte qenë në fuqi një ligj i tillë, kompanitë përkatëse automatikisht do të kishin falimentuar". Një situatë e tillë, sipas këtij grupimi biznesi, vlerësohet si penalizuese vetëm për kompanitë që janë të stabilizuara në treg dhe që veprojnë në bazë të të gjitha rregullave dhe ligjeve. Gjithashtu, këto grupime biznesi kanë vlerësuar si një nga rrjedhat më negative të këtij ndryshimi, fuqinë e madhe që merr vendimi i një inspektori tatimor, që me këtë ndryshim merr në dorë fatin e kompanive, me një aktivitet prej miliona dollarësh. "Nëse miratohet ky ligj siç është paraqitur, do të thotë që kompani të konsoliduara, me kapitale në treg, të jenë në dorën e falimentit nga një punonjës tatimor, që mund të jetë i pakualifikuar, i politizuar apo i paguar nga një kompani konkurrente",- kanë bërë të ditur, sipërmarrësit e Sektorit të Hidrokarbureve. Gjatë diskutimit në parim të këtij ligji, një javë më parë në Parlament, deputetët e opozitës janë shprehur kundër, duke e argumentuar se, nëse ai miratohet dhe vihet në zbatim, do të dërgojë drejt falimentimit një numër të madh të bizneseve në vend. Kjo, pasi ligji lejon tatimorët të aplikojnë gjobat ndaj bizneseve, të cilat duhet të parapaguhen apriori, pra, para se të vendosin gjykata nëse janë të drejta. Kundër këtij projektligji, gjatë votimit të tij në parim, kanë votuar kundër edhe deputetë të mazhorancës, si deputeti Spartak Ngjela, ish-ministri i Kulturës dhe Turizmit, Bujar Leskaj dhe ka dhënë votën tij abstenim, deputeti Aleksandër Biberaj. Por, megjithëse zërat kundër këtij projektligji, që në mënyrë të hapur realizohet për të mbushur arkën e buxhetit, janë të shumtë, mazhoranca në Parlament ka miratuar me forcën e kartonëve në parim, ligjin. Gjatës ditës së sotme, pritet që në Komisionin Parlamentar të Ekonomisë të diskutohet nen për nen projektligji "Për Procedurat Tatimore", ku pritet që sipërmarrja të paraqesë edhe një herë pretendimet e saj për projektin.