Lajme ekonomike

[Gerrard]

KESH ndërpret energjinë për 254 familje, në zonën e Vilave Gjermane

Prej disa ditësh KESH ka nisur një aksion për ndërprerjen e energjisë elektrike për të gjithë debitorët. Aksioni i korporatës këtë herë është përqendruar në zonë e Vilave Gjermane, në afërsi të Qytetit Studenti. Kjo zonë ishte piketuar në listën e debitorëve të korporatës. Në këto kushte KESH ka nisur dje ndërprerjen e energjisë elektrike në lagjen "Kolonia gjermane", ku nga 1510 abonentë, që furnizohen nga 17 kabina 966 rezultojnë të jenë debitorë në korporatë ose me lidhje te paligjshme dhe dyfishe. Sipas burime zyrtare nga KESH, dje janë kryer rreth 245 ndërprerje të energjisë elektrike, ndërkohë që debia në total kap shifrën 3.5 milionë lekë. Puna e grupeve të KESH-it ka gjetur mirëkuptim nga një pjesë e abonentëve. Një sërë linjash janë rilidhur menjëherë, pasi abonentët kanë dorëzuar te grupet e punës librezën me vulën që vërtetonte pagesën e sapokryer në arkat e KESH. Niveli i arkëtimeve në këtë rrethinë arrin në 36 %, kurse debitorët arrijnë 63.9%. Aksioni i KESH-it për ndërprerjen e energjisë elektrike për debitorët është shtrirë tashmë në të gjithë vendin. Ky aksion nuk ka kursyer as funksionarë të lartë, të cilët pavarësisht postit të tyre rezultonin të ishin debitorë ndaj KESH-it, ashtu si familjet më të ardhura të ulëta financiare.

[Gerrard]

Konfindustria: Shitja pa fatura tatimore mbjell informalitet për ekonominë

Biznesi i madh kërkon që të gjitha transaksionet tregtare në vend të formalizohen. Konfindustria, me anë të një deklarate për mediat i ka bërë thirrje qeverisë, që të realizojë një aksion ku të gjitha bizneset e vogla që realizojnë edhe transaksionet përfundimtare të mallrave me konsumatorët, të vendosin kasat regjistruese. "Shkak për këtë nismë të ndërmarrë është që të gjitha bizneset të formalizohen në të njëjtin nivel dhe në këtë mënyrë, tatimet do ta kenë të më të lehtë për të mbledhur taksat. Një masë e tillë do të ndihmojë qeverinë që të mbledhë taksat nga poshtë lart, dhe jo e kundërta, siç ka ndodhur deri tani",- ka bërë të ditur gjatë ditës së djeshme, Stefan Pinguli, kryetar i Këshillit Drejtues të Konfindustrisë. Vendosja e kasave dhe lëshimi i faturave tatimore për konsumatorët përfundimtarë, sipas përfaqësuesve të Konfindustrisë, është një masë e domosdoshme që heq të gjitha mundësitë për shmangien e bizneseve nga pagimi i TVSH-së. Vendosja e kasave regjistruese, përveç formalizimit të biznesit në vend, prek në radhë të parë edhe të gjithë qytetarët. Por ekspertët e ekonomisë i druhen ndonjë rritje të çmimeve, që sipas parashikimeve mund të jetë më e vogël se 20% i TVSH-së.

Kush e paguan TVSH

Tatimi mbi Vlerën e Shtuar, megjithëse nuk njihet realisht në shumicën e shitjeve përfundimtare nga ana e konsumatorëve, janë pikërisht këta të fundit që paguajnë edhe vlerën e plotë të TVSH-së, që grumbullohet gjatë gjithë rrugës që bën produkti. Formalizimi i shitjeve me anë të faturave tatimore, si në gjithë vendet e tjera të zhvilluara, vlerësohet i domosdoshëm nga ana e ekspertëve të ekonomisë, që i druhen edhe ndonjë efekti psikologjik në çmime. Për vite me radhë, biznesi i madh ka kërkuar që të formalizohet cikli i shitjes së mallrave me TVSH, nëpërmjet futjes së biznesit të vogël në këtë skemë. Por nga ana e Ministrisë së Financave, është nxjerrë si justifikim për këtë mungesë, pamundësia për kontrollin e të gjitha njësive të shitjes me pakicë, për faturat e lëshuara tek konsumatorët. Për të evituar dështimin edhe të kësaj radhe dhe duke parë edhe interesat e gjerë që përfshin realizimi i kësaj nisme, Konfindustria i është drejtuar me anë të një letre kryeministrit Berisha dhe kryetarit të opozitës, Edi Rama, ku i kërkon që të merren masa konkrete, për të zbatuar këtë projekt të lënë pas dore për shumë vite me radhë.

Projektet e dështuara të kasave regjistruese

Në vitin 1994 qeveria programoi për herë të parë vendosjen e kasave tatimore sipas praktikës fiskale të vendeve perëndimore. Por brenda gjashtë muajve, ato kasa dolën jashtë përdorimit. Në vitet në vazhdim, disa herë tatimorët urdhëruan përdorimin e kasave dhe shumë herë gjobitën dyqanet për mospërdorim të tyre. Por asnjëherë të dhënat mbi xhiron, të regjistruara në kasa, nuk u përdorën për llogaritjen e tatimeve. Aktualisht, Shqipëria e mbledh Tatimin mbi Vlerën e Shtuar në dogana, në rastet e importit ose në pika të tjera të regjistruara të shit-blerjeve. Por shitjet me pakicë, sektori më i rëndësishëm i ekonomisë, nuk i nënshtrohen TVSH-së. Nga llogaritja e nivelit të TVSH-së mbi totalin e konsumit të llogaritur nga Instituti i Statistikave, rezulton se çdo vit humbasin rreth 300 milionë euro të ardhura buxhetore.

Aktualisht, në të gjitha njësitë e tregtimit në vend, nuk shërbehet me fatura tatimore; janë të pakta dyqanet dhe supermarketet që punojnë me kasat, por vetëm për llogari të tyre, pasi askush nuk i kontrollon. Sipas të dhënave nga Drejtoria e Përgjithshme e Tatimeve, një pjesë e madhe e subjekteve e kanë arkën regjistruese, pavarësisht se nuk e përdorin në mënyrë të përhershme. Sipas tatimorëve "edhe për atë kategori subjektesh, e cila në pamje të parë e përdor arkën, nuk ka garanci se detyrimet tatimore i paguan në bazë të xhiros reale që regjistron dhe deklaron, pasi nuk ka institucion të specializuar e të autorizuar për të kontrolluar kujtesën fiskale të arkës regjistruese". Një problem i madh për mungesën e kasave regjistruese është edhe pamundësia e sigurimit të arkave regjistruese, pasi numri i shoqërive që kanë importuar produkte të tilla ka qenë i kufizuar (1-2 të tilla). Kjo, për faktin se shoqëritë para se t'i importojnë arkat regjistruese kërkojnë siguri që do ta shesin mallin, pasi vlera që investojnë është relativisht e madhe dhe nëse arkat ngelen stok i pashitur, bllokohet veprimtaria e ndërmarrjes.

Nëse do të vendoset të ndryshohet sistemi, pra të kontrollohet nga tatimorët kujtesa e arkës regjistruese apo të sistemeve integrale dhe pajisjeve që përdorin subjektet, duhet që tatimorët të vendosin sistemin e licencimit të shoqërive, të cilat do të lejohen të merren me importimin, tregtimin dhe mirëmbajtjen e arkave regjistruese, të cilat do të jenë njëkohësisht përgjegjëse edhe për kontrollin dhe mos prekjen e kujtesës fiskale.

[Gerrard]

Gjatë ditës së djeshme, ka vazhduar që të ndërpritet energjia për debitorët e Korporatës në Tiranë

Gjatë ditës së djeshme, Korporata Elektroenergjetike Shqiptare ka vazhduar aksionin për ndërprerjen e lidhjeve të paligjshme dhe kufizimin e energjisë, për të gjithë debitorët në kryeqytet. Të gjithë atyre që nuk kanë paguar energjinë në lagjet afër qytetit Studenti u është ndërprerë furnizimi, ndërsa nga ana e Policisë Elektrike është bërë e ditur se nuk do të ketë më lidhje të energjisë, nëse nuk paguhet borxhi i prapambetur. Një pjesë e mirë e qytetarëve i janë përgjigjur menjëherë kërkesës së bërë nga ana e KESH, për pagimin e detyrimeve, duke shlyer të gjithë borxhin e prapambetur. Fushata gjatë ditës së djeshme për ndërprerjen e energjisë elektrike është shtrirë na lagjen e njohur si Vilat Gjermane, ku arkëtimet kanë qenë shumë ta pakta. Kjo lagje është populluar gjatë viteve të fundit dhe pjesa dërrmuese janë shtëpi të ndërtuara nga vetë qytetarët, duke krijuar mundësitë edhe për një abuzim në rritje me anergjinë e papaguar. Me emërimin në krye të KESH të drejtorit Gjergji Bojaxhi, duket se aksioni për ndërprerjen e energjisë të gjithë atyre që nuk e paguajnë ka qenë më i vendosur, duke ua prerë energjinë edhe VIP-ve që kishin lidhje të paligjshme, apo që nuk kishin paguar për shkak të pozitave të tyre në administratën shtetërore. KESH, ka vazhduar kontrollet gjatë ditëve të fundit edhe në disa rrethe të tjera të vendit, ku pagimi i energjisë së konsumuar është në nivele minimale. Në krye të kontrolleve të realizuara nga ana e KESH në Shkodër, Elbasan, Gjirokastër, Vlorë, etj., ka qenë vetë drejtori i ri i Korporatës, Gjergj Bojaxhi.

Energjia, humbasin 100 mln USD për 2006

Energjia është kthyer në një nga gropat e mëdha, ku zhduken tashmë qindra milionë euro. Humbjet e deklaruara nga KESH, në masën 100 milionë euro, tashmë janë shtuar edhe me çmimin në rritje të energjisë te bursat ndërkombëtare, në një kohë që vendi, gjatë vitit të fundit është përballur me një krizë të thellë energjetike. Sipas raportit vjetor të Entit Rregullator të Energjisë, për vitin 2006 konsumatorët familjarë konsumuan 52% të energjisë elektrike, ndërsa rezultoi se ata përbëjnë 62% të energjisë së faturuar. Niveli i humbjeve gjatë vitit 2006, arrit në 41.3 %, nga 37% që duhet të ishin. Gjithashtu, gjatë vitit 2006, rezultoi se rreth 70 mijë konsumatorë familjarë dhe jofamiljarë, nuk arritën të pajiseshin me matësat e energjisë elektrike. Drejtori i përgjithshëm i KESH-it, Gjergj Bojaxhi, është shprehur i vendosur për të mos lejuar vjedhjen e energjisë elektrike, lidhjet dyfishe, apo abuzimet me energjinë elektrike në çdo lloj niveli.

Shekulli

[Gerrard]

Sipas ministrit maqedonas të Investimeve të Huaja, nafta nga Burgasi do të vijë në Vlorë më 2011-n

Silvana Sinaj

Një kompani amerikane prenoton 25% të kapacitetit
Tre vendet ballkanike, Shqipëria, Maqedonia dhe Bullgaria, janë tashmë të gatshme për fillimin e punimeve për ndërtimin e naftësjellësit AMBO, që parashikon të sjellë naftën e detit Kaspik drejt Europës Perëndimore. Ndërtimet për këtë qëllim parashikohet të fillojnë në qershor ose korrik të vitit të ardhshëm. Kështu ka deklaruar ministri maqedonas i Investimeve të Huaja, Gligor Tashkoviç, gjatë një takimi pune në qytetin grek të Vuliagmenit. Sipas tij, po të llogaritim se do të duhej një kohë prej 24 deri 39 muajsh që ky projekt të përfundonte, parashikohet që nga viti 2011 nafta e detit Kaspik të mbërrinte nga porti bullgar i Burgasit, në Vlorë. Sipas zyrtarit të lartë të Shkupit, rajoni i Vlorës është më i përshtatshëm se gjithë të tjerët për këtë qëllim, duke qenë se ofron një thellësi të konsiderueshme, gjë që i lejon anijet cisterna, të cilat janë të tonazheve shumë të mëdha, të afrohen në një distancë të përshtatshme nga bregu. Sipas ministrit Tashkoviç, AMBO ofron disa përparësi ndaj naftësjellësit rival, që e sjell naftën nga Bullgaria në Aleksandropulos të Greqisë. Ky i fundit është tri herë më i shkurtër dhe kostoja e tranzitit të naftës është dy herë më e vogël. “Por, ne jemi të sigurt se ky port i Greqisë nuk do të jetë në gjendje të ofrojë vendin e përshtatshëm për t’u ankoruar për tankerët e mëdhenj që transportojnë naftën”, - shtoi ai. Sipas tij, kostoja e parashikuar e naftësjellësit ka arritur në 1,5 miliardë dollarë, si pasojë e shtrenjtimit të tubave të çelikut në tregjet ndërkombëtare.
Prenotimi
Treguesi më i qartë i interesimit të madh për përshpejtimin e realizimit të këtij “korridori” transballkanik të naftës, sipas ministrit Tashkoviç, është fakti që një nga kompanitë më të mëdha amerikane të naftës, që tani është angazhuar të prenotojë një të katërtën e kapacitetit transportues të tij. Ai nuk pranoi të deklarojë emrin e kësaj kompanie.
AMBO është një nga projektet më ambiciozë ndërkombëtarë dhe tashmë të tre vendet nga do të kalojë kanë nënshkruar marrëveshjen përkatëse. KKRRTRSH ka miratuar edhe gjurmën që do të ndjekë në territorin shqiptar ky naftësjellës, duke kaluar në aksin rrugor Qafë-Thanë, Prrenjas, Librazhd, Elbasan, Cërrik, Fier-Shegan, Fier-Novoselë-Vlorë. Gjatësia e tubacionit në tokën shqiptare do të jetë rreth 143 kilometra.
Fillimisht, pas ardhjes në pushtet të qeverisë Berisha, kryeministri shqiptar kishte deklaruar se do t’i propozonte palës amerikane që të rishikojë gjurmën e AMBO-s, për të ruajtur vlerat turistike të bregdetit jugor. Por, kanë qenë vlerësimet e padiskutueshme të ekspertëve të sektorit që e kanë hedhur poshtë ndryshimin e gjurmës. Duke çuar në nënshkrimin e marrëveshjes janarin e këtij viti.

NAFTËSJELLËSI AMBO

Parashikimi i
fillimit të punimeve qershor 2008

Parashikimi i
fillimit të funksionimit viti 2011

Gjatësia 895 km

Kostoja 1,5 mld USD

Kostoja e tranzitit
të një ton naftë/km 9,1 USD

Konfindustria kërkon TVSH dhe kasa regjistruese për biznesin e vogël

Konfindustria kërkon nga qeveria vendosjen e TVSH-së dhe kasave regjistruese dhe për biznesin e vogël, me qëllim luftimin e informalitetit në ekonomi. Kërkesa e Konfindustrisë është nëpërmjet një letre dërguar zyrtarisht z. Sali Berisha, kryeministër i Shqipërisë dhe kryetar i PD-së, si dhe z. Edi Rama, kryetar i PS-së dhe i Bashkisë së Tiranës. Gjergj Buxhuku, administrator i Konfindustrisë, thotë për ”Albania”-n se “kemi vendosur të ndërmarrim nismën strategjike për të luftuar shkakun kryesor të prodhimit të informalitetit dhe evazionit fiskal, mungesës së përçimit të TVSH-së (Tatimit mbi Vlerën e Shtuar) dhe kasave regjistruese në transaksionet tregtare të shitjeve me pakicë, i ashtuquajturi biznes i vogël”. Në hallkën e ndërprerë të mësipërme të pikës ligjore të kontaktit të biznesit me konsumatorët fundorë (qytetarët), sipas Buxhukut “ndodhin pikërisht edhe të gjitha rrjedhjet evazioniste financiare si dhe lindin presionet nga poshtë-sipër për prodhimin e evazionit në të gjithë procesin tregtar”. Konfindustria është e ndërgjegjshme se formalizimi i tregtisë me pakicë nëpërmjet vendosjes së TVSH-së dhe kasave regjistruese është shumë më tepër sesa thjesht një nismë teknike. Duke qenë një veprim që ndryshon rrënjësisht të gjithë bazën fiskale të vendit, ajo prek, përveç biznesit, edhe interesat e gjithë qytetarëve shqiptarë. Kjo do të thotë se për ta përmbushur sa më sipër, duhet me çdo kusht një vullnet i plotë dhe i sinqertë i të gjithë faktorëve politikë të vendit.

Konfindustria, mesazhi për politikën


“Pozita të respektojë me çdo kusht autonominë financiare dhe, mbi të gjitha, masën e të ardhurave të pushtetit vendor, thelbi i decentralizimit të pushtetit, pjesë përbërëse shumë e rëndësishme e shtetit demokratik.
Paketë ligjore sipas standardeve të vendeve të BE-së, ku ndërtimi i Gjykatave Tregtare të pavarura për zgjidhjen e mosmarrëveshjeve ekzekutiv-biznes të jetë pjesë përbërëse”.

Licensat dhe lejet e turizmit, “në sitë” para sezonit

Hotelet dhe restorantet turistike do të inspektohen para fillimit të sezonit turistik. Një grup pune i ngritur nga Ministria e Ekonomisë dhe Energjetikës do të rishikojë të gjitha licensat dhe lejet e turizmit për lejet dhe licensat në Ministrinë e Ekonomisë, duke u koordinuar dhe me ministritë e tjera të linjës. Duke iu referuar kësaj nisme, burime nga Ministria e Ekonomisë dhe Energjetikës bëjnë të ditur se gjatë periudhës maj-korrik, grupi i punës për rishikimin e licencave në Ministrinë e Ekonomisë, Tregtisë dhe Energjetikës, do të rishikojë të gjitha lejet ekzistuese si dhe licencat në Ministrinë e Turizmit, Rinisë dhe Sporteve, si dhe në Ministrinë e Punës, Çështjeve dhe Shanseve të Barabarta. Këto rishikime lidhen me fenomenin e pengesave të ndryshme administrative që vihen re në sektorët e lejeve dhe licensave në tërësi në sektorët e ndryshëm ekonomikë. Duket se problematika më e madhe dhe qëllimi i rivlerësimit të këtyre licensave ka të bëjë me ato në fushën e turizmit. Qeveria ka ndërmarrë disa masa kohët e fundit në lidhje me këtë sektor dhe kësisoj, kërkon t’i bëjë një rivlerësim atyre bizneseve, të cilat janë të licensuara në këtë fushë.
Procedura ligjore
Aktiviteti i licensimit i aktivitetit në sektorin turistik është monopol i shtetit dhe është i rregulluar me rregullatorë të veçantë, e cila është miratuar në vitin 2003. Ligji shprehet qartë, ku thotë se “shtrimi i veprimtarisë turistike akomoduese, si veprimtari profesionale e specializuar, i nënshtrohet licensimit të detyrueshëm. Asnjë subjekt nuk lejohet të ushtrojë veprimtari turistike akomoduese në rast se nuk disponon licensë. Çdo person juridik që dëshiron të ushtrojë veprimtari turistike akomoduese, duhet të pajiset me licensë të lëshuar nga Ministria e Rregullimit të Territorit dhe Turizmit”. Kështu, qeveria, nëpërmjet Ministrisë së Rregullimit të Territorit dhe Turizmit, kontrollon këtë aktivitet. Ushtrimi i veprimtarisë turistike hoteliere (akomoduese) është e drejtë e personit juridik, të regjistruar si shoqëri tregtare në regjistrin tregtar të Gjykatës së Rrethit Tiranë, me objekt veprimtarie “ushtrimin e veprimtarisë turistike hoteliere (akomoduese)” dhe që disponon, në pronësi ose përdorim, njësi akomoduese paraprakisht të regjistruara dhe të cilësuara “turistike”. E gjithë kjo procedurë do të kontrollohet nga grupi i punës.

Investimet e huaja arrijnë në 260 milionë euro
Ndërkohë që në rajon po thithen gjithnjë e më shumë investime në sektorë të tillë si ndërtimi, industria agroushqimore dhe media, në Shqipëri këto biznese nuk janë as në prioritetet e institucionit që kujdeset për të tërhequr investitorët potencialë, “Albinvest”. Vetë kreu i këtij institucioni ka konfirmuar se “Albinvest” synon që të marrë investime në sektorin e shërbimeve dhe të “call-center”, ku mendohet se josh mjaft kostoja e ulët e fuqisë punëtore. Por, ndonëse ky institucion po kujdeset për këta sektorë, deri më sot figurojnë vetëm dy kompani të huaja që kanë investuar në “call-center”.
Banka e Shqipërisë ka konfirmuar se fluksi i Investimeve të Huaja Direkte gjatë vitit 2006, regjistroi 260 milionë euro kundrejt 224 milionë eurove, realizuar në vitin e kaluar. Këto vazhdojnë të jenë një faktor dominues në rritjen e detyrimeve financiare dhe në zhvillimet e transaksioneve kapitale e financiare të vendit. Gjithsesi, investimet e huaja në pjesën më të madhe janë kredi të marra nga qeveria dhe remitancat e emigrantëve.
Sipas BSH-së, flukset hyrëse të Investimeve të Huaja Direkte, janë shoqëruar me flukse të kapitalit në formën e huamarrjes, duke rritur borxhin e jashtëm të Shqipërisë. Lëvrimet e kredive afatgjata dhe atyre të buta nga jashtë, të cilat mbeten një faktor tjetër i rëndësishëm në rritjen e detyrimeve financiare të Shqipërisë me pjesën tjetër të botës, gjatë këtij viti vlerësohen 147 milionë euro, nga të cilat 80% kanë shkuar në sektorin e qeverisë. Rritja e këtyre detyrimeve ka çuar në rritjen e pagesave të ardhshme të borxhit të jashtëm. Njëkohësisht, shërbimi i borxhit të jashtëm për vitin 2006 ka reduktuar detyrimet tona me rreth 55 milionë euro, duke përfaqësuar vetëm 3% të eksporteve tona gjatë vitit 2006, gjë që tregon për një aftësi paguese brenda niveleve të pranuara. Ndërkohë, huamarrja private duket të ketë ngadalësuar ritmet e rritjes së saj. Krahasuar me vitin 2005, rritja e detyrimeve të këtij sektori vlerësohet sa gjysma e fluksit hyrës të një viti më parë dhe zë vetëm 20% të huamarrjes, sipas të dhënave të Bankës së Shqipërisë.

Albania

[Gerrard]

Aksion në zonën përreth Qytetit Studenti

Zona përreth Qytetit Studenti është përfshirë sot në një tjetër aksion të Koorporatës Elektro-energjetike shqiptare për ndërprerjen e energjisë dhe lidhjeve të paligjshme debitorëve. Në lagjen e njohur ndryshe si kolonia Gjermane furnizohen me energji rreth 1510 abonentë, prej të cilëve 966 subjekte janë debitorë të KESH-it, si dhe përdorues të linjave të paligjshme dyfishe. Dëmi financiar i shkaktuar në total ndaj kësaj kompanie nga shpërdorimet e energjisë elektrik pa kriter arrijnë deri në 3.5 milionë lekë. Niveli i arkëtimeve në këtë rrethinë arrin në 36 për qind, ndërsa debitorët arrijnë në 63.9 për qind, një shifër shumë e lartë kjo krahasuar me arkëtimet e mbledhura. Menjëherë pas ndërprerjes së energjisë një pjesë e konsiderueshme e banorëve kanë vrapuar drejt arkave për të paguar faturat elektrike. Ndërkohë që për këto familje KESH, ka bërë në mënyrë të menjëhershme furnizimin e tyre me energjinë elektrike. Një sërë linjash janë rilidhur menjëherë, pasi abonentët kanë dorëzuar te grupet e punës librezën me vulën që vërtetonte pagesën e sapo kryer në arkat e KESH-it. Deri në mesditë janë ndërprerë lidhjet për rreth 245 abonentë ndërkohë që kontrollimi i zonës ka vazhduar deri në orët e vona të darkës.

[Gerrard]

Letër e hapur për Berishën dhe Ramën, kërkohet bashkëpunim mes forcave politike

Konfindustria, Qeveria të ligjërojë vendosjen e kasave regjistruese të biznesit të vogël

Vendosja e Kasave për regjistrimin e xhiros dhe përfshirja e biznesit të vogël në skemën e TVSH-së, do të sjellë uljen e informalitetit dhe evazionit fiskal në ekonominë e vendit. Kjo është deklarata e bërë nga përfaqësuesit e Konfindustrisë, të cilët kanë kërkuar nga Qeveria dhe forcat e tjera politike që të ndërhyjnë për vendosjen e një stabiliteti ekonomik në vend. Në një letër drejtuar Kryeministrit të vendit Sali Berisha konfindustrialistët kanë kërkuar që të ligjërohet vendosja e kasave dhe përfshirja e biznesit të vogël në skemën e tatimeve. Ku faturimi i xhirove të bëra do të sjellë një stabilitet ekonomik në vend. Kryetari i Këshillit drejtues Stefan Pinguli, ka deklaruar se kjo nismë sjell formalizmin e bizneseve në të njëjtin nivel si dhe ul ritmet e larta të informalitetit të tyre. Ndërkohë që biznesi i vogël nuk është përfshirë asnjëherë në skemën e tatimeve.

Efektet

Ligjërimi i vendosjes së kasave dhe tatimit mbi bizneset e vogla do të sjellë uljen e niveleve të larta të informalitetit dhe evazionit fiskla që mbizotëron në ekonominë e vendit. Ndërkohë që do ti jap fund dhe konkurrencës së pandershme që zhvillohet nga subjektet e ndryshme të biznesit. Sipas përfaqësuesve konfindustrialistëve jo vetëm biznesi i madh mund të tatohet dhe i vogli, në mënyrë që të sigurohet një stabilitet ekonomik në vend. Lidhur me ndryshimet e çmimeve që mund të bëjnë bizneset e vogla nëse do të ligjërohet kërkesa, specialistët janë shprehur se kjo nismë nuk do të cenojë interesat e qytetarëve, të cilët edhe sot në mënyrë indirekte paguajnë tatimin mbi të ardhurat e tyre.

Letra

Nëpërmjet një letre të dërguar si Kryeministrit Berisha, ashtu edhe liderit të Opozitës Rama, konfindustrialistët kanë kërkuar që të bashkëpunohet nga të dyja palët mbi këtë çështje. Kemi vendosur të ndërmarrim nismën strategjike për të luftuar shkakun kryesor të prodhimit të informalitetit dhe evazionit fiskal: mungesës së përçimit të TVSH-së (Tatimit mbi Vlerën e shtuar) dhe kasave regjistruese në transaksionet tregtare të shitjeve me pakicë/i ashtuquajturi biznes i vogël. Në hallkën e ndërprerë të mësipërme të pikës ligjore të kontaktit të biznesit me konsumatorët fundore që janë qytetarët, ndodhin pikërisht edhe të gjitha rrjedhjet evazioniste financiare si edhe lindin presionet nga poshtë-sipër për prodhimin e evazionit në të gjithë procesin tregtar”,- thuhej në letrën e dërguar forcave politike.

Përmbajtja e letrës

Bashkëpunimi

Konfindustria është e gatshme të shërbejë si ndërmjetësuese, mes pozitës dhe opozitës për të gjetur mirëkuptimin ndërmjet tyre në përmbushjen e synimit për formalizmin e ekonomisë shqiptare. Konfindustria fton Qeverinë të japi një shembull të vullnetit të mirë për mirëkuptim, duke shtyrë në kohë hyrjen në fuqi të ligjit të penaliteteve për ta bërë pjesë të Paketës Ligjore të mësipërme. Përpara se të prodhojmë ligje për të rritur forcën ndëshkuese, ndaj biznesit, të zhduken shkaqet që e cenojnë atë.

Kushtet

· Të përfshihet në skemën e TVSH-së, edhe biznesi i vogël si dhe të bëhet pajisja e tyre me kasa regjistrimi dhe faturimi për xhirot e realizuara

· Paketë ligjore sipas standardeve të vendeve të BE-së, ku të ndërtohen Gjykata Tregtare të pavarura për zgjidhjen e mosmarrëveshjeve ekzekutiv-biznes

· Pozita të respektojë me çdo kusht autonominë financiare dhe mbi të gjitha masën e të ardhurave të pushtetit vendor.

· Opozita të mos përfitojë politikisht nga kostot, që objektivisht mund të lindin gjatë procesit.

Rezultatet

Vendosja e TVSH-së dhe mbi biznesin e vogël sipas specialistëve do të sjell,

normalizimin e ekonomisë në tërësi, përfshi prodhimin bujqësor dhe blegtoral si hapi pasardhës i procesit. Do të shmangë konkurrencën e pandershme që ka pllakosur biznesin sot. Ndërkohë që nga ana tjetër do të sjellë rritjen në mënyrë të menjëhershme të të ardhurave në Buxhetin e Shtetit. Këto të fundit do të përkthehen në krijimin e mundësive financiare shtetërore për rritjen ekonomike.

[Gerrard]

Risitë në tregun shqiptar

Tirana Bank, sjell dy forma të reja kreditimi për të gjithë konsumatorët shqiptarë, të cilët janë të interesuar të marrin kredi për nevoja të ndryshme p.sh, si zhvillimin e biznesit të tyre dhe kredi konsumatore. Këto forma kredie ofrojnë mundësinë e një shërbimi të shpejtë nga ana e bankës tonë, duke pasur limite kreditimi në kufijtë maksimalë të njohur deri më tani në tregun shqiptar dhe me kushte nga më të favorshmet gjatë procedurës për marrjen e kredisë.

Këto dy forma kredie janë Fast Busines, dhe Home Equity, të cilat paralelisht ndihmojnë klientë me nevoja krejtësisht të ndryshme nga njëri-tjetri.

Kështu Fast Biznes, ofron një linjë kredie, e cila mbështet biznesin e mesëm dhe vogël me kapital qarkullues në limite deri në 50 mijë euro, me një normë interesi në EVRO + 5 % për 12 muaj dhe mund të aplikohet në të tria format e monedhave, Lek, Euro dhe Dollarë. Një nga të veçantat e kësaj forme kredie, është se për të përfituar limitin e saj prej 50 mijë euro, procedurat për aplikimin e një kredie të tillë, janë të shpejta dhe klienti mund të marrë këtë kredi brenda 72 orëve. Kjo ndihmon për rastet emergjente nga ana e klientëve, të cilët kanë nevojë për kreditim të shpejtë sigurisht të pajisur me dokumentacionin e plotë që kërkohet nga banka për këtë lloj kredie, ndërsa për limite kreditimi deri në 5 mijë euro nuk ka nevojë për garanci nga ana e klientit.

Forma tjetër e kredisë Home Equity, është një mënyrë për të mbështetur të gjithë ata konsumatorë që kanë nevojë për kredi, për nevoja nga më të ndryshmet mjafton që të kenë në pronësi të tyre një shtëpi banimi. Risia e kësaj forme kreditimi është se klienti që aplikon është i lirë ta përdorë këtë financim sipas dëshirës dhe nevojave të tij pa qenë i detyruar të japë sqarime të veçanta, por vetëm të provojë kapacitetin e tij ripagues. Është një nga kreditë konsumatore më të mira në tregun shqiptar, e cila ofron interesa tepër të favorshme të njëjta me ato të kredisë për shtëpi mjafton të kesh thjesht hipotekën e një apartamenti.

Përfitimet e kësaj kredie janë të thjeshta dhe shumë të leverdishme për klientët tanë.

1. Interesi në këtë kredi është i njëjtë si në kreditë për shtëpi.

2. Kohëzgjatja e kredisë është deri në 15 vjet

3. Limiti i kreditimit mbi 50.000 EUR

4. Nuk ka nevojë për garanci apo të shpjegojë arsyet e tërheqjes së kredisë, mjafton pronësia e një shtëpie

Limiti i financimit është 50.000 Euro ose ekuivalentet në monedhat e tjera dhe periudha e financimit është deri në 15 vjet.

[Gerrard]

Pergjegjesi per Shqiperine ne qendren e FMN-se ne Washington, Istran Szekely, tha pas nje takmi me presidentin se sistemi aktual i taksave eshte i pranueshem.

Fondi Monetar Nderkomebetar eshte kunder reformes me te fundit te qeverise per taksen e sheshte. Pas takimit me presidenti e republikes, pergjegjesi per Shqiperine ne qendren e FMN ne Washington, Istran Szekely, tha se kjo reforme ne sistemin e taksave nuk eshte urgjente dhe se sistemi aktual ishte i pranueshem. E vetmja takse qe edhe mund te ndryshohet sipas tij eshte ajo e punes. Szekely nuk ka pranuar te komentoje ligjin me te fundit te miratuara nga maxhoarca per sistemin tatimor ose i njohur ndryshe si ligji i gjobave. “Nuk ka nevoje per nderhyrje urgjente se sistemi i taksave eshte ne pergjithesi i mire por ne do punojme gjithnje me qeverine nese ata duan te sigurojne me ne. Ajo qe eshte e rendesishme eshte te ulet taska mbi punen” tha Szekely.

[Gerrard]

Kreu i shtetit vazhdoi konsultimet me përfaqësues të FMN-së dhe Dhomës Amerikane të Tregtisë

Dekretimi ose jo i ligjit të gjobave ndaj biznesit duket se është një nga çështjet më kryesore që shqetëson kreun e shtetit. Për të dhënë një vendim të drejtë dhe në zbatim me Kushtetutën e vendit, Presidenti Moisiu ka vijuar edhe dje konsultimet e tij paraprake me drejtuesit e FMN-së në vendin tonë dhe me përfaqësues të Dhomës Amerikane të Tregtisë. Këto takime të Presidentit Moisiu vijnë pas konsultave të para, që ai ka bërë me këshilltarët e tij dhe me një grup përfaqësuesish të biznesit. Gjatë takimit me drejtuesit e FMN-së, shefin e Misionit për Shqipërinë, Istvan Szekely, dhe përfaqësuesen e përhershme të Zyrës së FMN-së në Tiranë, An-Margaret Uestin, kreu i shtetit shqiptar ka vlerësuar kontributin e FMN-së në drejtim të ruajtjes së stabilitetit financiar në vend, të zhvillimit ekonomik të Shqipërisë, përmes programeve konkrete, takimeve dhe konsultave në nivele të ndryshme. Kreu i shtetit ka vënë në dukje se çështjet ekonomike nuk mund të jenë jashtë vëmendjes së tij, për shkak të rëndësisë së tyre të posaçme për stabilitetin e vendit dhe në këtë drejtim ai ka theksuar se është i angazhuar seriozisht për të nxitur dhe mbështetur bashkëpunimin mes të gjitha strukturave dhe organeve përkatëse në vend. Po kështu, drejtuesit e FMN-së kanë informuar Presidentin Moisiu në lidhje me situatën e përgjithshme makroekonomike, fiskale dhe atë financiare. Gjithashtu, ata kanë vlerësuar interesimin e Presidentit Moisiu për çështjet ekonomike të vendit, procesin e konsultimit dhe të diskutimit, si dhe rolin e tij për gjetjen e konsensusit për sa u përket çështjeve të rëndësishme për zhvillimin dhe konsolidimin e demokracisë shqiptare. Të njëjtën temë diskutimi në lidhje me zhvillimet ekonomike në vend dhe miratimin e ligjeve më të fundit nga qeveria, Presidenti Moisiu e ka diskutuar edhe me anëtarët e bordit të Dhomës Amerikane të Tregtisë në Shqipëri, të kryesuar nga Presidenti i Dhomës, Xhefri Grifin. Sipas njoftimit të bërë nga zyra e shtypit e Presidentit Moisiu, bëhet e ditur se në këtë takim është diskutuar për sa i përket ligjit për procedurat tatimore në Republikën e Shqipërisë. Përfaqësuesit e Dhomës Amerikane të Tregtisë i kanë shprehur Presidentit mendimet dhe argumentet e tyre për këtë ligj, për të cilin mendojnë se duhet të rishqyrtohet në bazë të një dialogu më të gjerë me grupet e interesit, si dhe të partneritetit dhe barazisë së biznesit përpara ligjit. Ndërsa Presidenti Moisiu, nga ana e tij, pasi ka dëgjuar me vëmendje vërejtjet e përfaqësuesve të Dhomës Amerikane të Tregtisë, ka vënë në dukje se do të vijojë konsultimet për sa i përket këtij ligji dhe se vendimi i tij do të bazohet në parimet themelore dhe në frymën e Kushtetutës së Shqipërisë. Nga burime pranë Presidencës mësohet se kreu i shtetit do t‘i vazhdojë ende konsultimet për ligjin ndaj gjobave ndaj biznesit, pasi ai është i interesuar që të dekretojë një ligj në respekt të Kushtetutës; dhe Kushtetuta e përcakton qartë që ligji duhet të jetë i pranueshëm nga të gjithë, për të gjetur hapësira sa më të mëdha zbatimi. Por, deri më tani, vlen të theksohet se ligji i paraqitur nga qeveria dhe i miratuar në Kuvend me mjaft debate nuk është pritur mirë nga grupet e interesit, të cilat janë shprehur se duhet të ketë një ligj për të luftuar informalitetin, por varianti i hartuar nga qeveria nuk është i saktë. Ata i kanë kërkuar Kryeministrit që ky ligj të kthehej, për ta rishikuar dhe rindërtuar, edhe një herë. Po të njëjtën gjë i kanë kërkuar edhe kreut të shtetit gjatë takimit me të, mosdekretimin e ligjit, duke e kthyer atë sërish në Kuvend për t‘u rishikuar edhe një herë, pasi në formën që ka aktualisht ai diskriminon bizneset në vend. Tashmë kreut të shtetit nuk i kanë mbetur edhe shumë ditë për të vendosur nëse do ta dekretojë apo jo këtë ligj.

[Gerrard]

"Taksa e sheshtë, e panevojshme"

Fondi Monetar Ndërkombëtar është shprehur dje se angazhimi i ndërmarrë nga qeveria për vendosjen e taksës së sheshtë është i panevojshëm dhe i nxituar në këto momente. Sipas tij, kjo reformë në sistemin e taksave, pikërisht tani, ishte e panevojshme dhe se sistemi aktual ishte i pranueshëm. Po sipas tij, e vetmja taksë që duhet të ulet është ajo e punës. Këtë koment, shefi i Misionit për Shqipërinë, Istvan Szekely, e ka bërë pas takimit të zhvilluar me Presidentin e Republikës, ku ky i fundit është konsultuar me ta për ligjin e gjobave ndaj biznesit. "Me sa kemi kuptuar në fillim flitet për taksën e të ardhurave personale, nuk mendojmë se është një gjë që duhet të ndryshohet në mënyrë urgjente. Ajo që doja të theksoja është se, nuk mendoj se ka nevojë për ndërhyrje urgjente, sepse sistemi i taksave është në përgjithësi i mirë, por gjëja më e rëndësishme që ne shikojmë është që të ulet taksa mbi punën", është shprehur Szekely. Drejtuesi i FMN-së është shprehur se ata do ta mbështesin KESH-in për përmirësimin e situatës financiare. "Çështja kryesore për ne tani është KESH-i. Duhet të gjejmë një zgjidhje që të stabilizojmë situatën financiare të KESH-it dhe në të njëjtën kohë të mbështesim biznesin dhe ekonominë. Pas takimit me kreun e shtetit shqiptar, shefi i Misionit të FMN-së në Shqipëri nuk ka dashur të bëjë asnjë koment të veçantë në lidhje me ligjin e miratuar nga mazhoranca për ligjin e gjobave ndaj biznesit, pasi ka theksuar se ky ligj është në proces diskutimi.

FMN: Taksa e sheshtë, e panevojshme

Fondi Monetar Ndërkombëtar e ka quajtur të panevojshëm dhe të nxituar angazhimin e ndërmarrë nga qeveria për vendosjen e taksës së sheshtë në janar të vitit të ardhshëm. Shefi i misionit të FMN-së për vendin tonë, Istvan Szekely, tha se sistemi i taksave në Shqipëri nuk ka nevojë për ndryshime rrënjësore urgjente. "Qeveria duhet të mbajë parasysh se çdo vendim që merret, duhet të mos prekë nivelin e të ardhurave buxhetore, pasi në këtë moment buxheti i shtetit nuk mund t‘i lejojë vetes reduktim të të ardhurave", tha Szekely. Këtë deklaratë shefi i misionit të FMN-së e bëri pas një takimi pune që zhvilloi me Presidentin e Republikës, Alfred Moisiu. Edhe këtë herë FMN-ja ka ripërsëritur rekomandimin e vazhdueshëm për uljen e taksave të punës. "FMN mendon se të vetmet taksa ku janë të nevojshme ndërhyrjet urgjente, janë taksat e punës", tha Szekely. Por ndryshe nga të gjitha vendet që kanë aplikuar më parë taksën e sheshtë, qeveria shqiptare nuk ka parashikuar ulje të kontributeve të sigurimeve shoqërore dhe atyre shëndetësore. Projekti i qeverisë për taksën e sheshtë parashikon njësimin në nivelin 10 për qind të tatimit mbi fitimin dhe tatimit mbi të ardhurat personale duke lënë jashtë saj taksat e punës ose, siç njihen ndryshe, kontributet. Në takimin me Presidentin, misioni i FMN-së ka diskutuar edhe për ligjin e gjobave. Në lidhje me këtë pikë, FMN-ja ende nuk ka shprehur ndonjë qëndrim zyrtar, por Szekely tha se do të konsultohet në fillim me të gjitha grupet e interesit dhe më pas do të japë një prononcim publik në lidhje me këtë çështje.