Lajme ekonomike

[Gerrard]

Banka e Shqipërisë prezanton raportin vjetor,

Kriza energjetike që ka kaluar vendi ynë mund të mbartë pasoja të rënda për ekonominë e vendit tonë, kjo për faktin se ky fenomen nuk është menaxhuar në kohën duhur dhe me politikat e duhura. Kështu është shprehur Guvernatori i Bankës së Shqipërisë Ardian Fullani, gjatë prezantimit të raportit një vjeçar, pranë Komisionit Parlamentar të Ekonomisë. Sipas të cilit për këtë fillim viti shtrohet një detyrë emergjente në lidhje me ri kontrollimin e kësaj situate, ku duhet ndërmarrë urgjentisht nga të gjithë aktorët një politikë e re administrimi ndryshe nga ajo që është ndjekur gjatë këtyre 15 viteve. Ndërkohë që për evitimin e pasojave negative të krizës energjetike, sipas Fullanit nuk duhet ndikuar vetëm në administrimin e burimeve aktuale të energjetikës, por të ndërhyhet për të krijuar të tjera alternative. “Zgjidhja sa më e shpejtë e situatës energjetike, do të ketë ndikime pozitive për biznesin shqiptar, për shëndetin e financave publike, si dhe për zhvillimin e qëndrueshëm ekonomik të vendit në krijimin e stabilitetit makroekonomik”,- ka deklaruar Fullani. Ndërkohë në debatin e zhvilluar mes anëtarëve të komisionit të Ekonomisë dhe raportit të paraqitur ka rezultuar, se edhe pse ka pasur rritje pozitive të situatës ekonomike në vend sërish nënshkrimi i marrëveshjes së stabilizimit mund ti japë vonë efektet pozitive. Kjo për shkak të tranzicionit dhe problemeve, me të cilat po përballet ekonomia shqiptare. Ndërkohë që hapi pozitiv është fakti që është ulur kreditimi i Qeverisë pranë Bankës së Shqipërisë.

Të dhëna

·Realizimi i investimeve të huaja në vendin tonë mbetet në nivele shumë të kufizuara për shkak të problemeve, tranzicionit që po kalon ekonomia shqiptare. Për këtë duhen thelluar dhe më tej reformat ekonomike që të shihen efektet pozitive.

·Niveli i lartë i informalitetit në ekonominë e vendit është vënë re dhe në transaksionet e ulëta që bëhen ndërmjet bankave. Pjesa më e madhe e veprimtarive është përqendruar në kryeqytet, në rrethe mungon infrastruktura ekonomike

·Nëse nuk ndërhyhet për përmirësimin e situatës energjetike, kostot e importimit të energjisë mund të bëhen të papërballueshme. Çka sjellin dhe pasoja të tjera negative për biznesin dhe koorporatat prodhuese, që mund të reflektohen në çmime

[Gerrard]

Parashikohet dhe krijimi i Kodit të ri Doganor, për të zbutur sanksionet ndëshkuese tepër të larta

Paketa e re fiskale për përgjysmimin e taksave ndaj biznesit pritet të nisë nga zbatimi në muajin korrik. Kohë në të cilën taksat për subjektet e biznesit do të arrijnë deri në gjysmën e taksës së sheshtë që është sot. Lajmi është konfirmuar dje nga ministri i Financave Ridvan Bode gjatë prezantimit të bilancit tre mujor të zërave të buxhetit. Ashtu si dhe vitin e kaluar, edhe këtë vit në mes të korrikut do të krijohet një buxhet i ri suplementar dhe paketa e re fiskale. Sipas ministrit ky veprim do të behët, pasi në buxhet kanë rezultuar më shumë se 3.6 miliardë lekë tepricë nga shpenzimet e mosrealizuara, ndërkohë që ishte parashikuar krijimi i një deficiti prej 2 milion dollarësh. Ndërsa për paketën e re fiskale ministri është shprehur se përveç lehtësimit të barrierave për subjektet e biznesit është shumë e rëndësishme që për të ulur kufijtë e informalitetit dhe rritjen e zhvillimit ekonomik në vend taksa e sheshtë të ulet dhe më tej. Kështu taksa e sheshtë për bizneset të mos mbetet në kufijtë që është sot 20 për qind, por të operohet me uljen e saj të mëtejshme deri në nivelin 10 për qind është shprehur Bode.

Realizimet

Gjatë prezantimit të raportit ministri është shprehur se pjesa më e madhe e programit është realizuar. “Të ardhurat në tërësi janë realizuar në masën 98 për qind, të programit 3 mujor. Të ardhurat nga tatimet dhe doganat që administrohen nga Ministria e Financave janë realizuar në masën 103.2 për qind të programit, ku rritjen më të madhe dhe ecurinë më pozitive e ka shprehur TVSH – ja, e cila është 10 për qind më shumë nga programi dhe rreth 26 për qind më shumë se e njëjta periudhë e vitit 2006”,- ka deklaruar ministri Bode. Ndërkohë që mosrealizime kanë ardhur nga pushteti vendor, i cili ka realizuar zërat e tij deri në masën 65 për qind. Pjesa tjetër mbetet e pambuluar dhe shkak për këtë sipas ministrit janë bërë pengesat dhe vonesat e paraqitura në konstituimin e këshillave bashkiakë. Në toplistën e ministrive për realizimin e shpenzimeve është renditur Ministria e Transporteve, e cila ka përdorur fondet për përmirësimin e infrastrukturës.

Efektet

Ndërkohë që efektet financiare që do të krijohen si pasojë e përgjysmimit të taksave sipas përllogaritjeve të bëra nga ekspertët mund të arrijnë 7 deri në 8 miliardë lekë. Humbjet e krijuara nga një vendim i tillë është parashikuar që të mbulohen nga përmirësimi administrativ, zgjerimi i bazës së tatueshme, dominimi mbi informalitetin dhe evazionin fiskal dhe përafrimi i taksave me xhiron e vërtetë ekonomike që kanë bizneset. Gjithashtu problematike gjatë raportit situata është paraqitur për investimet e huaja, të cilat në vendin tonë vazhdojnë të jenë në nivele shumë të ulëta. Ndërkohë që do të synohet dhe mbledhja e kontributeve nga Sigurimet Shëndetësor dhe ato shoqërore, të cilat janë renditur në nivele të ulëta.

· Në 1 korrik, nis përgjysmimi i taksave për subjektet e biznesit. Sipas Bodes, është parashikuar arritja e tyre deri në gjysmën e taksës së sheshtë në 10 për qind.

· Paketa e re fiskale, nisin sot diskutimet me përfaqësuesit e Fondit Ndërkombëtar Monetar për detajimin e të dhënave për buxhetin shtesë që do krijohet në korrik

· Do ketë ndryshime në Kodin Doganor për uljen e masave ndëshkuese që renditen në nivele shumë të larta deri në 5-fish më shumë se subjektet e tjera.

· Rreth 800 milionë lekë më pak janë mbledhur nga të ardhurat e kontributeve të sigurimeve shoqërore dhe shëndetësore, të cilat janë realizuar në masën rreth 92 %.

· Thithja e investimeve të huaja mbetet shumë problematike, pasi renditet në nivele shumë të ulëta, shkak është bërë informalititei i krijuar, në sektorë të ndryshëm

· Te ardhurat nga kontributet e sigurimeve shoqërore dhe shëndetësore janë realizuar në masën rreth 92 %, duke pasur një mosrealizim me rreth 800 milionë lekë

Tepricë e buxhetit

Shkak për mosrealizimin e shpenzimeve në kufijtë e përcaktuar dhe për krijimin e suficitit prej 3.6 miliardë lekësh, ndërkohë që ishte parashikuar krijimi i një deficiti prej dy milion dollarësh, është bërë pushteti vendor. “Vonesat e paraqitura në konstituimin e këshillave bashkiakë ka bërë që dhe shpenzimet e parashikuar nga këto subjekte të mos realizohen në masën e kërkuar“,- ka deklaruar ministri Bode. Ndërkohë që fondet e mbetura do të kalojnë për administrim në buxhetin tjetër suplemtar që do të krijohet në korrik, për të mbuluar efektet e ndryshimeve të lindura në disa sektorë të ekonomisë në vendin tonë.

Gezeta Metropol

[Gerrard]

Ministria e Financave eshte duke hartuar nje strategji per ristrukturimin e borxhit, qe biznesi ka ndaj buxhetit. Deri me tani ka nje borxh te grumbulluar ne tatime, rreth 400 milion dollare, ndersa ne dogana detyrimet e biznesit jane 5 milion USD. Nisma e qeverise per ristrukturimin e detyrimeve pritet te krijoje kushte dhe mundesi qe edhe borxhet e prapambetura te trajtohen ne ate forme, qe te shlyhen pa shkaktuar falimentim tek bizneset.

[Gerrard]

Komuniteti i biznesit do te zhvishet edhe nga gjoba paraprake ne dogana, qe eshte 5 here me e larte se ne tatime. Ministri i Financave Ridvan Bode pohoi dje se shume shpejt do merret nisma ligjore, nepermjet te ciles biznesi do te lehtesohet nga penaliteti ne dogana, i cili, sipas kodit te ri doganor, qe u miratua ne vitin 1999, eshte 500%. Po keshtu, ministri i Financave tha se, ekspertet po bejne gati nje strategji, nepermjet te ciles synohet nje ristrukturim i borxheve te vjetra, qe biznesi i ka administrates tatimore dhe doganore. Aktualisht vlera e ketij detyrimi, duke perfshire principalin dhe interesat, eshte 450 milione dollare. “Nisma e qeverise per ristrukturimin e detyrimeve do te krijoje kushte dhe mundesi, qe edhe borxhet e prapambetura te trajtohen ne ate forme, qe te shlyhen pa shkaktuar falimentim tek bizneset”, tha kreu i financave.

Ne kulmin e acarimit te organizatave te biznesit me qeverine per shkak te miratimit te nje ligji per procedurat tatimore qe i denon bizneset te paguajne nje gjobe paraprake para se ceshtja te zgjidhet ne gjykate, ministri i Financave ka publikuar nje sere masash lehtesuese, qe po merren ne favor te ambientit te biznesit. Pervec permiresimeve ligjore, qe do te behen ne procedurat tatimore dhe doganore, do te kete nje pergjysmim te kuadrit te taksave ne gjashtemujorin e dyte te vitit. Taksa e sheshte, qe aktualisht eshte 20 %, do te jete 10 % . Ulja e nivelit te taksave, tha Bode, do te shkoje paralelisht me permiresimin e nivelit te sherbimeve. “Besoj se eshte e domosdoshme te shkojme paralelisht ne te dy krahet, duke zbutur nivelin e taksave, duke forcuar konkurrencen ne treg permes eliminimit te situatave monopol dhe goditjes se evazionit fiskal, formalizimit te plote te ekonomise dhe, nga ana tjeter, duke permiresuar ndjeshem infrastrukturen dhe sherbimet publike qe ofron Shqiperia”, shtoi ministri.

Ulja e barrierave fiskale dhe atyre burokratike per t’u futur ne treg si pakesimi i diteve te regjistrimit nga 40 dite ne 8 dite, aktualisht ne 1 dite, shihen si masa per permiresimin e klimes se biznesit. Gjithashtu, ulja e kostos se hyrjes dhe daljes nga tregu, (cmimeve te regjistrimit, licencave, patentave etj) kane kerkuar forcimin e masave ndeshkimore per ata qe nuk duan t’i nenshtrohen ligjit dhe nuk duan te jene te barabarte me konkurrentet e tyre, deklaroi Bode.

[Gerrard]

Kodi Doganor pritet te ndryshoje, per sa i perket mases se penalitetit ndaj biznesit.

Kodi Doganor, i miratuar ne vitin 1999, i jep te drejten administrates doganore, kur shkelen ligjet, qe te vendosin jo vetem detyrimin, por edhe deri ne 5 fish gjobe dhe te parapaguajne keto taksa para se te filloje procesi i ankimimit ne gjykata. Ne tatime penaliteti qe u miratua para disa ditesh eshte vetem 15 %.

[Gerrard]

Pakesimi i burokracive per regjistrimin e biznesit eshte nje mase tjeter lehtesuese, qe kohet e fundit eshte marre ne favor te biznesit. Nje projektligj per kete qellim, qe ka mberritur ne parlament, parashikon uljen e diteve per regjistrimin e biznesit nga 8 dite ne 1 dite. Permes ketij projektligji eliminohet perfshirja e drejteperdrejte e gjykatave ne procesin e regjistrimit, reduktohet niveli i kapitalit minimal te paguar, si dhe krijohet mundesimi i regjistrimit elektronik.

Tatim- fitimi, pergjysmim ne korrik

Ulja e taksave qe do inkuadrohet ne paketen fiskale te gjashtemujorit te dyte te ketij viti do te vijoje deri ne janar te vitit 2008. Te ardhurat personale per te gjitha kategorite do te behen 10 per qind, qe nga 1 korriku, dhe ulja e tatim-fitimit me 10 per qind do te miratohet ne korrik, por do te hyje ne fuqi ne janar te vitit qe vjen. Ne kuader te takses se sheshte, tatim-fitimi dhe taksa e punes do te ulen ne nivele te konsiderueshme, nderkohe qe Tatimi mbi Vleren e Shtuar nuk do te ndryshoje.

Koha Jone

[Gerrard]

Të gjithë shqiptarët e njohin nën petkun e gjeneralit, të komandantit suprem të forcave të Nato-s që udhëhoqi bombardimet ndaj forcave serbe në Kosovë.

Pas 8 vitesh nga ajo kohë, Wesley Clark rikthehet në Shqipëri me një tjetër uniformë. Atë të këshilltarit ekonomik të kompanisë “Bankers Petrolium Albania”. Kjo kompani që prej 3 vjetësh po realizon një prej projekteve më të mëdha për zhvillimin e sektorit të energjetikës në Shqipëri. Dje, gjatë pritjes së zhvilluar prej saj në hotel “Sheraton”, gjenerali Wesley Clark vuri theksin në ndryshimet e mëdha që ka bërë Shqipëria gjatë këtyre viteve. “Ishte ndjellëse për mua të rikthehesha në Shqipëri. Tirana duket kaq mirë. Rruga nga aeroporti, shpirti dhe vitaliteti i njerëzve janë kaq inkurajues. Gjithçka është kaq ndryshe nga 7 vjet më parë, kur helikopterët e mi “Apash” uleshin në baltë dhe kur mijëra shqiptarë të Kosovës vinin drejt Shqipërisë. Ishte një periudhë e errët për këtë vend, periudhë e errët edhe për Naton, por tashmë gjithçka ka kaluar”, tha Clark. Ai e quajti Shqipërinë partnerin më të rëndësishëm të Natos gjatë bombardimeve në Kosovë, për këtë gjenerali shprehu edhe njëherë falënderimin e tij. “Nato duhet të ndërhynte për të ndrequr një padrejtësi që ju bë Kosovës. Në këtë drejtim Shqipëria ka qenë partner i fortë i yni dhe si amerikan ju falënderoj qe jeni miq kaq të ngushtë të SHBA-së”, tha Klark. Veç kësaj ai u ndal në hapat përpara që ka bërë vendi ynë gjatë këtyre viteve, duke shtuar se Shqipëria është një vend me potenciale të mëdha dhe veçanërisht një popull i madh, i cili po bën përpjekje të dukshme për t’u zhvilluar. “Unë shoh ndryshimet, frytet e sigurisë dhe të punës që është bërë në këtë drejtim. Doja të përgëzoja qeverinë për atë që ka bërë, si dhe të shtoja se tashmë është koha e mundësive unike për Shqipërinë, e cila jam i sigurt se do të dijë t’i shfrytëzojë ato”, u shpreh Clark. Për sa i përket pozicionit të tij si këshilltar ekonomik i “Bankers Petrolium”, ai u shpreh se shfrytëzimi i potencialit të naftës që ka Shqipëria në fushën naftëmbajtëse të Patos Marinzës do të ndikojë në zhvillimin e ekonomisë së saj. Në këtë aspekt, Clark shprehu kënaqësinë që në Shqipëri është rikthyer me këtë detyrë. “Unë isha krenar kur vesha uniformën e ushtarakut dhe tani ndihem krenar që vesh uniformën e Bankers Petrolium”, tha ish-drejtuesi i Natos. Në pritjen e zhvilluar mori pjesë kryeministri i vendit, Sali Berisha, si dhe përfaqësues të organizatave ndërkombëtare dhe biznesit. Kryeministri në fjalën e tij falënderoi ish-komandantin e Nato-s për misionin që realizoi në Kosovë. Nga ana tjetër, Berisha e cilësoi projektin e “Bankers Petrolium” tepër efektiv dhe u bëri thirrje investitorëve të tjerë të huaj të derdhin kapitalet e tyre në vendin tonë. “Nga takimi që pata me presidentin e kësaj kompanie u vura në dijeni për investimin e madh të bërë në këtë drejtim, duke rritur ndjeshëm prodhimin e naftës. Fusha e Patos Marinzës ka një potencial total prej 2 milionë fuçi naftë, por në vendin tonë ke ende shumë fusha të paeksploruara. Ne ftojmë të gjithë investitorët e huaj të vijnë në Shqipëri, pasi në fillim të vitit 2008 vendi ynë do të ketë barrën fiskale më të ulët në Evropë. Për këtë, ne po thjeshtësojmë të gjitha procedurat burokratike”, tha Berisha.

[Gerrard]

Në takimin e parë me kreun e Financave, Ridvan Bode, d përfaqësuesit e FMN-së kanë kërkuar më shumë vëmendje ndaj KESH-it. Konkretisht shefi i misionit të FMN-së për Shqipërinë, Istvan Szekely, ka kërkuar edhe një herë që qeveria dhe KESH-i të hartojnë një strategji konkrete që të përmirësojë situatën e korporatës dhe që të mos vërë në rrezik objektivat finale të buxhetit për këtë vit. Gjatë takimit me misionin e FMN-së, ministri Bode ka theksuar tejkalimin e planit nga doganat dhe tatimet në masën 103.2 %, realizimin e mirë të investimeve me financimet e brendshme, por edhe mosrealizimet e taksës vendore për shkak të zgjedhjeve vendore dhe ndryshimit të këshillave bashkiakë. Misioni i FMN-së po viziton Tiranën për të kryer rishikimin e tretë në kuadrin e marrëveshjeve PRGF/EFF, i kryesuar nga Istvan Szekely dhe përfaqësuesja e përhershme e FMN-së për Shqipërinë, Ann Margret Westin. Misioni do të qëndrojë në Tiranë deri në 8 maj, kur do të ketë edhe një konferencë të përbashkët me Ministrinë e Financave dhe Bankën e Shqipërisë.

[Gerrard]

Tirana bank ka hedhur në dy forma të reja kreditimi për të gjithë konsumatorët shqiptare, të cilët janë të interesuar të marrin kredi për nevoja të ndryshme p.sh, si zhvillimin e biznesit të tyre dhe kredi konsumatore. Këto forma kredie ofrojnë mundësinë e një shërbimi të shpejtë nga ana e bankës, duke pasur limite kreditimi në kufijtë maksimale të njohur deri më tani në tregun shqiptar dhe me kushte nga më të favorshmet, gjatë procedurës për marrjen e kredisë. Këto dy forma kredie janë Fast Business, dhe Home Equity, të cilat paralelisht ndihmojnë klientë me nevoja krejtësisht të ndryshme nga njëri tjetri. Kështu Fast Bisinees, ofron një linje kredie, që mbështet biznesin e mesëm dhe të vogël me kapital qarkullues në limite deri në 50 mijë euro, me një normë interesi në eURO + 5 % për 12 muaj dhe mund të aplikohet në të tria format e monedhave, lek, euro dhe dollarë. Një nga të veçantat e kësaj forme kredie është se për të përfituar limitin e saj prej 50 mije euro, procedurat për aplikimin e një kredie të tillë janë të shpejta dhe klienti mund të marrë këtë kredi brenda 72 orëve. Kjo ndihmon për rastet emergjente nga ana e klientëve, të cilët kanë nevojë për kreditim të shpejtë. Forma tjetër e kredisë Home Equity është një mënyrë për të mbështetur të gjithë ata konsumatorë që kanë nevojë për kredi, për nevoja nga më të ndryshmet mjafton që të kenë ne pronësi të tyre një shtëpi banimi. Risia e kësaj forme kreditimi është se klienti që aplikon është i lirë ta përdorë këtë financim sipas dëshirës dhe nevojave të tij pa qenë i detyruar të japë sqarime të veçanta, por vetëm të provojë kapacitetin e tij ripagues. Është një nga kreditë konsumatore më të mira në tregun shqiptar, e cila ofron interesa tepër të favorshme të njëjta me ato të kredisë për shtëpi mjafton të kesh hipotekën e një apartamenti. Interesi në këtë kredi është i njëjtë si në kreditë për shtëpi. Kohëzgjatja e kredisë është deri ne 15 vjet. Limiti i kreditimit mbi 50.000 EUR.

[Gerrard]

Raiffeisen International” dhe RZB Group janë nderuar “Banka më e mirë në vendet e Evropës Lindore dhe Qendrore”. Revista e mirënjohur “Global Finance” nderon me çmimin “Banka më e mirë” 3 banka të rrjetit të “Raiffeisen International”. Kështu ky çmim është dhënë për rrjetin e bankave “Raiffeisen” në Shqipëri, Bosnjë dhe Hercegovinë, si dhe Serbi. “Global Finance” i ka dhënë çmimin si “Banka më e mirë” në Shqipëri për vitin 2007 “Raiffeisen Bank”. Çmimet lokale si “Banka më e mirë” iu dhanë edhe bankave të rrjetit “Raiffeisen International” si: Bosnia dhe Hercegovina (“Raiffeisen Bank d.d.”), si dhe Serbi (“Raiffeisenbank a.d.”). Botuesit e “Global Finance” me të dhëna nga analistë industrie, ekzekutivë korporatash dhe konsulentë bankarë, e bazuan vendimin e tyre në faktorë si: rritja e aseteve, fitueshmëria, shërbimi i klientit, çmimet konkurruese dhe produktet e reja. “Eshtë një kënaqësi e veçante të marrësh një vlerësim të tillë nga një institucion botëror dhe me reputacion të njohur si “Global Finance”. Viti 2006 ishte një vit transformimesh për “Raiffeisen Bank” sh.a. Unë jam krenar të them që shndërrimi nga një bankë shtetërore kursimesh në një bankë tregtare që ofron të gjitha shërbimet është pothuajse i përfunduar. Mund të konfirmoj që portofoli i kredisë u rrit ndjeshëm duke na çuar ne në numrin një në tregun e kredidhënies dhe ne presim rritje të konsiderueshme për vitin 2007 në të gjitha segmentet e tregut”, ka deklaruar Steven Grunerud, drejtor Ekzekutiv i ‘Raiffeisen Bank’ në Shqipëri.
“Ne kemi identifikuar bankat që u sigurojnë shërbim korporatave, duke shfrytëzuar mundësitë thelbësore për rritje, nganjëherë në mjedise sfiduese.”, u shpreh Joseph D. Giarraputo, redaktor dhe president i “Global Finance”. “Global Finance’ që këtë vit feston 20-vjetorit e publikimit të saj të parë ka më tepër se 250.000 lexues në më shumë se 160 vende, duke synuar veçanërisht në investitorët e portofolit dhe analistët financiarë. “Raiffeisen Bank” në Shqipëri është pjesë e “Raiffeisen International”. Ajo është banka më e madhe në vend dhe ka rrjetin më të gjerë të degëve.