Lajme ekonomike

[Gerrard]

Nuk është ligji në vetvete aq sa kanë qenë debatet e nxehta për të në mediat e ndryshe ato që i kanë futur frikën biznesit në Kukës. "Ky po fik shpresën për progres", thonë një numër tregtarësh për Kryeministrin. Të tjerë i kujtojnë atij taksën e sheshtë dhe 10 përqindëshin e TVSH-së. Ligji mbi vjeljen e gjobave përpara apelimit ka ngjallur reagime të ndryshme në mesin e biznesmenëve në Kukës. Në tërësi, shumica e personave që pretendojnë se bëjnë biznes në Kukës as njohin ndonjë detaj të ligjit dhe përgjithësisht vepron mbi baza informaliteti. Tregtarë mielli dhe fruta-perimesh kujtojnë masat e ndërmarra muajt e fundit në doganën e Morinit, ku malli që hynte në emër të pakicës, tashmë taksohet dhe në tregun e Kukësit janë rritur çmimet menjëherë më 15 deri 25 për qind. Një tregtar i elektro-shtëpiakeve dhe i një linje prodhimi ku ka dhjetëra të punësuar, thotë se është i zhgënjyer me masat e fundit të qeverisë. "Kur prishen marrëdhëniet korrekte, atëherë nuk ka më progres edhe sikur ato gjoba të ishin shpëtimi kombit shqiptar, aty nuk ka më biznes", thotë Muharrem D., një tregtar i cilësuar si i mesëm dhe që merret me tregti prej një dekade e gjysmë. Ndërkohë, drejtues të Dhomës së Tregtisë, ndonëse shprehen për ligjin në parim, shfaqin një shqetësim tjetër, frikën e abuzimit me ligjin nga ana e tatimorëve. "Segmente të caktuara të administratës së shtetit, ku hyjnë edhe tatimorët, shprehin nivelin më të ulët të mundshëm në kuptimin profesional", tha një drejtues i Dhomës së Kukësit, i cili shtoi se "ne nuk kemi asnjë siguri se ata nuk do të abuzojnë. Nga ana tjetër, qeveria do të kish bërë mirë të plotësonte së pari programin e vet për Taksën e Sheshtë, si dhe 10 përqindëshin e TVSH-së, pra të vepronte paralelisht në dy drejtimet, krahas hartimit gjithashtu paralelisht, të një ligji mbi masat penale ndaj abuzuesve të ligjit të gjobave". Drejtuesi i DHTI-së kujton faktin se në Shqipëri janë tepër të rralla dënimet ndaj personave të administratës shtetërore, kur është vërtetuar se ata kanë abuzuar me ligjin. "Kush u dënua në Shqipëri për abuzim me ligjin? Abuzuesit kanë marrë vetëm masa qesharake dhe janë ricikluar edhe më të rrezikshëm", tha ai. Por, ai u shpreh se në parim nuk i trembej ligjit të gjobave. "Së pari, dua garanci se çdo dëm i shkaktuar ndaj biznesit tim, me fitimin e munguar etj., do të me kompensohet, nëse drejtësia vërteton abuzimin e tatimorit, më pas dua garanci, që ai lloj harbuti të dënohet penalisht dhe jo të riciklohet, atëherë jam dakord", tha një përfaqësues tjetër i Dhomës së Tregtisë dhe Industrisë.

[Gerrard]

Në Dhomën e Tregtisë dhe Industrisë së Vlorës nuk është paraqitur zyrtarisht asnjë ankesë në lidhje me ligjin e miratuar dy ditë më parë për parapagimin e gjobave tatimore. Kreu i Dhomës së Tregtisë dhe Industrisë së Vlorës, Edmond Leka, është shprehur se ligji i gjobave ndaj biznesit është i padrejtë, ndërsa së shpejti do të ketë reagime ndaj biznesit, edhe pse zyrtarisht nuk është paraqitur asnjë kërkesë ndaj tyre. Ndërsa një pjesë e biznesmenëve vlonjatë qëndrojnë krejtësisht indiferentë përpara këtij ligji, shumë të tjerë thonë se në rastin e një tatimori të papërgjegjshëm, apo të nxitur nga shkaqe të konkurrencës, mund të abuzohet lehtësisht me këtë ligj. Ndërsa në Drejtorinë e Tatim- Taksave në Vlorë, kreu i këtij institucioni është shprehur se pavarësisht ndonjë ankese nga ndonjë biznesmenë, ligji do të zbatohet me korrektësi dhe se abuzime nga tatimorët nuk do të ketë në asnjë rast. Biznesmenë të ndryshëm shprehen kundra ligjit të parapagimit të gjobave tatimore nga ana e biznesit, por pa dhënë argumente për këto kundërshtime. Ligji i ri ndryshon mënyrën e pagesës së gjobave tatimore, duke detyruar biznesin të paguajë 15 për qind të gjobës së faturuar, përpara se të bëjë ankimimin në rrugë gjyqësore.

[Gerrard]

Në prag sezonit turistik, hoteleria ka ndjerë nevojën e marketingut të Sarandës si produkt turistik dhe të orientimit të flukseve turistike që pritet të vijnë. Për këtë hotelet më cilësorë janë përfshirë në përballimin e shpenzimeve financiare të një harte turistike, e cila do ta bëjë lehtësisht të lexueshme Sarandën në mundësitë që ajo ofron jo vetëm për akomodim, por edhe për guidimin nëpër pikat më tërheqëse të vizitueshme. Realzues të hartës turistike, që gjendet tashmë në proces përfundimtar janë një grup njerëzish me eksperiencë në fushën e menaxhimit të turizmit, të kryesuar nga intelektuali Ibrahim Barjami. Harta turistike është e formatuar në llojin e një guide të shpejtë me elementët që u interesojnë më tepër vizitorëve vendas e të huaj, duke u treguar atyre ku dhe si gjenden hotelet, pikat më interesante të pelegrinazhit turistik, çfarë nuk duhet humbur gjatë një guide të shpejtë, një apo disaditore, në rajonin më turistik të jugut shqiptar. Në përmbajtjen e hartës turistike, që mban titullin "Guida ime", vizitorit vendas dhe të huaj i lehtësohet mundësia e akomodimit dhe e shëtitjes në vendet më atraktive, duke nisur me Butrintin dhe Kalanë e Lëkurësit, me bazilikën dhe sinagogën e Sarandës, me Syrin e Kaltër, manastirin e 40 Shenjtorëve dhe atë të Mesopotamit etj. Harta turistike 2007, e mundësuar nga sponsorizimi i biznesit më të interesuar në fushë të hotelerisë, botohet në 5 mijë kopje.

Gazeta Shqip

[Gerrard]

Kjo ka sjellë për pasojë, jo vetëm pagimin e taksava për këto biznese, por edhe regjistrimin e punonjësve dhe pagimin e kontributeve të sigurimeve shoqërore për të paktën mbi 50 mijë vetë



Bizneset e reja të regjistruara gjatë një viti në zyrat e degëve të tatimeve të vendit kanë arritur në njëzet mijë e pesëqind. Një mijë e gjashtë qind biznese të reja të regjistruara këtë vit janë biznese të mëdha, çka do të thotë se janë biznese që paguajnë tatim mbi vlerën e shtuar. Drejtoria e Përgjithshme i Tatimeve bën me dije se, të gjitha këto të dhëna janë pasojë e punës së kryer nga administrata e tatimeve në kontrollin ndaj bizneseve, duke kërkuar zbatimin e ligjit. "Ne kërkojmë mirëkuptimin e biznesit të vogël për t'u regjistruar pranë organeve tatimore, pasi jemi të vendosur për të ndaluar lojën e pandershme, e cila nxit evazionin fiskal dhe informalitetin", - thonë specialistë të administratës. Numri i bizneseve të vogla, të regjistruara pranë organeve tatimore arriti në mbi pesëdhjetë e pesë mijë, në fund të muajit tetor, pas kontrollit të inspektorëve tatimorë, ndërsa numri i tatimpaguesve të mëdhenj ose "VIP" arriti në 830. Në numrin e madh të bizneseve të reja, të regjistruara në zyrat e tatimeve gjatë gjithë vitit këtij viti dominojnë bizneset që më parë nuk ishin të regjistruar asgjëkundi dhe nuk paguanin tatime, por gjithsesi kanë ekzistuar. Një numër prej pesëmbëdhjetë përqindësh prej tyre u përket bizneseve që janë çelur rishtas këtë vit. Saktësisht, ky numër mendohet prej specialistëve të administrarës së tatimeve mund të shkojë deri në katër mijë biznese të reja. Numri i bizneseve të reja që nuk kanë qenë më parë është më i lartë sesa mesatarja e viteve të shkuara. Shqipëria ka patur një ritëm të bizneseve të reja që shtoheshin për vit me rreth një mijë, por këto të dhëna, për shkak të informalitetit të lartë nuk janë të provuara. Të dhënat thonë po ashtu se, për herë të parë, plani i mbledhjes së të ardhurave për biznesin e vogël, si dhe taksën nacionale është realizuar në masën 100%. Sipas tyre, gjatë dy muajve të parë të këtij viti ka patur një rritje të regjistrimit të biznesit të vogël pranë organeve tatimore. Regjistrimi i biznesit pritet të rritet, për shkak të një ndryshimi të bërë nga Këshilli i Ministrave, për uljen e detyrimit tatimor për shitësit ambulantë, nga 75 mijë lekë në vit, në 800 lekë. Regjistrimi i një numri të tillë të lartë biznesesh brenda një viti, duket të jetë një nga lajmet më të mira në lidhje me betejën e nisur për formalizimin e ekonomisë. Deri vitin e shkuar, një mijë e gjashtëqind biznese të mëdha nuk ka paguanin tatim mbi fitimin, pasi ato ishin të regjistruara si biznese të vogla dhe po ashtu, rreth njëzet mijë biznese të vogla nuk paguanin tatim të biznesit të vogël, pasi nuk ishin të regjistrura askund. Kjo ka sjellë, për pasojë edhe mosregjistrimin e punonjësve dhe mospagimin e kontributeve të sigurimeve shoqërore, për të paktën mbi pesëdhjetë mijë vetë.

[Gerrard]

Guvernatori i Bankës së Shqipërisë, Ardian Fullani, së bashku me zv/ministrin e Financave, Shrefedin Shehu edhe drejtorin e KESH-it, Gjergji Bojaxhi, morën pjesë në Mbledhjen e Pranverës të Fondit Monetar Ndërkombëtar dhe të Grupit të Bankës Botërore në Washington. Sipas burimeve të BSH-së, gjatë qëndrimit të tij në SHBA, guvernatori i BSH-së, Fullani, mori pjesë në tryezën e rrumbullakët "Mbi stabilitetin financiar", të organizuar nga Banka e Francës, ku ishin të pranishëm shumë guvernatorë të bankave qendrore europiane dhe përfaqësues të lartë të FMN-së si dhe zhvilloi takime të shumta me përfaqësues të lartë të FMN-së, BB-së dhe Rezervës Federale. Në të gjitha takimet, nga të dyja palët u vlerësuan marrëdhëniet shumë të mira ndërmjet FMN-së dhe autoriteteve të Shqipërisë, ndërkohë që diskutimet u fokusuan në çështje që kanë të bëjnë me politikën monetare, politikën fiskale, stabilitetin financiar, reformat strukturore në ekonomi si dhe prespektivat e zhvillimit të vendit.

Përfaqësuesit e lartë të FMN-së vlerësuan rolin e Bankës së Shqipërisë në drejtim të ruajtjes së stabilitetit makroekonomik dhe monetar të vendit, veçanërisht në kontrollin e inflacionit në nivelet e synuara 3 për qind si edhe për masat e ndërmarra në drejtim të konsolidimit të sistemit bankar. Gjatë këtyre takimeve u diskutua gjerësisht vazhdimi i programeve të asistencës teknike që FMN-ja do t’i japë Bankës së Shqipërisë. Kjo asistencë do të konsistojë në fushat e zbatimit të politikës monetare, të ruajtjes së stabilitetit financiar dhe të fuqizimit të mbikëqyrjes bankare, të përmirësimit të funksioneve të auditit, të administrimit dhe miradministrimit të borxhit publik, si dhe të përmirësimit cilësor dhe sasior të statistikave. Në kuadër të takimeve me përfaqësues të lartë të BB-së u zhvilluan diskutime intensive me znj. Orsalia Kalantzopoulos, drejtore rajonale për Europën Juglindore, z. Giovanni Majnoni, drejtor ekzekutiv për Shqipërinë dhe personalitete të tjera të larta.

[Gerrard]

Grupet e Antikontrabandës pranë Drejtorisë së Përgjithshme të Doganave kanë ushtruar kontrolle të vazhdueshme në të gjitha pikat doganore në vend gjatë datave 9-15 prill. Sipas burimeve të kësaj drejtorie, nga kontrollet e grupit të A/Kontrabandës në Doganën e Kakavijës janë sekuestruar 50 steka me cigare të markës "Murat", të pajisura me pulla greke në automjetin me targa YHB5778. Ndërsa, në autobusin e linjës Tiranë-Athinë me targa TR6645M u gjetën 3 kuti kartoni me artikuj kozmetikë të padeklaruara të cilat u sekuestruan. Grupi i Antikontrabandës në pikën doganore të Hanit të Hotit ka sekuestruar 100 steka cigare të markës "Marlboro" pa pullë fiskale.

Nga kontrollet e kryera në pikat e tjera doganore grupet e A/Kontrabandës kanë vendosur gjatë kësaj jave gjoba për shmangie të deklarimit në vlerë dhe sasi nga subjekte të ndryshme, në një vlerë totale prej 2767847 lekësh.

Gjithashtu, subjekti "EMI TRANS" me konfeksione nga Turqia, u penalizua me një vlerë prej 1719976 lekësh, për diferencë në vlerë të mallit të deklaruar, ndërsa subjekti "IN-ALB" me konfeksione të ndryshme u penalizua me një vlerë prej 637408 lekësh për diferenca në sasi të mallit të deklaruar.

Tema

[Gerrard]

Kryeministri ne takimin e dhomave te tregtise, tha se ministria ka nderhyre dhe ligji do te rishqyrtohet dhe do te korrigjohet ne Keshillin e Ministrave

Qeveria terhiqet nga ligji per pagen minimale. Gjate nje takimi me perfaqesues te Dhomave te tregtise dhe industrise ne vend, kryeministri Sali Berisha ka pranuar se ligji do rishikohet duke premtuar kategorizimin e pages ne baze te rretheve. “Vendimi eshte marre pa debat me ju. Eshte keqinterpretuar. Ministria ka nderhyre dhe ligji do te rishqyrtohet dhe do te korrigjohet ne Keshillin e Ministrave”, u shpreh Berisha. Me tej kryeministri theksoi se do te merren te gjitha masat qe te ulet ne maksimum barra fiskale per biznesin si dhe por për t'i çliruar nga barrat burokratike. Kryeministri vlerësoi si shumë të rëndësishme trasformimin e marëdhënieve të autoritetit tatimor me biznesin. "Mbrojtjen e biznesit nga burokracia e mundimshme e këtij autoriteti, do ta ndryshojmë duke investuar në modernizimin e këtij autoriteti. Parimi i vetëdeklarimit, synon dixhitalizimin e këtij proçesi, i cili është një ndihmë reale për biznesin", tha Kryeministri Berisha

BalkanWeb

[Gerrard]

Sterlina është rritur dhe ka kapur nivelet më të larta të saj, kundrejt dollarit, që nga viti 1981, duke arritur në kuotën e 2,010$. Monedha britanike u ngrit mbi 2 dollarë të martën, pasi krejt papritur shifrat e inflacionit në Britani treguan se një rritje e mëtejshme e shkallës së interesit, është shumë e mundshme. Banka e Anglisë, pritet t‘i rrisë interesat deri në 5,5 për qind, më 10 maj dhe do ta bëjë këtë të paktën edhe një herë tjetër gjatë këtij viti. Dollari që më vonë njohu një ngritje të lehtë kundrejt sterlinës, në 2,005, ka shënuar gjithashtu edhe shkallën më të ulët të shkëmbimit kundrejt euros, në dy vitet e fundit. Në fakt, paundi britanik u fuqizua akoma më shumë gjatë minutave të mbledhjes së bordit të Bankës së Anglisë ku dy prej nëntë anëtarëve votuan për një rritje të menjëhershme të interesave. Shifrat zyrtare tregojnë se fitimet e përvitshme janë ngritur në një shkallë vjetore prej 4,6 përqindësh gjatë tre muajve të fundit, çka përbën edhe shkallën më të shpejtë të rritjes në tre vitet e shkuara. Banka e Anglisë është e shqetësuar se mos shkalla aktuale e inflacionit do të inkurajojë punonjësit të kërkojnë paga më të mëdha, gjë kjo që do të çonte në rritjen e tij. Zyra e statistikave shtetërore nënvizoi se rritja në fitimet mesatare vjen tërësisht nga bonuset, por ato mund të kenë ndikim tek inflacioni.

[Gerrard]

Deri tani prane bashkise jane regjistruar 10700 biznese te vogla, nderkohe qe nje vit me pare numri i bizneseve te regjistruara figuronte 12800

Kur ka mbetur vetem nje dite afat per pagesat e taksave vendore bashkia e Tiranes u ka bere thirrje gjithe bizneseve te vogla te kryeqytetit te paraqiten prane sportleve te bashkise te derdhin gjithe detyrimet e nevojshme. Kete vit per here te pare bashkia e Tiranes jo vetem i administron taksat e biznesit te vogel por dhe i mbledh ato. Cdo vonese pas dates 20 prill do te shoqerohet me sanskione perkatese.
Deri tani prane bashkise jane regjistruar 10700 biznese te vogla, nderkohe qe nje vit me pare numri i bizneseve te regjistruara figuronte 12800. Perfaqesues te bashkise thone se do te kontrollojne territorin e tatimpaguesve te kryeqytetit nepermjet policise bashkiake dhe inspektoreve tatimore.
Edhe kete vit llogaritja e tatim fitimit behet mbi bazen e librit te xhiros dhe vetedeklarimit te subjekteve. Nje pjese e biznesit te madh ku i tille figuron cdo biznes qe realizon nje xhiro vjetore mbi 8 miljon leke te rinj eshte kthyer ne biznes te vogel.

[Gerrard]

Qeveria ka shtuar kontrollin për të gjitha kriteret dhe procedurat e vlerësimit dhe shitjes së trojeve të ndërmarrjeve shtetërore.

Në ndryshim përfshihen edhe objektet e veçuara, që i nënshtrohen privatizimit, ose transformimit të tyre në shoqëri tregtare. Sipas projektit të miratuar dje nga qeveria, pritet të rishikohen çmimet e tokave për ndërmarrjet e dhëna para 11 tetorit 2006. Qeveria ndryshoi dje vendimin e saj, që mban datën 11 tetor, duke korrigjuar kështu një akt vetëm 6 muajsh. Sipas Berishës, këto projektligje janë ndërhyrje që bëhen në thjeshtimin e procedurave të privatizimit. Shumica dërrmuese e objekteve që janë për t’u privatizuar janë të vendosura mbi troje pronarësh. Sipas ligjit, ato duhet të dalin në privatizim me të drejtën e parablerjes së pronarit. “Një problem tjetër është edhe rregullimi i procedurës, kur kemi të bëjmë me privatizimin e truallit të objekteve, duke bërë të mundur që këto objekte të paguajnë qiranë e truallit deri në momentin e pagesës së vlerës së plotë të truallit, gjë që më parë nuk bëhej. Po në këto vendime dhe ligje të sjella nga Ministria e Ekonomisë, caktohet Ministria e Financave që të kryesojë verifikimin e sipërfaqeve të truallit të objekteve që janë privatizuar, gjë që rregullon procedurat e funksionimit të këtij komisioni”, theksoi Berisha

Ndryshimi kryesor
Sipas vendimit, “të gjitha dosjet me kërkesa për vlerësim trualli të objekteve të privatizuara, të dërguara nga ish-Agjencia Kombëtare e Privatizimit dhe degët e saj në rrethe, pranë organeve të qeverisjes vendore, sipas vendimit nr.169, datë 13.3.2003, të qeverisë, për të cilat nuk është dërguar vlerësimi i truallit në ish-Agjencinë Kombëtare të Privatizimit, degët e saj në rrethe dhe Ministrinë e Financave, Drejtoria e Administrimit dhe Shitjes së Pronave Publike, deri një ditë para hyrjes në fuqi të vendimit nr.703, datë 11.10.2006, do të kthehen në Ministrinë e Financave, Drejtoria e Administrimit dhe Shitjes së Pronave Publike, për të filluar procedurat nga e para, sipas kërkesave të këtij vendimi”. Me anë të këtij ndryshimi pritet që të rihapet edhe një herë vlerësimi i tokave për shumë ndërmarrje që prisnin privatizimin e truallit. Nga ana tjetër, për verifikimin e sipërfaqeve të marra në privatizimit do të ndërhyjë edhe Ministria e Financave. Sipas vendimit, “Ministria e Financave, Drejtoria e Administrimit dhe Shitjes së Pronave Publike kryeson komisionin e Verifikimit të Sipërfaqeve të truallit të objekteve të privatizuara, që kërkojnë saktësim”.