Lajme ekonomike

[FIERI1]

Pyetje?
Per ne qe jetojme jashte territorit te Shqiperise mund te blejme Bono thesari pa qene prezent atje dhe si veprohet?
Flm per ate qe do jap pergjigje.

[Gerrard]

Pershendetje!!

Mund te kalon ke Bursa dhe ti lexoni se si mund te beni Blerjen. I ke te shpjeguara te gjitha.

Klikoni Ketu

Shpresoj te te ndihmoj, nqs nuk i ke te qarta shpjegimet dhe ke Bursa ateher do ju ndihmoj nga e para se si veprohet dhe si mund te besh blerjen nga jashte vendit.

Me respekt

T-B

[Gerrard]

Miratohet me 66 vota pro projekti i qeversë për parapagimin e penaliteteve nga biznesi. PDK ofroi kompromis me 10 për qind. Rebelohet PBDNJ

Parlamenti ka miratuar pas mesnatës, pikërisht në ora 00.25,
ligjin për gjobat ndaj biznesit, me 66 vota pro, 43 kundër dhe 3 abstenim. Ndërkohë, 16 deputetë nuk morën pjesë në votim. Opozita ka kontestuar votimin, duke e cilësuar atë si të parregullt, pasi kanë votuar edhe deputetë që nuk ishte prezent, duke përmendur konkretisht, Arjan Starovën. Nënkryetari i grupit parlamentar të PS-së, Petro Koçi, deklaroi se mazhoranca ka vjedhur votat e deputetëve. Në seancën e mbrëmshme,
Berisha ka pranuar të tërhiqet nga varianti fillestar i tij në lidhje me
gjobat ndaj biznesit, duke zbritur në nivelin e shumës prej 15%, që një biznes duhet të parapaguajë policinë tatimore. Kryeministri ka ulur "pazarin", pas një presioni të gjatë nga aleatët
e tij në qeveri. Në fakt, parlamenti në orët e vona të ditës së djeshme ka votuar një kompromis mbi kompromisin
që ka propozuar kreu i Grupit parlamentar të Partisë
Demokristiane, Nikollë Lesi.

Të gjithë aleatët e Partisë Demokratike, por edhe deputetë brenda mazhorancës, kanë kundërshtuar ashpër projektligjin e gjobave, të cilin qeveria me arrogancë e ka kaluar në Kuvend. Edhe në seancën e mbrëmshme maratonë të Kuvendit, njëri pas tjetrit, pjesëtarët e koalicionit qeveritar kanë shprehur qëndrimin e tyre kundër projektligjit. Konkretisht, kreu i PBDNJ-së, Vangjel Dule, është shprehur kundër projektligjit, kreu i Grupit demokristian, Nikollë Lesi, është shprehur kundër duke propozuar një variant kompromisi, deputeti i PD-së, Spartak Ngjela, është shprehur kundër, duke kërkuar që biznesi duhet të shkojë detyrimisht në gjykatë për t‘u ankuar. Ndërkaq, Kryeministri Berisha vetëm ka folur kundër informalitetit me fjalë, ndërkohë që realisht atë duhet të fillonte, duke dhënë një shembull, duke ndëshkuar pikërisht rastin "Rrenga", i cili është një rast i pastër informaliteti. Ndryshe nga deputetët e PD-së, të cilët në thelb të diskutimeve të tyre kanë pasur vetëm një fjalë, lufta ndaj informalitetit, deputetët e krahut të majtë dhe aleatët e PD-së kanë kërkuar fakte konkrete se si do të luftohet ky informalitet dhe cili nga bizneset e shkel ligjin, duke vënë në zbatim evazionin fiskal, pasi taksa që ka vendosur qeveria është shkatërruese për biznesin. Kryetari i PDK-së, Nikollë Lesi, ka qenë mjaft i qartë në qëndrimin e tij kundër qeverisë, ai ka paraqitur një amendim për paragrafin 2, të nenit 3, të projektligjit për gjobat ndaj biznesit. Ai ka deklaruar se amendamenti i PDK parashikon që tatimpaguesi është i detyruar të paguaje ose të lërë një garanci pasurore prej 10%. Kreu i Grupit parlamentar të PDK kërkoi që mazhoranca të tërhiqet nga propozimi i saj dhe të miratojë amendamentin demokristian. Në rast të kundërt, tha Lesi, grupi i PDK do të dalë nga salla ose do të votojë kundër. Sipas tij, amendamenti tatimor nuk është ende profesional dhe perëndimor ndaj mbetet për të ndryshuar në aftësinë e saj. Kundër këtij projektligji është shprehur edhe kryetari i PBDNJ-së, Vangjel Dule. Gjatë fjalës së tij në Kuvend, para votimit të projektligjit, kreu i PBDNJ-së ka ritheksuar se Grupi i tij parlamentar do të votojë kundër këtij projektligji, pasi ai penalizon me pa të drejtë dhe biznesin në Shqipëri dhe do të rrisë korrupsionin në administratë. Kundër projektligjit ka qenë edhe deputeti i PD-së, avokati i njohur, Spartak Ngjela, i cili gjatë diskutimit të tij ka theksuar se "politika nuk do regjistrimin e popullatës, sepse duhet të manipuloje zgjedhjet dhe nuk pranon të vendosë sistemin fiskal modern, sepse kjo do të thotë që nuk ka më dogana as për Kryeministrin dhe as për ministrin". Sipas tij, pjesa më problematike e ligjit është pagimi i gjobave jashtë gjykatës. "Duke bërë pagesat në këtë mënyrë, shihet frika që ka politika se nuk e ka gjykata në dorë", është shprehur Ngjela. Ndërkohë që deputetët e opozitës, ashtu siç kanë bërë prej dy javëve, kanë qenë kundër këtij projektligji, por ata janë shprehur dje kundër deklaratave të Kryeministrit, i cili e ka akuzuar opozitës si avokate të informalitetit. Deputeti i PS-së, Erjon Braçe, i ka kujtuar Kryeministrit se duhet t‘u japë fund akuzave pa fakte dhe të japë emra e mbiemra konkret se kush janë avoketërit e informalitetit në parlament. Braçe i ka kujtuar Berishës se është ai personi më informal, i cili jeton në një apartament të padeklaruar. Gjithashtu Braçe i ka kujtuar Berishës t‘u japë fund deklaratave të tilla se ky projektligj është direktivë e BE-së. Ai i ka kujtuar kreut të qeverisë që të japë deputetëve kërkesën e BE që kërkon miratimin e këtij ligji. Qëndrimin e Braçes e kanë mbështetur edhe deputetët e tjerë të opozitës si Malaj, Prifti, Neranxi e të tjerë, të cilët kanë kërkuar që të ndryshohen nenet 2 dhe 3 që janë me diskriminuesit për biznesin. Ndërkaq, kreu i PAD-së, Neritan Ceka, theksoi se qeveria nuk ka moral të flasë për një administratë tatimore të pastër, sepse rasti i Rrengës, është vetëm një dëshmi që tregon të kundërtën. Por, pavarësisht zërit të lartë të opozitës në sallën e Kuvendit dhe partive aleate të PD-së kundër këtij projektligji, Kryeministri ka deklaruar publikisht se kjo është vetëm fillimi i betejës së qeverisë me biznesin. Sekretari politik i PS-së, Ben Blushi, ka akuzuar Kryeministrin se kërkon të fshehë deficitin publik të krijuar nga kriza energjetike me mjete të pandershme, duke hedhur poshtë deklaratat e tij. Blushi theksoi se kur PS-ja të vijë në pushtet do të rindërtojë një klimë të re me biznesin.

Gazet Shqip

[Gerrard]

Pakësohet sasia e parave në treg gjatë tremujorit të fundit të vitit 2006. Ndërkohë e kundërta ndodh gjatë muajve të parë të vitit. Sipas Bankës së Shqipërisë, teprica e likuiditetit që karakterizoi nëntë muajt e parë të vitit 2006, erdhi duke u pakësuar në tremujorin e fundit të vitit. Në këto kushte, për të ruajtur nivelin e normave të interesit, Banka e Shqipërisë vazhdoi ndërhyrjet javore për tërheqjen e likuiditetit të tepërt. Por duke parashikuar mungesën e likuiditetit në muajt e ardhshëm, njëkohësisht vazhdoi injektimin e likuiditetit, sikundër në fund të tremujorit të tretë nëpërmjet instrumenteve të përkohshme (repo të anasjelltë 3-mujore) dhe të përhershme (blerje me të drejta të plota e bonove të thesarit). Thellimi i mungesës së likuiditetit, solli në muajin nëntor ndryshimin e kahut të ndërhyrjes së Bankës së Shqipërisë nëpërmjet instrumentit kryesor, duke filluar injektimin e likuiditetit edhe në bazë javore, krahas injektimit me instrumentet e përkohshme me afat më të gjatë. Sipas BSH, gjatë tremujorit të katërt të vitit 2006, u injektuan rreth 7.50 miliardë lekë nëpërmjet instrumenteve të përkohshme me afat më të gjatë maturimi se një javë dhe rreth 1.7 miliardë lekë, nëpërmjet instrumentit me efekt të përhershëm– blerjes me të drejta të plota të bonove të thesarit. “Ndërkohë që, instrumenti kryesor u përdor për tërheqjen e likuiditetit në vlera mesatare rreth 1.6 miliardë lekë gjatë muajit tetor dhe rreth 0.93 miliardë lekë për injektimin e likuiditetit në tre raste të përdorimit të tij gjatë dy muajve të fundit të vitit”, thuhet në raport.



* 7.50 MILIARDE LEKE
u injektuan gjatë 3-mujorit të fundit të 2006, nëpërmjet instrumenteve të përkohshme me afat më të gjatë maturimi se një javë dhe rreth 1.7 miliardë lekë, nëpërmjet instrumentit me efekt të përhershëm
* 10.55 MILIARDE LEKE
ka blerë BSH gjatë tremujorit të katërt të vitit, me një kurs mesatar prej 93.50 lekë dhe 34.92 milionë euro me mesatarisht 123.45 lekë. Blerjet e BSH, gjatë gjithë 2006 kanë qenë rreth 138 milionë USD në krahasim me rreth 126 milionë USD, në 2005
* 274 MILIONE LEKE
ka qenë vëllimi i blerjeve me Ministrinë e Financave, për tremujorin e fundit të vitit, ndërsa blerjet e valutës nga institucionet e huaja llogariten në 127.55 milionë lekë (IDA
dhe IBRD)

[Gerrard]

Ministria e Punës dhe Çështjeve Sociale, në bashkëpunim me Bankën Botërore, po sheh mundësinë për rritjen e ndihmës ekonomike për personat në nevojë. Sipas burimeve nga kjo ministri, brenda vitit do të përfundojë një studim në bazë të të cilit do të merren edhe vendimet përkatëse. Aktualisht përkrahja sociale është e pamjaftueshme, ndonëse shteti jep jo pak, por 1.6 miliardë lekë për këtë kategori të qytetarëve. Kjo, pasi numri i personave të papunë apo që plotësojnë kushte të tjera për të përfituar ndihmën ekonomike është i lartë. Me këtë ndihmë trajtohen rreth 110 persona në të gjithë vendin. Por ajo është tepër e ulët dhe përftuesve nuk u mjafton as për përballimin e minimumit jetik. Pas përfundimit të studimit dhe nxjerrjes së faturës se sa do t’i kushtojë shtetit në total shtesa për ndihmën ekonomike për kategoritë në nevojë, ajo mund të pësojë rritje, por ata nuk do të mund ta kenë këtë “privilegj” deri vitin e ardhshëm.

[Gerrard]

Qeveria shqiptare ka akorduar një fond prej 25 milionë lekësh, në ndihmë të bizneseve eksportuese për reklamë. Sipas zv/ministrit të Ekonomisë, Eno Bozdo, ky fond bën pjesë në fondin e konkurrencës që qeveria shqiptare do të akordojë përgjatë këtij viti për kompanitë vendase, të cilat do të eksportojnë produktet e tyre për të konkurruar në tregjet e huaja. Qeveria ka dalë në mbështetje të këtyre bizneseve, për të ndihmuar në rritjen e pranisë së tyre në tregjet e huaja. Fondi do të vihet në funksionim të atyre kompanive, të cilat kanë mundësi më të mira për të rritur shitjet e tyre në tregjet e huaja si dhe kanë më tepër nevojë për promovim. Përveç kësaj, institucionet qeveritare, të cilat janë ngritur për të mbështetur këto biznese, do të ndihmojnë për realizimin e promovimit të tyre me anë të konsulencave të ekspertëve si dhe me anë të informacioneve të nevojshme lidhur me mundësitë më të mira për të reklamuar këto produkte. Të gjitha bizneset eksportuese që kanë mundësi për t’u shtrirë në tregjet e huaja si dhe që kanë nevojë reale për reklamim dhe promovim të produkteve të tyre mund të aplikojnë për të përfituar nga ky fond. Bozdo u shpreh se, qeveria ka marrë përsipër të lehtësojë procedurat për aktivitetet që kompanitë vendase do të ndërmarrin në tregjet e huaja, ndërkohë që po zbatohen dhe politika të reja për nxitjen e kokurrencës dhe standardeve të biznesit shqiptar për të rritur eksportet. Ky fond do të shërbejë për t’i bërë produktet shqiptare më të pranishme në tregjet e huaja, në mënyrë që mallrat shqiptare të mund të konkurrojnë në këto tregje. Qeveria ka ndërmarrë një sërë nismash për të mbështetur bizneset eksportuese, të cilat konsiderohen si target prej më të rëndësishmëve në politikat mbështetëse dhe subvencionuese qeveritare. Rritja e konkurrueshmërisë së këtyre kompanive konsiderohet si një sfidë kryesore në zhvillimin ekonomik të vendit, në kushtet e hapjes së tregut rajonal si dhe të tregjeve të BE-së. Në këtë mënyrë, qeveria ka ndërmarrë disa nisma dhe projekte për të mbështetur bizneset eksportuese në fonde dhe grante si dhe me asistencë teknike apo edhe me konsulencë, duke ofruar më tepër informacion mbi tregjet e huaja, në mënyrë që produktet shqiptare të shkojnë në ato pjesë të tregjeve të huaja ku mund të gjejnë hapësirën e duhur për të shtuar shitjet e tyre. Në këtë mënyrë, Ministria e Ekonomisë, në bashkëpunim me agjencinë “Albinvest’ ka ndërmarrë një projekt grantesh për të mbështetur të gjitha bizneset eksportuese me projekte konkrete për të shtuar konkurrueshmërinë e tyre. Targeti i këtyre projekteve janë ndërmarrjet e vogla dhe të mesme, të cilat janë parë si ndërmarrjet me potencialet më të mëdha për të qenë të pranishme në tregjet e huaja.

[Gerrard]

Banka e Shqipërisë njofton se, gjatë tremujorit të katërt të vitit 2006 ka hedhur në treg një sasi prej rreth 9.2 miliardë lekësh, me anë të blerjeve të bonove të thesarit. Prej tyre, instrumentave afatshkurtër u përkasin rreth 7.5 miliardë, ndërsa rreth 1.7 miliard lekë kanë qenë blerje të bonove të thesarit me të drejta të plota. Ndërkohë që, instrumenti kryesor u përdor për tërheqjen e likuiditetit në vlera mesatare rreth 1.6 miliard lekë gjatë muajit tetor dhe rreth 0.93 miliard lekë për injektimin e likuiditetit në tre raste të përdorimit të tij gjatë dy muajve të fundit të vitit. Këto masa, banka i mori për ruajtur nivelin e normave të interesit, duke u nisur nga teprica e likuiditetit e muajve paraardhës si dhe duke parashikuar mungesën e likuiditetit në muajt e ardhshëm, njëkohësisht vazhdoi injektimin e likuiditetit. Gjatë tremujorit të katërt, për investimin e likuiditeteve të lira, bankat përdorën depozitën njëditore, niveli mesatar ditor i së cilës ishte 4.803 milionë lekë. Në kushtet e plotësimit të nevojave në tregun ndërbankar, instrumenti i kredisë njëditore gjeti përdorim minimal gjatë tremujorit të katërt të vitit 2006, rreth 0.7 miliardë lekë në 2 raste përdorimi. Ndërhyrjet e Bankës së Shqipërisë në tregun e brendshëm valutor kanë vazhduar edhe gjatë tremujorit të fundit të vitit të kaluar, duke synuar përmbushjen e objektivit të Rezervës Ndërkombëtare Neto, por edhe shmangien e çrregullimeve të tregut të brendshëm valutor. Ndërhyrjet e Bankës së Shqipërisë kanë qenë përsëri në kahun e blerjes së valutës nga bankat e nivelit të dytë. Këto blerje janë përqëndruar në muajin dhjetor, që karakterizohet nga një ofertë e lartë valute. Banka e Shqipërisë ka blerë gjatë tremujorit të katërt të vitit, 10.55 milionë USD, me një kurs mesatar prej 93.50 lekësh dhe 34.92 milionë euro, me mesatarisht 123.45 lekë.

Blerjet e Bankës së Shqipërisë gjatë gjithë vitit 2006 kanë qenë rreth 138 milionë USD, në krahasim me rreth 126 milionë USD, në vitin 2005.

[Gerrard]

Policia tatimore e rrethit të Fierit ka konstatuar 12 raste abuzive të bizneseve të mëdha, të cilat nuk kanë deklaruar punonjësit e tyre për t’i regjistruar në sigurimet shoqërore. Sipas të dhënave, policia ka gjobitur brenda tre muajve të parë të vitit 12 subjekte të biznesit të madh, të cilët janë vërejtur me shkelje të tilla. Policia tatimore e Fierit ka ndërmarrë gjatë këtyre muajve kontrolle të vazhdueshme për goditur punën e zezë në kompanitë e këtij qyteti. Në konstatimet e bëra gjatë këtyre kontrolleve rezultoi se, 22 punëtorë të këtyre kompanive punonin në të zezë dhe nuk u paguheshin sigurimet shoqërore dhe shëndetësore. Shkeljet e vërejtura kanë qenë më tepër në sektorët e kompanive të veshjeve dhe prodhimit të këpucëve.

Pas ndëshkimit me gjobë, tatimet e rrethit të Fierit kanë bërë automatikisht edhe regjistrimin e këtyre punëtorëve në skemat e sigurimeve shoqërore dhe shëndetësore. Aksionet e policisë tatimore janë përqëndruar edhe ndaj subjekteve që tregtojnë mallra të akcizës, ku gjatë së njëjtës periudhe janë sekuestruar sasi të konsiderueshme cigaresh dhe pijesh alkoolike.

[Gerrard]

Pas projektligjit që pritet të miratohet sot ne parlament qëndron interesi i qeverisë për të mbledhur rreth 3.5 miliardë leke ose 35 milionë dollarë të prapambetura të kompanive private. Drafti, nëse miratohet, lejon qe gjobat te mbahen ne masën 25 për qind qe ne momentin fillestar pavarësisht te drejtës për ankim. Kërcënimi për kompanitë debitorë është lëshuar para disa kohësh nga vete Ministri i Financave, Ritvan Bode, i cili I ka prirë një fushate të rreptë për mbledhjen e borxheve që 100 kompanitë shqiptare që kanë borxhin më të madh.

Detyrimet e papaguara do të fillojnë që nga vitit 1995, por shumica e tyre janë pas vitit 2000. Borxhi doganor që nga viti 1992 deri në vitin 2005 arrin në 5.5 miliardë leke ose 44.9 milion euro. Nga këto, detyrimet doganore arrijnë në 2.337 miliardë lekë ose 19 milionë euro dhe gjoba e penalitete në 2.692 miliardë lekë ose 21.8 milionë euro. Ndërsa, kamatë-vonesat arrijnë në 0.5 miliardë lekë ose 4.1 milionë euro. Katër nga shoqëritë e mëdha të futura në "listën e zeze" janë ndërkohe në proces gjyqësor me shtetin.

[Gerrard]

Sipas një urdhri të nxjerrë nga qeveria shqiptare, ankimimet e palëve në procese gjyqësore, sipas vendimeve të marra nga Administrata Tatimore, duhet të kalojnë të tria shkallët e gjyqësorit, çka përkthehet me plot 5 vjet proces. Ish-ministri i Financave, Arben Malaj, tregon për gazetën se, në rast se ka të drejtë, biznesit do t'i bllokohen paratë për të paktën 5 vjet. "Ndryshe nga Suedia, Gjermania apo edhe vende të tjera të përmendura nga kryeministri Berisha, në vendin tonë, qeveria ka nxjerrë një urdhër, sipas të cilit, ankimimet që bëhen nga palët sipas vendimeve të marra nga Administrata Tatimore, duhet të kalojnë të tria shkallët e gjyqësorit. Kjo bën që një proces gjyqësor të përfundojë për rreth 5 vite, çka do të sjellë një kosto shumë të madhe për biznesin shqiptar dhe atë të huaj",- sqaron ish-ministri i Financave, Arben Malaj. Sipas Malajt, borxhi i keq i përmendur shumë herë nga Kryeministri, nuk është akumuluar brenda një viti, por për 15 vite dhe tani mban vlerën 400 milionë dollarë. Ai shton se borxhi i keq vjetor që biznesi i ka shtetit, nuk është asgjë, krahasuar me dëmin që mund të shkaktohet në rast se biznesit i merret edhe gjoba, së bashku me detyrimin tatimor.